Lucas 19

Chaqueo pio judi ano̧ mire jo̧rȩtamȩpea̧de Jechu pio ju̧i̧ nö̧ta ni̧bäa̧ duri oa

1Jechu judi Jerico quȩmȩ bë ma̧ri̧ oa yu̧a̧mȩrȩ chjätärëremȩdejȩ. 2Ado ju̧ri̧pȩ cjo̧ro̧rëremȩde Chaqueo quȩmȩ judi, pumȩ pio ji̧ri̧iä domano̧ ja̧ oa chëre boamȩ pio judi. Jabechji̧ pio jiro chirirä tjamo̧ chëre boamȩrȩ cjo̧ro̧rëremȩde. Ado chëre ji̧ra̧ri̧ goamȩrȩ cjo̧ro̧rëremȩde. 3Ado judi Jechu pio ju̧i̧ tjamo̧ri̧ datämi̧ cjiamȩrȩ garë dae chjaotarëremȩdejȩ jabo cjäri̧ madejȩ, pumȩ ju chocoi̧ oaiä, ado pumȩ buba oaiä, darea̧mi̧dërëremȩde. 4Ado pio ju̧i̧iä ji̧dë u̧i̧ jachi chja jämȩrȩ yabo jäeno̧rëremȩde to oa buapea̧ oa, chicomoro quȩmȩ to oa buapea̧ oa. Jabechji̧ ja̧dira̧ tjamo̧i̧ chjätäparemȩde Jechu judi. 5Ado ja̧dëa ji̧ Jechu judi Chaqueorë toro chamȩräpȩ go̧düdäräa̧rä, jabechji̧ uëräpȩmo̧ gatë damȩrȩ ëna̧diäa̧dejȩ, jibëa̧ quȩ oa yo̧mȩrȩ:

—Chaqueo —yo̧a̧dejȩ—. Jabechji̧ jo̧ȩra̧pe biravä. Na̧ bëräpȩ cjiadiäpea̧ chiarequede. Jabechji̧ pio ju̧ri̧pȩ mo̧a̧parequede pio yaba̧. Biravä —yo̧mȩrȩ yo̧rëremȩdejȩ Jechu judi Chaqueo quȩmȩ pio ju̧i̧iäpȩmo̧.

6Ado Chaqueo judi pio ju̧i̧ ta̧rëa̧ oaiä, chjaodëri̧ birarëremȩde. Ado bira ëte, Jechu pio ju̧i̧ ëba baärëremȩdejȩ jibëa̧ bëräpȩ, a̧dë chjäte ma̧ chiadëri̧ cjiamȩrȩ. 7Jabo cjäri̧ madiro̧jo̧ȩ, Jechu judi Chaqueo pio ju̧i̧ nö̧ta ëba baämȩ oa daea̧ji̧ri̧ pio judiro̧ ütëborë ma̧ȩ goaedë oa yo̧ji̧ri̧pea̧dirȩ:

—Jabo cjäri̧ made, Jechu judi pio ju̧i̧di jadü cjiadëtäremȩde. Jabechji̧ a̧dë chjäte chjai̧dëri̧ japamȩde Chaqueo judi. Ado pio ju̧i̧iä ëba baärea̧mi̧dëdejȩ —yo̧ji̧ri̧rȩ ma̧ȩ goaedëra̧ ni̧bäji̧ri̧pea̧dirȩ, goëdëri̧ cjiaji̧ri̧rȩ.

8Ado Jechu judi Chaqueo ja̧ bëräpȩ go̧düdäräa̧ duri oa, Chaqueo judi pio ju̧i̧ ja̧ dëbëräpȩ cjiamȩrȩ yo̧rëremȩdejȩ:

—Danȩ Ano̧mȩ, cüdë goa̧ pio ju̧i̧ tjomo̧mi̧ yürüparequedejȩrȩ chjö̧na̧i̧ti̧ oa cjäri̧ ja̧boji̧ri̧ pio ji̧ri̧iäpȩmo̧ —yo̧a̧dejȩ—. Ado cüdë eami̧ pumȩ oa chjai̧dëri̧ japea̧rä judi, pio ji̧ri̧iä ba cjia̧ pio uëri baë mitëa̧rä judi, jabechji̧ ado chjereno̧ yürüparequedejȩrȩ. Jabo cüdë pio ji̧ri̧iä baë mitëa̧mi̧ yürüdëparequedejȩrȩ jabo ji̧dë u̧i̧ ji̧ra̧ oa yürüparequedejȩrȩ ba uëri. Jabechji̧ cja̧rȩmȩ chëremi̧ da oa baë mitëa̧rä judi, jabechji̧ jadüchiami̧ chëremi̧ da oa ado chjereno̧ yürüparequedejȩrȩ, cüdë baë mitëa̧ pio ju̧i̧ uëri. Ja̧di ma ja̧di ma yürüparequedejȩrȩ cüdë pumȩ pio ji̧ri̧iä ba uëri cjo̧dëa̧ pio ju̧i̧ —yo̧a̧dejȩ Jechu ju̧i̧.

