Mateo 5

Ya̧mi̧räpȩ chamȩrȩ a̧ra̧ano̧rëremȩde Jechu judi pumȩ buba oa

1Ado Jechu judi jibëa̧ duriräpȩmo̧ pumȩ buba oa daea̧ oaiä, ya̧mi̧ uëräpȩ buarëremȩde. Ado uëräpȩ cjiamȩrȩ charëremȩde daburo. Ado chamȩ oa, go̧düdärärëreji̧ri̧diro̧jo̧ȩ jibëa̧ jadü judiro̧. 2Ado taruparëremȩde pio ji̧ri̧iäpȩmo̧ a̧ra̧ano̧pea̧ ji̧. Ja̧di ta̧rëri̧ yo̧mȩrȩ a̧ra̧ano̧rëremȩdejȩrȩ:

3⁠—⁠Danȩrȩ, pumȩ judiro̧, ‘Aja̧, chjö̧na̧i̧ti̧ oa cjäri̧ ja̧bomȩmi̧ dari̧ cjiaquëda’ quëna̧ji̧ri̧ pio ji̧ri̧, jabechji̧ chjadëri̧ a̧dodejȩrȩ Ütë tjamo̧ judi. Tjamo̧ davä. ‘Jabo cjäri̧ maa̧ro̧da, ibëa̧ ma̧na̧ri̧ japarea̧ decjiaa̧ro̧da, jabo Ütë tjamo̧ pio judi tuti japea̧ pio ju̧i̧iämo̧i̧ cjo̧ro̧rea̧mi̧ dadida' quëna̧ji̧ri̧ pio ji̧ri̧, chjadëri̧ a̧dodejȩrȩ. Ado judiro̧ ja̧di dari̧ quëna̧ oaiä, jabechji̧ Ütërë yo̧a̧ chja̧oerä cjo̧ro̧rea̧ dapadirȩ ⁠—⁠yo̧a̧dejȩrȩ Jechu judi.

4Ado ji̧dë u̧i̧ yo̧mȩrȩ ja̧di ta̧rëri̧ a̧de yo̧a̧dejȩrȩ:

⁠—⁠Danȩrȩ, ano̧ mire jo̧rȩtaji̧ri̧ pio ji̧ri̧ chjadëri̧ a̧dodejȩrȩ Ütë tjamo̧ judi. Tjamo̧ davä. Jënȩro̧ chjai̧dëri̧ japea̧ pio ju̧i̧ chjiari ano̧ mire jo̧rȩtaji̧ri̧ pio ji̧ri̧, jënȩro̧ chjai̧dëri̧ japea̧ pio ju̧i̧ chjiari ejaro cjiami̧ dari̧ jo̧rȩtaji̧ri̧ pio ji̧ri̧, jabechji̧ chjadëri̧ a̧dodejȩrȩ Ütë tjamo̧ judi. Jabechji̧ cjatäcjie jo̧rȩtarea̧ yürüpadejȩrȩ, chji̧ goaera̧ jo̧rȩtarea̧mi̧ dari̧ ⁠—⁠yo̧a̧dejȩrȩ Jechu judi.

5Ado ji̧dë u̧i̧ yo̧mȩrȩ ja̧di ta̧rëri̧ a̧de yo̧a̧dejȩrȩ:

⁠—⁠Danȩrȩ, ‘ba chiadëquëda’ quëna̧ji̧ri̧ pio ji̧ri̧ chjadëri̧ a̧dodejȩrȩ Ütë tjamo̧ judi. Jabechji̧ ‘o judiro̧ pio coa u̧i̧ ba chiadiro̧da, jabomo̧ boquëda’ quëna̧ji̧ri̧ pio ji̧ri̧ chjadëri̧ a̧dodejȩrȩ. Tjamo̧ davä. Yaboräpȩ cjiami̧ dari̧ cjiadëji̧ri̧ judiro̧ jabo duriräpȩ cjiami̧ dari̧ cjiaji̧ri̧ pio judiro̧, jabechji̧ chjadëri̧ a̧doa̧ oa cjiapadirȩ. Ado judiro̧ ja̧di dari̧ cjo̧ro̧a̧ oaiä, jabechji̧ Ütë tjamo̧ judi yürüpadejȩrȩ pumȩ judiro̧ cjo̧ro̧mȩ chiriräpȩti̧ oa#5:5 Ji̧dë duri oa japamitë chjätä ëte Jechu judi a̧dëri pio judiri birë ma̧na̧rä, pio yoa chirirä cjo̧ro̧pea̧ oa birë ma̧na̧rä, jabechji̧ chiri ütëmȩrȩ cjo̧ro̧pade. Ado jiro japamiterä quëna̧ji̧ri̧ pio ji̧ri̧iäpȩmo̧ chiri oa yürüpadejȩrȩ, ‘ba chiadëquëda’ quëna̧ jo̧rȩtaji̧ri̧ pio ji̧ri̧iäpȩmo̧. Aja̧, jënȩro̧ pio yoa chiri oa cjo̧ro̧a̧ nö̧ta ja̧di dari̧ cjo̧ro̧ji̧ri̧ oa, 'pumȩ ba chiadëquëda jabo o judiro̧ pio coa u̧i̧ ba chiadiro̧da' quëna̧ji̧ri̧ oa, chiri oa yürüpadejȩrȩ. ⁠—⁠yo̧a̧dejȩrȩ Jechu judi. 6Ado ji̧dë u̧i̧ yo̧mȩrȩ ja̧di ta̧rëri̧ a̧de yo̧a̧dejȩrȩ:

⁠—⁠Danȩrȩ, Ütë tjamo̧ ja̧ ma̧ȩ oa ji̧dë ma ta̧rëdiätämi̧ cjiaji̧ri̧ pio judiro̧, jabechji̧ chjadëri̧ a̧doa̧ oa cjiapadirȩ Ütë tjamo̧ pio ju̧i̧iä. Jabechji̧ mairi̧ jurami̧ dari̧ cjo̧ro̧rea̧ dapadirȩ. Ado ui ja̧bodëji̧ri̧mi̧ dari̧ cjo̧ro̧rea̧ dapadirȩ peaja̧di, chji̧ goae tjamo̧ra̧ jo̧rȩtarea̧mi̧ dari̧. Ado pio jiro pumȩ pio ji̧ri̧, ta̧rëdiätämi̧ cjiaji̧ri̧ pio ji̧ri̧, jabechji̧ ji̧dë u̧i̧ ta̧rëdiärea̧ yürüpadejȩrȩ Ütë tjamo̧ judi, ma̧ chiadëri̧ cjiari̧ cjo̧ro̧rea̧mi̧ dari̧ ⁠—⁠yo̧a̧dejȩrȩ Jechu judi.

7Ado ji̧dë u̧i̧ yo̧mȩrȩ ja̧di ta̧rëri̧ a̧de yo̧a̧dejȩrȩ:

⁠—⁠Danȩrȩ, o ji̧ri̧iäpȩmo̧ cjäri̧ri̧ cjia daji̧ri̧ pio judiro̧ peaja̧di chjadëri̧ a̧doa̧ oa cjiapadirȩ Ütë tjamo̧ pio ju̧i̧iä. Jabechji̧ cjäri̧ri̧ cjia dapadejȩrȩ Ütë tjamo̧ judi ⁠—⁠yo̧a̧dejȩrȩ.

