Mateo 9
9
Jechu judi chjaparȩrëremȩdejȩ tai̧dëmȩ pio ju̧i̧, ju chjererea̧ dadëmȩ oa
Marco 2:1-12; Uruca 5:17-26
1Ado Jechu judi chara oa buamȩrȩ ado chjereno̧ baärëremȩde tja oëräpȩ. Ado tja oëräpȩ chjätäa̧ duri oa, baärëremȩde jënȩ cjo̧ro̧mȩ bë ma̧ri̧räpȩ ju̧ri̧. 2Ado ju̧ri̧pȩ baädäräa̧mȩ oa, pumȩ judiro̧ chjaodëri̧ ara go̧düna̧ra̧rëreji̧ri̧diro̧jo̧ȩ tai̧dëmȩ ju̧i̧, ju chjererea̧ dadëmȩ pio ju̧i̧. Jibëa̧ tjae mo̧a̧rea̧ra̧ ara jana̧ji̧ri̧rȩ ara go̧düna̧ra̧dirȩ. Ado pio jȩaiäpȩ jana̧ji̧ri̧ oa jibëa̧ chji̧rä cjacjarë darëremȩdejȩrȩ Jechu judi. Pio jȩaiäpȩmo̧ chjuari̧ quëna̧ji̧ri̧ pio ji̧ri̧ cjacjarë daea̧ ji̧, 'Aja̧, tai̧dëmȩ pio ju̧i̧ chjaodëri̧ chjaparȩpai̧ dadiji̧da’ quëna̧ji̧ri̧ oa darëremȩdejȩrȩ. Ado pio ju̧i̧iä yo̧a̧dejȩ tai̧dëmȩ pio ju̧i̧:
—Järivä ca̧ ja —yo̧a̧dejȩ—. Mȩnȩ chjai̧dëri̧ japea̧ üdë duridëparȩa̧ oa cjiade —yo̧a̧dejȩ.
3Ado ju̧ri̧pȩrëreji̧ri̧dirȩ Moicherë go̧ȩparërea̧ ma̧ȩ oa a̧ra̧ano̧ji̧ri̧ judiro̧. Ado Jechu judi yo̧a̧ pio ju̧i̧ ta̧rëa̧ oaiä, ana̧ tjamo̧ri̧ jo̧rȩtaji̧ri̧rpea̧dirȩ. ‘Jabo cjäri̧ madida, ja̧di ta̧rëri̧ ni̧bärea̧mi̧dëdida, jabechji̧ pio yodëje chjai̧dë oa duridëparȩrea̧mi̧dëdida, jabo Ütë tjamo̧ pio judimo̧rȩ duridëparȩrea̧mi̧ dadida, ado pio yodëje ja̧di ta̧rëri̧ ni̧bäa̧ oaiä, Ütëcji̧ quëna̧ ni̧bämȩdida, Ütë tjamo̧ pio ju̧i̧iäpȩmo̧ chjai̧dëri̧ ni̧bämȩdida’ quëna̧ jo̧rȩtaji̧ri̧pea̧dirȩ Jechu pio ju̧i̧ chjiari.
4Jabo Jechu judi jibëa̧ chji̧rä cjacjarë damȩrȩ iëno̧ë ta̧rërëremȩdejȩrȩ:
—¿Tjana̧ ju̧i̧iä chjai̧dëri̧ jo̧rȩtanȩrȩ dibëa̧ chji̧ra̧ pio ju̧ri̧ra̧? —iëno̧ë ta̧rëa̧dejȩrȩ— 5Danȩrȩ, ¿tjana̧ tjamo̧de pio coaiä jamȩpai̧ da tjamo̧ üdë? Jabo tai̧dëmȩ judi chjai̧dëri̧ japea̧ pio ju̧i̧ duridëparȩpea̧ üdë, jabo tai̧dëmȩ ju̧i̧ chjaparȩpea̧ üdë. ¿Tjana̧ tjamo̧de pio coaiä jamȩpai̧ da tjamo̧ üdë? ¿Yö̧ta dari̧ jo̧rȩtanȩrȩ mȩnȩro̧? Danȩrȩ, eami̧ pumȩ ja̧ chjai̧dë pio ju̧i̧ duridëparȩpea̧ üdë, dëdë, chjao tjamo̧de. Ado tai̧dai̧ damȩ pio ju̧i̧ chjaparȩpea̧ üdë peaja̧di chjao tjamo̧de. Ji̧mo̧ baäde. Jabechji̧ a̧dë chjäte jauëchjamȩ Ütë pio ju̧i̧iämo̧i̧ chjaparȩrea̧mi̧ dade tai̧dëmȩ judi. Ado peaja̧di a̧dë chjäte jauëchjamȩ Ütë pio ju̧i̧iämo̧i̧ duridëparȩrea̧mi̧ dade. 6Ado yaba̧, mȩnȩro̧ pio coaiäpȩmo̧ coëma cjiari̧ jo̧rȩtapea̧ oa, jabechji̧ chjadëri̧ na̧rȩparequededibe —yo̧a̧dejȩrȩ—. 'Aja̧, Pumȩrȩ Ara̧ Tjamo̧ judi Ano̧mȩ pio judi tjamo̧dida, chjai̧dë pio ju̧i̧ duridëparȩrea̧ chiamȩdida, Ütë tjamo̧ pio judi yürüa̧ oa chjai̧dë oa duridëparȩrea̧ chiamȩ pio judidida, chiriräpȩti̧ oa cjo̧ro̧ji̧ri̧ pio ji̧ri̧ duridëparȩrea̧ chiamȩdida' quëna̧rea̧mi̧ dari̧ chjadëri̧ na̧rȩparequededibe —yo̧a̧dejȩrȩ.
