Lucas 18

Ütë tjamo̧ pio ju̧i̧iä ji̧dë ma cjo̧dëpea̧de

1Ado cja̧rȩmo̧ doremȩrä Jechu judi jibëa̧ jadü pio ji̧ri̧iäpȩmo̧ ni̧bä chjaoa̧ ji̧, judiro̧ Ütë tjamo̧ pio ju̧i̧iä ji̧dë ma cjo̧dëpea̧ pio ju̧i̧ chjiari ni̧bä chjaoa̧ ji̧, ja̧di ta̧rëri̧ yo̧mȩrȩ ni̧bä chjaorëremȩdejȩrȩ na̧rȩrea̧ ma̧ȩmi̧ dara̧:

2—Danȩrȩ, ado cja̧rȩmo̧ bë ma̧ri̧räpȩ ju̧ri̧ cjo̧ro̧rëremȩde tjamo̧ ütarë yo̧mȩ pio judi, pumȩ pio ji̧ri̧iä ta̧rë ëte ütarë yo̧mȩ pio judi. Jabechji̧ pumȩ pio ji̧ri̧iä iëno̧ iëno̧ ta̧rë ëte ütarë bape chjaorea̧ ma̧ȩ oa yürümȩrȩ cjo̧ro̧rëremȩde. Jabo judi Ütë tjamo̧ pio ju̧i̧iäpȩmo̧ uapamȩrȩ cjo̧ro̧tärea̧ ji̧, cjäri̧ made, uapadëmȩrȩ cjo̧ro̧rëremȩde. Ado pumȩ pio ji̧ri̧iäpȩmo̧ cjäri̧ri̧ cjiamȩrȩ datärea̧ ji̧, cjäri̧ri̧ cjiamȩrȩ dadërëremȩdejȩrȩ.

3Ado judi cjo̧ro̧mȩ bë ma̧ri̧räpȩ ju̧ri̧ cjo̧ro̧rëreyi̧nȩ iei̧ jini̧, üi̧ chiarëreyi̧ iei̧ pio jini̧. Ado pio jini̧ ji̧dë ma jädiä chjaorëreyi̧nȩ tjamo̧ ütarë yo̧mȩ pio ju̧i̧iä cjo̧dëpea̧ oa, pio jȩa chjiari tuti japapea̧ oa. Jabechji̧ ado cja̧rȩmo̧rȩ pio jiro iei̧ pio ji̧iäpȩmo̧ ji̧dë ma dëbëpe chjaoa̧ oaiä, jabechji̧ tjamo̧ ütarë yo̧mȩ pio ju̧i̧iä ji̧dë ma cjo̧dëpea̧ oa jädiä chjaorëreyi̧nȩ pio jȩa chjiari chjadëri̧ goë tuti japapea̧ oa, pio jȩaiäpȩmo̧ ji̧dë ma dëbëpe chjaomȩ pio judi boadärärea̧ dachea oa. Ado jini̧ pio ju̧i̧iäpȩ jädäräa̧rä, ja̧di ta̧rëri̧ yo̧a̧nȩjȩ tjamo̧ ütarë yo̧mȩ pio ju̧i̧iäpȩmo̧: "Jabechji̧ coëma cjiari̧ tuti japavä pio coa chjiari" yo̧a̧nȩjȩ. "Jabechji̧ pio coa dëbëpe chjaomȩ pio judi ji̧dë ma japachea oa, chjadëri̧ tuti japë yürücoe" yo̧a̧nȩjȩ. 4Jabo tjamo̧ ütarë yo̧mȩ pio judi, cjäri̧ madejȩ, cjäri̧ri̧ cjia dadëa̧dejȩ, jabomo̧ dae ano̧a̧dejȩ pio ji̧ a̧dorea̧ jo̧rȩtadëmȩrȩ. Jabo cjäri̧ manȩjȩ, pio jiro iei̧ pio jini̧ ji̧dë ma jädiä chjaoa̧ oaiä, jini̧ cjiadiädëa̧ oaiä, pio ju̧i̧ ja̧ dëbëräpȩ ji̧dë ma cjo̧dë chjaoa̧ oaiä, jabechji̧ ana̧ri̧ jo̧rȩtamȩpea̧de. 'Chia chia, pio jiro iei̧ pio jini̧ ji̧dë ma jana̧diä chjaoni̧coada, babui̧ra̧ cjo̧dë chjaoni̧coada, cjarari̧ cjiape bagarea̧mi̧ dari̧ japapai̧ dani̧coada' quëna̧ jo̧rȩtamȩpea̧de. Ado ja̧dëa ji̧ ja̧di ta̧rëri̧ yo̧a̧de: "Jabechji̧ cüdë Ütë tjamo̧ pio ju̧i̧iäpȩmo̧ uapamȩrȩ cjo̧ro̧dëmȩborë, ado pumȩ pio ji̧ri̧iäpȩmo̧ cjäri̧ri̧ cjia dadëmȩborë, 5jabechji̧ pio ji̧ chjiari coëma cjiari̧ tuti japatäremȩrequede pio coa ji̧dë ma järätä tänȩmi̧ dari̧ japachea oa, pio coa goae tjamo̧dëri̧ cjo̧ro̧ tänȩchea" yo̧a̧de —yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi.

