Liikë 17

Lisumu i n'leenvo

(Mat 18.6-7,21-22; Mak 9.42)

1Yeesu wukaambë bilaanzi byaandi : « Kusë yin'tubë ko maambu mënatë baatu mu kusumukë. Kasi lusifu olo ke wunë wun'vaangë lyalyooli! 2Mëyoolë mu naandi bën'kaangë mu cimenu limanyi linenë i kun'lakë mu m'bu, yikuvangisi kubwa mu lisumu wumweekë mu bibabanë. 3Keelaanu! »

« Ningë mwanaaku nguli be kuvaangë libi, n'vaanë ndoonji yifwenikini. Ningë naandi wube nyotëkënë livaangë lyaandi, n'lenvukilë. 4Ningë naandi wube kusafulë saambwali li vyaasi mu cilumbu i kadë vyaasi naandi wun'kwisë mu kukukaambë : “Miinu yanyotëkënë”, njeeyi kun'lenvukilë. »

Ciminu

5Mimbunzi bëkaambë Fumu : « Tukusi ciminu. » 6Fumu wusë cikunë : « Ningë beeno luke yi ciminu cicyeeci dedë mweekë lungeenzë lu mutalëdë#17.6 Mat 17.20., beeno kupodi kutubë ke n'ti owo, “Tumukë i we simimi mu m'bu” i wuluvitikilë. »

Cisalu ci ciseelu

7« Lwe biilaano lyaliili : nani mu beeno ke ciseelu cin'vatë, kaambofo ci luungë bibulu. Bunë kum'monë ciseelu cin'fuminë ku sisolë, naandi sya wun'kaambë : “Lengë kwiisë kukalë fë meesë?” 8Moniko, tiilyoko, naandi wukun'kaambë : “Mbelikilë biliiwu byaami, i viinji binkuutu bwiinji wukun'salilë ntaangu yo miinu yin'liilë i yin'nwiinë. Vandi ofo, njeeyi kupodi kwaaku kulya i kunwa mu yaaku ntaangu.” 9Naandi wusye toondë ko ciseelu cyaandi abu kwavaangë mo kun'tuumisi, bwaawu kwe? 10Bo bumweekë, beeno yiviinu, mooti beeno lun'vangisi mo bëlutumisi, tubaanu : “Beeso yiviitu biseelu bi buunë. Beeso twavaangë mo tufwenikini kuvaangë.” »

Yeesu wabukë kuumi li baatu babë yi bwaasi

11Bunë Yeesu, wulëkwendë ku Yelusaleemë, naandi wusë vyokilë fë mëkabë-ndilu më Samali i më Ngalilee. 12Naandi wukotë ku bwaalë bun'viipë, likuumi li bangë bwaasi bisë kwiisë mu ludyengunu lwaandi. Baawu bisë telëmë cinaanu#17.12 Lev 13.45-46., 13i bisë kulosukë : « A Yeesu, a Fumu, tufwiili cyaali! » 14Yeesu we bëmoni i kubëkaambë : « Ye yileesyaanu ke singangë-Nzaambi#17.14 Lev 14.2-3.. » Ntaangu bëlëkwendilë, baawu bisë sundilë kubuku. 15Wumweekë mu baawu, abu kwamoni ti naandi wabuku, wusë lengë vutukënë mu ke dumisyaangë Nzaambi mu mbeembu nkamu. 16Naandi wusë yilakë mu maalu më Yeesu, mbuuzu fë n'toto i wusë n'toondë. Muutu be woowo wabë musë Samali. 17Yeesu wusë kube tubë : « Likuumi lyakë lyooso libe buku, bwaawu kwe? Kuni kukeeli livwa limesi? 18Muutu ve wusë ba cisëmaanzë mu kuvutukë mu kutoondë Nzaambi, kanuku wo mweeni awu? » 19Tee Yeesu wusë n'kaambë : « Manë n'telë, i we yeendi. Ciminu cyaaku cyakuvuuci. »

