Mateo 13

Cho quiba chedemȩ pio ju̧i̧ chjiari a̧ra̧ano̧rëremȩde Jechu judi

Marco 4:1-9; Uruca 8:4-8

1Ji̧dë duri oa pio jiro doro, bëri pio judiri go̧dümȩrȩ järëremȩde Jechu judi tja yuroro chapea̧ oa. 2Ado pumȩ bubarë chjaodëri̧ go̧düna̧ra̧ chjaorëreji̧ri̧dirȩ, Jechu pio ju̧i̧ tjoro tänȩji̧ri̧rȩ. Ado pio ju̧i̧iä buarëremȩde uirä pjurëmȩ chara oa, pio ju̧ri̧pȩ ano̧ mire chapea̧ oa. Ado pumȩ bubarë, jabechji̧ tja yuroräpȩ a̧dopë cjiarëreji̧ri̧dirȩ. 3Ado Jechu judi na̧rȩrea̧ ma̧ȩmi̧ dara̧ ni̧bä chjaorëremȩdejȩrȩ, ma̧ȩ ji̧ra̧ra̧. Ja̧di ta̧rëri̧ yo̧mȩrȩ ni̧bä chjaoa̧dejȩrȩ:

⁠—⁠Danȩrȩ, pumȩ judi jibëa̧ tjadoräpȩ järëremȩde cho oa quiba chedepea̧ oa ⁠—⁠yo̧a̧dejȩrȩ⁠—⁠. 4Ado cho oa quiba chedemȩrȩ aeno̧a̧dejȩ daburäpȩmo̧. Ado cho üdë, orëmo̧rȩ cjatäa̧de pumȩrȩ järea̧ no̧ro, dabu chjua tjamo̧räpȩ ju̧ri̧. Ado pua üdë chjaodëri̧ baë jurera̧pea̧dejȩ. 5Ado cho üdë orë cjatäa̧de ta̧dë chiamȩ daburäpȩ, dabu ji̧ra̧ri̧ chiadëräpȩ. Ado dabu ji̧ra̧dë oaiä, jabomo̧ uëmo̧i̧ cha̧ oaiä, chjaodëri̧ buiua̧de cho üdë. 6Jabo tacö̧ üdë urëdi oa tacö̧tärea̧ ji̧, tacö̧rea̧ dadëa̧de. Pio ju̧i̧iä chjaodëri̧ gapea̧de pea buiumȩ cho üdë cjüëtüri̧ mo̧ë oaiä. 7Ado cho üdë, orë cjatäa̧de o̧ chiamȩ cärä cjitëpai̧ daräpȩ. Ado cho üdë buiua̧de, jabo chiatärea̧ ji̧, chiadëa̧de o̧ cärä üdë ma̧i̧ dari̧ cjitëa̧ oaiä, ma̧i̧ dari̧ boa̧ oaiä. 8Jabo orë cjatäa̧de dabu chjadëräpȩ. Ado buiu ëte, gägäari̧ cjitëmȩpea̧de. Ado cho chiamȩpea̧de. Orë 30 cho chiamȩpea̧de, cja̧rȩmȩ chorëremȩrȩ. Ado orë 60 cho chiamȩpea̧de, cja̧rȩmȩ chorëremȩrȩ. Ado orë 100 cho chiamȩpea̧de, cja̧rȩmȩ chorëremȩrȩ. Aja̧, ja̧di dari̧ chiamȩpea̧de dabu chjadëräpȩ cjitëa̧ oaiä. 9Aja̧, ta̧ra̧ cotomi̧ dari̧ cjo̧ro̧dëji̧ri̧ pio judiro̧ chjadëri̧ jo̧rȩtatäreji̧ri̧dirȩ pio yoa ma̧ȩ oa, urëdi oa jo̧rȩtaji̧ri̧rȩ ⁠—⁠yo̧mȩrȩ a̧ra̧ano̧rëremȩdejȩrȩ Jechu judi na̧rȩrea̧mi̧ da ma̧ȩra̧ pio ju̧ri̧ra̧.

¿Tjana̧ ju̧i̧iä ni̧bärëremȩdejȩrȩ Jechu judi pumȩ ji̧ri̧ na̧rȩrea̧ ma̧ȩmi̧ dara̧?

10Ja̧dëa ji̧ Jechu ja̧ jadü pio judiro̧ goëdepea̧diro̧jo̧ȩ. Ado ja̧di ta̧rëri̧ yo̧ji̧ri̧rȩ iëno̧ë ta̧rërëreji̧ri̧diro̧jo̧ȩ:

⁠—⁠Danȩ, ¿tjana̧ japea̧ ju̧i̧iä na̧rȩrea̧ ma̧ȩmi̧ da maeara̧ ni̧bä chjaorenȩjȩrȩ pumȩ buba oa? Chjadëri̧ ta̧rëdëdirȩ ⁠—⁠yo̧a̧diro̧jo̧ȩ.

11Ado Jechu judi dëbë yo̧a̧dejȩrȩ:

⁠—⁠Danȩrȩ ca̧ pumȩ, pio yoa ma̧ȩ oa pio dibëiäpȩmo̧ ma dabarea̧ yürüa̧didibe Ütë tjamo̧ judi ⁠—⁠yo̧a̧dejȩrȩ⁠—⁠. Tjamo̧ davä. Jënȩ yo̧a̧ chja̧oerä cjo̧ro̧pea̧ pio ju̧i̧ chjiari goadia̧ oa cjiarëremȩ ma̧ȩ pio ju̧i̧ chjadëri̧ dabarea̧ yürüa̧didibe, jabo o ji̧ri̧iäpȩmo̧ dabarea̧ oa yürüdëa̧dejȩrȩ. Ado pio ju̧i̧iä na̧rȩrea̧ ma̧ȩmi̧ da maeara̧ ni̧bä chjaorequedejȩrȩ. 12Jabechji̧ pumȩ judi, jënȩ dabapea̧ pio ju̧i̧ ta̧rëdiämȩ pio judi, ji̧dë u̧i̧ a̧de goamȩmi̧ dari̧ dabape jäpade, ji̧ra̧ tjamo̧ oa a̧de dabapadärärea̧mi̧ dari̧. Jabo pumȩ judi, jënȩ dabapea̧ pio ju̧i̧ ta̧rëdiädëmȩ pio judi, jabechji̧ ji̧dë u̧i̧ a̧de goamȩmi̧ dari̧ dabapatärea̧ ji̧, ja̧di dari̧ cjiadiärea̧ dadëpade jabo jënȩ dabapatarërea̧ pio judi goarijäa̧ oa cjiapade, jënȩ ji̧dë u̧i̧ dabape jätärea̧ ji̧. 13Ado pio ju̧i̧iä ni̧bä chjaorequedejȩrȩ na̧rȩrea̧ ma̧ȩmi̧ da maeara̧. Jabechji̧ cüdë japea̧ pio ju̧i̧ ji̧dë ma daräbo, jabechji̧ tjamo̧ri̧ dabaparea̧ dadëdirȩ. Cüdë a̧ra̧ano̧a̧ ma̧ȩ oa ji̧dë ma ta̧rëräbo, cjäri̧ madirȩ, acji cjaeärea̧ dadëdirȩ. Jabechji̧, ta̧rëji̧ri̧borë bapë ta̧rëdë madiro̧coe. 14Jabechji̧ pio jiro pumȩ pio ji̧ri̧ chjiari jabërä go̧ȩparëremȩde Ichaia judi no̧mȩ tjamo̧ri ja̧. Tjamo̧ davä. Ütë tjamo̧ judi pio jiro pumȩ pio ji̧ri̧ chjiari jabërä yo̧rërea̧ pio ju̧i̧ go̧ȩparëremȩde. Ta̧rëchji̧vä:

“Jabo cjäri̧ madiro̧coe, pio jiro pumȩ judiro̧ ji̧dë ma ta̧rëa̧räbo, bapë ta̧rërea̧ dadë madirȩ. Ado judiro̧ ji̧dë ma daea̧räbo, 'jabechji̧ pio judi tjamo̧dida’ quëna̧ dabarea̧ dadë madirȩ. 15Jabechji̧ pio jiro pumȩ ja̧ chji̧ üdë dabu chjua tjamo̧mi̧ dade. Dabapadëri̧ cjiamȩ chji̧ chiadirȩ. Ado ta̧ra̧ cotomi̧ dari̧ cjiadirȩ ji̧dëri̧. Da pjuruta̧ cjiami̧ dari̧ japadirȩ, tjamo̧ri̧ dabapadëri̧ cjiaji̧ri̧rȩ. Ado pio jiro pumȩ judiro̧ ja̧di dari̧ japea̧ oaiä, jabechji̧ da cotomi̧ dari̧ cjiadirȩ, jënȩro̧ dadiämi̧ dari̧ jo̧rȩtatärea̧ ji̧. Ado ta̧ra̧ cotomi̧ dari̧ cjiadirȩ peaja̧di, jënȩro̧ tjamo̧ri̧ ta̧rëdiätärea̧ ji̧. Ado chji̧ cotomi̧ dari̧ cjiadirȩ peaja̧di, jënȩro̧ bapë ta̧rëtärea̧ ji̧. Ado pio ju̧i̧iä ano̧ mire jo̧rȩtarea̧mi̧dëdirȩ. Ado pio ju̧i̧iä cüdë ji̧ri̧ chjaodëri̧ duridëparȩtärea̧ ji̧, pio ji̧ri̧ chjaparȩmi̧ dari̧ japatärea̧ ji̧, cjäri̧ marequedejȩrȩ, duridëparȩrea̧mi̧dërequedejȩrȩ.”

Aja̧, ja̧di ta̧rëri̧ ni̧bärëremȩde Ütë tjamo̧ judi pio jiro pumȩ pio ji̧ri̧ chjiari. Ado judi ni̧bärërea̧ pio ju̧i̧ go̧ȩparëremȩde Ichaia judi jabërä judirä. 16⁠—⁠Jabo danȩrȩ ca̧ jadü, ja̧didënȩrȩ ⁠—⁠yo̧a̧dejȩrȩ Jechu judi⁠—⁠. Pio judiro̧mi̧ dari̧ cjiadënȩrȩ, jabo jabechji̧ chjadëri̧ a̧doa̧ oa cjianȩrȩ Ütë tjamo̧ judi pio dibëiäpȩmo̧ chjadëri̧ jape chjaoa̧ tara. Jabechji̧ mȩnȩro̧ pio coa irä daea̧ tara, cüdë japea̧ pio ju̧i̧ irä daea̧ tara, jabechji̧ chjadëri̧ jape chjaoa̧didibe. 17Ado danȩrȩ, yo̧requededibe ⁠—⁠yo̧a̧dejȩrȩ⁠—⁠. Ütërë ea jana̧ chjadüa̧ oa ni̧bärëreji̧ri̧ pio judiro̧ irä datämi̧ cjia tjamo̧rëreji̧ri̧diro̧coe, coëma cjiari̧ cjo̧ro̧rëreji̧ri̧ pio judiro̧borë. Tjamo̧ davä. Pio mȩnȩro̧ coa irä dami̧ dari̧ datämi̧ cjia tjamo̧rëreji̧ri̧diro̧coe. Jabo datämi̧ cjia tjamo̧ji̧ri̧borë, darea̧ dadëa̧diro̧coe cüdë jabë birë ma̧na̧dëa̧ tara. Ado pio mȩnȩro̧ coa irä ta̧rëmi̧ dari̧ ta̧rëtämi̧ cjia tjamo̧ji̧ri̧borë, peaja̧di irä ta̧rërea̧ dadëa̧diro̧coe Ütërë ea jana̧ chjadüa̧ oa ni̧bärëreji̧ri̧ pio judiro̧. Jabo pio mȩnȩro̧ coa irä darea̧ dapea̧ oa, pio mȩnȩro̧ coa irä ta̧rërea̧ dapea̧ oa, jabechji̧ chjadëri̧ yürürëremȩdidibe Ütë tjamo̧ judi ⁠—⁠yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi.

Jechu judi areiami̧ dari̧ daba tänȩrëremȩdejȩrȩ cho quiba chedemȩ pio ju̧i̧ chjiari

Marco 4:10-20; Uruca 8:9-15

18Ado Jechu judi ji̧dë u̧i̧ yo̧mȩrȩ ja̧di ta̧rëri̧ yo̧rëremȩdejȩrȩ jibëa̧ jadü pio ji̧ri̧iäpȩmo̧:

⁠—⁠Danȩrȩ, areiami̧ dari̧ ni̧bä chjaoparequededibe na̧rȩrea̧ ma̧ȩmi̧ da pio ju̧i̧ chjiari, cho quiba chedemȩ pio ju̧i̧ chjiari ⁠—⁠yo̧a̧dejȩrȩ⁠—⁠. 19Danȩrȩ, pumȩrȩ järea̧ no̧ro dabu chjua üdë, pumȩ chji̧mi̧ dade. Ado pio jiro pumȩ judiro̧, dabu chjuami̧ da chji̧ chiaji̧ri̧ pio judiro̧, jabechji̧ bapë ta̧rëdëji̧ri̧ pio judiro̧dirȩ. Tjamo̧ davä. Ütë tjamo̧ ja̧ ma̧ȩ oa ta̧rërä, Ütërë yo̧a̧ chja̧oerä cjo̧ro̧pea̧ pio ju̧i̧ chjiari ma̧ȩ oa ta̧rërä, jabechji̧ bapë ta̧rëdëdiro̧jo̧ȩ. Jabechji̧ ma̧ȩ üdë jibëa̧ chji̧rä buiumi̧ dari̧ cjiatärea̧ ji̧, buiudë made. Jabechji̧ Ichiae judi chjaodëri̧ acji go̧düdäräa̧ oaiä, Ütë tjamo̧ ja̧ ma̧ȩ oa baë mitë ëte baë goa baämi̧ dari̧ japea̧ oaiä, buiudë made. 20Ado ta̧dë chiamȩ dabu üdë, peaja̧di pumȩ chji̧mi̧ dade. Ado pio jiro pumȩ judiro̧, ta̧dë chiamȩ dabumi̧ da chji̧ chiaji̧ri̧ pio judiro̧, jabechji̧ Ütë tjamo̧ ja̧ ma̧ȩ oa ta̧rërä, ma̧ chiadëri̧ cjiaji̧ri̧rȩ ta̧rëdiro̧jo̧ȩ chjaodëri̧. 21Jabo Ütë tjamo̧ ja̧ ma̧ȩ üdë jibëa̧ chji̧rä tacö̧ urëdi oa chiami̧ dari̧ cjiadëa̧ oaiä, jabechji̧ japamitë boi̧chji̧ maea oa jo̧rȩtadiro̧jo̧ȩ. Ja̧dëa ji̧ judiro̧ eami̧ chjai̧dë oa chjätärä, chjaodëri̧ putu jura̧ a̧dë chaji̧ri̧mi̧ dari̧ japadiro̧jo̧ȩ Ütë tjamo̧ ja̧ ma̧ȩ oa. Tjamo̧ davä. O judiro̧ pio jibëiäpȩmo̧ conȩda̧rä, jënȩro̧ quëna̧ji̧ri̧pea̧ oaiä conȩda̧ oa cjiarä, cjäri̧ madirȩ, chjaodëri̧ putu jura̧ a̧dë chaji̧ri̧mi̧ dari̧ japadiro̧jo̧ȩ ma̧ȩ oa, teracaba pio ju̧i̧ ado chjereno̧ quëna̧ji̧ri̧pe bagarea̧mi̧ dari̧. 22Ado o̧ cärä chiamȩ dabu üdë, peaja̧di pumȩ chji̧mi̧ dade. Ado pio jiro pumȩ judiro̧, o̧ cärä chiamȩ dabumi̧ da chji̧ chiaji̧ri̧ pio judiro̧ Ütë tjamo̧ ja̧ ma̧ȩ oa ta̧rërä, cjäri̧ madirȩ, ba chia pio ju̧i̧mo̧i̧ jo̧rȩtatärea̧ ji̧, badëra̧ pio ju̧ri̧ra̧ boë cjaeämi̧ dari̧ jo̧rȩtadiro̧jo̧ȩ. Tjamo̧ davä. Judiro̧ pio yoa chirirä cjo̧ro̧pea̧ pio ju̧i̧ chjiari ana̧ri̧ jo̧rȩta̧ oaiä, jënȩro̧ bücjüri̧ cjia tjamo̧ji̧ri̧rȩ cjo̧ro̧a̧ oaiä, jënȩro̧ chëre ji̧ra̧ tjamo̧ oa boapea̧ pio ju̧i̧ ana̧ri̧ jo̧rȩta̧ oaiä, jabechji̧ tuti chami̧ dari̧ japadejȩrȩ jibëa̧ chji̧ oa. Ado pio ju̧i̧iä chjaodëri̧ a̧dë jo̧rȩtadiro̧jo̧ȩ Ütë tjamo̧ ja̧ ma̧ȩ pio ju̧i̧. Jabechji̧ pio jiro ma̧ȩ üdë jibëa̧ chji̧rä chjadëri̧ chatärea̧ ji̧, cjäri̧ madejȩrȩ, tuti chami̧ dari̧ chade cho ji̧ra̧ tjamo̧ oa chiatärea̧ ji̧. 23Ado dabu chjadë üdë, peaja̧di pumȩ chji̧mi̧ dade. Ado pio jiro pumȩ judiro̧, dabu chjadëmi̧ da chji̧ chiaji̧ri̧ pio judiro̧, jabechji̧ Ütë tjamo̧ ja̧ ma̧ȩ oa ta̧rërä bapë ta̧rëdiro̧jo̧ȩ. Quëna̧diro̧jo̧ȩ. Ado ütëchjai̧pe jämi̧ dari̧ cjo̧ro̧dirȩ. Cho ji̧ra̧ tjamo̧pe järea̧mi̧ dari̧ na̧rȩriä cjo̧ro̧dirȩ. O judiro̧, jabëtari̧mi̧ chiaji̧ri̧mi̧ dari̧ na̧rȩdirȩ. Jabechji̧ cja̧rȩmȩ chomi̧ darëreji̧ri̧rȩ, 30 cho chiaji̧ri̧mi̧ dari̧ cjo̧ro̧ji̧ri̧pea̧dirȩ. Ado o judiro̧, ji̧dë u̧i̧ chiaji̧ri̧mi̧ dari̧ na̧rȩdirȩ. Jabechji̧ cja̧rȩmȩ chomi̧ darëreji̧ri̧rȩ, 60 cho chiaji̧ri̧mi̧ dari̧ cjo̧ro̧ji̧ri̧pea̧dirȩ. Ado o judiro̧ ji̧ra̧ tjamo̧ oa chiaji̧ri̧mi̧ dari̧ na̧rȩdirȩ. Jabechji̧ cja̧rȩmȩ chomi̧ darëreji̧ri̧rȩ, 100 cho ji̧ra̧ri̧ chiaji̧ri̧mi̧ dari̧ cjo̧ro̧ji̧ri̧pea̧dirȩ ⁠—⁠yo̧mȩrȩ daba tänȩrëremȩdejȩrȩ Jechu judi cho quiba chedemȩ pio ju̧i̧ chjiari.