6Ado Ano̧mȩ pio judi pio jiro ma̧ȩ oa ja̧di ta̧rëri̧ ni̧bä chjaoa̧ duri oa, pio yoa ma̧ȩbo a̧de ni̧bä chjaorëremȩdejȩrȩ:

—Danȩrȩ ca̧ jadü, chjadëri̧ dabapachji̧vä tjamo̧ ütarë yo̧mȩ pio ju̧i̧iä, coëma cjiari̧ ütarë yo̧dëmȩ pio ju̧i̧iä —yo̧a̧dejȩrȩ—. 7Danȩrȩ, judi chjadëri̧ japadëri̧ cjiamȩborë, judi iei̧ pio ji̧ chjiari coëma cjiari̧ tuti japadëri̧ cjiamȩborë, jabechji̧ japamitë ana̧ chjätä ëte coëma cjiari̧ japamȩmi̧ dari̧ japamȩpea̧de pio ji̧ chjiari, iei̧ jini̧ pio jȩaiä ji̧dë ma cjo̧dë chjaoa̧ pio ju̧i̧iä. Ado pio ju̧i̧iä yo̧requededibe —yo̧a̧dejȩrȩ—. Danȩrȩ, pio jiro ütarë yo̧mȩ pio judi iei̧ pio ji̧ chjiari coëma cjiari̧ tuti japea̧rä judi, judi tjamo̧ri̧ japadëri̧ cjiamȩborë chjadëri̧ tuti japea̧rä judi, ¿ji̧dë u̧i̧ tuti japë yürüdëpadidibe Ütë tjamo̧ judi mȩnȩro̧ pio ju̧i̧iä cjo̧dë chjaorä judi? Danȩrȩ, mȩnȩro̧ pio dibë chjiari tjamo̧ri̧ tuti japatämi̧ cjiamȩ pio ju̧i̧iä ji̧dë ma cjo̧dë chjaorä judi, doro, gȩnȩräbo cjo̧dë chjaorä judi, ¿coëma cjiari̧ tuti japadëpadidibe jënȩ mitëa̧ pumȩ pio ji̧ri̧ chjiari? Dëdë, chjadëri̧ japapadidibe davä, ji̧dë ma dibë dae ano̧mȩmi̧ dari̧ japarea̧ decjiari̧. 8Jabechji̧ yo̧requededibe ca̧ jadü. Pio jȩaiä cjo̧dëji̧ri̧ pio ji̧ri̧ chjaodëri̧ tuti japapadejȩrȩ Ütë tjamo̧ judi, coëma cjiari̧ japamȩrȩ. Jabo danȩrȩ, iëno̧ë ta̧rërequededibe ca̧ jadü —yo̧a̧dejȩrȩ—. Pumȩrȩ Ara̧ Tjamo̧ pio judi japamitë chjätä ëte ado ma̧na̧rä, ¿napai̧ pumȩ ji̧ri̧ dana̧ra̧pade pio jiro iei̧mi̧ daji̧ri̧ pio ji̧ri̧? ¿Napai̧ pumȩ oa dana̧ra̧padejȩrȩ Ütë tjamo̧ pio ju̧i̧iä ji̧dë ma cjo̧dëtaji̧ri̧ oa, cjo̧dë ano̧rea̧ decjiari̧ cjo̧dëtaji̧ri̧ oa? Aja̧, ca̧ Ama̧i̧ judi jo̧ȩra̧pe tuti japadëräbo, judi chjaodëri̧ a̧dodëräbo, ¿napai̧ pumȩ oa dana̧ra̧pade ma̧ chjuaji̧ri̧rȩ quëna̧ji̧ri̧ oa, ji̧dë ma järiji̧ri̧rȩ cjo̧dëji̧ri̧ oa? Pio ju̧i̧ tjamo̧ri̧ jo̧rȩtamȩrȩ iëno̧ë ta̧rërequededibe ca̧ jadü —yo̧a̧dejȩrȩ Jechu judi.