9Ado Chaqueo pio judi ja̧di dari̧ quëna̧mȩrȩ yo̧a̧ oaiä, jabechji̧ ja̧di ta̧rëri̧ dëbë yo̧a̧dejȩ Jechu judi:

—Jabechji̧ Ütërë yürüa̧ oa chjätärea̧ üdë pio yaba̧ domȩ oa go̧düna̧ra̧didibe, pio yoa bërä cjo̧ro̧ji̧ri̧ pio ji̧ri̧. Ado dëdë, Abaraa̧rea̧ pio judiri ja̧mȩrenȩ jabo mȩnȩ quena̧mȩpea̧ oaiä, jabechji̧ pio ju̧i̧ nö̧ta ji̧mo̧pea̧renȩ yaba̧ pio judi quëna̧rërea̧mi̧ quëna̧mȩpea̧ tara. Jabechji̧ Abaraa̧rea̧ pio judiri ja̧ tjamo̧mȩpea̧renȩ —yo̧a̧dejȩ—. 10Jabechji̧ Pumȩrȩ Ara̧ Tjamo̧ pio judi na̧era̧pea̧dejȩrȩ dabadëpea̧ oa cjiami̧ dari̧ cjiaji̧ri̧ pio ji̧ri̧, pio ji̧ri̧ chjadëri̧ chjätärea̧ yürüpea̧ oa —yo̧mȩrȩ yo̧rëremȩdejȩ Jechu judi Chaqueo pio ju̧i̧iäpȩmo̧.

Na̧rȩrea̧ ma̧ȩmi̧ dara̧ ni̧bä chjaorëremȩde Jechu judi chëre pio ju̧i̧ chjiari

11Ado pumȩ judiro̧ Jechu pio ju̧i̧ ta̧rëa̧ oaiä, "Aja̧, dabadëpea̧ oa cjiami̧ dari̧ cjiaji̧ri̧ pio ji̧ri̧ na̧era̧pea̧requede" yo̧a̧ pio ju̧i̧ ta̧rëa̧ oaiä, oëra̧ jo̧rȩtaji̧ri̧pea̧diro̧jo̧ȩ. 'Jaebodida, chjaodëri̧ chiri ütëmȩrȩ cjo̧ro̧pamȩdida, Jerucharȩräpȩ go̧düdärä ëte, chjaodëri̧ ütëmȩrȩ cjo̧ro̧pamȩdida, jabechji̧ Ütërë yo̧a̧ chja̧oerä cjo̧ro̧pea̧ japamitë üdë chjaodëri̧ tarupapadiibëda yaba̧' quëna̧ jo̧rȩtaji̧ri̧pea̧dirȩ Jechu pio ju̧i̧ chjiari, oëra̧ jo̧rȩtaji̧ri̧rȩ. Ado pio ju̧i̧iä judiro̧ Jerucharȩ queri̧räpȩ go̧düdäräa̧ oaiä, jabechji̧ na̧rȩrea̧ ma̧ȩ oa ni̧bä chjaorëremȩdejȩrȩ Jechu judi, pumȩ judiro̧ pio jȩa chjiari oëra̧ jo̧rȩtachea oa. 12-13Ja̧di ta̧rëri̧ yo̧rëremȩdejȩrȩ pumȩ ji̧ri̧:

—Danȩrȩ, tjamo̧ cjo̧ro̧mȩ ja̧ joja pio judi cjo̧ro̧rëremȩde jibëa̧ chiriräpȩ. Jabo judi chiri ütëmȩrȩ cjo̧ro̧dërërea̧ ji̧, jënȩ cjo̧ro̧mȩ chiriräpȩ chiri ütëmȩrȩ cjo̧ro̧dërërea̧ ji̧, jabechji̧ ëna̧diäa̧ oa cjiarëremȩde chiri ji̧ra̧ri̧ goamȩ ütëmȩ pio ju̧i̧iä. Aja̧, chiri ütëpe bagapea̧ oa, chiri ütë tänȩa̧ oa cjiapea̧ oa, ëna̧diäa̧ oa cjiarëremȩde jënȩ cjo̧ro̧mȩ chiriräpȩ ju̧ri̧ ütëmȩrȩ cjo̧ro̧pea̧ oa. Aja̧, tjamo̧ yo̧rea̧ dapea̧ oa, jënȩ cjo̧ro̧mȩ chiriräpȩ ütëmȩrȩ cjo̧ro̧pea̧ oa, ëna̧diärëremȩdejȩ pio jiro ütë judi, chiri ji̧ra̧ri̧ goamȩ ütë pio judi. Pio ju̧i̧iä jëdano̧rëremȩde go̧düpea̧ ji̧. Jabo judi go̧dübea yaboi̧, jabechji̧ ma̧ȩ chjadüa̧dejȩrȩ jibëa̧ mu̧i̧tjoi̧ ji̧ri̧, o ji̧ri̧mo̧i̧. Aja̧, ichi chjö̧na̧i̧ maea oa ma̧ȩ chjadüa̧dejȩrȩ. Ado pio jȩaiäpȩ a̧dopë cjiaji̧ri̧ oa, ütëbo oa yürüchärëremȩdejȩrȩ cja̧rȩmȩ chëre oa, a̧dë chjäte ba chiati̧ oa. Aja̧, judiro̧ pio ju̧ri̧ra̧ chjadëri̧ ja̧bepapea̧ oa, chëre üdë ji̧dë u̧i̧ ji̧ra̧pe bagari̧ ja̧bepapea̧ oa, yürüchäa̧dejȩrȩ. Ado pio ji̧ri̧ yürüchäa̧ duri oa, go̧dürëremȩde jachi tjamo̧ a̧rȩmȩ chiriräpȩ jäpea̧ oa, chiri ji̧ra̧ri̧ goamȩ ütë pio judi jȩa ütë tänȩpea̧ oa.

