2 Maka 10
10
1Omu bunaku obwo Makabeho na bagyenzi be, Mukama abeebembeire, bakagaruraho Nyaruju n'orurembo. 2Baasheenyagura amatambiro agaabaire gombekirwe Abanyamahanga omu mwanya oguteeranirwamu abantu, baacwekyereza n'endaaro zaabo. 3Baayeza omwanya ogurikwera, baayombeka erindi itambiro ry'okutambiraho ebitambo. Reero ku baaherize kutunga omuriro gu baihire omu kuhondesa ekyoma aha ibaare, baatamba ebitambo haahingwireho emyaka ebiri, baayoteza obubaani, baahemba amatabaaza, baataho omugaati gw'okumurikira Ruhanga. 4Ku baaherize kukora ebyo, baayerambika ahansi bajuumaire, baayeshengyereza Mukama ngu batarigaruka kugwerwa obugwe nk'obwo, kureka ngu ku karibatanda baakora ebibi, abe niwe yaabeehanira naabagumisiririza, kutari kubarekurira Abanyamahanga barikurogota kandi abainazi. 5Aha izooba eri Omwanya Ogurikwera gwahagariziibweho Abanyamahanga, niryo gwayereziibweho, nikwo kugira ngu aha kya abiri na bitaano eky'okwezi Kisileevu. 6Baamara ebiro munaana nibakora omukoro gw'okugyeeza bashemereirwe, nk'oku baakozire Obugyenyi bw'Ensiisira, nibaijuka ku hatakahingwireho mwanya muraingwa obu baabukora nibazengyerera omu nshozi n'omu nyanga nk'enyamaishwa. 7Batyo baakwata enkoni zihunzirwe ebishaba n'amataagi marungi n'enkindo baayeshongora ebyeshongoro by'okusiima, nibabyeshongorera owaababaasiise kuhika aha kwezibwa kw'Omwanya gwe Ogurikwera. 8Baataho ekiragiro ky'abantu boona, kandi baahamya ngu eihanga ry'Abayudaaya rigume ririnde ebiro ebyo buri mwaka.
9Omuheru gwa Antiyoko owaabaire naayetwa Epifane, nikwo gwabaire gutyo.
Eby'ekihemu kya Putolemaayo Makurooni
10Mbwenu twaza kubatebeza ebyabaireho omu busingye bwa Antiyoko Eupatoori mutabani w'ogwo mushaija otarikutiina Ruhanga, kandi nitwija kubagambira nitucwera hagufu, ebihikiirizi bikuru ebyareetsirwe engamba. 11Ogwo mushaija ku yaahungwire obugabe, yaatoorana Lisiya kutegyeka eihanga, n'okuba omutegyeki mukuru wa Koilesiriya na Foinikiya. 12Reero Putolemaayo owaabaire naayetwa Makurooni, niwe yaabandize kukorera Abayudaaya eby'obwinganisa obu baabaire bakozirwe kubi, yaateeraho kuguma aine obusingye nabo. 13Ekyarugiremu banywani b'omugabe baamurega ahari Eupatoori. Ahi yaabaire aza hoona, ahurira abantu nibamweta endeebya, ngu ahabw'okuba akaba atsigireho ekirwa Kupuro, eki Filomeetoro yaabaire amukwatsize, yaaza owa Antiyoko Epifane. Ku yaaremirwe kwetungira eiziina rirungi omu muringo gwe, yaayeha obushegu yaafa.
Ebya Gorigiya n'ebigo bya Idumaaya
14Gorigiya ku yaabaire omutegyeki omukuru w'ekyo kyanga, yaagira eihe ry'abaguririirwe kandi yaacwa obwengye kurwanisa Abayudaaya. 15Abaidumaaya nabo abaabaire nibategyeka ebigo bikuru by'okwerindiramu, baaguma nibarahura Abayudaaya. Bakaba baakiira ababingirwe Yerusalemu, haza baaguma nibabaganzya. 16Kwonka Makabeho n'engabo ze ku baaherize kweshengyereza munonga n'okushaba Ruhanga kubakombeerera, baasyoka, baateera ebigo by'Abaidumaaya eby'okwerindiramu. 17Ku baabafundiriize munonga, baakubuura egyo myanya, baabinga abaabaire nibarwanira aha bisiika, baita abu baabugabugaine nabo boona, batyo baita abantu obukumi bubiri n'okukiraho.
