Kut 44
44
1Bwanyima Yosefu akaragiira omubiiki w'eby'eka ye, ati: Ijuza enshaho z'aba bashaija ebyokurya munonga nk'oku barikubaasa kwekorera, kandi ote empiiha ya buri muntu omu minwa y'enshaho ye. 2Haza ote ekikopo kyangye eky'efeeza omu minwa y'enshaho ya murumuna waabo omuto, hamwe n'empiiha ye ei areetsire kushakisa. N'onu yaatwaza nk'oku Yosefu yaamuragiira.
3Ku bwabaire nibutaagurikana, abo bashaija baabaragiira kugyenda n'endogoya zaabo. 4Ku baabaire baagyendaho akaanya kakye baaruga omu rurembo, Yosefu yaagira omubiiki w'eby'eka ye ati: Irooko okurate abo bashaija; haza ku oraabahikye, obagire oti: Ahabw'enki muzimwire ekibi ahabw'ekirungi? Mbwenu ekibaibiise ekikopo kyangye ky'efeeza n'enki? 5Tikyo mukama wangye anyweramu kandi akaragurisa? Mukozire kubi okukora mutyo. 6Nawe ku yaabahikire, yaaba nikwo yaabagambira. 7Baamugira bati: Ahabw'enki, mukama waitu, nootugambira ebigambo biti? Nikikabure itwe abairu baawe kukora ekintu nk'ekyo! 8Mbwenu empiiha zi twashangire omu minwa y'enshaho zaitu, ka tuzikugaruriire, obu turugire omu nsi ya Kanaani? Haza tuza kwiba efeeza nari ezaabu omu nju ya mukama waawe? 9Omuriitwe abairu baawe, ou oraashangye akiine afe, kandi naitwe tube abahuuku baawe, mukama waitu. 10Abagarukamu ati: Mbwenu, ka kibe nk'oku mwagamba! Oraashangwe akiine, niwe araabe omuhuuku wangye, reero imwe abandi nimuba mutaine rubanja. 11Batyo buri muntu ahuumuza ahonaaho enshaho ye ahansi, kandi buri omwe akomoorora enshaho ye. 12Nawe acaaka naatandikira aha z'abakuru naahererukira aha z'abato; haza ekikopo akishanga omu nshaho eya Benyamiini. 13Nabo nikwo kutaagura ebi bajwaire, buri muntu akeekoreza endogoya ye, bakagarukayo omu rurembo. 14Yuda na beene ishe ku baahikire owa Yosefu, baashanga akiriyo, baayetuura ahansi omu maisho ge. 15Na Yosefu abagira ati: ekyo kikoro ki mukozire n'enki? Timurikumanya ngu omuntu nkaanye buzimazima nimbaasa kuragura? 16Yuda amugarukamu ati: Mukama wangye, mbwenu nitukyenda kukugambira ki? Hari ekindi tugambe ki? Nari twetonganire tuta? Ruhanga niwe yaasherembura ekibi ky'abairu baawe! Mbwenu reeba itwe n'ou baashanga aine ekikopo twaba abahuuku baawe. 17Yosefu amugarukamu ati: Nikikabure nyowe kukora ntyo! Kureka omuntu ou baashanga aine ekikopo, niwe araabe omuhuuku wangye. Reero imwe abandi mugyende n'obusingye, mugarukye owa shoimwe.
Yuda okutonganira Benyamiini
18Yuda nikwo kwirira Yosefu haihi, akamugira ati: Mukama wangye, naakweshengyereza ntega okutu nyowe omwiru waawe ngire eki naakugambira. Haza otangirira ekiniga nyowe omwiru waawe. Manya ori nka Faraaho nyakabara. 19Mukama wangye, itwe abairu baawe okatubuuza noogira oti: Mwine shoimwe nari murumuna waanyu? 20Mukama wangye, twakugira tuti: Twine tutaitwe, n'omugurusi; kandi twine na murumuna waitu ou yaazaire yaakuzire. Tuti na mukuru we akafa. Tuti kandi omurumuna ogwo niwe atsigaireho wenka omu b'enda ya nyina; haza ishe naamukunda. 21Naitwe abairu baawe waatugira oti: Mumundeetere, naanye mmureebe. 22Mukama wangye twakugira tuti: Ogwo mwana tarikubaasa kutsigaho ishe, ahabw'okuba ku arikumutsigaho, ishe naafa. 23Naitwe abaheereza baawe waatugira oti: Murumuna waanyu omuto ku ariba ataizire naimwe, timuringaruka mu maisho. 24Ku twagarukireyo ahari tata omuheereza waawe, twamugambira ebi iwe mukama wangye waatugambiire. 25Mbwenu tutaitwe ku yaatugizire ati: Mugarukyeyo mutugurire akokurya; 26twamugira tuti: Itwe titurikubaasa kuzayo, murumuna waitu yaaba atagyenzire naitwe, ahabw'okuba ogwo mushaija titurikwija kumugaruka mu maisho, murumuna waitu twaba tutamwine. 27Tata omuheereza waawe nawe nikwo kutugira ati: Nimumanya omukazi wangye ku yanzaariire aboojo babiri. 28Omwe ku yantsigireho, naagira nti: Buzimazima agaashwirwe, haza okwiha obwo tinkamureebaga. 29Mbwenu ku mwakuunyaka n'ogu, akabi kaamugwera, nk'oku nyine ezi nju, mukandeetera obujune, bumpuhura nza okuzimu. 30Haza ku naakuhika tata omwiru waawe tutaine ogu mwana, nk'oku amagara ge gakwatiraine n'ag'ogu mwana, 31yaareeba tutamwine, naija kufa. Haza itwe abairu baawe niitwe turikuba tureeteire omwiru waawe tataitwe obujune bw'okumuhuhura, akaza okuzimu n'ezo nju ze. 32Manya nyowe omuheereza waawe, niinye naabaire omukwato gw'ogu mwana ahari tata. Nkamugira nti: Taata, ku ndaabe ntamukugaruriire, ekihemu kibe niinye kyagumaho amagara gangye goona. 33Mbwenu, mukama wangye, naakweshengyereza nyowe omuheereza waawe, ba niinye waatsigaza omu mwanya gw'ogu mwana, mbe omuhuuku waawe, naiwe obe mukama wangye; haza we omurekye agarukyeyo na bakuru be. 34Mbwenu shi nimbaasa nta kugaruka ahari tata, ntaine gu mwana? Manya tindikubaasa kwemera okureeba tata naaguubwaho akabi.
Yosefu okwegambira bakuru be
Currently Selected:
Kut 44: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
