Mateo 14
14
Juan pio judi, uirä chudamȩ pio judi ja̧bo tänȩa̧ oa cjiarëremȩde
Marco 6:14-29; Uruca 9:7-9
1Ado Jechu pio ju̧i̧ chjiari ma̧ȩ üdë chjaodëri̧ baärëremȩde davä oëra̧ti̧ oa, pumȩ judiro̧ ütëborë ta̧rërea̧mi̧ dari̧. Ado Erode quȩmȩ judi, chiri ütë cjo̧ro̧mȩ pio judiborë goë ta̧rërëremȩde Jechu pio ju̧i̧ chjiari, judi jauëchja cjiari̧ japea̧ pio ju̧i̧ chjiari. 2Ado yo̧rëremȩdejȩrȩ jibëa̧ mu̧i̧tjoi̧ ji̧ri̧:
—Danȩrȩ, pio jiro Jechubea pio judi Juan quȩmȩrea̧ pio judi tjamo̧ jirode —yo̧a̧dejȩrȩ—. Jabechji̧ Juanrea̧ pio judi, ja̧borëremȩ pio judi, dabadëde, jabo bëdüa̧ oa cjia jirode. Pio judi jirode. Uirä go̧e cjaeä chudarëremȩ pio judi jirode Jechubea pio judi. Ado ja̧boa̧remȩrȩ bëdüa̧ pio ju̧i̧iä, jabechji̧ dami̧ti̧ jauëchjarea̧ oa japarea̧ da jirode. Jabechji̧ Juan pio judi jirode —yo̧mȩrȩ yo̧rëremȩdejȩrȩ jibëa̧ mu̧i̧tjoi̧ ji̧ri̧.
3-4Aja̧, ja̧di ta̧rëri̧ yo̧mȩrȩ yo̧rëremȩde Erode quȩmȩ ütë pio judi Juanrea̧ pio ju̧i̧ chjiari. Jabo mȩnȩro̧ dabadëchea oa, jabechji̧ go̧ȩparequededibe Juanrea̧ pio judi ja̧boa̧ pio ju̧i̧ chjiari. Danȩrȩ, ja̧di dari̧ ja̧borëremȩde. Erode pio judi baë ëbarëremȩdejȩ ju̧i̧di ja̧mȩ pio ju̧i̧ ja̧ iei̧ pio ji̧, Erodia quȩyi̧ ji̧. Aja̧, Felipe quȩmȩ pio ju̧i̧ ja̧ iei̧reyi̧ pio ji̧ baë ëba̧dejȩ. Ado pio ju̧i̧iä Juan judi cuchu chiadëri̧ chi̧dëearëremȩdejȩ judi Moicherë go̧ȩparërea̧ ma̧ȩ pio ju̧i̧ jiada̧ pio ju̧i̧ chjiari. Ado ja̧di dari̧ chi̧dëea̧ üdë goae tjamo̧dërëremȩdejȩ ütë pio ju̧i̧iä. Ado pio ju̧i̧iä jënȩ baë ëba pio jini̧ yo̧a̧ oaiä, Erodia quȩyi̧ pio jini̧ chi̧dëea̧ oaiä, jabechji̧ mitëtä yo̧ chjadürëremȩdejȩrȩ jibëa̧ guadia ji̧ri̧. Aja̧, Juan pio ju̧i̧ mitë ëte, yura ëte, jabechji̧ chaärea̧ bëräpȩ tutia̧ oa cjo̧ro̧ tänȩrëreji̧ri̧diro̧jo̧ȩ. 5Ado ütë judi Juan pio ju̧i̧ tjamo̧ri̧ ja̧bo tänȩtämi̧ cjiaräbo, jabechji̧ eami̧ oa japarea̧ dadëa̧dejȩ. Jabechji̧ pumȩ judiro̧ no̧i̧dërë Juan pio ju̧i̧ ba chia jo̧rȩta̧ oaiä, ‘Ütërë ea jana̧ chjadüa̧ oa ni̧bämȩ pio judidida’ quëna̧ jo̧rȩta̧ oaiä, jabechji̧ uaparëremȩde eami̧ oa japapea̧ ji̧. ‘Jabechji̧ cüdë Juan pio ju̧i̧ ja̧bo tänȩrä judi, pumȩ judiro̧ goëdëri̧ cjia tjamo̧pe bagapai̧ dadiro̧coada’ quëna̧ jo̧rȩta̧ oaiä, cjiadiärëremȩde ütë judi, ja̧bo tänȩtärea̧ ji̧.
