Za 13

Yeesu wasukulë maalu më bilaanzi byaandi

1Ntetë n'saangu Paakë, Yeesu wuzaabë ti zoolë yafwaanë mu naandi mu kubiikë buloongo be buubu mu kweendë ke Taatë. Naandi wulëzolaangë ntaangu syooso baandi bo babë mu buloongo i naandi wube zolë tee fë siitu. 2Yeesu i bilaanzi byaandi bëlëlyaangaangë ndiiwu mësikë. Dyaabu wuseengë n'timë Zuda, mwaanë Simu li Iskalyootë, mu kusumbisi Yeesu. 3Yeesu wulëzaabaangë naveekë ti wufuminë ke Nzaambi, i wuvutukënë ke Nzaambi i Taatë wutuulë byakë byooso mu lutumu lwaandi. 4Naandi wusë maanë n'telë fë meesë, wuvuulë cinkutu cyaandi i wuboongë n'lelë wuziingë mu lucyeto. 5Fë mbusë, naandi wusekulë masi mu liboolë i wusë sukulë maalu më bilaanzi byaandi i wumëfyoonë mu n'lelë wabë kuziingë mu lucyeto. 6Naandi wusë belëmë yi Simu li Pyeelë wunë wun'kaambë : « A Fumu, njeeyi wakun'sukulë maalwe? » 7Yeesu wun'vutulilë : « Njeeyi wusë munë kubakulë kuve buyifanwabu abu manë yilë mu kuvaangë, kasi wum'bakulë mu ntaangu yin'kwisë. » 8Pyeelë wusë n'kaambë : « Moniko, njeeyi kupodi ve kun'sukulë maalu! » Yeesu wun'vutulilë : « Ningë miinu yisye kusukulë maalu kuve, njeeyi wusë m'bakë cikuuku ko yimunë miinu. » 9Simu li Pyeelë wusë n'kaambë: « A Fumu, ningë boobo, keelë kun'sukulë tokë maalu, kasi n'sukuli yivaandi myooko i n'tu! » 10Yeesu wun'kaambë : « Wunë wakobilë, naandi n'ciinzë mu kusukulë tokë maalu, cibilë nawooso wucya. Beeno lucya, yaaku beeno booso kuve. » 11Yeesu wuzaabë buboti nani wufitë kun'sumbisi. Bwaawu kutubilë : « Beenë booso lukeeli lucya ko. »

12Yeesu abu kwe mani kubësukulë maalu, naandi wuboongë cinkutu cyaandi, wuvutukë fë meesë i kubëkaambë : « Beeno lwabakulë manë yaluvaangë? 13Beeno lulë mu kun'teelë “Fumu” i “N'loonji”, lu n'luungë cibilë miinu bwaawu yikeeli. 14Ningë miinu, Fumu i N'loonji yalusukulë maalu, beeno yivaandi, lufwenikini kuyisukulë maalu benuveekë yi benuveekë. 15Miinu yaluleesi buni lufwenikini kusiilë bwiinji luvangilë bo bumweekë miinu yasilë mu beeno. 16Licyelikë, licyelikë yilukaambë, ciseelu sye vyokilë bunaangë yi Fumu kuve, kaambofo wunë bëfilë kuvyokilë bunaangë yi wunë wun'filë#13.16 v. 12-16 i Lik 22.24-27.. 17Buyifanwabu beeno lwazaabë mamoomo, beeno lum'ba mu liyaanji ningë lube mësalilë. 18Miinu yisë n'tubilë kuve mu beeno booso, yizabisi banë yisoolë. Kasi bube fwanëkënë mo mësonëmë mëvangënë : “Wo wulëkabenaangë yaami limpa wakum'balukulë.#13.18 Twi 41.10.” 19Buyifanwabu yakulukaambë, ntetë lyaambu kuvangënë, bwiinji ti faanë lyaawu lin'kwisilë beeno luta maanë ti “miinu yikeeli”. 20Licyelikë, licyelikë yilukaambë : wosuku wun'tambulë wunë miinu yin'filë, wukun'tambulë yivaandi. Wosuku wukun'tambulë, wutambulë wunë wukun'filë. »

