Liikë 18

Sasafë yi n'fwiili i nzoonzi

1Yeesu wusë bëtelooso sasafë ayi mu kubëleesi ti baawu bëfwenikini kukalilë kadi ntaangu mu kusambilë, yi bitu kuvolë ve: 2« Nzoonzi mweekë yabë fë livulë lin'viipë wukaambu kubakaangë Nzaambi sisu i luciinzu ve mu wosuku muutu. 3Fanë livulë beenë fabë yivaandi n'fwiili wulëkwisaangë kadi ntaangu mu kun'kaambë : “Ntabuli simpakë yimunë mbeenyaami”. 4Mpaapë vyaasi, nzoonzi wulëmaangaangë, kasi wusë tubë : “Cyelikë miinu sisu ve mu Nzaambi i yisë n'cinzikë wosuku muutu ko, 5kasi bo n'fwiili awu wulë mu kum'paangë mpokoongu, miinu yakun'zabikini siduunji syaandi, mu kumaangë naandi, mu kweendë i kwiisë wukum'pangisi n'tu kutaatë.” » 6Fumu wusë be tubë : « Yuwaano manë mën'tubë nzoonzi yike yi mëvaangë mëbi. 7Cibeeni, Nzaambi wusë n'vaanë nduunji ko ke banë kusoolë bëke losukaangë bwiilu ku bwiilu, muunyi ku muunyi? Wun'volë bitu mu kubëvatule? 8Miinu beeno yikaambë: naandi wulengë kubëvangilë nduunji. Kasi, bunë Mwaanë muutu wun'kwisë, wukuzakini ciminu fë moongu butotwe? »

Sasafë yi Falisyaanu i cinoongë mpaku

9Yeesu wusë tubë yivaandi sasafë ayi, mu cibilë ci banë bëlëbalaangë ti baveekë bësulëmë fë nduunzi Nzaambi, i bëlëmonaangë bën'ka baatu kwaandi vwiili : 10« Baatu bwaali bisë kweendë ku n'zo-Nzaambi mu kusambilë. Wumweekë wabë Falisyaanu i wun'ka cinoongë mpaku. 11Falisyaanu kutelëmë i bo kulësambilë mu cibeenzë cyaandi ci n'timë : “A Nzaambi yaami! Miinu yakutoondë mu cibilë, yikeeli ko bo buke baatu bën'ka bëkeeli biifi, baatu bëbi i banë bën'valaangë. Miinu yakutoondë cibilë yikeeli ko buke cinoongë mpaku ocyo. 12Miinu yin'kaangaangë n'sweelë bilumbu byooli mu lumiingu i yivaanaangë cikuuku cimweekë ci kuumi mu byaami byooso.” 13Cinoongë mpaku wusë telëminë cinaanu, i wusye podi ko kuvumbulë ntalu ku yilu. Kasi naandi wulëbulaangë fë n'timë i wulëtubaangë : “A Nzaambi, n'fwiili cyaali, cibilë yilë n'sumuci!” 14Miinu yilukaambë, bëtubë Yeesu, cyelikë, muutu owo wabë wusulëmë yimunë Nzaambi#18.14 wuba wusulëmë yimunë Nzaambi kaambofo wutambulë lobukulu ke Nzaambi. bunë kwavutukë ku bwaalë bwaandi, kasi yaku ti Falisyaanu. Licyelikë, wosuku wuyizanjikë wun'kulukë kasi wunë wun'kulukë wun'zanjiku. »

Yeesu wasëmë bibabanë

(Mat 19.13-15; Mak 10.13-16)

15Baatu bëlëtwaalaangë bibabanë kuke Yeesu bwiinji kubëtendikë myooko. Bamoni katyoobo, bilaanzi bisë bëseembë. 16Kasi Yeesu wusë belëmë ke bibabanë i wusë tubë : « Biikaanu bibabanë bisë ke miinu! Bëfuunjaanu ko, cibilë Lwaangu lu Nzaambi luke dedë mweekë bo buke baawu. 17Licyelikë, yilukaambë : wosuku wun'kaambu kwaakë Lwaangu lu Nzaambi dedë buke cimwamwanë, naandyoowo, cyelikë, kusë n'kotë kwaawu ko. »

Muutu wu cisinë

(Mat 19.16-30; Mak 10.17-31)

18Fumu mweekë yi Sizwiifë wusë kufulë Yeesu : « A N'loonji wumboti, mbici yifwenikini kuvaangë mu kubakë luziingu lu sakë yi sakë? » 19Yeesu wusë n'kaambë : « Cibilë-mbici wukun'teelë muutu wumboti? Muutu ve wumboti, kanuku wo naveekë Nzaambi vwiili. 20Njeeyi wuzabisi mikaakë: “Keelë wulëvaalë, keelë wulëvoondë muutu, keelë wulëkwiibë, keelë wulëvaangë cimbaanji ci lupuutu mu wosuku muutu, cinzikë tataaku i mamaaku#18.20 Lub 20.12-16; Det 5.16-20..” » 21Libakëlë beenë lisë vutulë : « Miinu yicinzikë mikaakë yooso oyo kutatikilë fanë bubwabwanë bwaami. » 22Bunë kwayuwu katyoobo, Yeesu wusë n'zabikini: « Cimweekë cin'kaambooso yaaku: sumbisi byakë byooso wubakisi i kabë simboongo ke biyeembi, oboobo njeeyi wum'bakë businë kunë mëyilu. Yisë wukun'daandë. » 23Kasi bunë libakëlë beenë kwayuwu katyoobo, naandi wusë ba mu cyuundë cibilë naandi wabë cisinë cinenë. 24Yeesu wusë kumonë ti naandi wabë mu cyaali i wusë tubë : « Butudë beenë ke bisinë mu kukotë ku Lwaangu lu Nzaambi! 25Butudë beenë mu cibulu bën'teelë samu mu kuvyokilë fë livulu li ntuumbu, kasi mwiinji kutudë ke cisinë mu kukotë ku Lwaangu lu Nzaambi. » 26Banë bëlëkuwaangë Yeesu, bisë tubë : « Mu lyaawu nani wum'podi kuvuukë? » 27Yeesu wusë kuvutulë : « Lyaawu olyo mëvangulu mpa ke baatu, kasi ke Nzaambi, litudë likeeli ko. » 28Mu lyalyooli, Pyeelë wusë tubë : « Yuwo, beeso twavubikë byakë byooso binë tubakë, mu kukulaandë. » 29Yeesu wusë bëkaambë : « Licyelikë, ningë muutu wun'vubikë n'zwaandi, kaambofo n'kasyaandi, baanë baandi bë nguli, libaambë lyaandi i baanë baandi mu Lwaangu lu Nzaambi, 30naandi wum'bakë mpaapë mu ntaangu be yiiyi i mu buloongo bu ntwaalë yikwisë naandi wun'tambulë luziingu lu sakë yi sakë. »

Yeesu mu vyaasi yin'tatu wazabikini lufwa i luvulumuku lwaandi

(Mat 20.17-19; Mak 10.32-34)

31Yeesu wusë natë likuumi bë bwaali li bilaanzi byaandi i wusë bëkaambë : « Yuwaano, beeso twan'kweendë ku livulë li Yelusaleemë, kunë kun'vangininë makë mooso manë mibici bësonikë mu cibilë ci Mwaanë muutu. 32Bëkun'lekulë ke bo bëkaambu kuzaabë Nzaambi, bo bëkun'dyeengë, bëkun'fiingë i bëkun'taminë matë. 33Baawu bëkum'bulë sikoti si nzibulë-mbumë i bëkun'voondë. I fë cilumbu cin'tatu naandi wun'vulumukë. » 34Kasi bilaanzi bësye zikulë ko maambu be moomo. Suundu yi maambu be moomo yabë yiswaamë i baawu bësye zaabë ko manë mëlëtubë Yeesu.

Yeesu wabelusi mpofo

(Mat 20.29-34; Mak 10.46-52)

35Yeesu kwabelëmë ku Yeliko, kosuku mpofo mweekë wabë wukalë mu ndaambu nzilë i wulëloombaangë simboongo. 36Abu kwayuwu nkoongë baatu yilëvyookë, naandi wusë kufulë mbici obyo. 37Bisë kun'vutulilë ti, Yeesu li Nazaleetë wulë mu kuvyookë. 38Oboobo, naandi wusë losukë : « A Yeesu, li Mwaanë Daviidë, n'fwiili cyaali! » 39Bo bëlëlyaatë fë ntwaalë bisë kun'tundilë bwiinji kukoolë biyoko, kasi naandi wusë bweelë kulosukë yi mëngolo mooso : « A Mwaanë Daviidë, n'fwiili cyaali! » 40Yeesu wusë sikëmë, i kutumisi bën'twaalë. Bunë mpofo wusë belëmë yaandi, Yeesu wusë n'kufulë : 41« Njeeyi mbici wun'toombë yivaangë mu njeeyi? » Naandi wusë n'vutulilë : « A Fumu, mpaangisi kube monooso. » 42Yeesu wusë n'kaambë : « ngete, ciminu cyaaku cyakuvuuci. » 43Kususukulabu, naandi wusë be monë i wusë laandë Yeesu mu ke dumisyaangë Nzaambi. Mboongu yooso yamoni lyalyooli i yisë ba yivaandi mu kudumisi Nzaambi.

Currently Selected:

Liikë 18: NTVIL

Highlight

Copy