8Ado ji̧dë u̧i̧ yo̧mȩrȩ ja̧di ta̧rëri̧ a̧de yo̧a̧dejȩrȩ:

⁠—⁠Danȩrȩ, chjai̧dëra̧ mirea̧ oa jo̧rȩtadëji̧ri̧ judiro̧, chjadë maea oa jo̧rȩtaji̧ri̧ pio judiro̧ peaja̧di chjadëri̧ a̧doa̧ oa cjiapadirȩ Ütë tjamo̧ pio ju̧i̧iä. Jabechji̧ Ütë tjamo̧ pio ju̧i̧ chjadëri̧ dapadiro̧jo̧ȩ ⁠—⁠yo̧a̧dejȩrȩ.

9Ado ji̧dë u̧i̧ yo̧mȩrȩ ja̧di ta̧rëri̧ a̧de yo̧a̧dejȩrȩ:

⁠—⁠Danȩrȩ, o ji̧ri̧ chjadëri̧ chi̧dëeaji̧ri̧ judiro̧, ori̧ bagari̧ ëba cjiarea̧mi̧dëji̧ri̧ pio ji̧ri̧ chi̧dëeaji̧ri̧ pio judiro̧, jabechji̧ chjadëri̧ a̧doa̧ oa cjiapadirȩ Ütë tjamo̧ pio ju̧i̧iä. Ado ‘ca̧ u̧ri̧diro̧ca̧da’ quëna̧ jo̧rȩtamȩrȩ dapadejȩrȩ ⁠—⁠yo̧a̧dejȩrȩ Jechu judi.

10Ado ji̧dë u̧i̧ yo̧mȩrȩ ja̧di ta̧rëri̧ a̧de yo̧a̧dejȩrȩ:

⁠—⁠Danȩrȩ, conȩda̧ oa cjiaji̧ri̧ judiro̧, jënȩro̧ coëma cjiari̧ cjo̧ro̧a̧ oaiä conȩda̧ oa cjiaji̧ri̧ pio judiro̧ peaja̧di chjadëri̧ a̧doa̧ oa cjiapadirȩ Ütë tjamo̧ pio ju̧i̧iä. Ado Ütërë yo̧a̧ chja̧oeräpȩ cjo̧ro̧rea̧ dapadirȩ ⁠—⁠yo̧a̧dejȩrȩ Jechu judi.

11Ado ji̧dë u̧i̧ yo̧mȩrȩ ja̧di ta̧rëri̧ a̧de yo̧a̧dejȩrȩ:

⁠—⁠Danȩrȩ, Ütë tjamo̧ judi chjadëri̧ a̧dodejȩrȩ conȩda̧ oa cjiaji̧ri̧ pio ji̧ri̧. Tjamo̧ davä. Mȩnȩro̧ pio coa quëna̧ oaiä ma̧ȩ goaedëti̧ra̧ ya̧ea̧ oa cjiarä judi, idëri̧ cjia tänȩa̧ oa cjiarä judi, jabechji̧ chjadëri̧ a̧dodidibe. O judiro̧ pio dibë chjiari ma̧ȩ chjádë yürürä judi, dami̧ti̧ chjai̧dë oa ni̧bärä judi, jabechji̧ chjadëri̧ a̧dodidibe. 12Ado danȩrȩ, judiro̧ pio dibëiäpȩmo̧ ja̧di dari̧ japea̧ oaiä, jabechji̧ ma̧ chiadëri̧ cjiatäreji̧ri̧nȩrȩ. Jabechji̧ pio dibë ja̧di dari̧ conȩda̧ oaiä, ba chia tjamo̧ra̧ pio ju̧ri̧ra̧ ba ano̧a̧ oa cjiapanȩrȩ a̧dëräpȩ ju̧ri̧. Pio ju̧i̧iä dëdë, ma̧ chiadëri̧ cjia tjamo̧täreji̧ri̧nȩrȩ. Ado danȩrȩ, peaja̧di dari̧ conȩda̧ oa cjiarëreji̧ri̧dirȩ Ütërë ea jana̧ chjadüa̧ oa ni̧bäji̧ri̧ judiro̧ dibëa̧ yabo. Pio ju̧i̧ a̧dë jo̧rȩtadëtäreji̧ri̧nȩrȩ ⁠—⁠yo̧mȩrȩ yo̧rëremȩdejȩrȩ Jechu judi pumȩ pio ji̧ri̧iäpȩmo̧ ya̧mi̧ uëräpȩ ju̧ri̧.

Jechu judi a̧ra̧ano̧rëremȩde na̧rȩrea̧ ma̧ȩmi̧ dara̧ quëna̧ji̧ri̧ pio ji̧ri̧ chjiari

Marco 9:50; Uruca 14:34-35

13Ado Jechu judi ji̧dë u̧i̧ a̧ra̧ano̧mȩrȩ ja̧di ta̧rëri̧ a̧de ni̧bärëremȩdejȩrȩ:

⁠—⁠Danȩrȩ, ca̧ ma̧ȩrä cjo̧ro̧ji̧ri̧ pio judiro̧ yagoemȩmi̧ dadirȩ ⁠—⁠yo̧a̧dejȩrȩ⁠—⁠. Jabechji̧ yagoemȩ üdë chjadëri̧ a̧dodejȩ jurarea̧ oa. Ado mȩnȩro̧ peaja̧di chjadëri̧ a̧dorea̧ chianȩrȩ. Aja̧, chiriräpȩti̧ oa cjo̧ro̧ji̧ri̧ pio ji̧ri̧ chjadëri̧ a̧dorea̧ chianȩrȩ. Yagoemȩ üdë jurarea̧ oa chjadëri̧ a̧domi̧ dari̧ a̧dopai̧ danȩrȩ peaja̧di pumȩ ji̧ri̧. Jabo cjäri̧ made, yagoemȩ üdë chjadëdëpe bagarä judi, jurarea̧ oa goaeparȩrea̧ chiadëpea̧rä judi, ¿tjana̧ japapea̧? ¿Ado chjereno̧ chjadëparȩpea̧de? Cjäri̧ made, ado chjereno̧ chjadëparȩrea̧mi̧dëde. Ado pio ju̧i̧iä jabechji̧ daburäpȩmo̧ puri cjarapea̧de. Jabechji̧ pumȩ judiro̧ tara̧ boë cjaeäpea̧ maeade ⁠—⁠yo̧mȩrȩ ni̧bäa̧dejȩrȩ.