6Jabo ja̧dëa ji̧ Erode pio judi ararërea̧ do üdë ma̧na̧na̧ra̧rä, no̧i̧dërë a̧doparëreji̧ri̧dirȩ pio ju̧i̧ ja̧ bëräpȩ airi̧ cjia airi̧ cjia a̧dopapea̧ oa, ëba jurapea̧ oa. Ado ütëbodärärë a̧dopea̧ oa cjiarä, Erodia quȩyi̧ pio ji̧ ja̧ jojabi pio jini̧ goae tarari̧ bochegua bochegua cjiarëreyi̧nȩ pumȩ ütëbo ja̧ dachoro. Ado Erode quȩmȩ ütë pio judi goae tjamo̧ri̧ darëremȩdejȩ bochegua bochegua cjiayi̧ pio ji̧. 7Ado pio ju̧i̧iä yo̧rëremȩdejȩ:
—Damȩ, pio mȩa daea̧ oaiä, ma̧ chiadëri̧ cjia tjamo̧ji̧ri̧rȩ daa̧ro̧ma̧ —yo̧a̧dejȩ—. Ja̧di tara yo̧cama̧, mȩnȩ eami̧ oa earä judi, jabechji̧ cjo̧dëcoa. Chjadëri̧ yo̧coa. Jabechji̧ mȩnȩ coa cjo̧dëa̧mi̧ tjamo̧ri̧ yürüpacama̧, ano̧ mire jo̧rȩtarea̧ decjiari̧. Jabechji̧ quȩ ba chiara̧ a̧de yo̧mȩrȩ yo̧ë cji̧däcama̧ —yo̧mȩrȩ yo̧rëremȩdejȩ bochegua bochegua cjiayi̧ ji̧.
8Jabo pio jini̧ chjaodëri̧ dëbë yo̧tärea̧ ji̧, jibëa̧ ma̧na̧ri̧ jo̧rȩtayi̧rȩ dëbë yo̧tärea̧ ji̧, jäeno̧a̧nȩ jȩa arayi̧ pio ji̧iäpȩ pio ji̧iä ta̧rëpea̧ oa. Ado pio ji̧iä ta̧rë ëte, ado chjereno̧ jäeno̧a̧nȩ ütë pio ju̧i̧iäpȩ. Ado ja̧di ta̧rëri̧ yo̧yi̧rȩ dëbë yo̧rëreyi̧nȩjȩ:
—Danȩ ütë, yürücoe Juan pio ju̧i̧ ja̧ tjübë oa, uirä chudamȩ pio ju̧i̧ ja̧ tjübë oa. Jëdërea̧ ana̧rä ara jana̧coe. Pio ju̧i̧ earequede —dëbë yo̧yi̧rȩ yo̧a̧nȩjȩ.
9Ado ütë judi pio jiro ma̧ȩ oa ta̧rëa̧ oaiä, gito ana̧ri̧ jo̧rȩtamȩpea̧de. Jabo jënȩ ma̧ȩ chjádë yürürea̧mi̧dë ma̧ȩra̧ yo̧a̧ oaiä, quȩ ba chiara̧ a̧de yo̧mȩrȩ yo̧ë cji̧däa̧ oaiä, jabechji̧ ano̧ mire jo̧rȩtarea̧ dadëa̧de. Ado pio ju̧i̧ uëri pio jȩa nö̧ta a̧dopaji̧ri̧ pio ji̧ri̧ ja̧ ta̧ra̧ puërä yo̧a̧ oaiä, jabechji̧ jiadarea̧ dadëa̧de. Ado pio ju̧i̧iä yo̧a̧dejȩ guadia oa Juan pio ju̧i̧ ja̧ tjübë oa ara jana̧tä. 10Ado pio ju̧i̧iä jäa̧de guadia judi chaärea̧ bëräpȩ. Ado pio ju̧i̧ ja̧ tjübë oa tuti gu̧na̧dejȩ. 11Ado ja̧dëa ji̧ jëdërea̧ ana̧rä ara jana̧dejȩ iei̧ pëi̧ chja pio ji̧iäpȩmo̧. Ado jini̧ yüreno̧a̧nȩjȩ jibëa̧ ai̧ pio ji̧iäpȩmo̧. Ado Erodia pio jini̧ ja̧di dari̧ japea̧ oaiä, jabechji̧ Juan pio ju̧i̧ ja̧bo tänȩrea̧ daea̧nȩjȩ. 12Ado Juanrea̧ pio ju̧i̧ ja̧ jadü judiro̧ pio ju̧i̧ chjiari goë ta̧rëa̧ oaiä, jäeno̧a̧dirȩ pio ju̧i̧ ja̧ icjararemȩ pio ju̧i̧ mitëpea̧ oa, chjadëri̧ na̧ra̧pea̧ oa. Ado ja̧dëa̧ ji̧ yo̧epea̧diro̧jo̧ȩ Jechu pio ju̧i̧.
Aja̧, ja̧di dari̧ go̧ȩparequededibe mȩnȩro̧ Juan pio ju̧i̧ chjiari dabadëchea oa, ‘ja̧di dari̧ ja̧boa̧dida’ quëna̧ dabapea̧ oa.
Jechu judi jibëa̧ jauëchjara̧ ëba jurarëremȩdejȩrȩ pumȩ buba oa
Marco 6:30-44; Uruca 9:10-17; Juan 6:1-14
13Ado Jechu judi Juan pio ju̧i̧ ichjiari goë ta̧rëa̧ oaiä, pumȩ decjiaräpȩ jätämi̧ cjiamȩrȩ buarëremȩde chara oa. Jabo pumȩ judiro̧ pio ju̧i̧ chjiari ta̧rëa̧ oaiä, “ja̧dira̧ jäa̧de” yo̧a̧ oa ta̧rëa̧ oaiä, jabechji̧ bë ma̧ri̧räpȩ cjo̧ro̧ji̧ri̧ pio judiro̧ chjaodëri̧ cho̧rë järëreji̧ri̧diro̧jo̧ȩ tara̧. 14Ado Jechu judi charara̧ tja yuroro go̧düdäräa̧rä, pumȩ buba tjamo̧ oa darëremȩdejȩrȩ. Ado pio ji̧ri̧iäpȩmo̧ cjäri̧ri̧ cjia damȩrȩ chjaparȩrëremȩdejȩrȩ gito ja̧boji̧ri̧ pio ji̧ri̧. 15Ado gȩnȩpea̧rä, Jechu ja̧ jadü judiro̧ pio ju̧i̧iäpȩ go̧düdäräa̧diro̧jo̧ȩ. Ado yo̧a̧diro̧jo̧ȩ:
—Chia chia, bë ma̧ri̧ decjiaräpȩ cjiarea̧rȩ. Ado do üdë bira̧diibe. Jabërä chjadütäremȩrenȩjȩrȩ pumȩ ji̧ri̧, judiro̧ bë ma̧ri̧räpȩ jäpea̧ oa, jibëa̧ jurarea̧ pio ju̧i̧ gatëpea̧ oa —yo̧tea̧diro̧jo̧ȩ.