Ado cja̧rȩmo̧ na̧rȩrea̧ ma̧ȩmi̧ da oa ni̧bä chjaorëremȩdejȩrȩ Jechu judi tirigo to pio ju̧i̧ chjiari, cärä pio ju̧i̧ chjiari

24Ado Jechu judi ji̧dë u̧i̧ yo̧mȩrȩ ni̧bä chjaorëremȩdejȩrȩ pumȩ buba oa, jibëa̧ jadü pio ji̧ri̧mo̧i̧ ni̧bä chjaorërea̧ ji̧. Ja̧di ta̧rëri̧ yo̧mȩrȩ yo̧rëremȩdejȩrȩ tjado ano̧mȩ pio ju̧i̧ chjiari:

⁠—⁠Danȩrȩ, na̧rȩrea̧ ma̧ȩmi̧ dara̧ pio ju̧ri̧ra̧ ni̧bä chjaoparequededibe Ütërë yo̧a̧ chja̧oerä cjo̧ro̧pea̧ pio ju̧i̧ chjiari ⁠—⁠yo̧a̧dejȩrȩ⁠—⁠. Danȩrȩ, tjado ana̧mȩ judi cho chjadë maea oa ponȩa̧de jibëa̧ tjadoräpȩ ju̧ri̧. 25Jabo gȩnȩpea̧rä ütëbodärärë mo̧a̧ nö̧ta, tjado ano̧mȩ pio ju̧i̧ eadëmȩ pio judi acji go̧düdäräa̧de. Ado teracaba cärä cho maea oa goadi quiba chedea̧dejȩ tirigo cho chjarerä. Ado ja̧di dari̧ japa ëte, goadi baäeno̧a̧de. 26Ado ja̧dëa ji̧ japamitë chjätä ëte, tirigo to üdë cjitëa̧rä, ma̧ri̧pea̧rä, cho ji̧ra̧ri̧ chiapea̧rä, peaja̧di cjitërëremȩde teracaba cärä üdë. Jabechji̧ tirigo to pio judimo̧rȩ cjitëtärea̧ ji̧, teracaba cärä pio judiborë cjitëa̧de. 27Ado ja̧dëa ji̧ tjado ana̧mȩ ja̧ mu̧i̧tjoi̧ pio judiro̧ pio ju̧i̧ daea̧ oaiä, yo̧epea̧diro̧jo̧ȩ tjado ana̧mȩ pio ju̧i̧:

⁠—⁠Danȩ ana̧mȩ, cho chjadë maea oa, tirigo cho chjadë maea oa quibë adëa̧nȩ? ⁠—⁠iëno̧ë ta̧rëa̧diro̧jo̧ȩ⁠—⁠. Ado cho chjadë maea oa quibë aea̧rä judi, ¿tjana̧ japea̧ ju̧i̧iä tirigo to chjarerä cjiade pio jiro teracaba cärä üdë? ¿Tjana̧pea̧ ji̧ cärä chobo quibë aea̧nȩ? ⁠—⁠iënoë ta̧rëa̧diro̧jo̧ȩ.

28Jabo tjado ana̧mȩ judi dëbë yo̧a̧dejȩrȩ:

⁠—⁠Jabo cjäri̧ madique, pio coa eadëmȩ pio judi quiba chedea̧ jirodejȩ ⁠—⁠dëbë yo̧a̧dejȩrȩ.

Ado ja̧dëa ji̧ jibëa̧ mu̧i̧tjoi̧ judiro̧ iëno̧ë ta̧rëa̧diro̧jo̧ȩ:

⁠—⁠Jabo tjana̧ oa japatä earenȩibe yaba̧? ¿Teracaba cärä pio ju̧i̧ mu̧i̧ cö̧i̧tä earenȩibe jabërä? Chjadëri̧ yo̧ibe ⁠—⁠yo̧a̧diro̧jo̧ȩ.

29Jabo tjado ana̧mȩ judi dëbë yo̧a̧dejȩrȩ:

⁠—⁠Cjäri̧ made ⁠—⁠yo̧a̧dejȩrȩ⁠—⁠. Jabechji̧de. Teracaba cärä oa jabërä mu̧i̧ cö̧i̧dëpea̧de. Jabechji̧ pio ju̧i̧ mu̧i̧ cö̧i̧a̧ oaiä, tirigo to pio ju̧i̧bo mu̧i̧ cö̧i̧pai̧ danȩrȩ. 30Jabechji̧ cärä chjadëdëborë cjiatäde. Ado ja̧dëa ji̧ japamitë chjätä ëte mitëpea̧ doro tirigo cho üdë mo̧ȩpea̧rä, jabechji̧ chjadëri̧ yo̧parequedejȩrȩ mitëpaji̧ri̧ pio ji̧ri̧. ‘Aja̧, teracaba cärä pio ju̧i̧ mu̧i̧ cö̧i̧ ëte, ji̧mo̧ro a̧dopa ëte, tabüpea̧de ca̧i̧ra̧. Ado pio jiro tabüa̧ pio judi cäapea̧de’ yo̧parequedejȩrȩ. ‘Jabo chjadëri̧ a̧dopachji̧vä tirigo cho pio ju̧i̧, jurarea̧ boearea̧ jo̧ tjoräpȩ ju̧ri̧ chjadëri̧ boeapea̧ oa’ yo̧parequedejȩrȩ mitëpaji̧ri̧ pio ji̧ri̧ ⁠—⁠yo̧mȩrȩ na̧rȩrea̧ ma̧ȩmi̧ dara̧ pio ju̧ri̧ra̧ ni̧bä chjaorëremȩdejȩrȩ pumȩ ji̧ri̧ Jechu judi, Ütërë yo̧a̧ chja̧oerä cjo̧ro̧pea̧ pio ju̧i̧ chjiari.

Motacha quȩmȩ cho pio ju̧i̧ chjiari na̧rȩrea̧ ma̧ȩmi̧ dara̧ a̧ra̧ano̧rëremȩdejȩrȩ Jechu judi

Marco 4:30-32; Uruca 13:18-21

31Ado Jechu judi ado ni̧bä chjaorëremȩdejȩrȩ pumȩ buba pio ji̧ri̧iäpȩmo̧:

⁠—⁠Danȩrȩ, ado cja̧rȩmo̧ na̧rȩrea̧ ma̧ȩmi̧ dara̧ pio ju̧ri̧ra̧ ni̧bä chjaotämi̧ cjiarequededibe Ütërë yo̧a̧ chja̧orä cjo̧ro̧pea̧ pio ju̧i̧ chjiari ⁠—⁠yo̧a̧dejȩrȩ⁠—⁠. Danȩrȩ, tjado ana̧mȩ judi ponȩa̧dejȩ motacha quȩmȩ cho pio ju̧i̧ jibëa̧ tjadoräpȩ. 32Ado pio jiro cho üdë, boi̧chji̧ tjamo̧de. Piodai̧ cjiade a̧dë chjäte boi̧chji̧rȩ. Jabo boi̧chji̧remȩrȩ buiu ëte, cjitë ëte, ana̧ tjamo̧pe järëremȩde. Tjamo̧ davä, tjadoro cjo̧ro̧mȩ to pio ju̧i̧iä ji̧dë u̧i̧ ana̧pe järëremȩde. Pio ju̧i̧iä pua no̧i̧dërë to chjiaräpȩ ju̧ri̧ joëparea̧ daea̧dirȩ to üdë ana̧chja tjamo̧pea̧ tara ⁠—⁠yo̧mȩrȩ na̧rȩrea̧ ma̧ȩmi̧ dara̧ ni̧bä chjaorëremȩdejȩrȩ Jechu judi Ütërë yo̧a̧ chja̧oerä cjo̧ro̧pea̧ pio ju̧i̧ chjiari.