14Ado Jechu judi ji̧dë u̧i̧ ni̧bä chjaomȩrȩ ja̧di ta̧rëri̧ ni̧bä chjaorëremȩdejȩrȩ:

⁠—⁠Ado danȩrȩ, tataparea̧mi̧ danȩrȩ peaja̧di ⁠—⁠yo̧a̧dejȩrȩ⁠—⁠. Chiriräpȩti̧ oa cjo̧ro̧ji̧ri̧ pio ji̧ri̧ a̧dopea̧ oa tataparea̧mi̧ danȩrȩ. Ado mȩnȩro̧ coëma cjiari̧ cjo̧ro̧a̧ oaiä, jabechji̧ jachiti̧ oa tatarea̧mi̧ dari̧ cjo̧ro̧nȩrȩ. Danȩrȩ, ya̧mi̧ uë tjamo̧räpȩ ju̧ri̧ cjiamȩ bë ma̧ri̧ üdë, gȩnȩrä tatari̧ cjia oaiä, jabechji̧ oëra̧ti̧ oa cjo̧ro̧ji̧ri̧ pio judiro̧, jabechji̧ chjadëri̧ da maeadiro̧jo̧ȩ. Jabechji̧ goadirea̧ decjiari̧ chjadë maearä cjiade pio jiro bë ma̧ri̧ üdë. 15Ado danȩrȩ, eami̧ pumȩ judi tataparea̧ oa cjitëparȩrä judi, jabechji̧ goadidëdejȩ. Canarira̧ inë chji̧dädëjȩ, jabo jabechji̧ pumȩ judiro̧, bërä cjo̧ro̧ji̧ri̧ pio judiro̧ chjadëri̧ da mirerea̧mi̧ dari̧ cji̧dädejȩ chjadë maearä. Pio ju̧i̧iä yo̧requededibe ⁠—⁠yo̧a̧dejȩrȩ⁠—⁠. Tataparea̧ pio ju̧i̧ goadiji̧ri̧mi̧ dari̧ cjo̧ro̧dëchi̧vä, jabo jabechji̧ pumȩ judiro̧ ütëborë chjadëri̧ da mirerea̧mi̧ dari̧ cjo̧ro̧chji̧vä chjadë maearä. 16Ado peaja̧dimi̧ dari̧ cjo̧ro̧täreji̧ri̧nȩrȩ jachiti̧ oa tatapami̧ dari̧. Jabechji̧ pumȩ judiro̧ chjadëri̧ darea̧mi̧ dari̧ na̧rȩriä cjo̧ro̧täreji̧ri̧nȩrȩ, dami̧ti̧ chjadë oa japaji̧ri̧rȩ. Jabechji̧ ja̧di dari̧ cjo̧ro̧chji̧vä. Aja̧, pio dibë daji̧ri̧ pio judiro̧ dibëa̧ Ama̧i̧ pio ju̧i̧iäpȩmo̧ chjacjiamȩri̧ jo̧rȩtapea̧ oa, a̧dëräpȩ cjiamȩ Ama̧i̧ pio ju̧i̧iäpȩmo̧ chjacjiamȩri̧ ni̧bäpea̧ oa, jabechji̧ ja̧di dari̧ cjo̧ro̧chji̧vä ⁠—⁠yo̧mȩrȩ ni̧bä chjaorëremȩdejȩrȩ Jechu judi pumȩ buba oa, jibëa̧ jadü pio ji̧ri̧bo.

Jechu judi a̧ra̧ano̧rëremȩde yabo yürüa̧ pënȩrä cjiamȩ ma̧ȩ pio ju̧i̧ chjiari

17Ado Jechu judi ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ pumȩ ji̧ri̧:

⁠—⁠Danȩrȩ ca̧ pumȩ, oëra̧ jo̧rȩtadëchji̧vä ⁠—⁠yo̧a̧dejȩrȩ⁠—⁠. Oëra̧ jo̧rȩtadëchji̧vä Moicherë go̧ȩparërea̧ ma̧ȩ pio ju̧i̧ chjiari. Oëra̧ jo̧rȩtadëchji̧vä Ütërë ea jana̧ chjadüa̧ oa ni̧bäji̧ri̧ judiro̧ go̧ȩparërea̧ ma̧ȩ pio ju̧i̧ chjiari. ‘A̧ja̧, Jechu pio judi birë ma̧na̧ oaiä, jabechji̧ Moicherë go̧ȩparërea̧ ma̧ȩ üdë badëdida yaba̧, jabechji̧ Jechu judi Moicherë go̧ȩparërea̧ ma̧ȩ pio ju̧i̧ badëparȩpea̧ oa ma̧na̧ jirodida, ado Ütërë ea jana̧ chjadüa̧ oa ni̧bäji̧ri̧ pio judiro̧ go̧ȩparërea̧ ma̧ȩ pio ju̧i̧bo badëparȩra̧pea̧ oa ma̧na̧ jirodida’ peaja̧di quëna̧ jo̧rȩtarea̧mi̧dëde. Jabechji̧ pio judiro̧ go̧ȩpea̧ ma̧ȩ oa badëparȩra̧padëa̧requede, jabo jabechji̧ pio jiro ma̧ȩ üdë tjamo̧i̧ cjiari̧ cjiadiäpea̧ oa ma̧na̧requede. 18Danȩrȩ ca̧ pumȩ, tjamo̧i̧ cjiari̧ yo̧requededibe. Moicherë go̧ȩparërea̧ ma̧ȩ üdë goarijädëpade. Yuropadëpade jabo jabechji̧, ba chia maeari̧ cjiadiäpade a̧dë üdë goarijäa̧rä yuro, pio yoa dabu üdë peaja̧di yuropea̧rä yuro. ‘Jabechji̧ cja̧rȩmȩ ma̧ȩ pio judimo̧rȩ ba chiadë jirodida, cja̧rȩmȩ ma̧ȩ pio judimo̧rȩ badëpapa jirodida’ quëna̧rea̧mi̧dëde, jabo jabechji̧ pio jiro ma̧ȩ üdë chjö̧na̧i̧rȩ tjamo̧i̧ cjiari̧ cjiadiäpade, cja̧rȩmȩ ma̧ȩ üdë a̧dë cjiadiärea̧ decjiari̧. 19Ado pio ju̧i̧iä yo̧requededibe ⁠—⁠yo̧a̧dejȩrȩ⁠—⁠. Pio jiro ma̧ȩ oa ba chia jo̧rȩtadëmȩ judi, ‘Aja̧, pio yoamo̧i̧ ma̧ȩ boi̧chji̧ üdë ba chiadëdida, ta̧rëdiädëpea̧dida’ quëna̧mȩ pio judi, jabechji̧ ba chiadëmȩmi̧ darë cjiadiäpade Ütërë yo̧a̧ chja̧oeräpȩ ju̧ri̧. Tjamo̧ davä. O judiro̧ pio jiro ma̧ȩ oa ta̧rëdiädëtä chi̧dëeamȩ judi, “Aja̧, pio jiro ma̧ȩ üdë ba chia tjamo̧dëde” yo̧mȩrȩ a̧ra̧ano̧mȩ pio judi, jabechji̧ o judiro̧ pio ju̧i̧iä ji̧dë u̧i̧ ba chiaji̧ri̧mi̧ dari̧ cjiadiäpadirȩ Ütërë yo̧a̧ chja̧oeräpȩ ju̧ri̧. Jabechji̧ duriräpȩ cjiadiämi̧ dari̧ cjiadiäpade ba chiadëmȩmi̧ darë. Jabo Ütë tjamo̧ ja̧ ma̧ȩ oa ta̧rëdiämȩ judi, pio jiro ma̧ȩ oa coëma cjiari̧ a̧ra̧ano̧mȩ pio judi, jabechji̧ yaboräpȩ cjiadiämi̧ dari̧ cjiadiäpade Ütërë yo̧a̧ chja̧oeräpȩ ju̧ri̧, ba chia tjamo̧mȩmi̧ darë. 20Ado pio ju̧i̧iä uapai̧ ta̧rëri̧ yo̧requededibe ca̧ pumȩ ⁠—⁠yo̧a̧dejȩrȩ⁠—⁠. Danȩrȩ, mȩnȩro̧ Ütë tjamo̧ ja̧ ma̧ȩ oa go̧ȩpariä a̧ra̧ano̧ji̧ri̧ pio ji̧ri̧ u̧i̧ coëma cjiari̧ cjo̧ro̧dërä judi, pjaricheo pio ji̧ri̧ u̧i̧ coëma cjiari̧ cjo̧ro̧dërä judi, jabechji̧ Ütërë yo̧a̧ chja̧oeräpȩ yu̧a̧rea̧ dadëpanȩrȩ. Danȩrȩ, pio jiro pumȩ judiro̧, dëdë, järi tjamo̧dirȩ tüdüa̧mi̧ darä cjo̧ro̧pea̧ ji̧. Järi tjamo̧dirȩ nö̧tadäräri̧ ta̧rëdiäpea̧ ji̧ Moicherë go̧ȩparërea̧ ma̧ȩ pio ju̧i̧. Jabo cjäri̧ madirȩ, judiro̧ coëma cjiari̧ jo̧rȩtatärea̧ ji̧, chji̧ chjadëra̧ jo̧rȩtariä ta̧rëdiätärea̧ ji̧, cjäri̧ madirȩ, japadë madirȩ. Ado pio ju̧i̧iä yo̧requededibe. Mȩnȩro̧ pio jiro pumȩ pio ji̧ri̧ u̧i̧ coëma cjiari̧ cjo̧ro̧dërä judi, jabechji̧ Ütërë yo̧a̧ chja̧oeräpȩ yu̧a̧rea̧ dadëpanȩrȩ ⁠—⁠yo̧mȩrȩ ni̧bä chjaorëremȩdejȩrȩ Jechu judi.