14Jabo cjäri̧ madiro̧jo̧ȩ, jënȩ cjo̧ro̧mȩ chiriräpȩ cjo̧ro̧ji̧ri̧ judiro̧ orë eadë eadë darëreji̧ri̧diro̧jo̧ȩ. Ado pio ju̧i̧ ja̧ chja̧oerä cjo̧ro̧dëri̧ cjiarëreji̧ri̧dirȩ ji̧dëri̧. Jabechji̧ jibëa̧ chiri ütëpe bagatä ea tjamo̧dërëreji̧ri̧diro̧jo̧ȩ. Ado pio ju̧i̧iä tjamo̧ cjo̧ro̧mȩ ja̧ joja pio judi pearä go̧düa̧rä, chjaodëri̧ chjadürëreji̧ri̧diro̧jȩrȩ pumȩ ji̧ri̧, pio ju̧i̧ cho̧rë jäpea̧ oa, pio jȩa ütë tänȩpamȩ pio ju̧i̧iäpȩmo̧ ma̧ȩ yüre jäpea̧ oa, pio jiro pumȩ oa ütë tänȩchea oa. Ado pio ju̧i̧iä cho̧rë jäa̧ji̧ri̧ pio judiro̧ chiri ji̧ra̧ri̧ goamȩ ütë pio ju̧i̧iäpȩ go̧düdäräa̧rä, ja̧di ta̧rëri̧ yo̧a̧diro̧jo̧ȩ: "Danȩ, pio jiro pumȩ oa ibëa̧ ütëpe bagatä ea tjamo̧dërea̧ro̧jo̧ȩ. Pio ju̧i̧ ja̧ chja̧oerä cjo̧ro̧dëri̧ cjiarea̧rȩ" yo̧a̧diro̧jo̧ȩ. 15Jabo cjäri̧ madejȩrȩ, chiri ji̧ra̧ri̧ goamȩ ütë pio judi ta̧rë ja̧bodëa̧dejȩrȩ. Jabechji̧ judiro̧ jibëa̧ ütëpe bagatä eadëräbo, jabechji̧ jibëa̧ ütë tänȩrëremȩdejȩ.

Ado ja̧dëa ji̧ japamitë chjätä ëte pea ütëpea̧mȩ pio judi cuchupë baäa̧rä, chiri ütëmȩrȩ cjo̧ro̧pea̧ oa baäa̧rä, jabechji̧ jibëa̧ mu̧i̧tjoi̧ ji̧ri̧ pio jȩaiäpȩ jana̧tä yo̧ chjadüa̧dejȩrȩ jënȩ chëre oa yürürërea̧ pio ji̧ri̧. 'Jabechji̧ cüdë decjia nö̧ta, ¿napai̧ chëre oa boadiro̧da' quëna̧ jo̧rȩtamȩrȩ pio jȩaiäpȩ jana̧tä yo̧ chjadüa̧dejȩrȩ. 16Ado ja̧dëa ji̧ pearä dëbë yo̧mȩ pio judi ütarë yo̧a̧dejȩ: "Danȩ ano̧mȩ, mȩnȩ pio coa yürürërea̧ chërera̧ pio ju̧ri̧ra̧ ja̧beparëremȩrequede mȩnȩ decjia nö̧ta" yo̧a̧dejȩ. "Ado cja̧rȩmȩ chëre marërea̧ ji̧, jabechji̧ 10 chërepe baga̧de yaba̧, cüdë ja̧bepea̧ oaiä" yo̧a̧dejȩ. 17Ado chiri ütë cjo̧ro̧mȩ judi, pea ütë cjo̧ro̧mȩpea̧ pio judi dëbë yo̧a̧dejȩ: "Jabechji̧ mu̧i̧tjoi̧ chjadërenȩ" yo̧a̧dejȩ. "Jabechji̧ chjadëri̧ ja̧beparëremȩrenȩ cüdë mȩa jabëtari̧mi̧ oa yürüa̧ra̧ pio ju̧ri̧ra̧. Ado pio ju̧i̧iä jabechji̧, tjamo̧ yo̧rea̧ yürüparequedemȩ mȩnȩ tjamo̧ yo̧mȩrȩ cjo̧ro̧pea̧ oa, ichi chjö̧na̧i̧ bë ma̧ri̧räpȩ cjo̧ro̧ji̧ri̧ pio ji̧ri̧ ja̧ ütëmȩrȩ cjo̧ro̧pea̧ oa" yo̧a̧dejȩ. 18Ado ja̧dëa ji̧ ado cja̧rȩmo̧ mu̧i̧tjoi̧ üdë peaja̧di ütarë yo̧a̧dejȩ jibëa̧ ütë oa, jënȩ ja̧bepea̧ pio ju̧i̧ chjiari: "Danȩ ütë, mȩnȩ coa yürürërea̧ chërera̧ pio ju̧ri̧ra̧ ja̧beparëremȩrequede ji̧dë u̧i̧ ji̧ra̧pe bagarea̧mi̧ dari̧" yo̧a̧dejȩ. "Jabechji̧ cja̧rȩmȩ chëre marërea̧ ji̧, cja̧rȩichimo̧ chërepea̧de yaba̧" yo̧a̧dejȩ. 19Ado chiri ütë cjo̧ro̧mȩ judi pio ju̧i̧ ta̧rëa̧ oaiä, dëbë yo̧a̧dejȩ: "Jabechji̧ chjadëri̧ ja̧bepea̧renȩ" yo̧a̧dejȩ. "Ado pio ju̧i̧iä tjamo̧ yo̧rea̧ yürüparequedemȩ mȩnȩ tjamo̧ yo̧mȩrȩ cjo̧ro̧pea̧ oa, mȩnȩ cja̧rȩichimo̧ bë ma̧ri̧räpȩ cjo̧ro̧ji̧ri̧ pio ji̧ri̧ ja̧ ütëmȩrȩ cjo̧ro̧pea̧ oa" yo̧a̧dejȩ.

