Sélimɛ 21

Sara nyɛ́nì Siaga sii wè

1A Yewe 'sɔ̀ngi nɛ̀ taa nɛ́ wi nyasiɛnrɛ ní dè, dàa wi yé juu Sara mɛ́ wè, a wi 'ki kpíʔile nɛ̀ yɛli nɛ́ ti ní. 2A Sara 'laala taa nɛ̀ nàgabile sii Birayima mɛ́ wè, nɛ̀ ki yaʔa wi cé liɛ nɛ̀ kúɔ. A ti mìɛni 'kpíʔile nɛ̀ yɛli nɛ́ lɛ̀lɛ náà ní Kulocɛliɛ cé tìɛ wè.

3A Birayima wi 'jaa wi míʔɛ le gè, ŋàa Sara cé sii wè, nɛ wi ye Siaga (ki kɔri wire wī: kátaanra pùɔ). 4Bà cɛnyɛ kataanri yi 'nyì yè, a Birayima wi 'wi jaa Siaga kɛnɛkɛnɛ wè nɛ̀ yɛli nɛ́ Kulocɛliɛ siɛnrɛ ní dè, dàa wi yé juu nɛ̀ gbɛ̀ngɛ dè. 5Bà Birayima 'liɛ nɛ̀ yiʔɛlɛ dabataan taa wè, a wi jaa Siaga wi 'sii.

6A Sara 'jo:

«Kulocɛliɛ 'fundaanra kaala

kpíʔile m'mɛ́ !

A siɛn ó siɛn 'ti lúʔu,

wi béri tíʔɛ nɛ́ mi ní.»

7A wi ń'nɛ̀ jo:

«Ŋáa wi cî ki juu

Birayima mɛ́ bé jo

mi Sara wè, m'bé pùɔ kɛn

wi‑ ŋɔri ?

Nɛ̀ sí ki yaʔa mi nyɛ́nì nàgabile sii wi mɛ́

wi liɛguɔrɔ nī dè.»

Birayima 'Agari nɛ́ Simayira cìra bèle

8A Siaga ga liɛ nɛ̀ láʔa yírimɛ nɛ̄ bè, a Birayima 'pùrɔgbuɔrɔ kpíʔile dè wi mɛ́ ki cɛngɛ gè. 9A Sara 'Agari jaa nyaa wè, wi 'wìi nyíɛnɛ Siaga nɛ̄ wè. Agari wire yé puu sùkulocuɔ, Ezipiti kùlo wuu wi 'puu, nɛ́ pùɔ sii Birayima mɛ́ wè.

10A Sara 'ki juu Birayima mɛ́ nɛ́ jo: «‑Sùkulocuɔ ŋáà cìra wè nɛ́ wi jaa ní wè, nɛ́ ki cɛ́n sùkulocuɔ ŋáà wi jaa wiǐ gbɛ̀ kɔrigɔ lìi gè nɛ́ mi jaa Siaga ní wèʔ.»

11A siɛnrɛ dáà ti 'Birayima fungo cúʔɔ gè, nɛ́ ki cɛ́n wire jaa míɛni wi 'puu Simayira wè. 12A Kulocɛliɛ wi 'ki juu Birayima mɛ́ nɛ́ jo: «Fǎga sùkulocuɔ ŋáà nɛ́ wi pùɔ kaala yaʔa lè ni‑ muɔ fungo cúʔɔ gèʔ. Ma Sara siɛnrɛ ti mìɛni lúʔu, nɛ́ ki cɛ́n Siaga wire wi bé muɔ míʔɛ yige gè, wire ní muɔ bé siimɛ taa bè. 13Gàa ki sùkulocuɔ wire jaa 'kúɔ wè, m'bé 'ki kpíʔile wi‑ kò kùpolo láà, nɛ́ ki cɛ́n Simayira wire míɛni yē muɔ pùɔ wáà.»

