Liikë 19

Yeesu i Zasee

1Bunë kwakoti ku Yeliko, Yeesu wusë tabë livulë. 2Foofë, fabë muutu bëlëtelaangë Zasee. Naandi wabë n'kuluutu binoongë mpaku i wabë cisinë. 3Naandi wulëtoombaangë kumonë nani wabë Yeesu, vandi kasi bo kwabë yi n'telë wunkufi, naandi wusye podi ko mu cibilë ci nkoongë baatu. 4Naandi kukumbelëlë ntiinu ku ntwaalë i wusë makë mu n'ti bën'telaangë sikomoolë, bwiinji kumonë Yeesu wulëvyokilë faawu. 5Bunë Yeesu kwatuuci fë mbiinji be yiina, naandi wusë vum'bulë ntalu i wusë kaambë Zasee : « Lengë tuukë, bufwenikini ti miinu kukalë ke njeeyi Cibubwayi. » 6Zasee wusë lengë tuukë i kun'tambulë yimunë liyaanji. 7Bamoni obo, bakë booso bëlëmimëtaangë i bëlëtubaangë : « Muutu owo wake kalë kuke n'sumuci! » 8Zasee, wutelëmë fë ntwaalë Fumu, naandi wusë tubë : « Yuwo, a N'loonji, miinu yin'tiisi kuvaanë ndaambu yi biimë byaami ke biyeembi i ningë miinu yibongisi mpaapë simboongo ke muutu, miinu yin'tiisi kun'vutulilë mu vyaasi na bunë bwaawu#19.8 Lub 21.37; 2 Sa 12.6; Big 6.31.. » 9Yeesu wusë n'kaambë : « Bubwayi, luvukulu lwakotë ku n'zo be yiiyi cibilë ti njeeyi yivaaku, ndaandu Abalaamë. 10Kasi Mwaanë muutu, wuyisilë mu kutoombë i kuvuuci banë babë bëzimbilë. »

Sasafë yi binkongulu bi woolë

(Mat 25.14-30)

11Abu baatu bayuwu bikumë obyo, Yeesu kube bëteelë sasafë yimweekë, cibilë naandi wabë wabelëmë fë Yelusaleemë i baatu bëlëbalë ti Lwaangu lu Nzaambi lufitë monikë mu mwa ntaangu. 12Talaanu manë naandi kutubë : « Libakëlë li cifuumbë ci zitëmë wuyendë ku si cinaanu, mu kwe byaali fumu-lwaangu. Naandi nkanë wuvutëkunooso. 13Cin'tetë na kweendë, naandi kutelë kuumi li bisasi byaandi, kubëvaanë kuumi li binkongulu bi woolë i kubëkaambë ti : “Sasyaanu byaawu tee yi fanë miinu yin'vutukënë.” 14Kasi baatu bë syaandi bën'leendë, i baawu bisë filë bipayi fë mbusaandi mu kutubë ti : “Beeso tusye n'zolë ko, kuba fumu-lwaangu.” 15Bëm'byaasi kwaandi fumu-lwaangu i wuvutukënë ku syaandi. Naandi wusë kutelë bisasi binë kuvaanë simboongo, bwiinji kuzaabë syo babakë. 16Wun'tetë kwiisë i kutubë : “A fumu, miinu yabe bakë kuumi li binkongulu bi woolë mu byo nje kum'paanë.” 17Fumu-lwaangu wusë n'kaambë : “Liboti, nje wulë cisasi ciboti, cibilë njeeyi wabë wusulëmë mu mwa biimë bicyeeci, miinu yakubyaasi fumu likuumi li mëvulë.” 18Wumwaali wusë kwiisë i kutubë : “A fumu-lwaangu, cinkongulu cyaaku ci woolë cyabutë binkongulu bi taanu.” 19Fumu kun'kaambë : “Nje yivaaku yakubyaasi fumu li mëvulë më taanu.” 20Wun'ka kutuukë i wusë tubë : “A fumu, cinkongulu ci woolë cyaaku, cyaawu aci. Miinu yiciziingë fë n'lelë. 21Cibilë miinu yiba yi boomë mu njeeyi, njeeyi mungë bubaalu. Njeeyi wum'boongaangë biimë binë bikeeli ko byaaku, njeeyi wun'velaangë byo wukaambu kukunë.” 22Fumu kun'vutulilë : “Cisasi cibi, miinu yakukufundisi mu mëbuungu maaku njeveekë. Njeeyi wuzabisi ti miinu yim'boongaangë biimë binë bikeeli ko byaami i miinu yin'velaangë byo yikaambu kukunë. 23Oboobo, cibilë-mbici njeeyi wukaambu kutulilë luboongo lwaami ku cisweeku ci mboongo? Bwiinji fë luvutukulu lwaami, nkanë yilëboongë syaawu yimunë lukulë!” 24Naandi wusë kaambë bo babë faanë : “M'botulyaanu cinkongulu ci woolë cike yaandi, i vaanaanu cyaawu ke awu wuke yi likuumi.” 25Baawu bisë n'kaambë : “A Fumu, na mati ke likuumi li binkongulwe!” 26– “Miinu yilusisimini, wunë wuke yi ciimë bëkun'vaanooso. Kasi ke awu wukambusu bëkum'botulë keti fwaati fëke yaandi. 27Mu banë bëke simbeenyi syaami, bo bëmaangë ti miinu kuba fumu-lwaangu, bëtwalyaanu aku i bëvoondyaanu fë meeso maami.” »