20Ado ja̧dea̧ ji̧ ado cja̧rȩmo mu̧i̧tjo̧i̧ üdë peaja̧di ütarë yo̧a̧dejȩ jibëa̧ ütë oa, jȩnȩ ja̧bepea̧ pio ju̧i̧ chjiari. "Dane ütë, mȩnȩ coa yürürërea̧ chërei̧ pio ju̧i̧mo̧i̧ oa goa jana̧requedeme. Jabechji̧ chjibo cotoro joë puri ëte goadia̧reconȩ chjadëri̧ boeapea̧ oa. 21Jabechji̧ pio mȩa uapamȩrȩ jo̧rȩta̧ oaiä, mȩnȩ oëra̧ ja̧bepamȩ pio ju̧i̧ cjäri̧ri̧ cjiamȩrȩ dadë oaiä, mȩnȩ chjaodëri̧ ërecjiape bagamȩrȩ cjo̧ro̧a̧ oaiä, jabechji̧ goadia̧reconȩ. Jabechji̧ mȩnȩ ponȩdëa̧ tjadori pio judiri baë mitëmȩrenȩ. Ado mȩnȩ ja̧bepadëa̧ tjadori pio judiribo baë mitëmȩrenȩ. Ado pio ju̧i̧iä uaparëremȩrequede. Tjamo̧ davä. Menȩ coa yürüa̧ chëre üdë aeno̧a̧ oa cjiami̧ dari̧ cjiachea oa, badëri̧ cjiami̧ dari̧ cjiachea oa, jabechji̧ uaparëremȩrequede. Ado pio ju̧i̧iä goadia̧reconȩ cüdë ana̧ri̧ bape chjaoa̧ oa cjiachea oa. 22Jabo chiri ütë cjo̧ro̧mȩ judi pio ju̧i̧ ta̧rëa̧ oaiä, ja̧di ta̧rëri̧ dëbë yo̧a̧dejȩ: "Jabo cjäri̧ marenȩ, mu̧i̧tjoi̧ chjadëdë tjamo̧renȩ" yo̧a̧dejȩ. "Danȩ, mȩnȩ pea yo̧a̧ ma̧ȩ üdë, jabechji̧ aechide yo̧mi̧ dari̧ japadimȩ" yo̧a̧dejȩ. Jabechji̧ mȩnȩ pio coa chjiari ja̧di dari̧ jo̧rȩtarä judi, jabechji̧ chjadëri̧ japea̧täremȩrenȩ ca̧ chërera̧. Tjamo̧ davä. Mȩnȩ coa chjiari ja̧di dari̧ jo̧rȩtarä judi, 'Aja̧, jibëa̧dë pio ju̧i̧bo baë mitëmȩdida, ado judi ja̧bepadëa̧ tjadori pio judiribo baë mitëmȩdida' quëna̧ jo̧rȩtarä judi, jabechji̧ ¿tjana̧ ju̧i̧iä chjadëri̧ ja̧bepadëa̧renȩ ca̧ chërera̧ pio ju̧ri̧ra̧? 23Danȩ, mȩnȩ ca̧ chërera̧ ja̧bepadëri̧ cjiarä judi, jabechji̧ chjadëri̧ eopea̧täremȩrenȩjȩrȩ chëre boearea̧ bëräpȩ ja̧bepaji̧ri̧ pio ji̧ri̧iäpȩmo̧. Jabechji̧ pio judiro̧ ano̧ mire ja̧bepea̧täreji̧ri̧diro̧jo̧ȩ. Ado pio judiro̧ ca̧ chërera̧ ja̧bepea̧ oaiä, jabechji̧ ji̧dë u̧i̧ ji̧ra̧pe baga̧täremȩde eopea̧ ba oaiä. Jabo cjäri̧ marenȩ" yo̧a̧dejȩ. "Eami̧ oa japadëa̧renȩ. Cüdë ma̧na̧rä ji̧dë u̧i̧ ji̧ra̧ oa mitëtärea̧ ji̧, cjäri̧ marenȩque, chjadëri̧ japadëa̧renȩque" yo̧a̧dejȩ. 24Ado ja̧dëa ji̧ chiri ütë pio judi jibëa̧ mu̧i̧tjo̧i̧ chjadëdë pio ju̧i̧ ni̧bäa̧ ji̧, ano̧ mire ni̧bäa̧dejȩrȩ ado cja̧rȩmo̧ mu̧i̧tjoi̧ pio ji̧ri̧iäpȩmo̧: "Danȩrȩ, cüdë pio yoa yürürërea̧ chëre pio ju̧i̧ mitëchji̧jo̧ȩ. Ado ano̧ mire yürüchji̧jo̧ȩ ado cja̧rȩmo̧ pio ju̧i̧iäpȩmo̧, ichi chjö̧na̧i̧ chëre oa goamȩ pio ju̧i̧iäpȩmo̧" yo̧a̧dejȩrȩ. 25Jabo jibëa̧ mu̧i̧tjoi̧ judiro̧ dëbë yo̧a̧diro̧jo̧ȩ: "Jabo danȩ, ichi chjö̧na̧i̧ chëre oa goade" yo̧a̧diro̧jo̧ȩ. 26Jabo chiri ütë pio judi dëbë yo̧a̧dejȩrȩ: "Jabo dabarequede jabo. Jabechji̧ yo̧requededibe. Eami̧ pumȩ judi, pio jȩaiäpȩmo̧ yürüa̧ra̧ pio ju̧ri̧ra̧ chjadëri̧ ja̧beparä judi, jabechji̧ ji̧dë u̧i̧ a̧de goaji̧ri̧mi̧ dari̧ mitërea̧ dapade eami̧ oa japadëji̧ri̧ pio ji̧ri̧iä. Jabo eami̧ pumȩ judi, pio jȩaiäpȩmo̧ yürüa̧ra̧ pio ju̧ri̧ra̧ chjadëri̧ ja̧bepadërä judi, jabechji̧ judi jabëtari̧mi̧ maea oa goaräbo, mitëa̧ oa cjiapade, pio judi mö̧na̧ maearë cjiadiärea̧mi̧ dari̧. Tjamo̧ davä. Jënȩ mitëa̧ra̧ pio ju̧ri̧ra̧ eami̧ oa japadëa̧ oaiä, ji̧dë u̧i̧ ji̧ra̧pe bagari̧ ja̧bepadëa̧ oaiä, jabechji̧ jënȩ jabëtari̧mi̧ maea oa goa̧ pio judi mitëa̧ oa cjiapade, ado cja̧rȩmo̧ pio ji̧ri̧iäpȩmo̧ ano̧ mire yürüpea̧ oa.

