Liikë 1

Nsunjikulu

1Ndikwaami Tofiilë#1.1 Mëv 1.1.,

Mpaapë baatu bëyelikë kusonikë n'zisi mu maambu mëvangënë fë meeyiitu, 2bo bumweekë bëtukambilë maawu ke simbaanji fë ntonunu, bëmonë i bëbakë cisalu ci kutendulë Libuungu li Nzaambi, 3bunë yim'balë, bwa yatombilë yivaamë kuzaabë buboti-buboti maambu makë mooso mëvangënë kutatikilë fë ntonunu, mu kumësonikë ke njeeyi, ndikwaami Tofiilë, 4bwiinji njeeyi wubakulë cyelikë ci maambu manë wutambulë.

Yaanzi yatendulë lubutulu lu Za-Batiisë

5Ntaangu Eloodë wabë n'tinu wu Zudee, kwabë ngangë-Nzaambi bëlëteelaangë Zakaali, naandi wabë wun'viipë mu cinguuku ci singangë-Nzaambi si Abya#1.5 1 Lu 24.7-18.. N'kasyaandi wabë musë likaandë li Aloonë n'kuluutu ngangë-Nzaambi, bëteelaangë Lizabeetë. 6Babë baatu bwaali bësulëmë fë meeso më Nzaambi, i baawu bëlëcinzikaangë deku-dekoo mikaakë yooso i tutumu tooso tu Fumu. 7Kasi baawu bësye ba yi mwaanë ko, cibilë Lizabeetë wabë cisitë i babë bwaali babë banunë.

8Cilumbu cin'viipë, Zakaali wulësalaangë cisalu cyaandi ci bungangë-Nzaambi mu n'zo-Nzaambi, cibilë cyabë cilumbu ci cinguuku cyaawu mu kusalë. 9Bunë bwabë ciipë cyaawu ci singangë-Nzaambi, baawu bëbulë njekë i bësoolë Zakaali bwiinji kukotë ku civingë ci saantu ci Fumu mu kookë n'liinji#1.9 Lub 30.7-8.. 10Nkoongë yooso yi bitamaanë yilësambilaangë fë ngaandë fë zoolë yo bëlëkokilaangë n'liinji. 11Kuzimbukulabu, yaanzi yimweekë yi Fumu yisë monikinë Zakaali. Yaanzi beenë yabë yitelëmë ku lweeku lu mëbakëlë lu civakululu bën'kokilaangë n'liinji#1.11 Lub 30.1-6; 1 Lu 7.48.. 12Bunë Zakaali kwam'moni, naandi wusë tulumukë i wusë ba mu boomë. 13Kasi yaanzi wun'kaambë : « Keelë wulë ba yi boomë, Zakaali, cibilë Nzaambi wacikunë n'saambwaaku. N'kasyaaku Lizabeetë, wum'butë mwaanë wu libakëlë wunë njeeyi wun'vaanë nkuumbu Za. 14Njeeyi wum'ba mu liyaanji linenë, i mpaapë baatu bën'sangililë mu lubutulu lwaandi. 15Cibilë, naandi wum'ba muutu wunenë fë nduunzi Fumu. Naandi wusë n'nwa viinyi ko, kaambofo mëlafu mëngolo#1.15 Lut 6.3.. Naandi wun'waalë yi Ciluunzi ci Saantu, kutoonë munë civumu ci mamaandi. 16Naandi wun'vutulë mpaapë baatu bë Islayeelë ke Fumu Nzaambyaawu#1.16 Mal 2.6.. 17Naandi wun'kwisë buke cipayi ci Nzaambi yimunë ciluunzi i luleendo lu m'bici Eli, mu kuvutulë bundiku bu mëtaatë yimunë baanë baawu i kuvutulë banë bëkaambu kulenvukë mu bungelë bu bësulëmë#1.17 Mal 3.23-24.. Naandi wun'vaangë likaandë libëliminë mu Fumu. » 18Kasi, Zakaali wuyufulë yaanzi : « Buni, miinu yin'zabilë ti, maambu be moomo mën'vangënë? Licyelikë, miinu yanunë i n'kasyaami, wakwiibë n'vu. » 19Yaanzi kun'vutulilë : « Miinu mi Ngabilyeelë#1.19 Dan 8.16; 9.21; Lik 1.26. yin'telëmaangë fë nduunzi Nzaambi mu kun'salilë. Naandi na wakun'filë ke njeeyi, mu kukukaambë mpolu be yiiyi yimboti. 20Kasi njeeyi wusye ta maanë ko mu mëbuungu maami, mo mën'vangënë mu ntaangu yin'dedëkënë, mu bwaawu njeeyi wum'ba libabë, wusë be tubë ko, tee cilumbu cinë maambu ama mëvangënë. »

