Liikë 16

Cisasi cike buvavambë

1Yeesu wusë kaambë bilaanzi byaandi : « Libakëlë lin'viipë li cisinë lyabë yi cisasi i bisë kun'kaambë : cisasi ocyo wum'pudyaangë businë bwaaku. 2Fumu wusë n'telë i wusë n'kaambë : “Maambu mbi yilë mu kuwu mu njeeyi? Leesyo miinu bisalu byaaku, cibilë njeeyi wusë be podi ko kuba cisasi cyaami.” 3Cisasi wusë kutubilë mu naveekë : “Fumwaami sya kum'pokunë cisalu. Buni bukusilë? Miinu yikeeli ko mpaapë mëngolo mu kusalilë mu n'toto i yim'ba mu sonyi mu ke loombaangë.” 4Oboobo! Miinu yizabisi linë yake n'vaangë mooti bëkum'botulë fë cike cyaami, baatu mbasi bëkun'kwaakë mu sinzo syaawu! 5Mu lyaawu naandi wusë kutelë wumweekë-wumweekë mu banë bëlëdefë cyosuku ke fumwaandi. Naandi wusë kaambë ke wun'tetë : “Bya bikwa njeeyi wun'defë fumwaami?” 6Naandyaawu wusë n'vutulilë : “nkamë li mikendëmë li mëfutë më oliivë”, Cisasi cisë n'kaambë : “Cipengëlë cyaaku cyawaalë, Lengë kalë fësi i sonikë mëkuumë më taanu.” 7Naandi wusë kaambë wumesë: “Njeeyi bya bikwa wun'defë?” Naandyaawu wusë cikunë : “Nkamë li saaku li faliinë.” Cisasi wusë n'kaambë : “Tala cipengëlë cyaaku i sonikë naanë li mëkuumi.” 8Fumu wusë dumisi cisasi ci lupuutu, cibilë naandi wusalilë yimunë buvavambë. Mu lyaawu, bo bëke mu buloongo abu, bwiinji buvavambë fë ntwaalë bayaawu i bo buke mu cyeseesë. »

9Yeesu wusë bëtubë : « Miinu yilukaambë : vaangaanu bundiku yi bayiinu mu simboongo si lupuutu lu buloongo be buubu, bwiinji ntaangu simboongo beenë simaninë mu beeno bëlutambulë mu sinzo sin'kalilë. 10Wunë wuke wusulëmë mu mwa biimë bicyeeci, wuke yivaandi wusulëmë mu biimë binenë. Wunë wuke yi lupuutu mu mwa biimë bicyeeci, wuke yivaandi lupuutu mu biimë binenë. 11Mooti beeno lukeeli ko lusulëmë mu ntekwiinu yikusalilë businë bu nyeengulu bu buloongo be buubu, nani wum'podi kuluvaanë businë bucyelikë? 12Mooti beeno lukeeli ko lusulëmë mu businë bu baatu bën'ka, nani wuluvaanë liboti liinu bëlulundile? »

13« Cisasi ve cim'podi kusalilë fumu wali : kaambofo, naandi wun'leendë wun'tetë i wun'zolë wumwaali, kaambofo wun'fyaatë ke wun'tetë i wum'baayi wumwaali. Beeno lusë m'podi ko kusalilë Nzaambi i luboongo#16.13 Mat 6.24.. »

N'kaakë i lwaangu lu Nzaambi

(Mat 11.12-13; 5.31-32; Mak 10.11-12)

14Sifalisyaanu, bulëkuwaangë mëbuungu makë mooso omo i bisë ndyeengë Yeesu, cibilë baawu bëlëzolaangë simboongo. 15Yeesu wusë bëkaambë : « Beeno, baatu bën'leesi ti lusulëmë fë meeso më baatu, kasi Nzaambi wuzabisi mitimiinu. Cibilë linë baatu bëm'monë ti like beenë bunenë fë meeso më Nzaambi ciimë kwaandi vwiili. »

