Mateo 12

Järätä chjaparea̧ do pio ju̧i̧ chjiari ni̧bä chjaorëremȩdejȩrȩ Jechu judi

Marco 2:23-28; Uruca 6:1-11

1Ado pio jiro japamitërä järätä chjaparea̧ doro, tjado oa yu̧ë chjätärëremȩde Jechu judi jibëa̧ jadü pio ji̧ri̧ nö̧ta. Ado jibëa̧ jadü judiro̧ ta̧mȩcho̧ ja̧boa̧ oaiä, chjaodëri̧ yarëno̧a̧diro̧jo̧ȩ cho chiamȩ joë pio ju̧i̧. Ado mu̧i̧ yarëno̧ ëte, taruparëreji̧ri̧dirȩ jurapea̧ ji̧. 2Jabo pjaricheo judiro̧ pio ji̧ri̧ daea̧ oaiä, yo̧rëreji̧ri̧diro̧jo̧ȩ Jechu ju̧i̧:

⁠—⁠Jabo danȩ, na̧ jadü judiro̧ tüdüa̧mi̧ darä cjo̧ro̧pea̧ ma̧ȩrä chjadëri̧ cjo̧ro̧tärea̧ ji̧, järätä chjaparea̧ doro chjadëri̧ cjo̧ro̧tärea̧ ji̧, jabechji̧ china̧chja pio ju̧i̧ japadirȩ ⁠—⁠yo̧a̧diro̧jo̧ȩ⁠—⁠. Jabechji̧ tjadoro ja̧bepadirȩ. Ado järätä chjaparea̧ doro tjadoräpȩ ja̧beparea̧mi̧dëde. China̧chja do oaiä, jabechji̧ jurarea̧ cho oa mitërea̧mi̧dëde ⁠—⁠yo̧a̧diro̧jo̧ȩ.

3Jabo Jechu judi dëbë yo̧rëremȩdejȩrȩ pjaricheo pio ji̧ri̧iäpȩmo̧:

⁠—⁠Danȩrȩ, ¿Ütë tjamo̧ ja̧ ma̧ȩ oa go̧ȩ ni̧bädëa̧nȩrȩ? ⁠—⁠iëno̧ë ta̧rëa̧dejȩrȩ⁠—⁠. Davi quȩmȩrea̧ pio judi japarërea̧ pio ju̧i̧ chjiari ¿go̧ȩ ni̧bädëa̧nȩrȩ? Judi jibëa̧ jadü pio ji̧ri̧ nö̧ta japarërea̧ pio ju̧i̧ chjiari, judiro̧ ta̧mȩcho̧ ja̧bo tjamo̧ji̧ri̧rȩ japarërea̧ pio ju̧i̧ chjiari ¿go̧ȩ ni̧bädëa̧nȩrȩ? ⁠—⁠iëno̧ë ta̧rëa̧dejȩrȩ⁠—⁠. 4Danȩrȩ, Davirea̧ pio judi ta̧mȩcho̧ ja̧bomȩrȩ yu̧a̧rëremȩde dëbëdiärea̧ jo̧räpȩ. Ado yu̧a̧ ëte, china̧chja oa mitërëremȩdejȩ chja̧pe oa. Tjamo̧ davä. Chja̧pe oa jurapea̧ oa, Ütë tjamo̧ ja̧ oa china̧chjari̧ tutia̧ oa cjiaremȩ chja̧pe pio ju̧i̧ jurapea̧ oa, o ji̧ri̧ chjiari goë tuti ja̧bepaji̧ri̧ pio ji̧ri̧ ja̧ oa china̧chjari̧ tutia̧ oa cjiaremȩ chja̧pe pio ju̧i̧ jurapea̧ oa mitërëremȩde. Ado jurarea̧ china̧chja pio ju̧i̧ mitë ëte, go̧dürëremȩde jibëa̧ jadü pio ji̧ri̧iäpȩ, pio ji̧ri̧ nö̧ta ëba jurapea̧ oa. Ado judi juradëpea̧ pio ju̧i̧ jura̧räbo, tüdüa̧mi̧ darä cjo̧ro̧pea̧ ma̧ȩ oa ta̧rëdiädëa̧räbo, jabechji̧ chjai̧dëri̧ chjätädërëremȩde ⁠—⁠yo̧a̧dejȩrȩ⁠—⁠. 5Ado danȩrȩ, ¿go̧ȩ ni̧bädëa̧nȩrȩ Moicherë go̧ȩparërea̧ ma̧ȩ oa, järätä chjaparea̧ doro ja̧bepadëpea̧ pio ju̧i̧ chjiari ma̧ȩ oa? Danȩrȩ, järätä chjaparea̧ doro ja̧bepadëpea̧de yo̧de. Jabo ja̧di dari̧ go̧ȩpea̧ oa cjiaräbo, jabechji̧ o ji̧ri̧ chjiari goë tuti ja̧bepaji̧ri̧ pio judiro̧ ji̧dë ma ja̧bepadirȩ Ütë tjamo̧ ja̧ bëräpȩ. Jabechji̧ järätä chjaparea̧ doräbo ja̧bepadirȩ, järätä chjapadëji̧ri̧rȩ. Jabo jabechji̧de jabo. Pio jiro järätä chjaparea̧ doro ja̧bepea̧räbo, chjai̧dëri̧ japadërëreji̧ri̧dirȩ. 6Jabo danȩrȩ, dibëa̧ chjarerä cjiamȩ pio judi Ütë tjamo̧ ja̧ bë pio ju̧i̧iä ji̧dë u̧i̧ ba chiade. Aja̧, Ütë tjamo̧ ja̧ bë pio ju̧i̧iä ji̧dë u̧i̧ ba chiarequede cüdë. 7Danȩrȩ, Ütë tjamo̧ judi go̧ȩpa tänȩrërea̧ ma̧ȩ üdë peadëri ja̧ ja̧di ta̧rëri̧ go̧ȩpea̧ oa cjiarëremȩde:

“Mȩnȩro̧ Ütë tjamo̧ ju̧i̧iäpȩmo̧ eami̧ oa goe gu̧rori̧ cäë yürüa̧ üdë, jabechji̧ ba chiade. Jabo danȩrȩ, ji̧dë u̧i̧ ba chiade davä dibëa̧ pumȩ pio ji̧ri̧iäpȩmo̧ cjäri̧ri̧ cjia da̧ üdë. Tjamo̧ davä. Ji̧dë u̧i̧ ba chiade coaiä.”