16Jabo Jechu judi dëbë yo̧rëremȩdejȩrȩ:
—‘Jabechji̧ pumȩ judiro̧ baäpea̧ chiadiro̧da’ quëna̧dërequedejȩrȩ. Jabechji̧ pio mȩnȩro̧ jurarea̧ oa yürüchji̧jȩrȩ —yo̧a̧dejȩrȩ.
17—Jabo cjäri̧ marea̧rȩ —dëbë yo̧a̧diro̧jo̧ȩ—. Goadë marea̧rȩ. Cja̧rȩichimo̧ ma goarea̧rȩ chja̧pe oa. Ado ju̧i̧ uëri yo̧a̧ri̧ cho̧ maea oa goarea̧rȩ. Jurarea̧ decjiade —yo̧a̧diro̧jo̧ȩ.
18Jabo Jechu judi dëbë yo̧a̧dejȩrȩ:
—Jabechji̧ goa jana̧chji̧coe jurarea̧ oa.
19Ado ja̧di ta̧rëri̧ yo̧ ëte, Jechu pio judi cärärä cha tänȩrëremȩdejȩrȩ pumȩ buba oa. Ado cja̧rȩichimo̧ chja̧pe oa mitëmȩrȩ, cho̧ yo̧a̧ri̧ oa mitëmȩrȩ, a̧dëräpȩmo̧ gatë damȩrȩ ni̧bärëremȩdejȩ jibëa̧ Ama̧i̧ ju̧i̧. Chjacjiamȩri̧ jo̧rȩtamȩrȩ ni̧bäa̧dejȩ Ütë tjamo̧ ju̧i̧, 'chjadëri̧ yürüa̧diibëda' quëna̧ jo̧rȩtamȩrȩ. Ado ja̧di dari̧ japa ëte, chja̧pe oa mu̧i̧ quirëno̧ ëte, jabechji̧ chjarapë yürürëremȩdejȩrȩ jibëa̧ jadü pio ji̧ri̧iäpȩmo̧, pio judiro̧ ano̧ mire chjarapë yürüpea̧ oa pumȩ pio ji̧ri̧iäpȩmo̧. 20Ado ütëbodärärë mairi̧ jura marëreji̧ri̧dirȩ cja̧rȩmȩrȩ cjiadiädëri̧. Ado ja̧dëa ji̧ ütëborë mairi̧ jura̧ duri oa, Jechu ja̧ jadü judiro̧ boarëreji̧ri̧diro̧jo̧ȩ cjiadiäa̧mȩ jurarea̧ pio ju̧i̧. Cho̧ pënȩ oa, chja̧pe pënȩi̧ oa boarëreji̧ri̧dirȩ 12 taio tjuri cjiari̧. 21Ado chja̧pe oa jurareji̧ri̧ oari judiro̧ ji̧ra̧ tjamo̧rëreji̧ri̧dirȩ. Jabechji̧ 5000 pumȩrëreji̧ri̧dirȩ. Ado ji̧ri̧ uëri peaja̧di jurarëreji̧ri̧ni̧rȩ ivi jini̧ro̧, jibëa̧ bori̧borë. A̧dë chjäte ji̧ra̧ tjamo̧ji̧ri̧rȩ mairi̧ jurarëreji̧ri̧dirȩ.
Ui uëmo̧ tai̧rëremȩde Jechu judi chami̧rea̧mi̧dëri̧
Marco 6:45-52; Juan 6:16-21
22Ja̧dëa ji̧ Jechu judi chararä bua tänȩrëremȩdejȩrȩ jibëa̧ jadü ji̧ri̧, pio ju̧i̧ ja̧ yabo tja oëräpȩ baäpea̧ oa. Ado judiro̧ baäa̧ duri oa, Jechu judi baä tänȩrëremȩdejȩrȩ pumȩ buba oa. 23Ado pumȩ pio ji̧ri̧ baä tänȩa̧ duri oa, Jechu judi ya̧mi̧ uëräpȩ ju̧ri̧ buarëremȩde jibëa̧ma̧i̧ cjiapea̧ oa, jibëa̧ Ama̧i̧ pio ju̧i̧ nö̧ta ni̧bä chjaopea̧ oa. Ado gȩnȩpea̧dejȩ jibëa̧ Ama̧i̧ pio ju̧i̧ ni̧bämȩ oa. 24Jabo Jechu judi jibëa̧ Ama̧i̧ pio ju̧i̧ ni̧bäa̧ nö̧ta, charara̧ tai̧ji̧ri̧ pio judiro̧ jachi tjamo̧padäräa̧dirȩ tja tjoräpȩ ju̧ri̧, tja yuro queri̧dëräpȩ ju̧ri̧. Ado ma̧i̧ da gö̧ma̧ üdë aechja̧de aechja̧de cjiamȩpea̧dejȩrȩ uapai̧ da tjamo̧ri̧. Ado ju̧i̧ uëri pjaepa dëbë jätarëreji̧ri̧dirȩ. Ado chararä tai̧ji̧ri̧ pio ji̧ri̧ chjaodëri̧ gȩnȩparëremȩdejȩrȩ tja tjoräpȩji̧ri̧ oa. Jabechji̧ Jechu judi jabë ya̧mi̧räpȩrä gȩnȩpea̧dejȩrȩ. 25Ado ja̧dëa ji̧ japamitë chjätä ëte jabë gȩnȩrä, dopapea̧ jabë querediädërä, Jechu pio judi järëremȩdejȩrȩ jibëa̧ jadü pio ji̧ri̧iäpȩ. Jabechji̧ ui uëmo̧ tai̧mȩrȩ järëremȩdejȩrȩ. 26Jabo Jechu ja̧ jadü judiro̧ ui uëmo̧i̧ tai̧mȩ pio ju̧i̧ daea̧ oaiä, ‘Tjana̧cjiavadi, tjo maearë tai̧mȩ jirodida’ quëna̧ jo̧rȩtaji̧ri̧rȩ uape uape darëreji̧ri̧diro̧jo̧ȩ, a a ma jäji̧ri̧rȩ. 27Jabo Jechu judi chjaodëri̧ yo̧a̧dejȩrȩ jachiri:
—Bücjüri̧ cjiadëchji̧vä —yo̧a̧dejȩrȩ—. Pio cüdërequede. Jabechji̧ uapadëchji̧vä —yo̧a̧dejȩrȩ.
28Ado Pedro judi ‘Ano̧mȩ pio judidida’ quëna̧ jo̧rȩta̧ oaiä, jabechji̧ chjaodëri̧ dëbë yo̧a̧dejȩ:
—Danȩ Ano̧mȩ, pio mȩnȩ tjamo̧rä judi, jabechji̧ pio mȩaiäpȩmo̧ tai̧rea̧ yürücoe ui uëmo̧i̧ —yo̧a̧dejȩ.
29Ado Jechu judi chjaodëri̧ dëbë yo̧a̧dejȩ:
—Goë jaevä. Jana̧coe ado ja̧di —yo̧a̧dejȩ.
Ado Pedro judi Jechu ja̧ ma̧ȩ oa ta̧rëa̧ oaiä, chjaodëri̧ go̧deno̧a̧de charari pio judiri. Ado taruparëremȩde tai̧pea̧ ji̧ ui uëmo̧i̧ Jechu pio ju̧i̧iäpȩmo̧. 30Jabo ma̧i̧ dari̧ gö̧ma̧mȩ oa daea̧ oaiä, jabechji̧ uaparea̧ üdë chjaodëri̧ boa̧dejȩ jibëa̧ chji̧ oa. Ado chjaodëri̧ tarupea̧de chami̧pea̧ ji̧. Ado Jechu pio ju̧i̧ goae tarari̧ ëna̧diämȩrȩ ëna̧diäa̧dejȩ:
—Danȩ Ano̧mȩ, chjätärea̧ yürücoe —ëna̧diäa̧dejȩ.
