Malëkë 8

Yeesu walikilë biveefi bi na bi baatu

(Mat 15.32-39)

1Mu bilumbu be binë binaani, nkoongë yinenë yisë bëdukunooso. Abu nkoongë beenë yisye ba yi cyosuku ve ci kulya, Yeesu kutelë bilaanzi byaandi i wusë bëkaambë : 2« Miinu cyaali yilë mu kumonë mu baatu obo, cibilë, bilumbu bi tatu beekë yaami i bësyeeli ko yi cyosuku ci kulya. 3Ningë yibe bëvutulë mu maalë maawu yimunë civumu mpafëlë, baawu bëm'bwa libutu mu nzilë, cibilë mpaapë mu nkoongaawu bëfuminë cinaanu. » 4Bilaanzi byaandi bisë n'vutulilë : « Kuni tum'podi kubakilë ci kulya mu kukutu, mu ntaandu ciyumi afë tukeeli? » 5Yeesu wusë bëyufulë, « Mëmpa mëkwa mëke yiinu? » Baawu bisë kun'vutulilë : « Saambwali. » 6Mu lyaawu, naandi wusë vaanë n'swa ke nkoongë baatu mu kukalë fë n'toto. Tee wusë boongë lisaambwali li mëmpa, kutoondë Nzaambi i wusë mëmukënë i kuvaanë ke bilaanzi byaandi, bwiinji bëkabilë bakë booso. Lyalyooli lyabëvaangë. 7Baawu babë yivaandi, mwa mpooko simbisi sincyeeci. Yeesu wusë toondë Nzaambi mu cibilë ci litoongo i wusë kaambë bilaanzi byaandi bwiinji bëkabilë bakë booso. 8Kadë muutu kulya yi kukutu. Bilaanzi bisë ntwaalë saambwali li mikutë yiwaalë bitini bisobilë. 9Kosuku babë foofë biveefi bi na bi baatu. Tee Yeesu wusë bëvutulë mu maalë maawu, 10naandi kuleengë makooso mu bwaatu yimunë bilaanzi byaandi i wusë kweendë ku libweeti li Dalëmanuutë.

Sifalisyaanu bën'loombë ciliimbu ci cimaaku

(Mat 16.1-4)

11Sifalisyaanu kutuukë i bisë ba mu kufindënë mpakë yimunë Yeesu. Mu kun'seengë, baawu kuloombë ciliimbu ci cimaaku cin'leesi ti naandi wufuminë ke Nzaambi. 12Yeesu wusë kuvuminë beenë i wusë kutubë : « Mu cibilë-mbici mboongu baatu yi bubwayi yake n'loombë ciliimbu ci cimaaku? Bucyelikë yilukaambë, ciliimbu ve cin'veewu kuke mboongu baatu ayi! » 13Naandi kubiikë Sifalisyaanu i kube kandëmë mu bwaatu i wusë sabukë ku lweeku lum'mesë lu liyaangë.

Kebaanu ndongulu yi Sifalisyaanu

(Mat 16.5-12)

14Bilaanzi bi Yeesu bëzimbëkënë kuboongë mëmpa i limpa limweekë too lyabë yaawu mu bwaatu. 15Kosuku, Yeesu wusë kubëbikini: « Zungululaanu, lwe kebyaanu mu m'bweeli Sifalisyaanu i Eloodë. » 16Bilaanzi bisë ba mu kutubësënë mu cibilë bëkaambu mëmpa. 17Kwalibakuli, Yeesu kubëkaambë : « Mu nkoongiinu mu cibilë-mbici luke tubësënaangaanu? Cibilë lwakaambu mëmpa? Beeno lusë n'zikulë kuwu kwee? Mitimiinu yikafëkënë? 18Meeso mëke yiinu, akasi lusë m'monë ko. Matu mëke yiinu, kasi lusë n'kuwu ko#8.18 Zel 5.21; Ezk 12.2.? I beeno m'bali voo: 19bunë yamukëni mëmpa më taanu mu kulikilë biveefi bi taanu bi baatu, mikutë kwa yi bitini bi mëmpa lunoongë bisobilë luwaasi i lutwaalë? » — Baawu kun'vutulilë : « Kuumi mikutë wali#8.19 6.35-44.. » 20« Abu yamukëni lisaambwali li mëmpa mu biveefi bi na bi baatu, mikutë kwa yiwaalë bitini bi mëmpa lutwaalë? » — « Saambwali li mikutë », bën'vutulilë ke bilaanzi byaandi#8.20 8.1-9.. 21Yeesu kube bëkaambë : « Tee yi zwaalu, beeno lubuunu kubakulee? »