27Ado ja̧dëa ji̧ jibëa̧ mu̧i̧tjoi̧ pio ji̧ri̧ nö̧ta a̧dopea̧ duri oa, ja̧di ta̧rëri̧ yo̧rëremȩde:

—Ado yaba̧ ano̧ mire jo̧rȩtarequedejȩrȩ o ji̧ri̧, pio cüdë jibëa̧ ütëmȩrȩ cjo̧ro̧tä eadëji̧ri̧ pio ji̧ri̧. Jabechji̧ ëba jana̧chji̧ji̧ri̧coe. Ado pio yoaiä ca̧ dëbëräpȩ cjiaji̧ri̧ oa, jabechji̧ ja̧bo tänȩchji̧jȩrȩ" yo̧mȩrȩ yo̧rëremȩde chiri ütë judi.

—Aja̧, ja̧di ta̧rëri̧ yo̧mȩrȩ ni̧bä chjaorëremȩdejȩrȩ pumȩ ji̧ri̧ Jechu judi na̧rȩrea̧ ma̧ȩ oa.

Jechu judi Jerucharȩräpȩ go̧düdäräa̧mȩ oa, ma̧ chiadëri̧ cjiaji̧ri̧rȩ darëreji̧ri̧diro̧jo̧ȩ pumȩ judiro̧

Mateo 21:1-11; Marco 11:1-11; Juan 12:12-19

28Ado Jechu judi pio jiro ma̧ȩ oa ni̧bä chjaoa̧ duri oa, baärëremȩde Jerucharȩräpȩmo̧, jibëa̧ jadü pio ji̧ri̧ ja̧ yaboräpȩ jämȩrȩ. 29Ado Jechu judi jibëa̧ jadü pio ji̧ri̧ nö̧ta Orivo quȩmȩ ya̧mi̧räpȩ go̧düdäräa̧rä, jabechji̧ go̧düdärärëreji̧ri̧dirȩ Betage quȩmȩ bë ma̧ri̧ boi̧chji̧räpȩ, Betania quȩmȩ bë ma̧ri̧ boi̧chji̧räpȩ. Ado pio judiri jibëa̧ jadü yo̧a̧ri̧ oa yabo jätä eamȩrȩ chjadürëremȩdejȩrȩ. 30Ja̧di ta̧rëri̧ yo̧mȩrȩ chjadüa̧dejȩrȩ:

—Danȩrȩ, ji̧dë u̧i̧ yabo jächji̧vä —yo̧a̧dejȩrȩ—. Bë ma̧ri̧ boi̧chji̧räpȩ yabo jächji̧vä. Ado ju̧ri̧pȩ go̧düdärä ëte, chjaodëri̧ daeji̧ri̧renȩro̧jo̧ȩ buro pëi̧ chja oa, yura̧ oa cjiamȩ oa. Jabechji̧ eami̧rȩ cja̧rȩmȩ co buë chadëa̧ oa daeji̧ri̧renȩro̧jo̧ȩ. Jabechji̧ jare ëte, mu̧i̧ ma̧na̧chji̧jo̧ȩ. 31Ado eami̧ pumȩrȩ pio dibëiä iëno̧ë ta̧rërä judi, "¿tjana̧pea̧ oa jare ëte mu̧i̧ baärenȩro̧jo̧ȩ buro pio ju̧i̧?" iëno̧ë ta̧rërä judi, jabechji̧ ja̧di ta̧rëri̧ dëbë yo̧eji̧ri̧renȩro̧jo̧ȩ: "Danȩ, Ano̧mȩ pio judi chjadüa̧ oa jana̧rea̧ro̧jo̧ȩ buro oa. Eadejȩ." Aja̧, ja̧di ta̧rëri̧ yo̧eji̧ri̧renȩro̧jo̧ȩ. 32Ado Jechurë yo̧a̧mi̧ jäa̧dirȩ. Ado ju̧ri̧pȩ go̧düdärä ëte, daea̧diro̧jo̧ȩ buro pëi̧ chja oa, Jechu pio judi yo̧a̧mi̧. 33Ado ja̧dëa ji̧ judiro̧ buro oa jareno̧a̧ ji̧, buro ana̧ji̧ri̧ pio judiro̧ iëno̧ë ta̧rëa̧diro̧jȩrȩ: "¿Tjana̧ japapea̧ oa jareno̧nȩrȩ buro oa" iëno̧ë ta̧rëa̧. 34Jabo Jechu judi yo̧a̧mi̧ dëbë yo̧a̧diro̧jȩrȩ. "Aja̧, Ano̧mȩ pio judi eadejȩ" yo̧a̧. 35Ado ja̧dëa ji̧ mu̧i̧ ma̧na̧rëreji̧ri̧diro̧jo̧ȩ Jechu pio ju̧i̧iäpȩ. Ado ja̧dëa ji̧ jibëa̧ jadü pio judiro̧ jibëa̧ chjibora̧ pio ju̧ri̧ra̧ tjae yürüa̧diro̧jo̧ȩ buro pëi̧ chja ja̧ putu ju oa, Jechu pio judi buë chapea̧ oa. Ado Jechu judi buë cha̧dejȩ.

36Ado Jechu judi buroro buë chamȩrȩ jäa̧ nö̧ta, jabechji̧ pumȩ pio judiro̧ no̧i̧dërë mu̧i̧ mu̧i̧ a̧ra̧rëreji̧ri̧diro̧jo̧ȩ jibëa̧ chjibo oa järea̧ no̧ro yaboräpȩ ju̧ri̧. Jabechji̧ chjadëri̧ mu̧i̧ ia ëte, ütara̧mi̧ mu̧i̧ mu̧i̧ a̧ra̧diro̧jo̧ȩ pjatë a̧ra̧ri̧. 37Ado Jechu judi järea̧ no̧ üdë Orivo quȩmȩ ya̧mi̧ri pio judiri birapea̧ ji̧ go̧düdäräa̧rä, jabechji̧ pio jȩa cho̧rë jäji̧ri̧ pio judiro̧ bubarë taruparëreji̧ri̧dirȩ to̧bari̧ ni̧bäpea̧ ji̧. Jabechji̧ Ütë tjamo̧ pio ju̧i̧iäpȩmo̧ chjacjiamȩri̧ ni̧bäji̧ri̧rȩ ëna̧dië ëna̧dië yo̧ji̧ri̧rȩ ni̧bärëreji̧ri̧dirȩ Jechu judi jauëchja cjiari̧ japea̧ pio ju̧i̧ chjiari, judi ana̧ri̧ na̧rȩa̧ pio ju̧i̧ chjiari. 38Ado chjacjiamȩri̧ ni̧bäji̧ri̧rȩ ja̧di ta̧rëri̧ yo̧rëreji̧ri̧dirȩ:

—Jabechji̧ Ütë tjamo̧ pio judi chjadëri̧ japatädejȩ pio yoa Ütë oa, dai chirirä ja̧ Ütë pio ju̧i̧. Jabechji̧ Ano̧mȩ pio judi tjamo̧ yo̧rea̧ yürüa̧ oa ma̧na̧diibe. Ado a̧ro̧rȩ jachi cjiami̧ dari̧ cjiarërea̧ ji̧, jabechji̧ queri̧räpȩ cjiami̧ dari̧ cjiaji̧ri̧pea̧rea̧rȩ yaba̧ a̧dëräpȩ cjiamȩ Ütë pio ju̧i̧ nö̧ta. Ado pio ju̧i̧iä a̧dë chjäte chjacjiamȩri̧ ni̧bätäreji̧ri̧rea̧ro̧jo̧ȩ a̧dëräpȩ cjiamȩ Ütë pio ju̧i̧ —yo̧ji̧ri̧rȩ ni̧bärëreji̧ri̧dirȩ, to̧bari̧ yo̧ji̧ri̧rȩ.

