Kut 34
34
1Mbwenu Dina muhara wa Leeya, ou yaazairweho Yakobo, akaruga omuka yaaza kutaayaayira abakazi b'omuri egyo nsi. 2Reero Shekemu mwene Hamori Omuhiivi, omutegyeki w'egyo nsi, ku yaamureebire yaamuhamba, yaabyama nawe, yaamushiisha. 3Omutima gw'ogwo mushaija gwahwera ahari Dina muhara wa Yakobo, yaakunda ogwo mwishiki kandi yaamugambira eby'okumugwisa gye. 4Ekyarugiremu Shekemu yaagambira Hamori ishe ati: Nshwererera ogwo mwishiki. 5Mbwenu obwo Yakobo akahurira ku ogwo mwojo asiisire muhara we Dina; kwonka abatabani baashangwa bari omu ishwa n'amasyo ge; Yakobo nikwo kuhunama okuhitsya obu baizire.
6Bwanyima Hamori ishe Shekemu akaruga owe, yaaza owa Yakobo kuhanuura nawe. 7Beene Yakobo ku baakihuriire, baija omuka nibaruga omu ishwa; haza abo bashaija kyabagwisa kubi, baagira ekiniga kingi; ahabw'okuba ogwo mwojo akareeta ekihemu omuri Isiraeli ahabw'okubyama na muhara wa Yakobo, ekintu ekitashemereire kukorwa.
Abashekemu okushaba okushwererana na beene Yakobo
8Kwonka Hamori akahanuura nabo, yaabagira ati: Mutabani wangye Shekemu naakundira kimwe muhara waanyu. Naabeeshengyereza mumumuhe amushwere. 9Nimushwererane naitwe, mutuhingire bahara baanyu, naimwe mushwere abaitu. 10Muryatuura naitwe, kandi ensi egi tiharigira kyabazibira kugituuramu, kugishuuburizamu n'okugitungiramu. 11Shekemu nawe yaagambira ishe w'ogwo mwishiki, na nyina, na banyaanya, ati: Nimungirire embabazi, haza eki murancwe kyona ninkibaha. 12Enjugano yoona n'ebiconco ebi murancwe niinyija kubiha. Nyowe eki ndikufa n'okumpingira ogu mwishiki.
13Batabani ba Yakobo nikwo kugarukamu Shekemu na Hamori ishe n'oburyarya, ahabw'okuba akaba asiisire munyaanyabo Dina. 14Baabagira bati: Ekyo titurikubaasa kukikora, okuhingira muhara waitu omuntu otashazirwe, ahabw'okuba nikituhemura. 15Kureka ahi turaihe kubaikiriza, niimwe okuba nkaitwe, buri mushaija weena omuriimwe okusharwa; 16obwo nibwo turaabahe bahara baitu, naitwe tukashwera bahara baanyu, kandi tukatuura naimwe, tukaba eihanga rimwe. 17Kwonka ku muraayangye kutuhurira mukasharwa, nitwija kutwara muhara waitu twegyendere.
18Ebi baabagambiire bikagwisa gye Hamori n'omutabani Shekemu. 19Ogwo mutsigazi tiyaayeziringa kukora ekyo kintu, ahabw'okuba akaba naakunda munonga muhara wa Yakobo ogwo. Kandi akaba naasiimwa munonga okukira abandi boona omu ka ya ishe. 20Batyo Hamori na Shekemu omutabani baagarukayo. Ku baahikire aha irembo ry'orurembo rwabo, baagambira ab'omuri orwo rurembo, bati: 21Mbwenu abo bantu ni banywani baitu. Nimubarekye batuure omuri egi nsi bagishuuburiremu manya egi nsi mpango nibagihikamu. Ka tushwere bahara baabo, naitwe tubahingire bahara baitu. 22Kureka eki kyonka nikyo kiraareetere abo bashaija kwikiriza kutuura naitwe, tukaba eihanga rimwe: buri mushaija omuriitwe kusharwa nkabo oku bashazirwe. 23Mbwenu shi nimugira ngu ente zaabo n'ebintu byabo n'amatungo gaabo tibirikwija kuba ebyaitu? Kureka murekye twikirizane nabo, nibwo baraatuure naitwe. 24Reero boona abashohoire nibaraba omu irembo ry'orurembo rwe, baikiriza ebi Hamori n'omutabani Shekemu baabagambiire, buri mushaija weena yaasharwa.
Simeoni na Leevi okuhoora Abashekemu
25Aha kiro kya kashatu, abo bashaija ku baabaire bakirwaire obuhuta, batabani ba Yakobo bombi, Simeoni na Leevi banyaanya Dina, baihayo rurara zaabo, baateera orwo rurembo batamanyirwe, baita abashaija baamwo boona. 26Baitsa Hamori na Shekemu omutabani rurara, baiha Dina omu nju ya Shekemu, batyo baagyenda. 27Reero beene Yakobo baija baahika aha baitsirwe, baanyaga oby'omuri orwo rurembo, ahabw'okuba abaamwo bakaba basiisire munyaanyabo. 28Baatwara amasyo g'entaama n'ag'ente, endogoya na byona ebyabaire biri omuri orwo rurembo n'omu ishwa. 29Byona ebi baabaire batungire n'abaana baabo boona n'abakazi baabo n'esika yoona ey'omuri ago maju baabinyaga, byaba omunyago gwabo.
30Bwanyima Yakobo yaagira Simeoni na Leevi ati: Mwangwisiza akagwe kuunyangisa abatwire omuri egi nsi: Abanyakanaani n'Abaperizi; haza nimureeba ku nyine abantu bakye. Manya ku baakuhurura banteera nyowe n'ab'omu ka yangye, bakaatucwekyereza. 31Kwonka bo baamugarukamu bati: Mbwenu shi akaahindwire munyaanyaitwe maraaya?
Ruhanga okubonekyera Yakobo Beteli
Currently Selected:
Kut 34: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