O ji̧ri̧iäpȩmo̧ ërecjiape baga̧ pio ju̧i̧ chjiari ni̧bä chjaorëremȩdejȩrȩ Jechu judi

Uruca 12:57-59

21Ado Jechu judi ji̧dë u̧i̧ a̧ra̧ano̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ pumȩ ji̧ri̧:

⁠—⁠Danȩrȩ, peadëri ja̧ ta̧rërëreji̧ri̧nȩrȩ Moicherea̧ pio judi ibëa̧ ütëti̧rea̧ pio ji̧ri̧iäpȩmo̧ yo̧rërea̧ ma̧ȩ pio ju̧i̧ ⁠—⁠yo̧a̧dejȩrȩ⁠—⁠. Ja̧di ta̧rëri̧ yo̧mȩrȩ yo̧rëremȩdejȩrȩ: ‘Ado cja̧rȩmo̧ pumȩ oa ja̧bo tänȩdëchji̧jo̧ȩ. Jabo eami̧ pumȩ üdë ado cja̧rȩmo̧ pumȩ oa ja̧bo tänȩrä judi, jabechji̧ bape chjaopea̧de. Ütarë ta̧rë ëte, bape chjaopea̧de.’ Aja̧, ja̧di ta̧rëri̧ yo̧rëremȩdejȩrȩ ibëa̧ ütëti̧rea̧ pio ji̧ri̧iäpȩmo̧ Moicherea̧ pio judi. Ado pio mȩnȩro̧borë pio jiro ma̧ȩ oa peadëri ja̧ ta̧rërëreji̧ri̧nȩrȩ ibëa̧ ütëti̧rea̧ pio ji̧ri̧iä. 22Aja̧ ca̧ pumȩ, mȩnȩro̧ ado cja̧rȩmo̧ pumȩ oa ja̧bo tänȩrä judi, jabechji̧ bape chjaoa̧ oa cjiapanȩrȩ. Jabo danȩrȩ, pio yoa ma̧ȩbo a̧de uëri̧ yo̧tämi̧ cjiarequededibe mȩnȩro̧ tjaoëpai̧ dari̧ jo̧rȩtapea̧ oa ⁠—⁠yo̧a̧dejȩrȩ⁠—⁠. Danȩrȩ, mȩnȩro̧ ado cja̧rȩmo̧ pumȩ oa jabomo̧ ma̧ cjüëtüri̧ ërecjiape bagarä judi, peaja̧di bape chjaoa̧ oa cjiapanȩrȩ. Ado mȩnȩro̧ ado cja̧rȩmo̧ pumȩ oa ya̧rä judi, idëri̧ cjia tänȩji̧ri̧rȩ ya̧rä judi, peaja̧di bape chjaoa̧ oa cjiapanȩrȩ. Jabechji̧ tjamo̧ yo̧ji̧ri̧ pio ji̧ri̧ ja̧ dëbëräpȩ cjiadiäpea̧ chianȩrȩ ütara̧ oa cjiapea̧ oa, bape chjaoa̧ oa cjiapea̧ oa. Ado mȩnȩro̧ ado cja̧rȩmo̧ oa ma̧ȩ goaedëra̧ yo̧rä judi, ma̧ cjüëtüji̧ri̧rȩ ya̧rä judi, ‘Cjäri̧ marenȩ, ba chiadërenȩ. Ütë tjamo̧ ja̧ ërecjiarea̧ üdë acji cjatätädimȩ” yo̧rä judi, cjäri̧ manȩrȩ, Ütë tjamo̧ pio judi tänȩa̧ oa cjo̧dë tja ana̧räpȩ aeno̧a̧ oa cjiapai̧ danȩrȩ. 23Ado pio ju̧i̧iä yo̧requededibe ⁠—⁠yo̧a̧dejȩrȩ⁠—⁠. Danȩrȩ, mȩnȩro̧ Ütë tjamo̧ ja̧ bëräpȩ järä, Ütë tjamo̧ pio ju̧i̧iäpȩmo̧ chjacjiamȩri̧ jo̧rȩtapea̧ oa järä, jabechji̧ chji̧ goaera̧ jo̧rȩtaji̧ri̧rȩ jätäreji̧ri̧nȩrȩ. Jabo mȩnȩro̧ järä poë ae jo̧rȩtarä judi, mȩnȩro̧ eami̧ oa yürüpea̧ oa järä dibëa̧ chji̧ri pio judiri chjaodëri̧ cjitërä judi, mȩnȩro̧ yürüpea̧ mechja dëbëräpȩ cjiarä chjaodëri̧ poë ae jo̧rȩtarä judi, mȩnȩro̧ dibëa̧ omȩ pio ju̧i̧iäpȩmo̧ chjai̧dëri̧ japea̧ pio ju̧i̧ chjiari chjaodëri̧ poë ae jo̧rȩtarä judi, jabechji̧ a̧dë jäeno̧täreji̧ri̧nȩrȩ mȩnȩro̧ yürüpea̧ pio ju̧i̧. Tjamo̧ davä. Mȩnȩro̧ chjaodëri̧ poë ae jo̧rȩtarä judi, ‘aja̧ cüdë ja̧di dari̧ japea̧ oaiä ca̧ omȩ üdë ana̧ri̧ jo̧rȩtamȩpea̧ jirodida’ quëna̧ jo̧rȩtarä judi, 24jabechji̧ mȩnȩro̧ yürüpea̧ pio ju̧i̧ a̧dë jäeno̧chji̧jo̧ȩ dibëa̧ omȩ pio ju̧i̧iäpȩ jäpea̧ oa, pio ju̧i̧ nö̧ta chjadëri̧ ori̧ bagari̧ jëdano̧pea̧ oa. Ado mȩnȩro̧ dibëa̧ omȩ pio ju̧i̧ nö̧ta chjadëri̧ jëdano̧däräa̧rä, dëdë jächji̧vä ado chjereno̧ Ütë tjamo̧ ja̧ bëräpȩ. Mȩnȩro̧ yürüpea̧ pio ju̧i̧ chjadëri̧ yürüpea̧ oa, ado chjereno̧ jächji̧vä. Aja̧, ja̧di dari̧ japapea̧de ⁠—⁠yo̧mȩrȩ ni̧bä chjaorëremȩdejȩrȩ Jechu judi.

