Mateo 11
11
1Ado Jechu judi jibëa̧ jadü pio ji̧ri̧, 12 oa ütarë ni̧bä chjaodäräa̧ duri oa, judiro̧ chjadëri̧ ja̧bepapea̧ oa ni̧bä chjaodäräa̧ duri oa, jabechji̧ bë ma̧ri̧ nö̧tai̧ oa a̧ra̧ano̧riä tai̧ chjaorëremȩde oëra̧ti̧ oa. Aja̧, Ütë tjamo̧ ja̧ ma̧ȩ pio ju̧i̧ to̧bari̧ ni̧bä chjaopea̧ oa, a̧ra̧ano̧riä tai̧rëremȩde pio jiro chirirä.
Jechu judi ni̧bärëremȩdejȩrȩ Juan pio judi chjadüa̧ pio ji̧ri̧
Uruca 7:18-23
2Ado Juan pio judi, uirä chudamȩ pio judi chaärea̧ bëräpȩ tutia̧ oa cjiarëremȩde. Jabo judi Quiricho pio ju̧i̧ chjiari goë ta̧rëa̧ oaiä, ‘Aja̧, ja̧di dari̧ japadida, gito ja̧boji̧ri̧ pio ji̧ri̧ chjaparȩdiji̧ri̧da, ado yaröca chiaji̧ri̧ pio ji̧ri̧ peaja̧di chjaparȩdiji̧ri̧da’ quëna̧ ta̧rëa̧ oaiä, jabechji̧ chaärea̧ bë tjori pio judiri goëde jätä yo̧mȩrȩ ma̧ȩ chjadürëremȩdejȩrȩ jibëa̧ jadü pio ji̧ri̧, chaäa̧ oa cjiadëji̧ri̧ pio ji̧ri̧. Jabechji̧ Jechu pio ju̧i̧iä chjadëri̧ ta̧rëpea̧ oa goëde jätä yo̧ chjadürëremȩdejȩrȩ. 3Ado judiro̧ Jechu pio ju̧i̧iäpȩ go̧düna̧ra̧rä, ja̧di ta̧rëri̧ iëno̧ë ta̧rëa̧diro̧jo̧ȩ:
—Danȩ, Juan pio judi a̧ra̧ano̧a̧diibe cja̧rȩmȩrȩ ma̧na̧pea̧ pio ju̧i̧ chjiari —yo̧a̧diro̧jo̧ȩ—. Ado danȩ, ¿pio judidënȩ? ¿A̧ro̧rȩ no̧mȩ tjamo̧ri ja̧ jidatarërea̧ Chjätä Tänȩmȩ pio judidënȩ, jabo ado cja̧rȩmo̧ oa jidatapea̧? Chjadëri̧ yo̧ibe —yo̧a̧diro̧jo̧ȩ Jechu ju̧i̧.
4Ado Jechu judi dëbë yo̧mȩrȩ yo̧rëremȩdejȩrȩ:
—Danȩrȩ, ado chjereno̧ carupë baäeno̧chji̧vä Juan pio ju̧i̧iäpȩmo̧ chjadëri̧ ta̧rë tänȩpea̧ oa. Jabechji̧ mȩnȩro̧ pio coaiä ta̧rëa̧ pio ju̧i̧ chjiari, mȩnȩro̧ irä daea̧ pio ju̧i̧ chjiari chjadëri̧ ni̧bä chjaopea̧ oa cuchupë baächji̧vä —yo̧a̧dejȩrȩ—. 5Danȩrȩ, dacho cotorëreji̧ri̧ pio judiro̧ chjadëri̧ daji̧ri̧pea̧dirȩ. Ado ma̧i̧ da co chiarëreji̧ri̧ pio judiro̧ chjaparȩa̧ oa cjiaji̧ri̧pea̧dirȩ. Ado tai̧rea̧ chiadërëreji̧ri̧ pio judiro̧ chjadëri̧ tai̧rea̧ daji̧ri̧pea̧dirȩ. Ado ta̧ra̧ cotorëreji̧ri̧ pio judiro̧ chjadëri̧ ta̧rëji̧ri̧pea̧dirȩ. Ado ja̧boa̧reji̧ri̧ pio judiro̧ bëdü ëte, cjo̧ro̧ji̧ri̧pea̧dirȩ ado chjereno̧. Ado