Ado cja̧rȩmo̧ na̧rȩrea̧ ma̧ȩmi̧ dara̧ ni̧bä chjaorëremȩdejȩrȩ Jechu judi pjuru chiaparȩrea̧ pio ju̧i̧ chjiari

33Ado Jechu judi cjiadiädëmȩrȩ ji̧dë u̧i̧ ni̧bä chjao yo̧rëremȩdejȩrȩ:

⁠—⁠Danȩrȩ, ado cja̧rȩmo̧ na̧rȩrea̧ ma̧ȩmi̧ dara̧ ni̧bä chjaotämi̧ cjiarequededibe Ütërë yo̧a̧ chja̧oerä cjo̧ro̧pea̧ pio ju̧i̧ chjiari ⁠—⁠yo̧a̧dejȩrȩ⁠—⁠. Danȩrȩ, cja̧rȩmȩ iei̧ pio jini̧, chja̧pe japatämi̧ cjiayi̧ pio jini̧ mitëa̧nȩjȩ a̧de mirerea̧ oa, pjuru chiaparȩrea̧ pio ju̧i̧. Jabechji̧ pjuru chiaparȩrea̧ jabëtari̧mi̧ oa mitëa̧nȩ tirigo pjo̧no̧ pio ju̧i̧ nö̧ta mirepea̧ oa, tjarari̧ mö̧reda̧ pjo̧no̧ oa mirepea̧ oa. Ado pjuru chiaparȩrea̧ üdë ji̧ra̧ tjamo̧dëräbo, jabechji̧ tirigo pjo̧no̧ chjö̧na̧i̧ oa boadäräa̧dejȩ ana̧pe bagari̧, pjuru chiape bagari̧ ⁠—⁠yo̧mȩrȩ ni̧bä chjaorëremȩdejȩrȩ Jechu judi Ütërë yo̧a̧ chja̧oerä cjo̧ro̧rea̧ japamitë pio ju̧i̧ chjiari.

Na̧rȩrea̧ ma̧ȩmi̧ da maeara̧ ni̧bärëremȩdejȩrȩ Jechu judi Ütërë ea jana̧ chjadüa̧ oa ni̧bämȩ pio judi jabërä go̧ȩparërea̧mi̧

34Ado Jechu judi pumȩ ji̧ri̧ ni̧bä chjaorërea̧ ji̧, jabechji̧ ji̧dë ma ni̧bärëremȩdejȩrȩ na̧rȩrea̧ ma̧ȩmi̧ da maeara̧, na̧rȩdërea̧ ma̧ȩdë maeara̧. 35Jabechji̧ Ütë tjamo̧ ja̧ ma̧ȩ üdë tjamo̧i̧ cjiari̧ cjiadiäpea̧ oa, Ütërë ea jana̧ chjadüa̧ oa ni̧bärëremȩ pio judi jabërä yo̧rërea̧ ma̧ȩ üdë tjamo̧i̧ cjiari̧ cjiadiäpea̧ oa, jabechji̧ ja̧di ta̧rëri̧ ni̧bä chjaorëremȩdejȩrȩ Jechu judi. Aja̧, Jechu judi na̧rȩrea̧ ma̧ȩra̧ pio ju̧ri̧ra̧ ni̧bä chjaobëmi̧, ja̧di ta̧rëri̧ go̧ȩpea̧ oa cjiarëremȩde Ütërë ea jana̧ chjadüa̧ oa ni̧bämȩ judi jabërä. Ta̧rëchji̧vä:

“Na̧rȩrea̧ ma̧ȩmi̧ da maeara̧ ni̧bä chjaoparequedejȩrȩ. Jabechji̧ no̧mȩ tjamo̧ri ja̧ goadia̧ oa cjiarëremȩ ma̧ȩ pio ju̧i̧, dabu üdë pearä judirä pareapea̧ pio judiri yurori goadia̧ oa cjiarëremȩ ma̧ȩ pio ju̧i̧ chjadëri̧ daba tänȩparequedejȩrȩ, judiro̧ areiami̧ dari̧ jo̧rȩtapea̧ oa.”

Aja̧, pio ju̧i̧iä na̧rȩrea̧ ma̧ȩmi̧ da maeara̧ ni̧bä chjaorëremȩdejȩrȩ.

Jechu judi areiami̧ dari̧ dabapa tänȩrëremȩdejȩrȩ teracaba cärä cho pio ju̧i̧ chjiari

36Ado Jechu judi a̧dë baärëremȩdejȩrȩ pumȩ buba oa. Ado bëräpȩ yu̧a̧rëremȩde. Ado jibëa̧ jadü judiro̧ cho̧rë jäa̧diro̧jo̧ȩ. Ado yo̧a̧diro̧jo̧ȩ:

⁠—⁠Danȩ, chjadëri̧ yo̧ibe ⁠—⁠yo̧a̧diro̧jo̧ȩ⁠—⁠. ¿Tjana̧ yo̧rea̧de? Pio jiro na̧rȩrea̧ ma̧ȩmi̧ da pio ju̧i̧ chjiari, judi teracaba cärä cho oa tjadoro goadi quiba chedea̧ pio ju̧i̧ chjiari chjadëri̧ yo̧ibe ⁠—⁠yo̧a̧diro̧jo̧ȩ.

37Ado Jechu judi dëbë yo̧a̧dejȩrȩ:

⁠—⁠Danȩrȩ, cho chjadë oa quibë amȩmi̧ dari̧ japamȩ judi, Pumȩrȩ Ara̧ Tjamo̧ pio judirequede ⁠—⁠yo̧a̧dejȩrȩ⁠—⁠. 38Ado tjado üdë, jabechji̧ chiriräpȩti̧ oa cjiami̧ dade. Ado tirigo cho chjadë üdë, jabechji̧ Ütë tjamo̧ ja̧ pumȩmi̧ dadirȩ. Tjamo̧ davä. Ütërë yo̧a̧ chja̧oerä cjo̧ro̧ji̧ri̧ pio judiro̧mi̧ dadirȩ cho chjadë üdë. Ado teracaba cärä cho üdë, jabechji̧ a̧dë chjäte chjai̧dëri̧ cjiamȩ pio ju̧i̧ ja̧ u̧ri̧mi̧ dadirȩ, Ichiae pio ju̧i̧ ja̧ u̧ri̧mi̧ dadirȩ. 39Ado danȩrȩ, Ichiae pio judide goadi quiba chedemi̧ dari̧ japamȩ judi. Tjamo̧ davä. Teracaba cärä cho oa goadi quiba chedemi̧ dari̧ japamȩ judi, tirigo cho chjarerä quiba chedemi̧ dari̧ japamȩ judi, Ichiae pio judide. Ado danȩrȩ, tjadoro quibë aea̧ chjö̧na̧i̧ oa mitëpea̧ japamitë üdë, jabechji̧ cjiadiäa̧ do pio ju̧i̧ chjiari yo̧rea̧de. Cjiadiäa̧ japamitë pio ju̧i̧ chjiari yo̧rea̧de. Ado jurarea̧ cho chjadë oa mitëpaji̧ri̧ pio judiro̧, teracaba cärä oa cäapaji̧ri̧ pio judiro̧, jabechji̧ a̧dëräpȩ cjiaji̧ri̧ mu̧i̧tjoi̧ pio judiro̧dirȩ. 40Danȩrȩ, tjadoro ja̧bepaji̧ri̧ mu̧i̧tjoi̧ pio judiro̧ teracaba cära pio ju̧i̧ a̧dopa ëte, cäadiro̧jo̧ȩ. Ado cjiadiäa̧ japamitërä ütara̧ doro, peaja̧di a̧dopea̧ oa cjiapade teracaba cärämi̧ da üdë. Jabechji̧ a̧dopea̧ oa cjiapade cäapea̧ oa. 41Jabechji̧ Pumȩrȩ Ara̧ Tjamo̧ pio judirequede cüdë ⁠—⁠yo̧a̧dejȩrȩ⁠—⁠. Ado ca̧ mu̧i̧tjoi̧ pio ji̧ri̧, a̧dëräpȩ cjiaji̧ri̧ mu̧i̧tjoi̧ pio ji̧ri̧ chjadüparequedejȩrȩ daburäpȩmo̧. Tjamo̧ davä. Chjai̧dëri̧ japaji̧ri̧ pio ji̧ri̧ ütëbodärä oa mitëpea̧ oa, jibëa̧ pumȩ pio ji̧ri̧ chjai̧dëri̧ japa tänȩji̧ri̧ pio ji̧ri̧ mitëpea̧ oa, chjadüparequedejȩrȩ, eami̧ chjai̧dë oa japaji̧ri̧ pio ji̧ri̧ mitëpea̧ oa. Tjamo̧ davä. Pio jiro pumȩ pio ji̧ri̧ mitëpea̧ oa, cüdë yo̧a̧ chja̧oeri pio judiri bucho ana̧ go̧dü tänȩpea̧ oa, chjadüparequedejȩrȩ ca̧ mu̧i̧tjoi̧ pio ji̧ri̧. 42Ado ma̧i̧ da tümȩräpȩ ju̧ri̧ aeno̧padiro̧jȩrȩ a̧dë chjäte cjüëtü tjamo̧räpȩ ju̧ri̧. Ado pio ju̧ri̧pȩ tutia̧ oa cjiaji̧ri̧ pumȩ pio judiro̧ a̧dë chjäte ejaro cjiaji̧ri̧rȩ tarapadirȩ gito oa, a a ma cjiaji̧ri̧rȩ. 43Jabo coëma cjiari̧ cjo̧ro̧ji̧ri̧ pio judiro̧, jabechji̧ dorë tatami̧ dari̧ cjo̧ro̧padirȩ Jäjäarë yo̧a̧ chja̧oerä. Pio ju̧i̧iä yo̧requededibe ⁠—⁠yo̧a̧dejȩrȩ⁠—⁠. Ta̧ra̧ cotomi̧ dari̧ cjo̧ro̧dëji̧ri̧ pio judiro̧ chjadëri̧ jo̧rȩtatäreji̧ri̧dirȩ pio yoa ma̧ȩ oa, urëdi oa jo̧rȩtaji̧ri̧rȩ ⁠—⁠yo̧mȩrȩ areiami̧ dari̧ dabapa tänȩrëremȩdejȩrȩ jibëa̧ jadü pio ji̧ri̧iäpȩmo̧ Jechu judi, teracaba cärä cho quiba chedemȩ pio ju̧i̧ chjiari.

Ado cja̧rȩmo̧ na̧rȩrea̧ ma̧ȩmi̧ da oa ni̧bärëremȩdejȩrȩ Jechu judi a̧dë chjäte ba chiamȩ pio ju̧i̧ chjiari

44Ado Jechu judi cjiadiädëmȩrȩ ji̧dë u̧i̧ ni̧bä chjaorëremȩdejȩrȩ, ja̧di ta̧rëri̧ ni̧bämȩrȩ:

⁠—⁠Danȩrȩ, Ütërë yo̧a̧ chja̧oerä cjo̧ro̧pea̧ pio ju̧i̧ chjiari ado cja̧rȩmo̧ na̧rȩrea̧ ma̧ȩmi̧ dara̧ ni̧bä chjaotämi̧ cjiarequededibe ⁠—⁠yo̧a̧dejȩrȩ⁠—⁠. Danȩrȩ, pumȩ üdë a̧dë chjäte ba chiamȩ oa dadäräa̧dejȩ chiriräpȩmȩ oa, na̧ra̧ oa cjiaremȩ oa. Jabo jibëa̧ chiriräpȩmȩ oa dadëa̧dejȩ, jabo ado cja̧rȩmo̧ ja̧ chiriräpȩmȩ oa dadäräa̧dejȩ. Jabechji̧ cja̧rȩmȩrȩ no̧mȩ tjamo̧ri ja̧ goadirërea̧ pio ju̧i̧ dadäräa̧dejȩ ba chia tjamo̧ oa. Ado jënȩ dadäräa̧ pio ju̧i̧ ado chjereno̧ na̧ra̧dejȩ, jënȩ pea daea̧räpȩ ju̧ri̧. Ado ja̧dëa ji̧ järipea̧de. ‘Aja̧, pio yoa chiri oa gatëpacuni̧da, ado chiri pio yoa gatëa̧ oaiä, jabechji̧ ca̧ea̧ mape bagapadica̧da, pio yoa a̧dë chjäte ba chiamȩ pio judi ca̧ea̧ mape bagapadica̧da’ quëna jo̧rȩtamȩrȩ ado chjereno̧ na̧ra̧dejȩ. Ado ja̧di dari̧ japa ëte, ma̧ chiadëri̧ cjiamȩrȩ baäa̧de jibëa̧ bëräpȩ. Ado jibëa̧remȩ pio ju̧i̧ chjö̧na̧i̧ oa gatë tänȩno̧a̧dejȩ chëre maea oa boapea̧ oa. Ado ja̧di dari̧ japa ëte, jabechji̧ jënȩ pea mitëa̧ chërera̧ pio ju̧ri̧ra̧ gatëno̧a̧dejȩ chiri oa. Ado pio jiro chiri oa gatëa̧ oaiä, jabechji̧ a̧dë chjäte ba chiamȩ pio judi jibëa̧ mape baga̧dejȩ. Tjamo̧ davä. Judi pio jiro chiri oa gatëa̧ oaiä, a̧dë chjäte ba chiamȩ pio ju̧i̧ chiamȩ chiri oa gatëa̧ oaiä, jabechji̧ daburo na̧ra̧ oa cjiaremȩ pio judi jibëa̧ mape baga̧dejȩ ⁠—⁠yo̧a̧dejȩrȩ.

