Malëkë 9

1Yeesu wusë be bëkaambooso : « Licyelikë yilë mu kuluzabikini, bën'ka bëkeeli afa bë kusë yifwiilë ko, kukaambu ntetë kumonë Lwaangu lu Nzaambi lun'kwiisë yimunë luleendo looso. »

Lucitukulu lu Yeesu

(Mat 17.1-13; Lik 9.28-36)

2Bilumbu bi samunu byavyooci, Yeesu wusë kuboongë yaandi Pyeelë, Zaakë i Za. Naandi wusë bënatë ku mpeengë, ku yilu moongo wunenë. Naandi wusë citukë fë meeso maawu. 3N'vwaatwaandi kumanikë mpeembi, kusamë munë kusamë. Muutu ve fë buloongo n'viipë wum'podi kuvaangë mpeembi yi mpilë oyo#9.3 2 Py 1.16-18.. 4Foofë, Eli i Moyiizë kubëmonikinë i baawu bëlëbulaangë sinkuungu yimunë Yeesu. 5Kwabuli mbeembu, Pyeelë wusë kaambë Yeesu : « A N'loonji, liboti tukalilë kwaandi faafë. Twe tulikë binzwananë bi tatu : cimweekë cyaaku, cimesi ci Moyiizë i cin'ka ci Eli. » 6Pyeelë wusë tubilë katiboobo, cibilë wusye zaabë linë li kutubë ko i boomë bisë bëkotilë. 7Livweeti kuzibukë i lisë bëfukë i mbeembu nkamu kutendukë mu livweeti : « Awuuwu na Mwanaami wu mëdilë, n'yuwulwaanu#9.7 1.11.! » 8Kususukulabu, bilaanzi bisë cyengululu mu sinkoonzu syakë syooso. Kasi baawu bisë be monooso ko muutu wun'ka. Kanuku wo Yeesu yimunë baawu. 9Banengëmukë moongo, Yeesu kubëtumisi bëleembu kubulilë lukuungu mu mo bamonë tee yi fanë Mwaanë muutu wun'vulumukë mu nkoongë bëfwa. 10Boobo, bilaanzi bisë luundë libuungu be lyooli. Kasi bisë ke yufusënaangë baveekë i baveekë : « Suundu cikumë ci “kuvulumukë mu nkoongë bëfwa”? »

11Fë mbusë mamoomë, baawu bisë n'yufulë : « Cibilë-mbici Miloonji n'kaakë, bën'tubilaangë ti, Eli wufwenikini kutekë kwiisë#9.11 Mal 3.23.? » 12Yeesu wusë bëvutulilë : « Licyelikë, Eli wufwenikini kwiisë mu kululikë makë mooso. Vandi cibilë-mbici bësonikë mu Mwaanë muutu ti, naandi wufwenikini kumonë mëncyeenji mëndoongë i kubaayu#9.12 Ezy 53.3; Twi 22.1-18.? 13Kasi, yilukaambë Eli wabë wuyisë i baatu bëvaangë mu naandi manë bëzolë dedë bësonikinë mu Mëbuuku më Nzaambi. »

Yeesu wabelusi mwaanë wuvwaatu ke ciluunzi cibi

(Mat 17.14-21; Lik 9.37-43)

