Mateo 6

Jechu judi ano̧ mire ni̧bä chjaorëremȩdejȩrȩ cjäri̧ ja̧boji̧ri̧ pio ji̧ri̧iäpȩmo̧ yürüpea̧ pio ju̧i̧ chjiari

1Ado Jechu judi cjiadiädëmȩrȩ ji̧dë u̧i̧ ni̧bä chjaorëremȩdejȩrȩ pumȩ ji̧ri̧, ya̧mi̧räpȩ chaji̧ri̧ oa. Ja̧di ta̧rëri̧ yo̧mȩrȩ ni̧bä chjaorëremȩdejȩrȩ:

⁠—⁠Na̧e chiachji̧vä ⁠—⁠yo̧a̧dejȩrȩ⁠—⁠. Mȩnȩro̧ eami̧ chjadë oa japarä, oëra̧ jo̧rȩtadëchji̧vä. ‘Aja̧, pumȩ judiro̧ pio coa dapea̧ oa japatäremȩquëda, judiro̧ pio coa ji̧dë u̧i̧ ba chia dapea̧ oa, pio ji̧ri̧ ja̧ dachoro japatäremȩquëda’ quëna̧ jo̧rȩtadë matäreji̧ri̧nȩrȩ. Jabechji̧ mȩnȩro̧ ja̧di dari̧ japarä judi, mö̧na̧mi̧ dari̧ cjiadiäpanȩrȩ. Tjamo̧ davä. Ibëa̧ Ama̧i̧ judi, a̧dëräpȩ cjiamȩ Ama̧i̧ pio judi dibë chjadëri̧ ba ano̧tärea̧ ji̧, mö̧na̧ maearë cjiadiäpanȩrȩ. 2Pio ju̧i̧iä yo̧requededibe ⁠—⁠yo̧a̧dejȩrȩ⁠—⁠. Danȩrȩ, mȩnȩro̧ chëre oa yürürä, pumȩ pio ji̧ri̧ chjadëri̧ a̧dopea̧ oa yürürä, jabechji̧ o pio judiro̧mi̧ dari̧ yürüdëchji̧vä. Tjamo̧ri̧ yürücji̧ quëna̧ japadirȩ. Jibëa̧ maea oa jo̧rȩtaji̧ri̧rȩ yürüdirȩ tjamo̧ri̧ yürüdëri̧ cjiaji̧ri̧rȩ. Tjamo̧ davä. Tjamo̧ri̧ yürüdëri̧ cjiaji̧ri̧borë yürüdirȩ o judiro̧ pio jibëiäpȩmo̧ ba chia dapea̧ oa. Tjamo̧ davä. O judiro̧ pio jibëiäpȩmo̧ ma ba chia dapea̧ oa, pio jibëiäpȩmo̧ chjacjiamȩri̧ ni̧bäpea̧ oa, pio jibë chjiari goeari̧ yo̧pea̧ oa yürü maeadirȩ ütëborë dari̧, goadi yürümi̧ dari̧ yürütärea̧ ji̧. Aja̧, judiro̧ goadimi̧ dari̧ yürütärea̧ ji̧, ütëborë ta̧rërea̧mi̧ dari̧ to̧bari̧ ni̧bädirȩ, jënȩro̧ yürüa̧ pio ju̧i̧ chjiari. Tjamo̧ davä. Järea̧ no̧rä juri̧, judiorë a̧doparea̧räpȩ ju̧ri̧, to̧bari̧ ni̧bädirȩ. Ado pio ju̧i̧iä tjamo̧i̧ cjiari̧ yo̧requededibe ⁠—⁠yo̧a̧dejȩrȩ⁠—⁠. Danȩrȩ, judiro̧ ji̧dë duri oa, jënȩro̧ yürüa̧ ba oa ba ano̧a̧ oa cjiatärea̧ ji̧, ba anoa̧ oa cjiadëpadirȩ. Jabechji̧ pumȩ judiro̧ pio jibëiäpȩmo̧ chjacjiamȩri̧ ni̧bäa̧ oaiä, peadë ba ano̧a̧ oa cjiami̧ dari̧ cjiadiäa̧dirȩ ba chiadë maeara̧. 3Ado pio ju̧i̧iä yo̧requededibe ⁠—⁠yo̧a̧dejȩrȩ⁠—⁠. Mȩnȩro̧ chëre oa cjäri̧ ja̧bomȩ pio ju̧i̧iäpȩmo̧ a̧dopea̧ oa yürürä, jabechji̧ goadimi̧ dari̧ yürüchji̧jo̧ȩ, o judiro̧ dabarea̧mi̧dëri̧. 4Tjamo̧ davä. Mȩnȩro̧ yürürä, goadi yürümi̧ dari̧ yürüchji̧vä. Ado dibëa̧ Ama̧i̧ pio judi mȩnȩro̧ yürüa̧ pio ju̧i̧ chjiari chjadëri̧ dabamȩrȩ ba ano̧padidibe mȩnȩro̧ yürüa̧ ba oa ⁠—⁠yo̧mȩrȩ ni̧bä chjaorëremȩdejȩrȩ Jechu judi.

