2 Maka 12
12
1Ku baaherize kukora egyo ndagaano, Lisiya yaagaruka ow'omugabe, n'Abayudaaya baagaruka aha mirimo yaabo y'okuhinga n'okuriisa.
2Kwonka abamwe omu bategyeki abakuru omu byanga bitari bimwe, nka Timoteeho na Apoloniyo mwene Genaayo kandi na Yeronimo na Demofooni, otaireho na Nikanoori omutegyeki mukuru owa Kupuro, tibarabarekire kutuura gye baine obusingye. 3Bamwe omu Bayoopa baakora ekikorwa ky'okutatiina Ruhanga. Baayeta Abayudaaya abu batwire nabo kutemba amaato agu babateekateekyeire hamwe n'abakazi baabo n'abaana baabo, nk'abatainiire abo Bayudaaya omutima mubi. 4Kandi ekyo baakikora butunu n'ab'omu rurembo boona bakisiima. Abayudaaya ku baakiikiriize, ahabw'okwenda kutuura baine obusingye bataine keekyengo, ab'omuri Yoopa baabaiha omu rurembo, baabatwara aha Nyanja, baabarohamu bari abantu nka magana abiri. 5Yuda ku yaahuriire eky'obwinazi ekyo ekikozirwe aha b'eihanga rye, yaaragiira abashaija be kweteekateeka. 6Ku yaaherize kuhoogyera Ruhanga Omuramuzi ohikiriire, yaahurura, yaateera abo bantu baitsire beene waabo. Nyekiro enyambukiro yaagikoomeera omuriro, yaayotsya amaato gaabo, yaita abaabaire bahungiireyo. 7Ku yaashangire amarembo g'orurembo gakingire, yaarugayo aine ekiteekateeko ky'okugarukayo kumariraho kimwe ab'omuri Yoopa boona. 8Kwonka ku yaamanyire ngu n'ab'omuri Yamuniya baine ekiteekateeko ky'okumaraho Abayudaaya abatwire nabo, 9yaateera Abayamuniya nyekiro, yaayotsya enyambukiro yaabo n'amaato gaabo; endimi z'omuriro zaareeberwa omuri Yerusalemu, kilomita nka makumi ana na munaana okuruga okwo.
Ehururu y'omuri Gileyaadi
10Ku baabaire baagyendaho kilomita emwe n'okukiraho okuruga okwo, nibaza kurwanisa Timoteeho, Abaharabu nk'enkumi itaano baine n'ab'ahambaraasi magana ataano, baabateera. 11Ku baaherize kurwana nabo munonga, Yuda n'engabo ze, ahabw'okuhwerwa Ruhanga, baabasingura. Abo bafurafuruki ku baasingwirwe, baayeshengyereza Yuda kubaha engaro, naabahamiza ku baaba banywani be, nabo nibamuraganisa kumuha amatungo n'okuhwera abantu be omu miringo yoona. 12Yuda ku yaateekateekire ngu kwo buzimazima bakaaba ab'omugasho omu miringo mingi, yaikiriza kukora nabo endagaano y'obusingye. Ku yaaherize kubahamiza, baarugayo, baaza omu mahema gaabo.
13Kandi Yuda akateera orurembo rumwe rugumire orurikwetwa Kasipiini, orwabaire rwehinguririziibwe ebigo, rutwirwemu Abanyamahanga b'enganda nyingi. 14Mbwenu abaabaire barurimu, ahabw'okwesiga okuguma kw'ebigo byabo n'okushangwa baine ebyokurya bihunikire, bakagirira Yuda n'engabo ze ekyeesooro; baabajuma, nangwa baataho okurogota n'okugamba ebirikuhemura. 15Yuda n'abashaija be ku baaherize kuhoogyera Omugabe w'ensi yoona, owaacwekyereize Yeriko omu biro bya Yoshwa, ataine byoma birikusheenya n'eby'okurwanisa orugamba, baasheenya ebyo bigo n'ekiniga kingi. 16Ahabw'okukunda kwa Ruhanga, baakwata orwo rurembo, baarwitamu abantu batarikubarwa; enyanja yaaho ehereraineho, ekicweka kyayo ekirikuhitsya kimwe kya kana kya kilomita, kyashandaara eshagama.
