Mateo 4

Ichiae judi u̧i̧patea̧dejȩ Jechu ju̧i̧

Marco 1:12-13; Uruca 4:1-13

1Ja̧dëa ji̧ Tjo tjamo̧ judi yabo ëba baämi̧ dari̧ jä tänȩrëremȩdejȩ Jechu ju̧i̧ chiri tjoräpȩ ju̧ri̧, pumȩ decjiaräpȩ ju̧ri̧. Jabechji̧ Jechu judi Ichiae pio ju̧i̧iä ütara̧ oa cjiapea̧ oa jä tänȩrëremȩdejȩ. 2Ado Jechu judi pio idëpȩ cjiadiärëremȩde 40 do nö̧ta, 40 gȩnȩ nö̧ta. Jabechji̧ juradëmȩrȩ cjo̧ro̧rëremȩde. Ado pio jiro japamitë chjätä ëte, jabechji̧ ana̧ri̧ tararëremȩde ta̧mȩcho̧ pio ju̧i̧. 3Ado judirä chjai̧dë oa japatä u̧i̧patamȩ pio judi acji go̧düdärärëremȩdejȩ. Ado yo̧rëremȩdejȩ:

⁠—⁠Danȩ, mȩnȩ Ütë tjamo̧ ja̧ Jojarä judi, jabechji̧ na̧ jauëchjara̧ pio ju̧ri̧ra̧ chja̧pepe järi̧ yo̧jo̧ȩ pio yoa ta̧dë oa mȩnȩ jurapea̧ oa ⁠—⁠yo̧a̧dejȩ.

4Jabo Jechu judi dëbë yo̧mȩrȩ yo̧rëremȩdejȩ:

⁠—⁠Cjäri̧ made, ja̧di dari̧ japëno̧rea̧mi̧dëde ⁠—⁠dëbë yo̧a̧dejȩ⁠—⁠. Jabechji̧ ja̧di ta̧rëri̧ go̧ȩpea̧ oa cjiade ma̧ȩ üdë. Ta̧rëvä:

"Dai oa cjiamȩ chja̧pe pio ju̧i̧iämo̧i̧ cjo̧ro̧rea̧mi̧dëde. Jabechji̧ nö̧tadëde, jabo Ütë tjamo̧ ja̧ yari pio judiri go̧düa̧mȩ ma̧ȩrämo̧ cjo̧ro̧rea̧mi̧ dade."

Aja̧, ja̧di ta̧rëri̧ go̧ȩpea̧ oa cjiade ma̧ȩ üdë ⁠—⁠dëbë yo̧a̧dejȩ Jechu judi Ichiae pio ju̧i̧iäpȩmo̧.

5Jabo Ichiae judi cjiadiädëmȩrȩ ëba järëremȩdejȩ Jechu ju̧i̧ Ütë tjamo̧ ja̧ bë ma̧ri̧räpȩ ju̧ri̧, Jerucharȩräpȩ ju̧ri̧. Ado Ütë tjamo̧ ja̧ bë uë tjamo̧räpȩ ju̧ri̧ cjia tänȩrëremȩdejȩ, jo̧ pacho ina̧räpȩ ju̧ri̧. 6Ado ja̧dëa ji̧ ja̧di ta̧rëri̧ yo̧mȩrȩ yo̧rëremȩdejȩ Ichiae judi:

⁠—⁠Danȩ, mȩnȩ Ütë tjamo̧ pio ju̧i̧ ja̧ Joja tjamo̧rä judi, jabechji̧ daburäpȩmo̧ chiquivä ⁠—⁠yo̧a̧dejȩ⁠—⁠. Jabechji̧ "Ütë tjamo̧ judi yürüa̧ mu̧i̧tjoi̧ pio judiro̧ chjadëri̧ jidapadiro̧mȩ" yo̧mȩ ma̧ȩ üdë go̧ȩpea̧ oa cjiade. Ado pio yoa ma̧ȩbo go̧ȩpea̧ oa cjiade ji̧dëri̧. "Jibëa̧ mu̧i̧tjoi̧ pio judiro̧ jibëa̧ ichira̧ idapadiro̧mȩ mȩnȩ ta̧dëräpȩ ju̧ri̧ ju chjichji cjätächea oa, mȩnȩ gitoi̧ dari̧ tarachea oa." Aja̧, ja̧di ta̧rëri̧ go̧ȩpea̧ oa cjiade ma̧ȩ üdë peaja̧di. Pio ju̧i̧iä jabechji̧ daburäpȩmo̧ chiquivä ⁠—⁠yo̧a̧dejȩ Jechu ju̧i̧ Ichiae judi.

7Jabo Jechu judi ja̧di ta̧rëri̧ dëbë yo̧rëremȩdejȩ:

⁠—⁠Jabo danȩ, pio yoa ma̧ȩbo a̧de go̧ȩpea̧ oa cjiade. "Aja̧, dibëa̧ Ano̧mȩ Ütë pio ju̧i̧ ütarami̧ dari̧ japadëchji̧jo̧ȩ" yo̧diibe ma̧ȩ üdë. ¿Napai̧rä yuro jidapadicoada Ütë tjamo̧ judi, napai̧rä yuro a̧dopadicoada, cüdë ca̧ea̧ ma̧na̧ri̧ jo̧rȩtamȩrȩ japarä judi, judi yo̧dëa̧ pio ju̧i̧ japarä judi, ¿napai̧rä yuro jidapadicoada’ quëna̧ jo̧rȩtaji̧ri̧rȩ ütarami̧ dari̧ japadë matäreji̧ri̧rea̧ro̧jo̧ȩ Ütë tjamo̧ ju̧i̧. Ado pio ju̧i̧iä jabechji̧ daburäpȩmo̧ chiquidëparequede ⁠—⁠yo̧a̧dȩjȩ Jechu judi.

8Jabo Ichiae judi cjiadiädëmȩrȩ, jabechji̧ ëba järëremȩdejȩ Jechu ju̧i̧ ya̧mi̧ uë tjamo̧räpȩ ju̧ri̧. Ado pio judiri goë mitëmȩrȩ na̧rȩrëremȩdejȩ chiriräpȩti̧ oa cjo̧ro̧ji̧ri̧ ütëti̧ pio ji̧ri̧, jënȩro̧ chiri ütëti̧ji̧ri̧rȩ cjo̧ro̧mȩräpȩ, jënȩro̧ chjacjiamȩri̧ cjo̧ro̧mȩräpȩ. Ado pio jiro bë ma̧ri̧rä cjiamȩ goë pio ju̧i̧, a̧dë chjäte ba chia pio ju̧i̧ peaja̧di goë mitëmȩrȩ na̧rȩrëremȩdejȩ bë ma̧ri̧rä cjiamȩ chjacjiamȩ pio ju̧i̧. 9Ado yo̧a̧dejȩ Jechu ju̧i̧:

⁠—⁠Danȩ, pio jiro pumȩ pio ji̧ri̧ ja̧ ütë tänȩparequedemȩ mȩnȩ pio coaiäpȩmo̧ chjacjiamȩri̧ jo̧rȩtamȩrȩ ju chatura̧ cjiadärärä judi ⁠—⁠yo̧a̧dejȩ.

10Jabo Jechu judi dëbë yo̧a̧dejȩ:

⁠—⁠Ichiae, a̧dë cjarapacoe ⁠—⁠yo̧a̧dejȩ⁠—⁠. Jabechji̧ ja̧di ta̧rëri̧ go̧ȩpea̧ oa cjiade ma̧ȩ üdë:

"Dibëa̧ Ano̧mȩ Ütë pio ju̧i̧iäpȩmo̧ ma chjacjiamȩri̧ jo̧rȩtapea̧de, ado pio ju̧i̧ ja̧ maea oa ja̧bepariä cjo̧ro̧pea̧de."

Aja̧, ja̧di ta̧rëri̧ go̧ȩpea̧ oa cjiade ma̧ȩ üdë. Ado pio ju̧i̧iä yo̧requedemȩ Ichiae, mȩnȩ coa a̧dë baätä.

11Ado pio ju̧i̧ ta̧rëa̧ oaiä, Ichiae judi a̧dë cjaraparëremȩdejȩ. Ado judi baäa̧rä, Ütë tjamo̧ ja̧ mu̧i̧tjoi̧ pio judiro̧ a̧doera̧pea̧diro̧jo̧ȩ Jechu ju̧i̧.

Jechu judi taruparëremȩde a̧ra̧ano̧pea̧ ji̧ Garirea quȩmȩ chiriräpȩ

Marco 1:14-15; Uruca 4:14-15

12Ado Jechu judi Garirea̧ quȩmȩ chiriräpȩ baärëremȩde. Jabechji̧ uirä go̧e cjaeä chudamȩ pio ju̧i̧ chjiari goë ta̧rëa̧ oaiä, Juan pio ju̧i̧ chjiari goë ta̧rëa̧ oaiä, judi chaärea̧ bëräpȩ chaäa̧ oa cjiade yo̧a̧ oa ta̧rëa̧ oaiä, jabechji̧ a̧dë baärëremȩde Judea quȩmȩ chiri oa, ado chjereno̧ baäpea̧ oa Garirea quȩmȩ chiriräpȩ. 13Ado ju̧ri̧pȩ go̧düdärära̧rä, järëremȩde Nachare quȩmȩ bë ma̧ri̧räpȩ. Jabo pio ju̧ri̧pȩ cjiadiätärea̧ ji̧, jabechji̧ baärëremȩde Capanau̧ quȩmȩ bë ma̧ri̧räpȩ, Garirea tja yuroro cjiamȩ bë ma̧ri̧räpȩ ju̧ri̧. Jabechji̧ Capanau̧ quȩmȩ bë ma̧ri̧ üdë Cheburo̧ quȩmȩ chiri cotori pio judiri baäde, Netari quȩmȩ chiri cotori pio judiri. Jabechji̧ tjoro a̧rȩmȩde Capanau̧ quȩmȩ bë ma̧ri̧ üdë. Ado pio ju̧ri̧pȩ baärëremȩde Jechu judi. 14Ado Jechu judi pio jiro chiriräpȩ go̧düdäräa̧ oaiä, jabechji̧ tjamo̧i̧ cjiari̧ cjiadiärëremȩde ma̧ȩ üdë, Ütërë ea jana̧ chjadüa̧ oa ni̧bämȩ pio judi jabërä ni̧bärërea̧ ma̧ȩ üdë. Danȩrȩ, ja̧di ta̧rëri̧ ni̧bärëremȩde Ichaia judi. Ta̧rëchji̧vä:

15"Judiodë pio judiro̧ no̧i̧dërë cjo̧ro̧dirȩ Cheburo̧ quȩmȩ chiriräpȩ ju̧ri̧, Netari quȩmȩ chiriräpȩ ju̧ri̧. Tjamo̧ davä, Garirea tja yuroro a̧rȩmȩ chiriräpȩ ju̧ri̧, bea Joroda̧ oëräpȩ a̧rȩmȩ chiriräpȩ ju̧ri̧, judiodë pio judiro̧ no̧i̧dërë cjo̧ro̧dirȩ. 16Jabo judiro̧ bagönȩmi̧ darä jo̧rȩtaji̧ri̧rȩ cjo̧ro̧rërea̧ ji̧, ja̧boa̧ji̧ri̧mi̧ dari̧ cjo̧ro̧rërea̧ ji̧, jabechji̧ a̧dë chjäte tatari̧ cjiamȩ pio ju̧i̧ daea̧diro̧jo̧ȩ. Jabechji̧ pio jibë tatami̧ dara̧ jo̧rȩta tänȩmȩ pio judi dorë cjitëmi̧ dari̧ go̧düdäräa̧de pio ji̧ri̧iäpȩ. Jabechji̧ jënȩro̧ peadë tjamo̧ri ja̧ ja̧boa̧ chja̧oerä cjo̧ro̧ marërea̧ ji̧, ja̧boa̧ chja̧oeri pio judiri Go̧dü Tänȩmȩ pio ju̧i̧ daea̧diro̧jo̧ȩ."