Jechu judi ni̧bärëremȩdejȩrȩ Ama̧i̧ tjamo̧ pio ju̧i̧ nö̧ta ni̧bäpea̧ pio ju̧i̧ chjiari

Uruca 11:1-13

5Ado ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ Jechu judi ya̧mi̧räpȩ chamȩrȩ:

⁠—⁠Ado danȩrȩ, mȩnȩro̧ ibëa̧ Ama̧i̧ pio ju̧i̧ ni̧bärä, oëra̧ jo̧rȩtaji̧ri̧mi̧ dari̧ ni̧bädëchji̧vä ⁠—⁠yo̧a̧dejȩrȩ⁠—⁠. Jabechji̧ Ütë tjamo̧ ju̧i̧iä tjamo̧ri̧ ni̧bäcji̧ quëna̧ pio judiro̧mi̧ dari̧ ni̧bädëchji̧vä. Ya maeara̧ jo̧rȩtaji̧ri̧ pio judiro̧mi̧ dari̧ ni̧bädëchji̧vä. Jabechji̧ pumȩ ji̧ra̧ tjamo̧räpȩ ju̧ri̧ ni̧bätämi̧ cjiadiro̧jo̧ȩ Ütë tjamo̧ ju̧i̧. Jabechji̧ pumȩ ji̧ra̧räpȩ ju̧ri̧ ni̧bäpea̧ üdë goae tjamo̧dejȩrȩ. Tjamo̧ davä. Pumȩ judiro̧ pio jibëiäpȩmo̧ chjacjiamȩri̧ jo̧rȩtapea̧ oa, pio jibëiäpȩmo̧ ba chia dapea̧ oa, jabechji̧ pumȩ ji̧ra̧ tjamo̧räpȩ ni̧bäpea̧ ji̧ goae tjamo̧dejȩrȩ. Ado pio ju̧i̧iä judiorë a̧doparea̧ bëräpȩ ju̧ri̧ cjiaji̧ri̧rȩ ni̧bä chjaocji̧ quëna̧ japadirȩ Ütë tjamo̧ pio ju̧i̧iäpȩmo̧, järea̧ no̧ yuroräpȩ peaja̧di. Jabo tjamo̧i̧ cjiari̧ yo̧requededibe ⁠—⁠yo̧a̧dejȩrȩ⁠—⁠. Danȩrȩ, judiro̧ pio jȩaiäpȩmo̧ ni̧bäa̧ ba oa ba ano̧dëpadejȩrȩ Ütë tjamo̧ judi. Jabechji̧ peadë ba ano̧a̧ cjiami̧ dari̧ cjiadiäa̧dirȩ, pumȩ judiro̧ pio jibëiäpȩmo̧ irä dae chjaoa̧ oaiä. 6Ado pio ju̧i̧iä yo̧requededibe ca̧ pumȩ. Mȩnȩro̧ ibëa̧ Ama̧i̧ pio ju̧i̧iä ni̧bärä, jabechji̧ goadirea̧mi̧ daräpȩ jächji̧vä pio ju̧i̧iä ni̧bäpea̧ oa. Jabechji̧ dibëa̧ bëräpȩ yu̧a̧ ëte, jo̧ tjoräpȩ yu̧a̧ ëte, tuti carachji̧jo̧ȩ tuti cararea̧ joë ya pio ju̧i̧. Ado jo̧ tjoräpȩ ju̧ri̧ ni̧bächji̧jo̧ȩ darea̧mi̧dëmȩ pio ju̧i̧iäpȩmo̧. O judiro̧ darea̧mi̧dëri̧ ni̧bächji̧jo̧ȩ. Ado dibëa̧ma̧i̧ cjiaji̧ri̧ oa dapadidibe pio jȩaiäpȩmo̧ ni̧bäji̧ri̧ oa. Ado chjö̧na̧i̧ oa dabamȩ pio judi, dibëa̧ chji̧ oa cjacjarë damȩ pio judi, jabechji̧ jënȩ dabami̧ ba ano̧padidibe pio jȩaiäpȩmo̧ ni̧bäa̧ ba oa ⁠—⁠yo̧mȩrȩ ni̧bä chjaorëremȩdejȩrȩ Jechu judi Ama̧i̧ pio ju̧i̧ ni̧bäpea̧ pio ju̧i̧ chjiari.

7Ado Jechu judi cjiadiädëmȩrȩ ja̧di ta̧rëri̧ a̧de ni̧bärëremȩdejȩrȩ:

⁠—⁠Ado mȩnȩro̧ Ütë tjamo̧ pio ju̧i̧ ni̧bärä, jabechji̧ quëna̧dëji̧ri̧ pio judiro̧ ni̧bämi̧ dari̧ ni̧bädëchji̧jo̧ȩ ⁠—⁠yo̧a̧dejȩrȩ⁠—⁠. Danȩrȩ, urëdi tjamo̧ oa jo̧rȩtaji̧ri̧rȩ ni̧bädëdiro̧jo̧ȩ, jabo uëmo̧ uëmo̧ jo̧rȩtaji̧ri̧rȩ ni̧bädiro̧jo̧ȩ ma̧ȩ go̧a̧ti̧ tjamo̧ra̧. Jabechji̧ judiro̧ pea yo̧a̧ ma̧ȩra̧ pio ju̧ri̧ra̧ ado chjereno̧ cuchupë ni̧bä chjaodiro̧jo̧ȩ, cuchupë cuchupë ni̧bämi̧ dari̧. ‘Aja̧, a̧ro̧rȩ ma̧ȩ go̧a̧ti̧ tjamo̧ oa ni̧bä chjaoa̧ oaiä, jabechji̧ ta̧rë ja̧bopea̧ chiadiibëda ütë üdë’ quëna̧ jo̧rȩtaji̧ri̧rȩ carupë ni̧bä chjaodiro̧jo̧ȩ, tjamo̧ri̧ bapë ta̧rërea̧mi̧dë oa. 8Pio ju̧i̧iä yo̧requededibe ⁠—⁠yo̧a̧dejȩrȩ⁠—⁠. Jabechji̧ pio judiro̧mi̧ dari̧ ni̧bädëchji̧jo̧ȩ ibëa̧ Ama̧i̧ ju̧i̧. Jabechji̧ tjamo̧ri̧ ta̧rë ja̧bodidibe mȩnȩro̧ ni̧bäa̧ ji̧. Jabechji̧ mȩnȩro̧ jabë cjo̧dëdëa̧rä, dabade davä mȩnȩro̧ cjäri̧ ja̧boa̧ pio ju̧i̧ chjiari, mȩnȩro̧ cjo̧dëpea̧ pio ju̧i̧ chjiari. Jabërä chjadëri̧ dabade dibë a̧dopea̧ pio ju̧i̧ chjiari. Pio ju̧i̧iä quëna̧dëji̧ri̧ pio judiro̧ japami̧ dari̧ japadëchji̧vä. 9Jabo mȩnȩro̧ ibëa̧ Ama̧i̧ pio ju̧i̧iä ni̧bärä, ¿yö̧ta dari̧ ni̧bätäreji̧ri̧renȩro̧jo̧ȩ? Yö̧ta dari̧dë, danȩrȩ, ja̧di ta̧rëri̧ ni̧bätäreji̧ri̧nȩrȩ.

“Ama̧i̧, ni̧bärea̧ro̧mȩ a̧dëräpȩ cjiamȩ pio ju̧i̧. Ama̧i̧, pumȩ judiro̧ ütëbodärärë ba chia jo̧rȩta matäreji̧ri̧diro̧mȩ na̧ quȩ ba chiati̧ oa” yo̧ji̧ri̧rȩ yo̧täreji̧ri̧renȩro̧jo̧ȩ. 10“Ado Amai̧, pumȩ ütëbodärärë na̧ chja̧oerämo̧ cjo̧ro̧tä earea̧ro̧jȩrȩ jo̧ȩra̧pe. Jabechji̧ a̧dëräpȩ cjo̧ro̧ji̧ri̧ pio judiro̧ na̧ chja̧oerämo̧ cjo̧ro̧mi̧ dari̧ cjo̧ro̧ matädirȩ dai chirirä cjo̧ro̧ji̧ri̧ pio judiro̧ peaja̧di. 11Ado a̧ro̧rȩ do nö̧ta oa chjadëri̧ jurapea̧ oa yürüibe Ama̧i̧. 12Ado a̧ro̧rȩ chjai̧dëri̧ japea̧ pio ju̧i̧ duridëparȩibe Ama̧i̧. Ado pio ibëiäpȩmo̧ chjai̧dëri̧ japea̧ji̧ri̧ pio ji̧ri̧ chjadëri̧ duridëparȩmi̧ dari̧ japapea̧ oa peaja̧di a̧doibe. 13Ado chjadëri̧ tuti japaibe Ama̧i̧, a̧ro̧rȩ ma̧i̧ da chjai̧dë oa chjätärä oëra̧diä jo̧rȩtachea oa. Ado tuti japaibe Ama̧i̧, Ichiae judi ibë eami̧ oa japarea̧ dachea oa. Aja̧ Ama̧i̧, ja̧di ta̧rëri̧ yo̧mȩrȩ ni̧bärequedemȩ. Ja̧ditäde ⁠—⁠yo̧mȩrȩ yo̧rëremȩdejȩrȩ Jechu judi.

Aja̧, ja̧di ta̧rëri̧ yo̧mȩrȩ yo̧rëremȩdejȩrȩ pumȩ ji̧ri̧ Jechu judi, judiro̧ Ütë tjamo̧ pio ju̧i̧iäpȩmo̧ ni̧bäpea̧ pio ju̧i̧ chjiari dabadëchea oa. Ado ja̧di ta̧rëri̧ ni̧bäa̧ duri oa, pio yoa ma̧ȩ oa a̧de ni̧bä chjaorëremȩdejȩrȩ:

14⁠—⁠Danȩrȩ, mȩnȩro̧ cjatäcjie jo̧rȩtarea̧ darä judi, pio dibëiäpȩmo̧ chjai̧dëri̧ japea̧ji̧ri̧ pio ji̧ri̧iäpȩmo̧ chjaodëri̧ duridëparȩmi̧ dari̧ jo̧rȩtarä judi, peaja̧dimi̧ dari̧ japapadidibe ibëa̧ Ama̧i̧ judi, a̧dëräpȩ cjiamȩ Ama̧i̧ pio judi. Tjamo̧ davä. Duridëparȩpadidibe peaja̧di. 15Jabo mȩnȩro̧ cjatäcjie jo̧rȩtarea̧ dadërä judi, pio dibëiäpȩmo̧ chjai̧dëri̧ japea̧ji̧ri̧ pio ji̧ri̧ duridëparȩmi̧ dari̧ jo̧rȩtadërä judi, peaja̧dimi̧ dari̧ japapadidibe Ama̧i̧ judi ⁠—⁠yo̧mȩrȩ ni̧bä chjaorëremȩdejȩrȩ Jechu judi.