Lwisulu lu Lwaangu lu Nzaambi

(Mat 24.23-28,37-41)

20Sifalisyaanu bisë kufulë Yeesu ntaangu mbici yin'kwisilë Lwaangu lu Nzaambi. Naandi wusë bëvutulilë : « Lwaangu lu Nzaambi lusë n'kwisilë kuve buke ciimë cim'monikë mu meeso. 21Bisë n'tubë ko: “Monaanwe, naandyaawu afa!” Kaambofo : “Naandi wuke afa!” Cibilë, lwe zaabyaanu lyaawu, Lwaangu lu Nzaambi luke fë meeyiinu. »

22Tee naandi wusë kaambë bilaanzi : « Ntaangu yin'kwisë yinë beeno lun'toombë kumonë Mwaanë muutu keti fë cilumbu cimweekë, kasi beeno lusë kum'monë ko. 23Bëlukaambë : “Monaanu lyaawu!” Kaambofo : “Monaanu afaafa!” Kasi, leembwaanu kweendë, nudumyaanu ntiinu ko. 24Dedë mweekë lusyeemu lun'kalukë ku yilu i lun'lesikë sosu mweekë yi sosu mesi, bwaawu bum'beelë Mwaanë Muutu mu cilumbu kun'kwisilë. 25Kasi bufwenikini ntetë naandi kumonë mpaapë simpasi i bëkum'bumë ke baatu bë bubwayi aci. 26Manë mëvangënë mu ntaangu Nowee, mën'vangënë bo bumweekë mu bilumbu bin'kwisilë Mwaanë Muutu. 27Baatu bëlëlyangaangë i bëlënwangaangë, bëlëkwelësënaangë i bëlëkweesyaangë baanë baawu, tee yi cilumbu cinë Nowee kukotilë mu likuumbi. Ngami yiyituukë i yivangisi bakë booso kufwa#17.27 v.26-27; Ntn 6.9-7.24.. 28Bum'beelë bo bumweekë yivaandi mo mëvangënë mu ntaangu Lootë : baatu bëlëlyangaangë i bëlënwangaangë, bëlësuumbaangë i bëlësumbisyaangë, bëlëkunaangë i bëlëtulikaangë. 29Kasi, cilumbu cyo Lootë kubotukë ku Sodoomë, Nzaambi wusë nokisi n'vulë mbaasu, yivangisi kuvoondë bakë babooso#17.29 v.28-29, Ntn 18.20-19.25.. 30Bum'beelë bo bumweekë cilumbu cyo Mwaanë Muutu kun'kwisilë. »

31« Munë cilumbu be ciinë, wunë wum'ba fë yilu beedi yi n'zwaandi i wum'ba yi biimë byaandi mu kati, sye fwaanë ko kutuukë mu kubiboongë#17.31 Mat 24.17.. Mpilë mweekë, wunë wum'ba mu sisolë sye fwaanë ko kuvutukë mu n'zwaandi. 32Lwe tebukaanu moonyi mu n'kasi Lootë#17.32 Ntn 19.26.. 33Wunë wun'toombë kukeelë luziingu lwaandi, wulunyambëkini, kasi wunë wulunyambikini, wulusweekë. 34Miinu yilukaambë, munë bwiilu beenë, baatu bwaali bëm'ba fë ciikë cimweekë : wumweekë bëm'boongë i wumesë wun'syaalë. 35Bëcyeetu bwaali bën'nikë lungeenzë fë cimweekë : Wumweekë bëm'boongë i wumesë wun'syaalë. 36Bëbakëlë bwaali bëm'ba mu solë, wumweekë bëm'boongë i wumesë wun'syaalë#17.36 Mat 24.40. . » 37Bilaanzi bisë n'yufulë : « Fa mbi lyaawu lin'vyokilë, a Fumu? » Naandi wusë vutulë : « Fanë fëm'ba vuumbi, faawu yivaandi fë ndukuninë tusuci#17.37 Zob 39.30.. »

Currently Selected:

Liikë 17: NTVIL

Highlight

Copy