Sélimɛ 22

Kulocɛliɛ wi 'Birayima puu nɛ̀ wéli

1Kele gálì ke mìɛni 'kpíʔiligele kàduʔumɛ gè, a Kulocɛliɛ 'Birayima puu nɛ̀ wéli, nɛ́ wi yeri nɛ́ jo: «Birayima yo !»

A Birayima 'suɔ nɛ́ jo: «Coo‑i !»

2A Kulocɛliɛ 'wi yɛ: «‑Muɔ jaa kɔ́ri wè, muɔ jaa ŋáà nigbe wè, ŋàa wi 'muɔ dɛ́ni wè, Siaga wè, mari waa nɛ́ wi ní Mɔriya tɛ́nimɛ nī bè, kire tiʔɛ nī gè ma sa wi kpíʔile kakuɔrɔ kaasuʔuro#22.2 Kakuɔrɔ kaasuʔuro: Ti yé puu a pe nɛ̂ yajuʔu kɔni gè nɛ̀ ki taʔa gbùʔɔrɔdiʔɛ yafanʔa nɛ̄ gè, níɛ̀ ki sórigo ki mìɛni gè, nɛ̀ kɛn Yewe mɛ́, bè kapiʔile láʔa gèle., nyagurugo káà nɛ̄ gàa m'bé tìɛ muɔ nɛ̄ gè.»

3A Birayima 'yɛ̀ sínbiniwuuro nī dè, nɛ̀ kásiin wáligi yè, nyàa ní wi báa kàsun le gè, kakuɔrɔ kaasuʔuro wuʔu gè. Nɛ́ wi sèfɛnnɛ gbòbori lè nɛ́ tugoro puɔ dè ni nɛ̀, nɛ́ wi baakuɔlɔ nàgapunminɔ siin kɔ́ri nɛ́ fàri wi jaa Siaga nɛ̄ wè. A wi 'yɛ̀ nɛ̀ kɛ́ tiʔɛ mɛ́ gè gàa Kulocɛliɛ cé tìɛ wi nɛ̄ gè.

4A pe 'tánʔa cɛnyɛ taanri, a Birayima kɛ́nì yiʔɛ yɛ̀gɛ gè nɛ̀ wéli nɛ́ tiʔɛ nyaa gè baa liilige gàa Kulocɛliɛ yé tìɛ wi nɛ̄ gè. 5A Birayima 'ki juu wi baakuɔlɔ mɛ́ bèle nɛ́ jo: «Ye‑ mi sige náʔa gè nɛ́ sèfɛnnɛ ní lè; mi nɛ́ mi jaa ní wè, weli bé kɛ́ baa, bè sa Kulocɛliɛ gbùʔɔrɔ wè, bé koli de báan yeli kúrugu.»

6A Birayima 'kásiin líɛ yè nyàa ní wi báa kàsun le gè, kakuɔrɔ kaasuʔuro wuʔu gè, nɛ̀ yi tugo wi jaa Siaga nɛ̄ wè, nɛ́ kàsunnɛganʔana kálì kɔ̀n, nɛ́ ŋɔnɔ líɛ lè, a pe mìɛni siin 'pínɛ nɛ waa.

7A Siaga kɛ́nì wi tuu Birayima yúgo wè nɛ́ jo: «Aba yo !»

A wi 'suɔ nɛ́ jo: «Mi nɛ lúru muɔ mɛ́, nɛ jaa.»

A jaafɔli wi sí jo: «ʔá ! Kàsun n'gɛ, nɛ́ kásiin ní yè, ʔá ! Sé sí kakuɔrɔ sìnbuɔ wi yē ?»

8A Birayima wi 'jo: «Nɛ jaa, Kulocɛliɛ tíimɛ wi báa kakuɔrɔ sìnbuɔ kɛn wè.»

A pe mìɛni siin 'pínɛ nɛ waa.

9A pe sɛ́nì nɔ̀ tiʔɛ nɛ̄ gè gàa Kulocɛliɛ cé tìɛ wi nɛ̄ gè. Kire tiʔɛ nī gè, a Birayima 'gbùʔɔrɔdiʔɛ káà faan, nɛ́ kásiin líɛ yè nɛ̀ taʔa baa, nɛ́ wi jaa Siaga tɔliyɔ puɔ yè nɛ́ wi kiyɛ puɔ yè, nɛ́ wi líɛ nɛ̀ taʔa kásiin naamɛ gè, gbùʔɔrɔdiʔɛ nɛ̄ gè. 10A Birayima 'kɔli sáʔa gè nɛ̀ ŋɔnɔ líɛ lè bè wi jaa kɔni wè.

11Nɛ̀ ki yaʔa a Yewe tundunwɔ wi 'yékpoli wáa lè nyìʔɛnɛ nī lè, nɛ́ jo: «Birayima ! Birayima !»

A wi 'suɔ: «Coo‑i !»