Jechu judi ni̧bä chjaorëremȩdejȩrȩ Ütë tjamo̧ pio ju̧i̧iä cjo̧dëpea̧ pio ju̧i̧ chjiari, juradëji̧ri̧rȩ cjo̧dëpea̧ pio ju̧i̧ chjiari

16Ado Jechu judi ji̧dë u̧i̧ ni̧bä chjaomȩrȩ ja̧di ta̧rëri̧ a̧de ni̧bä chjaorëremȩdejȩrȩ Ütë tjamo̧ pio ju̧i̧iä cjo̧dëpea̧ pio ju̧i̧ chjiari:

⁠—⁠Danȩrȩ, mȩnȩro̧ Ütë tjamo̧ pio ju̧i̧iä cjo̧dërä, mȩnȩro̧ jurarea̧ oaiä oëra̧diäa̧ oa cjiadëri̧ cjiaji̧ri̧rȩ cjo̧dë chjaorä, jabechji̧ o judiro̧ chjaocjiami̧ japadëchji̧vä. Jabechji̧ tjamo̧ri̧ japadëdirȩ, jabomo̧ japacji̧ quëna̧ japadirȩ. Jabechji̧ judiro̧ Ütë tjamo̧ pio ju̧i̧mo̧ jo̧rȩtaji̧ri̧rȩ japatärea̧ ji̧, Ütë tjamo̧ ja̧ dachoromo̧ japaquëda’ quëna̧ jo̧rȩtatärea̧ ji̧, cjäri̧ madirȩ, pumȩ ja̧ dachoro cjo̧ro̧rea̧ pio ju̧i̧mo̧i̧ jo̧rȩtaji̧ri̧rȩ japadirȩ. Jabechji̧ o judiro̧ dabarea̧mi̧dëri̧ cjo̧dë chjaotärea̧ ji̧, o judiro̧ dabarea̧mi̧dëri̧ jurarea̧ oa jiadatärea̧ ji̧, cjapiri̧ cjiami̧ dari̧ goaditärea̧ ji̧, cjäri̧ madirȩ, ütëborë darea̧mi̧ dari̧ goae tjamo̧dëri̧ cjo̧ro̧mi̧ dari̧ jo̧rȩte chjaodirȩ, o ji̧ri̧iäpȩmo̧ ana̧ri̧ na̧rȩtämi̧ cjiaji̧ri̧rȩ. Ado judiro̧ jibëa̧ dacho oa chjadëri̧ jidatärea̧ ji̧, jibëa̧ chamacho oa doti̧mi̧ joatärea̧ ji̧, cjäri̧ madirȩ, japadë madirȩ, jabo dabu chia mape bagari̧ joadiro̧jo̧ȩ jibëa̧ chama̧cho oa, ca̧ra̧ mape bagari̧. Tjamo̧ davä. Cjo̧dë gu̧bë oa mitë ëte, chodiro̧jo̧ȩ jibëa̧ tjübë oa. Ado judiro̧ jibëa̧ ji̧ra̧ cö̧ oa doti̧mi̧ chjadëri̧ coaritärea̧ ji̧, cjäri̧ madirȩ, japadë madirȩ, jabo cö̧ pio ju̧i̧ oëra̧ti̧ oa a̧rȩ baäri̧ chiadiro̧jo̧ȩ jibëa̧ ji̧ra̧ cö̧ oa. Aja̧, ja̧di dari̧ japadirȩ o ji̧ri̧iäpȩmo̧ na̧rȩtämi̧ cjiaji̧ri̧rȩ. ‘Aja̧, jurarea̧ pio ju̧i̧ jiadaji̧ri̧rȩ japadiro̧da, Ütë tjamo̧ pio ju̧i̧iäpȩmo̧ cjo̧dëpea̧ oa japadiro̧da, jabechji̧ judio chjadë tjamo̧ tara, ja̧di dari̧ japadiro̧da’ quëna̧ jo̧rȩtapea̧ oa, ja̧di dari̧ jape chjaodirȩ. Jabo tjamo̧i̧ cjiari̧ yo̧requededibe ⁠—⁠yo̧a̧dejȩrȩ⁠—⁠. Ütë tjamo̧ judi pio ji̧ri̧ ba ano̧tärea̧ ji̧, ba ano̧dëpadejȩrȩ. Jabechji̧ peadë ba ano̧a̧ oa cjiami̧ dari̧ cjiadiäa̧dirȩ o judiro̧ pio jibëiäpȩmo̧ ba chia daea̧ oaiä. 17Ado pio ju̧i̧iä yo̧requededibe ca̧ pumȩ. Danȩrȩ, mȩnȩro̧ Ütë tjamo̧ pio ju̧i̧ ana̧ri̧ ni̧bärä, jurarea̧ pio oaiä oëra̧diäa̧ oa cjiadëri̧ cjiaji̧ri̧rȩ ni̧bärä, jabechji̧ chjadëri̧ goadimi̧ dari̧ japachji̧vä. Jabechji̧ dabu chiari̧ japadëchji̧vä dibëa̧ chama̧cho oa, jabo jabechji̧ chjadëri̧ joachji̧jo̧ȩ dibëa̧ dacho oa. Ado dibëa̧ cö̧ oa, jabechji̧ pjo̧dedëchji̧jo̧ȩ, jabo jabechji̧ chjadëri̧ coarichji̧jo̧ȩ, o ji̧ri̧iäpȩmo̧ na̧rȩchea oa. 18Jabechji̧ pumȩ judiro̧ dabarea̧mi̧dëri̧ jurë ano̧ji̧ri̧rȩ ni̧bätäreji̧ri̧renȩro̧jo̧ȩ ibëa̧ Ama̧i̧ ju̧i̧, pio ju̧i̧ ja̧ dachoromo̧ japaji̧ri̧mi̧ dari̧. Ado chjö̧na̧i̧ oa daba darea̧mi̧ damȩ Ama̧i̧ pio judi, dibëa̧ chji̧ oa cjacjarë damȩ pio judi, jabechji̧ chjadëri̧ ba ano̧padidibe ⁠—⁠yo̧mȩrȩ ni̧bä chjaorëremȩdejȩrȩ pumȩ buba oa Jechu judi.

