Mateo 7

‘Pio jiro pumȩ judiro̧ chjai̧dëdiro̧da’ quëna̧ji̧ri̧rȩ aechide yo̧dëpea̧de yo̧mȩrȩ ni̧bä chjaorëremȩdejȩrȩ Jechu judi

Uruca 6:37-42

1Ado Jechu judi cjiadiädëmȩrȩ ji̧dë u̧i̧ ni̧bä chjaorëremȩdejȩrȩ pumȩ ji̧ri̧ ja̧di ta̧rëri̧ yo̧mȩrȩ:

⁠—⁠Danȩrȩ, pumȩ pio ji̧ri̧ badë daji̧ri̧rȩ chjai̧dëri̧ ni̧bädëchji̧vä pio ji̧ri̧ chjiari. Jabechji̧ Ütë tjamo̧ judi pio dibë ütarë bape chjaochea oa, ja̧di dari̧ ni̧bädëchji̧vä ⁠—⁠yo̧a̧dejȩrȩ⁠—⁠. 'Jabechji̧ chjai̧dëdiro̧da, ütarë bape chjaopea̧ maeadiro̧da’ quëna̧ jo̧rȩtaji̧ri̧rȩ aechide yo̧dë machji̧jȩrȩ, Ütë tjamo̧ judi pio dibë chjiari peaja̧dimi̧ dari̧ japachea oa. 2Jabechji̧ mȩnȩro̧ o ji̧ri̧iäpȩmo̧ ütararea̧ra̧ pio ju̧ri̧ra̧ ütarapadidibe Ütë tjamo̧ judi. Jabechji̧ mȩnȩro̧ dibëa̧ pumȩ pio ji̧ri̧ cjäri̧ri̧ cjia dadëji̧ri̧rȩ ütarë darä judi, peaja̧di cjäri̧ri̧ cjia dadëmȩrȩ ütarë dapadidibe Ütë tjamo̧ judi. 3Danȩrȩ ca̧ pumȩ, ¿tjana̧ ju̧i̧iä ana̧ri̧ jo̧rȩtanȩrȩ dibëa̧ omȩ judi chjai̧dëri̧ japea̧ pio ju̧i̧ chjiari, jabo dibëa̧ chjai̧dë pio ju̧i̧ a̧dë jo̧rȩte chjaonȩrȩ? Jabechji̧, mȩnȩro̧ mai̧ da chjai̧dë oa japea̧ pio ju̧i̧ chjiari chjadëri̧ jëdano̧tärea̧ ji̧, japadë manȩrȩ jabo dibëa̧ omȩ judi tocoi̧mi̧ oëra̧diäa̧ pio ju̧i̧iä ana̧ri̧ jo̧rȩtanȩrȩ. 4Jabechji̧ mȩnȩro̧ ana̧ri̧ oëra̧diäa̧ pio ju̧i̧iä, ado mȩnȩro̧ chjadëri̧ jëdano̧dëa̧ oaiä, jabechji̧ dibëa̧ omȩ pio ju̧i̧ tjamo̧ri̧ a̧dorea̧mi̧dërenȩro̧jo̧ȩ. Pio ju̧i̧iä dibëa̧ omȩ pio ju̧i̧ ja̧di ta̧rëri̧ ni̧bärea̧mi̧dëde: "Danȩ omȩ, mȩnȩ no̧dë oa jämi̧ dari̧ cjo̧ro̧chea oa, jabechji̧ pio mȩa chjadëri̧ a̧dorea̧ yürücoe" yo̧rea̧mi̧dëde. 5Ado pio ju̧i̧iä yo̧requededibe. Jabechji̧ coëma cjiari̧ cjo̧ro̧cji̧ quëna̧ japadëchji̧vä. Jabechji̧ mȩnȩro̧ dibëa̧ omȩ pio ju̧i̧ tjamo̧ri̧ a̧dotämi̧ cjiarä judi, judi tocoi̧mi̧ oëra̧diäa̧ pio ju̧i̧ chjiari tjamo̧ri̧ a̧dotämi̧ cjiarä judi, jabechji̧ mȩnȩro̧ ana̧ri̧ oëra̧diäa̧ pio ju̧i̧ chjadëri̧ jëdano̧täreji̧ri̧nȩrȩ yabochja. Ado ja̧dëa ji̧ mȩnȩro̧ chjai̧dëri̧ japea̧ pio ju̧i̧ chjiari chjadëri̧ jëdano̧ ëte, dëdë, dibëa̧ omȩ pio ju̧i̧ a̧dopai̧ darenȩro̧jo̧ȩ peaja̧di ⁠—⁠yo̧mȩrȩ ni̧bä chjaorëremȩdejȩrȩ pumȩ buba oa Jechu judi judiro̧ pio jibë chjiari coëma cjiari̧ jo̧rȩtapea̧ oa.

