1 Maka 16
16
1Yohaana akainamuka naaruga Gazara, yaagambira Simooni ishe ebi Kendebaayo yaakozire. 2Simooni atyo ayeta abatabani bombi abakuru Yuda na Yohaana, abagira ati: Nyowe na barumuna bangye n'ab'eka ya tata turwaine engamba za Isiraeli, okwiha omu butsigazi n'okuhitsya hati, haza ebintu byagyenda gye nitutegyeka, tutyo kaingi twajuna Isiraeli. 3Kwonka mbwenu nyowe nkuzire, naimwe ahabw'embabazi za Ruhanga muhikize emyaka y'obukuru. Nimuze omu bigyere byangye n'ebya barumuna bangye, mushohore muze kurwanirira eihanga ryaitu, kandi obuhwezi oburikuruga aha W'omu iguru nibukagume naimwe.
4Yohaana atyo atoorana omu nsi abarwani obukumi bubiri n'ab'ahambaraasi, baza kuteera Kendebaayo, basiisira Modeyini, baraaraho. 5Kare omu kasheeshe baimuka, baza omu ruhita. Ago magingo beecura eihe rihango ry'ab'ebigyere n'ab'ahambaraasi niriija kubugabugana nabo, ahagati yaabo bacwekanisiibwe akagyera. 6Yohaana n'eihe rye nabo batenga orugamba kubarwanisa. Obwo ku yaareebire abaserukare batiinire kwambuka ako kagyera, yaaba niwe yaabanza kwambuka. Abashaija ku baamureebire, nabo baayambuka bamuri omu ntegye. 7Atyo eihe aricwa kabiri; ab'ahambaraasi abata ahagati y'ab'ebigyere, ahabw'okuba eihe ry'ab'ahambaraasi ery'abazigu rikaba riri rihango munonga. 8Reero ku baateire enzamba, Kendebaayo n'eihe rye baahunga, baingi omuribo baahutaazibwa baagwaho: abaatsigaireho baahungira omu kigo ekyerindirwamu. 9Omuri ago magingo Yuda murumuna wa Yohaana yaahutaazibwa, kwonka Yohaana we yaagyenda ababingire okuhitsya obu Kendebaayo yaahikire Kederooni, ahi yaabaire ayombekire. 10Bakataho n'okuhungira omu minaara y'omu bwerere bwa Azooto, kwonka Yohaana yaagyotsya; omuribo haafamu abantu nk'enkumi ibiri. Bwanyima yaagaruka Buyudaaya buhooro.
Simooni okugwa Dooki
11Mbwenu obwo Putolemaayo mutabani wa Abubu akaba ahindwirwe omutegyeki mukuru ow'omu ruhita rwa Yeriko, kandi aine efeeza n'ezaabu nyingi; 12ahabw'okuba akaba ari mukwe w'omuhongyerezi omukuru. 13Omutima gwe gukagira eigundu, yaamaramaza kukubuura egyo nsi, yaaconya enaama z'okureebya Simooni n'abatabani kubaita. 14Omu bunaku obwo Simooni akaba naataayaayira endembo z'omuri egyo nsi, kwetegyereza ebi abaamwo bakyenire. Atyo yaashuuma Yeriko aine abatabani Matatiya na Yuda, omu mwaka gwa igana na makumi mushanju na mushanju, omu kwezi kwa ikumi na kumwe, nikwo kwezi kwa Shebati. 15Mutabani w'Abubu yaabareebya, yaabaakiirira omu kigo kikye ekirikwetwa Dooki, eki yaabaire ayombekire; yaabateekyera obugyenyi bwingi, haza kunu asherekiremu abantu. 16Simooni n'abatabani ku baasinzire, Putolemaayo n'abashaija be baimuka, baihaho ebikwato byabo, baasyokyera Simooni baamurwanisiza omu kishengye ky'obugyenyi, baamwita n'abatabani bombi hamwe n'abagaragwa be. 17Putolemaayo akora atyo ekikorwa ky'obureebya buhango, ekirungi akizimuurira ekibi.
18Reero Putolemaayo ahandiika ebyo ebyabaho, abitwekyera omugabe, naamushaba kumwoherereza engabo z'okumuha emikono n'okumwikiriza kutegyeka ezo ndembo n'egyo nsi. 19Atuma Gazara abandi bashaija kwita Yohaana, atwekyera abakuru b'amahe amabaruha naabashaba kwija, ngu abahe efeeza n'ezaabu n'ebindi biconco; 20abandi bashaija abatuma kukubuura Yerusalemu hamwe n'orushozi rwa Nyaruju. 21Kwonka omuntu omwe airuka abeebembeire; abiteekyerereza Yohaana ari Gazara, ku ishe n'abarumuna bahwerekyereire; kandi ati: Naiwe akwoherereize abantu kukwita. 22Ebyo Yohaana ku yaabihuriire yaahuruutuka omutima, yaakwata abashaija abaabaire baizire kumwita, yaabaita; ahabw'okuba akamanya ku baizire kumwita.
23Ebindi bintu bikuru ebi Yohaana yaakozire, engamba ze n'obumanzi bwe, taho ebisiika bi yaayombekire n'ebindi bintu bi yaakozire, 24bihandiikirwe omu bitabo by'omu busingye bw'obuhongyerezi bwe, okwiha omu bunaku obu yaabeerairemu omuhongyerezi omukuru ahunguriire ishe.
Currently Selected:
1 Maka 16: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.