39Jabo pjaricheo pio judiro̧ orë, pumȩ chjarerä cjiaji̧ri̧ pio judiro̧ yo̧a̧diro̧jo̧ȩ Jechu ju̧i̧:

—A̧ra̧ano̧mȩ, to̧bari̧ chi̧dëeajȩrȩ pio mȩa cho̧rë jäji̧ri̧ pio ji̧ri̧ pio judiro̧ ja̧di ta̧rëri̧ ni̧bächea oa, oëra̧ yo̧chea oa —yo̧a̧dirȩ.

40Jabo Jechu judi dëbë yo̧a̧dejȩrȩ:

—Cjäri̧ marequedejȩrȩ, pio ji̧ri̧ cjapiri̧ cjia tänȩrea̧mi̧dërequedejȩrȩ —yo̧a̧dejȩrȩ—. Jabechji̧ pumȩ judiro̧ cjapiri̧ cjiarä judi, Ütë tjamo̧ pio judi tänȩa̧ oa chjacjiamȩri̧ ni̧bäji̧ri̧pe bagatäreji̧ri̧dirȩ järea̧ no̧ yuroro chaji̧ri̧ ta̧dë pio judiro̧. Tjamo̧ davä. Pio coa chjiari chjacjiamȩri̧ ni̧bäji̧ri̧pe bagatäreji̧ri̧dirȩ. Ado pio ju̧i̧iä yo̧requededibe. Chja jabechji̧ chjacjiamȩri̧ ni̧bätädiro̧coe pumȩ judiro̧ —dëbë yo̧a̧dejȩrȩ.

Jechu judi Jerucharȩ bë ma̧ri̧ pio ju̧i̧ daea̧ oaiä, eamȩpea̧de

41Jabo Jechu judi Jerucharȩ queri̧ tjamo̧räpȩ go̧düdäräa̧rä, ado pio jiro bë ma̧ri̧ oa yaboräpȩ a̧rȩmȩ oa daea̧rä, cjäri̧ made, da ui gu̧romȩpea̧de, gito ana̧ri̧ jo̧rȩtamȩrȩ. 42Ado pio ju̧ri̧pȩ cjo̧ro̧ji̧ri̧ pio ji̧ri̧ jo̧rȩtamȩrȩ yo̧rëremȩde, Jerucharȩräpȩ cjo̧ro̧ji̧ri̧ pio ji̧ri̧iäpȩmo̧ irä ni̧bämȩmi̧ dari̧:

—Chia chia, jabërä chjadëri̧ dabaji̧ri̧pea̧täreji̧ri̧nȩrȩ —yo̧a̧dejȩrȩ—. Tjamo̧ davä. Mȩnȩro̧ pio yaba̧ domȩ oa Ütë tjamo̧ pio ju̧i̧ nö̧ta jachidëparȩmi̧ dari̧ cjiapea̧ pio ju̧i̧ chjadëri̧ dabapea̧tärea̧ ji̧, cjäri̧ manȩrȩ, dabapadëa̧nȩrȩ. Ja̧di tara goadia̧ oa cjiami̧ dari̧ cjiamȩpea̧de yaba̧, mȩnȩro̧ dadiämi̧ dari̧ cjiatärea̧ ji̧ —yo̧a̧dejȩrȩ—. 43Ado pio ju̧i̧iä japamitë ana̧ tjamo̧dë chjätä ëte, dibë eadëji̧ri̧ pio judiro̧ acji jana̧padiro̧dibe pio dibë tjoro tänȩpea̧ oa. Jabechji̧ mȩnȩro̧ go̧dürea̧ dachea oa, dibëa̧ yuroti̧ oa ma̧i̧ da tutia̧rä cjia tänȩpadiro̧dibe. 44Ado bë ma̧ri̧ tjoräpȩ acji yu̧a̧rea̧ darä, cjäri̧ madiro̧dibe, chjö̧na̧i̧ oa yuropa tänȩpadiro̧dibe —yo̧a̧dejȩrȩ—. Pume ütëbodärä oa ma̧i̧ dari̧ japaji̧ri̧rȩ ida chidepadiro̧dibe daburäpȩmo̧, dibëa̧ bori̧bo. Tjamo̧ davä. Ju chjichjiparea̧mi̧ dari̧, dibë ütëbo oa ja̧bo tänȩrea̧mi̧ dari̧ ida chidepadiro̧dibe daburäpȩmo̧. Ado Jerucharȩ bë ma̧ri̧ üdë ta̧dë ana̧ra̧ chjadëri̧ cji̧däa̧ oa cjiarërea̧ ji̧, cjäri̧ madiro̧jo̧ȩ, iëchäeno̧ mapadiro̧jo̧ȩ chjö̧na̧i̧ oa, bë ma̧ri̧dëpe bagarea̧mi̧ dari̧, cja̧rȩmȩ ta̧dë üdë jibëa̧ jadüremȩrä charea̧mi̧dëri̧ cjiari̧. Jabechji̧ jiada̧renȩro̧jo̧ȩ Ütë tjamo̧ ju̧i̧. Aja̧, pio dibë a̧doera̧pea̧mȩ pio ju̧i̧ eadëa̧renȩro̧jo̧ȩ. Ütë tjamo̧ judi dibë goëdaera̧pea̧räbo, dibë chjadëri̧ a̧doera̧pea̧räbo, cjäri̧ marenȩro̧jo̧ȩ, jiada̧renȩro̧jo̧ȩ. Ado mȩnȩro̧ jiada̧ oaiä, jabechji̧ ma̧i̧ dari̧ conȩda̧ oa cjiapanȩrȩ —yo̧mȩrȩ ni̧bä chjaorëremȩde Jechu judi, Jerucharȩ bë ma̧ri̧rä cjo̧ro̧ji̧ri̧ pio ji̧ri̧iäpȩmo̧ jo̧rȩtamȩrȩ. Aja̧, eamȩrȩ, gitori̧ jo̧rȩtamȩrȩ ni̧bärëremȩdejȩrȩ, pio ji̧ri̧iäpȩmo̧ irä ni̧bämȩmi̧ dari̧.