21Mu ntaangu be yiinë, baatu bëlëciingaangë Zakaali i bisë tulumukë cibilë ti naandi wuvyoosi mpaapë ntaangu ku kati ku civingë ci saantu. 22Kasi ntaangu yo kubasikilë, naandi wusye bëtubënë yaawu ko, i baatu bisë zaabë ti, naandi cyeendë-meeso kwamonë ku kati ku civingë ci saantu. Naandi wusë bëkambilë maambu mu bivudë bi myooko i wusë ba libabë.

23Bunë Zakaali kwamani bilumbu byaandi bi kusalë ku n'zo-Nzaambi, naandi wusë vutukënë ku n'zwaandi. 24Fë mbusë mwa bilumbu, n'kasyaandi Lizabeetë, wusë ba mu bweembë, i wusë swaamë fë ngoondi taanu, kumonikë ve ke baatu. Naandi wulëtubaangë : 25« Tala manë Fumu kwavaangë mu miinu : buyifanwabu naandi watoombë kun'kobulë mu linë libe kun'fwiisyaangë sonyi fë ntwaalë bakë booso. »

Yaanzi yatendulë lubutulu lu Yeesu

26Mu ngoondë yin'samunu, Nzaambi wusë filë yaanzi Ngabilyeelë#1.26 1.19. ku livulë li Ngalilee, li Nazaleetë, 27kuke cilesi ci cyeetu wucini yi mpeembë, bëbilë kukweelë ke libakëlë bën'telaangë Zozeefë. Naandyaawu wabë ndaandu wu n'tinu Daviidë. Lizinë li cilesi ci cyeetu lyabë Maali. 28Yaanzi wusë kotë ku n'zwaandi, i wusë n'kaambë : « Ba mu liyaanji! Fumu wakuvaanë muulë wunenë, naandi ke yaaku. » 29Maali wusë kubaabë n'timë mu maambu mo yaanzi wun'kaambë. Naandi wusë yiyufulë buni bun'kwendilë mbilulu be yooyo. 30Yaanzi wusë n'kaambë : « Keelë wulë ba yi boomë a Maali, cibilë njeeyi watambulë muulë ke Nzaambi. 31Njeeyi wum'ba mu bweembë, wum'butë mwaanë wu bakëlë wunë wun'vaanë lizinë Yeesu. 32Naandi wum'ba n'nenë i bëkun'teelë Mwaanë Nzaambi-Mpuungu. Fumu Nzaambi wukum'byaasi n'tinu bunë bubeelë nkaakaandi Daviidë, 33i naandi wun'tumi tee yi tee mboongu Islayeelë. Lwaangu lwaandi mësitukulu ve#1.33 1 Sa 7.12.13.16; Ezk 9.6; Dan 7.14.. » 34Maali wusë kufulë yaanzi : « Buni lyalyooli lim'podi kuvangininë, cibilë ti miinu yicili yi mpeembë? » 35Yaanzi wusë n'vutulilë : « Ciluunzi ci Saantu cin'kulumukë mu njeeyi, i luleendo lu Nzaambi-Mpuungu lukufukë buke n'vefu. Mu bwaawu, wo wum'butu saantu i bëkun'teelë Mwaanë Nzaambi. 36Lizabeetë wubutënë yaaku, wulë mu kuciingë yivaandi mwaanë wu bakëlë, keti mu bununu bwaandi. Naandi wo bëlëteelaangë cisitë, weekë mu bweembë bu ngoondi samunu, 37cibilë ti Nzaambi wusë n'lekaangë lyaambu ko#1.37 Ntn 18.14.. » 38Maali wusë tubë : « Miinu ciseelu ci Fumu. Biikë ti maambu mooso mëvangënë bunë wakun'kambilë. » Fë mbusë, yaanzi wusë m'biikë.

