Mateo 8

Jechu judi chjaparȩrëremȩdejȩ ma̧i̧ da co chiamȩ ju̧i̧

Marco 1:40-45; Uruca 5:12-16

1Ado Jechu judi ya̧mi̧ uëri pio judiri bira̧rä, pumȩ bubarë cho̧rë birarëreji̧ri̧diro̧jo̧ȩ. 2Ado chjaodëri̧ go̧düdärärëremȩde ma̧i̧ da co chiamȩ üi̧ judi Jechu pio ju̧i̧iäpȩ. Ado pio ju̧i̧ ja̧ dëbëräpȩ ju chatura̧ cjiamȩrȩ ja̧di ta̧rëri̧ yo̧rëremȩdejȩ:

⁠—⁠Ano̧mȩ, mȩnȩ ca̧ co oa chjaparȩtämi̧ cjiarä judi, jabechji̧ chjaodëri̧ chjaparȩpai̧ darenȩque, co chja maeari̧ ⁠—⁠yo̧a̧dejȩ.

3Ado Jechu judi ichipë cjiamȩrȩ ga̧re tara̧dejȩ. Ado dëbë yo̧mȩrȩ yo̧a̧dejȩ:

⁠—⁠Aja̧, chjapatämi̧ cjiarequedemȩ. Jabechji̧ chjapea̧ oa cjiavä ⁠—⁠yo̧a̧dejȩ.

Ado chjaodëri̧ chjapea̧de ma̧i̧ da co chiaremȩ üdë. 4Ado Jechu judi yo̧a̧dejȩ:

⁠—⁠Danȩ, cüdë mȩa japea̧ pio ju̧i̧ chjiari yo̧dëpea̧de ⁠—⁠yo̧a̧dejȩ⁠—⁠. Jabechji̧ cjapiri̧ cjiamȩrȩ jävä o ji̧ri̧ chjiari goë tuti ja̧bepamȩ pio ju̧i̧iäpȩ. Pio ju̧i̧ tjamo̧i̧ jävä. Ado pio ju̧i̧ na̧rȩjo̧ȩ na̧ i oa, chjapea̧ oa cjiamȩ pio ju̧i̧. Ado pio ju̧i̧ na̧rȩ ëte, jabechji̧ Moicherë go̧ȩparërea̧ ma̧ȩ üdë yo̧a̧mi̧ yürütä earequedemȩ. Jabechji̧ ma̧i̧ da co chiaremȩ pio judi chjapea̧ oa cjiarä yürüpea̧ pio ju̧i̧ yürütä earequedemȩ. Ja̧di dari̧ japea̧ oaiä, chjadëri̧ na̧rȩemȩrenȩjȩrȩ pumȩ ji̧ri̧iäpȩmo̧, mȩnȩ chjadëri̧ chjapea̧ pio ju̧i̧ chjiari. Aja̧, jävä ⁠—⁠yo̧a̧dejȩ.

Ado järëremȩde gito ja̧borëremȩ judi.

Jechu judi chjaparȩrëremȩdejȩ domano̧ ja̧ guadia ja̧ mu̧i̧tjoi̧ pio ju̧i̧

Uruca 7:1-10

5Ado Jechu judi Capanau̧ quȩmȩ bë ma̧ri̧räpȩ yu̧a̧mȩ oa, dëbëdiärëremȩdejȩ domano guadia ja̧ ütë pio judi, pio ju̧i̧iä cjo̧dëpea̧ oa. 6Ado yo̧a̧dejȩ:

⁠—⁠Danȩ Ano̧mȩ, ca̧ mu̧i̧tjoi̧ üdë ca̧ bëräpȩ a̧rȩde tai̧dëmȩrȩ ⁠—⁠yo̧a̧dejȩ⁠—⁠. Jabechji̧ ja̧bopai̧ dari̧ a̧rȩdique ju chjererea̧ dadëmȩrȩ, gito ana̧ri̧ taramȩrȩ ⁠—⁠yo̧a̧dejȩ.

7Ado Jechu judi dëbë yo̧mȩrȩ yo̧a̧dejȩ:

⁠—⁠Danȩ, jäparequede na̧ bëräpȩ pio ju̧i̧ chjaparȩpea̧ oa.

