Za 14

Yeesu nzilë yin'nataangë ke Taatë

1« Keelaanu lulë ba yi lusweenu, lwe baanu lufyaatu mu Nzaambi i lwe baanooso yivaandi lufyaatu mu miinu. 2Biikë bike bimpaapë ku n'zo Tataami, ningë lyaawu lisye beelë boobo kuve nkanë miinu, yisye lukaambë kwe? Ti yake lubelikilë biikë fanë lun'kalilë. 3Bunë miinu yin'kwendë mu kulubelikilë biikë, i miinu yin'vutukë mu kuluboongë, bwiinji luba yaami, yiviinu fo yikeeli. 4Beeno luzabisi nzilë yin'nataangë ko yilë mu kweendë. » 5Toma wusë n'kaambë : « A Fumu, beeso tusye zaabë ko kuni wulë mu kweendë, buni tufwenikini kuzaabë nzilë? » 6Yeesu wusë n'vutulilë : « Miinu nzilë, cyelikë, i luziingu. Muutu ve wum'podi kweendë ke Taatë mooti naandi sye tabilë kuve fëke miinu. 7Ningë beeno lun'zabisi, lun'zaabë yivaandi Tataami. Buyifanwabu beeno lwan'zaabë, lwam'monë. »

8Filiipë wusë n'kaambë : « A Fumu, tuleesi Taatë i beeso tum'ba mu nyeenzi. » 9Yeesu wun'vutililë : « Mpaapë mitoono miinu yakalë yiinu, njeeyi yibuunu kun'zaabë, a Filiipë? Wunë wakum'monë, naandi wamonë Taatë. Cibilë-mbici njeeyi wakun'tubë ti : “Tuleesi Taatë”? 10Njeeyi wusë n'ta maanë kwe ti miinu yike mu Taatë i Taatë ke mu miinwe? Mëbuungu manë yilukaambaangë beeno booso, mësë n'fuminaangë ke miinu kuve. Mati Taatë wun'zingilaangë mu miinu, naandi wun'dedikinyaangë mëvaangë maandi. 11Teelaanu maanë bunë miinu yin'tubë : miinu yin'zingilaangë mu Taatë i Taatë wun'zingilaangë mu miinu. Kaambofo teelaanu manë keti mu mëvaangë be moomo. 12Licyelikë, licyelikë yilukaambë : wunë wun'ta manë mu miinu, wun'vaangë bimaaku byo yilë mu kuvaangë, naandi wun'vaangë byo bivyokilili yi miinu, cibilë yilë mu kweendë ke Taatë. 13Miinu yin'vaangë makë mooso lun'loombë mu lizinë lyaami, bwiinji Mwaanë wuleesi bumpumu bu Taatë. 14Ningë beeno lube kun'doombë cyosuku ciimë mu lizinë lyaami, yilivaangë. »

Lukanyu lu Ciluunzi ci Saantu

15Ningë beeno lun'zolisi, lun'lenvukë tutumu twaami. 16Miinu yin'loombë ke Taatë mu kuluvaanë wun'ka wun'kwisë mu kulunwaninë cikaangë, bwiinji naandi wukalë yiinu: 17mati Ciluunzi ci cyelikë. Buloongo kupodi ve kun'tambulë cibilë bwaawu kupodi ve kum'monë, kaambofo kun'zaabë. Kasi beeno lun'zabisi, cibilë naandi wun'kalë yiinu i naandi wum'ba yiinu mu ntaangu syakë syooso. 18Miinu yisë lubiikë benuveekë ko dedë mweekë baanë bësyaanë. Miinu yin'vutukënë ke beeno. 19Mu mwa ntaangu buloongo busë bëkum'monë ko, kasi beeno lukum'monë cibilë ti miinu yilë mu kuziingë i beeno lulë mu kuziingë yivaandi. 20Cilumbu be cyooci, beeno lum'bakulë ti miinu yikangëmë yi Tataami i beeno lukangëmë mu miinu i miinu mu beeno.

21« Wunë wun'siimbë tutumu i wuyicinzikë, naandyoowo, be kun'zolë. Tataami wun'zolë wunë wukun'zolisi. Miinu yikun'zolë yivaandi i yim'monikë ke naandi. »

22Zuudë – yaaku ti Zuda Iskalyootë – wun'kaambë : « A Fumu, buni lin'vangininë ti njeeyi wukuyileesi ke beeso yaaku ti mu buloongo? » 23Yeesu wusë n'vutulilë : « Wunë wukun'zolisi wun'vitikë manë yin'tubë. Tataami wun'zolisi, beeso tun'kwisë ke naandi, Tataami i miinu i beeso tun'kalë ke naandi. 24Wunë be kaambu kun'zolë wum'maangë mëbuungu maami. Linë lulë mu kuwu miinu kutubë lisye fuminë ke miinu ko, kasi ke Taatë wo wukun'filë. 25Miinu yalukambilë mamoomë bo yicilyooso yiinu. 26Wunë wun'kwisë mu kulusaasi, Ciluunzi ci Saantu cinë Taatë wun'filë mu lizinë lyaami, naandi wulësinë makë mooso i naandi wulutebulë moonyi mu makë mooso manë yilukaambë. »

27« Mati n'sikë yalubikilë, mati n'sikaami yaluvaanë#14.27 Ezy 9.5.. Miinu yisë luvaanë waawu ko dedë mweekë buloongo bun'vaninaangë. Keelaanu lulë kalilë mu lusweenu i boomë. 28Beeno lun'yuwu kutubë : “Miinu yakun'kwendë, kasi yin'vutukënë ke beeno.” Ningë beeno lube kun'zolë, beeno lum'ba mu liyaanji mu kuzaabë ti miinu yakun'kwendë ke Taatë, cibilë Taatë bëvyokilë bunaangë yi miinu. 29Buyifanwabu, beeno yin'kaambë bosuku mamaamë më kutuuci, bwiinji bunë mën'kwisë, beeno lun'ta maanë. 30Miinu yisë be tubë mpaapë ko yimunë beeno, cibilë Civadë-mbi ci buloongo wulë mu kwiisë. Naandi wukeeli yi lutumu ko mu miinu. 31Kasi bufwenikini buloongo kuzaabë ti miinu yibe zoolë Taatë i yin'vaangaangë dedë mweekë Taatë wukun'tumë. Telëmaanu, twe yendyaanu! »

Currently Selected:

Za 14: NTVIL

Highlight

Copy