Maali wuye monë Lizabeetë

39Fë bilumbu bilandëkënë, Maali wusë ke yendaangë mëlengë-lengë ku livulë lin'viipë li libweeti limoongo Zudee. 40Naandi wukotë ku n'zo yi Zakaali i wusë bilë Lizabeetë. 41Ntaangu yo Lizabeetë wuyuwu bweekë Maali, mwaanë wusë nikukë mu civumu cyaandi. Lizabeetë wusë waalë yi Ciluunzi ci Saantu, 42i wusë losukë mu mbeembu nkamu : « Nzaambi wakusakumunë, kuvyokililë bëcyeetu booso, i lusakumunu lwaandi luke mu mwaanë wo njeeyi wum'butë! 43Nani yikeeli bwiinji mamë Fumwaami wiisë ke miinwee? 44Talaanu, licyelikë bunë miinu yakuwu bwekaaku, mwaanë wanikukë yi liyaanji mu civumu cyaami. 45Nyeenzyaaku oyo : cibilë njeeyi wata lyaanë mu maambu mo Fumu wukuzabikini, i fanë maawu mën'vangënë. »

Luumbu lu Maali

46Maali wusë tubë ti#1.46 v. 46-55 i 1 Sa 2.1-10. :

« Ciluunzi cyaami cidumisi Fumu,

47i ciluunzi cyaami cyawaalë yi liyaanji

mu cibilë ci Nzaambi, N'vuucyaami.

48Cibilë, naandi wasitikë ntalwaandi

yi bubonzulu mu miinu n'dongwaandi#1.48 1 Sa 1.11..

Mu lyaawu kutatikilë fë bubwaafa,

mu sintaangu syooso,

baatu bëkun'teelë n'cyeetu liyaanji,

49cibilë ti Nzaambi-Mpuungu

wavaangë mu miinu maambu mënenë :

lizinë lyaandi Saantu.

50Naandi wum'monaangë cyaali

mu sintaangu syakë syooso

ke banë bëkum'bakaangë sisu.

51Naandi waleesi n'viingwaandi wooso mu mëngolo maandi,

i naandi watyamunë bangë mitimë lunaangu.

52Naandi wabotulë mitinu fë ntaanzyaawu,

i wazanjikë bibonzulu#1.52 Zob 5.11;12.19..

53Naandi wavaanë ndiiwu ke bifwa-nzalë,

i wavutulë bisinë myooko mpafëlë.

54Naandi wakwisilë mu kuzudi mboongo Islayeelë, biseelu byaandi,

i wusë n'zimbëkënë ko kubëfwiilë cyaali,

55bo bumweekë kuvangilë ci mëkulu ke Abalaamë

bo naandi kubikini ci mëkulu sinkaakë siitu. »

56Maali wusë vyoosi kwaasu ku ngoondi tatu ke Lizabeetë. Fë mbusë, wusë vutukë ku livulë lyaandi.

