Lukase 17

Pá’ nyìŋ Yěsô ńgwɔ́ á lÿɔ́’te mefʉ̀a

(Matio 18.6-7; Malékuse 9.42)

1Yěsô gíŋe ńgɔɔn né ngàŋa nkwò yé ngie: Ammó gie ńgwɔ́ mé fó mǒ fʉa nò, á lɔɔn ńgwɔ́ á le zág. Tá’, ashÿó tepòŋ, aa nyìŋ gẅie à ge gÿo nyìŋ fʉa nò. 2Mvfò ee pá’ ńgwɔ́ mé cʉŋe máamáa tóon lóŋ ngàŋ, ḿma’a yé tsɛ̀ɛ mmí, ńcʉa pá’ à lɔɔn ńgwɔ́ mé nyé yé, á gÿo tà tsɔ̌ tà’ ná mecʉ̀cʉ̀ŋ pɔ́ɔn cʉa ná yé tá fʉa nò. 3Pi ké ńdaga twó gí nà shwóŋè gí.

Mémá nyìŋ lɔɔn ńgÿo nò tepòŋ ná yé, á pʉ́le pʉlé shwóŋó yé, á zẅíŋe mefʉ̀a, á lege ńnáa mbwo yé. 4Efó ńzɔ́gɔ ta’a lyɛ̌’ ńgÿo nò tepòŋ ná yé pɔ́ ngʉ̀a sɔɔn mbʉ́a, ḿbiŋ ńtó ngʉ̀a sɔɔn mbʉ́a, ńzẅíŋ mefʉ̀a mbwo yé, á lege ńnáa mbwo yé.

Pá’ à lɔɔn ńgwɔ́ nyìŋ gẅie à zẅiŋé Yěsô lɔg ńzáb ntʉ́m wé nà Ssé

(Matio 17.20)

5Megàŋa kwò Yěsô gɔɔn né yé ngie: Cʉ̀apʉ̀a, kẅéte wég lékẅi’i ńzáb ntʉ́m nà Ssé. 6Yěsô gɔɔn ngie, lesɔɔn sésɔg ée mmó ńkɔ́g tɛ’, nyìŋ gẅi zɔɔn ńzáb ntʉ́m wé nà Ssé mbɔɔ méjʉ’ pú’u, mbà à ge gɔɔn né tÿǒ gie á tyé lɛ ngie: Tsɔ́’ɔ ńgʉa ńtyé tsɛ̀ɛ mmí, à jú’ ncwò wé.

Epʉ̀a pie ée pe Yěsô gẅiin fa’a yɔ́b ńtsẅe

7Pege pí fʉ̀’ ngie nyìŋ gẅi gẅiin ngàŋa fà’, à lɔɔn ńzɔ́gɔ tsẅɛ ńjʉ́’ ngwóŋ, kà ńzɔ́g ḿpféle pɔ́ menɔ̀ɔn wɔ́, ńgÿo ḿbiŋ nzèm, mbà yé gẅie aa tá fà’ ge gɔɔn mbwo yé ngie: Gʉa ńnéŋe ssé letʉ ḿpfɛ́ɛ mmó? 8Né ngie à ge gɔɔn né yé pɔ́ ngie: Kúbe menzsǒ, ńcwoŋte shúm léjÿó sɔ́ɔn ńtÿɔ́g né mèŋ, ńzẅí’te mèŋ m pfɛ́, ńnú melù’ tá ɔ̀ lêen ńké ḿpfɛ́ shú shúm ḿbiŋ ńnú mú melù’ lá? 9À tè séen gíŋe ná ndǎg mbwo ngàŋa fà’, mélà’mie à gÿǒ mmó gie à tsẅǐ wɔ́. 10Mbɔɔ gí fà’ ké ńgíŋe ńgwɔ́ pɔ́ pú’u. Pi lɔɔn ńdá’ fa’a fà’ gie mé tsẅǐ mbwo pi tà ḿmag, pi gɔɔn pɔ́ ndà’ ngie: Peg gwɔ́ yég pɔ́ megàŋa fà’ sẅɛ̀ɛ sẅɛ̀ɛ, peg gÿǒ pɔ́ mmó gie mé ně ńtsẅi ngie peg gÿo.