Ütë tjamo̧ ja̧ ma̧ȩ oa ji̧dë ma jiadaji̧ri̧ pio ji̧ri̧iäpȩmo̧ yürüdëpea̧de ma̧ȩ üdë yo̧rëremȩdejȩrȩ Jechu judi

6Ado Jechu judi ado cja̧rȩmo̧ na̧rȩrea̧ ma̧ȩmi̧ dara̧ ni̧bämȩrȩ ano̧ mire ni̧bä chjaorëremȩdejȩrȩ. Ütë tjamo̧ ja̧ ma̧ȩ oa ji̧dë ma jiadaji̧ri̧ pio ji̧ri̧ chjiari jo̧rȩtamȩrȩ na̧rȩrea̧ ma̧ȩmi̧ da oa yürürëremȩdejȩrȩ aure pio ju̧i̧ chjiari. Ja̧di ta̧rëri̧ yo̧mȩrȩ ni̧bä chjaorëremȩdejȩrȩ:

⁠—⁠Danȩrȩ, Ütë tjamo̧ ja̧ ma̧ȩ oa ji̧dë ma chjuari̧ jiadaji̧ri̧ pio ji̧ri̧iäpȩmo̧ ji̧dë ma a̧ra̧ano̧dëchji̧jȩrȩ ⁠—⁠yo̧a̧dejȩrȩ Jechu judi⁠—⁠. Jabechji̧ aure chjuamȩmi̧ dadirȩ. Aboeami̧ dadirȩ. Danȩrȩ, mȩnȩro̧ jurarea̧ ba chia oa aure oa yürüräbo, jabechji̧ chjaodëri̧ jui gu̧na̧pai̧ dadidibe. Ado mȩnȩro̧ aboea oa ta̧dë ba chia tjamo̧ oa yürürä judi, ¿yö̧ta jo̧rȩtapade? Yö̧ta jo̧rȩtadë, ‘jabechji̧ ba chia tjamo̧dida’ quëna̧ jo̧rȩtamȩrȩ dadëpadejȩ, jabo ji̧dë ma boë cjaeä chjätäpadejȩ ji̧dëri̧. Peaja̧dimi̧ dadirȩ ji̧dë ma jiadaji̧ri̧ judiro̧. Jabechji̧ Ütë tjamo̧ ja̧ ma̧ȩ pio ju̧i̧ ji̧dë ma boë cjaeä chjätämi̧ dari̧ japadiro̧jo̧ȩ. Ado pio ju̧i̧iä yo̧requededibe. Ji̧dë ma jiadaji̧ri̧ pio ji̧ri̧, jabechji̧ ji̧dë ma a̧ra̧ano̧rea̧mi̧dëdirȩ. Jabechji̧ ba chia pio ju̧i̧ badë jo̧rȩtadiro̧jo̧ȩ, aboeami̧ darë. Ado a̧ro̧rȩ chjadëri̧ yürüräbo, jabechji̧ jui gu̧na̧mi̧ dari̧ japapai̧ dadiro̧ibe, auremi̧ darë ⁠—⁠yo̧mȩrȩ ni̧bä chjaorëremȩdejȩrȩ Jechu judi.

