2 Maka 3
3
1Ab'omu rurembo orurikwera ku baabaire barutwiremu bagogyeire n'amateeka nigakuratirwa gye, ahabwa Oniya omuhongyerezi omukuru kutiina Ruhanga n'okwanga ebibi, 2abagabe nabo baaha ogwo mwanya ekitiinwa, baarangaanisa Nyaruju nibagirabukira ebiconco birungi munonga. 3Nangwa na Seleuko, omugabe wa Asiya, yaihurira byona ebikwatiraine n'eby'okutamba ebitambo, naakora aha mpiiha ze. 4Kwonka omushaija orikwetwa Simooni ow'omu ruganda rwa Benyamiini, owaatairweho kuba omureeberezi w'ebya Nyaruju, taraikirizaine na muhongyerezi omukuru omu by'okureeberera akatare k'orurembo. 5Ku yaareebire ngu tarikubaasa Oniya, yaaza ahari Apoloniyo mwene Taruso, owaabaire ari omutegyeki mukuru owa Koilesiriya na Foinikiya omu biro ebyo, 6yaamuregyera ku eibiikiro ry'omuri Yerusalemu riijwire empiiha zitarikugambwa, obwingi bwazo ku butarikubaasa kubarwa, kandi ku zitarikubarirwa mu z'okutamba ebitambo, haza ku kirikubaasika ezo mpiiha kureebererwa omugabe. 7Apoloniyo ku yaareebire omugabe, yaamuteekyerereza eby'empiiha zibaamugabiire. Omugabe yaatoorana Heliyodooro owaabaire naareeberera ebintu bye, yaamutuma naamuragiira kuziihayo. 8Heliyodooro nikwo kwimutsya orugyendo ahonaaho, naashusha nk'orikuza kushwijuma endembo za Koilesiriya na Foinikiya, kwonka omu mazima agiireyo kukora eki omugabe arikwenda.
Heliyodooro okuhika Yerusalemu
9Heliyodooro ku yaahikire Yerusalemu, omuhongyerezi mukuru w'orwo rurembo yaamwakiiza rukundo, n'onu yaamwatira enaama y'eki baaregire naamugambira ekimureetsire, kandi yaabuuza yaaba buzimazima nikwo kiri. 10Omuhongyerezi omukuru yaamushoboororera ku ezo mpiiha zibiikiirwe abafaakazi n'efuuzi; 11ku hariho n'empiiha za Hirikaano mwene Tobiya, omutu mukuru w'eiziina; kandi ku ezo zoona zirikuhika ebicweka eby'efeeza obusiriira bubiri byonka, kitari nk'oku Simooni enyabibi yaaregire. 12Ayongyera agira ngu kikaba kitarikubaasika kureebya n'okunyaga abaine obwesigye aha Mwanya Ogurikwera n'aha bukuru n'okuhundirira kwa Nyaruju etuura neeheebwa ekitiinwa omu nsi yoona.
Ab'omuri Yerusalemu okwitwa obwoba
13Kwonka Heliyodooro ahabw'okuragiirwa omugabe, akahamiza kimwe ku ezo mpiiha ziri ez'okutwarwa omu ibiikiro ry'omugabe, yaaba nibenda nari batarikwenda. 14Atyo ataho eizooba, aija omuri Nyaruju, na bwanyima ataahamu, ashwijuma eby'ezo mpiiha.
Ab'omu rurembo rwona baagira obujune bwingi. 15Abahongyerezi baayerambika omu maisho g'eitambiro bajuumaire, bajwaire ebijwaro by'obuhongyerezi, baahoogyera Ow'omu iguru owaataireho eiteeka eritegyeka eby'okubiika empiiha, ngu azirindire gye abaazibiikizemu. 16Oku omuhongyerezi omukuru yaareebekire ahamaisho, kukacumita omutima gw'omutu weena owaamureebire, ahabw'okuba emireebekyere ye y'ahamaisho n'okuhinduriza kwe, bikooreka enaku z'omu mutima gwe. 17Manya ogwo muntu akashwekwa obwoba n'okutetema, ebyayorekyeire kimwe abaamureebire obusaasi bu aine omu mutima. 18Abantu baaruga omu maka nibeehuuta bari omu bimbuuro, kweshengyerereza hamwe Ruhanga, ahabw'okuba Omwanya Ogurikwera gukaba gurangariire kuhemurwa. 19Abakazi beezirikiire ebiguniya ahaifo y'amabeere baayeshuka omu nguuto nibamigana. Abaishiki abaabaire barindiirwe omu maju bairukanga nibaza aha marembo, abandi aha bisiika n'abamwe baaringuririza omu madirisa; 20haza boona baayeshengyereza Ruhanga baimukize emikono ahaiguru. 21Okweyara kw'abantu boona bajuumaire, n'okwemereza omutima okw'omuhongyerezi omukuru aine obujune bwingi, bikaba nibiitsa esaasi.
