Liikë 2

Lubutulu lu Yeesu

(Mat 1.18-25)

1Mu ntaangu be yiina, n'tinu bëlëteelaangë Sezaalë Ugusëtë wusë vaanë n'kaakë wukuvaangë lusanzëmu lu baatu booso bë lwaangu looso lu Loomë. 2Lusanzëmu be loolo lun'tetë, lusë vangënë ntaangu yo Kilinyusë wabë n'tinu libweeti li Sili. 3Bakë booso bëlëkwendaangë mu ke sonikë mëzinë maawu, kadë muutu ku bwaandi bwaalë kubutulu. 4Zozeefë yivaandi wusë botukë ku livulë li Nazaleetë li Ngalilee, i wusë kweendë ku Betëlëyeemë li Zudee kunë kubutulu n'tinu Daviidë, cibilë naandi wabë muutu wu likaandë li Daviidë, 5mu ke sonikë lizinë yimunë Maali, wunë naandi kukanyi kukweelë, wabë mu bweembë. 6Bunë babë ku Betëlëyeemë, cilumbu cikuvwa-moonyi cisë fwaanë, 7i naandi wusë butë mwaanë wun'tetë wu bakëlë i wusë n'ziingë mu milelë i kun'nungunë ku kati ku cilikulu ci bibulu, cibilë bësye bakë ko ciikë ci kunukinë mu n'zo-beeni.

Yaanzi yisë monikinë miluungë mëmemë

8Munë libweeti be lyooli, mwabë miluungë mëmemë yiluvyosilaangë bwiilu mu sisolë mu kuluungë mëmemë maawu. 9Yaanzi mweekë yi Fumu yiyisë kubëmonikinë i bumpumu bu Fumu busë bëzukë mu cyeseesë. Bisë ba mu boomë bunenë. 10Kasi, yaanzi yisë bëkaambë : « Nubacyaanu boomë ko! Licyelikë, miinu yalunatinë Mpolu Mboti yin'vangisi liyaanji linenë mu baatu bakë booso : 11cibilë wabutu bubwayi mu beeno N'vuuci Kliistu Fumu ku livulë li Daviidë. 12Lyaliili mu beeno ciliimbu, luke zakini mwaanë ndeenji wuziingu mu milelë i wunungunu mu cilikulu ci bibulu. »

13Kususukulabu, yaanzi yisë kumonikë yi lukoongu lunenë lu siyaanzi lu yilu silë ke dumisyaangë Nzaambi, ke tubaangë :

14« Bumpumu ke Nzaambi kunë salaangë mëyilu,

i n'sikë fë n'toto fë meeyi baatu banë kuzolisi! »

Miluungë mëmemë bëyendë ku Betëlëyeemë

15Bunë siyaanzi sye bëbiici mu kuvutukë ku yilu, miluungë mëmemë bisë tubënë baveekë yi baveekë : « Twe yendyaanu tee kunë Betëlëyeemë, bwiinji twe moni maambu manë Fumu kwatuzabikini. » 16Mëlengë-lengë baawu bisë ke yendaangë, ku Betëlëyeemë i bisë ke zakënë Maali, Zozeefë, i mwaanë ndeenji wunuukë mu cilikulu ci bibulu. 17Bunë bam'moni, baawu bisë kubëzabikini bëbëkaambë mu cibilë ci mwaanë be wuuwu. 18Bake booso banë bëyuwu bisë tulumukë mu manë miluungë bëbëkaambë. 19Maali wuluundë makë mooso omo mu cimbeenzë cyaandi ci n'timë i wusë ke balaangë beenë. 20Fë mbusë, miluungë mëmemë bisë ke vutukunaangë. Baawu ke sangililaangë i ke dumisyaangë Nzaambi mu makë mooso manë bëyuwu i bëmonë. Cibilë makë mooso mëvangënë bunë yaanzi kubëtendulilë.

Lizinë li Yeesu

21Bunë naanë li bilumbu bye fwaani mu kum'bukë bubakëlë, oboobo bisë n'vaanë lizinë : li Yeesu, linë bën'teelë ke yaanzi, ntetë naandi kuba mu civumu#2.21 Lev 12.3; Lik 1.31..

Ludumbulu lu Yeesu mu n'zo-Nzaambi

22Ntaangu yisë kufwaanë mu Zozeefë i Maali mu kuvaangë n'saangu wu bulyomisi, bunë bën'loombilë n'kaakë Moyiizë#2.22 Lev 12.3,6.. Baawu bisë kunatë mwaanë mu n'zo-Nzaambi yi Yelusaleemë mu kun'dumbulë fë nduunzi yi Fumu, 23cibilë bësonikë mu n'kaakë wu Fumu : « Wosuku mwaanë wun'tetë wu bakëlë wum'butu, bëkun'tuunvi mu Fumu#2.23 Lub 13.2,12.. » 24Baawu bëfwenikini kuvaanë yivaandi civakuli bësonikë mu n'kaakë Fumu : « Mëbeembi mwaali më bidukë, kaambofo mëbeembi mwaali mëcyeeci#2.24 Lev 12.8.. »

25Ku Yelusaleemë kwabë muutu mweekë mu lizinë li Simeyoonë. Naandi wabë muutu wusulëmë i wabë sisu mu Nzaambi. Naandi wulëciingaangë muutu wunë Nzaambi wufilë mu kuvuuci mboongu Islayeelë. Ciluunzi ci Saantu cyabë yaandi 26i wusë n'kaambë ti naandi kusë lengë fwa ko kukaambu kutekë kumonë ntetë Kliistu wunë Fumu kun'filë. 27Ciluunzi ci Saantu cisë natë Simeyoonë ku n'zo-Nzaambi. Libaambë li Yeesu lin'natë mu kun'dumbulë bunë bun'lombilë n'kaakë, 28Simeyoonë wusë kwaakë mwaanë mu myookwaandi i wusë toondë Nzaambi i kutubë :

29« A Fumu, buyifanwabu lukanyu lwaaku lwavangënë.

