Lukase 16

Esagá nò nà ngàŋa fà’ gẅie à la pá’ legyè

1Yěsô gíŋe saga mbwo *ngàŋa kwò yé ngie: Atsɔ̌ ngàŋa mmó lǎ’ ńgẅiin ngàŋa fà’ gẅie à pǔ ńdíe shúm sé ntsèm. Mé fó lyɛ̌’ shwóŋó yé ngie à ngàŋa fà’ ŋwɛ́ cʉ’ʉ́ ńcʉŋte shúm sé cʉŋte. 2Á tóŋo yé ńzɛ́te yé ngie: N jǔ’ mé gɔɔn ngie ɔ̀ cʉ’ʉ́ ńgÿo pɔ́ lêkɔ́ lɛ? Pʉ́le sáŋ shúm sie n da cʉ́me mbwo gù éshwóŋó wɔ̀ɔn. Mèŋ, n cʉ’ʉ́ ńnyé ńkwoŋo ngie ɔ̀ líe shúm sɔ́ɔn mɔ́.

3Ngàŋa fà’ ŋwɛ́ jú’ ńkwaŋte ngie: Mèŋ n ge gÿo lêkɔ́ pá’ tá fà’ wɔ̀ɔn gee njwǒŋ mèŋ lɔɔn? N dɔɔn ngie n ge jʉ́’ ngwóŋ, n dɔg tʉ̀ nzɔ̌? Ńcʉ́’ʉ ngàŋ ndúɔ, mbà á ge gwɔ́ nò shʉ́ ná mèŋ. 4Ńńnéŋe tà ńgɔɔn ngie: N zsě pá’ mèŋ n ge gÿo tà fʉ̀’ gie mé kẅilé wɔ̀ɔn nà fà’ la, epʉ̀a kúe wɔ̀ɔn membʉ̀a mɔ́b, 5ńgÿo pú’u, ńtóŋo wɔ̌wɔ́ɔ gẅie à la gẅiin létoŋ njǔ mbwo tá fà’ we, ńzɛ́te mvɔ́g mvfò ngie, ɔɔ pá’a ńgẅiin láa gẅie ɔ̀ ge náa mbwo tá fà’ wɔ̀ɔn? 6Á gɔɔn ngie n gẅiin léná mèvɛ kúm nkÿo, ngàŋa fà’ gɔɔn ngie: Ŋwà’ne gie ɔ̀ la ŋwe’e á yɔɔn, ńcʉ́’ ŋwe’e pɔ́ móm ntʉ̀a fʉ̀’ɔɔn. 7Ńgɔɔn mbwo tsɔ̌ nyìŋ ngie: Ɔɔ pá’a ńgẅiin láa gẅie ɔ̀ ge náa mbwo tá fà’ wɔ̀ɔn? Á gɔɔn ngie: ngesáŋ ntsíŋ pɔ̀ɔn nkÿo. Á gɔɔn ngie: Ŋwà’ne jú yɔɔn, ńŋwe’e móm lefɔ̌ɔn fʉ̀’ɔɔn. 8Tá fà’ gÿo ńgyá ntí gie ngàŋa fà’ we lɔ̌g ḿbá’ legyè pú’u, ńcʉ́’ ńzẅíŋ zẅíŋ ngie legyè sé ée wó. Yěsô ma’a twó ngie: Áa nénʉ́ ngie pʉ̀a njÿó yɔɔn zsé lépá’ legyè ńdɔg ńtáŋte menò tsetsɛ̀ɛ pɔ́b, ńtɔ́g pʉ̀a pie é záb ntʉ́m wɔ́b nà Ssé.

