Malëkë 7

Ndongulu sinkaakë

(Mat 15.1-9)

1Cilumbu cin'viipë, Sifalisyaanu i mpooko miloonji n'kaakë, bëfuminë ku livulë li Yelusaleemë bëkukumë fëke Yeesu. 2Baawu bisë monë bën'viipë mu nkoongë bilaanzi byaandi bëlëkwambulë yi myooko yikaambu kulyoomë, dedë ti yikaambu kusukulu bunë bun'kwendilë civi-cikulu. 3Licyelikë, Sifalisyaanu i Sizwiifë syooso, bën'cinzikaangë mikaakë yibiikë sinkaakë syaawu : baawu bën'lyangaangë kutekë sukulë myooko bunë bufwenikini#7.3 Lik 11.38., 4i bunë bën'fuminë mu mëzaandu, kukaambu kulyoomë baawu kwambulë ve. Baawu bën'cinzikaangë mpaapë mikaakë yin'ka yi sinkaakë, nsukululu yimboti yi simbuungu, bidoyi, sizuungu sikutaangë i biikë byaawu.

5Sifalisyaanu i miloonji n'kaakë kun'yufulë : « Cibilë-mbici bilaanzi byaaku bën'kaambwaangë kucinzikë sinsalulu sibiikë sinkaakee? Kwisilë buni baawu mu kwambulaangë yi myooko yike suusi! » 6Yeesu kubëvutulilë : « Ezayi wubikë bunë bwaawu mu cibilë ciinu. A beeno bimpilë-mpiipi! Bësonikë :

“Mboongu baatu ayi yikun'vumisilë mu bilili,

kasi n'timë wuyakënë cinaanu yi miinu.

7Mu buunë kwaandi baawu bëkun'cinzikilaangë mu tusaambulu twaawu,

cibilë, mo bësinu mën'fuminë ke baatu kwaandi vwiili#7.7 Ezy 29.13..” »

8Yeesu wusë be tubooso : « Beeno lwavubikë lutumu lu Nzaambi mu kutatiminë mikaakë yi baatu. »

9Na kubëtubë : « Cibeeni, beeno lube zaabë kun'nyacikë bunë bwaawu lutumu lu Nzaambi bwiinji bësalilë bukulu bwiinu! 10Licyelikë Moyiizë wutubë : “Cinzikë tataaku i mamaaku,” yivaandi “Wunë wun'sifë tataandi kaambofo mamaandi, wufwenikini kuvoondu.#7.10 Lub 20.12 i Det 5.16. Lub 21.17 i Lev 20.9.” 11Kasi beeno, lun'sinaangë ti, ningë muutu wun'kaambë tataandi kaambofo mamaandi ti : “Cyo yifwenikini kukuvaanë mu kukuzudi, cyaawu Kolëbaanë” – Dedë mweekë ti “likabu libelikulu mu Nzaambi.” – 12Beeno lukun'vaanaangë n'swa wukuleembu kuvatulë tataandi kaambofo mamaandi. 13Oboobo, beeno lwaviinji libuungu li Nzaambi mu nzingulu siinu i beeno ke sinaangë bukulu bwiinu. Beeno lun'vadaangë mpaapë maambu mën'ka mu mpilë be yooyo. »

Biimë bin'kaambu kulyomisi muutu

(Mat 15.10-20)

14Yeesu kube telooso nkoongë baatu i wusë bëkaambë : « Beeno booso n'yuwulwaanu i viisyaanu : 15Cin'velë cikeeli ko cinë cin'fuminë ku ngaandë cin'kotë mu muutu, cikun'vangisi kukaambu kulyoomë. Kasi mo mëm'basikaangë mu muutu, maawu mëkun'vangisi kukaambu kulyoomë. 16Wosuku ke yi n'tu, matu mëke yaandi! »