Jechu judi a̧de ni̧bä chjaorëremȩdejȩrȩ a̧dëräpȩ boea pio ju̧i̧ chjiari

Uruca 11:34-36; 12:22-34

19Ado Jechu judi cjiadiädëmȩrȩ ja̧di ta̧rëri̧ yo̧mȩrȩ a̧de ni̧bä chjaorëremȩdejȩrȩ pumȩ ji̧ri̧, ya̧mi̧räpȩ chamȩrȩ:

⁠—⁠Danȩrȩ, goëje ji̧ra̧ tjamo̧pe järea̧mi̧ dari̧ boeadëchji̧vä mȩnȩro̧ yoa chirirä goa̧ pio ju̧i̧ ⁠—⁠yo̧a̧dejȩrȩ⁠—⁠. Jabechji̧ chjaodëri̧ chjadëdëpe bagapai̧ dade mu̧i̧ pio ju̧i̧iä, ado ë pio ju̧i̧iäbo. Ado pio ju̧i̧ uëri garüji̧ri̧ pio judiro̧ dibëa̧ bëräpȩ acji yu̧a̧ ëte, chjaodëri̧ baë goa baäpai̧ dadiro̧dibe peaja̧di. Tjamo̧ davä. Pio yoa chirirä ja̧ oa tjamo̧ri̧ boearea̧mi̧dëde. 20Danȩrȩ, dai chirirä goa̧ üdë ba chia tjamo̧dëde, jabo a̧dëräpȩ goa̧ üdë, dëdë, ba chia tjamo̧de bucho ana̧mȩ tara. Ado pio ju̧i̧iä jabechji̧, pumȩ pio ji̧ri̧ chjadëri̧ japaji̧ri̧rȩ cjo̧ro̧chji̧vä. Ado mȩnȩro̧ ja̧di dari̧ japea̧ oaiä, a̧dëräpȩ ju̧ri̧ goëje ji̧ra̧ tjamo̧pe järea̧mi̧ dari̧ ano̧ mire boeapanȩrȩ. Jabechji̧ chjadëdëpe jädëmȩräpȩ ju̧ri̧, mu̧i̧ decjiaräpȩ ju̧ri̧, achäcä chiape jädëmȩräpȩ ju̧ri̧, ë decjiaräpȩ ju̧ri̧ chjadëri̧ boeachji̧jo̧ȩ, garüji̧ri̧ pio judiro̧ baë goa baärea̧mi̧dëräpȩ ju̧ri̧. 21¿Jabo tjana̧ ju̧i̧iä ja̧di ta̧rëri̧ yo̧requededibe? ⁠—⁠iëno̧ë ta̧rëa̧dejȩrȩ Jechu judi⁠—⁠. Tjana̧ ju̧i̧iädë, jabechji̧ mȩnȩro̧ goa̧ ba chia pio ju̧i̧ pio yoa chirirä boea̧ oa goarä judi, cjäri̧ manȩrȩ, pio yoa chiri cjo̧ro̧pea̧ pio ju̧i̧mo̧i̧ jo̧rȩtaji̧ri̧rȩ cjo̧ro̧panȩrȩ. Jabo mȩnȩro̧ goa̧ ba chia pio ju̧i̧ a̧dëräpȩ ju̧ri̧ boea̧ oa goarä judi, jabechji̧ a̧dëräpȩ goa pio ju̧i̧ chjiari jo̧rȩtaji̧ri̧rȩ cjo̧ro̧panȩrȩ. Pio ju̧i̧iä a̧dëräpȩ boea̧ oa goachji̧vä dibëa̧ pio ju̧i̧ ⁠—⁠yo̧rëremȩdejȩrȩ Jechu judi.

Jechu judi pumȩ ja̧ tjo pio ju̧i̧ chjiari ni̧bämȩrȩ na̧rȩrea̧ ma̧ȩmi̧ dara̧ ni̧bärëremȩde dacho pio ju̧i̧ chjiari

Uruca 11:34-36

22Ado Jechu judi pumȩ ji̧ri̧ ana̧ri̧ ni̧bä chjaomȩrȩ ji̧dë u̧i̧ ni̧bärëremȩdejȩrȩ. Ja̧di ta̧rëri̧ yo̧mȩrȩ a̧de yo̧a̧dejȩrȩ na̧rȩrea̧ ma̧ȩmi̧ dara̧:

⁠—⁠Danȩrȩ, dibëa̧ dacho üdë tataparea̧mi̧ dade ⁠—⁠yo̧a̧dejȩrȩ⁠—⁠. Ado dibëa̧ dacho üdë chjadërä judi, jabechji̧ tatami̧ darä jo̧rȩtanȩrȩ. 23Jabo dibëa̧ dacho üdë chjadëdëpe baga̧rä judi, jabechji̧ da cotope baganȩrȩ. Jabechji̧ bagönȩmi̧ darä jo̧rȩtanȩrȩ. Jabechji̧ tatarea̧ üdë dairäpȩ tutia̧ oa cjiami̧ dari̧ cjiatäremȩde, tatamȩ pio ju̧i̧ darea̧mi̧dëri̧. Ado peaja̧dide dibëa̧ tjo pio ju̧i̧iä. Dibëa̧ tjo üdë chjadërä judi, tatami̧ darä cjo̧ro̧rä judi, mȩnȩro̧ coëma cjiari̧ jo̧rȩtarea̧ra̧ pio ju̧ri̧ra̧ jo̧rȩtariä cjo̧ro̧rä judi, jabechji̧ chjadë maea oa japariä cjo̧ro̧panȩrȩ dibëa̧ icjarara̧ pio ju̧ri̧ra̧. Jabechji̧ bagönȩmi̧ darä cjo̧ro̧mi̧ dari̧ cjo̧ro̧dëpanȩrȩ, jabo tatami̧ darä cjo̧ro̧mi̧ dari̧ cjo̧ro̧panȩrȩ. Jabo dibëa̧ tjo üdë chjadëdërä judi, bagönȩmi̧ darä cjo̧ro̧rä judi, mȩnȩro̧ coëma cjiari̧ baämȩ jo̧rȩtarea̧ra̧ pio ju̧ri̧ra̧ jo̧rȩtariä cjo̧ro̧dë marä judi, jabechji̧ chjai̧dë maea oa japariä cjo̧ro̧panȩrȩ dibëa̧ icjarara̧ pio ju̧ri̧ra̧. Jabechji̧ ma̧i̧ da bagönȩmi̧ darä cjo̧ro̧panȩrȩ. Ado pio ju̧i̧iä yo̧requededibe. Na̧e chiachji̧vä. Danȩrȩ, ‘tatami̧ darä cjo̧ro̧quëda’ quëna̧pai̧ danȩrȩ. Jabo ja̧di dari̧ quëna̧ji̧ri̧borë, bagönȩmi̧ darä cjo̧ro̧ji̧ri̧mi̧ dari̧ cjo̧ro̧pai̧ danȩrȩ. Jabechji̧ dibëa̧ icjararä chjai̧dë üdë dibëa̧ chji̧ oa ji̧dë ma boadärämi̧ dari̧ japarä judi, mȩnȩro̧ ji̧dë ma chjai̧dëri̧ japarä judi, tjamo̧ri̧ tatami̧ darä cjo̧ro̧dënȩrȩ, jabo bagönȩmi̧ darä cjo̧ro̧nȩrȩ. Jabechji̧ mȩnȩro̧ ‘tatami̧ darä cjo̧ro̧mȩquëda’ quëna̧ji̧ri̧borë bagönȩmi̧ darä cjo̧ro̧rä judi, ¿napai̧ ji̧ra̧ri̧ chiade dibëa̧ chji̧rä bagönȩmi̧ da üdë? Napai̧dë, jabechji̧ a̧dë chjäte ji̧ra̧ri̧ chiade ⁠—⁠yo̧mȩrȩ ni̧bä chjaorëremȩdejȩrȩ Jechu judi dacho pio ju̧i̧ chjiari, tjo pio ju̧i̧ chjiari.

Yo̧a̧ri̧ ütëti̧ ja̧ oa ja̧beparea̧mi̧dëde yo̧rëremȩdejȩrȩ Jechu judi

Uruca 16:13

24Ado Jechu judi cjiadiädëmȩrȩ ano̧ mire ni̧bä chjaorëremȩdejȩrȩ ado cja̧rȩmo̧ ma̧ȩ oa. Ja̧di ta̧rëri̧ ni̧bä chjaorëremȩdejȩrȩ:

⁠—⁠Danȩrȩ, yo̧a̧ri̧ ütëti̧ ja oa ja̧beparea̧mi̧dënȩrȩ ⁠—⁠yo̧a̧dejȩrȩ⁠—⁠. Danȩrȩ mu̧i̧tjoi̧ üdë yo̧ari̧ ütëti̧ ja̧ oa ja̧beparä judi, cja̧rȩmȩ oa ea tjamo̧padejȩ, ba chia damȩrȩ, jabo ado cja̧rȩmo̧ oa ea tjamo̧dëpadejȩ. Jabechji̧ cja̧rȩmȩ ja̧ oa chjadëri̧ ja̧bepë yürüpadejȩ, jabo cja̧rȩmo̧ pio ju̧i̧ badë da oaiä chjadëri̧ ja̧bepë yürüdëpadejȩ pio ju̧i̧ ja̧ oa. Peaja̧dimi̧ danȩrȩ mȩnȩro̧. Jabechji̧ mȩnȩro̧ chëre pio ju̧i̧ ana̧ri̧ jo̧rȩtaji̧ri̧rȩ ja̧beparä judi, chjadëri̧ ja̧bepaë yürüdëparenȩro̧jo̧ȩ Ütë tjamo̧ pio ju̧i̧iäpȩmo̧, jabo chëre ja̧ mu̧i̧tjoi̧mi̧ dari̧ cjo̧ro̧panȩrȩ. Ado pio ju̧i̧iä yo̧requededibe. Yo̧a̧ri̧ ja̧ oa ja̧beparea̧mi̧dënȩrȩ ⁠—⁠yo̧mȩrȩ ni̧bä chjaorëremȩdejȩrȩ Jechu judi.