8Jabo guadia ütë pio judi dëbë yo̧a̧dejȩ:

⁠—⁠Jabo cjäri̧ marenȩ ca̧ Ano̧mȩ, pio coa u̧i̧ ba chia tjamo̧renȩ ⁠—⁠yo̧a̧dejȩ⁠—⁠. Nö̧tadërequedemȩ. Jabechji̧ mȩnȩ ca̧ bëräpȩ yu̧a̧pea̧ ji̧ nö̧tadërequede. Jabomo̧ ma̧ȩ yürüvä mȩnȩ cjiamȩri pio judiri, ca̧ mu̧i̧tjoi̧ pio judi chjadëri̧ chjaparȩa̧ oa cjiapea̧ oa. 9Peaja̧di dari̧ japarequede cüdë. Danȩ, cüdë ma̧ȩ yürüa̧ oaiä, ta̧rëdiädiro̧coe ca̧ mu̧i̧tjoi̧ judiro̧, ado coa u̧i̧ ba chiaji̧ri̧ pio ji̧ri̧ ja̧ ma̧ȩrä japarequede pio cüdë. Danȩ, guadia ütërequede jabo o judiro̧ coa u̧i̧ ba chiadirȩ. Pio ji̧ri̧ ja̧ chja̧oerä cjo̧ro̧requede. Jabo ji̧ri̧ ja̧ chja̧oerä cjo̧ro̧mȩborë, peaja̧di ütërequede cüdë. Tjamo̧ yo̧mȩrequede. Ado pio ju̧i̧iä cüdë eami̧ oa yo̧a̧ oaiä, japa maeadirȩ ca̧ chjao̧eräji̧ri̧ judiro̧. Tjamo̧ davä. Ca̧ guadia mu̧i̧tjoi̧ oa jana̧tä yo̧rä judi, chjaodëri̧ jana̧dique. Ado cja̧rȩmo̧ oa jätä yo̧rä judi, peaja̧di chjaodëri̧ jäde. Ado cja̧rȩmo̧ oa ja̧di dari̧ japatä yo̧rä judi, peaja̧di chjaodëri̧ japadejȩ, cüdë yo̧a̧mi̧. Jabechji̧ cüdë ma̧ȩ yürüa̧ oaiä, jabechji̧ japa maeadirȩ. Ado peaja̧di dari̧ japa jirorenȩ Ano̧mȩ. Ado pio ju̧i̧iä yo̧requedemȩ. Jabomo̧ ma̧ȩ yürüvä. Ca̧ mu̧i̧tjoi̧ judi pio yaba̧ chjaodëri̧ chjapapea̧ oa jabomo̧ ma̧ȩ yürüvä ⁠—⁠yo̧rëremȩdejȩ Jechu ju̧i̧ guadia ütë üdë.

10Ado Jechu judi pio ju̧i̧ ta̧rëa̧ oaiä, goaeri̧ ta̧rëa̧dejȩ guadia ütë oa. ‘Chia chia, chjaodëri̧ quëna̧mȩpea̧dicoada, judiodëborë chjuari̧ quëna̧dicoada’ quëna̧ jo̧rȩtamȩrȩ ma̧ chiadëri̧ cjiamȩrȩ jo̧rȩtamȩpea̧de. Ado pio ju̧i̧iä mȩmȩrȩpe cjiadiärëremȩde Jechu judi pio jȩa cho̧rë jäji̧ri̧ pio ji̧ri̧ tocoi̧mi̧ ano̧ mire ni̧bä chjaopea̧ oa. Ado ja̧di ta̧rëri̧ ni̧bärëremȩdejȩrȩ:

⁠—⁠Tjamo̧i̧ cjiari̧ yo̧requededibe ⁠—⁠yo̧a̧dejȩrȩ⁠—⁠. Danȩrȩ, pio jiro guadia ütë üdë Icharai pio judiri ja̧dëmȩborë, jabechji̧ chjuari̧ quëna̧dique. ‘Jauëchjadida’ quëna̧dique. Jabo pio judimi̧ dari̧ quëna̧mȩ oa jabë dadärädëa̧requede pio yoaiä, Icharai pio judiri ja̧ji̧ri̧ pio ji̧ri̧iä ⁠—⁠yo̧mȩrȩ yo̧a̧dejȩrȩ. 11Ado pio ju̧i̧iä tjamo̧i̧ cjiari̧ yo̧requededibe ⁠—⁠yo̧a̧dejȩrȩ⁠—⁠. Ütara̧ doro, judiodë pio judiro̧borë no̧i̧dërë, chiriräpȩti̧ oa cjo̧ro̧rëreji̧ri̧ pio judiro̧borë Ütërë yo̧a̧ chja̧oerä jadü chapadiro̧jȩrȩ ibëa̧ ütëti̧rea̧ pio ji̧ri̧. Tjamo̧ davä. Abaraa̧ pio ju̧i̧, Icha pio ju̧i̧, ado Jacobo pio ju̧i̧bo jadü chapadiro̧jȩrȩ judiodë pio judiro̧borë. Jabechji̧ dorë cjitëmȩräpȩmo̧ a̧rȩmȩ chiriri pio judiri, dorë biramȩräpȩmo̧ a̧rȩmȩ chiriri pio judiri go̧düdäräpadirȩ davä mechjaräpȩ chapea̧ oa, ibëa̧ ütëti̧rea̧ pio ji̧ri̧ nö̧ta ëba chapea̧. 12Jabo Icharai pio judiri ja̧ji̧ri̧ judiro̧ ütëborë peaja̧di mechjaräpȩ chatärea̧ ji̧, pio judiro̧borë Ütërë yo̧a̧ chja̧oerä yu̧a̧tärea̧ ji̧, cjäri̧ madirȩ, a̧dë chjäte ma̧i̧ dari̧ cjiamȩ bagönȩräpȩ ju̧ri̧ aeno̧a̧ oa cjiapadirȩ. Ado pio ju̧ri̧pȩji̧ri̧ judiro̧ ma̧i̧ da gito oaiä, ji̧dë ma ëna̧dië ëna̧dië ejaro cjiaji̧ri̧rȩ jo̧rȩtapadirȩ, pumȩ taradai̧ tarari̧ cjiaji̧ri̧rȩ ⁠—⁠yo̧mȩrȩ ni̧bä chjaorëremȩdejȩrȩ pio jȩa cho̧rë jäji̧ri̧ pio ji̧ri̧.

13Ado pio ji̧ri̧ ni̧bä chjaoa̧ duri oa, Jechu judi ado chjereno̧ ano̧ mire ni̧bärëremȩdejȩ guadia ütë pio ju̧i̧:

⁠—⁠Jabechji̧ baävä ⁠—⁠yo̧a̧dejȩ⁠—⁠. Mȩnȩ coa cjo̧dëa̧mi̧ pea chjaparȩa̧ oa cjiade na̧ mu̧i̧tjoi̧ üdë. Jabechji̧ mȩnȩ quëna̧ tara, chjaparȩa̧ oa cjiade. Baävä ⁠—⁠yo̧a̧dejȩ.

Ado Jechu judi yo̧a̧ oaiä, chjaodëri̧ chjaparȩa̧ oa cjiadiärëremȩde guadia ja̧ mu̧i̧tjoi̧ üdë, Jechu judi guadia ütë oa yo̧a̧mi̧ nö̧ta.

Jechu judi chjaparȩrëremȩdejȩrȩ pumȩ ji̧ra̧ tjamo̧ oa

14Ado Jechu judi Pedro ja̧ bëräpȩ järëremȩde. Ado pio ju̧i̧ ja̧ bërä yu̧a̧däräa̧rä, daea̧dejȩ Pedro pio ju̧i̧ ja̧ cjö̧na̧ pio ji̧, taipa ja̧boyi̧rȩ a̧rȩyi̧ oa, i ma̧na̧gura cjiami̧ dari̧ areyi̧ oa. 15Ado Jechu judi i tüyi̧ pio ji̧ ja̧ ichi oa ga̧re tara̧ oaiä chjaodëri̧ chjapea̧nȩ. Ado cjatäcjiayi̧rȩ chjaodëri̧ cjitëa̧nȩ Jechu pio ju̧i̧ jurarea̧ oa yürüpea̧ oa. 16Ado gȩnȩpea̧rä, no̧i̧dërë ëba go̧düdärärëreji̧ri̧diro̧jȩrȩ yaröca chiaji̧ri̧ pio ji̧ri̧, gito ja̧boji̧ri̧ pio ji̧ri̧bo. Ado Jechu judi jibëa̧ ma̧ȩra̧ yo̧mȩrȩ chjaodëri̧ baä tänȩrëremȩdejȩrȩ yaröca pio ji̧ri̧, ira̧diä cjaeäji̧ri̧ pio ji̧ri̧. Ado gito ja̧boji̧ri̧ pio ji̧ri̧ ütëbodärä oa peaja̧di chjaparȩrëremȩdejȩrȩ. 17Jabechji̧ judi ja̧di dari̧ chjaparȩa̧ oaiä, tjamo̧i̧ cjiari̧ cjiadiärëremȩde ma̧ȩ üdë. Jabechji̧ ta̧rëchji̧vä Ichaia quȩmȩrea̧ judi pearä go̧ȩparërea̧ ma̧ȩ pio ju̧i̧:

“Jabechji̧ tuti japarëremȩdiibe a̧ro̧rȩ gitori̧ tara̧ pio ju̧i̧ chjiari. Chjaparȩrëremȩdiibe a̧ro̧rȩ gito ja̧boa̧ pio ju̧i̧.”