Ütë tjamo̧ pio ju̧i̧iä goë cjo̧dëpea̧de

7Ado Jechu judi ji̧dë u̧i̧ ni̧bä chjaomȩrȩ ja̧di ta̧rëri̧ a̧de ni̧bä chjaorëremȩdejȩrȩ Ütë tjamo̧ pio ju̧i̧iä goë cjo̧dëpea̧ pio ju̧i̧ chjiari:

⁠—⁠Danȩrȩ, Ütë tjamo̧ pio ju̧i̧iä ji̧dë ma goë cjo̧dëchji̧vä, ado yürüpadidibe jënȩ daba̧mi̧ ⁠—⁠yo̧a̧dejȩrȩ⁠—⁠. Jabechji̧ ji̧dë ma na̧taji̧ri̧mi̧ dari̧ goë cjo̧dëchji̧vä mȩnȩro̧ dadärärea̧mi̧ dari̧ mitërea̧ dapea̧ oa. Jabechji̧ joë ya oa ji̧dë ma tao tao eari̧ guna̧ gu̧na̧ cjiami̧ dari̧ goë cjo̧dëchji̧vä pio ju̧i̧iä, ado areia̧ oa cjiami̧ dari̧ cjiapade. 8Jabechji̧ eami̧ pumȩ üdë pio ju̧i̧iä goë cjo̧dëmȩ pio judi, jabechji̧ mitërea̧ dapade. Ado ji̧dë ma na̧tamȩmi̧ dari̧ cjo̧dëmȩ pio judi, jabechji̧ dadärärea̧mi̧ dari̧ dapade. Ado joë ya oa tao tao eari̧ guna̧ gu̧na̧ cjiami̧ dari̧ cjo̧dëmȩ pio judi, jabechji̧ areia̧ oa cjiami̧ dari̧ cjiapade pio ju̧i̧ ja̧ oa ⁠—⁠yo̧a̧dejȩrȩ.

9Ado Jechu judi ji̧dë u̧i̧ ni̧bämȩrȩ ja̧di ta̧rëri̧ a̧de ni̧bä chjaorëremȩdejȩ Ütë tjamo̧ ju̧i̧iä cjo̧dëpea̧ ju̧i̧ chjiari:

⁠—⁠Danȩrȩ, eami̧ nö̧rimȩ judi dabade davä jibëa̧ bori̧ ji̧ri̧ yürüpea̧ ji̧ ⁠—⁠yo̧a̧dejȩrȩ⁠—⁠. Jabechji̧ jibëa̧ ja üdë pio ju̧i̧iä jurarea̧ cjo̧dërä judi, chja̧pe oa cjo̧dërä judi, ¿tjana̧ yürütäremȩdejȩ? ¿Jabo ta̧dë oa yürütäremȩdejȩ? Jabo cjäri̧ made, ja̧di dari̧ yürürea̧mi̧dëdejȩ. 10Ado joja judi nö̧rimȩ ju̧i̧iä cho̧ oa cjo̧dërä judi, ¿tjana̧ oa yürütäremȩdejȩ? ¿Jabo po pio ju̧i̧ yürütäremȩdejȩ? Jabo cjäri̧ made, ja̧di dari̧ yürürea̧mi̧dëdejȩ. Jabechji̧ dabade davä jibëa̧ ja pio ju̧i̧ chjadëri̧ yürüpea̧ ji̧. 11Ado danȩrȩ ca̧ pumȩ, peaja̧di dabade ibëa̧ Ama̧i̧ judi. Tjamo̧ davä. Pio dibëiäpȩmo̧ chjadëri̧ yürüpea̧ ji̧ dabade peaja̧di. Jabechji̧ pio mȩnȩro̧, ji̧dë ma coëma cjiari̧ cjo̧ro̧dëji̧ri̧ pio judiro̧ dibëa̧ u̧ri̧ pio ji̧ri̧iäpȩmo̧ chjadëri̧ yürüpea̧ ji̧ dabarä judi, ¿ji̧dë u̧i̧ dabadëde ibëa̧ Ama̧i̧ judi pio ibëiäpȩmo̧ yürüpea̧ ji̧? Dëdëde davä. A̧dëräpȩ cjiamȩ Ama̧i̧ pio judi ji̧dë u̧i̧ dabade davä pio jȩaiä cjo̧dëji̧ri̧ pio ji̧ri̧iäpȩmo̧ chjadëri̧ yürüpea̧ ji̧, ja̧ u̧ri̧ pio ji̧ri̧iäpȩmo̧ chjadëri̧ yürüpea̧ ji̧ ⁠—⁠yo̧mȩrȩ ni̧bä chjaorëremȩdejȩrȩ Jechu judi pumȩ ji̧ri̧ Ütë tjamo̧ ju̧i̧iä goë cjo̧dëpea̧ pio ju̧i̧ chjiari.