Ado ja̧di ta̧rëri̧ yo̧ ëte, Jechu judi yo̧a̧dejȩ tai̧dëmȩ pio ju̧i̧iäpȩmo̧:
—Cjitëvä. Na̧ tjae mo̧a̧rea̧ oa mitë ëte, mu̧i̧ baävä na̧ bëräpȩ. Chjapea̧ oa cjiarenȩ —yo̧a̧dejȩ.
7Ado tai̧dërëremȩ pio judi chjaodëri̧ cjitëno̧a̧ ëte, baärëremȩde jibëa̧ bëräpȩ. 8Ado pumȩ judiro̧ Jechurë ja̧di dari̧ japea̧mȩ oa irä daea̧ oaiä, ana̧ri̧ jo̧rȩtaji̧ri̧pea̧dirȩ uapa tjamo̧ji̧ri̧rȩ. ‘Chia chia, ja̧di dari̧ japarea̧ yürüa̧diji̧da, pumȩ pio ju̧i̧iäpȩmo̧ ja̧di dari̧ japarea̧ yürüa̧diji̧da, Ütë tjamo̧ pio judi yürüa̧diji̧da, ado pio ju̧i̧iä Ütërë yürüa̧ jauëchjara̧ pio ju̧ri̧ra̧ japea̧dida, ja̧di dari̧ japapea̧ ji̧ tjamo̧ yo̧rea̧ yürüa̧diji̧da’ quëna̧ jo̧rȩtaji̧ri̧rȩ chjacjiamȩri̧ jo̧rȩtarërëreji̧ri̧diro̧jo̧ȩ Ütë tjamo̧ pio ju̧i̧iäpȩmo̧. Aja̧, ja̧di dari̧ jo̧rȩtaji̧ri̧pea̧dirȩ pumȩ judiro̧ Jechu judi tai̧dërëremȩ pio ju̧i̧ chjaparȩa̧mȩ oa irä daea̧ oaiä.
Jechu judi ëna̧diärëremȩdejȩ Mateo pio ju̧i̧
Marco 2:13-17; Uruca 5:27-32
9Ado Jechu judi pio judiri jämȩrȩ darëremȩdejȩ Mateo quȩmȩ pio ju̧i̧, domano̧ ja̧ ütëti̧ pio ji̧ri̧ ja̧ oa chëre boamȩ pio ju̧i̧. Chëre boarea̧ jo̧ tjoräpȩ chamȩ oa darëremȩdejȩ. Ado ja̧di ta̧rëri̧ yo̧mȩrȩ yabërëremȩdejȩ:
—Cho̧rë jana̧coe —yo̧a̧dejȩ.
Ado Mateo judi chjaodëri̧ cjitëno̧ ëte, cho̧rë järëremȩdejȩ.
10Ado ji̧dë duri oa gȩnȩpea̧rä, Jechu judi jibëa̧ jadüborë jura charëreji̧ri̧dirȩ Mateo ja̧ bëräpȩ. Ado domano̧ ja̧ ütëti̧ pio ji̧ri̧ ja̧ oa chëre boaji̧ri̧ pio judiro̧ no̧i̧dërë jura charëreji̧ri̧dirȩ peaja̧di, chjai̧dëri̧ japaji̧ri̧ pio judiro̧borë. 11Jabo pjaricheo pio judiro̧ Jechu pio ju̧i̧ daea̧rä, chjai̧dëri̧ japaji̧ri̧ pio ji̧ri̧ nöta jura chamȩ oa daea̧rä, goae tjamo̧dërëremȩdejȩrȩ. Ado pio ju̧i̧iäji̧ri̧rȩ iëno̧ë ta̧rëa̧diro̧jȩrȩ Jechu ja̧ jadü pio ji̧ri̧:
—Danȩrȩ, dibë a̧ra̧ano̧mȩ pio judi ëba jura chadejȩrȩ domano̧ ja̧ oa chëre boaji̧ri̧ pio ji̧ri̧ nöta, chjai̧dëri̧ japaji̧ri̧ pio ji̧ri̧ nöta —yo̧a̧diro̧jȩrȩ—. ¿Jabo tjana̧ japea̧ ju̧i̧iä ëba jura chadejȩrȩ pio jiro pumȩ pio ji̧ri̧? Chjadëdëde —yo̧a̧diro̧jȩrȩ.
12Jabo Jechu judi judiro̧ yo̧a̧ pio ju̧i̧ ta̧rëa̧rä, dëbë yo̧rea̧ yürüdëa̧dejȩrȩ jibëa̧ jadü ji̧ri̧, jabo pio judi tuti yo̧mȩrȩ, ja̧di ta̧rëri̧ yo̧rëremȩdejȩrȩ pjaricheo pio ji̧ri̧iäpȩmo̧:
—Tjana̧ japea̧ ju̧i̧iä chjai̧dëri̧ japaji̧ri̧ pio ji̧ri̧ nö̧ta ëba jura chadë, jabechji̧ chjari̧ dopaji̧ri̧ pio judiro̧, ‘Aja̧, chjaparȩmȩ pio ju̧i̧iäpȩ jäpaquëda, coa a̧dorea̧ chiamȩ pio ju̧i̧iäpȩ jätäremȩquëda’ quëna̧ jo̧rȩtadë madirȩ —yo̧a̧dejȩrȩ—. Jabo ja̧didëdirȩ gito ja̧boji̧ri̧ judiro̧. ‘Chjaparȩmȩ pio ju̧i̧iäpȩ jätäremȩquëda, coa a̧dorea̧ chiamȩ pio ju̧i̧iäpȩ jätäremȩquëda’ quëna̧ jo̧rȩtadirȩ. 13Danȩrȩ, ‘coëma cjiari̧ cjo̧ro̧quëda’ quëna̧ji̧ri̧ pio ji̧ri̧ ëna̧diäera̧padëa̧requedejȩrȩ, jabo jabechji̧ chjai̧dëri̧ japaji̧ri̧ pio ji̧ri̧ ëna̧diäera̧pea̧requedejȩrȩ —yo̧a̧dejȩrȩ Jechu judi—. Tjamo̧ davä. ‘Chjai̧dëri̧ japamȩquëda’ quëna̧ji̧ri̧ pio ji̧ri̧ a̧doera̧pea̧requedejȩrȩ. Pio ji̧ri̧ mitëpea̧ oa ma̧na̧requede cüdë. Ado pio ju̧i̧iä chjai̧dë oa japaji̧ri̧ pio ji̧ri̧iäpȩrequede. Ado peaja̧di ta̧rëri̧ go̧ȩpea̧ oa cjiarëremȩde ma̧ȩ üdë. Ta̧rëchji̧vä:
“Danȩrȩ, mȩnȩro̧ o ji̧ri̧iäpȩmo̧ cjäri̧ri̧ cjia da üdë a̧dë chjäte ba chiade pio coaiä. Jabechji̧ mȩnȩro̧ pio coaiäpȩmo̧ ji̧dë ma goe gu̧rori̧ cäë yürüa̧ pio ju̧i̧ u̧i̧ ba chiade o ji̧ri̧iäpȩmo̧ cjäri̧ri̧ cjia da̧ üdë.”
Aja̧, ja̧di ta̧rëri̧ go̧ȩpea̧ oa cjiade ma̧ȩ üdë —yo̧a̧dejȩrȩ Jechu judi—. Ado pio ju̧i̧iä pio ji̧ri̧ nö̧ta ëba cjiarequedejȩrȩ. Jabechji̧ pio ji̧ri̧ cjäri̧ri̧ cjia dapea̧ oa ëba cjiarequedejȩrȩ. Ado mȩnȩro̧ pio jiro ma̧ȩ pio ju̧i̧ chjiari ji̧dë u̧i̧ chjadëri̧ dabapea̧ oa, jabechji̧ urëdi oa jo̧rȩtatäreji̧ri̧nȩrȩ —yo̧mȩrȩ ni̧bä chjaorëremȩdejȩrȩ Jechu judi pjaricheo pio ji̧ri̧iäpȩmo̧. ‘Jabechji̧ coëma cjiari̧ cjo̧ro̧quëda, gito ja̧bodëmȩmi̧ dari̧ cjiaquëda' quëna̧ji̧ri̧ pio ji̧ri̧ ëna̧diäera̧padëa̧dejȩrȩ Jechu judi, jabo jabechji̧, chjai̧dëri̧ japamȩquëda, gito ja̧bomȩmi̧ dari̧ cjiamȩquëda’ quëna̧ ji̧ri̧ pio ji̧ri̧mo̧i̧ ëna̧diäera̧pea̧dejȩrȩ. Ado pio ju̧i̧iä ja̧di ta̧rëri̧ yo̧mȩrȩ dëbë ni̧bä chjaorëremȩdejȩrȩ pjaricheo pio ji̧ri̧iäpȩmo̧ Jechu judi.
Ütë tjamo̧ ju̧i̧ ni̧bäpea̧ pio ju̧i̧ chjiari, juradëji̧ri̧rȩ ni̧bäpea̧ pio ju̧i̧ chjiari ni̧bärëremȩdejȩrȩ Jechu judi
Marco 2:18-20; Uruca 5:33-35
14Ado cja̧rȩmo̧ doremȩrä Juan pio ju̧i̧ ja̧ jadü judiro̧, uirä chudamȩ pio ju̧i̧ ja̧ jadü pio judiro̧ goë daera̧pea̧diro̧jo̧ȩ Jechu ju̧i̧. Ado ja̧di ta̧rëri̧ yo̧ji̧ri̧rȩ yo̧rëreji̧ri̧diro̧jo̧ȩ:
—Danȩ, pio a̧ro̧rȩ jo̧rȩta̧mi̧ jiadarea̧ro̧jo̧ȩ jurarea̧ pio ju̧i̧ —yo̧a̧diro̧jo̧ȩ—. Jabechji̧ juratärea̧ ji̧, jiadarea̧ro̧jo̧ȩ Ütë tjamo̧ pio ju̧i̧ ana̧ri̧ jo̧rȩtapea̧ oa, jurarea̧ pio ju̧i̧iä oëra̧diächea oa. Ado peaja̧di dari̧ japadirȩ pjaricheo judiro̧ —yo̧a̧diro̧jo̧ȩ—. Jabo danȩ, na̧ jadü pio judiro̧borë jurarea̧ jiadaji̧ri̧rȩ cjo̧ro̧tärea̧ ji̧, ¿tjana̧ ju̧i̧iä japadë madirȩ? —iëno̧ë ta̧rëa̧diro̧jo̧ȩ.
15Ado Jechu judi pio ji̧ri̧ ta̧rëa̧ oaiä, ja̧di ta̧rëri̧ yo̧mȩrȩ dëbë yo̧rëremȩdejȩrȩ na̧rȩrea̧ ma̧ȩmi̧ dara̧. Jabechji̧ iei̧ pea ëbamȩmi̧ darë na̧rȩrea̧ ma̧ȩmi̧ dara̧ ni̧bä chjaorëremȩdejȩrȩ, pio jȩa chjiari ni̧bämȩrȩ:
—Tjana̧ ju̧i̧iä jurarea̧ oa jiadadë, danȩrȩ, pumȩ judi jibëa̧ iei̧ pio ji̧ pea ëba̧rä, jabechji̧ pumȩ judiro̧ a̧dopapadirȩ airi̧ cjia airi̧ cjia jurapea̧ oa —yo̧a̧dejȩrȩ—. Ado pea ëbamȩ judi pio ji̧ri̧di ëba a̧dopea̧ oaiä, jabechji̧ jurarea̧ pio ju̧i̧ jiadaji̧ri̧rȩ ëba a̧doparea̧mi̧dëde. Jabechji̧ jurapea̧de. Ana̧ri̧ jo̧rȩtadëpea̧de jabo ma̧ chiadëri̧ cjiaji̧ri̧rȩ a̧dopapea̧de. Ëba airi̧ cjiaji̧ri̧rȩ jurapea̧de. Aja̧, ja̧di tara yo̧requededibe —yo̧a̧dejȩrȩ—. Danȩrȩ, üi̧ judi jibëa̧ iei̧ pio ji̧ pea ëba̧rä, jabechji̧ jurarea̧ pio ju̧i̧ jiadaji̧ri̧rȩ a̧dopadëpea̧de. Jabo dëdë, pea ëbamȩ üi̧ pio judi baë goa baäa̧ oa cjiarä, jȩa eadëji̧ri̧ ji̧ri̧iä baë goa baäa̧ oa cjiarä, jabechji̧ jibëa̧ pumȩ judiro̧ jurarea̧ pio ju̧i̧ a̧dë jo̧rȩtapadiro̧jo̧ȩ, judiro̧ odai̧ dari̧ jo̧rȩta̧ oaiä. Aja̧, pio jiro japamitërä, dëdë, jurarea̧ pio ju̧i̧ jiadaji̧ri̧rȩ ana̧ri̧ jo̧rȩtapai̧ dadiro̧jo̧ȩ Ütë tjamo̧ ju̧i̧ —yo̧mȩrȩ dëbë yo̧rëremȩdejȩrȩ Jechu judi Juan pio ju̧i̧ ja̧ jadü pio ji̧ri̧iäpȩmo̧.