Yeesu wazabikini ti Zuda wukun'sumbisi

(Mat 26.20-25; Mak 14.17-21; Lik 22.21-23)

21Fë mbusë mamoomo, Yeesu wucyenzëkënë beenë, naandi wusë tubë yi nkasu : « Licyelikë, licyelikë yilukaambë : wumweekë mu beeno wukun'sumbisi. » 22Bilaanzi byaandi bëlëtalësënaangë baveekë yi baveekë i bisë kufusënë : « Mu nani kulë mu kutubilë? » 23Wumweekë mu bilaanzi wunë Yeesu kulëzolaangë, wabë wukalë fë nkoonzu Yeesu. 24Simu li Pyeelë wusë n'cyebulë, bwiinji kuyufulë Yeesu mu nani naandi wulë mu kutubilë. 25Cilaanzi wusë betikë n'tu fëke Yeesu i wun'yufulë : « A Fumu, nani owe? » 26Yeesu wusë vutulë : « Miinu yake m'bwiikë citini cimpa mu lubuci, wunë yin'tambikë cyaawu, na woowo. » Yeesu wusë boongooso citini cimpa, wubwiikë i wusë tambikë Zuda, li mwaanë Simu li Iskalyootë. 27Fo Zuda kwe boonji citini cimpa, Satënë wusë kotë mu naandi. Yeesu wun'kaambë : « Linë njeeyi wuvwiili n'ciinzë kuvaangë, lengë vaangë lyaawu. » 28Wun'viipë ve mu bakë booso babë fë meesë wuzaabë cibilë-mbici naandi kulëtubilaangë boobo. 29Abu Zuda kulësweekaangë n'kutë mboongo, mpaapë mu baawu bëlëbalaangë ti Yeesu wun'kaambë mu kweendë mu kusuumbë bini bifwenikini mu n'saangu, kaambofo mu ke vaanë likabu ke biyeembi. 30Zuda, wusë boongë citini cimpa i wusë lengë basikë. Bwiisi bwabë bwa kwiilë.

N'kaakë wumoonë

31Zuda abu kwe basikë, Yeesu wusë tubë : « Buyifanwabu bumpumu bu Mwaanë Muutu bwamonikë i bumpumu bu Nzaambi bwamonikë mu naandi. 32Vandi, ningë bumpumu bu Nzaambi bum'monikë mu naandi, Nzaambi yivaandi wun'leesi mu naveekë bumpumu bu Mwaanë i naandi wabelëmë mu kulivaangë. 33A baanë baami, miinu yicili yiinu mu mwa ntaangu too. Beeno lukun'toombë kasi yakulukaambë buyifanwabu manë miinu yikaambë Sizwiifë simesë, beeno kupodi ve kweendë ko miinu yilë mu kweendë#13.33 7.34.. 34Miinu yakuluvaanë n'kaakë wumoonë : zolësënaanu benuveekë yi benuveekë. Lufwenikini kuzolësënë benuveekë yi benuveekë bo yiluzolilë. 35Ningë beeno lube zolësënë benuveekë i benuveekë faawu ofo, bakë booso bën'zabilë ti beeno bilaanzi byaami lukeeli. »

Yeesu wake n'zabikini ti Pyeelë wukun'tunë

(Mat 26.31-35; Mak 14.27-31; Lik 22.31-34)

36Simu li Pyeelë wusë n'yufulë : « A Fumu, njeeyi kuni wakë kun'kweende? » Yeesu wun'vutulilë : « Njeeyi kupodi ve kun'daandë buyifanwabu ko yakun'kwendë, kasi njeeyi wukun'daandë bilumbu bin'kwiisë kun'twaalë. » 37Pyeelë wusë n'kaambë : « A Fumu, cibilë-mbici yin'kaambu kukulaandë buyifanwabu? Miinu yabelëmë mu kuvaanë luziingu lwaami mu njeeyi! » 38Yeesu wusë n'vutulilë : « Njeeyi wun'vaanë luziingu lwaaku mu cibilë cyaami? Licyelikë, licyelikë yikukaambë: ntetë susu kukokilë fë vyaasi tatu, njeeyi wukun'tunë. »

Currently Selected:

Za 13: NTVIL

Highlight

Copy