Jechu judi ni̧bä chjaorëremȩdejȩrȩ pjaricheo pio ju̧i̧ chjiari, ado domano̧ ja̧ oa chëre boamȩ pio ju̧i̧ chjiari

9Ja̧dëa ji̧ Jechu judi ni̧bä chjaorëremȩdejȩrȩ pumȩ ji̧ri̧ ado cja̧rȩmo̧ na̧rȩrea̧ ma̧ȩmi̧ dara̧. Jabechji̧ oëra̧ jo̧rȩtaji̧ri̧ pio ji̧ri̧, 'pumȩ chjadëquëda' quëna̧ji̧ri̧ pio ji̧ri̧, 'jaeboquëda, cüdë ca̧ea̧ ma̧na̧ri̧ japea̧ oaiä coëma cjiari̧ cjo̧ro̧rea̧ daquëda' quëna̧ jo̧rȩtaji̧ri̧ pio ji̧ri̧ ni̧bä chjaorëremȩdejȩrȩ, o ji̧ri̧iäpȩmo̧ badë daji̧ri̧ pio ji̧ri̧. Ado ja̧di ta̧rëri̧ yo̧mȩrȩ ni̧bä chjaoa̧dejȩrȩ:

10—Danȩrȩ, yo̧a̧ri̧ pumȩ judiro̧ järëreji̧ri̧dirȩ Ütë tjamo̧ ja̧ bëräpȩ Ütë tjamo̧ pio ju̧i̧iäpȩmo̧ ni̧bäpea̧ oa —yo̧a̧dejȩrȩ—. Cja̧rȩmȩ üdë pjaricheorëremȩde. Ado cja̧rȩmo̧ üdë domano̧ ja̧ oa chëre oa boamȩrȩ cjo̧ro̧rëremȩde. 11Ado pjaricheo judi o ji̧ri̧ nö̧ta ëba cjiadëri̧ cjiamȩrȩ pio jȩa chjiari ni̧bärëremȩdejȩ Ütë oa, ja̧di ta̧rëri̧ yo̧mȩrȩ: "Aja̧ Ütë, ma̧ chiadëri̧ cjiarequede cüdë o judiro̧mi̧ dari̧ cjo̧ro̧dëmȩ tara, cüdë chjai̧dëri̧ japadëmȩ tara. Jabechji̧ o judiro̧ baë mitë chjaodirȩ o ji̧ri̧iä, Jibëa̧ pumȩ pio ji̧ri̧iäpȩmo̧ chjadëri̧ japatärea̧ ji̧, cjäri̧ madiro̧jȩrȩ, chjadëri̧ japadë madiro̧jȩrȩ. Jabo ja̧di dari̧ japadëmȩrequede jabo ji̧dë ma chjadëri̧ japarequedejȩrȩ. Ado o judiro̧ jibëa̧ iei̧ maea oa ëba mo̧a̧tärea̧ ji̧, cjäri̧ madirȩ, jibëa̧ iei̧dë oa baë ëba mo̧a̧ chjaodirȩ. Jabo cüdë, cjäri̧ marequede, ja̧di dari̧ japadëmȩrequede cüdë. Jabechji̧ pio judiro̧mi̧ dari̧ cjo̧ro̧dëmȩrequede cüdë chjai̧dëri̧ japadëmȩ tara. Ado danȩ ca̧ Ütë, pio yoaiä cjiamȩ üdë, ca̧ queri̧räpȩ cjiamȩ pio üdë, jabechji̧ pio judimi̧ da tjamo̧dërequede, cüdë o ji̧ri̧iä baë mitëdëmȩ tara. Jabo pio jiro pumȩ üdë, domano̧ ja̧ oa chëre boamȩ pio judi, dëdë, o ji̧ri̧iä baë mitëmȩde. Jabechji̧ ba uëri baë cjo̧dë chjaomȩde. Jabo pio judimi̧ dari̧ cjo̧ro̧mȩ ma ja̧didërequede cüdë. Jabechji̧ pumȩ chjadërequede. 