Sélimɛ 23

Sara wi 'kùu

1A Sara 'liɛ nɛ̀ yiʔɛlɛ tekɔlini nɛ́ kɔlisiin (127) taa; keli ke 'puu Sara sìi yiʔɛlɛ gèle. 2A Sara 'kùu Kiriyati Ariba kàʔa nī. Piyē nɛ ki yeri míɛni Eburɔn kàʔa; kiī baa Kanaa kùlo nī lè.

A Birayima cuɔ wi ga kùu wè, a wi pɛ́ni kùugo kpínʔini gè níɛ nyɛni wi nɛ̄. 3A wi 'yɛ̀ nɛ̀ núgo kpúu táanni wè, nɛ̀ sɛ́nì juu nɛ́ Eti siɛnnɛ ní bèle nɛ́ jo: 4«Mi yē nabɔnwɔ wī, nɛ́ pɛ́nì tɛ́ni yeli sunʔɔmɔ ní bè. Ye‑ tɔ́ndiʔɛ kɛn m'mɛ́ mi‑ mi cuɔ tɔ́n wè.»

5A Eti siɛnnɛ pe 'siɛnnugoro kɛn dè Birayima mɛ́ wè nɛ́ jo: 6«Lúʔu weli mɛ́, weli kàfɔli. Kulocɛliɛ nyɛ́nì muɔ kpíʔile siɛnkpuɔwɔ weli sunʔɔmɔ nī bè. Sa muɔ cuɔ tɔ́n wè weli nyɛgɛ káà nī gìi ki 'muɔ dɛ́ni gè. Weli wàa sǐ gbɛ̀ cíi nyɛgɛ nɛ̄ muɔ mɛ́ bè muɔ cuɔ tɔ́n wèʔ.»

7A Birayima 'yɛ̀ nɛ̀ tuu nɛ̀ cúbulo kùlo ni siɛnnɛ yiʔɛ mɛ́ gè, Eti siɛnnɛ bèle, 8nɛ́ juu pe ní nɛ́ jo: «Mi nɛ yeli náari wī, a ki yē yeli 'yéri ki nɛ̄ mi‑ mi kpúu tɔ́n wè, ye‑ lúʔu m'mɛ́, yé Efurɔn náari mi kɛn, Zokari jaa wè, 9wi‑ nyaguruwiʔi kɛn gè m'mɛ́ gàa gī baa Makpela tiʔɛ nī gè, wire wuʔu gè, kiī baa wi siʔi kanyuɔ nɛ̄ gè; wi‑ ki lɔri juu dè m'mɛ́. M'bé ki suɔ yeli nyaamɛ nɛ̄ ki‑ puu mi cuɔ wi tɔ́ndiʔɛ.»

10Nɛ̀ ki cɛ́n Efurɔn wire 'puu tɛ́niwɛ Eti siɛnnɛ sunʔɔmɔ nī bè, wire tíimɛ 'puu Eti wuu. A wi 'siɛnnugoro kɛn dè Birayima mɛ́ wè nɛ́ yékpogbuɔlɔ ní a Eti siɛnnɛ pe 'ti lúʔu, bàli pe mìɛni pe 'puu nɛ jíin nàkpanʔa wìile nī lè, a wi 'jo: 11«ʔúnʔun, mi kàfɔli, lúʔu m'mɛ́, m'bé mi siʔi kɛn gè muɔ mɛ́ nɛ́ nyaguruwiʔi ní gè. Mi siɛnnɛ pe nyaamɛ nɛ̄, m'bé ki kɛn muɔ mɛ́. Ma sa muɔ kpúu tɔ́n wè.»

12A Birayima 'tuu nɛ̀ cúbulo kùlo ni siɛnnɛ yiʔɛ mɛ́ gè, 13nɛ̀ juu nɛ́ Efurɔn ní nɛ́ yékpogbuɔlɔ ní a kùlo ni siɛnnɛ pe 'ti lúʔu, nɛ́ jo:

«A ki yē muɔ 'fɔ̀li bè lúʔu m'mɛ́ wè, m'bé siʔi ki lɔri kɛn dè muɔ mɛ́. Ma fɔ̀li ki nɛ̄, ma ki lɔri suɔ dè m'mɛ́, bà m'bé sa mi cuɔ tɔ́n wè baa.»

14A Efurɔn ń'nɛ̀ juu nɛ́ Birayima ní wè nɛ́ jo: 15«Mi kàfɔli, lúʔu m'mɛ́, dàala náà lɔri dī walifiiwe walikpegele sirasiin (400) gèle o, kire yē gbɛ̀ligɛ lé mi nɛ́ muɔ sunʔɔmɔ ní bè ? Sa muɔ kpúu tɔ́n wè.»

16A Birayima 'fali nɛ̀ ki cɛ́n wali nyuɔ gáà Efurɔn 'puu nɛ caa gè, a wi 'fali nɛ̀ wali nyuɔ sàri gè Efurɔn mɛ́ wè, gàa wi yé juu gè á Eti siɛnnɛ pe 'ki lúʔu gè, walifiiwe walikpegele sirasiin (400) gèle, nɛ̀ yɛli nɛ́ yasuɔbarilɛ pe tɔ́rigɛnmɛ ní bè, kire lɛ̀lɛ nī lè.

17Bà ki 'kpíʔile a Birayima 'siʔi suɔ gè Efurɔn mɛ́ wè, Makpela tiʔɛ nī gè, gàa gī Mambire tiʔɛ táanni gè, siʔi gè nɛ́ nyaguruwiʔi ní gè, nɛ́ tiire ti míɛni ní dàa ti 'puu baa siʔi nī gè, nɛ́ dàa ti 'puu siʔi ki láʔagɛlɛ nɛ̄ gèle. 18A ki mìɛni 'kò Birayima wuʔu, Eti siɛnnɛ pe mìɛni nyaamɛ nɛ̄, bàli pe mìɛni pe 'puu nɛ báan nɛ jíin nàkpanʔa wìile nī lè.

19Bà tire 'tóri dè, a Birayima wi cuɔ 'Sara tɔ́n wè Makpela siʔi nyaguruwiʔi nī gè, gàa gī Mambire táanni wè, gàa piyē nɛ yeri Eburɔn kàʔa gè, kiī Kanaa kùlo nī lè. 20Bà sí ki 'kpíʔile a siʔi nɛ́ nyaguruwiʔi ní gè, á Eti siɛnnɛ pe 'ki pári Birayima mɛ́ wè, a ki 'kò Birayima siɛnnɛ tɔ́ndiʔɛ.

Currently Selected:

Sélimɛ 23: sev

Highlight

Copy