O ji̧ri̧iäpȩmo̧ chjadëri̧ japatä yo̧rëremȩdejȩrȩ Jechu judi

12Ado Jechu judi ado cja̧rȩmo̧ ma̧ȩ oa ano̧ mire ni̧bä chjaorëremȩdejȩrȩ, ja̧di ta̧rëri̧ yo̧mȩrȩ:

⁠—⁠Danȩrȩ ca̧ pumȩ, o judiro̧ pio dibëiäpȩmo̧ chjadëri̧ japatä earä judi, peaja̧dimi̧ dari̧ chjadëri̧ japatäreji̧ri̧renȩro̧jȩrȩ o ji̧ri̧iäpȩmo̧ ⁠—⁠yo̧a̧dejȩrȩ⁠—⁠. Tjamo̧ davä. Mȩnȩro̧, o judiro̧ pio dibëiäpȩmo̧ chjadë maea oa japatä earä judi, jabechji̧ chjadëri̧ japachji̧jȩrȩ. Aja̧, chjadë maea oa japachji̧jȩrȩ. Jabechji̧ mȩnȩro̧ ja̧di dari̧ japea̧ oaiä, Moicherë go̧ȩparërea̧ ma̧ȩ pio ju̧i̧ ta̧rëdiänȩrȩ, Ütërë ea jana̧ chjadüa̧ oa ni̧bäji̧ri̧ pio judiro̧ go̧ȩparërea̧ ma̧ȩ pio ju̧i̧bo ⁠—⁠yo̧mȩrȩ ni̧bä chjaorëremȩdejȩrȩ Jechu judi.

Yo̧a̧ri̧ joë yami̧ dade ado yo̧a̧ri̧ no̧mi̧ dade

Uruca 13:24

13Ado Jechu judi cjiadiädëmȩrȩ ano̧ mire ni̧bä chjaorëremȩdejȩrȩ na̧rȩrea̧ ma̧ȩmi̧ dara̧:

⁠—⁠Danȩrȩ, ja̧di ta̧rëri̧ yo̧requededibe ca̧ pumȩ. Jabechji̧ chjadëri̧ yu̧a̧chji̧vä yu̧a̧rea̧ joë ya jujuai̧räpȩmo̧ ⁠—⁠yo̧a̧dejȩrȩ Jechu judi⁠—⁠. Jabechji̧ yu̧a̧rea̧ joë ya ana̧ri pio judiri baämȩ no̧ üdë cjo̧dë tja ana̧räpȩmo̧ baäde. Jabechji̧ joë ya ana̧ri baämȩ no̧ro baäa̧ üdë, jabechji̧ chjao tjamo̧dëde jabo uapai̧ da tjamo̧de. Ado no̧i̧dë tjamo̧dirȩ pio jiro no̧ro baäji̧ri̧ judiro̧. 14Jabo bucho ana̧ cjo̧ro̧rea̧räpȩmo̧ baämȩ no̧ üdë, no̧ jujuai̧ maeade. Pio jiro yu̧a̧rea̧ joë ya üdë, peaja̧di jujuai̧de. Ado pio jiro joë yari baämȩ no̧ro baäa̧ üdë chjao tjamo̧de, ado ji̧ra̧ tjamo̧dëdirȩ ja̧dira̧ baäji̧ri̧ judiro̧. Jabo danȩrȩ, bucho ana̧ cjo̧ro̧rea̧räpȩ baäde. Ado pio jiro joë ya no̧rämo̧ yu̧a̧därärea̧ dapanȩrȩ ca̧ pumȩ ⁠—⁠yo̧mȩrȩ ni̧bä chjaorëremȩdejȩrȩ pumȩ ji̧ri̧ Jechu judi.