#9:15 Aja̧, ja̧di ta̧rëri̧ dëbë yo̧mȩrȩ yo̧rëremȩdejȩrȩ Jechu judi Juan pio ju̧i̧ ja̧ jadü pio ji̧ri̧iäpȩmo̧. Jabechji̧ iei̧ ëbamȩmi̧ darë na̧rȩrea̧ ma̧ȩmi̧ dara̧ ni̧bä chjaorëremȩdejȩrȩ, pio jȩa chjiari ni̧bämȩrȩ. Jabechji̧ jibëa̧ jadü pio ji̧ri̧di pio yoa chirirä cjo̧ro̧a̧ nö̧ta, jabechji̧ ma̧ chiadëri̧ cjiari̧ ëba tai̧pea̧de, jurarea̧ oa jiadarea̧ decjiari̧. Ado pio ju̧i̧iä ja̧di ta̧rëri̧ dëbë yo̧rëremȩdejȩrȩ Juan pio ju̧i̧ ja̧ jadü pio ji̧ri̧iäpȩmo̧. Aja̧, judiro̧ iëno̧ë ta̧rëa̧ oaiä, Jechu ja̧ jadü pio judiro̧ jurarea̧ oa jiadadëji̧ri̧rȩ cjo̧ro̧a̧ pio ju̧i̧ chjiari iëno̧ë ta̧rëa̧ oaiä, jabechji̧ ja̧di ta̧rëri̧ dëbë yo̧rëremȩdejȩrȩ.
No̧mȩ ja̧ a̧ra̧ano̧rea̧ ma̧ȩ üdë mirerea̧mi̧dëde a̧ra̧ano̧rea̧ ma̧ȩ peaja̧ra̧ pio ju̧ri̧ra̧
Marco 2:21-22; Uruca 5:36-39
16Ado Jechu judi ji̧dë u̧i̧ ni̧bämȩrȩ a̧de ni̧bä chjaorëremȩdejȩrȩ ado cja̧rȩmo̧ na̧rȩrea̧ ma̧ȩmi̧ dara̧.
—Danȩrȩ, eami̧ pumȩ üdë chjibo no̧mȩ ja̧ oa, co chiamȩ chjibo oa jëdano̧rä judi, jabechji̧ pjaranera chjibo coto peaja̧ra̧ pio ju̧ri̧ra̧ goë ca̧ra̧rea̧mi̧dëde. Jabechji̧ pjaranera chjibo coto peaja̧ üdë uira̧ joa oaiä, cjäri̧ made, tocoi̧ boi̧chji̧mi̧ dape jäpade. Ado tocoi̧ boi̧chji̧mi̧ dape jäa̧ oaiä, ado chjereno̧ quiquiri chiapai̧ dade no̧mȩ ja̧ chjiboremȩ üdë. Pio ju̧i̧iä ja̧di dari̧ japarea̧mi̧dëde. 17Ado bino quȩmȩ ërü oa japamȩ judi, jabechji̧ joë no̧mȩ ja̧rä, chivo ira̧ japea̧ oa cjiamȩ joë no̧mȩ ja̧rä boeadëpea̧de. Jabechji̧ joë no̧mȩ ja̧rä boearä judi, cjäri̧ made, ërü üdë ma̧i̧ dari̧ ö̧da oaiä popë chiapai̧ dade, chëquë chëquëape jäa̧ oaiä, i üdë chjuadëpe baga̧ oaiä. Jabechji̧ ërü decjiari̧ popë chiapai̧ dade. Ja̧di tara joë peaja̧rämo̧ chö̧ra̧pea̧de chjadëri̧ boeapea̧ oa. Ja̧di dari̧ chö̧ra̧ oaiämo̧i̧ popë chiadëpade joë üdë, ado ërü üdë daburo aeno̧a̧ oa cjiadëpade —yo̧rëremȩdejȩrȩ Jechu judi.