Yěsô gÿǒ megàŋ nkà’ pǎb legém zéŋe

11Yěsô la nyé ńgwɔ́ pɔ́ mánzsé ńne ńgee Yerósalem, ńcʉa nà pàa lá’ pà Samalîɛ pâ pà Galilea. 12Ńgʉa tà ńkúu tsɛ̀ɛ tsɔ́ lá’, megàŋ nkà’ pǎb legém zá’a yé, tà ńtyé pɔ́ ngʉ̀a shʉ̀shʉ̀a, 13ńga’te lê tʉ ńgɔɔn ngie: Yěsô, Andè, tsɔ́ɔn mezìŋe még. 14Yěsô gyá wɔ́b, ńgɔɔn né pɔb ngie pi gʉa ńnyɛ mbùm gi mbwo *pànùŋe pwɔ́’. Pɔ́ cʉ́me mánzsé, ńně ńgee, ńgyá, mbà nkà’ magá ná pɔ́b. 15Atsɔ̌ tà’ ná pɔ́b gyá pá’ à zeŋé, ḿbiŋ nzèm, ńkwé’e ngyè ye ńnáa tÿǒ ńdɔg ńgú’te Ssé. 16Ńtó ńnuŋe mekwò Yěsô, ńcÿɔ’ɔ zí yé ssé, ńná ndǎg mbwo yé. Angàŋ laa nyìŋ Samalîɛ. 17Yěsô leen ńké ńgɔɔn ngie: Pʉ̀a legém pǔ ńzeŋe, pe lepfwɔ’ɔ́ gwɔ́ pɔ́ nzɔ̌? 18Pɔ́ pǔ ńzeŋe metsèm, tà ndà’ gù wɔɔn zɔ tǒ lénná ndǎg mbwo Ssé ká? 19Yěsô leen ńké ńgɔɔn mbwo nyìŋ Samalîɛ ŋwɛ́ ngie: Lu ssé ńgʉa, e Ssé gÿǒ ɔ̀ tsẅɛ́, ńtí pá’ ɔ̀ zǎb ntʉ́m ɔ́ ná mèŋ.

Lefùɔ Ssé ée tsetsɛ̀ɛ pi

20Tsɔ́ pà *farisay gÿo ńzɛ́te Yěsô ngie: E Ssé ge lá’ zye lésá’ njÿó pɔ́ síŋe? Á tsɔ́’ɔ mbwo pɔ́b ngie: *Lefùɔ Ssé té gwɔ zye mé ne ńdɔgɔ menÿɔ́g ńgyá wɔ́. 21Ngwɔ́ mé le gɔɔn ngie: E sɔɔn jʉ’ɔɔn kà pɔ́ lé gɔɔn ngie, e si jʉ’e wɔ́. N zɔɔn ńgɔɔn pá’ɔɔn, mbà Ssé ně ńdá’ ńgwɔ́ tsetsɛ̀ɛ pi tà pi ne ńzẅíŋe lefùɔ sé.

Alyɛ̌’ gie Míŋ Nyìŋ ge gÿo piŋ nzèm

22Yěsô gíŋe ńgɔɔn mbwo *ngàŋa kwò yé gílé pɔ́b ngie: Atsɔ́ fʉ̀’ ge gÿo gwɔ́ pi tsɔ́ɔn pá’ pi lâ *Míŋ Nyìŋ ge fó gíŋe zɔ́g pɔ́ ndà’ tà’a lyɛ̌’, pi ké le gyá#17.22 Ngwɔ́ mé gíŋ ngie: E Ssé ne sá’a mentʉ́m mí. .