chjö̧na̧i̧ti̧ oa cjäri̧ ja̧boji̧ri̧ pio judiro̧ ma̧ȩ chjadëi̧ pio ju̧i̧ ta̧rëdërërea̧ ji̧, jabechji̧ a̧ra̧ano̧a̧ oa ta̧rëji̧ri̧pea̧dirȩ yaba̧. Aja̧, pio ju̧i̧ chjiari chjadëri̧ ta̧rë tänȩchji̧jo̧ȩ Juan pio ju̧i̧. Jabechji̧ cüdë chjö̧na̧i̧ oa japea̧ pio ju̧i̧ chjadëri̧ ni̧bä chjaochji̧jo̧ȩ, mȩnȩro̧ daea̧ pio ju̧i̧. Jabechji̧ judi dabadëchea oa, chjadëri̧ ta̧rë tänȩchji̧jo̧ȩ. 6Ado danȩrȩ, pio yoa ma̧ȩbo a̧de yo̧chji̧jo̧ȩ —yo̧a̧dejȩrȩ—. Jabechji̧ ma̧ chiadëri̧ cjia tjamo̧mȩrȩ cjo̧ro̧pade pio coa chjiari oëra̧ jo̧rȩtadëmȩ judi —yo̧a̧dejȩrȩ—. Jabechji̧ eami̧ pumȩ üdë pio coa chjiari oëra̧ jo̧rȩtadëmȩrȩ quëna̧rä judi, ‘Aja̧, Quiricho pio judi tjamo̧dida, ma̧diä cjia tänȩdëpadicoada, ado pio ju̧i̧iä ado cja̧rȩmo̧ oa jidatadëpea̧dida yaba̧’ quëna̧ jo̧rȩtarä judi, jabechji̧ ma̧ chiadëri̧ cjia tjamo̧mȩrȩ cjo̧ro̧pade. Aja̧, pio ju̧i̧ ma̧ȩbo a̧de yo̧eji̧ri̧renȩro̧jo̧ȩ Juan pio ju̧i̧ —yo̧mȩrȩ dëbë ni̧bä chjaorëremȩdejȩrȩ Juan ja̧ jadü pio ji̧ri̧iäpȩmo̧ Jechu judi. Jabechji̧ Juan judi, uirä go̧e cjaeä chudamȩ pio judi pio jȩa chjiari dabadëchea oa, ja̧di ta̧rëri̧ ni̧bä chjaorëremȩdejȩrȩ Jechu judi.
7Ado judiro̧ ado chjereno̧ Juan pio ju̧i̧iäpȩ baäa̧ duri oa, Jechu judi pumȩ buba oa ni̧bämȩrȩ taruparëremȩde ni̧bä chjaopea̧ ji̧ Juan pio ju̧i̧ chjiari. Ado ja̧di ta̧rëri̧ yo̧mȩrȩ ni̧bä chjaorëremȩdejȩrȩ:
—Danȩrȩ, no̧mȩ judi mȩnȩro̧ chiri tjo maearäpȩ järërea̧ ji̧, uirä chudamȩ pio ju̧i̧iäpȩ järërea̧ ji̧, ¿tjana̧pea̧ oa jäa̧nȩrȩ? —iëno̧ë ta̧rëa̧dejȩrȩ—. Ano̧ mire jo̧rȩte chjaomȩ pio ju̧i̧, yo̧a̧ri̧ ya chiami̧ dari̧ ni̧bämȩ pio ju̧i̧ goëdepea̧ oa ¿jäa̧nȩrȩ? 8¿Tjana̧ ju̧i̧iä jäa̧nȩrȩ pio ju̧ri̧pȩ? ¿Chjia tjamo̧ oa dapea̧ oa jäa̧nȩrȩ? ¿Chjibo chjacjiamȩ tjamo̧ oa ina̧mȩ pio ju̧i̧ dapea̧ oa jäa̧nȩrȩ? Jabo cjäri̧ manȩrȩ, chjacjiamȩri̧ ina̧ oa cjiamȩ pio ju̧i̧ jo̧rȩtaji̧ri̧rȩ jädëa̧ jironȩrȩ. Jabechji̧ pio jiro chjibo oa ina̧ji̧ri̧ pio judiro̧ chiri ütërë cjo̧ro̧mȩräpȩ cjo̧ro̧ maeadirȩ. Pumȩ decjiaräpȩ cjo̧ro̧dë madirȩ. Jabechji̧ ja̧di dari̧ ina̧ oa cjiamȩ oa jo̧rȩtaji̧ri̧rȩ jädëa̧ jironȩrȩ. Jabo ja̧di da cjiamȩ oa jädëa̧rä judi, ¿chjia tjamo̧ oa dapea̧ oa jäa̧nȩrȩ? 9Yo̧chji̧coe. ¿Tjana̧ ju̧i̧iä jäa̧nȩrȩ Juan pio ju̧i̧iäpȩ? Ütërë ea jana̧ chjadüa̧ oa ni̧bämȩ pio ju̧i̧ dapea̧ oa ¿jäa̧nȩrȩ? Dëdë, pio ju̧i̧ tjamo̧ri̧ jo̧rȩtaji̧ri̧rȩ jäa̧nȩrȩ. Jabechji̧ Juan judi Ütërë ea jana̧ chjadüa̧ oa ni̧bämȩde. Ado o pio ji̧ri̧iä ji̧dë u̧i̧ ba chiade ji̧dëri̧. Tjamo̧ davä. Jabechji̧ Ütërë ea jana̧ chjadüa̧ oa ni̧bärëreji̧ri̧ pio ji̧ri̧iä ji̧dë u̧i̧ ba chiade Juan judi. Jabechji̧ Ütërë ea jana̧ chjadüa̧ duri pio ju̧i̧ ni̧bäpea̧ pio ju̧i̧mo̧i̧ ja̧bepadërëremȩde, jabo jabechji̧ a̧de ja̧beparea̧ ba chia tjamo̧ goamȩrȩ ja̧beparëremȩde peaja̧di. 10Ado judi a̧de ja̧beparërea̧ pio ju̧i̧ chjiari jabërä go̧ȩpea̧ oa cjiarëremȩde ma̧ȩ üdë —yo̧a̧dejȩrȩ Jechu judi—. Tjamo̧ davä. Jabërä Ütë tjamo̧ judi pio coa ni̧bärërea̧ ji̧, jabechji̧ Juan judi pio coa chjiari japapea̧ pio ju̧i̧ chjiari ni̧bärëremȩdique, judi no̧mi̧ da oa jëdano̧mi̧ dari̧ japapea̧ pio ju̧i̧ chjiari. Ta̧rëchji̧vä.
“Danȩ, ca̧ mu̧i̧tjoi̧ pio ju̧i̧ chjadüpareconȩ na̧ yaboi̧. Jabechji̧ mȩnȩ jäpea̧ no̧mi̧ da pio ju̧i̧ jabërä chjadëri̧ jëdano̧mi̧ dari̧ japapea̧ oa, na̧ yaboi̧ chjadüpareconȩ.”
Aja̧, ja̧di ta̧rëri̧ ni̧bärëremȩdique Ütë tjamo̧ judi jabërä Juan pio ju̧i̧ chjiari —yo̧a̧dejȩrȩ Jechu judi—. 11Ado pio ju̧i̧iä jabechji̧, Ütërë ea jana̧ chjadüa̧ oa ni̧bärëreji̧ri̧ pio ji̧ri̧iä ji̧dë u̧i̧ ba chiade Juan judi, cüdë ma̧na̧rea̧ no̧mi̧ da pio ju̧i̧ jëdano̧a̧ tara. Ado pio ju̧i̧iä yo̧requededibe, tjamo̧i̧ cjiari̧ yo̧mȩrȩ —yo̧a̧dejȩrȩ—. Danȩrȩ, cja̧rȩmȩrȩ nö̧tadë marëreji̧ri̧diro̧jo̧ȩ Juan pio ju̧i̧. Tjamo̧ davä. Chiriräpȩti̧ oa cjo̧ro̧rëreji̧ri̧ pumȩ pio judiro̧, pearä judiräri ja̧ ara̧ oa cjiarëreji̧ri̧ pio judiro̧, Juan üdë jabë cjo̧ro̧dëa̧rä cjo̧ro̧rëreji̧ri̧ pio judiro̧ cja̧rȩmȩrȩ nö̧tadë marëreji̧ri̧diro̧jo̧ȩ Juan pio ju̧i̧, uirä chudamȩ pio ju̧i̧. Jabo danȩrȩ, Juan judi pumȩ ütëbo pio ji̧ri̧iä ji̧dë u̧i̧ ba chiaräbo, jabechji̧ Ütërë yo̧a̧ chja̧oerä cjo̧ro̧ji̧ri̧ pio judiro̧ pio ju̧i̧iä ji̧dë u̧i̧ ba chia maeadirȩ. Tjamo̧ davä. Eami̧ pumȩ üdë, ba chiadëmȩmi̧ damȩ pumȩ pio judiborë Ütërë yo̧a̧ chja̧oerä cjo̧ro̧rä judi, jabechji̧ Juan pio ju̧i̧iä ji̧dë u̧i̧ ba chia maeade —yo̧a̧dejȩrȩ—. 