Aja̧, pio jiro na̧rȩrea̧ ma̧ȩmi̧ dara̧ ni̧bä chjaorëremȩdejȩrȩ pumȩ ji̧ri̧ Jechu judi judiro̧ na̧e chiape bagapea̧ oa, peaja̧ a̧ra̧ano̧rea̧ ma̧ȩ üdë no̧mȩ ja̧ a̧ra̧ano̧rea̧ ma̧ȩremȩra̧ pio ju̧ri̧ra̧ a̧de mirea̧ oa cjiami̧ dari̧ japachea oa.
Jechu judi bëdü tänȩrëremȩdejȩ ja̧boa̧yi̧ boi̧ pio ji̧, ado nö̧ri nö̧ripë tara cjiayi̧ pio ji̧ chjaparȩrëremȩdejȩ
Marco 5:21-43; Uruca 8:40-56
18Ado Jechu judi ja̧di ta̧rëri̧ ni̧bä chjaomȩ oa, judio tjamo̧ yo̧mȩ pio judi go̧düna̧ra̧rëremȩdejȩ. Ado pio ju̧i̧ ja̧ dëbëräpȩ ju chatura̧ cjiadäräa̧mȩrȩ ja̧di ta̧rëri̧ cjo̧dëmȩrȩ yo̧rëremȩdejȩ:
—Danȩ, ca̧ jabi jini̧ pea ja̧boa̧nȩ —yo̧a̧dejȩ—. Jabo jabechji̧ ja̧boa̧räbo pio coadi jätä ea tjamo̧requedemȩ mȩnȩ pio ji̧ ga̧re tarapea̧ oa, jini̧ ado chjereno̧ cjo̧ro̧rea̧ dapea̧ oa —yo̧a̧dejȩ.
19Ado Jechu judi tjamo̧ yo̧mȩ pio ju̧i̧iä ta̧rëa̧ oaiä, jabechji̧ cjitë ëte cho̧rë järëremȩdejȩ, jibëa̧ jadüborë. 20Ado tjamo̧ yo̧mȩ pio ju̧i̧ cho̧rë jäa̧mȩ oa, cja̧rȩmȩ iei̧ jini̧, no̧mȩ tjamo̧ri ja̧ gitoyi̧ pio jini̧, 12 uiri ja̧ nö̧ri nö̧ripë tara cjiayi̧ pio jini̧ peaja̧di ëba järëreyi̧nȩjȩ. Ado pio ju̧i̧ ja̧ duri oa jäyi̧rȩ goadi ga̧re tara̧nȩjȩ ju̧i̧ ja̧ chjibo yuroi̧ oa. 21‘Jaeboquëda, pio ju̧i̧ ja̧ chjibo oa ga̧re tararea̧ darä judi, chjaodëri̧ chjapea̧ oa cjiaeyi̧quëda’ quëna̧ jo̧rȩtayi̧rȩ ga̧re tara̧nȩjȩ. 22Ado Jechu judi mire damȩrȩ darëremȩdejȩ. Ado pio ji̧ gatë damȩrȩ ja̧di ta̧rëri̧ yo̧rëremȩdejȩ:
—Järivä ca̧ jabi —yo̧a̧dejȩ—. Mȩnȩ quëna̧ oaiä, jabechji̧ chjapea̧ oa cjiamȩ —yo̧a̧dejȩ.
Ado chjaodëri̧ chjapea̧ oa cjiarëreyi̧nȩ.
23Ado Jechu judi tjamo̧ yo̧mȩ pio ju̧i̧ ja̧ bëräpȩ go̧düdäräa̧rä, pumȩrȩ ja̧boa̧rä pjurarea̧ oa pjuraji̧ri̧ oa darëremȩdejȩrȩ. Ado peaja̧di ma̧i̧ dari̧ gürë eari̧ cjiaji̧ri̧ oa darëremȩdejȩrȩ pumȩ buba oa, ëcarami̧ dara̧ jo̧rȩtaji̧ri̧ oa, ëna̧dië ëna̧dië ejaro cjiaji̧ri̧ oa. 24Ado pio ji̧ri̧ daea̧rä, Jechu judi yo̧rëremȩdejȩrȩ pumȩ buba oa:
—Jabechji̧ baächji̧vä —yo̧a̧dejȩrȩ—. Tjamo̧ri̧ ja̧bodëa̧nȩ iei̧ boi̧ jini̧, jabomo̧ mo̧a̧ cjianȩ. Baächji̧vä —yo̧a̧dejȩrȩ.