Njeeyi kupodi kubiikë ciseelu cyaaku kufwiilë mu n'sikë.

30Cibilë ti, miinu yamonë mu meeso maami N'vuucyaaku,

31luvukulu lunë njeeyi wubelikilë ntamë mu cibilë ci mboongu baatu yooso:

32mati cyeseesë cin'vangisi njeeyi kuzabëkënë mu baatu bëke mu sisi syooso mu buloongo

yinë yim'ba bumpumu bu Islayeelë likaandë lyaaku#2.32 Ezy 42.6; 49.6; 52.10.. »

Lubiku lu Simeyoonë

33Taatë i mamë Yeesu, bisë tulumukë mu kuwu maambu mo Simeyoonë wutubë mu naandi. 34Simeyoonë wusë bësakumunë i kukaambë Maali, mamë Yeesu : « Mwaanë awu wakwiisë mu kubwiisi, kaambofo kuvumbulë baatu bëmpaapë bë Islayeelë. Naandi wum'ba ciliimbu ci Nzaambi, cin'vangisi nkankini, 35i wum'baasi fë ciyalëlë simbalulu siswaamë mu mitimë mpaapë baatu. Mu njeveekë Maali, mwaangë wun'tobulë mbalyaaku dedë mweekë cisabë. »

Aanë, m'bici

36Fabë yivaandi m'bici mweekë wu n'cyeetu mu lizinë li Aanë, naandi wabë mwaanë Penweelë, wu cifuumbë ci Aseelë. Naandi wabë cinunu. Naandi wuziingë saambwali li n'vu yimunë n'nuni wunë kukweelë fë bulesi bwaandi, 37i wusë kuba n'fwiili, naandi wusë kudukusi naanë li mëkuumi na më n'vu. Naandi wusye botukaangë ko ku n'zo-Nzaambi, kunë kulësalilaangë Nzaambi bwiilu ku bwiilu muunyi ku muunyi : ke kaangaangë n'sweelë i ke sambilaangë. 38Naandi wusë kutuukë mu ntaangu be yooyi i wusë kutoondë Nzaambi. Naandi wutubilë mu mwaanë ke baatu bakë booso banë bëlë ciingë ti, Nzaambi wuvuuci baatu bë Yelusaleemë.

Luvutukulu ku Nazaleetë

39Bunë libaambë li Yeesu lisë manë kudumbulë mwaanë bunë bun'lombilë n'kaakë Fumu, baawu bisë vutukënë yi mwaanë ku Ngalilee, ku livulë lyaawu li Nazaleetë. 40Mwaanë wusë ke kulaangë i ke ciindaangë. Naandi wabë wuwaalë bungelë i muulë wu Nzaambi wabë mu naandi.

Yeesu mu kuumi mivu wali mu n'zo-Nzaambi

41Mu kadë n'vu, libaambë li Yeesu lilëkwendaangë ku Yelusaleemë mu n'saangu Paakë. 42Ntaangu Yeesu wudukisi kuumi mivu wali, baawu bën'natë bunë bwabë ciipë cyaawu#2.42 Lub 12.1-27; Det 16.1-8.. 43Bunë n'saangu wamani, libaambë lisë vutukënë, Kasi Yeesu mwaanë, wusyaalë ku Yelusaleemë, taatë i mamë bësye zaabaangë ko. 44Baawu bëlëbalaangë ti Yeesu wabë yimunë bayaawu bëlëkwendë yaawu mu mweendo, i bisë lyaatë cilumbu cin'viipë. Fë mbusë baawu bisë toonë mu kun'toombë mu nkoongë bayaawu bëke likaandë limweekë i mu nkoongë sindiku syaawu. 45Kasi baawu bësye m'monë ko i bisë ke vutukunaangë ku Yelusaleemë mu ke n'toombi. 46Fë mbusë bilumbu bi tatu, baawu bisë ke n'zakënë mu n'zo-Nzaambi. Naandi wabë wukalë fë meeyi miloonji n'kaakë, wulëbëkuwaangë i wulëbëkufulaangë byuufu. 47Bake booso bëlën'kuwaangë, bisë tulumukë mu cibilë ci mëlyeelë maandi i mputululu kulëvaanë. 48Ntaangu yo taatë yi maamë bëm'moni, baawu kubwa libobo, i mamë wusë n'kaambë : « A mwanaami, cibilë-mbici njeeyi watusiilë katyoobwe? Tataaku i miinu tulë mu cyuundë mu ke kutoombaangë. » 49Naandi wubëvutulilë : « Cibilë-mbici beeno luke kun'tombilaangë? Beeno lusye zaabë kwe ti miinu yifwenikini kukalilë mu n'zo Tataamye? » 50Kasi baawu bësye zikulë kuwu ko maambu manë naandi wulëbëkaambaangë.

51Yeesu wusë vutukë yaawu ku Nazaleetë. Naandi wulëbëcinzikaangë. Mamaandi wulë ke sweekaangë maambu makë mooso ku cimbeenzë cyaandi ci n'timë. 52Yeesu wulë ke kulaangë mu mpuungë i mu mëlyeelë i wulëmonikë buboti fë nduunzi yi Nzaambi i fë ntwaalë baatu#2.52 1 Sa 2.26; Big 3.4..

Currently Selected:

Liikë 2: NTVIL

Highlight

Copy