12Jabechji̧ Juan judi, uirä chudarëremȩ pio judi pearä tarupë a̧ra̧ano̧a̧ pio judiri yurori pumȩ no̧i̧dërë yu̧a̧ chjaorëreji̧ri̧dirȩ Ütërë yo̧a̧ chja̧oeräpȩ. O judiro̧ ma̧i̧ dari̧ dëbëpe chjaoa̧räbo, goe chiari̧ conȩda̧räbo, jabechji̧ dae jämi̧ dari̧ jira̧ tjamo̧pe järëreji̧ri̧dirȩ yu̧a̧ji̧ri̧ pio judiro̧. Ado pio yaba̧mi̧rä peaja̧di ji̧ra̧ tjamo̧pe jädirȩ yu̧a̧ji̧ri̧ judiro̧. 13Jabechji̧ Juan pio judi jabë cjo̧ro̧dëa̧rä, Ütërë ea jana̧ chjadüa̧ oa ni̧bärëreji̧ri̧ pio judiro̧ ütëborë pio yoa japamitë pio ju̧i̧ chjiari jabërä go̧ȩparëreji̧ri̧dirȩ, Moiche pio judirea̧borë. Aja̧, Ütërë yo̧a̧ chja̧oerä cjo̧ro̧pea̧ pio ju̧i̧ chjiari jabërä go̧ȩpa marëreji̧ri̧dirȩ Juan pio judi ma̧na̧rä yuro. 14Ado danȩrȩ, mȩnȩro̧ pio coa chjadëri̧ ta̧rë ja̧borä judi, 'jabechji̧ Juan judi Eria pio judimi̧ dadida, jabechji̧ Ütërë ea jana̧ chjadüa̧ oa ni̧bäji̧ri̧ pio judiro̧ Eria pio ju̧i̧ chjiari yo̧a̧ ji̧, jabechji̧ Juan pio ju̧i̧ jo̧rȩtaji̧ri̧rȩ yo̧rëreji̧ri̧diro̧da' quëna̧ jo̧rȩtapanȩrȩ. #11:14 No̧mȩ tjamo̧ri ja̧ Ütërë ea jana̧ chjadüa̧ oa ni̧bärëreji̧ri̧ pio judiro̧ ni̧bärëreji̧ri̧dirȩ Juan pio ju̧i̧ chjiari, uirä chudapamȩ pio ju̧i̧ chjiari. Aja̧, no̧ oa chjadëri̧ jëdano̧mi̧ dari̧ jabepapea̧ pio ju̧i̧ chjiari, Chjätä Tänȩmȩ ja̧ oa jëdano̧mi̧ dari̧ ja̧bepapea̧ pio ju̧i̧ chjiari jabërä ni̧bärëreji̧ri̧dirȩ. Jabo Juan yo̧mȩ quȩ pio ju̧i̧ yo̧tärea̧ ji̧, jabechji̧ Eria yo̧mȩ quȩ pio ju̧i̧mo̧i̧ ni̧bärëreji̧ri̧dirȩ. Aja̧, uirä chudapamȩ pio ju̧i̧ quȩ yo̧tärea̧ ji̧, jabechji̧ Eria yo̧mȩ quȩ maea oa yo̧rëreji̧ri̧dirȩ. Pio ju̧i̧iä ja̧di ta̧rëri̧ yo̧rëremȩdejȩrȩ pjaricheo ji̧ri̧ Jechu judi Eria pio ju̧i̧ chjiari, Juan pio ju̧i̧ chjiari. 15Danȩrȩ, mȩnȩro̧ ta̧ra̧ puë chiami̧ dari̧ cjo̧ro̧rä judi, jabechji̧ chjadëri̧ acji cjaeä ta̧rëchji̧vä —yo̧a̧dejȩrȩ.
16—¿Jabo yö̧ta dari̧ yo̧mȩrȩ chjadëri̧ na̧rȩtäremȩrequededibe pio yaba̧mȩ yoaiä cjo̧ro̧ji̧ri̧ pumȩ pio ji̧ri̧ chjiari? Yö̧ta dari̧dë, jabechji̧ bori̧mi̧ dari̧ cjo̧ro̧dirȩ. Gatë tänȩrea̧ bë ji̧ra̧räpȩ ju̧ri̧ chjaocjiaji̧ri̧ bori̧mi̧ dadirȩ. Ado chji̧ goaera̧ jo̧rȩtaji̧ri̧rȩ chjaocjiatärea̧ ji̧, cjäri̧ madirȩ, jibëa̧ jadü pio ji̧ri̧iäpȩmo̧ idëri̧ cjia tänȩdiro̧jȩrȩ, ya̧ji̧ri̧rȩ. Danȩrȩ, ja̧dimi̧ ta̧rëri̧ ni̧bädirȩ: 17“Jabo cjäri̧ manȩrȩ, a̧ro̧rȩ yo̧a̧mi̧ japadë manȩrȩ” yo̧diro̧jȩrȩ. “A̧ro̧rȩ yo̧ro, ‘Aja̧, airi̧ cjiaji̧ri̧rȩ go̧a̧tärȩ’ yo̧rä, chjadëri̧ jadü cjiadë marenȩro̧ibe. Ado a̧ro̧rȩ yo̧ro, ‘Aja̧, gitori̧ jo̧rȩtaji̧ri̧mi̧ dari̧ chjaocjiatärȩ’ yo̧rä, peaja̧di chjari̧ jadü cjiadë marenȩro̧ibe. Jabechji̧ mȩnȩro̧ pio ibë nö̧ta chjadëri̧ chjaocjiatärea̧ ji̧, japadë manȩrȩ. Ado pio ju̧i̧iä chjai̧dënȩrȩ” ya̧ji̧ri̧rȩ ni̧bädiro̧jȩrȩ jibëa̧ jadü pio ji̧ri̧iäpȩmo̧ ma̧ȩ goaedëra̧ pio ju̧ri̧ra̧. 18Aja̧, ja̧di ta̧rëri̧ ma̧ȩ goaedëra̧ ni̧bädirȩ bori̧ judiro̧. Ado peaja̧dimi̧ dari̧ ni̧bänȩrȩ pio mȩnȩro̧ —yo̧a̧dejȩrȩ Jechu judi—. Danȩrȩ, uirä chudarëremȩ pio ju̧i̧ chjiari, Juan pio ju̧i̧ chjiari ma̧ȩ goaedëra̧ ni̧bä chjaonȩrȩ. Ado peaja̧di ta̧rëri̧ ni̧bä chjaonȩrȩ pio coa chjiari. Jabechji̧ Juan judi, jënȩ jo̧rȩta̧mi̧ jurarea̧ pio ju̧i̧ jiadamȩrȩ cjo̧ro̧rëremȩdejȩ Ütë tjamo̧ pio ju̧i̧ ana̧ri̧ jo̧rȩtapea̧ oa, jurarea̧ pio oaiä oëra̧diächea oa. Ado ërü oa, jabechji̧ jaradë marëremȩdejȩ. Jabo judi eami̧ oa japadëa̧räbo, cjäri̧ marenȩro̧jo̧ȩ, “yaröca chiade” yo̧rëreji̧ri̧nȩrȩ pio ju̧i̧ chjiari. Ma̧ȩ goaedëra̧ yo̧rëreji̧ri̧renȩro̧jo̧ȩ bori̧ pio judiro̧ ya̧mi̧ dari̧. 19Ado peaja̧di yo̧nȩrȩ pio coa chjiari, Pumȩrȩ Ara̧ Tjamo̧ pio ju̧i̧ chjiari —yo̧a̧dejȩrȩ—. Tjamo̧ davä. Ma̧ȩ goaedëra̧ ni̧bänȩrȩ pio coa chjiari pumȩ bori̧ pio judiro̧ ya̧mi̧ dari̧. Jabechji̧ ado cja̧rȩmo̧ doremȩrä, cüdë pio dibë nö̧ta mairi̧ jura̧ ji̧, “Jabo cjäri̧ made, ma̧i̧ dari̧ japamȩde” yo̧ chjaoa̧nȩrȩ. “Jurarea̧ goaramȩde. A̧dë chjäte ji̧ra̧ oa juramȩde” yo̧a̧nȩrȩ. Ado cüdë jara̧ oaiä, “Aja̧, ërü yu̧i̧mȩde” yo̧a̧nȩrȩ. Jabechji̧ bori̧ pio judiro̧mi̧ dari̧ chjaodëri̧ aechide yo̧a̧renȩro̧coe. Ado cüdë o pio ji̧ri̧ nö̧ta ëba cha̧ oaiä, “Aja̧, ma̧i̧ da chjai̧dëri̧ japaji̧ri̧ pio ji̧ri̧ ja̧ jadüde” yo̧a̧nȩrȩ. “Domano̧ ja̧ chëre oa boaji̧ri̧ pio ji̧ri̧ irämȩde” yo̧a̧nȩrȩ. Jabo mȩnȩro̧ pio ibë chjiari ji̧dë ma ma̧ȩ goaedëra̧ ni̧bä chjaoräbo, jabechji̧ pumȩ no̧i̧dërë ana̧ri̧ na̧rȩji̧ri̧rȩ cho̧rëdiädiro̧ibe —yo̧a̧dejȩrȩ Jechu judi—. Tjamo̧ davä. Juan judi, pio cüdëborë, jabechji̧ a̧dëri pio judiri ma̧na̧mȩ jo̧rȩtarea̧ra̧ pio ju̧ri̧ra̧ jo̧rȩtariä cjo̧ro̧a̧ oaiä, ‘Aja̧ coëma cjiari̧ cjo̧ro̧diro̧da, cho̧rëdiärea̧mi̧ dari̧ cjo̧ro̧diro̧da’ quëna̧ jo̧rȩtaji̧ri̧rȩ cho̧rëdiädiro̧ibe, chjadë maea oa na̧rȩji̧ri̧rȩ —yo̧mȩrȩ ni̧bä chjaorëremȩdejȩrȩ Jechu judi.
Ano̧ mire jo̧rȩtadëri̧ cjiaji̧ri̧ pio judiro̧ bape chjaoa̧ oa cjiapadirȩ
Uruca 10:13-15
20Ado Jechu judi bë ma̧ri̧räpȩ ju̧ri̧ no̧i̧dëri̧ jauëchja cjiari̧ na̧rȩa̧räbo, ano̧ mire jo̧rȩtadë marëreji̧ri̧dirȩ ju̧ri̧pȩ cjo̧ro̧ji̧ri̧ judiro̧. Ado pio ju̧i̧iä ya̧mi̧ dari̧ ni̧bärëremȩdejȩrȩ, ja̧di ta̧rëri̧ yo̧mȩrȩ:
21—Jabechji̧ Corachi̧ quȩmȩ bë ma̧ri̧räpȩ cjo̧ro̧ji̧ri̧ pio ji̧ri̧iäpȩmo̧ acji cjatätädidibe a̧dë chjäte ma̧i̧ dari̧ bape chjaorea̧ üdë —yo̧a̧dejȩrȩ—. Ado Bechaida quȩmȩ bë ma̧ri̧räpȩ cjo̧ro̧ji̧ri̧ pio ji̧ri̧iäpȩmo̧bo acji cjatätädidibe a̧dë chjäte ma̧i̧ dari̧ bape chjaorea̧ üdë. Jabechji̧ cüdë dibë ji̧ra̧ tjamo̧ oa na̧rȩa̧räbo, ano̧ mire jo̧rȩtadëa̧nȩrȩ. Jabo Tiro quȩmȩ bë ma̧ri̧räpȩ cjo̧ro̧ji̧ri̧ pio ji̧ri̧iäpȩmo̧ ja̧di dari̧ na̧rȩa̧rä judi, chjaodëri̧ ano̧ mire jo̧rȩtaji̧ri̧pe baga̧täreji̧ri̧dirȩ. Ado cüdë Chido̧ quȩmȩ bë ma̧ri̧räpȩ cjo̧ro̧ji̧ri̧ pio ji̧ri̧iäpȩmo̧ ja̧di dari̧ na̧rȩa̧rä judi, peaja̧di chjaodëri̧ ano̧ mire jo̧rȩtaji̧ri̧pe baga̧täreji̧ri̧dirȩ. Tjamo̧ davä. Gito ana̧ri̧ jo̧rȩta̧täreji̧ri̧dirȩ jënȩro̧ chjai̧dëri̧ japea̧ pio ju̧i̧ chjiari. Jabechji̧ cjo̧dë gu̧bë maearäpȩ chaji̧ri̧rȩ, ma̧i̧ da töcamȩ ina̧rea̧ra̧ ano̧ mire ina̧ji̧ri̧rȩ japea̧täreji̧ri̧dirȩ. Jabechji̧ chjadëri̧ na̧rȩpea̧ oa, jënȩro̧ chjai̧dëri̧ japea̧ pio ju̧i̧ chjiari gitori̧ jo̧rȩta̧ pio ju̧i̧ chjadëri̧ na̧rȩpea̧ oa ja̧di dari̧ japea̧täreji̧ri̧dirȩ. 22Jabo cjäri̧ manȩrȩ, —yo̧a̧dejȩrȩ—, ano̧ mire jo̧rȩtadëri̧ cjianȩrȩ. Ado ano̧ mire jo̧rȩtadëri̧ cjia̧ oaiä, jabechji̧ ji̧dë u̧i̧ bape chjaoa̧ oa cjiapanȩrȩ ütara̧ doro. Jabechji̧ Tiro quȩmȩräpȩ cjo̧ro̧ji̧ri̧ pio ji̧ri̧iä, ado Chido̧ quȩmȩräpȩ cjo̧ro̧ji̧ri̧ pio ji̧ri̧iä ji̧dë u̧i̧ bape chjaoa̧ oa cjiadiäpanȩrȩ. 23Ado mȩnȩro̧, Capanau̧ quȩmȩ bë ma̧ri̧räpȩ cjo̧ro̧ji̧ri̧ pio judiro̧, ¿yö̧ta dari̧ jo̧rȩtanȩrȩ mȩnȩro̧? Yö̧ta dari̧ jo̧rȩtadë, jabechji̧ oëra̧ jo̧rȩta jironȩrȩ. 'Jaeboquëda, a̧ro̧rȩ pumȩ chjadë tara, jabechji̧ a̧dëräpȩ cjiapea̧ oa cjitë tänȩpa jirodiibëda, ado a̧ro̧rȩ ju̧ri̧pȩ go̧düdäräa̧rä, jabechji̧ chjacjiamȩri̧ ni̧bäpa jirodiro̧ibëda’ ¿quëna̧ jo̧rȩtadënȩrȩ? Dëdë, ja̧di dari̧ jo̧rȩtanȩrȩ. Jabo cjäri̧ manȩrȩ —yo̧a̧dejȩrȩ—, ja̧boa̧ji̧ri̧ pio ji̧ri̧iäpȩ aeno̧a̧ oa cjiapanȩrȩ, mȩnȩro̧ chjuari̧ jiada̧ pio oaiä. Jabechji̧ cüdë pio dibë na̧rȩa̧mi̧ na̧rȩa̧rä judi, Chodomaräpȩ cjo̧ro̧ji̧ri̧ pio ji̧ri̧iäpȩmo̧ ja̧di dari̧ na̧rȩa̧rä judi, jauëchja cjiari̧ na̧rȩrea̧ ji̧ra̧ra̧ pio ju̧ri̧ra̧ na̧rȩa̧rä judi, jabechji̧ chjaodëri̧ ano̧ mire jo̧rȩtaji̧ri̧pe baga̧täreji̧ri̧dirȩ. Ado cjo̧dë ana̧ra̧ pio ju̧ri̧ra̧ yuropea̧ oa cjiadiädëa̧täreji̧ri̧dirȩ. Jabechji̧ pio jiro bë ma̧ri̧ üdë jabë cjiadiäa̧täremȩde pio yaba̧ domȩ oa. 24Jabo cjäri̧ manȩrȩ, bape chjaorea̧ doro ana̧ tjamo̧ri̧ bape chjaoa̧ oa cjiapanȩrȩ. Jabechji̧ Chodomaräpȩ cjo̧ro̧rëreji̧ri̧ pio ji̧ri̧iä ji̧dë u̧i̧ ma̧i̧ dari̧ bape chjaoa̧ oa cjiapanȩrȩ —yo̧mȩrȩ ni̧bä chjaorëremȩdejȩrȩ Jechu judi.
Jechu judi ni̧bärëremȩdejȩ jibëa̧ Ama̧i̧ ju̧i̧, ‘chjadëri̧ a̧doa̧dicoada’ quëna̧ jo̧rȩtamȩrȩ
Uruca 10:21-22
25Ado ja̧dëa ji̧ Jechu judi ni̧bärëremȩdejȩ jibëa̧ Ama̧i̧ ju̧i̧. Ja̧di ta̧rëri̧ yo̧mȩrȩ ni̧bärëremȩdejȩ:
—Ama̧i̧, Ano̧mȩ tjamo̧renȩ —yo̧a̧dejȩ—. A̧dë Ano̧mȩ pio judirenȩ. Ado dabu Ano̧mȩ pio judirenȩ peaja̧di. Ado ma̧ chiadëri̧ cjiamȩrȩ jo̧rȩtarequedemȩ mȩnȩ chjadëri̧ japea̧ tara, mȩnȩ bori̧mi̧ dari̧ jo̧rȩtaji̧ri̧ pio ji̧ri̧iäpȩmo̧ dabaparea̧ yürüa̧ tara. Tjamo̧ davä. Bori̧mi̧ dari̧ jo̧rȩtaji̧ri̧ pio ji̧ri̧iäpȩmo̧ na̧ ma̧ȩ oa dabaparea̧ yürüa̧renȩjȩrȩ Ama̧i̧. Jabo dai chirirä jo̧rȩtarea̧ maeara̧ jo̧rȩtatämi̧ cjiaji̧ri̧ pio ji̧ri̧ dabaparea̧ yürüdëa̧renȩjȩrȩ. Jabechji̧ oëra̧ quëna̧ji̧ri̧ pio ji̧ri̧, 'jaeboquëda, ca̧ea̧ ma̧na̧ri̧ jo̧rȩta̧ pio ju̧i̧iä dami̧ti̧ oa dabapapai̧ daquëda' quëna̧ji̧ri̧ pio ji̧ri̧, jabechji̧ dabaparea̧ yürüdëa̧renȩjȩrȩ, jabo ji̧dëri̧ na̧ ma̧ȩ üdë goadia̧ oa cjiami̧ dari̧ cjiade pio ji̧ri̧iä. Aja̧ Ama̧i̧, goadia̧ oa cjiami̧ dari̧ cjiade pio mȩnȩ tänȩa̧ oaiä. 26Aja̧ Ama̧i̧, ja̧di dari̧ japarëremȩrenȩ pio mȩaiä goae tjamo̧ tara, jabechji̧ ja̧di dari̧ japarëremȩrenȩ. Ja̧ditäde —yo̧mȩrȩ ni̧bärëremȩdejȩ jibëa̧ Ama̧i̧ ju̧i̧iäpȩmo̧ Jechu judi.
Järätä tjamo̧mi̧ dari̧ cjiaji̧ri̧ pio ji̧ri̧ ëna̧diärëremȩdejȩrȩ Jechu judi
27Ja̧dëa ji̧ Jechu judi ado ni̧bärëremȩdejȩrȩ pumȩ ji̧ri̧, ja̧di ta̧rëri̧ yo̧mȩrȩ:
—Danȩrȩ ca̧ pumȩ, ca̧ Ama̧i̧ pio judi tjamo̧ yo̧rea̧ yürürëremȩdique —yo̧a̧dejȩrȩ—. Ado pio ju̧i̧iä chjö̧na̧i̧därärë ca̧ chja̧oerämo̧ cjiade. Ado ca̧ Ama̧i̧ pio judi chjadëri̧ dabadique. O judiro̧ tjamo̧ri̧ dabadëdiro̧coe jabo ca̧ Ama̧i̧ pio judi, dëdë, tjamo̧ri̧ dabadique. Ado cüdë peaja̧di dabareconȩ ca̧ Ama̧i̧ pio ju̧i̧. O judiro̧ tjamo̧ri̧ dabadë madiro̧jo̧ȩ jabo cüdë, dëdë, tjamo̧ri̧ dabareconȩ. Ado cüdë mitëa̧ pio ji̧ri̧bo daba tänȩparequedejȩrȩ ca̧ Ama̧i̧ pio ju̧i̧ —yo̧a̧dejȩrȩ.
28Ado Jechu judi ji̧dë u̧i̧ ni̧bämȩrȩ ja̧di ta̧rëri̧ a̧de ni̧bä chjaorëremȩdejȩrȩ:
—Danȩrȩ, pio coaiäpȩ ma̧na̧mi̧ dari̧ quëna̧chji̧coe. Järätä tjamo̧mi̧ dari̧ ja̧bepaji̧ri̧ pio judiro̧, chacha tjamo̧ oa arami̧ dari̧ cjiaji̧ri̧ pio judiro̧ ma̧na̧mi̧ dari̧ quëna̧chji̧coe, ado jabechji̧ järätä chjapami̧ dari̧ cjo̧ro̧rea̧ yürüparequededibe. 29Jabechji̧ ca̧ ararea̧ to pio ju̧i̧ ano̧ mire arami̧ dari̧ ëba arachji̧coe, ca̧ mu̧i̧tjoi̧pe järi̧, ca̧ chja̧oerä cjo̧ro̧pe järi̧, pio coaiä dabaparea̧mi̧ dari̧. Jabechji̧ pio dibë chjiari bücjüri̧ cjiari̧ jo̧rȩtamȩrȩ bücjüi̧ jidamȩmi̧ dari̧ a̧doparequededibe. Ado jabechji̧ dibëa̧ tjo üdë goae tarari̧ järätä chjapami̧ dari̧ cjo̧ro̧rea̧ yürüparequededibe. 30Jabechji̧ ca̧ ararea̧ tomi̧ da üdë chachadëde jabo bücjüchja maeade. Ado pio ju̧i̧iä yo̧requededibe. Pio coaiäpȩ ma̧na̧mi̧ dari̧ quëna̧chji̧coe —yo̧mȩrȩ ni̧bä chjaorëremȩdejȩrȩ pumȩ ji̧ri̧ Jechu judi. Ado ja̧di ta̧rëri̧ yo̧ ëte, cjiadiärëremȩde.
Currently Selected:
Mateo 11: Pume
Highlight
Share
Copy
Want to have your highlights saved across all your devices? Sign up or sign in
©2021 Global Partners, All Rights Reserved