Jabo pio ju̧i̧ ta̧rëa̧ oaiä airi̧ cjiaji̧ri̧rȩ daea̧diro̧jo̧ȩ Jechu ju̧i̧, ‘tjamo̧ri̧ dabadëdida’ quëna̧ jo̧rȩtaji̧ri̧rȩ. 25Jabo judiro̧ pio jȩa chjiari airi̧ cjiaräbo, jabechji̧ bë dairäpȩmo̧ go̧dü tänȩrëremȩdejȩrȩ. Ado ja̧dëa ji̧ judiro̧ dairäpȩ cjiadiäa̧rä, järëremȩde iei̧ boi̧ pio ji̧iäpȩ. Ado pio ji̧ ja̧ ichi oa mitëa̧ oaiä, ja̧boa̧reyi̧ pio jini̧ chjaodëri̧ cjitëa̧nȩ. 26Ado Jechu judi chjaparȩa̧ üdë oëra̧ti̧ oa chjuchjupechärëremȩde chjaodëri̧, oëra̧ti̧ oa cjo̧ro̧ji̧ri̧ pio judiro̧borë ta̧rërea̧mi̧ dari̧.
Jechu judi chjaparȩa̧dejȩrȩ da cotoji̧ri̧ pio ji̧ri̧
27Ado Jechu judi iei̧ boi̧chji̧rȩ cjo̧ro̧mȩ bëri pio judiri go̧düa̧rä, yo̧a̧ri̧rȩ cho̧rë järëreji̧ri̧diro̧jo̧ȩ, da cotoji̧ri̧ pio judiro̧. Ado to̧bari̧ ëna̧diäji̧ri̧rȩ ëna̧diäa̧diro̧jo̧ȩ Jechu ju̧i̧:
—Danȩ, yo̧rea̧ro̧mȩ Davi pio judiri ja̧mȩ ju̧i̧. Jabechji̧ pio ibëiäpȩmo̧ cjäri̧ri̧ cjia daibe —yo̧a̧diro̧jo̧ȩ.
28Ado ja̧dëa ji̧ Jechu judi, jënȩ cjo̧ro̧mȩ bëräpȩ yu̧a̧däräa̧rä, jabechji̧ da cotoji̧ri̧ pio judiro̧ yo̧a̧ri̧borë cho̧rë yu̧a̧diro̧jo̧ȩ. Ado Jechu judi yo̧a̧dejȩrȩ:
—‘Pio judi ibë tjamo̧ri̧ chjaparȩrea̧mi̧ dadicoada’ ¿quëna̧dënȩrȩ? —iëno̧ë ta̧rëa̧dejȩrȩ.
Ado dëbë yo̧ji̧ri̧rȩ yo̧a̧diro̧jo̧ȩ:
—Dëdë Ano̧mȩ —yo̧a̧diro̧jo̧ȩ.
29Ado pio ju̧i̧ ta̧rëa̧ oaiä, Jechu judi jibëa̧ dacho oa ga̧re taramȩrȩ yo̧a̧dejȩrȩ:
—Danȩrȩ, mȩnȩro̧ quëna̧mi̧ japë yürüparequededibe —yo̧a̧dejȩrȩ.
30Ado chjaodëri̧ areia̧mi̧ dari̧ cjiadiäa̧de jibëa̧ dacho üdë. Jabechji̧ judiro̧ dadërea̧ ji̧, chjadëri̧ daji̧ri̧pea̧dirȩ. Ado ja̧dëa ji̧ Jechu judi yo̧a̧dejȩrȩ:
—Cjapiri̧ baächji̧vä. Jabechji̧ cüdë dibë chjaparea̧ pio ju̧i̧ chjiari yo̧dëchji̧vä. Jabechji̧ eami̧ pumȩ oa yo̧dëpea̧de —yo̧mȩrȩ to̧bari̧ yo̧rëremȩdejȩrȩ.
31Jabo cjäri̧ madirȩ, ta̧rë ja̧bodëa̧diro̧jo̧ȩ. Jabechji̧ jënȩro̧ jäa̧mi̧ nö̧ta, ni̧bä chjaorëreji̧ri̧dirȩ Jechu judi pio jibë chjiari tuti japea̧ pio ju̧i̧ chjiari, pio ju̧ri̧pȩ cjo̧ro̧ji̧ri̧ pio judiro̧ ütëbodärärë ta̧rërea̧mi̧ dari̧.