Aja̧, ja̧di ta̧rëri̧ go̧ȩparëremȩde Ichaia judi jabërä Jechu judi Garirearäpȩ go̧düdäräpea̧ pio ju̧i̧ chjiari, judi judiodë pio ji̧ri̧iäpȩmo̧ a̧ra̧ano̧pea̧ pio ju̧i̧ chjiari.

17Ado pio judirä taruparëremȩde Jechu judi a̧ra̧ano̧pea̧ ji̧. “Ano̧ mire jo̧rȩtachji̧vä” yo̧mȩrȩ yo̧rëremȩdejȩrȩ. “Aja̧, Ütërë yo̧a̧ chja̧oerä cjo̧ro̧pea̧ üdë ma̧na̧pea̧ ji̧ querediä tjamo̧de” yo̧mȩrȩ yo̧rëremȩdejȩrȩ.

Jechu judi mitërëremȩdejȩrȩ jibëa̧ jadü ji̧ri̧, jadüchiami̧ oa

Marco 1:16-20; Uruca 5:1-11

18Ado Jechu judi Garirea̧ tja yuroro tai̧mȩrȩ darëremȩdejȩrȩ yo̧a̧ri̧ oari ji̧ri̧, ji̧mo̧ ja̧ pio ji̧ri̧. Chimo̧ quȩmȩ pio ju̧i̧, ado A̧däre quȩmȩ pio ju̧i̧ darëremȩdejȩrȩ, cho̧ mu̧i̧rea̧ bärera̧ tjaräpȩmo̧ mu̧i̧ chideji̧ri̧ oa. Jabechji̧ cho̧ mu̧i̧ji̧ri̧rȩ cjo̧ro̧rëreji̧ri̧dirȩ. Ado Chimo̧ pio ju̧i̧, peaja̧di Pedro yo̧rëreji̧ri̧diro̧jo̧ȩ. 19Ado ji̧ri̧ damȩrȩ yabërëremȩdejȩrȩ:

⁠—⁠Danȩrȩ, pio coa cho̧rë jana̧chji̧coe ⁠—⁠yo̧a̧dejȩrȩ⁠—⁠. Jabechji̧ mȩnȩro̧ cho̧ ma mu̧i̧rërea̧ ji̧, pumȩ pio ji̧ri̧ ano̧ mire mu̧i̧riä tai̧mi̧ dari̧ dabapa tänȩparequededibe. Cho̧rë jana̧chji̧coe ⁠—⁠yo̧a̧dejȩrȩ.

20Ado Jechu pio ju̧i̧iä ta̧rëa̧ oaiä, jabechji̧ chjaodëri̧ mitë aneno̧rëreji̧ri̧diro̧jo̧ȩ jibëa̧ cho̧ mu̧i̧rea̧ bäre oa Jechu pio ju̧i̧ cho̧rë jäpea̧ oa. 21Ado ji̧dë u̧i̧ jachi oa jämȩrȩ Jechu judi ado darëremȩdejȩrȩ yo̧a̧ri̧ pumȩ ji̧ri̧, ji̧mo̧ ja̧ pio ji̧ri̧. Jibëa̧ chararä ja̧bepaji̧ri̧ oa, pio jibë nö̧rimȩ pio ju̧i̧ nö̧ta ja̧bepaji̧ri̧ oa daea̧dejȩrȩ jibëa̧ cho̧ mu̧i̧rea̧ bäre oa jëdano̧ji̧ri̧ oa. Santiago quȩmȩ pio ju̧i̧, ado Juan quȩmȩ pio ju̧i̧ daea̧dejȩrȩ, Chebedeo ja̧ u̧ri̧ pio ji̧ri̧. Ado pio jȩa cho̧rë jätä yabëa̧dejȩrȩ. 22Ado pio ju̧i̧iä chjaodëri̧ cho̧rë järëreji̧ri̧diro̧jo̧ȩ. Aja̧, jibëa̧ amai̧ ju̧i̧ a̧dë jäeno̧diro̧jo̧ȩ, jibëa̧ charabo, Jechu pio ju̧i̧ ano̧ mire cho̧rë jäpea̧ oa.