12Ado danȩ Ütë, tüdüa̧mi̧ darä cjo̧ro̧pea̧ ma̧ȩrä cjo̧ro̧mȩ pio judi, jabechji̧ jurarea̧ pio ju̧i̧ jiadapea̧de cja̧rȩmȩ co chemana nö̧ta, pio mȩa ana̧ri̧ jo̧rȩtapea̧ oa, jurarea̧ oaiä oëra̧diächea oa. Jabo cüdë ja̧di dari̧ japadërequede jabo ji̧dë u̧i̧ japarequede. Jabechji̧ cüdë ji̧dë u̧i̧ coëma cjiari̧ cjo̧ro̧pea̧ oa yo̧a̧ri̧ co chemana nö̧ta jiadarequede jurarea̧ oa, chjadëri̧ juratärea̧ ji̧. Ado pio ju̧i̧ uëri cüdë boa̧ pio ju̧i̧ yürürequedemȩ cja̧rȩmȩ oa, mȩnȩ ütara̧ pio ju̧i̧,. Jabechji̧ ichi chjö̧na̧i̧mi̧ da oa boa̧ oaiä, jabechji̧ cja̧rȩmȩmi̧ da oa yürürequedemȩ" yo̧mȩrȩ ni̧bärëremȩde pjaricheo judi, jënȩ Ütë tjamo̧ pio ju̧i̧iäpȩmo̧ ni̧bäa̧ ji̧.

13Ado domano̧ ja̧ oa chëre boamȩ pio judi peaja̧di Ütë tjamo̧ ju̧i̧iäpȩmo̧ ni̧bärëremȩde. Jabo pumȩ chjarerä cjiatärea̧ ji̧, cjäri̧ made, jachi tjamo̧räpȩ cjiadiäa̧de, 'tjamo̧ri̧ nö̧tadëquëda' quëna̧ jo̧rȩtamȩrȩ. Ado judi a̧dëräpȩmo̧ gatë datärea̧ ji̧, jabechji̧ ëteräpȩmo̧ dae cjiamȩrȩ ni̧bärëremȩdejȩ Ütë tjamo̧ ju̧i̧, 'ba chiadëquëda, ma̧i̧ da chjai̧dëri̧ japamȩrȩ dopaquëda' quëna̧ jo̧rȩtamȩrȩ. Ado jibëa̧ maito oa cjae cjae guamȩrȩ, a̧dë chjäte gitori̧ jo̧rȩtamȩrȩ ni̧bäa̧dejȩ Ütë tjamo̧ pio ju̧i̧iäpȩmo̧, ja̧di ta̧rëri̧ yo̧mȩrȩ: "Ütë, cjäri̧ri̧ cjiamȩrȩ dacoe. Jabechji̧ a̧dë chjäte chjai̧dë oa japamȩrȩ cjo̧ro̧requede. Cjäri̧ri̧ cjia dacoe" yo̧a̧de —yo̧mȩrȩ ni̧bä chjaorëremȩdejȩrȩ Jechu judi. 14Ado ja̧dëa ji̧ a̧de yo̧a̧dejȩrȩ:

—Tjamo̧i̧ cjiari̧ yo̧requededibe —yo̧a̧dejȩrȩ—. Danȩrȩ, domano̧ ja̧ oa chëre cjo̧dëmȩ pio judi jabechji̧parȩa̧ oa cjiadiäa̧de Ütë tjamo̧ pio ju̧i̧iä jabo pjaricheo pio judi, cjäri̧ made, jabechji̧parȩa̧ oa cjiadiädëa̧de. Jabechji̧ oëra̧ quëna̧ji̧ri̧ pio judiro̧, 'Aja̧, ba chiaquëda, pumȩ chjadëquëda' quëna̧ji̧ri̧ pio judiro̧, jabechji̧ ba chiadëparȩa̧ oa cjiadiäpadirȩ. 'Jabo ba chiadëquëda jabomo̧ pumȩ chjai̧dëquëda' quëna̧ji̧ri̧ pio judiro̧, jabechji̧ ba chiaparȩa̧ oa cjiadiäpadirȩ —yo̧mȩrȩ ni̧bä chjaorëremȩdejȩrȩ Jechu judi oëra̧ jo̧rȩtaji̧ri̧ pio ji̧ri̧, 'jabechji̧ pumȩ chjadëquëda' quëna̧ jo̧rȩtaji̧ri̧ pio ji̧ri̧.

Chja ja̧di pio jȩaiäpȩmo̧ jana̧tä eadejȩrȩ bori̧ ji̧ri̧ Jechu judi

Mateo 19:13-15; Marco 10:13-16

15Ado cja̧rȩmo̧ doremȩrä pumȩ judiro̧ ëba go̧düdärärëreji̧ri̧diro̧jȩrȩ bori̧ pio ji̧ri̧ Jechu pio ju̧i̧iäpȩ, Jechu judi pio ji̧ri̧ ga̧re tarapea̧ oa, pio ji̧ri̧ chjadëri̧ dapea̧ oa. Jabo jibëa̧ jadü pio judiro̧ pio ji̧ri̧ daea̧ oaiä, jabechji̧ to̧bari̧ yo̧a̧diro̧jȩrȩ ja̧di dari̧ japadëtä, Jechu pio ju̧i̧iäpȩ ëba jana̧dëtä. 16Jabo Jechu judi pio ji̧ri̧ daea̧ oaiä, chjaodëri̧ tuti yo̧mȩrȩ ëna̧diäa̧dejȩrȩ bori̧ ji̧ri̧ pio jȩaiäpȩ jana̧tä. Ado yo̧a̧dejȩrȩ jibëa̧ jadü ji̧ri̧:

—Cjäri̧ ma, chja jabechji̧ jana̧tädiro̧coe bori̧ pio judiro̧. Tja̧reparȩdëchji̧jȩrȩ —yo̧a̧dejȩrȩ—. Jabechji̧ pio jiro bori̧mi̧ da maearë yu̧a̧rea̧ dapadirȩ Ütërë yo̧a̧ chja̧oerä. Chja jabechji̧ jana̧tädiro̧coe —yo̧a̧dejȩrȩ—. 17Ado danȩrȩ, tjamo̧i̧ cjiari̧ yo̧requededibe. Eami̧ pumȩ üdë bori̧ pio judiro̧ quëna̧mi̧ dari̧ quëna̧dërä judi, Ütërë yo̧a̧ chja̧oeräpȩ yu̧a̧rea̧ dadëpade. Tjamo̧ davä. Eami̧ pumȩ üdë bori̧ pio judiro̧ quëna̧mi̧ dari̧ quëna̧dërä judi, bori̧ judiro̧, 'Aja̧, Ütë tjamo̧ ja̧ ma̧ȩ üdë tjamo̧dida' quëna̧mi̧ dari̧ quëna̧dërä judi, jabechji̧ Ütërë yo̧a̧ chja̧oeräpȩ yu̧a̧rea̧ dadëpade —yo̧a̧dejȩrȩ.

Chëre ji̧ra̧ri̧ goamȩ pio ju̧i̧ chjiari ni̧bä chjaode Jechu judi

Mateo 19:16-30; