Mateo 10

Ado jibëa̧ jadü pio ji̧ri̧ chjadürëremȩdejȩrȩ Jechu judi, 12 oa

Marco 3:13-19; 6:7-13; Uruca 6:12-16; 9:1-6

1Ado Jechu judi jibëa̧ jadü pio ji̧ri̧, 12 oa, pio jȩa nö̧ta a̧dopatä yo̧rëremȩdejȩrȩ. Ado judiro̧ a̧dopea̧rä, tjamo̧ yo̧rea̧ oa yürürëremȩdejȩrȩ judiro̧ pio ju̧i̧ ja̧ oa chjadëri̧ ja̧bepapea̧ oa. Tjamo̧ davä. Ira̧diä cjaeäji̧ri̧ pio ji̧ri̧ baä tänȩpea̧ oa, dami̧ti̧ gito oa ja̧boji̧ri̧ pio ji̧ri̧ chjaparȩpea̧ oa, ju chiarea̧ yürürëremȩdejȩrȩ, judiro̧ eami̧ti̧ tararea̧ oa taraji̧ri̧ pio ji̧ri̧ cjatäcjiarea̧ yürüpea̧ oa. 2Ado Jechurë chjadüa̧ judiro̧, 12rë, ¿chjiadirȩ judiro̧? ¿Chjiadëdirȩ, pio yodëro̧dirȩ. Danȩrȩ, Chimo̧ pio ju̧i̧ ja̧ quȩ oa yabochja ütarë yo̧requededibe. Aja̧, Chimo̧ quȩmȩde jabo Pedro ma yo̧diro̧jo̧ȩ. Ado cja̧rȩmo̧ üdë, A̧däre pio judide. Pedro pio ju̧i̧di ja̧mȩde. Ado Chebedeo quȩmȩ joja üdë, Santiago pio judide. Ado ju̧i̧di ja̧mȩ judi, Juan quȩmȩde. Pio judiro̧borë chjadüa̧ oa cjiadirȩ. 3Ado Felipe quȩmȩ judi, ado Bartolomȩ quȩmȩ judi, ado Tomas judi, Jechurë chjadüa̧ oa cjia maeadirȩ peaja̧di. Ado Mateo judi, domano̧ ja̧ oa chëre oa boarëremȩ pio judiborë Jechurë chjadüa̧ oa cjiade. Ado Santiago judi, Apjeo quȩmȩ pio ju̧i̧ ja̧ joja pio judi, peaja̧di Jechurë chjadüa̧ oa cjiade. Ado Tadeo quȩmȩ pio judiborë chjadüa̧ oa cjiade. 4Ado Chimo̧ pio judiborë chjadüa̧ oa cjiade. Ado judi, jabechji̧ domano̧ pio ji̧ri̧ ea tjamo̧dërëremȩdejȩrȩ. Tjamo̧ davä. Icharaita ja̧ chiri pio ju̧i̧ baë mitera̧pea̧ji̧ri̧ pio ji̧ri̧ ea tjamo̧dërëremȩdejȩrȩ domano̧ pio ji̧ri̧. Ado Chimo̧ pio ju̧i̧ uëri Judas Iscariote pio judiborë chjadüa̧ oa cjiarëremȩde, jabo cjäri̧ made, pio jȩa chjadüa̧mȩ pio ju̧i̧ yürürëremȩdejȩ Jechu ju̧i̧ chjai̧dëri̧ japatämi̧ cjiaji̧ri̧ pio ji̧ri̧iäpȩmo̧. Aja̧, pio judiro̧dirȩ Jechu judi chjadüa̧ judiro̧.

5Ado Jechu judi pio jiro pumȩ 12 oa, chjadürëremȩdejȩrȩ. Ja̧di ta̧rëri̧ yo̧mȩrȩ chjadürëremȩdejȩrȩ:

⁠—⁠Danȩrȩ, judiodë pio ji̧ri̧iäpȩ jädë machji̧vä ⁠—⁠yo̧a̧dejȩrȩ⁠—⁠. Ado Chamaria quȩmȩräpȩ cjo̧ro̧ji̧ri̧ pio ji̧ri̧iäpȩ peaja̧di jädëchji̧vä. Jabechji̧ Chamariaräpȩ cjiamȩ bë ma̧ri̧räpȩ jädë machji̧vä. 6Jabo jabechji̧, Icharai quȩmȩ pio judiri ja̧ji̧ri̧ pio ji̧ri̧iäpȩmo̧ ma jätä earequededibe dabadëpea̧ oa cjiaji̧ri̧mi̧ da oveja pio ji̧ri̧iäpȩmo̧ ma. 7Ado a̧ra̧ano̧riä tai̧chji̧vä. Ja̧di ta̧rëri̧ a̧ra̧ano̧riä tai̧chji̧vä. “Aja̧, Ütërë yo̧a̧ chja̧oeräpȩ cjo̧ro̧pea̧ japamitë üdë ma̧na̧pea̧ ji̧ querediä tjamo̧diibe” yo̧eji̧ri̧nȩrȩ. 8Ado danȩrȩ, gito ja̧boji̧ri̧ pio ji̧ri̧, jabechji̧ chjaparȩchji̧jȩrȩ. Ado ja̧boa̧ji̧ri̧ pio ji̧ri̧ bëdü tänȩchji̧jȩrȩ. Ado ma̧i̧ da co chiaji̧ri̧ pio ji̧ri̧ chjaparȩchji̧jȩrȩ peaja̧di. Ado ira̧diä cjaeäji̧ri̧ pio ji̧ri̧ baä tänȩchji̧jȩrȩ yaröca pio ji̧ri̧. Aja̧, ja̧di dari̧ ja̧bepatä earequededibe pumȩ pio ji̧ri̧iä chëre cjo̧dëdëji̧ri̧rȩ. Jabechji̧ cüdë pio yoa ja̧beparea̧ oa yürüa̧ ji̧, peaja̧di chëre oa cjo̧dëdëmȩrȩ yürüa̧requededibe. Ado peaja̧dimi̧ dari̧ a̧dotä earequededibe pumȩ ji̧ri̧. Jabechji̧ chëre oa cjo̧dëdëji̧ri̧rȩ ja̧bepatä earequededibe. 9Ado danȩrȩ, chëre oa goa jädë machji̧vä ⁠—⁠yo̧a̧dejȩrȩ⁠—⁠. Jabechji̧ dibëa̧ chëre oa boearea̧ oa goa jädë machji̧vä. 10Jabechji̧ mö̧na̧ji̧ri̧rȩ jächji̧vä dibëa̧ ma̧chi̧ra̧ joë oa goa järea̧ decjiari̧. Ado ano̧ mire ina̧rea̧ oa peaja̧di goa jädëpea̧de. Ado ano̧ mire go̧iorea̧ ta joë oa peaja̧di goa jädëpea̧de. Ado mȩnȩro̧ tjätjäpë tai̧rea̧ to oa peaja̧di ara jädëpea̧de. Jabechji̧ mö̧na̧ji̧ri̧rȩ jächji̧vä pumȩ pio ji̧ri̧ a̧ra̧ano̧pea̧ oa. Ado mȩnȩro̧ pio ji̧ri̧iäpȩmo̧ a̧ra̧ano̧a̧ ba oa, pumȩ ja̧ oa ja̧bepea̧ ba oa, jabechji̧ chjadëri̧ ëba jurapea̧ chiadiro̧dibe. Ado pio ju̧i̧iä jiadadë matäreji̧ri̧renȩro̧jȩrȩ dibë a̧dotämi̧ cjiaji̧ri̧ pio ji̧ri̧ ⁠—⁠yo̧mȩrȩ yo̧rëremȩdejȩrȩ Jechu judi pio ji̧ri̧ chjadübea yaboi̧.

11Ado Jechu judi ji̧dë u̧i̧ ni̧bä chjaomȩrȩ ja̧di ta̧rëri̧ a̧de yo̧rëremȩdejȩrȩ:

⁠—⁠Ado danȩrȩ, mȩnȩro̧ eami̧ bë ma̧ri̧räpȩ go̧düdäräa̧rä, jabechji̧ dibë a̧dotämi̧ cjiaji̧ri̧ pio ji̧ri̧ ja̧ bëräpȩ cjiadiächji̧vä ⁠—⁠yo̧a̧dejȩrȩ⁠—⁠. Jabechji̧ pio ju̧ri̧pȩ cjiadiächji̧vä mȩnȩro̧ pio jiro bë ma̧ri̧ri pio judiri a̧dë baäa̧rä yuro. 12Ado mȩnȩro̧ eami̧ bëräpȩ yu̧a̧rä, dibë cjo̧ro̧rea̧ yürütämi̧ cjiaji̧ri̧ pio ji̧ri̧ ja̧ bëräpȩ yu̧a̧rä, jabechji̧ jeaeji̧ri̧renȩro̧jȩrȩ. "Aja̧, Ütë tjamo̧ judi chjadëri̧ a̧dotädidibe pio yoaiä cjo̧ro̧ji̧ri̧ pio ji̧ri̧” yo̧ji̧ri̧rȩ jeaeji̧ri̧nȩrȩ. 13Ado pio jiro pumȩ judiro̧ dibë chjadëri̧ ëba cjo̧ro̧rä judi, jabechji̧ chjadëri̧ a̧dopadejȩrȩ Ütë tjamo̧ judi. Jabo judiro̧ dibë chjadëri̧ ëba cjo̧ro̧dërä judi, jabechji̧ Ütë tjamo̧ pio judi chjadëri̧ a̧dodëpadejȩrȩ. Ado mȩnȩro̧ pea yu̧a̧rä yo̧rërea̧ ma̧ȩ üdë, jabechji̧ badëpe bagami̧ dari̧ cjiapadejȩrȩ ⁠—⁠yo̧a̧dejȩrȩ⁠—⁠. Jabechji̧ Ütë tjamo̧ judi pio ji̧ri̧iäpȩmo̧ chjadëri̧ a̧dorea̧ yürütärea̧ ji̧, ja̧di dari̧ yürüdëpadejȩrȩ. 14Ado danȩrȩ ca̧ pumȩ, mȩnȩro̧ ado cja̧rȩmo̧ bë ma̧ri̧räpȩ go̧düdärärä, dibë chjadëri̧ japadërä judi, jabechji̧ a̧dë baächji̧jȩrȩ ⁠—⁠yo̧a̧dejȩrȩ⁠—⁠. Tjamo̧ davä. Mȩnȩro̧ ado cja̧rȩmo̧ bë ma̧ri̧räpȩ go̧düdärärä, jabo jibëa̧ bëräpȩ yu̧a̧rea̧ yürüdë marä judi, ado mȩnȩro̧ a̧ra̧ano̧a̧ pio ju̧i̧ ta̧rë chadëri̧ cjiarä judi, jabechji̧ a̧dë baächji̧jȩrȩ. Jabo mȩnȩro̧ baärä, jabechji̧ dibëa̧ taräremȩ pio ju̧i̧ gu̧ro tänȩchji̧jo̧ȩ dabu pjo̧no̧i̧remȩ pio ju̧i̧, ta gu̧në pjo̧deji̧ri̧rȩ. Jabechji̧ dibëa̧ taräremȩ pio judi na̧rȩrea̧de pio ji̧ri̧ uapai̧ dari̧ na̧rȩpea̧ oa. Ado judiro̧ pio ju̧i̧ daea̧ oaiä, ‘Aja̧, a̧ro̧rȩ a̧ra̧ano̧ji̧ri̧ pio ji̧ri̧ jiada̧ oaiä jabechji̧dëdida, bape chjaoa̧ oa cjiapaa̧ro̧da, Ütë tjamo̧ pio judi tänȩa̧ oa bape chjaoa̧ oa cjiapaa̧ro̧da’ quëna̧ jo̧rȩtapadirȩ na̧rȩa̧ pio ju̧i̧iä. Pio ju̧i̧iä ja̧di dari̧ japapea̧de mȩnȩro̧ baäbea yaboi̧. 15Ado pio ju̧i̧iä tjamo̧ri̧ yo̧requededibe ca̧ pumȩ ⁠—⁠yo̧a̧dejȩrȩ⁠—⁠. Pio jiro pumȩ judiro̧, dibë jiadaji̧ri̧ pio judiro̧, jabechji̧ uapai̧ da tjamo̧ri̧ bape chjaoa̧ oa cjiapadirȩ. Tjamo̧ davä. Bape chjaorea̧ do üdë ma̧na̧na̧ra̧rä, o ji̧ri̧iä ji̧dë u̧i̧ ma̧i̧ dari̧ bape chjaoa̧ oa cjiapadirȩ. Jabechji̧ Chodomaräpȩ cjo̧ro̧rëreji̧ri̧ pio ji̧ri̧iä, Gomoraräpȩ cjo̧ro̧rëreji̧ri̧ pio ji̧ri̧iä ji̧dë u̧i̧ uapai̧ dari̧ bape chjaoa̧ oa cjiapadirȩ jiro bë ma̧ri̧räpȩ cjo̧ro̧ji̧ri̧ judiro̧ ⁠—⁠yo̧mȩrȩ ni̧bä chjaorëremȩdejȩrȩ Jechu judi, jënȩ chjadüa̧ pio ji̧ri̧, judiro̧ jäbea yaboi̧.

Conȩda̧ oa cjiapadirȩ quëna̧ji̧ri̧ judiro̧

Mateo 24:1-14; Marco 13:1-13; Uruca 12:11-12; 21:12-17

16Ado Jechu judi cjiadiädëmȩrȩ ji̧dë u̧i̧ ni̧bä chjaorëremȩdejȩrȩ jibëa̧ jadü ji̧ri̧, pio ji̧ri̧ chjadübea yaboi̧:

⁠—⁠Danȩrȩ ca̧ pumȩ, uapai̧ da tjamo̧räpȩ chjadürequededibe ja̧bepapea̧ oa ⁠—⁠yo̧a̧dejȩrȩ⁠—⁠. Tjamo̧ davä, ovejami̧ da maea oa chjadürequededibe ja̧bepapea̧ oa, aure chjuaji̧ri̧mi̧ da pio ji̧ri̧ ja̧ chjarerä cjo̧ro̧ji̧ri̧ pio ji̧ri̧ a̧dopea̧ oa. Ado pio ju̧i̧iä na̧ȩ chiachji̧vä mȩnȩro̧ u̧i̧pea̧ oa cjiachea oa. Jabechji̧ urëdi oa jo̧rȩtachji̧vä mȩnȩro̧ chjadë pio ju̧i̧mo̧i̧ mitëpea̧ oa, mȩnȩro̧ chjadëri̧ ütarë jo̧rȩtapea̧ oa. Ado peaja̧di chjai̧dëra̧ pio ju̧ri̧ra̧ mirea̧ oa cjiadëchji̧vä, o judiro̧ dibë aechide yo̧rea̧mi̧dëri̧. 17Aja̧, ja̧di dari̧ cjo̧ro̧pea̧de ca̧ pumȩ. Jabo ji̧dë ma na̧e chiachji̧vä ⁠—⁠yo̧a̧dejȩrȩ⁠—⁠. Jabechji̧ mȩnȩro̧ chjadëri̧ cjo̧ro̧räbo, o judiro̧ goëdëri̧ cjiapai̧ dadiro̧dibe. Ado dibë chjuari̧ mitë ëte, ëba jäpai̧ dadiro̧dibe tjamo̧ ütaraji̧ri̧ pio ji̧ri̧iäpȩ, pio dibë aechide yo̧pea̧ oa. Ado judiorë a̧doparea̧ bëräpȩ ju̧ri̧ bide cjaeäpai̧ dadiro̧dibe peaja̧di. 18Jabechji̧ mȩnȩro̧ ca̧ mu̧i̧tjoi̧ tara, chiri ütë cjo̧ro̧ji̧ri̧ pio ji̧ri̧ ja̧ dëbëräpȩ cjiadärä tänȩpai̧ dadiro̧dibe peaja̧di. Ado pio ji̧ri̧ ja̧ dëbëräpȩ cjiarä, jabechji̧ pio coa chjiari ni̧bärea̧ dapanȩro̧jȩrȩ, judiodë pio judiro̧borë ta̧rërea̧mi̧ dari̧. 19Jabo danȩrȩ, ana̧ri̧ jo̧rȩtadëchji̧vä ⁠—⁠yo̧a̧dejȩrȩ⁠—⁠. Jabechji̧ judiro̧ dibë chjuari̧ mitërä, tjamo̧ ütaraji̧ri̧ pio ji̧ri̧iäpȩ ëba jäpea̧ oa mitërä, ana̧ri̧ jo̧rȩtadëchji̧vä. ‘Chia chia, pio coa iëno̧ë ta̧rërä judi, pio judiro̧ coa iëno̧ iëno̧ ta̧rërä judi, ¿yö̧ta dari̧ dëbë yo̧täremȩcjivaquiji̧ri̧? quëna̧ jo̧rȩtadëchji̧vä. Jabechji̧ mȩnȩro̧ pio ji̧ri̧ ja̧ dëbëräpȩ cjiarä, dëbë ni̧bärea̧ yürüpadidibe Ama̧i̧ tjamo̧ pio ju̧i̧ ja̧ Tjo pio judi. 20Jabechji̧ pio mȩnȩro̧ tjamo̧dënȩrȩ jabo Ama̧i̧ tjamo̧ pio ju̧i̧ ja̧ Tjo pio judide. Aja̧, pio judide pio dibëiä ni̧bäpamȩ judi. Pio ju̧i̧iä yo̧requededibe, bücjüri̧ cjiadëchji̧vä ⁠—⁠yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi.

21Ado ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ Jechu judi:

⁠—⁠Danȩrȩ ca̧ jadü, pio jiro japamitërä eadëpadiro̧dibe. Jabechji̧ pio coa eadërërea̧mi̧ eadëpadiro̧dibe peaja̧di. Ado pio ju̧i̧iä o judiro̧ jibëa̧ pumȩ pio ji̧ri̧iäpȩmo̧ goëdëri̧ cjiapadiro̧jȩrȩ. Ado ja̧dëa̧ ji̧ yürüpadiro̧jȩrȩ jibë eadëji̧ri̧ pio ji̧ri̧iäpȩmo̧. Tjamo̧ davä, quëna̧ji̧ri̧ pio ji̧ri̧ ja̧bo tänȩpea̧ oa pio jibëdi ja̧ji̧ri̧ pio judiro̧ yürüpadiro̧jȩrȩ. Ado nö̧riji̧ri̧ judiro̧ orë peaja̧di dari̧ japapadiro̧jȩrȩ jibëa̧ u̧ri̧ pio ji̧ri̧. Tjamo̧ davä. Jibëa̧ u̧ri̧ judiro̧ pio coaiäpȩmo̧ quëna̧ji̧ri̧pea̧ oaiä, quëna̧ji̧ri̧ pio ji̧ri̧ ja̧bo tänȩtämi̧ cjiaji̧ri̧ pio ji̧ri̧iäpȩmo̧ yürüpadiro̧jȩrȩ peaja̧di. Ado u̧ri̧ judiro̧ orë peaja̧di dari̧ japapadiro̧jȩrȩ pio jibë nö̧riji̧ri̧ pio ji̧ri̧. Peaja̧di ja̧bo tänȩpea̧ oa yürüpadiro̧jȩrȩ. 22Jabechji̧ mȩnȩro̧ ca̧ jadü tara, ütëborë goëdëri̧ cjia dapadiro̧dibe. Jabo go̧dürea̧ yürüparequededibe jabo. Jabechji̧ mȩnȩro̧ coa ji̧dë ma chjuari̧ quëna̧ji̧ri̧ oa, mȩnȩro̧ ma̧i̧ da chjai̧dë oa chjätäräbo ma̧ chjua jo̧rȩtaji̧ri̧ oa, jabechji̧ chjadëri̧ go̧dürea̧ yürüparequededibe ⁠—⁠yo̧a̧dejȩrȩ⁠—⁠. 23Ado danȩrȩ, mȩnȩro̧ eami̧ bë ma̧ri̧räpȩ ma̧i̧ dari̧ conȩda̧ oa cjiarä, jabechji̧ ado cja̧rȩmo̧ bë ma̧ri̧räpȩmo̧ jo̧ȩra̧pe bagurëno̧chji̧vä. Jabo danȩrȩ, tjamo̧ri̧ cjiari̧ yo̧requededibe ⁠—⁠yo̧a̧dejȩrȩ⁠—⁠. Cüdë dibë yürüa̧ ja̧beparea̧ pio ju̧i̧ jabë ja̧bepadäräa̧ oa cjiadërä, daparenȩro̧coe Pumȩrȩ Ara̧ Tjamo̧ pio ju̧i̧. Tjamo̧ davä. Mȩnȩro̧ Icharairäpȩ cjiamȩ bë ma̧ri̧ nö̧tai̧ oa jabë ja̧bepadäräa̧ oa cjiadërä, jabechji̧ daparenȩro̧coe ma̧na̧mȩ oa ⁠—⁠yo̧mȩrȩ ni̧bä chjaorëremȩdejȩrȩ Jechu judi.

24⁠—⁠Danȩrȩ ca̧ jadü, pio dibë a̧ra̧ano̧mȩ pio judirequede. Ado mȩnȩro̧ pio coaiä dabapaji̧ri̧nȩrȩ. Jabo danȩrȩ, eami̧ dabapamȩ judi pio jȩa a̧ra̧ano̧mȩ pio ju̧i̧ nö̧tadëdejȩ. Jabechji̧ ji̧dë u̧i̧ ba chiade a̧ra̧ano̧mȩ judi. Peaja̧dimi̧ dade mu̧i̧tjoi̧ pio ju̧i̧iä. Jabechji̧ eami̧ mu̧i̧tjoi̧ üdë nö̧tadëdejȩ jibëa̧ ano̧mȩ ju̧i̧iä. Jabechji̧ ana̧mȩ pio judi ji̧dë u̧i̧ ba chiade. Ja̧di maeade. 25Ado danȩrȩ, dabapaji̧ri̧ pio judiro̧ cho̧rëdiätäreji̧ri̧diro̧jo̧ȩ pio jibë a̧ra̧ano̧mȩ pio ju̧i̧. Jabechji̧ pio judi dabami̧ dari̧ dabatäreji̧ri̧dirȩ peaja̧di. Ado peaja̧dide mu̧i̧tjoi̧ pio ji̧ri̧iä. Jabechji̧ mu̧i̧tjoi̧ pio judiro̧ cho̧rëdiätäreji̧ri̧diro̧jo̧ȩ jibëa̧ ano̧mȩ pio ju̧i̧. Jabechji̧ pio judimi̧ dari̧ cjiatäreji̧ri̧dirȩ. Ado danȩrȩ, pio cüdë dibë a̧ra̧ano̧mȩ tara, dibëa̧ Ano̧mȩ tara, jabechji̧ pio cüdëmi̧ dape jätäreji̧ri̧nȩrȩ. Ado pio ju̧i̧iä pumȩ judiro̧ pio coa eadëa̧mi̧ eadëpadiro̧dibe peaja̧di ⁠—⁠yo̧a̧dejȩrȩ⁠—⁠. Danȩrȩ, bë tjamo̧ ano̧mȩmi̧ dari̧ cjiarequede cüdë. Jabo cüdë, bë tjamo̧ ano̧mȩmi̧ dari̧ cjiaräbo, ‘yaröca ütëdida’ quëna̧ jo̧rȩtaji̧ri̧rȩ yo̧a̧dirȩ pio coa chjiari. Ado danȩrȩ, judiro̧ pio coa chjiari ja̧di ta̧rëri̧ yo̧a̧rä judi, ¿yö̧ta dari̧ ni̧bäpadirȩ pio dibë chjiari? Yö̧ta dari̧dë, ji̧dë u̧i̧ chjai̧dëri̧ ni̧bäpadirȩ. Tjamo̧ davä. Judiro̧ pio coa chjiari chjai̧dëri̧ ni̧bäa̧ ju̧i̧ u̧i̧ chjai̧dëri̧ ni̧bäpadirȩ pio dibë chjiari, ca̧ bërä cjo̧ro̧mi̧ dari̧ cjiaji̧ri̧ pio ji̧ri̧ chjiari. 26Jabo danȩrȩ ca̧ pumȩ, o judiro̧ pio dibë chjiari chjai̧dëri̧ ni̧bäräbo, judiro̧ uapai̧ ta̧rëri̧ yo̧ë cji̧däräbo, jabechji̧ uapadëchji̧jȩrȩ ⁠—⁠yo̧a̧dejȩrȩ⁠—⁠. Jabechji̧ ütara̧ doro chjö̧na̧i̧rȩ chjadë maearä cjiami̧ dari̧ cjiapade goadirea̧ decjiari̧. Tjamo̧ davä. Pio dibë chjai̧dëri̧ japaji̧ri̧ pio judiro̧ goadirea̧ dadëpadirȩ, jabo chjadë maearä cjiami̧ dari̧ cjiapadirȩ. 27Ado pio ju̧i̧iä yo̧requededibe ⁠—⁠yo̧a̧dejȩrȩ⁠—⁠. Danȩrȩ, cüdë pio dibëmo̧ goadi yo̧rërea̧ pio ju̧i̧, jabechji̧ chjadë maearä cjiami̧ dari̧ a̧ra̧ano̧chji̧jo̧ȩ. Ado cüdë pio dibëiäpȩmo̧ garügarü ni̧bärërea̧ pio ju̧i̧, peaja̧di goae tarari̧ ëna̧diäji̧ri̧rȩ a̧ra̧ano̧chji̧jo̧ȩ bë dairäpȩ ju̧ri̧, ütëbodärärë chjadëri̧ ta̧rërea̧mi̧ dari̧ ⁠—⁠yo̧a̧dejȩrȩ.

28Ado Jechu judi ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ jibëa̧ jadü ji̧ri̧:

⁠—⁠Danȩrȩ ca̧ jadü, uapadëchji̧vä ⁠—⁠yo̧a̧dejȩrȩ⁠—⁠. Dibëa̧ icjara oa ja̧bo tänȩpai̧ daji̧ri̧ pio ji̧ri̧ uapadëchji̧vä. Dibëa̧ tjo pio ju̧i̧, cjäri̧ madiro̧jo̧ȩ, ja̧bo tänȩrea̧mi̧dëdiro̧jo̧ȩ. Dibëa̧ tjo oa cjo̧dë tja ana̧räpȩmo̧ aeno̧rea̧mi̧dëdiro̧jo̧ȩ. Pio ju̧i̧iä uapadëchji̧jȩrȩ ⁠—⁠yo̧a̧dejȩrȩ⁠—⁠. Danȩrȩ ca̧ pumȩ, pio dibë goëdëri̧ cjiaji̧ri̧ pio ji̧ri̧ uapadëchji̧jȩrȩ, jabo Ütë tjamo̧ pio ju̧i̧iäpȩmo̧ ma uapariä cjo̧ro̧täreji̧ri̧nȩrȩ ji̧dëri̧. Aja̧, aeno̧rea̧ chiamȩ pio ju̧i̧mo̧i̧ uapariä cjo̧ro̧täreji̧ri̧renȩro̧jo̧ȩ. Tjamo̧ davä. Dibëa̧ icjara oa, dibëa̧ tjobo cjo̧dë tja ana̧räpȩmo̧ aeno̧rea̧ chiamȩ pio ju̧i̧mo̧i̧ uapaji̧ri̧rȩ jo̧rȩtariä cjo̧ro̧täreji̧ri̧renȩro̧jo̧ȩ ⁠—⁠yo̧a̧dejȩrȩ⁠—⁠. 29Danȩrȩ, pumȩ pio judiro̧, dëdë, ja̧bo tänȩpai̧ dadiro̧dibe, jabo Ütë tjamo̧ pio judi japarea̧ yürüa̧rämo̧ ja̧bo tänȩrea̧ datäreji̧ri̧diro̧dibe. Jabechji̧ chjö̧na̧i̧ oa ütarë daba damȩde. Ado pua pio ji̧ri̧ chjiaribo dabade. Ba chiadëräbo dabamȩde. Danȩrȩ, cja̧rȩmȩ chëre boi̧chji̧rä yo̧a̧ri̧ pua bori̧ gatërea̧mi̧ dade. Jabo pio jiro pua üdë ba chiadëräbo, jabechji̧ Ütë tjamo̧ ja̧ dachoro cjo̧ro̧de. Ado teracabari̧ cjatä ëte ja̧bodëpade. Jabechji̧ ibëa̧ Ama̧i̧ pio judi ütarami̧ ja̧bopade. 30Ado danȩrȩ ca̧ pumȩ, pua pio ji̧ri̧iä ji̧dë u̧i̧ ba chia dadidibe Ütë tjamo̧ judi. Ado pio dibë ba chia daea̧ oaiä, jabechji̧ dibëa̧ tjübë cö̧ pio ju̧i̧ chjiari ütara̧ oa goadidibe ji̧dëri̧. Dibë ba chia damȩrȩ chjö̧na̧i̧ oa ütara̧ oa goadidibe. 31Ado pio ju̧i̧iä yo̧requededibe ca̧ pumȩ ⁠—⁠yo̧a̧dejȩrȩ⁠—⁠. Jabechji̧ uapadëchji̧vä o judiro̧ pio dibë japapea̧ pio ju̧i̧ chjiari. Jabechji̧ pua pio ju̧i̧iä ji̧dë u̧i̧ ba chianȩrȩ. Ado ji̧dë u̧i̧ ba chia da oaiä, jabechji̧ ji̧dë u̧i̧ jidapadidibe ibëa̧ Ama̧i̧ judi. Ado pio ju̧i̧iä teracabari̧ ja̧bodëpanȩrȩ peaja̧di. Ado pio ju̧i̧iä jabechji̧, uapadëchji̧vä ⁠—⁠yo̧mȩrȩ ni̧bä chjaorëremȩdejȩrȩ pumȩ ji̧ri̧ uapaji̧ri̧rȩ cjo̧ro̧chea oa.

Ibëa̧ Ano̧mȩ pio ju̧i̧ chjiari cjapiri̧ cjiadiädëtäreji̧ri̧rȩarȩ

Uruca 12:8-9

32Ado Jechu judi cjiadiädëmȩrȩ ja̧di ta̧rëri̧ a̧de ni̧bä chjaorëremȩdejȩrȩ:

⁠—⁠Danȩrȩ ca̧ jadü, eami̧ pumȩ üdë jibëa̧ pumȩ ja̧ dëbëräpȩ pio coa chjiari chjadëri̧ ni̧bärä judi, goadidëmȩrȩ chjadëri̧ ni̧bärä judi, “Aja̧, Jechu pio ju̧i̧ cho̧rë jämȩreconȩ” yo̧mȩrȩ yo̧rä judi, peaja̧di ta̧rëri̧ yo̧parequede cüdë ca̧ Ama̧i̧ ja̧ dëbëräpȩ. “Aja̧, pio yoa pumȩ yodë cho̧rë jana̧mȩdique” yo̧parequede pio jiro pumȩ pio ju̧i̧ chjiari a̧dëräpȩ cjiamȩ Ama̧i̧ ja̧ dëbëräpȩ. 33Jabo eami̧ pumȩ judi jibëa̧ pumȩ ja̧ dëbëräpȩ pio coa chjiari chjadëri̧ ni̧bädërä judi, jabo goadimȩrȩ ni̧bärä judi, "cjäri̧ mareconȩ, Jechu pio ju̧i̧ cho̧rë jädëmȩreconȩ" yo̧rä judi, peaja̧dimi̧ dari̧ yo̧parequede pio ju̧i̧ chjiari ca̧ Ama̧i̧ ja̧ dëbëräpȩ, a̧dëräpȩ cjiamȩ Ama̧i̧ ja̧ dëbëräpȩ ⁠—⁠yo̧mȩrȩ ni̧bä chjaorëremȩdejȩrȩ Jechu judi jënȩ chjadüpea̧ pio ji̧ri̧iäpȩmo̧.

Jechu pio judide yo̧a̧ri̧ bubape baga tänȩmȩmi̧ dari̧ japamȩ judi

Uruca 12:49-53; 14:26-27; 9:24

34Ado Jechu judi cjiadiädëmȩrȩ ji̧dë u̧i̧ ni̧bä chjaorëremȩdejȩrȩ jibëa̧ jadü ji̧ri̧.

⁠—⁠Danȩrȩ ca̧ jadü, oëra̧ jo̧rȩtadëchi̧vä pio coa chjiari ⁠—⁠yo̧a̧dejȩrȩ⁠—⁠. Jabechji̧ pumȩ judiro̧ ütëbodärärë ji̧dë ma goaeri̧ ëba cjo̧ro̧rea̧ dapea̧ oa, cja̧rȩmȩ bubami̧ dari̧ cjo̧ro̧pea̧ oa, jibëa̧ dëbëti̧ra̧ chia dëbëpe chjaorea̧ decjiari̧ ëba cjo̧ro̧pea̧ oa, birë ma̧na̧dëa̧requede. Tjamo̧ davä. Pumȩ judiro̧ cja̧rȩmȩ bubami̧ dari̧ ji̧dë ma cjo̧ro̧pea̧ oa, jibëa̧ dëbëti̧ra̧ chia dëbëpe chjaorea̧ decjiari̧ ëba cjo̧ro̧pea̧ oa birë ma̧na̧dëa̧requede, jabo jabechji̧ judiro̧ jibëa̧ dëbëti̧ra̧ chia dëbëpe chjaomi̧ dari̧ ëba cjo̧ro̧pea̧ oa birë ma̧na̧requede. 35Jabechji̧ pumȩ judiro̧ orë pio coa quȩna̧ oaiä, jibëa̧ pumȩ pio ji̧ri̧ a̧dë tjaoëpe baga̧ oaiä, jabechji̧ yo̧a̧ri̧ bubape bagami̧ dari̧ cjiadiäpea̧ oa birë ma̧na̧requede. Ado pio ju̧i̧iä dëdë, joja pio judi jȩa nö̧ri̧mȩ pio judimi̧ dari̧ jo̧rȩtadëpade. Ado jojabi pio jini̧ jȩa arayi̧ pio jini̧mi̧ dari̧ jo̧rȩtadëpanȩ. Ado joja oa ëbayi̧ pio jini̧ jibëa̧ cjö̧na̧ pio jini̧mi̧ dari̧ jo̧rȩtadëpanȩ peaja̧di. Jabechji̧ dëbëpe chjaomi̧ dari̧ cjo̧ro̧padirȩ. Ja̧di ma ja̧di ma cjo̧ro̧padirȩ pio coaiä. 36Jabechji̧ dibëa̧ bëräji̧ri̧ pio judiro̧padirȩ pio dibë dëbëpe chjaomi̧ dari̧ japaji̧ri̧ judiro̧. Tjamo̧ davä. O judiro̧ quëna̧ oaiä, jabo o judiro̧ quëna̧dëri̧ cjia oaiä, jabechji̧ ja̧di dari̧ tutia̧ oa cjiami̧ dari̧ cjo̧ro̧padirȩ dibëa̧ bëräji̧ri̧ judiro̧ ⁠—⁠yo̧a̧dejȩrȩ.

37⁠—⁠Jabo danȩrȩ ca̧ jadü, eami̧ pumȩ üdë pio coa ji̧dë u̧i̧ eapea̧ chiadique. Pio coa o ji̧ri̧ u̧i̧ eapea̧ chiadique. Jabechji̧ o ji̧ri̧ u̧i̧ ea tjamo̧dërä judi, ca̧ jadüpe bagarea̧mi̧dëde ⁠—⁠yo̧a̧dejȩrȩ⁠—⁠. Tjamo̧ davä. O ji̧ri̧ ji̧dë u̧i̧ earä judi, coa u̧i̧ earä judi, pio jȩa nö̧rimȩ pio ju̧i̧ ji̧dë u̧i̧ earä judi, pio jȩa arayi̧ pio ji̧ ji̧dë u̧i̧ earä judi, coa u̧i̧ earä judi, jabechji̧ nö̧tadëde ca̧ jadüpe bagapea̧ ji̧. Ado joja pio ju̧i̧ ji̧dë u̧i̧ earä judi, jojabi pio ji̧ ji̧dë u̧i̧ earä judi, pio coa u̧i̧ earä judi, jabechji̧ nö̧tadëde ca̧ jadüpe bagapea̧ ji̧. 38Jabechji̧ eami̧ pumȩ üdë pio coa cho̧rë jana̧dëri̧ cjiarä judi, jënȩ ja̧bopea̧ to pio ju̧i̧ arami̧ dari̧ cjo̧ro̧dëri̧ cjiarä judi, pio jȩaiäpȩmo̧ ja̧bo tänȩpai̧ darä yuro pio coa ta̧rëdiädëri̧ cjiarä judi, jabechji̧ nö̧tadëde ca̧ jadüpe bagapea̧ ji̧. 39Jabechji̧ eami̧ pumȩ üdë, jibëa̧ chji̧rämo̧ jo̧rȩtamȩrȩ cjo̧ro̧mȩ pio judi, jibëa̧ i pio ju̧i̧ ji̧dë ma jidatämi̧ cjiamȩ pio judi, cjäri̧ made, tjamo̧ri̧ cjo̧ro̧rea̧ dadëpade. Jabo eami̧ üdë ca̧ ma̧ȩ pio ju̧i̧ ji̧dë ma ta̧rëdiämȩrȩ cjo̧ro̧mȩ judi, pio jȩa ja̧bo tänȩpai̧ daräbo chjuari̧ quëna̧mȩrȩ cjo̧ro̧mȩ pio judi, jabechji̧ tjamo̧ri̧ cjo̧ro̧rea̧ dapade, bucho ana̧ cjo̧ro̧rea̧ damȩrȩ ⁠—⁠yo̧mȩrȩ ni̧bä chjaorëremȩdejȩrȩ Jechu judi.

Chjadëri̧ ba ano̧padiibe Ütë tjamo̧ judi

Marco 9:41

40Ado Jechu judi ji̧dë u̧i̧ ni̧bä chjaorëremȩdejȩrȩ:

⁠—⁠Danȩrȩ, eami̧ pumȩ üdë pio cüdëmi̧ dari̧ japarä judi, pio dibë cjäri̧ri̧ cjiamȩrȩ jearä judi, jabechji̧ pio coabo cjäri̧ri̧ cjia dami̧ dari̧ jeadique. Ado eami̧ pumȩ üdë pio coa cjäri̧ri̧ cjia damȩrȩ jearä judi, pio coa chjadüa̧mȩ pio ju̧i̧bo cjäri̧ri̧ cjia dami̧ dari̧ jeadejȩ. 41Ado eami̧ pumȩ üdë Ütërë ea jana̧ chjadüa̧ oa ni̧bämȩ pio ju̧i̧ cjäri̧ri̧ cjia damȩrȩ jearä judi, ‘Aja̧ ba chia oa ja̧bepadida, Ütë tjamo̧ ja̧ ma̧ȩ oa ni̧bädida’ quëna̧ jo̧rȩtamȩrȩ chjadëri̧ ëba cjo̧ro̧rä judi, jabechji̧ pio judi ba ano̧a̧ oa cjiami̧ dari̧ cjiapade. Tjamo̧ davä. Ütërë ea jana̧ chjadüa̧ oa ni̧bämȩ pio judimi̧ dari̧ ba ano̧a̧ oa cjiapade. Ado eami̧ pumȩ üdë coëma cjiari̧ cjo̧ro̧mȩ pio ju̧i̧ cjäri̧ri̧ cjia damȩrȩ jearä judi, ‘Aja̧, coëma cjiari̧ cjo̧ro̧dida, coëma cjiari̧ cjo̧ro̧pea̧ üdë ba chiadida’ quëna̧ jo̧rȩtamȩrȩ chjadëri̧ ëba cjo̧ro̧rä judi, jabechji̧ coëma cjiari̧ cjo̧ro̧mȩ pio judi ba ano̧a̧ oa cjiami̧ dari̧ cjiapade. Tjamo davä. Coëma cjiari̧ cjo̧ro̧mȩ pio judimi̧ dari̧ ba ano̧a̧ oa cjiapade. 42Ado eami̧ pumȩ üdë ca̧ jadü pio ji̧ri̧ a̧dorä judi, eami̧ oa yürürä judi, ui chjöchja oa yürürä judi, ba chia tjamo̧dëmȩmi̧ da pio ju̧i̧ yürürä judi, jabechji̧ chjadëri̧ ba ano̧a̧ oa cjiapade peaja̧di. Jabechji̧ ca̧ Ama̧i̧ pio judi chjadëri̧ ba ano̧padejȩrȩ a̧doji̧ri̧ pio ji̧ri̧, ca̧ jadü pio ji̧ri̧ a̧doji̧ri̧ pio ji̧ri̧ ⁠—⁠yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi.

Currently Selected:

Mateo 10: Pume

Highlight

Copy