Jechu judi chjaparȩrëremȩdejȩ ni̧bärea̧ chiadëmȩ ju̧i̧
32Ado da cotoreji̧ri̧ pio judiro̧ Jechu pio ju̧i̧ a̧dë baäa̧ duri oa, yaröca chiamȩ pio ju̧i̧ ëba go̧düna̧ra̧rëreji̧ri̧diro̧jo̧ȩ pumȩ judiro̧. Ado yaro̧ca üdë ira̧diä cjaeäa̧ oaiä, ni̧bärea̧ yürüdëa̧ oaiä, jabechji̧ ni̧bädëmȩrȩ cjo̧ro̧rëremȩde. 33Ado Jechu judi chjaodëri̧ baä tänȩrëremȩdejȩ yaröca pio ju̧i̧. Ado yaröca üdë baäa̧rä, jabechji̧ ni̧bämȩpea̧de üi̧ üdë. Ado dae cjiaji̧ri̧ judiro̧ bubarë ana̧ri̧ jo̧rȩtaji̧ri̧pea̧dirȩ dacho bëremi̧ cjiami̧ dari̧. Ado yo̧a̧dirȩ:
—Chia chia, a̧ro̧rȩ pio yi Icharai quȩmȩ chiriräpȩ cja̧rȩmȩ co ja̧di dari̧ japea̧ oa dadë marëreji̧ri̧rea̧ro̧jo̧ȩ —yo̧a̧dirȩ.
34Jabo pjaricheo judiro̧ yo̧a̧dirȩ:
—Jabo cjäri̧ made, yaröca ja̧ ütë pio judi yürüa̧ jauëchjara̧ pio ju̧ri̧ra̧ baä tänȩdejȩrȩ yaröca pio ji̧ri̧ —yo̧ji̧ri̧rȩ aechide ni̧bärëreji̧ri̧dirȩ, Jechu pio ju̧i̧ tjamo̧ri̧ eadëji̧ri̧rȩ.
Ja̧bepaji̧ri̧ judiro̧ tjamo̧ri̧ nö̧tadëdirȩ
35Ado Jechu judi oëra̧ti̧ oa chjätäti̧ cjiamȩrȩ bë ma̧ri̧ chjö̧na̧i̧ oa goëde järëremȩdejȩrȩ, bë ma̧ri̧ boi̧chji̧bo. Jabechji̧ judiorë a̧doparea̧ bëräpȩ ju̧ri̧ a̧ra̧ano̧riä tai̧rëremȩde ma̧ȩ chjadëi̧ oa, Ütërë yo̧a̧ chja̧oerä cjo̧ro̧pea̧ ma̧ȩ pio ju̧i̧ chjiari. Ado ju̧i̧ uëri pumȩ ütëbodärä oa peaja̧di chjaparȩ chjaorëremȩdejȩrȩ dami̧ti̧ gito oa ja̧boji̧ri̧ pio ji̧ri̧, eami̧ti̧ taraji̧ri̧ pio ji̧ri̧. 36Ado pumȩ buba oa daea̧ oaiä, cjäri̧ri̧ cjiamȩrȩ darëremȩdejȩrȩ. Jabechji̧ ma̧i̧ da chjai̧dë oa chjätäji̧ri̧ oa, a̧dorea̧ chiadëji̧ri̧ oa darëremȩdejȩrȩ, ovejami̧ daji̧ri̧ oa, pio jibë jidamȩ chiadëji̧ri̧ oa. 37Ado pio ju̧i̧iä yo̧rëremȩdejȩrȩ jibëa̧ jadü ji̧ri̧:
—Danȩrȩ, Ütë tjamo̧ ja̧ ma̧ȩ oa quëna̧pai̧ daji̧ri̧ pio judiro̧ ji̧ra̧ tjamo̧dirȩ —yo̧a̧dejȩrȩ—. Joechjapea̧mȩ jurarea̧mi̧ dadirȩ. Jabo cjäri̧ madiro̧jo̧ȩ, jabepaji̧ri̧ judiro̧ nö̧tadëdiro̧jo̧ȩ pio jiro jurarea̧mi̧ da pio ju̧i̧ mitëpea̧ ji̧. 38Ado pio ju̧i̧iä yo̧requededibe ca̧ jadü, mȩnȩro̧ babui̧ra̧ goë cjo̧dëtä Ano̧mȩ pio ju̧i̧iä. Tjamo̧ davä. Ano̧mȩ pio ju̧i̧iä, mitëpea̧ jurarea̧mi̧ da pio ju̧i̧ ja̧ Ano̧mȩ pio ju̧i̧iä babui̧ra̧ goë cjo̧dëtä yo̧requededibe, judi ja̧bepaji̧ri̧ ji̧ra̧ tjamo̧ oa chjadütä, joechjapea̧mȩ jurarea̧mi̧ da pio ju̧i̧ mitëpaji̧ri̧ pio ji̧ri̧, ji̧ra̧ tjamo̧ oa chjadütä —yo̧mȩrȩ ni̧bä chjaorëremȩdejȩrȩ Jechu judi jibëa̧ jadü ji̧ri̧.
Currently Selected:
Mateo 9: Pume
Highlight
Share
Copy
Want to have your highlights saved across all your devices? Sign up or sign in
©2021 Global Partners, All Rights Reserved