14A Birayima 'yɛ̀ faʔa sínbiniwuuro nī dè, nɛ̀ yaliire líɛ nɛ́ luʔɔ le gè sɛ̀ngɛ forigo nī, nɛ̀ ti tùɔn Agari nɛ̄ wè, nɛ́ pùɔ kɛn wè wi mɛ́, nɛ́ wi yɛ wiri waa. A wi sɛ́nì nyaari nɛ mári Bɛri Seba kpàanjali nɛ̄ wè, kàdɛnigbɛri tiʔɛ nī gè. 15Luʔɔ gáà ki 'puu sɛ̀ngɛ forigo nī gè, bà ki kɛ́nì kúɔ gè, a wi sɛ́nì pùɔ yaʔa wè tiipile láà láara, 16nɛ́ kɛ́ nɛ̀ sɛ́nì tɛ́ni liilige sandali ŋaʔa ŋɔgɛnmɛ#21.16 Sandali ŋaʔa ŋɔgɛnmɛ bè, ki bé gbɛ̀ nyaa ki 'líili nɛ̀ mɛtirile 100 félige kúɔ. baa yiʔɛ mɛ́ gè, nɛ́ ki cɛ́n wi 'puu nɛ ki nyu nɛ́ jo, wire wè caa bè wire pùɔ nyaa wè kùudiʔɛ nīʔ. A wi 'tɛ́ni baa kire tiʔɛ nī gè nɛ nyɛni nɛ yékpoli wáari lè.

17A Kulocɛliɛ 'nàgabile ni kɔngɔ lúʔu gè, a Kulocɛliɛ tundunwɔ 'kò baa nyìʔɛnɛ nī lè nɛ̀ Agari yeri nɛ́ jo: «Gáa gī baa, Agari ? Muɔ fǎga de fìʔɛ́ʔ ! Kulocɛliɛ nyɛ́nì nàgabile ni kɔngɔ lúʔu gè tiʔɛ gíì nī muɔ 'wi sínge wè. 18Yɛ̀, ma sa pùɔ yɛ̀gɛ wè, ma wi cò kɔli nɛ̄, nɛ́ ki cɛ́n m'bé wi kpíʔile wi‑ kò kùpolo láà.» 19A Kulocɛliɛ 'Agari yiʔɛ múgu gè, a wi 'kɔ̀lɔ wáà nyaa, a wi sɛ́nì luʔɔ kúu wi nī nɛ̀ le sɛ̀ngɛ forigo nī gè nɛ́ kàa kɛn nàgabile mɛ́ lè á ni‑ gbuɔ.

20,21A ki 'nyaa bɛ̀ Kulocɛliɛ 'puu nɛ́ pùɔ ní wè, a pùɔ wi pɛ́nì liɛ, a wi 'tɛ́ni baa waama kùlo nī lè, Paran kpàanjali nɛ̄ wè, nɛ̀ pɛ́nì kò siɛn wáà ŋàa wī sandali ŋɔgi gè. A wi yàa wi 'Ezipiti kùlo cuɔ wáà líɛ nɛ̀ kɛn wi mɛ́.

Birayima nɛ́ Abimɛlɛki pe 'bìɛ nigbe nɛ̄

22Kire lɛ̀lɛ nī lè, a Abimɛlɛki nɛ́ wi kapiɛngbuɔnnɔ kàfɔli ní wè, ŋàa pe 'ye Pikɔli wè, a wi pɛ́nì juu nɛ́ Birayima ní wè nɛ́ jo: «Weli 'ki nyaa Kulocɛliɛ yē nɛ́ muɔ ní muɔ kakpiʔiligele ke mìɛni nī. 23Píra ŋáà nī wè, ma kàli m'mɛ́ Kulocɛliɛ míʔɛ nɛ̄ gè náʔa gè, ma jo muɔ sì ga mi fáanniʔ, mi nɛ́ mi pìile ní bèle nɛ́ mi kàduʔumɛ pìile ní bèle, muɔ bága kacɛ̀ngɛ kpíʔile mi nɛ̄, bé ní kacɛ̀ngɛ kpíʔile kùlo mɛ́ lè nàa nī muɔ yē náʔa tɛ́niwɛ wè nɛ́ ní nabɔnwɔ wè, bɛ̀ mi nyɛ́nì kacɛ̀ngɛ kpíʔile muɔ nɛ̄ kɛnmɛ báà nɛ̄ bè.»