25Ado ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ Jechu judi, ya̧mi̧räpȩ chamȩrȩ:

⁠—⁠Danȩrȩ ca̧ pumȩ, mȩnȩro̧ dibëa̧ pumȩ pio ju̧i̧iäpȩmo̧ chjai̧dëri̧ japea̧rä judi, jabechji̧ jëreeaji̧ri̧rȩ jëdano̧täreji̧ri̧nȩrȩ pio ju̧i̧ nö̧ta, dibë aechide yo̧tämi̧ cjiamȩ pio ju̧i̧ nö̧ta. Tjamo̧ davä. Jabërä järea̧ no̧rä ju̧ri̧, tjamo̧ ütarë ta̧rëji̧ri̧ pio ji̧ri̧iäpȩ go̧düdäräbea yaboi̧, chjadëri̧ jëdano̧täreji̧ri̧renȩrȩ pio dibëiäpȩmo̧ aechide yo̧mȩ pio ju̧i̧ nö̧ta. Jabo cjäri̧ manȩrȩ, mȩnȩro̧ jabërä jëdano̧rea̧ dadërä judi, jabechji̧ tjamo̧ ütärë ta̧rëji̧ri̧ pio judiro̧ ütarë ta̧rë ëte, jabechji̧ chjadüpai̧ dadiro̧dibe davä tjamo̧ bape chjaorea̧ ma̧ȩ yürümȩ pio ju̧i̧iäpȩmo̧. Ado pio judi ütara ëte, jabechji̧ chaärea̧ bëräpȩ tjamo̧ chaä tänȩmȩ pio ju̧i̧ ano̧ mire yürüpadiro̧dibe pio dibë chaä tänȩpea̧ oa. 26Ado danȩrȩ ca̧ pumȩ, tjamo̧ri̧ cjiari̧ yo̧requededibe. Mȩnȩro̧ chaäa̧ oa cjiarä, jabechji̧ chaärea̧ bëri pio judiri chjaodëri̧ go̧dürea̧ dadëpanȩrȩ, jabo jabechji̧ tutia̧ oa cjiadiäpanȩrȩ mȩnȩro̧ chjö̧na̧i̧ oa chjadëri̧ ba ano̧däräa̧rä yuro. Jabechji̧ tjamo̧ bape chjaorea̧ ma̧ȩ yürümȩ pio judi ji̧ra̧ tjamo̧ oa ba ano̧tä yo̧a̧ pio ju̧i̧iä, jabechji̧ tutia̧ oa cjiadiäpea̧ chianȩrȩ chaärea̧ bëräpȩ ju̧ri̧ mȩnȩro̧ ba ano̧däräa̧rä yuro. Ado ba ano̧däräa̧rämo̧ go̧dürea̧ dapanȩrȩ chaärea̧ bëri pio judiri. Pio ju̧i̧iä jëreeaji̧ri̧rȩ jëdano̧täreji̧ri̧nȩrȩ jabërä, chaäa̧ oa cjiabea yaboi̧ ⁠—⁠yo̧mȩrȩ ni̧bä chjaorëremȩdejȩrȩ Jechu judi ya̧mi̧räpȩ chamȩrȩ.

Goae tarari̧ dëbëpe chjaomi̧ dari̧ jiadapea̧de chjai̧dë oa yo̧mȩrȩ ni̧bä chjaorëremȩdejȩrȩ Jechu judi

27Ado Jechu judi ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ:

⁠—⁠Danȩrȩ, peadë ta̧rërëreji̧ri̧nȩrȩ Moicherea̧ pio judi ibëa̧ ütëti̧rea̧ pio ji̧ri̧iäpȩmo̧ yo̧rërea̧ ma̧ȩ oa ⁠—⁠yo̧a̧dejȩrȩ⁠—⁠. Danȩrȩ, ja̧di ta̧rëri̧ yo̧rëremȩdejȩrȩ: "Ado cja̧rȩmo̧ ja̧ iei̧ pio ji̧ baë ëba mo̧a̧dë machji̧vä". Aja̧, ja̧di ta̧rëri̧ yo̧rëremȩdejȩrȩ Moiche judi. 28Jabo danȩrȩ, pio yoa ma̧ȩbo a̧de uëri̧ yo̧requededibe mȩnȩro̧ tjaoëpai̧ dari̧ jo̧rȩtapea̧ oa. Danȩrȩ, eami̧ pumȩ üdë, jibëa̧ chji̧ra̧ chjai̧dëri̧ jo̧rȩtarä judi, jibëa̧ iei̧dë oa gari̧patämi̧ cjiamȩrȩ dae ja̧bo dae ja̧bo darä judi, jabechji̧ pio jiro iei̧ pio ji̧ nö̧ta baë ëba mo̧a̧mȩmi̧ dari̧ japade, jibëa̧ chji̧ra̧ oëra̧ jo̧rȩta̧ oaiä. 29Ado pio ju̧i̧iä yo̧requededibe. Danȩrȩ, chjai̧dë oa japadëchji̧vä. Ado eami̧ üdë dibë chjai̧dëri̧ japa tänȩrä judi, jabechji̧ putu jura̧ a̧dë chami̧ dari̧ japachji̧jo̧ȩ. Aeno̧chji̧jo̧ȩ. Oëra̧diächea oa, jabechji̧ aeno̧chji̧jo̧ȩ. Danȩrȩ, dibëa̧ dacho üdë, ca̧ȩta̧ra̧rimȩ pio judi dibë chjai̧dëri̧ japa tänȩrä judi, jabechji̧ putu jura̧ a̧dë chami̧ dari̧ japachji̧vä pio jiro chjai̧dë oa. Jabechji̧ dibëa̧ dacho oa coëno̧ ëte aeno̧mi̧ dari̧ aeno̧chji̧jo̧ȩ pio jiro chjai̧dë pio ju̧i̧. Jabechji̧ dibëa̧ icjara codë oa cjo̧dë tja ana̧räpȩmo̧ aeno̧a̧ oa cjiachea oa, jabechji̧ chjai̧dëri̧ japa tänȩmȩ dacho pio ju̧i̧ coëno̧ ëte aeno̧mi̧ dari̧ aeno̧chji̧jo̧ȩ. Jabechji̧ da cotorë cjo̧ro̧pea̧ üdë ji̧dë u̧i̧ chjadëde icjara codë oa chiamȩrȩ cjo̧dë tja ana̧räpȩ aeno̧pea̧ pio ju̧i̧iä. Jabechji̧ mȩnȩro̧ dibëa̧ icjara codë oa chiadëji̧ri̧rȩ cjo̧ro̧räbo, ji̧dë u̧i̧ chjadëtäremȩde dibëa̧ icjara codë oa chiaji̧ri̧rȩ cjo̧dë tja ana̧räpȩ aeno̧a̧ oa cjia̧ pio ju̧i̧iä. 30Ado dibëa̧ ichi üdë, mu̧i̧ chjuari ja̧ pio judi dibë chjai̧dë oa japa tänȩrä judi, jabechji̧ putu jura̧ a̧dë chami̧ dari̧ japachji̧vä pio jiro chjai̧dë oa. Jabechji̧ dibëa̧ ichi oa tuti coa ëte, aeno̧mi̧ dari̧ aeno̧chji̧jo̧ȩ jiro chjai̧dë pio ju̧i̧. Jabechji̧ dibëa̧ icjara codë oa chiadëji̧ri̧rȩ a̧dëräpȩ go̧düdäräpea̧ üdë, jabechji̧ ji̧dë u̧i̧ chjadëde dibëa̧ icjara codë oa chiaji̧ri̧rȩ cjo̧dë tja ana̧räpȩ aeno̧a̧ oa cjia̧ pio ju̧i̧iä ⁠—⁠yo̧mȩrȩ yo̧rëremȩdejȩrȩ Jechu judi.

