2 Maka 11
11
1Ku haahingwireho omwanya mukye, Lisiya omworozi w'omugabe kandi oine nawe obuzaare, owaabaire naareeberera obukama, ku yaanyangaraziibwe ebyabaireho, 2yaahuruza abantu nk'obukumi munaana, hamwe n'ab'ahambaraasi be boona, yaija kurwanisa Abayudaaya. Akaba naayenda orurembo Yerusalemu kuruhindura obutaaho bw'Abaguriiki, 3n'okushoza Nyaruju omushoro, nk'oku yaagizire emyanya erikwera ey'agandi mahanga, kandi n'okuguza butunu obuhongyerezi obukuru buri mwaka. 4Tareetaire ha maani ga Ruhanga n'akakye, kureka akaba naateerwa ebihagi eihe rye ry'abarwani obukumi n'obukumi abarikugyendesa ebigyere, n'enkumi n'enkumi z'ab'aha mbaraasi, kandi n'enjojo ze makumi munaana. 5Ku yaateire Buyudaaya, yaahika haihi na Beetizuuri omwanya ogwehinguririziibwe ebigo, ogurikuhitsya nka kilomita makumi ashatu na ibiri okuruga Yerusalemu, haza yaagufundiriza munonga.
6Makabeho n'abashaija be ku baahuriire Lisiya agotsire ebyo bigo, bo hamwe n'abantu boona baayeshengyereza Mukama nibacura kandi nibarira, ngu abooherereze maraika omurungi kurokora Isiraeli. 7Makabeho yaaba niwe yaabanza kukwata eby'okurwanisa, kandi yaayehanangiriza abandi kuhayo amagara gaabo hamwe nawe, kuha beene waabo emikono. Batyo baahurura n'engoga. 8Reero ku baabaire bakiri haihi na Yerusalemu, baabonekyerwa omu maisho gaabo omuntu atembire embaraasi, ajwaire ebirikwera, abangiire aha mitwe yaabo eby'okurwanisa bya zaabu. 9Boona baahimbisiza hamwe Ruhanga ow'embabazi, baaguma omutima beeteekateekire kuteera ti bantu bonka, kureka n'enyamaishwa enshaarizi nari ebisiika by'ebyoma. 10Baagyenda omu maisho batengire orugamba, Ow'omu iguru naabakombeerera, ahabw'okuba Mukama akabagirira embabazi. 11Haza baasyoka nk'entare, baarwanisa abazigu, baabaitamu abantu akakumi kamwe na rukumi, kandi na rukumi na magana mukaaga ab'ahambaraasi, abandi boona abaatsigaireho baahunga. 12Abaingi omuribo baahunga baanagire eby'okurwanisa kandi bahutaire, na Lisiya nyakabara yaakira naahunga naabwerabwera.
Lisiya okukora endagaano n'Abayudaaya
13Lisiya nk'oku yaabaire atari mushema, ku yaateekateekire munonga aha by'okusingurwa kwe okwamubaireho, yaamanya ku Abayudaaya batarikubaasa kusingurwa, ahabw'okuba Ruhanga ow'obushoboorozi akaba naabakombeerera. Yaabatumaho 14naabeehanangiriza kushoboorora ebintu byona omu buryo buhikire, naabaraganisa ku arikwija kwotereza omugabe akamugyemesereza kuba munywani waabo. 15Makabeho ku yaayetegyereize ku ekyo kiri eky'okugasira abantu, yaikiriza ebi Lisiya yaamutumireho; ahabw'okuba omugabe akaikiriza byona ebi Lisiya yaashabiire Abayudaaya, ebi Makabeho yaamukwatsize omu buhandiikye.
16Ebaruha ei Lisiya yaahandiikiire Abayudaaya ekaba neegira eti:
Nyowe Lisiya, imwe Abayudaaya naabahandiikira nimbaramutsya. 17Yohaana na Abusalomu abu mwantumireho bampikizeho ebaruha yaanyu ei mwataireho emikono, baashaba kushoboorora ebigirimu. 18Mperize kushoboororera omugabe kyona ekirikwetengwa kumumanyisa, nawe yaikiriza byona ebiraabaasikye. 19Ku muraagume mwiniire obukama obu omutima murungi, naanye niinyija kuteeraho omu biro birikwija kutunguura ebibainiire omugasho. 20Mbwenu ebikwatiraine n'ebyo bintu na buri kimwe, naaragiira abantu baanyu hamwe n'abajwekyerwa bangye kubihanuura naimwe. 21Mugumeho! Ebaruha egi naagihandiika omu mwaka gwa igana na makumi ana na munaana, ebiro makumi abiri na bina by'okwezi kwa Diyosikorintiyo.
22Ebaruha ey'omugabe yo ekaba neegira eti:
Nyowe Omugabe Antiyoko, iwe Lisiya mwene tata, naakuhandiikira ninkuramutsya. 23Mbwenu nk'oku tataitwe afiire akaza kuguma hamwe na baaruhanga, nitwenda ngu abantu b'obugabe obu barekye kurabanisibwamu, baaba nibeecurengyera ebintu byabo ahabwabo. 24Tuhuriire ngu Abayudaaya tibarikwikiriza entwaza ya baatataitwe, ey'okutooreza emicwe y'Abaguriiki, kureka ngu nibasiima emitwarize yaabo, kandi ngu baikirizibwe kukuratira emicwe yaabo. 25N'ahabw'ekyo nk'oku turikusiima ngu eryo ihanga rirekye kugira omurabanamu, twahamya ku Nyaruju yaabo ebagarurirwa, bakatwaza nka baishenkurubo. 26Mbwenu noija kukora gye waagira eki waabatumaho, noobahamiza omukago gwaitu nabo, haza babone kumanya entwaza yaitu, bashemuukye, bagumizemu bashemereirwe nibeekorera ebyabo ahabwabo. 27Kandi omugabe akahandiikira eihanga ebaruha egi, ati:
Nyowe Omugabe Antiyoko naahandiikira eishengyero ry'Abayudaaya n'abandi Bayudaaya, nimbaramutsya. 28Ku muraabe muri gye, naitwe nikyo turikwenda. Naitwe turiyo tugumire. 29Menelaaho atumanyiise ku murikwenda kugarukayo owaanyu, mukeereebererera ebintu byanyu. 30N'ahabw'ekyo abarikugarukayo owaabo ekiro kya ikumi na bishatu ekya Kisantiko kitakahikire, nitwija kubahamiza ku twine nabo omukago, kandi ku turikwikiriza kimwe, 31Abayudaaya kunanurwa ebyokurya byabo n'amateeka gaabo nka ira, haza tihariho n'omwe omuribo orikorwa kubi omu muringo gwona ahabw'eki yaashobize atakimanyire. 32Mbwenu naabatumaho Menelaaho kubagumya. 33Mugumeho! Ebi naabihandiika omu mwaka gwa igana na makumi ana na munaana, ebiro ikumi na bitaano by'okwezi kwa Kisantiko.
34Abarooma nabo bakabatwekyera ebaruha erikugira eti:
Itwe Kwinto Meemiyo na Tito Maaniyo entumwa z'Abarooma, imwe Abayudaaya twabahandiikira nitubaramutsya. 35Naitwe nitwikiriza ebi Lisiya omunyabuzaare w'omugabe abaikiriize. 36Kwonka aha bi yaacwiremu ngu n'eby'okwoherereza omugabe, ku muraaheze muti kubiteekateekaho, mututumeho omuntu ahonaaho, tubone kubishoboorora gye, bibagasire, ahabw'okuba mbwenu nitwenda kuza Antiyokiya. 37N'ahabw'ekyo murahukye kututumaho abantu, tubone kumanya ebi mucwiremu. 38Mugumeho! Ebi twabihandiika omu mwaka gwa igana na makumi ana na munaana, ekiro kya ikumi na bitaano eky'okwezi Kisantiko.
Ebyabaire Yoopa na Yamuniya
Currently Selected:
2 Maka 11: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.