45Ado Jechu judi ji̧dë u̧i̧ ni̧bä chjaorëremȩdejȩrȩ:

⁠—⁠Danȩrȩ, Ütërë yo̧a̧ chja̧oerä cjo̧ro̧pea̧ pio ju̧i̧ chjiari ado cja̧rȩmo̧ na̧rȩrea̧ ma̧ȩmi̧ dara̧ ni̧bä chjaotämi̧ cjiarequededibe ⁠—⁠yo̧a̧dejȩrȩ⁠—⁠. Danȩrȩ, cja̧rȩmȩ pumȩ üdë oëra̧ti̧ oa tai̧rëremȩde a̧dë chjäte ba chiamȩ tjärichji cho pio ju̧i̧ dadäräpea̧ oa, pera quȩmȩ tjärichji cho pio ju̧i̧ dadäräpea̧ oa. Ado ji̧ra̧ tjamo̧ oa daea̧räbo, ji̧ra̧ tjamo̧ oa gatëa̧räbo, jabechji̧ ji̧dë ma tai̧rëremȩde ji̧dë u̧i̧ ba chiamȩ pio ju̧i̧ dadäräpea̧ oa. 46Ado ja̧dëa ji̧ a̧dë chjäte ba chiamȩ pio ju̧i̧ dadäräa̧rä, jabechji̧ jënȩ goa̧ chjö̧na̧i̧ oa gatë tänȩno̧a̧dejȩ. Aja̧, jibëa̧ bëräremȩ pio ju̧i̧, jënȩ gatëa̧ pio ju̧i̧ chjö̧na̧i̧ oa gatë tänȩno̧a̧dejȩ a̧dë chjäte ba chiamȩ pio ju̧i̧ ano̧ mire gatëpea̧ oa ⁠—⁠yo̧mȩrȩ ni̧bä chjaorëremȩdejȩrȩ Jechu judi.

Ütërë yo̧a̧ chja̧oerä cjo̧ro̧pea̧ pio ju̧i̧ chjiari ado a̧ra̧ano̧rëremȩde Jechu judi cho̧ mu̧i̧rea̧ bäre oa jo̧rȩtamȩrȩ

47Ado Jechu judi cjiadiädëmȩrȩ ji̧dë u̧i̧ ni̧bä chjaorëremȩdejȩrȩ, ja̧di ta̧rëri̧ ni̧bämȩrȩ:

⁠—⁠Danȩrȩ, Ütërë yo̧a̧ chja̧oerä cjo̧ro̧pea̧ pio ju̧i̧ chjiari ado cja̧rȩmo̧ na̧rȩrea̧ ma̧ȩmi̧ dara̧ ni̧bä chjaotämi̧ cjiarequededibe ⁠—⁠yo̧a̧dejȩrȩ⁠—⁠. Danȩrȩ, cho̧ mu̧i̧rea̧ bäre boi̧dë tjamo̧ üdë mu̧i̧ cürëa̧ oa cjiarëremȩde ui ana̧räpȩmo̧. Ado pio jiro bäre ana̧ tjamo̧ oa mu̧i̧ cürëa̧ oaiä, jabechji̧ dami̧ti̧ cho̧ oa chiamȩpea̧de, o oamo̧i̧ chiadëmȩrȩ. 48Ado cho̧ mu̧i̧ji̧ri̧ pio judiro̧ pio jiro bäre oa mu̧i̧a̧ ji̧, jabechji̧ tjuri cjia oa, chacha tjamo̧ oa mu̧i̧rëreji̧ri̧diro̧jo̧ȩ ui ana̧ yuroräpȩmo̧. Ado cho̧ oa mu̧i̧ji̧ri̧ judiro̧ yuroräpȩmo̧ mu̧i̧därä ëte, jabechji̧ chadäräa̧dirȩ. Ado chaji̧ri̧rȩ ütarë darëreji̧ri̧diro̧jo̧ȩ cho̧ pio ju̧i̧. Ado cho̧ chjadë pio ju̧i̧, jabechji̧ boearea̧rä tutia̧diro̧jo̧ȩ. Jabo cho̧ chjadëdë pio ju̧i̧, jabechji̧ aeno̧a̧diro̧jo̧ȩ. 49Ado danȩrȩ, cjiadiäa̧ japamitërä, jabechji̧ peaja̧dimi̧ dari̧ japapadiro̧jȩrȩ pumȩ ji̧ri̧ a̧dëräpȩ cjiaji̧ri̧ mu̧i̧tjoi̧ pio judiro̧ ⁠—⁠yo̧a̧dejȩrȩ⁠—⁠. Jabechji̧ yo̧a̧ri̧ bubape bagami̧ dari̧ tutipadiro̧jȩrȩ coëma cjiari̧ cjo̧ro̧ji̧ri̧ pio ji̧ri̧ jibëa̧ buba cjiapea̧ oa. Ado chjai̧dëri̧ japaji̧ri̧ pio ji̧ri̧bo tutipadiro̧jȩrȩ ado cja̧rȩmo̧räpȩ tutia̧ oa cjiapea̧ oa. 50Jabechji̧ a̧dë chjäte cjüëtü tjamo̧räpȩ ju̧ri̧ aeno̧padiro̧jȩrȩ, ji̧dë ma ejaro cjiarea̧räpȩ ju̧ri̧, a a ma cjiarea̧räpȩ ju̧ri̧ ⁠—⁠yo̧mȩrȩ yo̧rëremȩdejȩrȩ Jechu judi jibëa̧ jadü pio ji̧ri̧.

51Ado Jechu judi ja̧di ta̧rëri̧ ni̧bä ëte, iëno̧ë ta̧rëa̧dejȩrȩ:

⁠—⁠Danȩrȩ, ¿bapë ta̧rërenȩro̧coe?

Ado judiro̧:

⁠—⁠Aja̧, ta̧rërea̧ro̧mȩ ⁠—⁠yo̧a̧diro̧jo̧ȩ⁠—⁠. Bapë ta̧rërea̧ro̧mȩ ⁠—⁠dëbë yo̧a̧diro̧jo̧ȩ.