16« Ntaangu yi n'kaakë Moyiizë i mëbuuku më mibici yiziingë tee mu ntaangu Za-Batiisë. Kutoonë ntaangu beenë, Mpolu Mboti yi Lwaangu lu Nzaambi yilë mu kutendukë, i wosuku muutu wulë mu kuvaangë mëngolo mu kukotë kwaawu. 17Kasi li yilu i n'toto bin'zimbilë boobo kwaandi yi mwa cisonë cicyeeci cimweekë ci n'kaakë cim'bwa. »

18« Lyosuku libakëlë wum'botulë n'kasyaandi fë likweelë, i wun'kweelë n'cyeetu wun'ka, wun'vaalë. Wunë wun'kweelë n'cyeetu bëbotulë fë likweelë, wun'vaangë bunduumbë. »

Sasafë yi libakëlë li cisinë i Lazaalë

19« Yabë libakëlë lin'viipë li cisinë wulëvwaataangë binkutu bi noofi bi bukaalu i wulëvaangaangë kadë cilumbu misaangu yinenë. 20Ciyeembi cimweekë, lizinë Lazaalë wulë beelë simbeenzi, wabë wunonukë fë ntwaalë livitu li n'zo li cisinë. 21Naandi wulëzolaangë kulya biselëkëtë bilëbwangaangë kusi meesë më cisinë. Kasi yivaandi simbwa silëkwisaangë mu kuveendë sibeenzë syaandi. 22Ciyeembi wusë fwa i siyaanzi bisë natë kuke Abalaamë#16.22 13.28.. Cisinë yivaandi wusë fwa i bisë n'ziikë. 23Naandi wumonë mpaapë simpasi ku buloongo bu baatu bëfwa. Naandi wusë vum'bulë ntalu, i wusë talilë Abalaamë i Lazaalë wabë fë likumë lyaandi. 24Mu lyaawu, naandi wusë losukë : “A Tataami Abalaamë, nfwiilë cyaali i filë Lazaalë mu kubondikë lunzalë lwaandi mu masi bwiinji yibondikë ndakaami cibilë miinu yilë mu kumonë mpaapë simpasi mu kati ku mbaasu ayi.” 25Kasi Abalaamë wusë tubë : “A mwanaami, tebukë moonyi ti njeeyi wubakë mpaapë businë mu luziingu lwaaku, vandi kasi Lazaalë wumonë mpaapë simpasi. Abuubu, wakun'tambulë afaafa lubondulu lwaandi, kasi njeeyi weekë mu mënyonyi. 26Vandyooso, fëke n'vwiilë wunenë fëke beeno yi beeso. Bwaawu, banë bën'toombë kuvyokilë afa mu kweendë ke beeno, bë kusë m'podi ko i bë kusë m'podi ko yivaandi kutuukë kuke beeso yi fo njeeyi wukeeli.” 27Cisinë wusë tubë : “Mënaanë maaku ata! Filë vwiili Lazaalë ku n'zo Tataami, 28kunë kuke baanë baami bë nguli bëtaanu. Naandi weendë mu ke bëbikinyi bwiinji bëleembu kwiisë aku kuke mënyonyi.” 29Abalaamë wusë vutulë : “Baanë yaaku bë nguli bëke yi Moyiizë i Mibici mu kubëbikini. Bwiinji baawu be bëyuwulu.” 30Cisinë wusë tubë : “Moniko, Lyaawu lisye fwanëkënë ko a Tataami Abalaamë. Kasi ningë muutu wun'fuminë kuke bo bëfwa, i kweendë ke bëzakënë, fa foofo, baawu bëm'balulë mëvaangë maawu.” 31Kasi Abalaamë wusë n'kaambë : “Ningë baawu bësë n'zolë kuve kuwulu Moyiizë i mibici, baawu bën'kusë n'vitikë kuve, keti muutu mweekë wulëvulumukë mu bo bëfwa.” »

Currently Selected:

Liikë 16: NTVIL

Highlight

Copy