22Ku baabaire nibakihoogyera Mukama omushoboorozi wa byona ngu arinde gye ebi abantu baabiikize, 23Heliyodooro yaagumizamu kuhikiiriza eki yaamaririire kukora.
Okufubirwa kwa Heliyodooro
24Kwonka Heliyodooro ku yaahikire aha ibiikiro hamwe n'abarinzi be, Mukama w'emitima kandi ow'abaine obushoboorozi yaayeyoreka okutakareebwaga. Boona abataratiinire kumushendekyereza baatangaazibwa amaani ga Ruhanga, obwoba bwabagwisa enshazi. 25Manya bakabonekyerwa embaraasi ejwaire eby'ekitiinisa, etembirwe omuntu orikutiinisa. Egyo mbaraasi yaasyokyera Heliyodooro n'ekiniga kingi, yaamuteeza ebyara byayo by'omu maisho. Ogitembire yaareebwa ajwaire eby'orugamba n'eby'okurwanisa bya zaabu; 26n'abatsigazi babiri b'amaani gatakareebwaga, barungi munonga, bajwaire gye, baamubonekyera, baamwemerera aha mbaju zombi; baaguma nibamwasha nibamuteera munonga. 27Ahonaaho ku yaayetwire ahansi, omwirima mwingi gwamushweka, abashaija be baamwimutsya, baamuta aha katanda, 28baamutwara. Ogwo mushaija waabaire yaataaha ati omuri eryo ibiikiro, aine engabo nyingi zimushendekyereize hamwe n'abarinzi, akaba atakibaasa kwehwera; abu yaabaire aine baayetegyerereza kimwe obushoboorozi bw'amaani ga Ruhanga. 29Ku yaabaire akirambiire, ajuumaire atakiine gagamba ahabw'eki Ruhanga yaamukozire, kandi atakiine matsiko g'okukira, 30Abayudaaya baasiima Mukama owaakozire eby'okutangaaza ahabw'Omwanya gwe Ogurikwera; n'ab'omuri Nyaruju abaabaire baitsirwe obwoba bajagaraire omu kaanya kakye akaarugaho, baashemererwa munonga, baananuka ahabwa Mukama omushoboorozi wa byona kweyoreka.
31Bamwe ahari banywani ba Heliyodooro baayeshengyereza Oniya kuhoogyera Rukiraboona kugarura amagara omuri ogwo muntu owaabaire arambiire atarikuteeza, ategyereize kwitsya omwitsyo gwe gw'aha muheru. 32Omuhongyerezi omukuru ahabw'okutiina ngu omugabe atakaateekateeka ngu Abayudaaya nibo bakozire kubi Heliyodooro, yaatamba ekitambo ky'okumukiza. 33Omuhongyerezi ku yaabaire naakitamba ekitambo ky'okukaraba, abatsigazi bari baagaruka baabonekyera Heliyodooro, bajwaire emyenda nk'eri, baayemerera baamugira bati: Siima munonga Oniya omuhongyerezi omukuru, ahabw'okuba ahabwe Mukama yaakugarurira amagara. 34Kandi iwe owaayashwa ab'omu iguru, reeba ngu waamanyisa abantu boona obushoboorozi bw'amaani ga Ruhanga. Ku baaherize kugaba ebyo baabura.
Okuhinduka kwa Heliyodooro
35Ebyo ku byahwaire Heliyodooro yaatoijera Mukama ekitambo, yaasigira omujuni w'amagara ge ekisigo kikuru. Ku yaaherize kuragana na Oniya, yaimutsya orugyendo n'amahe ge kugaruka ow'omugabe. 36Kandi yaahamiza abantu boona ebi Ruhanga omukuru yaakozire, ebi we wenka yaayereebeire n'age. 37Omugabe ku yaabuurize Heliyodooro omuntu oshemereire kwoherezibwa Yerusalemu obundi, onu yaamugarukamu ati: 38Ku oraabe oine omuzigu weena, nari orikuconya enaama y'okutenda butegyeki bwawe, obe niwe waayoherezayo, ahabw'okuba ku araahiirwe yaakira, naija kukugarukira bamuteire munonga; ahabw'okuba buzimazima ogwo mwanya gurimu amaani ga Ruhanga. 39Manya ow'omu iguru niwe agureeberera akagurinda, akateera abaija kugushiisha, akabacwekyereza. 40Ebya Heliyodooro n'okurindwa kw'eibiikiro ry'empiiha nikwo byabaire bityo.
Eby'obufa-mutima bwa Simooni omureeberezi wa Nyaruju
Currently Selected:
2 Maka 3: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.