Lukase 15

Esagá nò nà njʉ̀njÿò gie mé la gíŋ ńgyá

(Matio 18.12-14)

1 *Pàkẅé ncùb pà Roma lâ petsɔ́ pʉ̀a pie mé lɔ́ɔn ńkʉ́e wɔ́b ne ńtóo metsèm, á lejʉ́ŋ Yěsô lé jú’u nò yé. 2Pà *farisay pâ *pàkyàgte lepʉ̌ Mǒsê gyá pú’u, ńné ńzẅɛte tsetsɛ̀ɛ pɔ́b ńgɔɔn ngie: Nyìŋ wɛ ne ńkúe pʉ̀a tepòŋ tà pâ pɔ̌ teme shúm ńjÿó.

3Yěsô lêen ńké saga mbwo pɔ́b ngie: 4Nyìŋ gẅi lɔɔn ńgẅiin *njʉ̀njÿò ye nkÿo, ńgʉa tsẅɛ ḿpféle, tà’ pyé, mbà à ge gǎ? Mbà à tè nyé yetsɔ́ ntsɔ̀b lepfwɔ’ɔ́ lê móm lepfwɔ’ɔ́, é gʉa fa’ gie e pyě tà gyá wɔ́? 5À ge fa’ tà gyá, é pú kág, é kaa zába mekẅí yé, 6é lɔg piŋ tà kúu mbʉ̀a, é tóŋ meshǔ pé mbɔɔ ngàŋ nkwɔ’ɔ́ mbʉ̀a, é gɔɔn né pɔ́b ngie: Pege kág ńtí pá’ n gyǎ *njʉ̀njÿò yɔ̀ɔn mie e kà pyě. 7Áa pú’u, tá mèŋ shwóŋó gẅí: Tà’ ngàŋ mefʉ̀a lɔɔn ńkúbe mà we, mé kága tÿǒ lepwó tɛ’, ńcʉa pá’ à lɔɔn ńgwɔ́ mé kága ná pʉ̀a ntsɔ̀b lepfwɔ’ɔ́ lê móm lepfwɔ’ɔ́ pie pɔ́ gyǎ ngie pɔ́ ée nénʉ́ tà ńgwá ńgwɔ́ pɔ́ le kúbe mà wɔb wɔ́.

Esagá nò ná pàga nkáb gie manzwě la gíŋ ńgyá

8Pi gíŋe ńjú’u tsɔ́, manzwě lɔɔn ńgẅiin nkáb ye pàg legém, tà’a pàg pyé, mbà à ge gǎ? Mbà à tè lyɛɛ lâm, é jÿɔg ndá, é ta’ kʉ̀ŋe, é pʉ́le fa’ tà lá’ gyá wá? 9À ge gyá, é tóŋ mesǒ pé mbɔɔ ngàŋ nkwɔ’ɔ́ mbʉ̀a, é gɔɔn né pɔ́b ngie: Pi tó pege kág ńtí pá’ n gyǎ pàga nkáb yɔ́ɔn gie á ka pyě. 10Tà mèŋ shwóŋó gẅí: Á gíŋe ńgwɔ́ pɔ́ pú’u, *mecÿɔ́’ Ssé kág ńtí tà’ nyìŋ tepòŋ wémɔ’ɔ́ gẅie à kubé mà we.

Esagá nò ná múɔ gẅie tá we la gíŋe ńgyá yé

11Yěsô gíŋe ńgɔɔn ngie: Atsɔ̌ mámbàŋa lǎ’ ńgẅiin gubé yé mbàŋa yépʉ́a. 12We nkʉ́ ńnéŋe tà ńgɔɔn né yé ngie: Tɔ̌ɔnmé, gʉa nà shúm ségè, ńná wɔ̀ɔn tÿɔgɔ́ fʉ̀’ɔɔn. Tá we fó ńdɔg shúm sé ńgaba wɔ́b mépʉ́a, 13é gwaa cʉa lyɛ̌’ shÿɔ́’ɔ tsɔ́ wɔ́, múɔ wá sẅiŋ sé shúm, ńdɔg nkáb ńgʉa lê túm, ńkúu zɔ́gɔ tepòŋ, ḿbú ńcʉŋte nkáb ya, 14ńcʉŋte nkáb tà é gwɔ mag, gwáŋa gwe tsɛ̀ɛ wɛ̌ ngwòŋ. Á zye lézága ye mpfɛ̌. 15Ńtebe tà ńgʉa ńkúu fà’ mbwo tsɔ̌ nyìŋe lá’ ŋwɛ́. Á túmo yé nká’ lépyɛ́b mekúnɔ́ɔn. 16Á gʉa ne ḿbyɛ́bɛ, ńnéŋe té pfɛ́ɛ mmó, nzyè pú ńgyáŋa* yé, tà á tsɔ́ɔn shúm mekúnɔ́ɔn#15.16 À la gẅiin yé pɔ́ lélɔg mekúnɔ́ɔn ńgwá ńgiŋe tsẅɛ, á fʉ̀’e zsǒ, ḿbiŋ ncwò nzém ńdɔgɔ wɔ́b ńtó lê mbʉ̀a tá tsɔ̌ nyìŋ náa wɔ́b shúm léjÿó. , tá nyìŋ tè tsoon fùbe nà shúm mekúnɔ́ɔn né yé ná. 17Á ńnéŋe tà ńkwaŋte ntʉ́m yé ngie: Ngàŋa fà’ tá wɔ̀ɔn ée mbʉ̀a ńjÿó shúm tà ńgwá’a tsɔ́, n gwɔ́ jʉ’ɔɔn ńkwé nzyè lá! 18Mèŋ n ge fóo jʉ’ɔɔn gʉa, é piŋ nzèm lê mbʉ̀a tá wɔ̀ɔn, é tó gɔɔn né yé ngie: Tá wɔ̀ɔn, n ka gÿo nò tepòŋ nà Ssé, ńgÿo ná gù. 19Pú’u, n tè gíŋe ńku’u gẅie à lɔɔn ńgwɔ́ ɔ̀ tóŋ lê míŋ ɔ̀ wɔ́. Fó ńdɔgɔ wɔ̀ɔn ńgÿo tsɔ̌ ngàŋa fà’ ɔ̀ lâ.

