Liikë 20

Kuni kufuminë lutumu lu Yeesu?

(Mat 21.23-27; Mak 11.27-33)

1Cilumbu cin'viipë, Yeesu wulëloongë baatu mu n'zo-Nzaambi i wusë bëtendulilë Mpolu Mboti. Bëkuluutu bë singangë-Nzaambi i miloonji n'kaakë bisë kwiisë fë cimweekë yimunë mëkakëtë 2i bën'yufulë : « Tukaambyo, mu lutumu lu nani njeeyi ke vangilaangë maambu omo nani wakuvaanë lutumu mu lyaawu? » 3Yeesu wubëvutulilë : « Miinu yivaamë, yakulukufulaanu cyuufu cimweekë. N'kaambyaanu: 4nani wufilë Za mu kubatizyaalë#20.4 3.3,7.? Nzaambi voo baatu? » 5Kasi baawu bëtoonë kufindënë simpakë baveekë yi baveekë i kutubë : « Ningë tube vutulë “Mati Nzaambi na wun'filë”, naandi wutukufulë, “Cibilë-mbici beeno lukaambu kuta maanë mu Za?” 6Kasi ningë beeso tube tubë : “Baatu bën'filë,” baatu bakë booso sya bëtulakë mëmanyi mu kutuvoondë, cibilë baawu bëcikunë ti Za wabë m'bici. » 7Mu lyalyooli, baawu bisë vutulë : « Beeso tusye zaabë ko nani wun'filë. » 8Yeesu yivaandi wusë bëvutulilë : « Miinu yivaamë yisë luzabikini ko, mu lutumu lu nani yilë mu kuvangilë maambu be moomo. »

Sasafë yi bivasi bibi mu solë viinyi

(Mat 21.33-46; Mak 12.1-12)

9Fë mbusë, Yeesu wusë kube bëzabikini sasafë ayi : « Libakëlë limweekë wuvatë solë miti yi viinyi#20.9 Ezy 5.1., fë mbusë na kubiikë solë be yooyi mu myooko bivasi i wusë kweendë mu mweendo mu mpaapë bilumbu. 10Abu ntaangu yikuvelilë mëkuundi më viinyi yafwaani, naandi wusë kufilë cisasi cimweekë ke bivasi bi solë viinyi, bwiinji kubakë cyaandi cikuuku cim'butë yi solë miti viinyi. Kasi bivasi bisë bulë cisasi beenë i kun'vutulë myooko yi myooko. 11Fumu solë wusë filooso cisasi cin'ka, kasi bivasi viinyi kubulë naandyaawu yivaandi, kum'bundulë i kuvutulë cyosuku ciimë kun'vaanë ve. 12Naandi wusë bëfilooso cisasi cin'tatu. Naandyaawu, baawu bisë kulwaasi cisasi beenë i bisë kum'bumë ku ngaandë. 13Fumu solë viinyi wusë balë ku cibeenzë cyaandi ci n'timë: “Miinu buni yake n'siilë? Yake n'filë mwaanaami wo yin'zolaangë beenë. Yim'balë ti baawu bëkun'cinzikë.” 14Kasi bunë bivasi bisë monë mwaanë beenë, baawu bisë tubënë baveekë i baveekë : “Na wuuwu wum'byalilë lifwa li solë be yiiyi yi viinyi. Tun'voondaanu, bwiinji solë be yiiyi yiba yiitu.” 15Baawu kum'bumë ku ngaandë yi solë viinyi i bisë n'voondë. »

« Mu lyalyooli, mbici fumu solë yi viinyi wun'vaangë mu baawu? 16Naandi wun'kwisë, wun'voondë bivasi bi viinyi i wun'vaanë solë ke bisasi bin'ka. » Bunë baatu bayuwu bikumë obyo, baawu bisë tubë : « Lyaawu olyo bunë yim'balë kusë livangënë ko! » 17Kasi Yeesu wusitikë meeso maandi mu baawu i wutubë : « Mbici Libuungu be liili lin'tubë :

“Limanyi lyo bituunji bëbumë,

lyaawu lyacitukë limanyi linkumë#20.17 Twi 118.22.”?

18Wosuku muutu wum'bwa fë yilu limanyi be liili wun'kesëkënë. Ningë lyaawu libe bwa fë yilu muutu, lyaawu li kun'kesëkënë. »

Mpaku bën'futilë ke n'tinu wu Loomë

(Mat 22.15-22; Mak 12.13-17)