Aja̧, ja̧di ta̧rëri̧ go̧ȩpea̧ oa cjiarëremȩde ma̧ȩ üdë. Ado mȩnȩro̧ pio jiro ma̧ȩ pio ju̧i̧ chjiari chjadëri̧ dabarä judi, dibëa̧ pumȩ pio ji̧ri̧ cjäri̧ri̧ cjia daji̧ri̧rȩ cjo̧ro̧rä judi, jabechji̧ aechide yo̧dëa̧täreji̧ri̧renȩro̧jȩrȩ ca̧ jadü pio ji̧ri̧ ⁠—⁠yo̧a̧dejȩrȩ Jechu judi⁠—⁠. Tjamo̧ davä. “Tüdüa̧mi̧ darä cjo̧ro̧pea̧ ma̧ȩrä chjadëri̧ cjo̧ro̧dëdirȩ” yo̧dëa̧täreji̧ri̧nȩrȩ jabo jabechji̧, cjäri̧ri̧ cjia daea̧täreji̧ri̧renȩro̧jȩrȩ. Jabechji̧ judiro̧ chjai̧dëri̧ japadëa̧dirȩ. 8Jabechji̧ Pumȩrȩ Ara̧ Tjamo̧ pio judi järätä chjaparea̧ do Ano̧mȩ pio judirequede. Aja̧, järätä chjaparea̧ do oa tjamo̧ri̧ yo̧mȩ pio judirequede. Ado pio ju̧i̧iä pio cüdë tjamo̧requede ütarë yo̧mȩ judi pumȩ judiro̧ järätä chjaparea̧ do oa japapea̧ pio ju̧i̧ chjiari ⁠—⁠yo̧mȩrȩ ni̧bä chjaorëremȩdejȩrȩ Jechu judi pjaricheo pio ji̧ri̧iäpȩmo̧.

Jechu judi chjaparȩrëremȩdejȩ ichi chjerea̧mȩ ju̧i̧

Marco 3:1-6; Uruca 6:6-11

9Ado pjaricheo pio ji̧ri̧ nö̧ta ni̧bäa̧ duri oa, pio judiri jämȩrȩ yu̧a̧rëremȩde Jechu judi judiorë a̧doparea̧ bëräpȩ. 10Ado pio ju̧ri̧pȩrëremȩde ichi chjerea̧mȩ judi. Ado Jechu pio ju̧i̧iäpȩmo̧ aechide yo̧tämi̧ cjiaji̧ri̧ pio judiro̧borë pio ju̧ri̧pȩrëreji̧ri̧dirȩ. Ado iëno̧ë ta̧rëa̧diro̧jo̧ȩ Jechu ju̧i̧:

⁠—⁠Danȩ, ¿tjana̧ yo̧diibe ma̧ȩ üdë, tüdüa̧mi̧ darä cjo̧ro̧pea̧ ma̧ȩ üdë? Järätä chjaparea̧ doro pumȩ pio ju̧i̧ chjaparȩpea̧ üdë ¿jabechji̧dëde? Aja̧ ja̧di ta̧rëri̧ iëno̧ë ta̧rȩrëreji̧ri̧diro̧jo̧ȩ, aechide yo̧rea̧mi̧ dari̧ japapai̧ dadiji̧da' quëna̧ jo̧rȩtaji̧ri̧rȩ.

11Ado Jechu judi dëbë yo̧mȩrȩ yo̧rëremȩdejȩrȩ:

⁠—⁠Danȩrȩ, mȩnȩro̧ cja̧rȩmȩrȩ oveja oa goarä judi, ado dibëa̧ oveja üdë cja̧rȩmȩrȩ järätä chjaparea̧ doro puë urëdiräpȩ choë cjatärä judi, ¿chjaodëri̧ mu̧i̧ go̧dü tänȩdëparenȩro̧jo̧ȩ? Dëdë, chjaodëri̧ mu̧i̧ go̧dü tänȩtäreji̧ri̧renȩro̧jo̧ȩ järätä chjaparea̧ dorobo. 12Ado danȩrȩ, ¿oveja pio ju̧i̧iä ji̧dë u̧i̧ ba chiadëde pumȩ judi? Dëdë, ji̧dë u̧i̧ ba chiade. Ado pio ju̧i̧iä yo̧requededibe. Danȩrȩ, järätä chjaparea̧ dorobo, jabechji̧ chjadë tjamo̧de pumȩ pio ju̧i̧iäpȩmo̧ chjadëri̧ japapea̧ üdë ⁠—⁠yo̧a̧dejȩrȩ.

13Ado ja̧di ta̧rëri̧ yo̧ ëte, Jechu judi yo̧rëremȩdejȩ ichi chjerea̧mȩ ju̧i̧:

⁠—⁠Danȩ, na̧ ichi chjia oa tobovä ⁠—⁠yo̧a̧dejȩ⁠—⁠.

Ado judi ichi chjia oa toboa̧ oaiä, chjaodëri̧ chjapea̧ oa cjiadiärëremȩde dëbëri ja̧ ichi pio judimi̧ dari̧. 14Jabo Jechu judi ja̧di dari̧ japea̧ oaiä, pjaricheo pio judiro̧ järi tjamo̧pe bagarëreji̧ri̧dirȩ pio ju̧i̧ ja̧bo tänȩpea̧ ji̧.

Ütë tjamo̧ judi mitërërea̧ mu̧i̧tjoi̧ pio judide Jechu judi

15Ado Jechu judi pjaricheo judiro̧ pio jȩa chjiari jo̧rȩta̧ pio ju̧i̧ daba̧ oaiä, judiro̧ pio jȩa chjiari chjai̧dëri̧ japapea̧ pio ju̧i̧ daba̧ oaiä, jabechji̧ baärëremȩde ado cja̧rȩmo̧ chiriräpȩmo̧. Ado pumȩ no̧i̧dë tjamo̧rȩ cho̧rë järëreji̧ri̧diro̧jo̧ȩ. Ado gito ja̧boji̧ri̧ pio ji̧ri̧ chjaparȩrëremȩdejȩrȩ ütëbodärä oa, cja̧rȩmȩrȩ a̧dë cjiadiädëri̧. 16Jabo pio jȩa chjiari o ji̧ri̧iäpȩmo̧ yo̧dëtä eamȩrȩ cjapiri̧ cjiatä yo̧rëremȩdejȩrȩ chjaparȩa̧ oa cjiaji̧ri̧ pio ji̧ri̧. 17Jabechji̧ ja̧di ta̧rëri̧ yo̧rëremȩde Jechu judi, Ichaia quȩmȩrea̧ pio judi jabërä go̧ȩparërea̧ ma̧ȩ üdë tjamo̧i̧ cjiari̧ cjiadiäpea̧ oa. Tjamo̧ davä. Ütërë ea jana̧ chjadüa̧ oa ni̧bämȩ pio judi jabërä yo̧rërea̧ ma̧ȩ üdë tjamo̧i̧ cjiari̧ cjiadiäpea̧ oa, yo̧rëremȩde Jechu judi. Ado Ichaia judi Jechu pio ju̧i̧ chjiari jabërä go̧ȩparërea̧ ji̧, Ütë tjamo̧ judi joja pio ju̧i̧ chjiari yo̧rërea̧ ji̧ ¿tjana̧ ma̧ȩ oa ni̧bärëremȩde? Tjana̧dë, pio yoa ma̧ȩ oa ni̧bärëremȩde. Ta̧rëchji̧vä:

18"Danȩrȩ, cüdë mitërërea̧ mu̧i̧tjoi̧ pio ju̧i̧ dachji̧jo̧ȩ. Jabechji̧ ea tjamo̧reconȩ. Ado ji̧dë ma ma̧ chiadëri̧ cjiamȩrȩ dareconȩ. Ji̧dë ma goaedique. Ado pio ju̧i̧ yürüpareconȩ ca̧ Tjo oa. Ado judiodë pio ji̧ri̧iäpȩmo̧ ni̧bä chjaopadejȩrȩ, jënȩro̧ jabechji̧parȩa̧ oa cjiapea̧ oa. 19Ado eami̧ pumȩ pio ji̧ri̧ dëbë ni̧bätadëpadejȩrȩ. Ado järea̧ no̧räpȩ ju̧ri̧ ma̧ȩ goaedëra̧ to̧bari̧ ëna̧die ëna̧die yo̧dëpade jabechji̧. 20Jabo ju chiadëji̧ri̧ pio ji̧ri̧ järiparȩpadejȩrȩ. Ado jidatarea̧ chiadëji̧ri̧ pio ji̧ri̧ chjadëri̧ a̧dopadejȩrȩ, ma̧diä ma̧diä cjiarea̧ decjiari̧. Aja̧, ja̧di dari̧ cjo̧ro̧pade ca̧ mu̧i̧tjoi̧ judi, judi chjai̧dë pio ju̧i̧ boadäräa̧rä yuro, Ütërë coëma cjiari̧ ütarë jo̧rȩtarërea̧ üdë chjadëri̧ japadäräa̧ oa cjiarä yuro. 21Ado pio ju̧i̧iämo̧i̧ jidatarea̧ dapadirȩ chiriräpȩti̧ oa cjo̧ro̧ji̧ri̧ pumȩ pio judiro̧.”

Aja̧, ja̧di ta̧rëri̧ go̧ȩparëremȩde Ichaia judi. Ütë tjamo̧ judi Joja pio ju̧i̧ chjiari ni̧bärërea̧ ma̧ȩ pio ju̧i̧ go̧ȩparëremȩde.

Teracabari̧ aechide ni̧bärëreji̧ri̧diro̧jo̧ȩ Jechu pio ju̧i̧iäpȩmo̧

Marco 3:20-30; Uruca 11:14-23

22Ja̧dëa̧ ji̧ yaröca chiamȩ pio ju̧i̧ ëba go̧düna̧ra̧rëreji̧ri̧diro̧jo̧ȩ Jechu pio ju̧i̧iäpȩ. Ado yaröca pio judi ira̧diä cjaeäa̧ oaiä, jabechji̧ da cotorëremȩde. Ado ni̧bärea̧ dadëmȩrȩ cjo̧ro̧rëremȩde ji̧dëri̧. Ado Jechu judi chjaodëri̧ chjaparȩrëremȩdejȩ. Ado pio ju̧i̧iä chjaodëri̧ ni̧bämȩpea̧de. Ado damȩpea̧de. 23Ado pumȩ judiro̧ pio ju̧i̧ daea̧ oaiä, ütëbodärärë ana̧ tjamo̧ri̧ jo̧rȩtaji̧ri̧pea̧dirȩ ya yabë cjiaji̧ri̧mi̧ dari̧. Ado yo̧a̧dirȩ:

⁠—⁠¿Pio yodëje Davirea̧ pio judiri ja̧mȩ pio judidëde? ¿A̧ro̧rȩ jidatarërea̧ Chjätä Tänȩmȩ pio judidëde? ⁠—⁠yo̧a̧dirȩ.

24Jabo pjaricheo judiro̧ pio ju̧i̧ ta̧rëa̧ oaiä, yo̧a̧diro̧jȩrȩ pumȩ ji̧ri̧:

⁠—⁠Jabo cjäri̧ made ⁠—⁠yo̧a̧diro̧jȩrȩ⁠—⁠. A̧ro̧rȩ jidatarërea̧ Chjätä Tänȩmȩ pio judidëde. Jabechji̧ yaröca ja̧ ütë pio judi jibëa̧ jauëchja oa yürüa̧ oaiämo̧i̧ baä tänȩrea̧ dadejȩrȩ yaröca ji̧ri̧. Aja̧, Bechebu quȩmȩ pio ju̧i̧iämo̧i̧ jauëchjarea̧ oa dade yaröca pio ji̧ri̧ baä tänȩpea̧ ji̧ ⁠—⁠yo̧a̧dirȩ.

25Jabo Jechu judi, ‘Aja̧ ja̧di dari̧ jo̧rȩtadiro̧da’ quëna̧ dabamȩrȩ dëbë yo̧rëremȩdejȩrȩ, na̧rȩrea̧ ma̧ȩmi̧ dara̧ yo̧mȩrȩ:

⁠—⁠Danȩrȩ, eami̧ chiriräpȩ cjo̧ro̧ji̧ri̧ pio judiro̧ chjadëri̧ ëba cjo̧ro̧dërä judi, jabo ji̧dë ma goëdëri̧ cjia jo̧rȩtarä judi, judiro̧ jadüchiami̧ bubami̧ dari̧ cjiadiärä judi, cjäri̧ madirȩ, chjarapë baämi̧ dari̧ cjo̧ro̧padirȩ goarijärea̧mi̧ dari̧ ⁠—⁠yo̧a̧dejȩrȩ⁠—⁠. Peaja̧di maeade bë ma̧ri̧räpȩ cjo̧ro̧ji̧ri̧ pio ji̧ri̧iä. Jabechji̧ judiro̧ jibëa̧ dëbëti̧ra̧ chia dëbëpe chjaoji̧ri̧rȩ cjo̧ro̧rä judi, jadüchiami̧ bubami̧ dari̧ cjo̧ro̧rä judi, peaja̧di goarijäa̧ oa cjiapadirȩ. Aja̧ ca̧ pumȩ, ja̧di maeade. Ado peaja̧di maeade pumȩ ja̧ bëräpȩ cjo̧ro̧ji̧ri̧ pio ji̧ri̧iä. Jabechji̧ judiro̧ jibëa̧ dëbëti̧ra̧ chia ji̧dë ma dëbëpe chjaomi̧ dari̧ japarä judi, judiro̧ jadüchiami̧ bubami̧ dari̧ cjo̧ro̧rä judi, jabechji̧ chjuchjupechäpadirȩ, pumȩ decjiape bagarea̧mi̧ dari̧. 26Ado peaja̧dide Ichiae pio ju̧i̧iä ⁠—⁠yo̧a̧dejȩrȩ⁠—⁠. Danȩrȩ, Ichiae judi jibëa̧ mu̧i̧tjoi̧ pio ji̧ri̧ dëbëpe chjaorä judi, Ichiae pio judi ira̧diä cjaeäji̧ri̧ pio ji̧ri̧ baä tänȩrä judi, judiro̧ jadüchiami̧ bubami̧ dari̧ jo̧rȩtarä judi, jabechji̧ ju chiadëji̧ri̧mi̧ dari̧ cjiadiäpadirȩ. Tjamo̧ davä. Yaröca judiro̧ jibëa̧ dëbëti̧ra̧ chia dëbëpe chjaorä judi, Ichiae pio ju̧i̧bo dëbëpe chjaorä judi, cjäri̧ madirȩ, jibëa̧ ja̧beparea̧ pio ju̧i̧ chjadëri̧ japatärea̧ ji̧, dae järea̧mi̧ dari̧ ja̧bepatärea̧ ji̧, jabechji̧ ju chiadëji̧ri̧mi̧ dari̧ cjiadiäpadirȩ, eami̧ oa japarea̧ dadëji̧ri̧rȩ. Ado pio ju̧i̧iä Ichiae judi, cjäri̧ madique, yürüdë matäremȩdique jibëa̧ ju chiarea̧ oa yaröca pio ji̧ri̧ baä tänȩpea̧ oa. 27Jabo danȩrȩ, chjadëri̧ iëno̧ë ta̧rëtämi̧ cjiarequededibe ⁠—⁠yo̧a̧dejȩrȩ⁠—⁠. Jabechji̧ cüdë Ichiae pio judi yürüa̧ ju chiarea̧ra̧ pio ju̧ri̧ra̧ yaröca pio ji̧ri̧ tjamo̧ri̧ baä tänȩrä judi, ¿chiarë yürüa̧ oa ju chiarea̧ra̧ baä tänȩdiro̧jȩrȩ dibëa̧ jadü judiro̧? Danȩrȩ, peaja̧di baä tänȩdiro̧jȩrȩ yaröca pio ji̧ri̧. Ado pio judiro̧borë yaröca pio ji̧ri̧ baä tänȩa̧ oaiä, jabechji̧ ana̧ri̧ jo̧rȩtapai̧ dadirȩ davä mȩnȩro̧ ja̧di ta̧rëri̧ yo̧a̧ pio ju̧i̧iä. Jabechji̧ mȩnȩro̧ pio coaiäpȩmo̧ aechide ni̧bäa̧ pio ju̧i̧iä, jabechji̧ pio ji̧ri̧iäpȩmo̧bo aechide ni̧bämi̧ dari̧ ni̧bärenȩro̧jȩrȩ. “Aja̧, pio mȩnȩro̧borë Ichiae pio judi yürüa̧ ju chiarea̧ra̧ baä tänȩrenȩro̧jȩrȩ yaröca pio ji̧ri̧” yo̧mi̧ ta̧rëri̧ ni̧bärenȩro̧jȩrȩ pio ji̧ri̧iäpȩmo̧bo, dibëa̧ jadü pio ji̧ri̧iäpȩmo̧bo. Ado judiro̧ pio ju̧i̧ ta̧rë oaiä, jabechji̧ ütarë ta̧rëpadiro̧dibe davä, 'oëra̧ yo̧a̧diro̧da' quëna̧ jo̧rȩtaji̧ri̧rȩ. 28Jabo danȩrȩ, tjamo̧i̧ cjiari̧ yo̧requededibe ⁠—⁠yo̧a̧dejȩrȩ⁠—⁠. Yaröca ja̧ ano̧mȩ pio judi yürüa̧ ju chiarea̧ra̧ yaröca pio ji̧ri̧ baä tänȩdë marequedejȩrȩ, jabo Ütë tjamo̧ pio ju̧i̧ ja̧ Tjo pio judi yürüa̧ ju chiarea̧ra̧ baä tänȩrequedejȩrȩ. Ado cüdë ja̧di dari̧ japea̧ pio oaiä jabechji̧ na̧rȩrequededibe. ‘Aja̧, Ütë judi yo̧a̧ chja̧oerä cjo̧ro̧rea̧ üdë ma̧na̧diibëda yaba̧’ quëna̧ jo̧rȩtapea̧ oa na̧rȩrequededibe ⁠—⁠yo̧mȩrȩ ni̧bä chjaorëremȩdejȩrȩ Jechu judi.

29Ado Jechu judi Ichiae pio ju̧i̧ chjiari ji̧dë u̧i̧ ni̧bä chjaomȩrȩ ja̧di ta̧rëri̧ a̧de yo̧rëremȩdejȩrȩ pjaricheo pio ji̧ri̧iäpȩmo̧:

⁠—⁠Danȩrȩ, pio yoa na̧rȩrea̧ ma̧ȩmi̧ da oa a̧de ni̧bä chjaorequededibe peaja̧di ⁠—⁠yo̧a̧dejȩrȩ⁠—⁠. Danȩrȩ, garümȩ judi ju chia tjamo̧mȩ pio ju̧i̧iä garütämi̧ cjiarä judi, bë ana̧mȩ pio ju̧i̧iä garütämi̧ cjiarä judi, jabechji̧ jabërä boadäräpea̧ chiadejȩ. Jabechji̧ jibëa̧ bëräpȩ acji yu̧a̧ ëte, ado pio ju̧i̧ boadärä ëte, jabechji̧ tabüpea̧ chiadejȩ, judi eami̧ oa japarea̧ decjiari̧. Ado ja̧di dari̧ japa ëte, jabechji̧ chjaodëri̧ baë goa baäpai̧ dadejȩ davä pio ju̧i̧ ja̧remȩ pio ju̧i̧#12:29 Danȩrȩ ca̧ pumȩ, peaja̧dimi̧ dari̧ japarëremȩdejȩ Ichiae pio ju̧i̧ Jechu judi. Jabechji̧ boadäräa̧dejȩrȩ. Jibëa̧ bë oa acji yu̧a̧ ëte, jabechji̧ tabüa̧mi̧ dari̧ japarëremȩdejȩ. Aja̧, jibëa̧ pumȩrëreji̧ri̧ pio ji̧ri̧, pio ju̧i̧ ja̧ chja̧oerä cjo̧ro̧rëreji̧ri̧ pio ji̧ri̧, jabechji̧ baë mitëmi̧ dari̧ japarëremȩdejȩrȩ, pio ji̧ri̧ chjätä tänȩrea̧mi̧ dari̧. Tjamo̧ davä. Ichiae pio ju̧i̧ ja̧remȩ pio ju̧i̧ baë goa baämi̧ dari̧ chjätä tänȩrëremȩdejȩrȩ. Aja̧, Ichiae ja̧ totarea̧ri pio judiri go̧dü tänȩrea̧mi̧ dari̧, jare chjadürea̧mi̧ dari̧ go̧dü tänȩrëremȩdejȩrȩ Ichiae pio ju̧i̧ ja̧ chja̧oerä tutia̧ oa cjiami̧ dari̧ cjo̧ro̧rërea̧ ji̧. ⁠—⁠yo̧mȩrȩ ni̧bä chjaorëremȩdejȩrȩ pjaricheo pio ji̧ri̧iäpȩmo̧ Jechu judi.

30Ado Jechu judi cjiadiädëmȩrȩ ji̧dë u̧i̧ ni̧bä chjaorëremȩdejȩrȩ pjaricheo pio ji̧ri̧iäpȩmo̧, ja̧di ta̧rëri̧ a̧de yo̧mȩrȩ:

⁠—⁠Eami̧ pumȩ judiro̧ pio coa a̧dodërä judi, jabechji̧ pio judiro̧ dëbëpe chjaomi̧ dari̧ japadiro̧coe ⁠—⁠yo̧a̧dejȩrȩ⁠—⁠. Ado eami̧ pumȩ judiro̧ ca̧ ovejami̧ da pio ji̧ri̧ a̧dopapea̧ ji̧ a̧dodërä judi, jabechji̧ chjuchjuti̧mi̧ baä tänȩmi̧ dari̧ japa madiro̧jȩrȩ. 31Ado pio ju̧i̧iä yo̧requededibe ⁠—⁠yo̧a̧dejȩrȩ⁠—⁠. Eami̧ pumȩ üdë Ütë tjamo̧ pio ju̧i̧iäpȩmo̧ chjai̧dëri̧ japarä judi, Ütë tjamo̧ pio ju̧i̧iäpȩmo̧ chjai̧dëri̧ ni̧bärä judi, jabechji̧ duridëparȩa̧ oa cjiapai̧ dade, jënȩ ano̧ mire jo̧rȩtamȩpea̧rä judi. Jabo eami̧ pumȩ üdë Tjo tjamo̧ pio ju̧i̧iäpȩmo̧ ji̧dë ma chjai̧dëri̧ japarä judi, pio ju̧i̧ chjiari ji̧dë ma chjai̧dëri̧ ni̧bärä judi, jabechji̧ duridëparȩa̧ oa cjiarea̧mi̧dëde ⁠—⁠yo̧a̧dejȩrȩ⁠—⁠. 32Jabechji̧ eami̧ pumȩ üdë pio coaiiäpȩmo̧ chjai̧dëri̧ ni̧bärä judi, Pumȩrȩ Ara̧ Tjamo̧mȩ pio coaiäpȩmo̧ chjai̧dëri̧ ni̧bärä judi, dëdë, duridëparȩa̧ oa cjiapai̧ dade, jënȩ ano̧ mire jo̧rȩtamȩpea̧rä judi. Jabo eami̧ pumȩ üdë Tjo tjamo̧ pio ju̧i̧iäpȩmo̧ chjai̧dëri̧ ni̧bärä judi, jabechji̧ duridëparȩa̧ oa cjiadëpade. Tjamo̧ davä. Eami̧ pumȩ judiro̧ pio yoa japamitërä Tjo tjamo̧ pio ju̧i̧ ji̧dë ma jiadarä judi, jabechji̧ duridëparȩa̧ oa cjiadëpade. Ado ji̧dë duri oa ma̧na̧pamȩ cjiadiärea̧ japamitërä cjo̧ro̧pamȩ pio judiborë duridëparȩa̧ oa cjiadëpade peaja̧di. Tjamo̧ davä. Judi Tjo tjamo̧ pio ju̧i̧ ji̧dë ma jiadarä judi, jabechji̧ duridëparȩa̧ oa cjiadëpade ⁠—⁠yo̧mȩrȩ yo̧rëremȩdejȩrȩ pjaricheo pio ji̧ri̧iäpȩmo̧ Jechu judi.

Aja̧, pjaricheo judiro̧ Jechu pio ju̧i̧ chjiari oëra̧ yo̧a̧ oaiä, Tjo tjamo̧ pio ju̧i̧iäpȩmo̧bo chjai̧dëri̧ ni̧bämi̧ dari̧ yo̧a̧ oaiä, ja̧di ta̧rëri̧ yo̧rëremȩdejȩrȩ. Jabechji̧ “Ichiae pio judi ju chiarea̧ yürüa̧ oaiä yaröca pio ji̧ri̧ baä tänȩmȩde” yo̧mȩ ma̧ȩ pio ju̧i̧ yo̧a̧ oaiä, dëdë, Tjo tjamo̧ pio ju̧i̧iäpȩmo̧ chjai̧dëri̧ ni̧bärëreji̧ri̧diro̧jo̧ȩ. Ado pio ju̧i̧iä ja̧di ta̧rëri̧ yo̧rëremȩdejȩrȩ Jechu judi duridëparȩa̧ oa cjiapea̧ pio ju̧i̧ chjiari.