Yeesu wakun'kwendë ku Yelusaleemë

(Mat 21.1-11; Mak 11.1-11; Za 12.12-19)

28Abu kwamani kutubilë katyoobo, Yeesu wusë ke yendaangë fë ntwaalë nkoongë mu nzilë yim'makaangë ku Yelusaleemë. 29Bunë kwabelëmi kutuukë bwaalë bën'telaangë Betëfaazë i ku Betani, belë-belë yi limoongo li miti Oliivë, naandi wusë filë fë ntwaalë bilaanzi byooli#19.29 Mak 11.1., 30i wusë bëkaambë : « Yendaanu ku bwaalë buke fë ntwaaliinu, ntaangu beeno luke tukilë, lum'monë mwaanë buulu wukangëmë, fë yilwaandi muutu vo yibuunu kukalilë vyaasi. N'kutulyaanu i n'twaalyaanu afa. 31Ningë muutu wulukufulë : “Mu cibilë-mbici beeno lwakun'tulilë?” N'kaambyaanu: “Fumu ke yi n'ciinzë mu cyaawu.” »

32Bo bëfilu bisë kweendë i bisë ke zakënë bunë Yeesu wabë bëkaambilë. 33Bunë baba mu kutulë mwaanë buulu beenë, baatu bëbakë cyaawu bisë bëkufulë : « Cibilë-mbici beeno lulë mu kukutulë cyaawu? » 34Baawu bisë vutulë : « Fumu ke yi n'ciinzë mu cyaawu. » 35Mu lyalyooli, baawu bisë natë cyaawu kuke Yeesu. Baawu bëtuulë binkutu byaawu fë yilu mwaanë buulu i bisë maci Yeesu fë yilwaandi#19.35 Zkl 9.9.. 36Ntaangu kulëkwendilë, baatu bisë ke yalaangë biyuungë byaawu mu nzilë#19.36 2 Mt 9.13.. 37Abu kulëbelëmë ku Yelusaleemë, mu nzilë yin'kulukaangë ku limoongo li miti Oliivë, nkoongë yakë yooso yi bilaanzi yisë kuwaalë mu nyeenzi, bisë ba mu kusangililë Nzaambi mu mbeembu yi nkamu cibilë mu bimaaku byooso binë baawu bëmonë. 38Baawu bëlëtubaangë : « Nzaambi kwe sakumuni n'tinu wun'kwisilë mu lizinë li Fumu! N'sikë wuba kusalaangë mëyilu i mpumu ke Nzaambi#19.38 Twi 118.26; Lik 2.14.! »

39Mwa mpooko yi Sifalisyaanu babë mu nkoongë, bisë kaambë Yeesu : « A Fumu, kaambë bilaanzi byaaku bëkalë swii. » 40Yeesu wusë bëvutulilë : « Miinu yilukaambë, ningë baawu bëbëkalë swii, mëmanyi mën'losukë! »

Yeesu walilë mu baatu bë Yelusaleemë

41Bunë Yeesu wusë belëmë ku livulë, i wusë yimonë, naandi wusë lilë mu cibilë cyaandi, 42wusë tubë : « Ningë njevaaku wulizaabë yivaandi mu cilumbu aci, buni bukubakilë n'sikë! Kasi buyifanwabu, lyaawu liswaamë mu njeeyi, njeeyi kupodi ve kulimonë! 43Cibilë bilumbu bilë mu kwiisë mu njeeyi fanë simbeenyi syaaku bëkuzukë mu bibakë biciindë i bëkubatikini mu sinkoonzu syakë syooso. 44Baawu bëkunyisëkënë nje wo, njeeyi i baanë baaku booso. Baawu bisë bëm'biikë ko limanyi limweekë kutetëmë fë yilu limanyi lin'ka, cibilë njeeyi wusye bakulë kuve ntaangu yo Nzaambi wuyisë mu kukuzudi! »

Yeesu mu n'zo-Nzaambi

(Mat 21.12-17; Mak 11.15-19; Za 2.13-22)

45Yeesu wukotë mu n'zo-Nzaambi i wusë ba mu kukulë bisumbisi, 46mu kubëkaambë : « Busonëmë : “N'zwaami yim'ba n'zo yi n'saambu.” Kasi beeno, lwayicitulë civingë ci biifi#19.46 Ezy 56.7; Yel 7.11! »

47Bilumbu byakë byooso, Yeesu wulësinaangë mu n'zo-Nzaambi. Bëkuluutu bë singangë-Nzaambi, miloonji n'kaakë, mëkundaalë më Sizwiifë i sifumu sisi bëlëtoombë kun'voondë. 48Kasi baawu bësye zaabë ko buni kulivangilë, cibilë mboongu yooso yilë n'kuwulwaangë mu bunketë.

Currently Selected:

Liikë 19: NTVIL

Highlight

Copy