31Ado Jechu judi chjaodëri̧ mu̧i̧ gatëa̧dejȩ jibëa̧ ichiri judiri, judi chami̧chea oa. Ado yo̧a̧dejȩ:
—Chia chia Pedro, jabëtari̧mi̧ maea oa quëna̧renȩquȩ —yo̧a̧dejȩ—. ¿Tjana̧ japea̧ ju̧i̧iä chjuari̧ quëna̧dëa̧renȩque? ¿Tjana̧ japea̧ ju̧i̧iä na̧e chia cjiari̧ jo̧rȩtadërenȩque? ¿Tjana̧ japea̧ ju̧i̧iä chji̧ chjara chiami̧ dari̧ jo̧rȩtarenȩque? —yo̧mȩrȩ iëno̧ iëno̧ë cjiarëremȩdejȩ.
32Ado judiro̧ chararä bua̧rä, chjaodëri̧ goepa mapea̧de. 33Ado chararäji̧ri̧ judiro̧ chjacjiamȩri̧ jo̧rȩtarëreji̧ri̧diro̧jo̧ȩ Jechu ju̧i̧. Ado yo̧a̧diro̧jo̧ȩ:
—Ütë tjamo̧ pio ju̧i̧ ja̧ Joja tjamo̧renȩ.
Aja̧, ja̧di ta̧rëri̧ yo̧ji̧ri̧rȩ yo̧rëreji̧ri̧diro̧jo̧ȩ Jechu pio ju̧i̧, ui uëmo̧i̧ tai̧mȩ pio ju̧i̧iäpȩmo̧.
Ado Jechu judi chjaparȩrëremȩdejȩrȩ Genechare quȩmȩ chiriräpȩji̧ri̧ pio ji̧ri̧
Marco 6:53-55
34Ado Jechu judi, jibëa̧ jadü pio judiro̧borë tja oëräpȩ chjätäa̧rä, go̧düdärärëreji̧ri̧dirȩ Genechare quȩmȩ chiriräpȩ. 35Ado ju̧ri̧pȩ cjo̧ro̧ji̧ri̧ judiro̧ Jechu pio ju̧i̧ chjiari ta̧rëa̧rä, 'Aja̧, Jechu pio judi jana̧diibëda’ quëna̧ jo̧rȩtaji̧ri̧pea̧rä, jabechji̧ jëreeaji̧ri̧rȩ jä cjieno̧rëreji̧ri̧dirȩ oëra̧ti̧ oa ma̧ȩ yürüpea̧ oa, pumȩ judiro̧ gito ja̧boji̧ri̧ pio ji̧ri̧ ara jana̧pea̧ oa Jechu pio ju̧i̧iäpȩ. Ado judiro̧ ara jana̧ ütëbo oa chjaparȩrëremȩdejȩrȩ Jechu judi. 36Ado cjo̧dë chjaorëreji̧ri̧diro̧jo̧ȩ Jechu pio ju̧i̧iä, jibëa̧ chjibo chiri yuroi̧ ma mitëpea̧ ji̧. Jabechji̧ pio ju̧i̧ ja̧ i oa ga̧re taratärea̧ ji̧, jabechji̧ jibëa̧ chjibo chiri yuroi̧ maea oa ga̧re taratä eaji̧ri̧rȩ cjo̧dëtarëreji̧ri̧diro̧jo̧ȩ. Ado ju̧i̧ ja̧ chjibo oa ga̧re taraji̧ri̧ pio judiro̧ ütëborë chjaodëri̧ chjapea̧ oa cjiadiä marëreji̧ri̧dirȩ.
Currently Selected:
Mateo 14: Pume
Highlight
Share
Copy
Want to have your highlights saved across all your devices? Sign up or sign in
©2021 Global Partners, All Rights Reserved