Baramȩ cho pio ju̧i̧ ütarë daea̧ oaiä, ‘A̧ja̧, pio jiro todida’ quëna̧ daba darea̧ro̧jo̧ȩ

Uruca 6:43-45

33Ado Jechu judi ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ pjaricheo pio ji̧ri̧iäpȩmo̧ na̧rȩrea̧ ma̧ȩmi̧ dara̧:

⁠—⁠Danȩrȩ, jurarea̧ to chjadë üdë, jabechji̧ jurarea̧ chjadë oa chiade ⁠—⁠yo̧a̧dejȩrȩ⁠—⁠. Jabo jurarea̧ to üdë chjadëdë üdë, jabechji̧ jurarea̧ chjadëdë oa chiade. Teracaba maea oa chiade. Aja̧, jurarea̧ pio ju̧i̧ ütarë daea̧ oaiä, jabechji̧ dabarea̧rȩ to pio ju̧i̧ chjiari. 34Jabo cjäri̧ manȩrȩ, to chjadëdëmi̧ da maeanȩrȩ. Ma̧i̧ da ë chiamȩ pomi̧ danȩrȩ. Jabechji̧ ma̧ȩ coëma oa ni̧bärea̧mi̧dënȩrȩ. Chjai̧dë maea oa ni̧bänȩrȩ. Jabechji̧ dibëa̧ chji̧ chjadëdëri pio judiri ji̧dë ma cjitëde mȩnȩro̧ jo̧rȩtarea̧ üdë. Ado mȩnȩro̧ jo̧rȩta̧ pio ju̧i̧ ni̧bänȩrȩ dibëa̧ yara̧ pio ju̧ri̧ra̧ ⁠—⁠yo̧a̧dejȩrȩ⁠—⁠. 35Danȩrȩ, pumȩ chjadë üdë, jabechji̧ chjadëri̧ ni̧bäde. Jabechji̧ jibëa̧ chji̧ra̧ chjadë pio ju̧i̧ jo̧rȩtariä cjo̧ro̧a̧ oaiä, jabechji̧ chjadë pio judi tjuri cjiami̧ dari̧ cjiade jibëa̧ chji̧ oaiä. Ado pio ju̧i̧iä judi ni̧bärä, jabechji̧ jibëa̧ chji̧ri pio judiri cjitëmȩ pio ju̧i̧ ni̧bäde chjadë pio ju̧i̧mo̧i̧. Jabo pumȩ chjai̧dë judi, jabechji̧ chjai̧dëri̧ ni̧bäde. Jabechji̧ jibëa̧ chji̧ra̧ chjai̧dë pio ju̧i̧ jo̧rȩtariä cjo̧ro̧a̧ oaiä, chjadëdë pio judi tjuri cjiami̧ dari̧ cjiade jibëa̧ chji̧ oaiä. Ado pio ju̧i̧iä judi ni̧bärä, jabechji̧ jibëa̧ chji̧ri pio judiri cjitëmȩ pio ju̧i̧ ni̧bäde chjadëdë pio ju̧i̧. 36Danȩrȩ ca̧ pumȩ, chjadëri̧ jo̧rȩtachji̧vä cüdë dibë yo̧a̧ pio ju̧i̧ ⁠—⁠yo̧a̧dejȩrȩ⁠—⁠. Mȩnȩro̧ eami̧ ma̧ȩ teracaba oa ni̧bäa̧ ba oa, eami̧ ma̧ȩ chjai̧dë oa ni̧bäa̧ ba oa, jabechji̧ bape chjaorea̧ doro ütara̧ oa cjiapanȩrȩ. Pio ju̧i̧iä teracabari̧ ni̧bädëtäreji̧ri̧nȩrȩ. 37Jabechji̧ mȩnȩro̧ yo̧a̧ pio ju̧i̧ ta̧rëmȩrȩ ütarapadidibe Ütë tjamo̧ judi. Mȩnȩro̧ chjadëri̧ ni̧bärä judi, ‘Aja̧, jabechji̧parȩa̧ oa cjiadiro̧da’ quëna̧ jo̧rȩtamȩrȩ ütarë dapadidibe. Jabo mȩnȩro̧ ji̧dë ma chjai̧dëri̧ ni̧bärä judi, ‘jabechji̧ aeno̧pea̧ maeadiro̧da’ quëna̧ jo̧rȩtamȩrȩ ütarë dapadidibe peaja̧di. Pio ju̧i̧iä yo̧requededibe. Na̧e chiachji̧vä mȩnȩro̧ teracabari̧ ni̧bächea oa ⁠—⁠yo̧mȩrȩ ni̧bä chjaorëremȩdejȩrȩ Jechu judi pjaricheo pio ji̧ri̧iäpȩmo̧.

Na̧rȩrea̧ ma̧ȩmi̧ da oa yürürëremȩdejȩrȩ Jechu judi Jonás pio ju̧i̧ chjiari

Marco 8:11-12; Uruca 11:29-32

38Ado Moicherë go̧ȩparërea̧ ma̧ȩ oa a̧ra̧ano̧ji̧ri̧ pio judiro̧ orë Jechu pio ju̧i̧ ta̧rëa̧ oaiä, pjaricheo pio judiro̧borë ta̧rëa̧ oaiä, ja̧di ta̧rëri̧ yo̧rëreji̧ri̧diro̧jo̧ȩ:

⁠—⁠Danȩ a̧ra̧ano̧mȩ, a̧ro̧rȩ ana̧ri̧ jo̧rȩtapea̧ oa, jabechji̧ jauëchja cjiari̧ na̧rȩibe a̧ro̧rȩ quëna̧pea̧ oa pio mȩa chjiari, ‘Aja̧, Ütë tjamo̧ pio judi chjadüa̧ oa tjamo̧ri̧ ma̧na̧diibëda’ quëna̧ jo̧rȩtapea̧ oa ⁠—⁠yo̧a̧diro̧jo̧ȩ.