18Abandi abarikweshumba enkumi mwenda ku baahungiire omu minaara ebiri egumire munonga, kandi eine ebirikubabaasisa kugungira ababagotsire, 19Makabeho yaatsigira Simooni na Yosefu na Zakaayo n'engabo ze eihe ririkubaasa kubagota; we yaaza omu myanya ei yaabaire naayetengwamu munonga. 20Kwonka abashaija abu Simooni yaabaire aine, abaabaire baine omururu gw'empiiha, abantu b'omuri egyo minaara bakabaha enguzi. Ku baaherize kuheebwa shilingi obusiriira bushatu n'emitwaro etaano, baareka abandi baatoroka. 21Makabeho ku yaahuriire ekyabaireho ekyo, yaateerana abakuru b'amahe, yaatabaariza abo bashaija orubanja rw'okutunda beene waabo empiiha, bakareka abazigu baabo kubarwanisa. 22Atyo aita abo bashaija endeebya, ahamba eminaara yombi. 23Yaahiirwa atyo, yaasingura engamba zi yaarwaine, yaacwekyereza abantu barikweshumba obukumi bubiri ab'omu bigo byombi.
Yuda okusingura Timoteeho akakwata Gazara
24Omu biro ebyo Timoteeho owaabaire asingwirwe Abayudaaya bwabiso, akahuruza eihe rihango munonga ry'abaguririirwe, yaarundaana ab'ahambaraasi baingi naabaiha Asiya, yaija amaririire kuteera Buyudaaya nk'eihunga. 25Ku yairiire haihi, Makabeho n'abashaija be baayeshuka eiju omu mitwe, baayezirika ebiguniya nibeeshengyereza Ruhanga. 26Ku baajuumaire aha matembero g'omu maisho g'eitambiro, baamweshengyereza ku abagirira embabazi, akaba omuzigu w'abazigu baabo n'omubisha w'ababisha baabo, nk'oku eiteeka ririkugira. 27Ku baimukire baaheza kushaba, baakwata eby'okurwanisa, bagyenda omwanya gwiriireyo okuruga aha rurembo, kandi ku baahikire haihi n'abazigu baayemerera. 28Ku bwabaire nibutaagurukana buti, amahe gombi gaabugabugana kurwana, erimwe nirihiga kugyenderwa gye n'okusingura, ti habw'obumanzi bwaryo, kureka habw'okwesiga Mukama, kwonka erindi nirihindura ekishinjo omwebembezi waaryo omu kurwana.
29Orugamba ku rwashaariire, abazigu baabonekyerwa abashaija bataano barikumurinkana nibaruga omu iguru, batembire embaraasi ziine ebyoma by'ezaabu ebirikuzitegyeka beebembeire Abayudaaya. 30Baayehinguririza Makabeho, nibamurindisa eby'okwekingiza omu rugamba hamwe n'eby'okurwanisa, ngu abazigu batakaamuhutaaza. Haza obwo baayohora emyambi n'emirabyo y'enkuba ahari abo babisha. Banu ku baaburaburiirwe, baahuma, baagwa omu kajuyango, baataataana. 31Haafa abantu obukumi bubiri na magana ataano, n'ab'ahambaraasi magana mukaaga.
32Timoteeho we yaahungira omu kigo kirikwetwa Gazara, ekirinzirwe omu muringo gw'omutaano, ekyabaire nikitegyekwa Keereya omukuru w'amahe. 33Makabeho n'abashaija be baashemererwa, ekyo kigo baakigotera ebiro bina. 34Abaabaire bakirimu ahabw'okwesiga ogwo mwanya gugumire, baarogota munonga nibakabuka ebigambo bibi. 35Aha izooba rya kataano omushekye ku gwabaire nigujuguta, abatsigazi makumi abiri b'omu ihe rya Makabeho ku baitsirwe ekiniga ahabw'okwo kurogota, baasheenya ekigo n'obumanzi, kandi baita buri muntu ou baashangamu baine ekiniga kingi. 36Abandi abaizire nabo baaziguuruka abarikwerwanaho, baayotsya eminaara, baayatsya emiriro, baahemberera abo barogotsi bahuriire. Abandi baahenda amarembo, baagaigurira eihe rya Makabeho ryona, baakwata orurembo. 37Baita Timoteeho owaabaire ayesherekire omu kiziba, hamwe na mwene ishe Keereya na Apolofaane. 38Ku baaherize kukora ebyo, baasiima Mukama ogiriire Isiraeli embabazi ezirikwingana zityo, akabaha obusinguzi, nibamweshongorera ebyeshongoro by'okumusingiza.
Lisiya okuteera Abayudaaya
Currently Selected:
2 Maka 10: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.