Jechu judi, Ütë tjamo̧ ja̧ bëri pio judiri go̧dü tänȩrëremȩdejȩrȩ gatë tänȩji̧ri̧ pio ji̧ri̧

Mateo 21:12-17; Marco 11:15-19

45Ado Jechu judi Jerucharȩräpȩ yu̧a̧mȩrȩ järëremȩde Ütë tjamo̧ ja̧ bëräpȩ. Ado chjaodëri̧ taruparëremȩde gatë tänȩchäji̧ri̧ pio ji̧ri̧ baä tänȩpea̧ ji̧. Tjamo̧ davä. Goe gu̧rori̧ yürüpaji̧ri̧ pio ji̧ri̧iäpȩmo̧ gatë tänȩchäji̧ri̧ pio ji̧ri̧ baä tänȩrëremȩdejȩrȩ. 46Ado yo̧rëremȩdejȩrȩ Jechu judi:

—Danȩrȩ, ja̧di ta̧rëri̧ go̧ȩpea̧ oa cjiade ma̧ȩ üdë, Ütë tjamo̧ pio judi yo̧rërea̧ ma̧ȩ üdë. "Aja̧, ca̧ bë üdë, pio coaiäpȩmo̧ ma ni̧bäpea̧ bëde." Aja̧, ja̧di ta̧rëri̧ yo̧diibe ma̧ȩ üdë —yo̧a̧dejȩrȩ Jechu judi—. Jabo cjäri̧ manȩrȩ, pio mȩnȩro̧ ma̧i̧ dari̧ japea̧ oaiä, garüji̧ri̧ pio ji̧ri̧ ja̧ a̧doparea̧ bëmi̧ dapea̧de —yo̧a̧dejȩrȩ.

47Ado Jechu judi, jabechji̧ doti̧mi̧ a̧ra̧ano̧rëremȩde Ütë tjamo̧ ja̧ bëräpȩ. Jabo cjäri̧ madiro̧jo̧ȩ, Jechu judi gatë tänȩa̧ ji̧ri̧ pio ji̧ri̧ baä tänȩa̧ pio judiri yurori järi tjamo̧pea̧dirȩ tjamo̧ yo̧ji̧ri̧ judiro̧ pio ju̧i̧ ja̧bo tänȩpea̧ ji̧. Tjamo̧ davä. O ji̧ri̧ chjiari tjamo̧ goë tuti ja̧bepaji̧ri̧ pio judiro̧, ado Moicherë go̧ȩparërea̧ ma̧ȩ oa a̧ra̧ano̧ji̧ri̧ pio judiro̧, ado judio ütëti̧ pio judiro̧borë ja̧di dari̧ jo̧rȩtaji̧ri̧pea̧dirȩ, Jechu pio ju̧i̧ tjamo̧ri̧ ja̧bo tänȩtämi̧ cjiaji̧ri̧rȩ. 48Jabo cjäri̧ madiro̧jo̧ȩ. Eami̧ oa japarea̧ dadëa̧diro̧jo̧ȩ pumȩ buba oaiä. Jabechji̧ pumȩ no̧i̧dërë ta̧rë ja̧bo marëreji̧ri̧diro̧jo̧ȩ. Pio ju̧i̧iä eami̧ oa japarea̧ dadëa̧diro̧jo̧ȩ.

Currently Selected:

Lucas 19: Pume

Highlight

Copy