39Jabo Jechu judi ja̧di ta̧rëri̧ dëbë yo̧rëremȩdejȩrȩ:

⁠—⁠Cjäri̧ manȩrȩ, pio yaba̧ domȩ oa cjo̧ro̧ji̧ri̧ pumȩ pio judiro̧ chjai̧dë tjamo̧nȩrȩ. Jabechji̧ Ütë tjamo̧ pio ju̧i̧ putu jura̧ a̧dë chami̧ dari̧ a̧dë jo̧rȩtarenȩro̧jo̧ȩ. Ado pio ju̧i̧iä na̧rȩrea̧ pio ju̧i̧mo̧ jo̧rȩtanȩrȩ. Aja̧, jauëchja cjiari̧ na̧rȩrea̧ datämi̧ cjianȩrȩ, jabo cjäri̧ marequededibe, eami̧ na̧rȩrea̧ oa na̧rȩdëparequededibe. Jabo dëdë, pio yoamo̧i̧ na̧rȩrea̧ oa yürüparequededibe Jona̧ quȩmȩrea̧ pio ju̧i̧ chjiari, Ütërë ea jana̧ chjadüa̧ oa ni̧bärëremȩ pio ju̧i̧ chjiari. 40Danȩrȩ, Jona̧ quȩmȩrea̧ pio judi cho̧ ana̧ pio ju̧i̧ ja̧ acärä tjarari̧ do nö̧ta cjiarërea̧mi̧ cjiaparequede Pumȩrȩ Ara̧ Tjamo̧mȩ pio judi peaja̧di. Tjamo̧ davä. Jona̧ judi cho̧ ana̧ acärä tjarari̧ do nö̧ta tutia̧ oa cjiami̧ dari̧ cjiarërea̧mi̧ peaja̧dimi̧ dari̧ tutia̧ cjiami̧ dari̧ cjiaparequede dabu ëterä, ta̧dë cjararä ju̧ri̧. Pio jiro na̧rȩrea̧ maea oa yürüparequededibe. 41Jabo danȩrȩ, pio yoa ma̧ȩbo a̧de yo̧requededibe ⁠—⁠yo̧a̧dejȩrȩ⁠—⁠. Jabechji̧ ütarapea̧ doro, Niniveräpȩ cjo̧ro̧rëreji̧ri̧ pio judiro̧borë cjitëpadirȩ pio dibëiäpȩmo̧ aechide yo̧pea̧ oa. Tjamo̧ davä, Ütë tjamo̧ judi pumȩ ütëbodärä oa ütarapea̧ domȩ ju̧i̧iä, pio judiro̧borë cjitëpadirȩ pio dibëiäpȩmo̧ aechide yo̧pea̧ oa. Jabechji̧ judiro̧ Jona̧ quȩmȩrea̧ pio judi Ütë tjamo̧ ja̧ ma̧ȩ oa a̧ra̧ano̧a̧ oaiä, chjaodëri̧ ano̧ mire jo̧rȩtaji̧ri̧pea̧dirȩ. Jabo mȩnȩro̧ Jona̧ quȩmȩrea̧ pio ju̧i̧ u̧i̧ ba chiamȩ pio ju̧i̧ irä daji̧ri̧borë, mȩnȩro̧ pio ju̧i̧ u̧i̧ ba chiamȩ pio ju̧i̧ irä ta̧rëji̧ri̧borë, jabechji̧ ano̧ mire jo̧rȩtadë manȩrȩ pio coa chjiari. 42Ado pio ju̧i̧iä jabechji̧, ado cja̧rȩmo̧rȩ peaja̧di aechide yo̧pani̧dibe pio jiro doro. Tjamo̧ davä. Ütë tjamo̧ pio judi pumȩ ütëbodärä oa ütarapea̧ domȩ ju̧i̧iä, jabechji̧ Cheba quȩmȩräpȩ cjo̧ro̧rëreji̧ri̧ pio ji̧ri̧ ja̧ ütërëreyi̧ pio jini̧borë cjitëpanȩ. Pio jini̧borë cjitëpanȩ pio yaba̧ domȩ oa cjo̧ro̧ji̧ri̧ pio dibëiäpȩmo̧ aechide yo̧pea̧ oa. Jabechji̧ ni̧bäpanȩ mȩnȩro̧ chjuari̧ jiada̧ pio ju̧i̧ chjiari. Danȩrȩ, pio jiro iei̧ jini̧ jachi tjamo̧räpȩ cjo̧ro̧rëreyi̧borë, jabechji̧ goë dae järëreyi̧venȩjȩ Icharaita ja̧ ütë pio ju̧i̧, Charomo̧ quȩmȩ pio ju̧i̧. Pio ju̧i̧iä chjadëri̧ ta̧rëpea̧ oa, pio ju̧i̧iä urëdi oa jo̧rȩtarea̧ oa ta̧rëpea̧ oa, go̧düdärärëreyi̧venȩ jachi tjamo̧ri pio judiri. Jabo cjäri̧ manȩro̧coe ⁠—⁠yo̧a̧dejȩrȩ⁠—⁠. Charomo̧ pio ju̧i̧ u̧i̧ ba chiamȩ pio ju̧i̧ irä ta̧rëji̧ri̧borë, Charomo̧ judi dabarërea̧ pio ju̧i̧iä ji̧dë u̧i̧ dabamȩ pio ju̧i̧ irä ta̧rëji̧ri̧borë jiada marenȩro̧coe. Pio ju̧i̧iä cjitëpanȩ pio jiro ütërëreyi̧ pio jini̧ pio dibë aechide yo̧pea̧ oa ütarapea̧ domȩ ju̧i̧iä ⁠—⁠yo̧mȩrȩ ni̧bä chjaorëremȩdejȩrȩ pjaricheo pio ji̧ri̧iäpȩmo̧ Jechu judi.

Yaröca judiro̧ ado chjereno̧ ira̧diä cjaeäpai̧ dadiro̧jȩrȩ pumȩ pio ji̧ri̧ ja̧ icjara oa

Uruca 11:24-26

43Ado Jechu judi cjiadiädëmȩrȩ na̧rȩrea̧ ma̧ȩmi̧ dara̧ ni̧bämȩrȩ a̧de ni̧bä chjaorëremȩdejȩrȩ pumȩ pio ji̧ri̧iäpȩmo̧, judiro̧ ji̧dë ma jiade chjaoa̧ pio ju̧i̧ chjiari. Aja̧, ja̧di ta̧rëri̧ yo̧a̧dejȩrȩ:

⁠—⁠Danȩrȩ, yaröca üdë pumȩ ja̧ icjararä ira̧diä cjaeäremȩ pio judi chjätäti̧ cjiami̧ dari̧ jä chjaode oëra̧ti̧ oa, ui decjiaräpȩ, dabu nȩgȩ maearäpȩ ⁠—⁠yo̧a̧dejȩrȩ⁠—⁠. Jabechji̧ järätä chjapami̧ dari̧ cjo̧ro̧pea̧ oa, na̧e tai̧mȩmi̧ dari̧ jä chjaode oëra̧ti̧ oa ira̧diä cjaeäpea̧ oa, ano̧ mire bëpami̧ dari̧ ira̧diä cjaeäpea̧ oa. Jabo ano̧ mire bëparea̧räpȩ dadärädë madejȩ. 44Ado pio ju̧i̧iä ja̧di dari̧ jo̧rȩtade: ‘Jabo cjäri̧ maquëda, ano̧ mire bëparea̧ dadëquëda, ado pio ju̧i̧iä cüdë ira̧diä cjaeärërea̧räpȩ ju̧ri̧ ado carupë baätäremȩquëda’ quëna̧ jo̧rȩtamȩrȩ cuchupë baäde, jënȩ cjo̧ro̧rërea̧ icjararäpȩmo̧, jënȩ bëparërea̧räpȩmo̧. Ado ju̧ri̧pȩ go̧düdäräa̧rä, jabechji̧ bë cjara mami̧ da oa dadärädejȩ, ado cja̧rȩmo̧rȩ ano̧ mire bëpadëa̧ oaiä. Jabechji̧ bë üdë chjadëri̧ jida̧ oa cjiamȩmi̧ da oa, chjadëri̧ cha̧oë ana̧ oa cjiamȩmi̧ da oa dadärädejȩ. 45Jabo judi pumȩ ja̧ icjara oa yu̧a̧bea yaboi̧, jabechji̧ jäeno̧dejȩrȩ jibëa̧ jadü pio ji̧ri̧iäpȩ, pio ji̧ri̧iäpȩmo̧ yabëpea̧ oa. Jabechji̧ pio jȩaiä ji̧dë u̧i̧ chjai̧dë tjamo̧ pio ji̧ri̧ yabëdejȩrȩ ado cja̧rȩmo̧ yaröca 7 oa. Ado ja̧dëa ji̧ ëba baädejȩrȩ jënȩ cjo̧ro̧rërea̧ icjararäpȩmo̧ pio ji̧ri̧ nö̧ta bëpapea̧ oa. Ado pio jiro pumȩ judi, cjäri̧ made, jënȩ pearä cjo̧ro̧rërea̧mi̧ cjo̧ro̧dëpade. Jabechji̧ ji̧dë u̧i̧ chjadëdëri̧ cjo̧ro̧pade. Ado peaja̧dimi̧ dari̧ cjo̧ro̧panȩrȩ pio yaba̧mȩ yoaiä cjo̧ro̧ji̧ri̧ pio judiro̧. Jabechji̧ mȩnȩro̧ pio coa ji̧dë ma jiada̧ oaiä, cüdë a̧ra̧ano̧a̧ pio ju̧i̧ ji̧dë ma jiade ta̧rëa̧ oaiä, jabechji̧ ji̧dë u̧i̧ chjai̧dëri̧ ano̧ mire cjo̧ro̧panȩrȩ, mȩnȩro̧ pearä cjo̧ro̧rërea̧mi̧dëri̧ ⁠—⁠yo̧mȩrȩ ni̧bä chjaorëremȩdejȩrȩ judio ütëti̧ pio ji̧ri̧iäpȩmo̧ Jechu judi.

Jechu judi ni̧bärëremȩde pio jȩadi ja̧ji̧ri̧ tjamo̧ pio ji̧ri̧ chjiari

Marco 3:31-35; Uruca 8:19-21

46Ado Jechu judi pjaricheo pio ji̧ri̧iäpȩmo̧ jabë ni̧bä chjaoa̧rä, chjaodëri̧ go̧düna̧ra̧rëreyi̧nȩ pio jȩa arayi̧ pio jini̧, jȩadi ja̧ji̧ri̧ pio judiro̧borë. Jabechji̧ pio ju̧i̧ nö̧ta ni̧bä chjaotämi̧ cjiaji̧ri̧rȩ go̧düna̧ra̧rëreji̧ri̧dirȩ. 47Ado peaja̧di ta̧rëri̧ yo̧rëremȩdejȩ Jechu ju̧i̧ cja̧rȩmȩ pumȩrȩ, ja̧di ta̧rëri̧ yo̧mȩrȩ:

⁠—⁠Danȩ, mȩa arayi̧ pio jini̧, ado mȩadi ja̧ji̧ri̧ pio judiro̧ dairäpȩdirȩ. Ni̧bä chjaotämi̧ cjiadiro̧mȩ ⁠—⁠yo̧a̧dejȩ.

48Jabo Jechu judi pio jȩa ni̧bämȩ pio ju̧i̧ dëbë yo̧mȩrȩ ja̧di ta̧rëri̧ yo̧a̧dejȩ:

⁠—⁠Danȩ, ¿chjia tjamo̧nȩ ca̧ ai̧ jini̧? Ado ¿chjia tjamo̧dirȩ pio coadi ja̧ji̧ri̧ judiro̧? ⁠—⁠yo̧a̧dejȩrȩ.

49Ado Jechu judi jibëa̧ jadü pio ji̧ri̧iäpȩmo̧ goë mitëmȩrȩ a̧de yo̧rëremȩdejȩ:

⁠—⁠Danȩ, pio yidirȩ ca̧ pumȩ judiro̧ ⁠—⁠yo̧a̧dejȩ⁠—⁠. Pio yinȩ ca̧ ai̧ jini̧. Pio yidirȩ ca̧ oti̧ judiro̧. 50Jabechji̧ eami̧ üdë ca̧ Ama̧i̧ ja̧ ma̧ȩrä cjo̧ro̧mȩ pio judi, eami̧ üdë a̧dëräpȩ cjiamȩ Ama̧i̧ pio ju̧i̧ ja̧ ma̧ȩrä cjo̧ro̧mȩ pio judi, jabechji̧ ca̧ pumȩ tjamo̧dirȩ. Pio judiro̧ tjamo̧dirȩ pio coadi ja̧ji̧ri̧ judiro̧. Pio jini̧ro̧ tjamo̧ni̧rȩ ca̧ ayi̧ca̧i̧ jini̧ro̧. Pio jini̧ro̧ tjamo̧ni̧rȩ ca̧ ai̧ jini̧ro̧ ⁠—⁠yo̧mȩrȩ dëbë yo̧rëremȩdejȩ pio jȩa yo̧a̧mȩ pio ju̧i̧. Ado judiri cjiadiärëremȩde Jechu judi.

Currently Selected:

Mateo 12: Pume

Highlight

Copy