Ütë tjamo̧ judi chjadëri̧ jidadejȩrȩ jibëa̧ u̧ri̧ ji̧ri̧

Uruca 12:22-31

25Ado ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ Jechu judi:

⁠—⁠Ja̧di tara, mȩnȩro̧ cja̧rȩmȩ Ütë pio ju̧i̧ ja̧ maea oa ja̧bepa tara, jabechji̧ bücjüri̧ cjiaji̧ri̧rȩ cjo̧ro̧dë matärereji̧ri̧nȩrȩ ⁠—⁠yo̧a̧dejȩrȩ⁠—⁠. Tjamo̧ davä. Mȩnȩro̧ pio yoa chirirä cjo̧ro̧a̧ nö̧ta, jabechji̧ bücjüri̧ cjiadëtäreji̧ri̧nȩrȩ. Jabechji̧ mȩnȩro̧ jurapea̧ pio ju̧i̧ chjiari, mȩnȩro̧ jarapea̧ pio ju̧i̧ chjiari bücjüri̧ cjiadë machji̧vä. Ana̧ri̧ jo̧rȩtadëchji̧vä dibëa̧ icjara oa ina̧pea̧ pio ju̧i̧ chjiari. Jabechji̧ Ütë tjamo̧ judi dibë a̧dë chjäte ba chiamȩ pio ju̧i̧ yürüa̧rä judi, cjo̧ro̧rea̧ pio ju̧i̧ yürüa̧rä judi, jȩoarea̧ pio ju̧i̧ yürüa̧rä judi, peaja̧di mȩnȩro̧ pumȩdiärea̧ dapea̧ oa a̧de yürüdëpadidibe? Dëdë, a̧de yürüpadidibe. Pio ju̧i̧iä bücjüri̧ cjiadëtäreji̧ri̧nȩrȩ pio ju̧i̧ chjiari. 26Danȩrȩ, ütarë jo̧rȩtachji̧vä uëräpȩ cjo̧ro̧ji̧ri̧ pua pio ji̧ri̧. Jabechji̧ bücjüri̧ cjiadë madirȩ jibëa̧ jurarea̧ pio ju̧i̧ chjiari. Jibëa̧ tjado oa ja̧beparea̧ goadë madirȩ. Ado jibëa̧ jurarea̧ pio ju̧i̧ boaerea̧ jo̧ ana̧rä boea̧ oa juradë madirȩ. Jabo ja̧di dari̧ japadëräbo jurariä cjo̧ro̧dirȩ. Jabechji̧ ibëa̧ Ama̧i̧ pio judi chjadëri̧ jidadejȩrȩ. Tjamo̧ davä. Ibëa̧ Ama̧i̧ judi, a̧dëräpȩ cjiamȩ Ama̧i̧ pio judi chjadëri̧ jidadejȩrȩ. Ado pio ju̧i̧iä iëno̧ë ta̧rërequededibe ⁠—⁠yo̧a̧dejȩrȩ⁠—⁠. Danȩrȩ, ¿pua pio ji̧ri̧iä ji̧dë u̧i̧ ba chiadënȩrȩ? Dëdënȩrȩ, ji̧dë u̧i̧ ba chianȩrȩ. Ado pua pio ji̧ri̧iä ji̧dë ui̧ ba chia oaiä, jabechji̧ jidë u̧i̧ chjadëri̧ jidapadidibe. 27Pio ju̧i̧iä bücjüri̧ cjiadëchji̧vä. Danȩrȩ, mȩnȩro̧ pio yoa chirirä cjo̧ro̧pea̧ pio ju̧i̧ jidë ma̧ bücjüri̧ cjia oaiä, ¿a̧dodidibe ji̧dë u̧i̧ japamitë ana̧ri̧ cjo̧ro̧rea̧ dapea̧ oa? Cjäri̧ madidibe, a̧dodëpadidibe. Ji̧dë u̧i̧ japamitë ana̧ri̧ cjo̧ro̧rea̧ dapea̧ oa a̧dodëpadidibe. 28Ado pio ju̧i̧iä iëno̧ë ta̧rërequededibe. ¿Tjana̧ ju̧i̧iä ana̧ri̧ jo̧rȩtanȩrȩ chjibo chjacjiamȩ oa mitëpea̧ ji̧? Danȩrȩ, ütarë dachji̧jo̧ȩ chiri tjoräpȩ cjiamȩ to chjuchju pio ju̧i̧. Jabechji̧ cjitëde. Ado jibëa̧ ina̧rea̧ oa jëdano̧dëräbo, jabechji̧ chjacjiamȩrȩ cjitëde. Ina̧ oa cjiadëmȩborë chjacjiamȩde. 