Orugamba rwa Karinaimu
17Yuda n'abe ku baagyenzireho kilomita igana na makumi ataano na ibiri kuruga aho, baahika Karakisa omu Bayudaaya abarikwetwa Abatubiyaani. 18Kwonka omuri ekyo kyanga tibaashangayo Timoteeho, ahabw'okuba akaba yaakirugiremu ataine ki akozire, kureka okutsiga omu mwanya gumwe ekigo ky'abaserukare ekigumire munonga. 19Desiteeyo na Sosipateeri abakuru b'amahe ga Makabeho, baagyenda baacwekyereza abu Timoteeho yaatsigire omuri ekyo kigo, abarikweshumba abantu kakumi. 20Reero Makabeho yaatebeekanisa engabo ze, yaazibaganisamu ebicweka, yaataho ab'okuzikurira; atyo yairuka abingire Timoteeho, owaabaire aine abantu akasiriira kamwe n'obukumi bubiri abarikugyendesa amaguru, n'ab'ahambaraasi enkumi ibiri na magana ataano. 21Timoteeho ku yaamanyire ngu Yuda ari haihi kumuhambya, yaayohereza abakazi n'abaana n'esika omu mwanya gurikwetwa Karinaimu, ogwabaire gutarikurahuka kugotwa kandi gugumire kuhikwamu, ahabw'obufunda bw'emihanda erikuzayo. 22Kwonka abazigu ku baayecuzire omutwe gw'eihe rya Yuda ogw'okubanza, kandi baabonekyerwa Ogwo oreeba byona, baitwa obwoba, baatiina, bairuka, baahunga nibatoora oku n'oku; abamwe baahutaazibwa abantu baabo n'abandi baayetunga ahari zaarurara zaabo. 23Yuda yaagumizamu ababingire n'engoga, naashogoitesa rurara ezo nkozi z'ebibi, yaacwekyereza atyo abantu baingi abarikuhika nk'obukumi bushatu.
24Timoteeho nawe yaahambwa Dositeeyo na Sosipateeri n'engabo zaabo. Kwonka yaabeeshengyereza n'amengye maingi ku bamureka akagyenda buhooro; ahabw'okuba akaba akwatsire abazaire b'abaingi omuribo n'abanyaruganda b'abamwe, ngu kuri naaba atarekwirwe, na bariya tibarikwija kugirirwa esaasi. 25Ku yaaherize kubagambira bingi, naahamya ku arikwija kubabagarurira batakozirweho kabi, nabo ahabw'okwenda kukiza beene waabo, baamurekura yaagyenda. 26Bwanyima Yuda yaaza kuteera Karinaimu n'endaaro ya Atarigaati, yaitirayo abantu obukumi bubiri n'enkumi itaano.
Yuda okuraba Efurooni na Sikutoopoli
27Yuda ku yaaherize kwita abo bantu n'okubacwekyereza, yaaza kuteera Efurooni, orurembo rw'ekigo kigumire oru Lisiya yaabaire atwiremu n'enyanja y'abantu b'amahanga maingi. Abatsigazi baayo emanzi baatenga orugamba omu maisho g'ebigo, baabagungira n'amaani, ahabw'okuba okwo hakaba hariyo amabiikiro mahango g'ebyoma by'orugamba n'enjungu. 28Kwonka Abayudaaya baahoogyera Nyakusinga osheenyaguza obushoboorozi bwe amaani g'abazigu, baahamba orwo rurembo, baita n'abantu baingi abaabaire barurimu, abarikuhika obukumi bubiri n'enkumi itaano.
29Ku baarugire okwo baayehuuta baaza Sikutoopoli, oruri kilomita igana na makumi abiri okuruga Yerusalemu. 30Kwonka Abayudaaya abarutwiremu ku baabahamiize ku abantu ba Sikutoopoli babainiire omutima murungi, kandi ku barikubakorera eby'embabazi bagwirweho ebihikiirizi, 31na banu baabasiima, baabehanangiriza kuguma nibatwaza batyo abantu b'eihanga ryabo omu biro ebiriija. Mpaho bainamuka Yerusalemu, Obugyenyi bwa Wiiki buri haihi kubaho.
