Kut 35
35
1Ruhanga akagambira Yakobo, ati: Imuka, oze Beteli, obe niyo waatuura, kandi oyombekyereyo Ruhanga eitambiro, owaakubonekyeire noohunga mukuru waawe Esau.
2Mpaho Yakobo yaagambira ab'omu ka ye n'abandi boona abaabaire bari hamwe nawe, ati: Mweiheho baaruhanga b'abanyamahanga abu mwine, mweyeze mujware ebindi bijwaro. 3Haza twimukye tuze Beteli, mbone kwombekyerayo Ruhanga eitambiro, Ruhanga owampwereire nyine enaku, akaguma naanye hoona ahi naagiire. 4Batyo baaha Yakobo baaruhanga b'abanyamahanga boona abu baabaire baine, n'empeta ezi baabaire bajwaire aha matu gaabo; Yakobo yaaziziika ahansi y'omuvure ogwabaire guri haihi na Shekemu.
5Reero ku baabaire nibagyenda, Ruhanga yaitsa obwoba ab'omu ndembo ezaabaire zibeehinguririize, tibaakurata beene Yakobo bababingire. 6Yakobo atyo yaahika Luuzi (niyo Beteli) ey'omu nsi ya Kanaani, we n'abandi abu yaabaire aine. 7Okwo yaayombekayo eitambiro, kandi ogwo mwanya yaagweta Eli-Beteli, ahabw'okuba aho niho Ruhanga yamweyorekyeire ahungire mukuru we. 8Kandi aho Debora omurezi wa Rebeka niho yaafeereire, akaziikwa ahansi y'omuvure, eifo ya Beteli; nikyo baagweteire omuvure gw'okucuriramu.
9Yakobo ku yaarugire Padanarama, Ruhanga yaagaruka yaamubonekyera, kandi yaamuha omugisha. 10Ruhanga yaamugira ati: Eiziina ryawe ori Yakobo, kwonka tokyetwa Yakobo, kureka noija kwetwa Isiraeli. Nawe nikwo kwetwa Isiraeli. 11Kandi Ruhanga yaamugira ati: Ndi Ruhanga omushoboorozi wa byona; ozaare, okanye; eihanga n'ekimbuuro ky'amahanga maingi garugye omuriiwe, n'abagabe bakomookye omuriiwe. 12Ensi ei naahaire Aburahamu na Isaaka ndyagikuha, kandi ngihe na baijukuru baawe. 13Bwanyima Ruhanga yaamutsiga omu mwanya ogu yaabaire naagaaniiriramu nawe. 14Yakobo yaabyara enyomyo y'eibaare omuri ogwo mwanya gu yaagaaniriiremu nawe; yaagishukaho viino n'amajuta g'omuoliva. 15Yakobo nikwo kweta ogwo mwanya gu Ruhanga yaagaaniriiremu nawe eiziina Beteli.
Okuzaarwa kwa Benyamiini n'okufa kwa Rakeeli
16Batyo baimutsya baaruga Beteli. Ku baabaire bakitsigaizeyo akaanya kuhika Efuraata, Rakeeli yaarumwa, haza yaahangaanirwa. 17Mbwenu ku yaashamatsirwe ebisha, omuzaarisa yaamugira ati: Otatiina, ahabw'okuba hati waaza kuzaara omwana omwojo ondi. 18Mbwenu ku yaabaire naakaba (ahabw'okuba akafa), yaamweta eiziina Benoni, kwonka ishe yaamweta Benyamiini. 19Atyo Rakeeli afa, bamuziika aha muhanda gurikuza Efuraata (niyo Beetelehemu). 20Yakobo abyara enyomyo aha kituuro; niyo nyomyo y'ekituuro kya Rakeeli ekiriyo na hati.
Abaana ba Yakobo
21Isiraeli yaagumizamu orugyendo, bwanyima yaateera eihema rye seeri y'omunaara gwa Ederi.
22Isiraeli ku yaabaire akitwire omuri egyo nsi, Reubeeni yaagyenda yaabyama na Biliha ekinyanshunju kya ishe, haza Isiraeli kyamugwa omu kutu.
Obwo beene Yakobo bakaba bari ikumi na babiri. 23Batabani ba Leeya ni Reubeeni (omujigaijo gwa Yakobo), Simeoni, Leevi, Yuda, Isakaari na Zebuluuni. 24Batabani ba Rakeeli ni Yosefu na Benyamiini. 25Reero batabani ba Biliha omuzaana wa Rakeeli, ni Daani na Nafutaali. 26Kandi batabani ba Zilipa omuzaana wa Leeya, ni Gaadi na Asheri. Abo nibo beene Yakobo abu yaazaariire Padanarama.
Okufa kwa Isaaka
27Yakobo obu yaahika Mamure owa Isaaka ishe, nainga shi Kiriyatariba (niyo Heburooni), ei Aburahamu na Isaaka baabaire bashuuhuukiire, 28obwo Isaaka akaba aine emyaka ya bukuru igana na makumi munaana. 29Atyo Isaaka omwitsyo gwamuhwamu, yaafa naakurata abaabo, ari omugurusi eboote; abatabani Esau na Yakobo baamuziika.
Oruzaaro rwa Esau
Currently Selected:
Kut 35: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
