2 Maka 2
2
1Nikishangwa omu bihandiiko ebibiikirwe, ku Yeremiya omurangi yaaragiire abaabaire nibazaahibwa ngu batware ahari ogwo muriro nk'oku kyagambwa. 2Ogwo murangi ku yaaherize kubaha eiteeka, yaabahabura ku batashemereire kwebwa ebiragiro bya Mukama, kandi ngu ku barireeba ebishushani by'ezaabu n'eby'efeeza n'ebibihunzirweho, bitaribatwara omutima bikabahabisa. 3Yaabeehanangiriza n'ebigambo nk'ebyo, ku eiteeka ritari ry'okuruga omu mitima yaabo.
4Omuri ebyo bihandiiko harimu n'ekirikugira ngu ogwo murangi ku yaaherize kuhaburwa Ruhanga, yaaragiira ku eihema n'eshanduukye y'endagaano bigyenda nawe, yaimutsya orugyendo, yaaza aha rushozi oru Musa yaatembire, akareeba ensi ei Ruhanga yaaraganiise. 5Yeremiya ku yaahikireyo, yaashangayo enyanga, yaagitamu eihema n'eshanduukye y'endagaano n'eitambiro ry'okwotereraho obubaani; bwanyima yaigara obutaahiro bwayo. 6Bamwe aha baamukuratiire bakainamukayo kusherura ahi yaaraba, kwonka tibaahareeba. 7Yeremiya ku yaakimanyire, yaabajuukirira kandi yaarangirira ati: Omwanya ogu guryaguma gutamanyirwe, okuhitsya obu Ruhanga arigaruka kuteerana hamwe abantu be, akooreka embabazi ze, 8ngu nibwo Mukama aryoreka butunu ebyo bintu, ekitiinwa kye n'ekicu kye bikareebwa nk'oku byayorekirwe obwa Musa, kandi ngu na Solomooni akashaba ngu ogwo mwanya gwezibwe omu muringo gw'omutaano.
9Kikamanywa ngu Solomooni, omu bwengye bu yaahairwe, akatamba ekitambo ky'okweza Nyaruju yaaheza kugyombeka. 10Nk'oku Musa yaashabire Mukama, omuriro gukashuuma niguruga omu iguru, gukasiriiza ekitambo, na Solomooni nikwo yaashabire, omuriro gukashuuma, gukasiriiza ebitambo by'okucwetsya byona. 11Manya Musa akagira ati: Bikamarwaho omuriro ahabw'okuba empongano y'ekibi terariirwe. 12Solomooni nawe nikwo yaateekire atyo obugyenyi, bukamara ebiro munaana.
Eby'eibiikiro ry'ebitabo ebirikwera n'okwezibwa kwa Nyaruju
13Ebintu nk'ebyo nibigambwaho omu bihandiiko n'omu bi Nehemiya yaahandiikire ebya buri izooba; kandi ngu akataho eibiikiro ry'ebitabo, yaarundaana ebitabo eby'omu busingye bw'abagabe n'abarangi n'ebi Daudi yaahandiikire n'amabaruha g'abagabe agarikugamba aha bitambo ebiheebwayo ahabw'okwekundira. 14Na Yuda nikwo yaagizire, akarundaana ebitabo byona ebyabaire bitaataanisiibwe ahabw'engamba ezaatubaireho, mbwenu tubiine. 15N'ahabw'ekyo ku muraabe nimubyetenga, mutume abantu babibaakiirire.
16Kandi nk'oku turi haihi kukora omurimo gw'okweza Nyaruju, naimwe twabahandiikira. Mbwenu ebyo nimwija kugira emikoro ahari ago mazooba? 17Manya Ruhanga niwe yaajunire abantu be boona, akabagarurira ensi yaabo y'obuhunguzi n'obugabe n'obuhongyerezi n'okwezibwa, 18nk'oku yaakiraganisiize omu iteeka. Nikyo twiniire amatsiko ku Ruhanga arikwija kurahuka kutugirira esaasi akatutaaruura omu byanga byona eby'ahansi y'eiguru, akatutaasya omu Mwanya gwe Ogurikwera, nk'oku atwihire omu kabi kahango k'emiringo mingi, akeeza Nyaruju.
Enturukiriro y'owaarundaine ebiri omuri eki kitabo
19Ebya Yuda Makabeho na beene ishe n'okwezibwa kwa Nyaruju n'okuhaasirirwa kw'eitambiro, 20n'eby'engamba z'okurwanisa Antiyoko Epifane n'omutabani Eupatoori, 21n'okubonekyerwa kwingi okwarugire omu iguru, kukaizira abaabaire baine eihato ry'okurwanirira ediini y'Ekiyudaaya n'eihanga ryabo, nobu baabaire bari bakye, bakakubuura ensi yoona, bakabinga ebimbuuro by'Abanyamahanga, 22bakeegarurira Nyaruju rugambwa omu nsi yoona, bakaiha orurembo omu mikono y'ababisha, bakagaruraho amateeka agaabaire garangariire kwihwaho, haza Mukama akaguma naababangira, abainiire embabazi nyingi: 23ebyo byona ebi Yasooni owa Kureene yaataire omu bitabo bihango bitaano nitwija kuteeraho kubifunza, bibe ekitabo kimwe. 24Ahabw'okureeba ngu ebyabaireho ebyo bikaba biri bingi, byareetera oburemeezi abarikwenda kubyega, 25nikyo turikwendera kubikundisa abaraabishome, tukabyanguhiza abeeteekateekire kubikwata omu mutwe, bikabona kugasira boona abaraabishome. 26Reero itwe abeehaireyo kukora omurimo gw'okubifunza tikirikutwanguhira, kureka n'eky'okututuutura n'okuturaaza aha kiro, 27nk'oku omuntu ayecurenga naatebeekanisa obugyenyi, ngu abandi babone kushemererwa. Kwonka ahabw'okwenda kugasira baingi, nitwija kwehangaana n'omutima murungi kukora ogwo murimo gurikurusya, 28obwo owaabirundaine nitumurekyera omurimo gw'okuba niwe yaajunaanwa buri kintu. Kureka itwe amaani nitugamarira aha bintu bikuru eby'omuri eki kitabo kyafunzibwa. 29Manya nk'oku omwombeki mukuru ata omutima aha ki arikwombeka, haza orikukisiiga erangi n'okukiraba akateekateeka aha bishemereire kukihunda byonka, naitwe omu kuteekateeka kwaitu nikwo turi. 30N'omurimo gw'omuhandiiki w'ebyabairebo owaabandize kugira obuhamya bu eki arikuza kutebya, akahanuura aha birikukikwataho ebya buri rubaju, n'okwecurengyera ekirimu kyona; 31kwonka orikugaruka omuri ekyo kitebyo ashemereire kwikirizibwa kukishoboorora naacwera hagufu n'okwetantara ebirikurusya. 32Mbwenu nu ka tutandikye ekitebyo kyaitu tutarikwongyera munonga aha byagambwa, ahabw'okuba n'eky'obushema omuntu kureisya enturukiriro, akacwa bugufu ebyabaireho buzima.
Simooni okuregyera Apoloniyo eby'empiiha za Nyaruju
Currently Selected:
2 Maka 2: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.