Jechu judi a̧ra̧ano̧rëremȩdejȩrȩ pumȩ ji̧ri̧ Garirearäpȩ ju̧ri̧

Uruca 6:17-19

23Ado Jechu judi Garirearäpȩ ju̧ri̧ oëra̧ti̧ oa tai̧mȩrȩ chjätäti̧ cjiarëremȩde, Judiorë a̧doparea̧ bëräpȩ a̧ra̧ano̧ chjaomȩrȩ. Jabechji̧ Ütërë yo̧a̧ chja̧oerä cjo̧ro̧pea̧ pio ju̧i̧ chjiari a̧ra̧ano̧mȩrȩ tai̧rëremȩde ma̧ȩ chjadëi̧ pio ju̧i̧ chjiari. Ado dami̧ti̧ gito oa ja̧bomȩ pio ju̧i̧ chjaparȩrëremȩdejȩ, eami̧ti̧ gito oa taramȩ oa. 24Ado judi ja̧di dari̧ japea̧ oaiä, jabechji̧ pio ju̧i̧ chjiari ma̧ȩ üdë oëra̧ti̧ oa chjuchjupechärëremȩde Chiria quȩmȩ chiri nö̧ta oa. Ado pio ju̧i̧iä ëba go̧düdärä chjaorëreji̧ri̧diro̧jo̧ȩ pumȩ judiro̧ gito ja̧boji̧ri̧ pio ji̧ri̧. Ado jabechji̧ chjö̧na̧i̧därä oa chjaparȩrëremȩdejȩrȩ Jechu judi. Dami̧ti̧ gito oa ja̧boji̧ri̧ pio ji̧ri̧ chjaparȩrëremȩdejȩrȩ. Jabechji̧ gaipa ja̧boji̧ri̧ pio ji̧ri̧, ju chjererea̧ dadëji̧ri̧ pio ji̧ri̧ chjaparȩ marëremȩdejȩrȩ, tai̧rea̧ chiadëji̧ri̧ pio ji̧ri̧bo. Ado cjarari̧ cjiape jäji̧ri̧ pio ji̧ri̧, i ma̧na̧gurami̧ dari̧ cjiaji̧ri̧ pio ji̧ri̧ chjaparȩrëremȩdejȩrȩ peaja̧di. Ado yaröca chiaji̧ri̧ pio ji̧ri̧bo chjaparȩrëremȩdejȩrȩ, yaröca chiadëji̧ri̧pe bagarea̧mi̧ dari̧. 25Ado pio ju̧i̧iä pumȩ no̧i̧dë tjamo̧rȩ cho̧rë järëreji̧ri̧diro̧jo̧ȩ. Jabechji̧ Garireariji̧ri̧ pio judiro̧, Decapoririji̧ri̧ pio judiro̧ cho̧rë järëreji̧ri̧diro̧jo̧ȩ, Jerucharȩriji̧ri̧ pio judiro̧borë. Ado Judeariji̧ri̧ pio judiro̧, ado bea Joroda̧ oëräpȩ cjo̧ro̧ji̧ri̧ pio judiro̧borë cho̧rë jä marëreji̧ri̧diro̧jo̧ȩ.

Currently Selected:

Mateo 4: Pume

Highlight

Copy