23Epʉ̀a ge lá’ ne gɔɔn né pi ngie: Yé wɔɔn jʉ’ɔɔn kà pɔ́ ngie yé gẅi jʉ’ e wɔ́. Pi pɔ́ɔn léjwoŋte, tà pi gwá ńkÿo mendʉ́. 24*Míŋ Nyìŋ ge zɔɔn lá’ tó mé pú ńgyá yé pá’ nně mbʉ̀ŋ gie e lěen ngie ŋwâŋ, ḿbú ńkyɛ’ jʉ’ ntsèm tsèm. 25Tá’, á ge ké zɔɔn gwaa gwɔ́ pú’u, *Míŋ Nyìŋ zɔɔn ḿvɔg ńgyá ngɔ́’ pá’ɔɔn tɛ’, pʉ̀a pie ée tsɛ̀ɛ njÿó fʉ̀’ɔɔn lʉ’ʉ yé.

26À ge lá’ gwaa tó menò mie é la gÿo fʉ̀’e Noá gíŋe ńgÿo. 27Á laa fʉ̀’ó, epʉ̀a mesoŋ ně ḿpfɛ́ɛ shúm, ńnúu melù’, ńně ńdɔ́ɔn ndá, ńnáa púɔ pɔ́b lɔ́ɔn ndá, tà ńkú lyɛ̌’ gie Noá la kúu tsɛ̀ɛ páŋ. Ntse kwɔ́’ ḿbú ḿbyága wɔ́b metsèm. 28Á ge lá’ gíŋe gwɔ́ pɔ́ pá’ menò mie é la gÿo nà fʉ̀’e Lod: Epʉ̀a mesoŋ la ne ḿpfɛ́ɛ, ńnúu, ńně ńjúu, ńně sẅiŋe, ńně ḿbye shúm, ńně ńkwɛ́ɛ mendá. 29Tà ńdá’ ńkúu nà lyɛ̌’ gie Lod la fó tÿǒsoŋo Sodom tà ńkẅɛ. E Ssé fóo tÿǒ lepwó, ńtúm mbʉ̀ŋ mmɔ̌g pâ *mekʉ̀a, é pú ḿbyága lá’ tà á mag. 30Pi gyá nò gie á ge lá’ gíŋe gÿo pʉ̀a, á nà lyɛ̌’ gie *Míŋ Nyìŋ ge lá’ vege vege tó.

31À gwɔ́ lyɛ̌’ó, nyìŋ gẅie à ge lá’ gwɔ́ nà tetʉ́a gie áa ntsɔ̀’ ndá le fó wó sẅɛ́’ ngie à ge píi mmó tá kÿo wɔ́. Nyìŋ gẅie aa nká’ le mbʉ̀a yé piŋ. 32Pi kímte nzwě Lod. 33Nyìŋ gẅie à ge gÿo fà’a lépɔ́ɔn we le gwɔ́, à ge gÿo pyé, nyìŋ gẅie à zẅiŋé lépyé, yé zɔ gÿo ńgwɔ́ wó. 34Oon mèŋ shwóŋó gẅí, á ge lá’ gwɔ́ lêtsẅɛ́’ lyɛ̌’ áyɛ̌, ńgwɔ́ gie pʉ̀a nuŋé kǔ mépʉ́a, mbà mé ge lɔgɔ tà’ nyìŋ gʉa nyé wetsɔ̌, 35ńgwɔ́ gie pànzwě mépʉ́a ne ńgwɔ’ɔ ngesáŋ lùŋo ńkẅéte, mbà mé ge lɔgɔ tà’ gʉa, é nyé wetsɔ̌, 36[ńgwɔ́ gie mbàŋa ée nká’ yépʉ́a, mbà mé ge lɔgɔ tà’ gʉa, é nyé wetsɔ̌]. 37Megàŋa kwò Yěsô leen ńké ńzɛ́te yé ngie, Andè, yɔɔn ntí nò ge lá’ gÿo nzɔ̌ jʉ’? Á tsɔ́’ɔ mbwo pɔ́b ngie: Apfó mmó ge gÿo gwɔ́ nzɔ̌ wɔ́, megúm cú’te jʉ’ó.

Currently Selected:

Lukase 17: NGBM

Highlight

Copy