Za 15

Yeesu, n'ti viinyi wumboti

1Miinu n'ti viinyi#15.1 Ezy 5.1-4. wumboti i Tataami naandi wuwukunë. 2Naandi wum'botulaangë bitafi byooso binamë mu miinu bin'kaambu kuvaanaangë mëkuundi, kasi wun'cyelaangë, wun'cyeesyaangë kadë citafi cinë cin'vaanaangë mëkuundi bwiinji cibweelë kuvaanë mëkuundi. 3Liloonji linë miinu yiluvaanë lya lulyomisi. 4Kangëmaanu mu miinu, bo miinu yikangëminë mu beeno. Citafi kupodi ve kubutë mëkuundi mu naveekë mooti kusye kangëmë kuve mu n'ti viinyi. Bo bumweekë beeno kupodi ve kubutë mëkuundi ningë beeno lusye kangëmë kuve mu miinu. 5Miinu n'ti viinyi yikeeli, beeno bitafi. Wunë wun'kangëmë ke miinu, i wunë miinu yin'kangëmë mu naandi, naandi wum'butë mpaapë mëkuundi, cibilë beeno kupodi ve kuvaangë cin'velë kukaambu miinu. 6Wunë wun'kaambu kukangëmë mu miinu, naandyoowo wum'bumu ku ngaandë dedë mweekë citafi i naandi wun'kuumë. Bitafi biyumë bëbinoongë, bëbilaakë ku mbaasu i byaawu bin'lakëtë. 7Ningë beeno lube kangëmë mu miinu, i mëbuungu maami mëkalë mu beeno, loombaanu byosuku lun'zolë, i beeno lum'bakë. 8Talaanu buni bumpumu bu Taatë bum'monikinaangë : mooti beeno lun'vaanë mpaapë mëkuundi i beeno lukuyileesi ti bilaanzi byaami. 9Miinu yiluzolisi bo Taatë be kun'zolilë. Kangëmaanu mu luzolo lwaami. 10Ningë lube luundë tutumu twaami, beeno lun'kangëmë mu luzolo lwaami, dedë mweekë yiluundë tutumu tu Tataami i miinu yikangëmë mu luzolo lwaandi.

11« Miinu yalukambilë boobo bwiinji liyaanji lyaami liba mu beeno i liyaanji liinu liba deku-dekoo#15.11 Ezy 9.2; 35.10.. 12Aluulu lutumu lwaami: zolësënaanu benuveekë i benuveekë bo miinu yibe luzolilë. 13Luzolo luvyokililë bunenë lunë muutu wum'podi kuleesi, mati mu kuvaanë luziingu lwaandi mu sindiku syaandi. 14Beeno sindiku syaami ningë lube vaangë manë yilukaambë. 15Miinu yisë be luteelë ko bisasi, cibilë cisasi wusë n'zaabaangë ko manë mën'vaangaangë fumwaandi. Miinu yiluteelë sindiku, cibilë yiluzabikini makë mooso yisinu ke Taatë. 16Yaaku beeno kuve lukun'soolë, mati yilusoolë. Miinu yilufilë mu kweendë, mu kubutë likuundi i likuundi lin'ziingë. Bwaawu, Taatë wuluvaanë makë mooso manë lukun'loombë mu lizinë lyaami. 17Linë miinu yiluloombë, lufwenikini kuzolësënë benuveekë yi benuveekë. »

Buloongo buleendë Yeesu i banë babë yaandi

18Ningë buloongo bwaluleendë, zaabaanu ti bwaawu bëkun'deendë ntetë yi beeno. 19Ningë beeno lubakunu mu buloongo, buloongo buluzolë cibilë beeno luke mu naandi. Kasi miinu yilusoolë i yilubotulë mu buloongo i beeno lusyeeli ko baatu bë buloongo: bwaawu, buloongo bwalulendilë. 20Tebukaanu moonyi mu manë yilukaambë : Cisasi cisye vyokilë bunaangë ko yi fumwaandi#15.20 Mat 10.24; Lik 6.40; Za 13.16. . Ningë baatu bu kun'kwamisi, baawu bëlukwamisi yivaandi. Ningë baawu bë bëvitikë liloonji lyaami, bën'vitikë yivaandi liloonji liinu. 21Kasi baawu bëluvangilë makë mooso omo mu cibilë cyaami, cibilë bësye zaabë ko nani wukun'filë. 22Baawu kusë bë bëseembë kuve mu lisumu ningë miinu yisye kwiisë ko i ningë yisye bëkaambë kuve. Kasi buyifanwabu, baawu bëkeeli yin'leenvu ko mu mësumu maawu. 23Wunë wukun'deendë, naandi wuleendë yivaandi Tataami. 24Baawu nkanë bësye bwa kuve mu lisumu ningë yisye vaangë ko fë meeyaawu mëvaangë mëboti manë wosuku muutu wuvangisi vyaasi ko. Kosuku, buyifanwabu baawu bamonë mëvaangë maami i bakun'deendë yimunë Tataami. 25Kasi bwiinji libuungu lisonëmë mu n'kaakaawu livangënë : « Baawu bakun'deendë fë kaambu cikumë#15.25 Twi 35.19; 69.5.. »

26« Bunë bun'kwiisë wunë wulunwaninë cikaangë, mu cibilë ci Taatë yin'filë ke beeno, Ciluunzi ci cyelikë. Cyaawu cikun'teelë cimbaanji. 27Beeno yiviinu, lukun'teelë cimbaanji, cibilë beeno lwabë yaami kutatikilë fë ntonunu. »

Currently Selected:

Za 15: NTVIL

Highlight

Copy