Aja̧, ja̧di ta̧rëri̧ go̧ȩparëremȩde Ütërë ea jana̧ chjadüa̧ oa ni̧bämȩ judi jabërä Jechu pio ju̧i̧ chjiari.

Chjao tjamo̧de Jechu pio ju̧i̧ cho̧rë jäpea̧ üdë

18Ado cja̧rȩmo̧ doremȩrä, Jechu judi pumȩ buba tjamo̧ oa daea̧ oaiä, pio jȩaiäpȩ jana̧diä jana̧diä cjiaji̧ri̧ oa daea̧ oaiä, yo̧rëremȩdejȩrȩ jibëa̧ jadü pio ji̧ri̧:

⁠—⁠Danȩrȩ, tja oëräpȩmo̧ chjätätärȩ ⁠—⁠yo̧a̧dejȩrȩ.

19Jabo judiro̧ jabë go̧düdëa̧rä, chjaodëri̧ go̧düdärärëremȩde pumȩ üdë, Moicherë go̧ȩparërea̧ ma̧ȩ oa a̧ra̧ano̧mȩ pio judi. Ado Jechu pio ju̧i̧iäpȩ jämȩrȩ yo̧rëremȩdejȩ:

⁠—⁠A̧ra̧ano̧mȩ, mȩnȩ eami̧räpȩ järä, jabechji̧ cho̧rë jäparequedemȩ ⁠—⁠yo̧a̧dejȩ.

20Jabo Jechu judi dëbë yo̧a̧dejȩ:

⁠—⁠Danȩ ca̧ pumȩ, bë goadërequede. Aja̧, oariro judiro̧ jibëa̧ mo̧a̧rea̧ oa goadirȩ. Ado pua judiro̧ peaja̧di jibëa̧ mo̧a̧rea̧ oa goadirȩ. Jabo cüdë ca̧ mo̧a̧rea̧ oa tjamo̧ri̧ goadërequede. Bë goadërequede cüdë. Jabechji̧ Pumȩrȩ Ara̧ Tjamo̧mȩborë mö̧na̧requede cüdë. Eami̧räpȩ mo̧a̧pea̧ oa goadërequede. Ado pio ju̧i̧iä iëno̧ë ta̧rërequedemȩ. ¿Tjamo̧ri̧ cho̧rë jana̧tämi̧ cjiarenȩque? ¿Mo̧a̧rea̧ oa goadëmȩ pio ju̧i̧ cho̧rë jana̧tämi̧ cjiarenȩque? ⁠—⁠yo̧mȩrȩ ni̧bä chjaorëremȩdejȩ Jechu judi Moicherë go̧ȩparërea̧ ma̧ȩ oa a̧ra̧ano̧mȩ pio ju̧i̧.

21Ado Jechu judi pio ju̧i̧ ni̧bäa̧ duri oa, ju̧i̧ ja̧ jadü üdë ado cja̧rȩmo̧rȩ peaja̧di yo̧a̧dejȩ:

⁠—⁠Danȩ, cho̧rë jätämi̧ cjiarequedemȩ ⁠—⁠yo̧a̧dejȩ⁠—⁠. Aja̧, cho̧rë jätämi̧ cjiarequedemȩ jabo jabërequede jabo. Cüdë mȩa cho̧rë jäbea yaboi̧, chja ja̧di järea̧ yürücoe coa nö̧rimȩ pio ju̧i̧ na̧ra̧pea̧ oa ⁠—⁠yo̧mȩrȩ yo̧rëremȩdejȩ chjarapë jo̧rȩtamȩrȩ.

22Jabo Jechu judi dëbë yo̧a̧dejȩ:

⁠—⁠Chja jabechji̧ cho̧rë jana̧coe ⁠—⁠yo̧a̧dejȩ⁠—⁠. Chja ja̧di ja̧boa̧mi̧ dari̧ cjiaji̧ri̧ pio judiro̧ na̧ra̧pai̧ dadiro̧jo̧ȩ. Jabechji̧ cho̧rë jana̧coe coa ⁠—⁠dëbë yo̧a̧dejȩ.