Lubutulu lu Za-Batiisë

57Bunë ntaangu yafwaani Lizabeetë wusë butë mwaanë wu bakëlë. 58Banë bëlukalaangë yaandi bwaalë i libaambë lyaandi bisë zaabë ti Fumu waleesi buboti bwaandi. Mu lyaawu, baawu bisë ba mu liyaanji yimunë Lizabeetë. 59Bunë naanë li bilumbu lyafwaani, baawu bisë kweendë mu kubukë mwaanë bubakëlë#1.59 Lev 12.3.. Baatu booso bëzolë kun'vaanë lizinë li tataandi, Zakaali. 60Kasi mamaandi wusë tubë : « Monikoo, bëkun'teelë Za. » 61Baawu bisë n'kaambë : « Muutu ve fë likaandë lyaaku wuke lizinë be lyooli! » 62Mu lyaawu, baawu bisë kuvaangë mwa bivudë, mu kufulë Zakaali nkuumbu mbici naandi kun'zolë kuvaanë mwanaandi. 63Zakaali wusë loombë mwa libayi mu kusonikë, i wusë sonikë : « Lizinë lyaandi Za. » Mu lyaawu, baatu booso kutulumukë. 64Mo mu ntaangu beenë, Zakaali kutoonë kube tubë. Naandi wusë dumisi Nzaambi yi mëngolo mooso. 65Mu lyalyooli, bayaawu booso bëlëziingaangë yaawu belë-belë bisë ba yi boomë i mu libweeti lyooso li limoongo li Zudee, baatu bisë ke bulilaangë sinkuungu mu maambu be moomo. 66Bakë booso bëlëkuwaangë maambu be moomo, bisë ke yufusënaangë kusi n'timë : « Mwaanë be woowo, nani kum'ba? » Licyelikë, luleendo lu Fumu lum'ba mu naandi.

Luumbu lu lubiku lu Zakaali

67Zakaali, taatë mwaanë wusë waalë yi Ciluunzi ci Saantu. Naandi wusë kubikë mu ntubulu ayi :

68« We dumu Fumu, Nzaambi yi mboongu Islayeelë,

cibilë ti naandi wakwisë mu kuzudi mboongwaandi i mu kuyivuuci.

69Naandi wavaanë beeso N'vuuci wuke mëngolo

mu sindaandu si n'tinu Daviidë, ciseelu cyaandi.

70Mati maawu yabë kutendulë faanë yi faanë, mu munu mibicyaandi yi saantu :

71naandi wukanyi mu kutuvuuci mu myooko simbeenyi

i mu lutumu lu bo bëtutiisi libi.

72Naandi wusë leesi buboti bwaandi ke sinkaakë siitu,

i naandi wusye zimbëkënë ko n'kangulwaandi wu saantu.

73Licyelikë, Nzaambi wulefë mpesë ke Abalaamë, nkaakiitu#1.73 Ntn 22.16-17.,

74mu kutuvuuci mu lutumu lu simbeenyi,

bwiinji wutuvaanë likanë li kun'salilë kukaambu boomë,

75bwiinji tuba baatu bë saantu bësulëmë fë nduunzyaandi

bilumbu byakë byooso bi luziingu lwiitu.

76Njeeyi mwanaami, njeeyi wum'ba m'bici wu Nzaambi-Mpuungu,

cibilë ti njeeyi wun'lyaatë fë nduunzi Fumu bwiinji mu kululikë nzilaandi#1.76 Mal 3.1.

77i mu kuzabikini mboongwaandi ti naandi wun'kwisë mu kun'vuuci

mu kobulë mësumu miinu.

78Nzaambiitu ke beenë luzolë i mëboti.

Naandi wun'vangisi kulesikë mu beeso cyeseesë ci yilu, cifwanëkënë yi muunyi cin'selukë,

79mu kuvaanë cyeseesë mu banë bëke ku bwiilu i ku ciduundu ci lufwa, i

mu kunatë bitaambi biitu mu nzilë n'sikë#1.79 Ezy 9.1.. »

80Mwaanë wulë ke kulaangë i wulë ke bakaangë mëngolo më ciluunzi. Naandi wulëzingilaangë ku si ciyumi tee mu cilumbu cinë naandi wuyimonikë fë ntwaalë mboongu Islayeelë.

Currently Selected:

Liikë 1: NTVIL

Highlight

Copy