29Jabechji̧ Charomo̧ quȩmȩrea̧ ütë pio ju̧i̧iä ji̧dë u̧i̧ chjacjiamȩde chjuchju üdë. Tjamo̧i̧ cjiari̧ yo̧requededibe ⁠—⁠yo̧a̧dejȩrȩ⁠—⁠. Charomo̧ judi jibëa̧ chjibo ba chia tjamo̧ oa ina̧ oa cjiamȩborë, jibëa̧ chjibo chjacjiamȩ tjamo̧ oa ina̧ oa cjiamȩborë, jabechji̧ nötadërëremȩde to chjuchju pio ju̧i̧. Jabechji̧ Charomo̧ pio ju̧i̧iä ji̧dë u̧i̧ chjacjiamȩ tjamo̧ri̧ cjiade chjuchju üdë. Jabechji̧ a̧dë chjäte chjacjiamȩri̧ na̧rȩde. 30Ado danȩrȩ, Ütë tjamo̧ judi chjuchju pio ju̧i̧ chjadëri̧ jidarä judi, chjaodëri̧ goarijäpamȩ to chjuchju pio ju̧i̧ chjadëri̧ jidarä judi, chjaodëri̧ acjürüa̧ oa cjiapai̧ damȩ pio ju̧i̧ chjacjiamȩri̧ cjitë tänȩrä judi, ¿peaja̧dimi̧ dari̧ chjadëri̧ jidadëpadidibe pio dibë? Dëdë, chjadëri̧ jidapadidibe peaja̧di. Jabo cjäri̧ manȩrȩ, ibëa̧ Ütë pio ju̧i̧ chjuari̧ quëna̧tärea̧ ji̧, chjuari̧ quëna̧dë marenȩro̧jo̧ȩ, jabo jabëtari̧mi̧ maea oa quëna̧renȩro̧jo̧ȩ. 31Ado pio ju̧i̧iä yo̧requededibe ado ⁠—⁠yo̧a̧dejȩrȩ⁠—⁠. Jabechji̧ bücjüri̧ cjiadëchji̧vä. ‘¿Tjana̧ oa jurapacjivaa̧ro̧, ¿tjana̧ oa jarapacjivaa̧ro̧, ¿tjana̧ oa ina̧pacjivaa̧ro̧’ quëna̧ jo̧rȩtaji̧ri̧rȩ bücjüri̧ cjiadëchji̧vä. 32Peaja̧dimi̧ dari̧ jo̧rȩtadirȩ Ütë tjamo̧ ju̧i̧ dabadëji̧ri̧ pio judiro̧. Ji̧dë ma bücjüri̧ cjiadirȩ pio ju̧i̧ chjiari. Jabo danȩrȩ ca̧ pumȩ, peadë dabade davä ibëa̧ Ama̧i̧ judi mȩnȩro̧ ea̧ pio ju̧i̧ chjiari. Peadë dabade a̧dëräpȩ cjiamȩ Ama̧i̧ judi mȩnȩro̧ cjäri̧ ja̧boa̧ pio ju̧i̧ chjiari. 33Ado pio ju̧i̧iä jabechji̧ yo̧requededibe davä. Jabechji̧ pio yoa chirirä cjo̧ro̧pea̧ pio ju̧i̧ chjiari bücjüri̧ cjiadëchji̧vä. Jabo jabechji̧, järi tjamo̧chji̧vä Ütërë yo̧a̧ chja̧oerä cjo̧ro̧pea̧ ji̧, pio ju̧i̧ ja̧ ma̧ȩrä coëma cjiari̧ cjo̧ro̧pea̧ ji̧. Ado Ütë tjamo̧ judi, dëdë yürüpadidibe davä mȩnȩro̧ cjäri̧ ja̧boa̧ pio ju̧i̧, mȩnȩro̧ jurapea̧ oa, mȩnȩro̧ ina̧pea̧ oa. 34Ado pio ju̧i̧iä bücjüri̧ cjiadëchji̧vä ca̧ pumȩ. Jabechji̧ yaba̧ dopea̧rä mȩnȩro̧ cjo̧ro̧pea̧ pio ju̧i̧ chjiari jabërä bücjüri̧ cjiadëchji̧vä. Ado danȩrȩ, peaja̧di bücjüri̧ cjiadëtäreji̧ri̧nȩrȩ mȩnȩro̧ chjai̧dëri̧ chjätäpea̧ pio ju̧i̧ chjiari. Jabechji̧ mȩnȩro̧ ado cja̧rȩmo̧ doro chjai̧dëri̧ chjätäpea̧ pio ju̧i̧ chjiari bücjüri̧ cjiadëchji̧vä. Jabechji̧ doti̧mi̧ chjai̧dë oa chjätäpai̧ danȩrȩ. Ado pio ju̧i̧iä jabechji̧, mȩnȩro̧ jaco chjätäpea̧ pio ju̧i̧ jabërä a̧de jo̧rȩtadëtäreji̧ri̧nȩrȩ. Jabechji̧ pio yaba̧ do oa chjai̧dëri̧ chjätäpea̧ pio ju̧i̧mo̧i̧ jo̧rȩtatäreji̧ri̧nȩrȩ. Jabechji̧ nö̧tade. Ado jaco judi, jabechji̧ ano̧ mire jo̧rȩtaparea̧rȩ jaco chjätäpea̧ pio ju̧i̧ chjiari. Jabo bücjüri̧ cjiadë machji̧vä. Ja̧di dari̧ cjo̧ro̧pea̧de ⁠—⁠yo̧mȩrȩ ni̧bä chjaorëremȩdejȩrȩ pumȩ ji̧ri̧ Jechu judi, ya̧mi̧räpȩ chamȩrȩ.

Currently Selected:

Mateo 6: Pume

Highlight

Copy