Ja̧di ta̧rëri̧ yo̧mȩrȩ ni̧bä chjaorëremȩdejȩ Jechu judi.

Ma̧i̧ dari̧ pupuripea̧ ji̧, goepa ma cjia tänȩrëremȩde Jechu judi

Marco 4:35-41; Uruca 8:22-25

23Ado Jechu judi chara oa bua̧rä, jibëa̧ jadü judiro̧ cho̧rë bua̧diro̧jo̧ȩ. 24Ado jachipadäräji̧ri̧ oa chjaodëri̧ pupuriparëremȩdejȩrȩ goae tarari̧. Ado gö̧ma̧ üdë ma̧i̧ dari̧ acji ma̧na̧ oaiä chara tjoräpȩmo̧ ui mapea̧de chjaodëri̧, aechja̧de aechja̧de baäa̧ oaiä. Ado pio ju̧i̧iä tarupea̧de chami̧pea̧ ji̧. Jabo Jechu judi mo̧a̧ cjiarëremȩde. 25Ado pio ju̧i̧ chjaodëri̧ na̧rȩno̧a̧diro̧jo̧ȩ. Ado uapa tjamo̧ji̧ri̧rȩ yo̧a̧diro̧jo̧ȩ to̧bari̧:

⁠—⁠Danȩ Ano̧mȩ, chjätä tänȩibe. Jemu̧i̧ ja̧bopai̧ darea̧rȩ. A̧doibe ⁠—⁠yo̧a̧diro̧jo̧ȩ.

26Ado Jechu judi dëbë yo̧mȩrȩ iëno̧ë ta̧rëa̧dejȩrȩ:

⁠—⁠¿Tjana̧ ju̧i̧iä uapanȩrȩ? ¿Tjana̧ ju̧i̧iä tocoi̧mi̧ jo̧rȩtarenȩro̧coe? ¿Tjana̧ ju̧i̧iä jabëtari̧mi̧ maea oa quëna̧renȩro̧coe? ⁠—⁠yo̧a̧dejȩrȩ.

Ado ja̧di ta̧rëri̧ yo̧ ëte, cjitëa̧de. Ado ya̧mȩmi̧ ta̧rëri̧ ni̧bärëremȩdejȩ pupuripamȩ ju̧i̧. Ado chjaodëri̧ chjadëpea̧de. Chjaodëri̧ goepa ma cjiapea̧de.

27Ado jibëa̧ jadü judiro̧ pio ju̧i̧ daea̧ oaiä, ana̧ tjamo̧ri̧ jo̧rȩtaji̧ri̧pea̧dirȩ, jibëa̧ dëbëti̧ra̧ chia ni̧bäji̧ri̧rȩ.

⁠—⁠¿Jabo chjia tjamo̧de pio yodë üi̧ üdë? ¿Tjana̧ pumȩde? Jabechji̧ pumȩ chjami̧ dadëde. Jabechji̧ judi eami̧ oa yo̧ro, chia chia, pumȩ pio judiro̧mo̧rȩ ta̧rë japadëdiro̧jo̧ȩ, jabo pjaepamȩ pio judiborë ta̧rë ja̧bomi̧ dari̧ japadejȩ, gö̧ma̧borë. Ado pio ju̧i̧iä ¿chjiacjivadi? ⁠—⁠yo̧rëreji̧ri̧dirȩ, ana̧ tjamo̧ri̧ jo̧rȩtaji̧ri̧rȩ.