14Bunë batuuci fanë fabë bilaanzi byaandi bin'ka, baawu kumonë nkoongë yinenë yi baatu yibëzukë yimunë miloonji n'kaakë bëlëfindënaangë yaawu simpakë. 15Bunë nkoongë baatu yisë monë Yeesu, yaawu kutulëmukë i baatu bisë kumbelëlë ntiinu mu kum'bilë. 16Naandi wusë bëyufulë : « Mu lyaambu mbici luke findënaangë yaawu simpakë? » 17Wun'viipë munë nkoongë baatu wusë n'vutulilë : « A N'loonji, yatwaalë mwanaami wu bakëlë ke njeeyi, ka ciluunzi ci bubaba cyan'vwaatë. 18Fosuku fanë kum'bwiilë, ciluunzi beenë kun'lumbikaangë fësi. Mwaanë lifusë kum'basikë, kukweetë meeno i kucitukë simbi-mbii. Miinu yabondilë bilaanzi byaaku bwiinji bëkumbisi ciluunzi be cyooci, akasi bësye ba yi mëkanë ko mu kucikumbisi. » 19Yeesu wusë bëkaambë : « A mboongu baatu yikaambu lufyaatu, tee ntaangu mbici miinu yifwenikini kukalilë yiinwee? Miinu yifwenikini kuciimbë moonyi tee ntaangu mbicye? Natinaanu mwaanë! » 20Bisë n'natinë mwaanë, ciluunzi cibi cyamoni Yeesu, cyaawu kun'nyinkunë yi bubaalu booso, mwaanë wusë yilumbikë fësi. Naandi wusë ke vidëbungaangë i wabë lifusë mu munu. 21Yeesu wusë kufulë lisya lyaandi : « Yeekë bilumbu bikwa kum'beelaangë katiboobo? » Lisya lyaandi wusë n'cikuninë : « Kutoonë fanë bubwabwanë bwaandi. 22Mpaapë vyaasi ciluunzi beenë ke n'lakaangë ku mbaasu kaambofo mu masi mu kun'vangisi kufwa. Nkanë njeeyi wum'podi kuvaangë lin'viipë, tuzudi, wutufwiilë cyaali. » 23Yeesu wusë n'kaambë : « Ningë wum'podi! Makë mooso mën'vangënë mu wosuku wuke ciminu. » 24Lisya li mwaanë wusë sundilooso kulosukë : « Miinu yike ciminu! Kasi nzudi, mu lukaambu lu ciminu! »

25Yeesu wusë monë nkoongë baatu yisë lutilë kufunë, wusë baminë ciluunzi cibi : « A nje ciluunzi cibi wun'vangisi mwaanë kudukë-matu i bubabë, we basikë mu mwaanë awu. Miinu, nje yin'kaambë i bilii, wukotyooso ko mu naandi! » 26Ciluunzi cibi cisë basikë, bwendi ke lookaangë i ke n'nyikunaangë yi bubaalu booso. Mwaanë wusë ba buke vuumbi i baatu bisë tubë : « Wafwa. » 27Kasi, Yeesu kun'siimbë mu kooko, kun'telikë i mwaanë kumanë n'telë. 28Bunë Yeesu kwakoti ku n'zo, bilaanzi byaandi bisë n'yufulë ku mpeengë : « Mu mbici beeso twakambulu kubasilë ciluunzi cibye? » 29Yeesu wusë bëcikuninë : « Mu n'saambu vwiili mwaawu bëm'podi kubasilë mpilë ciluunzi ocyo. »

Yeesu wake bëzabikinyooso lufwa i luvulumuku lwaandi

(Mat 17.22-23; Lik 9.43-45)

30Babotukë fë mbiinji be yooyi i bisë vyookë libweeti li Ngalilee. Yeesu wusye zolë ko ti baatu bëzaabë fanë kwabë, 31cibilë naandi wulëlengilë moonyi mu kuloongë bilaanzi byaandi. Naandi kubëkaambë : « Mwaanë muutu wun'vakulu mu myooko baatu. Baawu bëkun'voondë i fë bilumbu bi tatu fë mbusë lufwa lwaandi, naandi wun'vulumukë. » 32Kasi bilaanzi bësye bakulë ko suundu libuungu olyo, tiilyoko, boomë bëlëmonë mu kube n'yufulë byuufu bin'ka.

Nani wuvyokilili bukuluutu?

