2 Maka 1
1
Ebaruha ezaahandiikiirwe Abayudaaya ba Misiri
Ebaruha y'okubanza
1Itwe beene waanyu Abayudaaya b'omuri Yerusalemu n'ab'omuri Buyudaaya, twabahandiikira imwe beene waitu Abayudaaya b'omuri Misiri, nitubaramutsya kandi nitubatengyera obusingye.
2Ruhanga naakabakorere ebirungi, akaijuka endagaano ye na Aburahamu na Isaaka na Yakobo, abaheereza be abeesigwa. 3Mwena naakabahe omutima gw'okumuramya n'okukora ebi akunda mwine ebiteekateeko by'obufura n'omutima gwekundiire. 4Emitima yaanyu naakagishashaanurire eiteeka rye n'ebiragiro bye, kandi naakabahe obusingye! 5Naakahurire okushaba kwanyu akagarukana naimwe, akareka kubatsigaho omu bunaku bubi. 6Na mbwenu itwe kunu nitubashabira.
7Omu busingye bwa Demetiriyo, omu mwaka gwa igana na makumi mukaaga na mwenda, itwe Abayudaaya beene waanyu tukabahandiikira turi omu kabi kahango akaatubaireho omuri egyo myaka, obu Yasooni na bagyenzi be baagoma, bakareebya ensi erikwera n'obugabe, 8bakootsya ekisasi ky'eirembo rya Nyaruju, bakasheesha eshagama y'abataine rubanja. Tukeeshegyereza Mukama, yaatuhurira; twatamba ebitambo, twatoija esaano y'engano, twahemba amatabaaza kandi twamurika emigaati. 9Mbwenu mureebe ngu mwaguma nimukora Obugyenyi bw'Ensiisira omu kwezi kwa Kisileevu. Ebaruha egi yaahandiikwa omu mwaka gwa igana na makumi munaana na munaana.
Ebaruha ya kabiri
10Itwe abari omuri Yerusalemu n'ab'omuri Buyudaaya n'Eishengyero na Yuda, twakuhandiikira iwe Arisitobulo, ow'omu ruganda rw'abahongyerezi abaasiigirwe amajuta, kandi omwegyesa w'Omugabe Putolemaayo, hamwe n'Abayudaaya b'omuri Misiri, nitubaramutsya kandi tubatengyera amagara marungi.
11Ruhanga akatujuna, yaatwiha omu kabi kahango k'emiringo mingi, nikyo turikumusiimira munonga ahabw'okutuhwera kurwanisa omugabe. 12Ruhanga ogwo akabingamu abaabaire nibarwanisa ab'omu rurembo orurikwera. 13Manya omwebembezi waabo ku yaahikire Buperisiya n'eihe ririkushusha oti tiririkubaasa kugungirwa, we n'abantu be baahirimburirwa omu ndaaro ya Nanaaya, ahabw'okugobezibwa abahongyerezi ba Nanaaya. 14Manya Antiyoko ku yaayegizire nk'orikwenda kushwera Nanaaya, yaija omuri ogwo mwanya na banywani be kutunga ebintu bingi munonga eby'amatungo gaamwo kuba emihingiro. 15Abahongyerezi b'omu ndaaro ya Nanaaya ku baaherize kumurika eby'amatungo ebyo, na Antiyoko yaataahire omu kishengye ky'ekyombeko ekirikwera aine abantu bakye, baakinga endaaro, yaataahamu ati. 16Ku baigwire orwigi rw'aha daari orutarikumanywa, baarekyera amabaare, baagateera ogwo mwebembezi, n'abashaija be baabagwisaho, baabahirimbura ebihinju, baabatemaho emitwe, baabitambikira abari aheeru. 17Ruhanga waitu owaahaireyo ezo nkozi z'ebibi kwitwa, naakasingye omu miringo yoona.