Jechu judi yo̧a̧ri̧ yaröca chiaji̧ri̧ oari pio ji̧ri̧ chjaparȩrëremȩdejȩrȩ

Marco 5:1-20; Uruca 8:26-39

28Ado Jechu judi jibëa̧ jadü pio ji̧ri̧ nö̧ta tja oëräpȩ go̧düdäräa̧rä, Gadara quȩmȩ chiriräpȩ go̧düdäräa̧rä, chjaodëri̧ dëbëdiäa̧diro̧jȩrȩ yo̧a̧ri̧ yaröca chiaji̧ri̧ oari judiro̧, ta̧dë cjarari pio judiri go̧düji̧ri̧rȩ. Jabechji̧ ta̧dë cjararäpȩ ju̧ri̧ cjo̧ro̧rëreji̧ri̧dirȩ, ja̧boa̧ji̧ri̧ pio ji̧ri̧ idë a̧ra̧rea̧räpȩ. Ado yaröca chiaji̧ri̧ pio judiro̧ uapai̧ da tjamo̧ri̧ japea̧ oaiä, jabechji̧ pumȩ judiro̧ ja̧dira̧ järea̧ jo̧rȩtadë marëreji̧ri̧dirȩ. 29Ado judiro̧ Jechu pio ju̧i̧iäpȩ go̧düdäräa̧rä, chjaodëri̧ taruparëreji̧ri̧dirȩ pio ju̧i̧iäpȩmo̧ to̧bari̧ ëna̧diäpea̧ ji̧:

⁠—⁠Aja̧, Ütë tjamo̧ ja̧ Joja pio judirenȩ ⁠—⁠yo̧a̧diro̧jo̧ȩ⁠—⁠. ¿Tjana̧ ju̧i̧iä tja̧rera̧pea̧renȩibe? ¿Conȩdaera̧pea̧renȩibe? ¿Jabërä bape chjaorea̧ do üdë ma̧na̧bea yaboi̧ conȩdaera̧pea̧renȩibe? ⁠—⁠yo̧ji̧ri̧rȩ to̧bari̧ iëno̧ë ta̧rëa̧diro̧jo̧ȩ Jechu ju̧i̧.

30Ado ju̧ri̧pȩ aboea bubarë jurarëreji̧ri̧dirȩ jachi tjamo̧dëräpȩ. 31Ado yaröca judiro̧ yo̧ji̧ri̧rȩ cjo̧dëtarëreji̧ri̧diro̧jo̧ȩ Jechu ju̧i̧:

⁠—⁠Danȩ, mȩnȩ ibë ado cja̧rȩmo̧räpȩ chjadürä judi, chjadëri̧ ano̧ mire chjadüibe aboea pio ji̧ri̧iäpȩmo̧. Pio ji̧ri̧ ano̧ mire ira̧diä cjaeätäreji̧ri̧rea̧ro̧jȩrȩ ⁠—⁠yo̧a̧dirȩ.

32Ado Jechu judi dëbë yo̧a̧dejȩrȩ:

⁠—⁠Jaechji̧vä. Baächji̧vä ⁠—⁠yo̧a̧dejȩrȩ.

Ado pio ju̧i̧ ta̧rëa̧ oaiä, pumȩ ja̧ icjarari pio judiri chjaodëri̧ go̧deno̧rëreji̧ri̧dirȩ aboea ja̧ icjararäpȩ ano̧ mire ira̧diäpea̧ oa. Pio ju̧i̧iä aboea chjö̧na̧i̧rȩ, no̧i̧dë tjamo̧rȩ cjarari̧ cjiape jäji̧ri̧rȩ goae tarari̧ baguraji̧ri̧pea̧dirȩ ya̧mi̧ uëri pio judiri biraji̧ri̧rȩ. Ado ya̧mi̧ curë uë tjamo̧ri pio judiri choa choa ja̧boa̧ maeadirȩ tjaräpȩ ju̧ri̧. 33Ado pio ju̧i̧ daea̧ oaiä, aboea jidareji̧ri̧ pio judiro̧ chjaodëri̧ bagureno̧a̧dirȩ bë ma̧ri̧räpȩ cjo̧ro̧ji̧ri̧ oa ma̧ȩ yürüpea̧ oa. Jibëa̧ pumȩ ji̧ri̧ ma̧ȩ yürüpea̧ oa bagureno̧a̧dirȩ aboea pio ji̧ri̧ chjiari ta̧rë tänȩpea̧ oa, ado yaröca chiareji̧ri̧ pio ji̧ri̧ chjiaribo ta̧rë tänȩpea̧ oa. 34Ado pio ji̧ri̧iä ta̧rëa̧ oaiä, ana̧ri̧ jo̧rȩtaji̧ri̧rȩ chjaodëri̧ go̧düdärärëreji̧ri̧dirȩ bë ma̧ri̧riji̧ri̧ judiro̧, Jechu pio ju̧i̧ irä dapea̧ oa. Ado pio ju̧i̧ daea̧rä, jibëa̧ chiriri pio judiri a̧dë baätä eaji̧ri̧rȩ yo̧ chjaorëreji̧ri̧diro̧jo̧ȩ.

Currently Selected:

Mateo 8: Pume

Highlight

Copy