24A Birayima 'jo: «Mi 'kàli m'bé ki kpíʔile.» 25A Birayima 'tìgi Abimɛlɛki nɛ̄ kɔ̀lɔ siɛnrɛ nɛ̄, kɔ̀lɔ ŋáà Abimɛlɛki baakuɔlɔ pe cé suɔ Birayima mɛ́ wè fànʔa nɛ̄ gè.

26A Abimɛlɛki 'jo: «Mi sì ki cɛ́nʔ siɛn ŋáà wi 'kire kpíʔile gè, nɛ́ ki cɛ́n muɔ tíimɛ wè, muɔ sì yakaa juu m'mɛ́ʔ kire kɔli mɛ́ gè. A pàngɛ bɛ̀ʔ wè, mi fìɛ cɛ́nì ti lúʔu nɛ̀ nyaaʔ.»

27A Birayima 'sìnbaala cò, nɛ́ síkaala, nɛ́ nìɛyɛ, nɛ́ ti kɛn Abimɛlɛki mɛ́ wè, a pe siin pe 'kàli nɛ̀ kɛn pìye mɛ́. 28A Birayima 'sìnbaporipigele kɔlisiin cò nɛ̀ tɛ́ngɛ kiyeyɛ.

29A Abimɛlɛki 'ki juu Birayima mɛ́ wè, nɛ́ jo: «Gáa nɛ̄ muɔ sìnbaporipigele kɔlisiin gálì cò gèle nɛ̀ tɛ́ngɛ kiyeyɛ ?»

30A Birayima 'jo: «Muɔ 'yɛli bè sìnbaporipigele kɔlisiin gálì suɔ gèle, mi tíimɛ kɔli nī, kire bé puu fìɛ bè ki tìɛ mi mi nyɛ́nì kɔ̀lɔ ŋáà túgu wè.» 31Kire nɛ̄ a pe 'kò nɛ kire tiʔɛ yeri gè Bɛri Seba (ki kɔri wire wī: pe 'kàli)#21.31 Eburu siɛnrɛ nī dè, Bɛri Seba míʔɛ ki kɔri wire wī: sìnbapigele kɔlisiin kɔ̀lɔ; kire ga laa, we bé gbɛ̀ jo: kɔ̀lɔ ŋáà nɛ̄ pe 'kàli wè., nɛ́ ki cɛ́n kire tiʔɛ nī pe yé kàli nɛ̀ kɛn pìye mɛ́.

32Bà ki 'kpíʔile a pe 'kàli nɛ̀ kɛn pìye mɛ́ Bɛri Seba kɔ̀lɔ táanni wè. A Abimɛlɛki nɛ́ wi kapiɛngbuɔnnɔ kàfɔli ní wè, Pikɔli wè, a pe 'koli nɛ̀ kɛ́ Filisitiyé kùlo mɛ́ lè. 33A Birayima 'tiige káà cɔ́ri Bɛri Seba tiʔɛ nī gè; pe 'puu nɛ ki tiige gáà yeri gè tamarisi. A wi 'Yewe míʔɛ yeri gè baa kire tiʔɛ nī gè, nɛ̀ wi síɛri nɛ̀ wi gbùʔɔrɔ nɛ́ jo wire wī Lɛ̀gɛlɛ Ke Mìɛni Kulocɛliɛ wè. 34A Birayima wi 'tɛ́ni nɛ̀ mɔgɔ baa Filisitiyé kùlo nī lè.

Currently Selected:

Sélimɛ 21: sev

Highlight

Copy