Jibëa̧ iei̧ pio ji̧ ano̧pea̧ pio ju̧i̧ chjiari ni̧bä chjaorëremȩdejȩrȩ Jechu judi

Mateo 19:9; Marco 10:11, 12; Uruca 16:18

31Ado Jechu judi ji̧dë u̧i̧ ni̧bä chjaomȩrȩ ja̧di ta̧rëri̧ a̧de yo̧rëremȩdejȩrȩ:

⁠—⁠Danȩrȩ, peadëri ja̧, peaja̧di go̧ȩpea̧ oa cjiarëremȩde ma̧ȩ üdë üi̧ judi jibëa̧ iei̧ ji̧ ano̧pea̧ pio ju̧i̧ chjiari ⁠—⁠yo̧a̧dejȩrȩ Jechu judi⁠—⁠. Danȩrȩ, “Eami̧ pumȩ üdë jibëa̧ iei̧ pio ji̧ ano̧tämi̧ cjiarä judi, jabechji̧ ano̧rea̧ go̧ȩ i pio ju̧i̧ yürütäremȩdejȩ, ütëbodärärë dabadëchea oa, üi̧ judi jibëa̧ iei̧ ji̧ ano̧pea̧ pio ju̧i̧ chjiari dabadëchea oa.” Aja̧, ja̧di ta̧rëri̧ yo̧diibe ma̧ȩ üdë. 32Jabo ja̧di ta̧rëri̧ yo̧requededibe ⁠—⁠yo̧a̧dejȩrȩ⁠—⁠. Eami̧ üi̧ üdë jibëa̧ iei̧ pio ji̧ teracabari̧ jo̧rȩtamȩrȩ ano̧rä judi, jabechji̧ ado cja̧rȩmo̧ üi̧ pio ju̧i̧ nö̧ta baë ëba mo̧a̧dëyi̧ pio ji̧ ano̧rä judi, chjai̧dëri̧ japade Ütë tjamo̧ pio ju̧i̧iäpȩmo̧. Jabechji̧ ano̧dëtäremȩdejȩ. Ado cja̧rȩmo̧ üi̧ pio ju̧i̧ baë ëba mo̧a̧dëyi̧ pio ji̧ ano̧dëtäremȩdejȩ. Jabechji̧ pio judi ano̧a̧ oaiä, jabechji̧ china̧chjapea̧nȩ iei̧ jini̧ ado cja̧rȩmo̧ üi̧ pio ju̧i̧iä. Pio ju̧i̧iä iei̧ jini̧, china̧chjayi̧rȩ ano̧ mire ëbarä judi, chjai̧deri̧ japanȩ. Ado eami̧ üi̧ üdë pio ji̧ ano̧ mire ëbarä judi, china̧chja pio ji̧ ëbadejȩ, peaja̧di chjai̧dëri̧ japamȩrȩ. Pio ju̧i̧iä jabechji̧, a̧dë oëadëri̧ cjiadëyi̧ pio ji̧ ano̧dëpea̧de. Jabo jibëa̧ iei̧ jini̧ ado cja̧rȩmo̧ üi̧ pio ju̧i̧ nö̧ta baë ëba mo̧a̧rä judi, dëdë, ano̧pai̧ dadejȩ üi̧ üdë ⁠—⁠yo̧mȩrȩ ni̧bä chjaorëremȩdejȩrȩ Jechu judi.

Yo̧ë cji̧däpea̧ pio ju̧i̧ chjiari a̧ra̧ano̧rëremȩde Jechu judi

Santiago 5:12

33Ado ji̧dë u̧i̧ ni̧bämȩrȩ ja̧di ta̧rëri̧ a̧de ni̧bärëremȩdejȩrȩ Jechu judi pumȩ buba oa, ya̧mi̧räpȩ chamȩrȩ:

⁠—⁠Aja̧, Moicherea̧ judi ibëa̧ ütëti̧rea̧ pio ji̧ri̧iäpȩmo̧ yo̧rërea̧ ma̧ȩ pio ju̧i̧ ta̧rërëreji̧ri̧nȩrȩ peadëri ja̧ ⁠—⁠yo̧a̧dejȩrȩ⁠—⁠. Danȩrȩ, ja̧di ta̧rëri̧ yo̧rëremȩdejȩrȩ: “Mȩnȩro̧ Ano̧mȩ pio ju̧i̧ jabomo̧ ma̧ȩ yürë cji̧därä, mȩnȩro̧ tjamo̧i̧ cjiari̧ yo̧ji̧ri̧rȩ ma̧ȩ yürürä, jabechji̧ mȩnȩro̧ Ano̧mȩ pio ju̧i̧ yo̧ë cji̧däa̧mi̧ japapea̧ maeade, ‘japadëpaquëda’ quëna̧rea̧ decjiari̧.'" Aja̧, ja̧di ta̧rëri̧ yo̧mȩrȩ yo̧rëremȩdejȩrȩ Moiche judi ibëa̧ ütëti̧rea̧ pio ji̧ri̧iäpȩmo̧ no̧mȩ tjamo̧ri ja̧. 34Jabo danȩrȩ, pio yoa ma̧ȩbo a̧de uëri yo̧requededibe mȩnȩro̧ tjaoëpai̧ dari̧ jo̧rȩtapea̧ oa ⁠—⁠yo̧a̧dejȩrȩ Jechu judi⁠—⁠. Danȩrȩ, Mȩnȩro̧ ado cja̧rȩmo̧ pumȩ oa yo̧ë cji̧därä, jabechji̧ chjadëri̧ yo̧ë cji̧dächji̧jo̧ȩ, a̧dë pio ju̧i̧ a̧de yo̧rea̧ decjiari̧. ‘Jabechji̧ pumȩ judiro̧ pio coa chjiari tjamo̧ri̧ yo̧dida’ quëna̧pea̧ oa, ‘jabechji̧ a̧dë pio ju̧i̧ a̧de yo̧pea̧ chiaquëda’ quëna̧dëchji̧vä. Jabechji̧ coëma cjiari̧ yo̧ji̧ri̧rȩ yo̧ë cji̧dächji̧vä, a̧dë pio ju̧i̧ a̧de yo̧rea̧ decjiari̧. Jabechji̧ a̧dëräpȩ ju̧ri̧ chade a̧dë chjäte tjamo̧ Yo̧mȩ pio judi. Jibëa̧ charea̧ ba chia tjamo̧räpȩ chade. Ado pio ju̧i̧iä a̧dë pio ju̧i̧ a̧de yo̧rea̧mi̧dëde. 35Ado peaja̧di dabu pio ju̧i̧bo a̧de yo̧ji̧ri̧rȩ yo̧ë cji̧dädëchji̧vä. Jabechji̧ Ütë tjamo̧ pio ju̧i̧ ja̧ ta oa boë cjaeä charea̧mi̧ dade. Pio ju̧i̧iä dabu pio ju̧i̧ a̧de yo̧dëpea̧de. Ado danȩrȩ, Jerucharȩ bë ma̧ri̧ pio ju̧i̧ chjiari yo̧requededibe peaja̧di. Jabechji̧ Jerucharȩ pio ju̧i̧ a̧de yo̧ji̧ri̧rȩ yo̧ë cji̧dädëpea̧de. Jabechji̧ a̧dë chjäte Ütë pio ju̧i̧ ja̧ bë ma̧ri̧de. Pio ju̧i̧ a̧de yo̧rea̧mi̧dëde. Jabechji̧ chjaocjiami̧ dari̧ ni̧bädë matäreji̧ri̧nȩrȩ Ütë tjamo̧ ja̧ pio ju̧i̧ chjiari. 36Ado danȩrȩ, mȩnȩro̧ yo̧ë cji̧därä, dibëa̧ tjübë pio ju̧i̧bo a̧de yo̧dëpea̧de. Jabechji̧ jauëchjadënȩrȩ. Ju chiadë manȩrȩ. Jabechji̧ dibëa̧ cö̧ oa bërebëreape baga tänȩrea̧ chiadë manȩrȩ. Ado peaja̧di cö̧ oa ca̧ra̧ca̧ra̧pe baga tänȩrea̧ chiadë manȩrȩ ji̧dëri̧. Jabechji̧ ju chiadënȩrȩ. Pio ju̧i̧iä dibëa̧ tjübë oa a̧de yo̧ji̧ri̧rȩ yo̧ë cji̧dädëpea̧de. 37Pio ju̧i̧iä yo̧requededibe ⁠—⁠yo̧a̧dejȩrȩ⁠—⁠. Jabechji̧ mȩnȩro̧ yo̧a̧mi̧ japachji̧vä. “Aja̧, ja̧di dari̧ japaparequede” yo̧rä judi, jabechji̧ mȩnȩro̧ yo̧a̧mi̧ japachji̧vä. "Ado cjäri̧ marequede, ja̧di dari̧ japadëparequede” yo̧rä judi, jabechji̧ mȩnȩro̧ yo̧a̧mi̧ japachji̧vä. Jabechji̧ ma̧ȩ ji̧ra̧ri̧ a̧de yo̧rea̧ decjiari̧ japachji̧vä mȩnȩro̧ yo̧a̧mi̧. Jabechji̧ ma̧ȩ ji̧ra̧ri̧ ade yo̧rea̧ üdë tarupade Ichiae pio ju̧i̧iä. Pio ju̧i̧iä japadëpea̧de ⁠—⁠yo̧mȩrȩ ni̧bä chjaorëremȩdejȩrȩ Jechu judi ya̧mi̧räpȩ chamȩrȩ.

Bape chjaodëpea̧de yo̧rëremȩdejȩrȩ Jechu judi

Uruca 6:29-30

38Ado Jechu judi ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ pumȩ ji̧ri̧, ya̧mi̧räpȩ chaji̧ri̧ oa:

⁠—⁠Aja̧, peadë ta̧rërëreji̧ri̧nȩrȩ Moicherea̧ pio judi ibëa̧ ütëti̧rea̧ pio ji̧ri̧iäpȩmo̧ yo̧rërea̧ ma̧ȩ oa ⁠—⁠yo̧a̧dejȩrȩ⁠—⁠. Ja̧di ta̧rëri̧ yo̧rëremȩdejȩrȩ: “Jabechji̧ bape chjaochji̧vä” yo̧rëremȩdejȩrȩ. “Aja̧, pio dibë japea̧mi̧ ba dëbë japapea̧de ado cja̧rȩmo̧ oa. Jabechji̧ dibëa̧ dacho oa pupi guarä judi, peaja̧di ba dëbë pupi guapea̧de. Ado dibëa̧ jo̧dë cja̧rȩmȩ oa chjichji cjae guarä judi, peaja̧di ba dëbë chjichji cjae gua go̧dü tänȩpea̧de.” 39Aja̧ ja̧di ta̧rëri̧ yo̧mȩ oa ta̧rërëreji̧ri̧dirȩ ibëa̧ ütëti̧rea̧ judiro̧ peadëri ja̧. Jabo danȩrȩ ca̧ pumȩ, pio yoa ma̧ȩ oa a̧de uëri yo̧requededibe mȩnȩro̧ tjaoëpai̧ dari̧ jo̧rȩtapea̧ oa. Jabechji̧ dibë chjai̧dëri̧ japamȩ pio ju̧i̧ ba dëbë japadëchji̧jo̧ȩ ⁠—⁠yo̧a̧dejȩrȩ Jechu judi⁠—⁠. Jabechji̧ pumȩ judi dibëa̧ chamacho oa bide cjaeärä judi, jabechji̧ ano̧ mire ja̧ȩpë yürüchji̧jo̧ȩ ca̧ȩta̧ra̧rimȩ ja̧ chamachobo cjae bidepea̧ oa. 40Ado eami̧ üdë dibë tjamo̧ ütaraji̧ri̧ pio ji̧ri̧ ja̧ dëbëräpȩ aechide yo̧rä judi, mȩnȩro̧ chjai̧dë oa japea̧ ba oa dibëa̧ chjibo oa mitërä judi, jabechji̧ yürüchji̧jo̧ȩ. Ado ju̧i̧ uëri a̧de yürüchji̧jo̧ȩ ado cja̧rȩmo̧ chjibo oa peaja̧di, a̧de ina̧rea̧ chjibo oa. 41Ado eami̧rȩ guadia üdë jibëa̧ goë pio ju̧i̧ jachi oa ara jäe yürütä tänȩtarä judi, cja̧rȩmȩ kilometro jachi oa ara jäe yürütä tänȩtarä judi, jabechji̧ jiadadëchji̧jo̧ȩ, jabo chjadëri̧ jo̧rȩtaji̧ri̧rȩ, chjadëri̧ ara jäe yürüchji̧jo̧ȩ yo̧a̧ri̧ kilometro jachi oa. Jabechji̧ judi cjo̧dëa̧ ju̧i̧ uëri ara jäe yürüchji̧jo̧ȩ. 42Ado eami̧ pumȩ üdë pio dibëiä cjo̧dërä judi, jabechji̧ goëdëri̧ cjiadëji̧ri̧rȩ chjadëri̧ yürüchji̧jo̧ȩ. Ado dibëiä eopatämi̧ cjiamȩ pio ju̧i̧, jabechji̧ eopatämi̧ cjiaji̧ri̧rȩ yürüchji̧jo̧ȩ ⁠—⁠yo̧mȩrȩ ni̧bä chjaorëremȩdejȩrȩ Jechu judi.