Baramȩ jurarea̧ pio ju̧i̧ daea̧ oaiä daba darea̧ro̧jo̧ȩ to oa

Uruca 6:43-45

15Ado cjiadiädëmȩrȩ ji̧dë u̧i̧ ni̧bä chjaorëremȩdejȩrȩ Jechu judi, ja̧di ta̧rëri̧ yo̧mȩrȩ:

⁠—⁠Danȩrȩ, na̧e chiachji̧vä teracabari̧ a̧ra̧ano̧ji̧ri̧ pio ji̧ri̧ chjiari ⁠—⁠yo̧a̧dejȩrȩ⁠—⁠. Jabechji̧ u̧i̧pea̧ oa cjiadëchji̧vä Ütërë ea jana̧ chjadüa̧ oa ni̧bäcji̧ quëna̧ ni̧bäji̧ri̧ pio ji̧ri̧iä. Jabechji̧ aure chjuamȩmi̧ da maeadirȩ. Jabo oveja ja̧ ira̧ ina̧ oa cjiami̧ dari̧ cjiaji̧ri̧rȩ go̧düdärädirȩ mȩnȩro̧ pio ji̧ri̧ chjiari na̧e chiachea oa. Jabo cjäri̧ madirȩ, uapai̧ da tjamo̧dirȩ. Dairi daea̧ ji̧mo̧i̧ chjadëmi̧ dadirȩ chjadëdë pio judiro̧. Ado pio dibë jui quiraji̧ri̧mi̧ dari̧ japatämi̧ cjiadiro̧dibe. 16Jabo danȩrȩ, judiro̧ japea̧ pio ju̧i̧ ütarë daea̧ oaiä, ‘Aja̧, pio judiro̧ tjamo̧diro̧da’ quëna̧rea̧ dapanȩrȩ. Ado peaja̧dide jurarea̧ to pio ju̧i̧iä ⁠—⁠yo̧a̧dejȩrȩ⁠—⁠. Danȩrȩ, uva quȩmȩ jurarea̧ oa täapamȩ judi, oro oro pio ju̧i̧iä täadëpade, jabo uva to pio ju̧i̧iämo̧i̧ täarea̧ dapade. Pio ju̧i̧ dabanȩrȩ. Ado igera quȩmȩ jurarea̧ pio ju̧i̧ chjiaribo dabanȩrȩ. Jabechji̧ oro oro pio ju̧i̧iä täarea̧mi̧dëde, jabo jabechji̧ igera to pio ju̧i̧iämo̧i̧ täarea̧mi̧ dade. 17Ado pio ju̧i̧iä yo̧requededibe ca̧ pume. Eami̧ to chjadë üdë, jabechji̧ jurarea̧ chjadë maea oa chiade. Ado eami̧ to chjadëdë üdë, jabechji̧ jurarea̧ chjadëdë maea oa chiade. Teracaba jurarea̧ maea oa chiade. 18Jabechji̧ to chjadë üdë jurarea̧ chjadëdë maea oa chiarea̧mi̧dëde. Ado to chjadëdë üdë jurarea̧ chjadë pio ju̧i̧ chiarea̧mi̧dë maeade. 19-20Tjamo̧ davä. Ütërë ea jana̧ chjadüa̧ oa ni̧bäcji̧ quëna̧ ni̧bäji̧ri̧ pio judiro̧ teracabari̧ a̧ra̧ano̧dirȩ. Jabo danȩrȩ, ‘pio judiro̧ tjamo̧diro̧da’ quëna̧ dabarea̧ dapanȩrȩ davä, judiro̧ japea̧ pio ju̧i̧iä, judiro̧ jibëa̧ jurarea̧ chjadëdëmi̧ da oa na̧rȩriä cjo̧ro̧a̧ oaiä. Tjamo̧ davä. To chjadëdëmi̧ dadirȩ oëra̧ a̧ra̧ano̧ji̧ri̧ judiro̧. Jurarea̧ chjadë oa chiadëmȩ tomi̧ dadirȩ pio judiro̧. Ado eami̧ to üdë jurarea̧ chjadë oa chiadërä judi, jabechji̧ tuti depea̧de. Cjo̧dëräpȩ aeno̧pea̧de ⁠—⁠yo̧rëremȩdejȩrȩ Jechu judi.