Á té poŋ ngie nkáb zɔ ne sá’a pʉ̀a pie ée nzèm Ssé wɔ́

9Yěsô ma’a twó ngie: Pi lɔg gí shúm se yɔɔn tèpòŋ njÿó, ńkúu kwà’ shǔ gẅie é tsẅé té mì, à lá’ ńtyé fʉ̀’ gie sɛ̌ shúm ŋwɛ́ té nyé wó wɔ́, e Ssé lɔgɔ gẅi ńgʉa lá’ ye, pi tsẅé ńgwɔ́ wó. 10Mé lɔɔn ńcʉ́me mûɔ mémmó mbwo nyìŋ, á pɔ́ɔn mboŋó, mbà á ge tó gwɔ́ gie á gyɔ́ɔn, à gíŋe ḿbɔ́ɔn pɔ́ pú’u, ńcʉ́me mûɔ mémmó mbwo nyìŋ à tè pɔ́ɔn mboŋó wɔ́, mbà á ge tó gwɔ́ ye lÿò á le pɔ́ɔn mboŋó wɔ́. 11Pi lɔɔn tè ku’u lépɔ́ɔn shúm se yɔɔn njÿó ye tepòŋ wɔ́, mbà à lɔɔn ńgwɔ́ wɔ̌ cʉ́me kwà’ shúm se tʉ̀ nzẅìŋ mbwo pi? 12Pi lɔɔn tè zsé lépɔ́ɔn mmó nyìŋ ndyɛ̀’ɛ wɔ́, mbà wɔ̌ ge lá’ náa gie áa kwà’ gí mbwo pi?

13À lɔɔn ńgwɔ́ tsɔ̌ ngàŋa fà’ a le fa’a mbwo metá fà’ mépʉ́a wɔ́. À gÿo pú’u, mbà à ge pʉ̀a tsɔ̌, é kwoŋo tsɔ̌, ńké tè pú’u wɔ́, mbà à ge jú’ ncwò wetsɔ̌, é piŋ gwága wetsɔ̌. À lɔɔn ńgwɔ́ pi le ne ńzába ntʉ́m nà Ssé, ńgíŋe ne ńzába nà nkáb wɔ́.

Pà farisay kwoŋ nkáb ńcʉa nò Ssé

14Yěsô gɔɔn pú’u, pà *farisay pie é laa jʉ’ó jú’, ḿbú sóon, ńgẅe yé, mélà’mie pɔ́ gɔ’ nkáb tɛ’. 15Á gɔɔn mbwo pɔ́b ngie: Pi pɛ̂, pi zɔ̌g ḿbab pʉ̀a ngie pi ee pʉ̀a mbòŋo, tá’, e Ssé ké ńne ńzsé pá’ letʉ́m sí ée pú’u. Pi zsé ngie: Anò gie pʉ̀a mesoŋ gyá ngie áa nò tɛ’, áa mvfò Ssé ńgwɔ́ nò shʉ́.

Lefùɔ Ssé cʉa mbʉ̌ me fʉ̀’ʉ mvfò

(Matio 11.12-13)

16Yěsô gíŋe ńgɔɔn ngie: Jâŋ ka gwaa tó, mé ne ńjú’u pɔ́ mbʉ̌ Mǒsê, pɔ́ menò *pàntsẅì nkʉ̀ Ssé, mé ée fʉ̀’ɔɔn ńne ńtsẅii Nkʉ̀ Mbòŋo ńdɔgɔ́ ḿbÿé ngie *lefùɔ Ssé zyě létó. Awɔ̌wɔ́ɔ ne ńkaga tʉ̀ lézẅíŋ ngie Ssé zɔ cʉ’ʉ́ sá’a yé.

17Tá n ké tě ńdɔgɔ ńgɔɔn ngie *lepʉ̌ Mǒsê mǎg wɔ́, lefaŋ pɔ́ tsetsá’ ge lá’ mag tá á le tʉ, à lɔɔn ńgwɔ́ múɔ mélǎga nò lê pilé, á le lá’ ḿbyé nà *lepʉ̌ Mǒsê wɔ́.

18Áa pú’u, tá mèŋ n dɔgɔ ńgɔɔn ngie: Nyìŋ lɔɔn ńjwoŋo nzwě we, ńzɔ́’ɔ tsɔ̌, mbà pɔ́ wéwɛ̌ gwɔ́ pɔ́ nà nò gÿɛ́. Nyìŋ gẅie à pǐŋ ńzɔ́’ɔ manzwě gẅie ndǔm we jwoŋó yé, mbà à gÿó pɔ́ gÿɛ́.

Esagá nò ná nò ngàŋ nkáb pɔ́ Nǎzalo

19Yěsô gíŋe ńgɔɔn ngie: Tsɔ̌ ngàŋ nkáb lǎ’ ńgwɔ́ wó, ńnéŋe ḿma’a menzsǒ mie é poŋ, ḿbiŋ ńcÿɔ́g nkáb tɛ’, ńgwɔ́ lyɛ̌’ ntsèm, ńjÿó yé pɔ́ línɔ́ɔn. 20Atsɔ̌ mbóŋ gwɔ́ yé wó, lezíŋ sé gwɔ́ le Nǎzalo. Mefʉ̌ŋ pú ńgwɔ́ ná yé tɛ’, á nuŋe ncwò ndá ngàŋ nkáb ŋwɛ́, 21ńně ńtsɔ́ɔn ngie kà à lɔɔn ńgwɔ́ ngàŋ nkáb pfɛ́ɛ mmó tà mé gwá’a pfwɔ́’, á lagte wɔ́, tá’, ńnuŋe jʉ’ó, ngwé zɔ̌ ne ńtóo ńdaŋa mefʉ̌ŋ mé.