Ibë eadë ji̧ri̧ pio ji̧ri̧ chjiari ni̧bä chjaorëremȩde Jechu judi

Uruca 6:27-28, 32-36

43Ado Jechu judi cjiadiädëmȩrȩ ja̧di ta̧rëri̧ a̧de yo̧rëremȩdejȩrȩ:

⁠—⁠Danȩrȩ, nomȩ tjamo̧ri ja̧ yo̧rërea̧ ma̧ȩ pio ju̧i̧ peadë ta̧rërëreji̧ri̧nȩrȩ ⁠—⁠yo̧a̧dejȩrȩ⁠—⁠. Aja̧, ja̧di ta̧rëri̧ yo̧de ma̧ȩ üdë: “Pio dibë queri̧räpȩ cjo̧ro̧mȩ pio ju̧i̧ cjäri̧ri̧ cjia dachji̧jo̧ȩ, jabo dibë eadëmȩ pio ju̧i̧, dibë dëbëpe chjaomȩ pio ju̧i̧, jabechji̧ eadë eadë dachji̧jo̧ȩ.” Aja̧ ca̧ oti̧, ja̧di ta̧rëri̧ go̧ȩpea̧ oa cjiarëremȩde ma̧ȩ üdë. Ado ja̧di ta̧rëri̧ ta̧rëa̧ maeanȩrȩ. 44Jabo danȩrȩ, pio yoa ma̧ȩ oa a̧de uëri yo̧requededibe mȩnȩro̧ tjaoëpai̧ dari̧ jo̧rȩtapea̧ oa ⁠—⁠yo̧a̧dejȩrȩ⁠—⁠. Danȩrȩ, dibë eadëji̧ri̧ pio ji̧ri̧ eaji̧ri̧rȩ cjo̧ro̧chji̧jȩrȩ. Ado pio dibë dëbëpe chjaoji̧ri̧ pio ji̧ri̧bo eachji̧jȩrȩ. Jabechji̧ pio dibë conȩdaji̧ri̧ pio ji̧ri̧ chjiari goë cjo̧dëchji̧vä Ütë tjamo̧ pio ju̧i̧iä. 45Jabechji̧ mȩnȩro̧ ja̧di dari̧ japea̧ oaiä, ibëa̧ Ama̧i̧ pio judimi̧ dari̧ japapanȩrȩ. Tjamo̧ davä. Mȩnȩro̧ dibë chjai̧dëri̧ japaji̧ri̧ pio ji̧ri̧iäpȩmo̧ chjadëri̧ japea̧ oaiä, jabechji̧ a̧dëräpȩ cjiamȩ Ama̧i̧ pio ju̧i̧ ja̧ u̧ri̧mi̧ dari̧ japapanȩrȩ. Ado Ütë tjamo̧ judi, ¿yö̧ta dari̧ japade? Yö̧ta dari̧dë, jabechji̧ ibëa̧ Ama̧i̧ pio judiborë chjadëri̧ japadejȩrȩ chjai̧dëri̧ japaji̧ri̧ pio ji̧ri̧. Danȩrȩ, chjadëri̧ cjo̧ro̧ji̧ri̧ pio ji̧ri̧ ja̧ maea oa cjitë tänȩdëdejȩ do oa, jabo chjai̧dëri̧ japaji̧ri̧ pio ji̧ri̧ ja̧bo cjitë tänȩdejȩ. Ado coëma cjiari̧ cjo̧ro̧ji̧ri̧ pio ji̧ri̧ ja̧ maea oa cjü tänȩdëde Ütë tjamo̧ judi, jabo coëma cjiari̧ cjo̧ro̧dëji̧ri̧ pio ji̧ri̧ ja̧bo cjü tänȩdejȩrȩ. Pio ju̧i̧iä dibë eadëji̧ri̧ pio ji̧ri̧iäpȩmo̧bo eatäreji̧ri̧nȩrȩ ⁠—⁠yo̧a̧dejȩrȩ⁠—⁠. 46Jabo danȩrȩ, mȩnȩro̧ dibë eaji̧ri̧ pio ji̧ri̧iäpȩmo̧ ma earä judi, ¿tjana̧ ju̧i̧iä 'chjadëri̧ japadiro̧da' quëna̧ jo̧rȩtamȩrȩ datäremȩdidibe Ütë tjamo̧ judi? ¿Tjana̧ ju̧i̧iä ba ano̧täremȩdidibe mȩnȩro̧ ja̧di dari̧ japea̧ ba oa? Danȩrȩ, peaja̧di dari̧ japa maeadirȩ chjai̧dëri̧ japaji̧ri̧ judiro̧. Peaja̧di jibë eaji̧ri̧ pio ji̧ri̧iäpȩmo̧ eadiro̧jȩrȩ. Danȩrȩ, Domano̧ ja̧ oa chëre boaji̧ri̧ pio judiro̧ chjai̧dëri̧ jape chjaodirȩ pumȩ pio ji̧ri̧iä ba uëri̧ cjo̧dë chjao oaiä. Jabo chjai̧dëri̧ japaji̧ri̧borë, jabechji̧ eadiro̧jȩrȩ pio jibëiäpȩmo̧ eaji̧ri̧ pio ji̧ri̧iäpȩmo̧. 47Pio ju̧i̧iä iëno̧ë ta̧rërequededibe. Mȩnȩro̧ dibëa̧ pumȩ maea oa cjäri̧ri̧ cjia jearä judi, ¿yö̧ta dari̧ na̧rȩji̧ri̧rȩ cjo̧ro̧nȩrȩ? Peaja̧di dari̧ japa maeadirȩ quëna̧dëji̧ri̧ judiro̧ ⁠—⁠yo̧a̧dejȩrȩ⁠—⁠. Peaja̧di chjadëri̧ jeadiro̧jȩrȩ pio jibë eaji̧ri̧ pio ji̧ri̧iäpȩmo̧. Jabo cjäri̧ ma ca̧ pumȩ, pio ibë eadëji̧ri̧ pio ji̧ri̧bo chjadëri̧ jearä judi, chjadë tjamo̧de. Jabechji̧ ja̧di dari̧ cjo̧ro̧tä eadiibe Ütë tjamo̧ judi. 48Ado pio ju̧i̧iä yo̧requededibe ⁠—⁠yo̧a̧dejȩrȩ⁠—⁠. Jabechji̧ ibëa̧ Ama̧i̧ judi pumȩ ütëbodärä oa a̧dë chjäte chjadëri̧ Japamȩ tara, peaja̧dimi̧ dari̧ cjo̧ro̧täreji̧ri̧nȩrȩ. Tjamo̧ davä. A̧dëräpȩ cjiamȩ Ama̧i̧ judi pumȩ ütëbodärä oa jabëdiärea̧ decjiari̧ chjadëri̧ Japamȩ tara, peaja̧dimi̧ dari̧ cjo̧ro̧täreji̧ri̧nȩrȩ pio ju̧i̧ ja̧ u̧ri̧ judiro̧ ⁠—⁠yo̧mȩrȩ ni̧bä chjaorëremȩdejȩrȩ pumȩ ji̧ri̧ Jechu judi.

Currently Selected:

Mateo 5: Pume

Highlight

Copy