17Bunë kwayakënë nkoongë i wusë kotë ku n'zo, bilaanzi byaandi kun'yufulë suundu yi sasafë be yooyi. 18Naandi wusë bëkaambë : « Beeno yiviinu, lwakaambu lyeelë? Lusye bakulë ko, mu muutu cin'velë ve cin'fuminë ku ngaandë cikun'vangisi kukaambu kulyoomë. 19Cibilë cyaawu kupodi ve kukotë mu n'timë, vandi kasi mu civumu i fë siitu i kubumu mu bikasiinyi. » Mu bikumë obyo, Yeesu wun'leesi ti ndiiwu yooso yifwenikini kuliiwu#7.19 Mëv 10.9-16.. 20Naandi kube tubë : « Binë bim'basikë mu muutu, byaawu bikun'vangisi kukaambu kulyoomë. 21Cibilë, mu kati ku n'timë muutu, mwaawu mu n'fuminaangë simbalulu simbi, busafu, bwiifi, kuvoondë, 22kuvaalë, kutafë binganë, bubaalu, kupuutu, bulalawu, n'soci, kutubilë wayaaku simbi, lunaangu i buyimbu. 23Tudiifu tooso oto tum'basikilaangë mu muutu i twaawu oto twaawu tun'vangësyaangë muutu kukaambu kulyoomë. »

N'cyeetu mweeni wata maanë mu Yeesu

(Mat 15.21-28)

24Kwamani ofo, Yeesu kubotukë mbiinji be yiinë i wusë kweendë ku libweeti li Tiilë. Naandi kukotë ku n'zo i wusye zolë ko ti wun'viipë kulizaabë. Kasi wusye podi ko kuswaamë. 25Licyelikë, n'cyeetu wabë yi mwanaandi wu n'cyeetu wuvwaatu ke ciluunzi cibi. Kwayuwu ndumu Yeesu, mëlengë-lengë, naandi kwiisë kufukumë fë maalu më Yeesu. 26N'cyeetu beenë wusye ba Zwiifë ko, musë Sili, li libweeti li Fenisiinë. Naandi kubondililë Yeesu mu kukulë ciluunzi cibi cyabë mu mwanaandi. 27Yeesu kun'kaambë : « Bikoobo baanë bëyukutu, kasi busye fwaanë ko mu kuboongë mëmpa më baanë i kulakilë ke baanë bëm'bwa. » 28Naandi kun'vutulilë : « Cibeeni a Fumu! Kasi baanë bëm'bwa bën'lyangaangë biselekëtë byo baanë bëm'bwiisyaangë kusi meesë. » 29Foofë, Yeesu kun'kaambë : « Mu cibilë ci libuungu olyo, yeendë, ciluunzi cibi cyabasikë mu mwanaaku. » 30Bunë kwakoti ku n'zo, n'cyeetu ke zakënë mwanaandi wunuukë fë ciikë. Ciluunzi cibi cisë basikë mu naandi.

Yeesu wabelusi libakëlë wudukë matu i wabë libabë

31Yeesu wusë botukë ku libweeti li Tiilë, wuvyokilë ku livulë li Sidoonë, ku lweeku lu liyaangë li Ngalilee ke taabaangë bwendi libweeti likuumi li mëvulë, bën'teelë Dekapoolë. 32Bisë kun'twalilë muutu wabë wudukë matu, yin'kukëmë. Baawu kubondililë Yeesu bwiinji kun'tendikë myooko. 33Yeesu kun'natë ku mpeengë, cinaanu yi nkoongë baatu. Naandi kun'tuulë sinzalë mu matu i kufulë matë mu sinzalë syaandi naveekë i wusë kusiimbë ndakaandi. 34Kwavumbuli ntalu, kuvuminë i wusë kukaambë muutu : « Efaata! » – Dedë ti : « Zibukë! » – 35Kususukulabu matu kuzibukë, ndakaandi kusyalulu i kutubë buboti. 36Yeesu kubëkandiminë bëleembu kulibulilë lukuungu ke wosuku muutu. Kasi fo kulëbëfungilë, baawu kube lutilë kutendulë saangu. 37Baawooso kusiminë, kubookë i bisë tubë : « Makë mooso kwavaangë mëboti! Wavangisi bidukë-matu kuwu i mëbabë kutubë! »

Currently Selected:

Malëkë 7: NTVIL

Highlight

Copy