12A Yewe tundunwɔ wi ń'nɛ̀ jo: «Fǎga muɔ kɔli taʔa gè nàgabile nɛ̄ lè, fǎga kapiʔi kpíʔile wi nɛ̄ʔ. Mi nyɛ́nì ki cɛ́n muɔ nɛ fìʔɛ́ Kulocɛliɛ nɛ̄, kire nɛ̄ muɔ sì cíi bè muɔ jaa kɛn wè m'mɛ́ʔ, muɔ jaa nigbe wèʔ.»

13A Birayima 'yiʔɛ yɛ̀gɛ gè nɛ́ sìnbapɔli wáà nyaa nyɛgɛlɛ ní gèle nyárigɛlɛ kákpobile nī. A Birayima sɛ́nì sìnbapɔli cò wè nɛ̀ pɛ́nì wi kpúu kakuɔrɔ kaasuʔuro wi jaa sìndiʔɛ nī gè. 14A Birayima 'tiʔɛ gáà ki míʔɛ le gè nɛ ki yeri: Yewe bága we kɛn. Kire nɛ̄ a pe 'kò nɛ ni wáari kàsiile, nɛ́ jo: Yewe nyagurugo naamɛ gè, wi bé we kɛn.

15A Yewe tundunwɔ wi ń'nɛ̀ Birayima yeri wè taziinwuʔu nɛ̄ gè nyìʔɛnɛ nī lè 16nɛ́ jo: «Ti n'dɛ dàa Yewe 'juu dè: Mi 'kàli nìɛ nɛ̄, bɛ̀ muɔ 'fɔ̀li nɛ̀ gàa kpíʔile gè, bɛ̀ muɔ sì cíi bè muɔ jaa kɛn wè m'mɛ́ wèʔ, muɔ jaa nigbe wèʔ, 17kányiʔɛ nɛ̄ m'bé mi kajɛ̀ngɛ taʔa gè muɔ nɛ̄ bè muɔ siimɛ niʔɛ bè. M'bé pi kpíʔile nìʔɛmɛ bɛ̀ ŋɔgɔlɔ tíɛlɛ gèle, nɛ́ bɛ̀ kuʔɔjii gògoyo dàrimiʔɛ tíɛlɛ gè. Muɔ siimɛ pi bé pe leguulo jáa bèle bè fànʔa taa pe kàaya nɛ̄ yè. 18Muɔ siimɛ bè, pire duniya siɛnnɛ pe mìɛni bé bari wéli, béri diba tari wè pìye nɛ̄, nɛ́ ki cɛ́n muɔ nyɛ́nì lúʔu m'mɛ́.»

19A Birayima 'tìgi nyagurugo nɛ̄ gè nɛ̀ pɛn wi baakuɔlɔ kúrugu bèle, a pe 'yɛ̀ nɛ̀ pínɛ nɛ̀ kɛ́ Bɛri Seba mɛ́ wè. A Birayima 'kò baa Bɛri Seba tiʔɛ nī gè.

Nakɔri siimɛ bī bàa bè

20Kele gálì ke mìɛni kàduʔumɛ gè, a pe pɛ́nì ki juu Birayima mɛ́ wè nɛ́ jo Milika míɛni nyɛ́nì nàgabigele sii Nakɔri mɛ́, Birayima cɔni wè. 21Peli bīɛlɛ bàli bèle: Usi wī pìpeliwe wè, nɛ́ wi cɔni Busi wè, nɛ́ Kemiɛli ŋáà wi 'puu Arami tuu wè, 22nɛ́ Kɛsɛdi, nɛ́ Azo, nɛ́ Pilidasi, nɛ́ Yidilafi, nɛ́ Betuwɛli wè. 23Betuwɛli wire wī yé Erebɛka sii wè. Pìile bálì peli kataanri bīɛlɛ, Milika 'sii Nakɔri mɛ́ wè, Birayima cɔni wè.

24 Cɛliwɛ wáà 'puu Nakɔri mɛ́ ŋàa wiì cé pɔri wèʔ#22.24 Faʔa gè, Isirayɛli siɛnnɛ mɛ́ bèle, nàguɔ nɛ̂ cé gbɛ̀nɛ cɛliwɛ wáà líɛ ŋàa pɔrigɛnmɛ piì cé puu nubo nɛ́ wi celiɛdɛngɛwɛ ní wèʔ. Kire cuɔ ŋáà míɛni wi nɛ̂ puu baa kpáa nī gè. A wi yé pìile taa nɛ́ kire cuɔ ní wè, pìile pe liɛlɛ ni nɛ̂ puu baa pe tuu wi kɔrigɔ nī gè.. Pe 'puu nɛ wi ye Erewuma. A wire míɛni 'pìile sii Nakɔri mɛ́, peli pe 'puu: Teba wè, nɛ́ Gaʔama, nɛ́ Taʔasi, nɛ́ Maʔaka wè.

Currently Selected:

Sélimɛ 22: sev

Highlight

Copy