(Mat 18.1-5; Lik 9.46-48)

33Batuuci ku livulë li Kapelënawuumë. Bunë bakoti ku n'zo, Yeesu kubëyufulë : « Mani lufitë ke yifindënaangë mpakë bwendi yi nzilee? » 34Kasi baawu yi mbeembu kun'vutulilë mpa, cibilë, bwendi yi nzilë, bëye findësënaangë mpakë nani wuvyokilili bukuluutu mu nkoongaawu. 35Yeesu wusë kalë, kwateli likuumi bëbwaali li bilaanzi byaandi, wusë kutubë : « Mooti wun'viipë wun'zolë kuba wun'tetë, we ba muutu wu siitu i we ba ciseelu ci bakë booso. » 36Na kuboongë cimwamwanë i wusë n'tuulë fë katyaasi ku meeyaawu, kwam'buumbi i wusë bëkaambë : 37« Muutu wunë wun'tambulë cimwamwanë wunë wuke dedë mweekë yi naandyaawu mu lizinë lyaami miinu, minuveekë kun'tambulë. Wosuku wun'tambulë miinu, yaaku tokë miinu vwiili kun'tambulë, vandi kasi yivaandi wo wukun'filë. »

Wunë wukaambu kutuleendë wuke yiitu

(Lik 9.49-50)

38Foofë, Za kun'kaambë : « A N'loonji, beeso twamonë muutu n'viipë wuke yobulaangë mu lizinë lyaaku baatu bëvwaatu ke biluunzi bibi, akasi twan'fuungë abu kukaambu kuba mu nkoongiitu. » 39Kasi Yeesu kubëvutulilë : « Leembwaanu kun'fuungë, cibilë muutu ve wum'podi kuvaangë cimaaku mu lizinë lyaami i kube kun'tubilë simbi. 40Kasi wunë wukaambu kutuleendë, naandi wuke yiitu. 41Wosuku wuluvaanë koopo masi, mu lizinë lyaami cibilë beeno mu Kliistu lukeeli, yilukaambë miiti: bucyelikë naandi wum'bakë ndobwaandi. »

Yeesu wabikini bilaanzi

(Mat 18.6-9; Lik 17.1-2)

42Ningë ti muutu wun'vangisi kubwiisi mu lisumu wumweekë mu bibabanë bëke ciminu mu miinu, mëyoolë mu muutu be woowo, kun'kaangë limanyi linenë mu cimenu i kun'lakë mu m'bu. 43Ningë ti likaandë lyaaku li kooko likuvangisi kubwa mu lisumu, licyeli. Mëyoolë njeeyi kukotë mu luziingu lu cyelikë yimunë cikudu ci kooko i kukotë yi myookwaaku yiwali ku buluunji bu mbaasu yin'kaambu kuzimë. 44Kunë, singaambu sin'keetë nyitu kufwa ve i mbaasu yin'kaambu kuzimë. 45Ningë ti kuulu kwaaku kukuvangisi kubwa mu lisumu, kucyeli. Mëyoolë njeeyi kukotë mu luziingu lu cyelikë yimunë cikudu ci kuulu i kulaku ku buluunji bu mbaasu yi maalu maaku më mwaali. 46Kunë, singaambu sin'keetë nyitu kufwa ve i mbaasu yin'kaambu kuzimë#9.46 N'kuku awu wusye sonikë ko mu bisonë bimesi.. 47Mpilë mweekë yivaandi, ningë ti lyeesu lyaaku likuvangisi kubwa mu lisumu, litumuni. Mëyoolë kukotë ku Lwaangu lu Nzaambi yi litulu i yikuluundë meeso më mwaali yikulaku ku buluunji bu mbaasu. 48Kunë, singaambu sin'keetë nyitu kufwa ve i mbaasu yin'kaambu kuzimë#9.48 Ezy 66.24.. 49Licyelikë, wosuku wum'ba nkali mu mbaasu.

50« Saalu n'ciinzë yikeeli, akasi ningë lutwiingu lwaandi lusyeelyooso ko, buni lum'podi kube vutulilë lutwiingwee? Lwe baanu saalu mu benuveekë i lwe zingilyaanu mu n'sikë mu benuveekë i benuveekë. »

Currently Selected:

Malëkë 9: NTVIL

Highlight

Copy