Liikë 15

Sasafë yi limemë lizimbilë

(Mat 18.12-14)

1Binoongë mpaku byooso i bisumuci bëbelëmë fëke Yeesu mu kun'kuwu. 2Sifalisyaanu i miloonji n'kaakë bëlësungaangë Yeesu. Baawu bëlëtubaangë : « Muutu owo, wun'tambulë bisumuci i wun'kwambulë yimunë baawu. » 3Mu lyaawu, Yeesu wusë bëteelë sasafë ayi : 4« Ningë n'viipë mu nkoongiinu, wuke yi nkamë li mëmemë i naandi wun'zimbisi limweekë mu maawu, naandi wusë biikë ko livwa li mëkumë-vwa mën'ka mu civakë mu kwe toombaangë linë lyazimbilë tee yi fanë naandi wukulimonë? 5Bunë naandi kulimonë, wum'ba mu liyaanji: naandi kutuulë limemë fë yilu mëvangëti maandi, 6i bunë kwavutukënë ku n'zwaandi, naandi wusë kucikë sindiku syaandi i bayaandi, i wusë bëkaambë : “Lwe yangëlëlyaanu yimunë miinu, cibilë miinu yamonë limemë lyaami linë lyabë lizimbilë.” 7Bo bumweekë, yilukaambë, bum'ba liyaanji livyokilili ku yilu mu cibilë ci n'sumuci wumweekë wun'toonë luziingu lumoonë yi mu livwa li mëkumë-vwa li baatu bësulëmë bën'kaambu n'ciinzë mu kuvilukë. »

Sasafë yi likutë li mboongo limonikë

8« Kaambofo, n'cyeetu mbici, mooti naandi ke yi likuumi li mëkutë li mboongo i naandi bunë kun'zimbisi limweekë, wun'kaambu kutatikë mwiindë, wun'kaambu kukombulë n'zo, i wusë n'toombë ko yi bungelë tee fanë kulimweene? 9Mooti naandi walimonë, wun'telë bayaandi i sindiku syaandi i wubëkaambë : “Sangilaanu yimunë miinu, cibilë yamonë likutë li mboongo lyo yizimbisi!” 10Bo bumweekë, miinu yilukaambë, fëke liyaanji fë meeyi siyaanzi si Nzaambi mu n'sumuci wumweekë wun'vilukë. »

Sasafë yi mwaanë wuzimbilë i wumonikë

11Yeesu wutubooso : « Muutu mweekë wabë yi baanë bwaali bëbakëlë. 12Cilesi wusë kaambë taatë : “Ata, mpaani cikuuku ci lifwa liitu cifwenikini mu miinu.” Fa foofo, taatë wusë kabë lifwa lyaandi mu baanë baandi bë bwaali. 13Mwa bilumbu byavyooci, mwaanë cilesi wusë sumbisi cyaandi cikuuku ci biimë i ke yendaangë yimunë simboongo syaandi ku si cinaanu. Fa foofo, naandi wusë zingilë mu n'vuusu, i wusë nyambikini boobo byakë byooso byabë yaandi. 14Bunë naandi kwamani kupudi byakë byooso, cibuyi cinenë cisë kwiisë mu si, i wusë toonë kukaambu binë bifwenikini. 15Naandi wusë ke yendaangë mu ke yituuli mu cisalu ke muutu mweekë musë si, wusë n'filë mu sisolë syaandi mu kuluungë singulu#15.15 Mak 5.11.. 16Naandi wabë yin'zalë kulya mëkuundi mëlë lyangaangë singulu, kasi muutu ve wukun'vaanë maawu. 17Fa foofë, naandi wusë balë zingulwaandi i wusë tubë : “Bisasi byooso bi tataami bike yimpaapë ndiiwu yibëfwenikini. Kosuku miinu aku yikeeli yilë mu kufwa nzalë. 18Miinu yake n'vutukënë ke tataami i miinu yikun'kaambë : Ata, miinu yasumukë fë nduunzi Nzaambi i fë ntwaalaaku. 19Miinu yisye be fwaanë ko ti njeeyi wukun'teelë mwanaaku, cin'tuli kwaaku bo buke wumweekë mu bisasi byaaku.” » 20Bo kwamanë n'telë, wusë vutukë ke tataandi.

« Bunë kwabë cinaanu yi n'zo, tataandi wusë n'talilë i wusë ba mu cyuundë. Naandi wudumë-ntiinu mu ke n'dyengënë, kum'buumbë i kun'fifë. 21Mu lyalyooli, mwaanë wusë tubooso : “Ata, miinu yasumukë fë nduunzi Nzaambi i fë ntwaalaaku, yisye be fwaanë ko ti njeeyi wukun'teelë mwanaaku…” 22Kasi taatë wusë kaambë biseelu byaandi : “Lengë twalaanu lizweeli li noofi i n'vwiicyaanu lyaawu. N'tuulaanu neelë mu luzalë i mëpaapë mu maalu. 23Twaalaanu ngoombi yivoongë i voondaanu yaawu. Twe vaanjyaanu n'saangu i twe saanjyaanu, 24cibilë ti mwanaami lumonaanu awu wabë wufwa i naandi wavutukënë mu luziingu, wabë wuzimbilë i yabe m'monë.” » Bisë toonë n'saangu.

25« Munë ntaangu beenë, mwaanë wu n'kuluutu wu libakëlë be woowo wabë ku sisolë. Fë luvutukulu lwaandi, bunë kwabelëmë yi n'zo, wusë kuwu biyoko bi bisikulu i mëcinu. 26Naandi wusë telë wumweekë mu biseelu i wusë n'yufulë manë mëlëvangënë. 27Ciseelu wusë n'vutulilë : “Nkombaaku wavutukënë i tataaku wavangisi kuvoondë ngoombi yivoongë, cibilë ti naandi wamonë mwanaandi wavutukënë yi buvinyi.” 28Mu lyalyooli, mwaanë wu n'kuluutu wusë booso mu fiti i wumaangë kukotë ku n'zo. Tataandi wusë basikë mu kubondililë mu kukotë. 29Kasi mwaanë wuvutulilë tataandi : “Yuwo, yeekë mpaapë mivu yinë miinu yikusalilaangë, i miinu sye kumanginë vyaasi ko mu wumweekë mu tutumu twaaku. Mu kumonë kwaandi njeeyi wusye kum'paanë vyaasi ko keti ngoombi yimweekë bwiinji yivaangë n'saangu yimunë sindiku syaami. 30Kasi bunë mwanaaku awu wavutukë, naandi wo wapudi businë bwaaku booso yimunë bëcyeetu bë nduumbë, mu naandi, wavoondë ngoombi yivoongë!” 31Taatë wusë n'kaambë : “A mwanaami, njeeyi wukalë-wukalë yaami i byakë byooso bike yaami, byaaku yivaandi. 32Kasi beeso tufwenikini kuvaangë n'saangu i kusangilë cibilë ti nkombaaku awu wabë wufwa i naandi wavutukënë mu luziingu, wabë wuzimbilë, i wamonikë!” »

Currently Selected:

Liikë 15: NTVIL

Highlight

Copy