20Ńkwaŋ pú’u, ńcʉ́me mánzsé, ńně ḿbiŋe nê mbʉ̀a pɔ́b. Tá we tyé ńgyá yé, tà á nyé pɔ́ ngʉ̀a shʉ̀shʉ̀a, mezìŋe mé kúu yé, á nɔ́ɔnte yé, ésiŋte yé, ngie: Wɔɔn aa gú lá? 21Múɔ gɔɔn né tá we ngie: Tɔ̌ɔnmé, n ka gÿo nò tepòŋ nà Ssé, ńgÿo ná gù, n tè gíŋe ńku’u gẅie à lɔɔn ńgwɔ́ ɔ̀ tóŋ lê míŋ gù wɔ́. 22Tá’, tá we gɔɔn né megàŋa fà’ ngie: Pi lwo ńgʉa fa’ nzsǒ mbòŋo ńdɔg ńtó ḿma’a ná yé, ńdíe kwáŋ shÿɔ́gɔ ná múɔ tepwó we, éfa’ melɔ̌ɔn shÿɔ́gɔ mekwò yé. 23Pi fa’a mûɔ fòŋ gẅie à fǎŋ tɛ’ la, ńzẅé pege pfɛ́, ńkág, 24ńtí pá’ míŋ wɔ̀ɔn mɔɔn à ka kwě, à zǐm, à ka pyě, n giŋé ńgyá yé. Á gɔɔn pú’u, pɔ́ zye lékág.

25Á gwaa gwɔ́, míŋ we we lÿò gwɔ́ nká’, ńgÿo ne ḿbiŋe, ńgʉa tà ńcʉ́’ʉ lékúu mbʉ̀a, ńjú’ mé gwɔ́ wó ńzɔbɔ ńzíŋe. 26Á tóŋo tsɔ̌ ngàŋa fà’, ńzɛ́te yé ngie: Akɔ́ áa mbʉ̀a? 27Ngàŋa fà’ gɔɔn ngie: Mémá gù zɔ cʉ̌’ ńtó tà ńgwɔ́ pɔ́ ntentʉ́, tá gù zẅě mûɔ fòŋ gẅie à fǎŋ tɛ’ la, mé ne ńdɔgɔ ńkága. 28Andyè we jú’ pú’u, ḿbú ńgyáŋa lóŋ tà ńdʉ’ʉ lékúu ndá. Tá we kẅɛɛ pǐ ḿbú’ mbwó mbwo yé ngie à kúu ndá. 29Á tsɔ́’ɔ mbwo yé ngie: Tɔ̌ɔn, mèŋ fa’á mbwo gù ngù’ shÿɔ́’ɔ? N dǎ ké fʉa *lepʉ̌ shú? Tà ɔ̀ lǎ fó ńnáa wɔ̀ɔn mûɔ mvfó ndà’ ngie pega meshǔ pɔ́ɔn zẅé ńdɔg ńkág? 30Míŋ ɔ̀ gẅie pâ mekwàla kéen ḿpfɛ́ nkáb jù, à lěen ńtó, ɔ̀ gwóon ńzẅé mûɔ fòŋ gẅie à fáŋ tɛ’ ńtí yé? 31Tá we gɔɔn ngie, míŋ wɔ̀ɔn, pɔgɔ zɔɔ ńzɔ́gɔ. Akɔ́ɔkɔ́ɔ wɔ́ gie n gẅiin wɔ́ áa jú. 32Tá’, á kɔ’ɔ́ ḿboŋ ngie pege kág kwà’ mboŋó, mélà’mie afɛ̌ gù wɔɔn à ka kwě, à zimé nà legwé, à kà pyě, mèŋ n gǐŋ ńgyá yé.

Currently Selected:

Lukase 15: NGBM

Highlight

Copy