19Miloonji n'kaakë i bëkuluutu bë singangë-Nzaambi bëlëtoombë kubwiilë Yeesu munë ntaangu be sinë sinaani, cibilë ti baawu bisë zaabë ti naandi wutubilë sasafë be yooyi mu baawu. Kasi baawu bisë ba yi boomë mu nkoongë baatu. 20Mu lyalyooli, baawu bisë ba mu ke sungaangë Yeesu mwakë mooso i bisë filë baatu bëm'monikë ti baawu bëzitu. Baatu beenë nkanë bësokë Yeesu mu cyuufu cimweekë, bwiinji bëbakë likanë mu kun'vakulilë ku lutumu i cinaangë ci mikwa-lwaangu. 21Baawu bisë kufulë cyuufu: « A Fumu, beeso tuzabisi ti maambu mo njeeyi wulë mu kutubë i mo wulë mu kutuloongë mëke mëcyelikë. Njeeyi kusë wun'fundisyaangë ko mu kumonë mu biinyi, kasi wulë mu kuloongë bucyelikë bun'toonzi Nzaambi. 22Mu lyalyooli, tuzabikini: tuke yi n'swa wukufutë mpaku vo moniko ke n'tinu Sezaalë? » 23Kasi Yeesu wusë bakulë n'taambu awu i wusë bëzabikini: 24« Leesyaanu miinu, cinkongulu cimweekë ci mboongo. Ciinyi aci bisonë abi, bi nanye? » Baawu bisë vutulë : « Byaawu bike bi n'tinu Sezaalë. » 25Mu lyalyooli, Yeesu wusë bëzabikini: « Vutulaanu ke Sezaalë binë bi Sezaalë i ke Nzaambi binë bi Nzaambi. » 26Baawu bisë lem'bëkënë kubakë lyaambu libi mu maambu manë naandi wutubë fë ciyalëlë. Tiilyoko, mputululwaandi yibe tulumisi i baawu bëkalë swii.

Cyuufu mu luvulumuku lu baatu bëfwa

(Mat 22.23-33; Mak 12.18-27)

27Bën'viipë mu nkoongë Sisadusyaanu — bo bën'tubaangë ti luvulumuku lukeeli ko#20.27 Mëv 23.8. bisë kubelëmë Yeesu i kun'yufulë 28mu nteku ayi : « A Fumu, Moyiizë wutuvaanë n'kaakë awu: “Mooti libakëlë likweelë, wuke yi mwanaandi nguli wu libakëlë, kufwa yi baanë kubiikë ve, bufwenikini mwanaandi nguli kukweelë n'fwiili bwiinji wuvaanë baanë mu na wo wafwa#20.28 Det 25.5-6. .” 29Vandi, fabë vyaasi saambwali li baanë bë nguli. N'kuluutu kukweelë, kufwa i baanë kubiikë ve. 30Wumwaali wusë kweelë n'fwiili, 31wun'tatu yivaandi. Bubeelë bo bumweekë mu lisaambwali lyooso, banë bëfwa baanë kubiikë ve. 32Kosuku, n'cyeetu wusë kufwa yivaandi. 33Fë cilumbu ci luvulumuku, na n'cyeetu be woowo wum'ba n'kasi wu nani? Cibilë lisaambwali lyooso lin'citulë n'kasi! » 34Yeesu kubëvutulilë : « Bëbakëlë i bëcyeetu bë buloongo be buubu bën'kweelë. 35Kasi bëbakëlë i bëcyeetu banë bëm'monikë ti baawu bëfwenikini kuvulumukë mu bo bëfwa i kuzingilë mu buloongo bu ntwaalë yikwisë kusë bën'kweelë ko. 36Baawu kusë bëfwa ko, beekë dedë mweekë yi siyaanzi. Baawu bëlë baanë bë Nzaambi, cibilë babotukë ku lufwa mu kutambulë luziingu. 37Moyiizë naveekë wulitubilë cyelikë ti bëfwa bën'vulumukë. Mu n'kukë wo bëlë mu kutubilë mu cisosu cilëvya mbaasu, naandi watelë Fumu “Nzaambi Abalaamë, Nzaambi Isaakë i Nzaambi yi Zakoobë#20.37 Lub 3.2,6..” 38Nzaambi, wusë bëtubë Yeesu, wulë Nzaambi yi baatu lumoonyi i yaaku ti yi bëfwa, cibilë bakë booso bëke moonyi mu naandi. » 39Mwa ndaambu miloonji n'kaakë bisë tubë : « A Fumu, wavumukë buboti. » 40Baawu bësye be podi ko kun'yufulë byuufu bin'ka.

Kliistu i Daviidë

(Mat 22.41-46; Mak 12.35-37)

41Yeesu wusë bëkaambë : « Buni baatu bëm'podi kutubilë ti, Kliistu wuli mwaanë Daviidë? 42Licyelikë, naveekë Daviidë na wusonikë mu Libuuku li Twiimbu:

“Fumu Nzaambi wukaambë Fumwaami:

Yisë kalë ku mëbakëlë maami,

43tee yi fanë yin'tulilë simbeenyi syaaku

kusi maalu maaku#20.43 Twi 110.1..”

44Mooti Daviidë wukun'teelë “Fumu”, buni Kliistu kum'podyooso kube beelë mwanaandye? »

Yeesu wabikinyi baatu mu miloonji n'kaakë

(Mat 23.1-36; Mak 12.38-40)

45Bunë baatu booso bëlën'yuwaangë, Yeesu wusë kaambë bilaanzi byaandi : 46« Keelaanu mu miloonji n'kaakë, bën'zolaangë kuzungunë mu mëzweeli mëkulë i ke bilwaangë yi luciinzu looso fë ciyalëlë. Baawu bën'zolaangë kukalë mu biikë bi ntwaalë mu bizutununu i biikë bi bunaangë mu bikaamvu binenë. 47Baawu bën'vokënaangë bëfwiili byakë byooso bëbakë i ke vaangaangë mufukë-nyeembo mu misaambu yikulë-yikulë, bwiinji baatu bëbëmonaangë. Baawu bën'fuundusu mu mëseembu më kwaatë-yekë. »

Currently Selected:

Liikë 20: NTVIL

Highlight

Copy