Jabo o judiro̧ Ütërë yo̧a̧ chja̧oeräpȩ yu̧a̧rea̧ dadëpadirȩ

21Ado Jechu judi ji̧dë u̧i̧ ni̧bä chjaomȩrȩ ja̧di ta̧rëri̧ a̧de ni̧bä chjaorëremȩdejȩrȩ:

⁠—⁠Danȩrȩ, pumȩ judiro̧ orë Ütërë yo̧a̧ chja̧oeräpȩ yu̧a̧rea̧ dadëpadirȩ ⁠—⁠yo̧a̧dejȩrȩ⁠—⁠. Jabechji̧ judiro̧ pio coa yo̧a̧räbo, “Aja̧ Ano̧mȩ, ibëa̧ Ano̧mȩ pio judirenȩ” yo̧a̧räbo, jabechji̧ Ütërë yo̧a̧ chja̧oeräpȩ yu̧a̧rea̧ dadëpadirȩ. Jabechji̧ ca̧ Ama̧i̧ judi yo̧a̧ pio ju̧i̧ ta̧rëdiädë madirȩ. Ado danȩrȩ, ta̧rëdiäji̧ri̧ pio judiro̧mo̧rȩ yu̧a̧rea̧ dapadirȩ. Tjamo̧ davä. A̧dëräpȩ cjiamȩ Ama̧i̧ judi yo̧a̧ pio ju̧i̧ ta̧rëdiäji̧ri̧ pio judiro̧mo̧rȩ yu̧a̧rea̧ dapadirȩ Ütërë yo̧a̧ chja̧oëräpȩ. 22Ado cjiadiäa̧ japamitërä, Ütërë ütarapea̧ doro, dëdë, pumȩ judiro̧ no̧i̧dërë yo̧padiro̧coe, “Danȩ Ano̧mȩ, na̧ quȩrä a̧ra̧ano̧rëremȩrequede na̧ ma̧ȩ oa” yo̧pa. “Aja̧, na̧ ju chiarea̧ra̧ pio ju̧ri̧ra̧ yaröca pio ji̧ri̧ go̧dü tänȩa̧rea̧ro̧jȩrȩ, ira̧diä cjaeäji̧ri̧ pio ji̧ri̧. Ado na̧ quȩrä peaja̧di dami̧ti̧ jauëchja na̧rȩrea̧ oa japarëreji̧ri̧rea̧rȩ”. Aja̧, ja̧di ta̧rëri̧ yo̧ji̧ri̧rȩ yo̧padiro̧coe pumȩ judiro̧ no̧i̧dërë. 23Jabo judiro̧ ja̧di ta̧rëri̧ coa yo̧a̧räbo, ja̧di ta̧rëri̧ dëbë yo̧parequedejȩrȩ. “Jabo cjäri̧ marequededibe, tjamo̧ri̧ dabadërequededibe” yo̧parequedejȩrȩ. “Jabechji̧ chjai̧dëri̧ japaji̧ri̧ pio judiro̧nȩrȩ. Jabechji̧ jachi oa a̧dë baächji̧coe” dëbë yo̧parequedejȩrȩ. Aja̧, ja̧di ta̧rëri̧ dëbë yo̧parequedejȩrȩ ⁠—⁠yo̧mȩrȩ ni̧bä chjaorëremȩdejȩrȩ Jechu judi.

Yo̧a̧ri̧ bë cji̧däji̧ri̧ pio ji̧ri̧ chjiari ni̧bämȩrȩ na̧rȩrea̧ ma̧ȩmi̧ dara̧ ni̧bärëremȩde Jechu judi ta̧rëdiäji̧ri̧ pio ji̧ri̧ chjiari, ta̧rëdiädëji̧ri̧ pio ji̧ri̧ chjiaribo

24Ado Jechu judi ji̧dë u̧i̧ ni̧bä chjaomȩrȩ ja̧di ta̧rëri̧ a̧de ni̧bä chjaorëremȩdejȩrȩ na̧rȩrea̧ ma̧ȩmi̧ dara̧, bë cji̧däji̧ri̧ pio ji̧ri̧ chjiari:

⁠—⁠Danȩrȩ, ca̧ ma̧ȩ oa ta̧rë ëte ta̧rëdiäji̧ri̧ pio judiro̧, jabechji̧ urëdi oa jo̧rȩtamȩ üi̧mi̧ dadirȩ ⁠—⁠yo̧a̧dejȩrȩ⁠—⁠. Ado pio jiro üi̧ üdë jibëa̧ bë oa ta̧dë uëmo̧ cji̧däpea̧ ji̧ tarupea̧de, taru a̧rȩmȩ chjadëmi̧ darä. 25Ado bë cji̧däa̧ oa cjia̧rä, jabechji̧ chjua tjamo̧ri̧ cjiadiäa̧de. Ado a̧dë chjäte ma̧i̧ dari̧ pupuripea̧räbo, itu tjamo̧ri̧ bide bide cjüea̧räbo, dürü chjö̧na̧i̧rȩ cjücjürü tjamo̧pe baga̧räbo, ma̧i̧ dari̧ pjaepamȩ üdë jo̧ oa bide cjaeämi̧ dari̧ ara ara goëa̧räbo, jabechji̧ chjua tjamo̧ri̧ cjiadiäa̧de. Chjaodëri̧ arëgoëa̧ oa cjiatärea̧ ji̧, chjaodëri̧ arë aea̧ oa cjiatärea̧ ji̧, jabechji̧ chjuari̧ cjiadiäa̧de ta̧dë uëmo̧ cji̧däa̧ oa cjia̧ oaiä. 26Jabo ca̧ ma̧ȩ oa ta̧rë ëte ta̧rëdiädëji̧ri̧ pio judiro̧, jabechji̧ chjadëri̧ ütarë jo̧rȩtadëmȩ üi̧mi̧ dadirȩ. Uëmo̧ uëmo̧ jo̧rȩtamȩ üi̧mi̧ dadirȩ. Ado pio jiro üi̧ üdë jibëa̧ bë oa dabu nȩgȩrä cji̧däpea̧ ji̧ tarupea̧de. 27Ado bë cji̧däa̧ oa cjia̧rä, jabechji̧ a̧dë chjäte ma̧i̧ dari̧ pupuripea̧dejȩ. Ado itu tjamo̧ri̧ cjüea̧dejȩ, dürü chjö̧na̧i̧rȩ cjücjürü tjamo̧pe bagarea̧mi̧ dari̧. Ado ma̧i̧ da pjaepamȩ üdë jo̧ oa bide cjaeämi̧ dari̧ ara ara goëa̧dejȩ. Jabo cjäri̧ madejȩ. Chjuari̧ cjiadiädëa̧de bë üdë. Chjaodëri̧ areia̧ oa cjiadiäa̧de. Jabechji̧ bë decjiape bagari̧ pjatë mape baga̧de ⁠—⁠yo̧mȩrȩ ni̧bä chjaorëremȩdejȩrȩ Jechu judi.

28Ado Jechu judi jiro ma̧ȩ oa a̧ra̧ano̧pea̧ ji̧ cjiadiäa̧rä, a̧dë chjäte ana̧ri̧ jo̧rȩtaji̧ri̧pea̧dirȩ pumȩ judiro̧, yaa yabë cjiaji̧ri̧rȩ. 29Jabechji̧ tjaoëpai̧ dari̧ a̧ra̧ano̧rëremȩdejȩrȩ. Moicherë go̧ȩparërea̧ ma̧ȩ oa a̧ra̧ano̧ji̧ri̧ pio judiro̧mi̧ dari̧ a̧ra̧ano̧dëa̧dejȩrȩ, jabo uapadëmȩrȩ a̧ra̧ano̧rëremȩdejȩrȩ tjamo̧ yo̧mȩmi̧ darë. Ado pio ju̧i̧iä ana̧ tjamo̧ri̧ jo̧rȩtaji̧ri̧pea̧dirȩ pumȩ judiro̧.

Currently Selected:

Mateo 7: Pume

Highlight

Copy