Yeesu wabelusi mpofo ku Betesayiidë

22Baawu bëyetuukë ku Betesayiidë, bisë n'twalilë mpofo i kum'bondililë bwiinji kun'tendikë kooko. 23Yeesu kusiimbë mpofo mu kooko i wusë n'natë cinaanu yi ngandaandi bwaalë. Tee naandi kun'tuulë matë mu meeso i kwan'tendikë myooko, naandi kun'yufulë buni wulë mu kumonë mwa ciimee? 24Mpofo kuzibulë meeso i wusë tubë : « Mweeni, yilë mu kumonë baatu, yilë mu kubëmonë buke miti, kasi bëke lyaataangë. » 25Yeesu kube tuulooso myooko mu meeso më mpofo. Mpofo wusë kumonë buboti, wabë wabelukë i kumonë byakë byooso deku-dekoo. 26Yeesu kun'vutulë ku n'zwaandi i wusë n'kaambë : « We koti ko ku livulë. »

Pyeelë wusë tubë ti Yeesu na Kliistu

(Mat 16.13-20; Lik 9.18-21)

27Yeesu ke yendaangë yimunë bilaanzi byaandi mu livulë li Sezalee li Filiipë#8.27 Sezalee li Filiipë: livulë libelëmë yi sinto-masi si Yulëdaani, n'kuluutu Filiipë na wutuungë yaawu. Bubwayi aci bëliteelë « Banyaasë ».. Mu nzilë yikwendë, naandi kube bëyufulë : « Baatu mbici bëlë mu ke tubaangë mu miinwe, miinu nani yikeeli? » 28Baawu kun'vutulilë : « Baatu bëlë mu kutubë ti njeeyi Za-Batiisë, bën'ka bën'tubë ti njeeyi Eli m'bici, bën'kooso yivaandi bën'tubë ti njeeyi wun'viipë mu nkoongë mibici. » 29Naandi kubëyufulë : « Vandi mu beeno, miinu nani yikeeli? » Pyeelë kun'vutulilë : « Njeeyi wuli Kliistu. » 30Mu bwaawu, Yeesu wusë bëfuungë bëleembu kulibulilë lukuungu ke wosuku muutu.

Yeesu wazabikini lufwa lwaandi i luvulumuku lwaandi

(Mat 16.21-28; Lik 9.22-27)

31Fë mbusë, Yeesu wusë kuvaanë ndongulu ayi ke bilaanzi byaandi: « Mwaanë Muutu be fwanëkënë kumonë mëncyeenji mëndoongë i kunyaciku. Mëkakëtë, bëkuluutu bë singangë-Nzaambi i miloonji n'kaakë bëkum'maangë i bëkun'voondë, fë cilumbu cin'tatu, naandi wun'vulumukë. » 32Naandi wubëyalulilë mpolu be yooyi yi civuufu cyooso. Pyeelë kun'natë ku mpeengë i wusë n'seembë. 33Kasi Yeesu kubalukë, kutalë bilaanzi i wusë baminë Pyeelë : « Yakënë afa, a Satënë. Simbalulu syaaku sisye fuminë ke Nzaambi ko, kasi ke baatu kwaandi vwiili! »

34Naandyooso kutelë nkoongë baatu yimunë bilaanzi byaandi i wusë bëkaambë : « Mooti wun'viipë wube zolë kwiisë yaami, kwe yizimbikini naveekë, kwe nanguni lwaandi lukuluusu i we kun'daandi. 35Licyelikë, mooti wun'viipë wutoombë kuvuuci luziingu lwaandi, naandyoowo wulunyambikini, kasi wunë wun'nyambikini luziingu lwaandi mu cibilë cyaami i ci Mpolu Mboti wuluvuuci. 36N'cinzë mbicye ke muutu mu kubakë businë bu buloongo n'viipë, mooti naandi wun'nyambikini luziingu lwaandyee? 37Mbici muutu wum'podi kuviinji fë ciikë ci luziingu lwaandi? 38Ningë ti wun'viipë, wum'monë sisonyi mu miinu i mu cibilë ci mëbuungu maami fë meeyi baatu bë bubwayi, bivaangë mëbi i bëkaambu kusulëmë ke Nzaambi, bwaboobo Mwaanë Muutu yivaandi wum'ba yi sonyi mu naandi ntaangu kun'kwisilë mu bumpumu bu Tataandi yimunë siyaanzi syaandi sisaantu. »

Currently Selected:

Malëkë 8: NTVIL

Highlight

Copy