Eby'omuriro gurikwera ogwarinzirwe omu muringo gurikutangaaza
18Nk'oku turikwija kukora omugyenzo gw'okwezibwa kwa Nyaruju aha kiro kya makumi abiri na bitaano ekya Kisileevu, tureebire nikyetengwa kubamanyisa ngu naimwe mukore Obugyenyi bw'Ensiisira n'obw'omuriro ogwareebekire obu Nehemiya, owaayombekire Nyaruju n'eitambiro, yaatamba ebitambo.
19Baatatenkuriitwe obu baatwarwa Buperisiya bari enkwatwa, abahongyerezi abarikutiina Ruhanga ab'omuri obwo bunaku bakaguha omuriro gw'aha itambiro, baagushereka omunda y'ekiziba kyomire, baaguma nibeerinda ngu ogwo mwanya hatagira owaagumanya. 20Ku haahingwireho emyaka mingi, Ruhanga yaakisiima, omugabe wa Buperisiya yaatuma Nehemiya, n'onu yaayohereza baijukuru b'abahongyerezi abaasherekire ogwo muriro kugureeta. Ku baatumanyiise ngu tibagureebire, kureka bashangireho amaizi garikurendemuka, Nehemiya yaabaragiira kugataha bakagareeta. 21Ku baareetsire eby'okutambisa ebitambo, Nehemiya yaaragiira abahongyerezi kumiisiira ago maizi aha nku n'ebyabaire bizitairweho. 22Ku baaherize, haahinguraho omwanya, eizooba eryabaire rikingiirwe ebicu ryayaka, omuriro mwingi gwabuguma, boona baatangaara. 23Mbwenu ekitambo ku kyabaire nikisya, abahongyerezi hamwe n'abandi boona baashaba. Yonataaani yaayebembera okushaba, abandi hamwe na Nehemiya nibamwakiira. 24Baashaba bati: Ai Mukama, Mukama Ruhanga, Omuhangi w'ebintu byona, iwe otiinisa, ow'amaani, ow'oburyo kandi ow'esaasi, iwe wenka omugabe kandi iwe wenka ow'embabazi, 25niiwe wenka oijwire embabazi, niiwe wenka ow'oburyo, oshoboorora byona, otahwaho, oiha Isiraeli omu kabi koona, owaatooraine baatatenkuriitwe okabeeza. 26Mbwenu yakiira eki kitambo ahabw'abantu baawe boona Abaisiraeli, orinde abantu baawe ahabwawe kandi obeeze. 27Taaruura abantu baitu abaataataine, abari abahuuku omu Banyamahanga, obahaise okurekurwa. Naga eriisho aha batarikwetwaho n'abarikugaywa, haza Abanyamahanga bamanye ku niiwe oba Ruhanga waitu. 28Bonabonesa abarikutuhata, bakatugayisa eigundu. 29Gumya abantu baawe omu Mwanya Ogurikwera nk'oku Musa yaagambire. 30Abahongyerezi nabo baayeshongora ebyeshongoro by'okuhimbisa. 31Eby'okuhongyesa ekitambo ku byacwekize, Nehemiya yaaragiira ngu amaizi agaatsigaraho gashukwe aha mabaare mahango. 32Ekyo ku kyakozirwe, omuriro gwanaga enkobe; kwonka ekyererezi kirikuruga aha itambiro ku kyayakire nikihwerera, na gunu gwaraara. 33Ekyo abantu ku baakimanyire, baakigambira omugabe w'Abaperisiya ku omu mwanya gu abahongyerezi abaazaahiibwe baasherekiremu omuriro habonekiremu amaizi garikurendemuka, agu Nehemiya na bagyenzi be bookyeise eby'okuhongyesa ekitambo. 34Omugabe ku yaaherize kukicondooza, yaaziguurutsya ogwo mwanya orugo, yaaragiira ku gwetwa ogurikwera, 35kandi yaahaana empaano z'ebiconco bingi kandi birungi munonga n'abu yaabaire naakunda. 36Nehemiya na bagyenzi be ago maizi garikurendemuka baageeta Nefutayi, amakuru ngu okwezibwa; kwonka abantu abaingi baageeta Nafuta.
Yeremiya okushereka eihema n'eshanduukye y'endagaano n'eitambiro
Currently Selected:
2 Maka 1: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.