Ehururu y'okuteera Gorigiya
32Ekiro kikuru ekyetwa Pentekooti ku kyahwaire, baayehuuta kuza kuteera Gorigiya omutegyeki mukuru owa Idumaaya. 33Nawe yaarugayo n'abarwani enkumi ishatu abarikugyendesa amaguru n'ab'ahambaraasi magana ana. 34Ku baabugabuganiire omu rugamba, Abayudaaya bakye baitwa. 35Kwonka omuntu orikwetwa Dositeeyo ow'omu Bakenoori, owaabaire atembire embaraasi kandi ari omushaija w'enkubito, yaakwata Gorigiya, yaasikura omunagiro gwe, yaamukurura n'amaani maingi, naayenda kutwara ogwo mwinazi ahuriire, kwonka omwe omu b'ahambaraasi z'Abaturaako yaamusyokyera, yaamutemaho omukono. Gorigiya yaakira atyo, yaarugaho yaahika Marisa.
36Esidiriasi n'engabo ze ku baarwaine okumara omwanya muraingwa, baaruha; Yuda yaahoogyera Mukama naamushaba kweyoreka ku akwataniise nabo, kandi ku ari omwebembezi waabo omuri orwo rugamba. 37Mpaho omu rurimi rwa baishenkurubo yaateera enduuru y'okuhuruza, yaakuratsaho n'ebyeshongoro, bwanyima yaateera engabo za Gorigiya zitamwetegire, yaazituntumura.
Okutamba ekitambo ahabw'abafiire
38Ebyo ku byahwaire Yuda yaarundaana engabo ze yaaza omu rurembo Adulaamu. Ekiro kya mushanju ku kyabaire kiri haihi kuhika, baayeyeza nk'oku omucwe gwabo guri; baakorerayo emigyenzo ya Sabato.
39Aha izooba ryakuratsireho ku baareebire ngu omu bunaku obwo nikyetengyerwa kimwe, Yuda n'engabo ze baaza kwanduura emitumbi y'abafiire, n'okugireeta ekaziikwa hamwe na beene waabo omu bituuro bya baishenkurubo. 40Kwonka omu kijwaro kya buri omwe omu baafiire, baashangamu engisha z'emandwa za Yamuniya, ezi eiteeka ririkuzibira Abayudaaya kujwara. Haza boona baakimanyira kimwe ku ekyo nikyo kyareeteire abo bantu kwitwa. 41Batyo boona baahimbisa Mukama omuramuzi ohikiriire oshuuruura ebisherekirwe, ahabw'eki yaakozire. 42Bwanyima baashaba nibeeshengyereza Ruhanga, ngu ekyo kibi ki baakozire kibaihirweho kimwe. Egyo manzi Yuda yaayehanangiriza abo bantu kwetantara ebibi, ahabw'okuba bakeereebera n'agaabo ekyagweraire abaafiire nibaturwa ekibi kyabo. 43Bwanyima Yuda omwebembezi w'Abayudaaya akashorooza empiiha omu bantu be, yaarundaana ahari buri muntu ebicweka by'efeeza ebyateerainwe bikahika nk'omutwaro gumwe; yaabyohereza Yerusalemu kuziihamu ekitambo ky'okukarabira ekibi. Omu kutwaza atyo akakora ekintu kirungi munonga kandi ky'ekitiinwa, naateekateeka munonga aha by'okuzooka. 44Manya kuri yaabaire ataine matsiko ngu abaafiire baryazooka, kikaabaire kitaine mugasho kandi kiri eky'obushema okushabira abaafiire; 45kwonka ku araabe yaateekateekire aha kihembo ky'ekitiinwa ekibiikiirwe abafa nibatiina Ruhanga, ekiteekateeko kye ekyo kikaba ekirikwera kandi eky'okutiina Ruhanga. N'ahabw'ekyo akahongyerera abaafiire, ngu babone kujunwa ebibi byabo.
Ebya Antiyoko V na Lisiya n'eby'okufa kwa Menelaaho
Currently Selected:
2 Maka 12: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.