52Ado ja̧dëa ji̧ judiro̧ bapë ta̧rëa̧ oaiä, jabechji̧ pio yoa ma̧ȩra̧ a̧de ni̧bä chjaorëremȩdejȩrȩ:

⁠—⁠Danȩrȩ, eami̧ a̧ra̧ano̧mȩ judi, Moicherë go̧ȩparërea̧ ma̧ȩ oa a̧ra̧ano̧mȩ pio judi, Ütërë yo̧a̧ chja̧oerä cjo̧ro̧pea̧ pio ju̧i̧ chjiari chjadëri̧ dabapea̧rä judi, jabechji̧ jibëa̧ bëräpȩ ju̧ri̧ a̧dë chjäte ba chiati̧ oa boea̧ oa goamȩmi̧ dari̧ cjo̧ro̧de ⁠—⁠yo̧a̧dejȩrȩ⁠—⁠. Jabechji̧ no̧mȩ tjamo̧ri ja̧ go̧ȩpea̧ oa cjiarërea̧ ma̧ȩ pio ju̧i̧ boea̧ oa goami̧ dari̧ goade, ma̧ȩ peaja̧ra̧ a̧de. Ado pio ju̧i̧iä judi a̧ra̧ano̧ro, jabechji̧ ma̧ȩ ba chia tjamo̧ oa boearea̧ jo̧ tjori pio judiri go̧dü tänȩmȩmi̧ darë a̧ra̧ano̧pai̧ dade, pearä go̧ȩparërea̧ ma̧ȩra̧ tarupë a̧ra̧ano̧mȩrȩ. Ado ja̧dëa ji̧ ma̧ȩ peaja̧ra̧ pio ju̧ri̧ra̧, ji̧dë duri oa ma̧na̧mȩ a̧ra̧ano̧rea̧ ma̧ȩra̧ pio ju̧ri̧ra̧ a̧de miremi̧ dari̧ a̧de a̧ra̧ano̧pai̧ dade peaja̧di ⁠—⁠yo̧mȩrȩ ni̧bä chjaorëremȩdejȩrȩ Jechu judi.

Nachareräpȩ ju̧ri̧ cjo̧ro̧ji̧ri̧ pio judiro̧ jiadarëreji̧ri̧diro̧jo̧ȩ Jechu pio ju̧i̧

Marco 6:1-6; Uruca 4:16-30

53Ado Jechu judi pio jiro na̧rȩrea̧ ma̧ȩmi̧ dara̧ ni̧bä chjao ëte, pio jiro bëri pio judiri a̧dë go̧dürëremȩde. 54Ado jibëa̧ chiriräpȩ go̧düdäräa̧mȩrȩ, jënȩ ütëparȩa̧ oa cjiamȩ bë ma̧ri̧räpȩ go̧düdäräa̧mȩrȩ yu̧a̧rëremȩde judiorë a̧doparea̧ bëräpȩ. Ado a̧ra̧ano̧a̧dejȩrȩ. Ado pumȩ judiro̧ pio ju̧i̧ ta̧rëa̧ oaiä, ya yabë cjiami̧ dari̧ jo̧rȩtaji̧ri̧pea̧dirȩ, ana̧ri̧ jo̧rȩtaji̧ri̧rȩ. Ado jibëa̧ dëbëti̧ra̧ chia iëno̧ iëno̧ cjiaji̧ri̧pea̧dirȩ:

⁠—⁠¿Jabo chjia ju̧i̧iä dabapa ëte urëdi tjamo̧ oa jo̧rȩtamȩpea̧de pio yodëje? ¿Chjia ju̧i̧iä dabapa ëte, a̧dë chjäte jauëchja cjiari̧ na̧rȩrea̧ goamȩpea̧de? 55Danȩrȩ, pumȩ ba chiadëde, jabomo̧ pio yoa chiririmȩde. Jabechji̧ Joche pio ju̧i̧ ja̧ jojade. Jabomo̧ to maeara̧ ja̧bepamȩ pio ju̧i̧ ja̧ jojade. Ado pio ju̧i̧ arayi̧ pio jini̧, jabechji̧ Maria quȩyi̧ pio jini̧nȩ. Ado pio ju̧i̧di ja̧ji̧ri̧ pio ji̧ri̧ chjiaribo dabarea̧rȩ. Danȩrȩ, Santiago ju̧i̧, ado Joche pio ju̧i̧, ado Chimeo̧ ju̧i̧, ado Juda ju̧i̧, ‘jabechji̧ pio judiro̧diro̧da’ quëna̧ dabarea̧ro̧jȩrȩ. 56Ado pio ju̧i̧di ja̧ji̧ri̧ pio jini̧ro̧borë pio yi cjo̧ro̧ni̧rȩ. Ibëa̧ queri̧räpȩ ëba cjo̧ro̧ maeani̧ro̧ibe. Pio ji̧ri̧ dabarea̧rȩ. Pio ju̧i̧iä jabechji̧, ¿yudiri ma̧na̧mȩ dabarea̧ oa dabamȩpea̧de? ¿Yudiri ma̧na̧mȩ jauëchjarea̧ oa dabade? ⁠—⁠yo̧ji̧ri̧rȩ ni̧bä chjaorëreji̧ri̧dirȩ jibëa̧ dëbëti̧ra̧ chia.

Aja̧, ja̧di ta̧rëri̧ yo̧ji̧ri̧rȩ ma̧ȩ goaedëra̧ ni̧bä chjaorëreji̧ri̧dirȩ pio ji̧ri̧ ja̧ chjarerä ütëparȩa̧ oa cjiarëremȩ pio ju̧i̧ chjiari. Jabechji̧ Jechu pio ju̧i̧iäpȩmo̧ goaedëri̧ daea̧ oaiä, ‘pio ibë u̧i̧ ba chiadida’ quëna̧dëri̧ cjia̧ oaiä, jabechji̧ putu jura̧ a̧dë chami̧ dari̧ japarëreji̧ri̧diro̧jo̧ȩ. 57Jabechji̧ pio ju̧i̧ chjadëri̧ quëna̧tärea̧ ji̧, goëdëri̧ cjiaji̧ri̧pea̧diro̧jo̧ȩ, pio ju̧i̧iäpȩmo̧ quëna̧dëri̧ cjiaji̧ri̧rȩ. Jabo Jechu judi yo̧rëremȩdejȩrȩ:

⁠—⁠Danȩrȩ, eami̧ pumȩ judi, Ütërë ea jana̧ chjadüa̧ oa ni̧bämȩ pio judi, jabechji̧ ba chiadë made jënȩ cjo̧ro̧mȩ chiriräpȩ ju̧ri̧ ⁠—⁠yo̧a̧dejȩrȩ⁠—⁠. Ba chiadë made jibëa̧ pumȩ pio ji̧ri̧iä. Jabechji̧ badë dapadiro̧jo̧ȩ. Ado peaja̧di da maeari̧ japa marenȩro̧coe ⁠—⁠yo̧a̧dejȩrȩ Jechu judi.

58Ado ju̧ri̧pȩji̧ri̧ judiro̧ Jechu pio ju̧i̧ quëna̧dëa̧ oaiä, jabechji̧ a̧dë chjäte ana̧ri̧ na̧rȩtärea̧ ji̧, dami̧ti̧ jauëchjarea̧ oa japatärea̧ ji̧, jabechji̧ jabëtari̧mi̧ maea oa japarëremȩde Jechu judi.

Currently Selected:

Mateo 13: Pume

Highlight

Copy