22Ngàŋ ngɔ́’ gÿo ńkwé, *mecÿɔ́’ Ssé tó ńkaa yé, ńgʉa ńnéŋe lejʉ́ŋ Ábalam. Ngàŋ nkáb gÿo ńkwé yé, mé kaa yé ńtúŋ. 23Á kúu lá’ mepfó, ḿbú ne ńgyá ngɔ́’ tɛ’, ḿma’ lejÿɔ́g ngʉ̀a shʉ̀shʉ̀a, ńgyá Ábalam, Nǎzalo ńnéŋe lejʉ́ŋ ye. 24Ngàŋ nkáb zye léga’te ngie: Tá wɔ̀ɔn Ábalam, tsɔ́ɔn mezìŋe mɔ́ɔn, ńtúmo Nǎzalo, à cÿɔ’ɔ múɔ tepwó we á nà ntse ńdɔg ńtó, ńcʉ́me nà lʉ́m yɔ́ɔn. Á nue m bǔ ńne ńgyá ngɔ́’ tsɛ̀ɛ mmɔ̌g wɔɔn tɛ’. 25Ábalam tsɔ́’ɔ mbwo yé ngie: Míŋ wɔ̀ɔn, kímte pá’ ɔ̀ ka nyé tsɛ̀ɛ njÿó ńgwɔ́ tsɛ̀ɛ fù’, Nǎzalo ne ńgyá ngɔ́’, á piŋ ńgwɔ́ fʉ̀’ɔɔn, Nǎzalo gwɔ́ tsɛ̀ɛ fù’, ɔ̀ ne ńgyá ngɔ́’. 26Á zɔɔn ńgwaa gwɔ́, máamáa sém gwɔ́ tsetsɛ̀ɛ pege, tà ńgwɔ́ gie nyìŋ lɔɔn fó jʉ’ɔɔn éfa’a légʉa jʉ’ɛ, á le ku’, éfó jʉ’ɛ fa’a létóo jʉ’ɔɔn, á le ku’. 27Ngàŋ nkáb gɔɔn né yé ngie: Tá wɔ̀ɔn, e sẅiŋte gú, ńdyɛ́’ ɔ̀ túmo Nǎzalo, á gʉa mbʉ̀a peg. 28Á nue mefɛ́ pɔ́ɔn pe mbàŋa ée mbʉ̀a métʉ̀a. Mèŋ n tsɔ́ɔn ngie Nǎzalo piŋ ńkága tuŋó yɔ́b, ńnáa wɔ́b ntÿɔ́gɔ́ ḿbɔ́gɔ pá’ pɔ́ ge lá’ gíŋe tó kú yɔ́b tsɛ̀ɛ yɔɔn jʉ’e ngɔ́’. 29Ábalam tsɔ́’ɔ mbwo yé ngie, mefɛ́ pú gẅiin ŋwà’ne Mǒsê, ńgíŋe ńgẅiin me *pàntsẅì nkʉ̀ Ssé. Pɔ́ jú’ ntÿɔgɔ́ gẅie ée tsɛ̀ɛ wó. 30Ngàŋ nkáb gɔɔn ngie: Ngǎŋ, mbà tá wɔ̀ɔn Ábalam, áa nò tá’, nyìŋ lɔɔn fó lá’ mepfó ḿbiŋ ńtó shwóŋó wɔ́b, mbà pɔ́ ge jú’, é kúbe mà wɔ́b. 31Tá Ábalam gɔɔn né yé ngie: Pɔ́ lɔɔn tè jú’u shwóŋè Mǒsê mbɔɔ ye *pàntsẅì nkʉ̀ Ssé wɔ́, mbà nyìŋ zɔɔn ńzím zím, ńtó shwóŋó wɔ́b pɔ́ kɔ́ wɔ́, pɔ́ le zẅíŋ.

Currently Selected:

Lukase 16: NGBM

Highlight

Copy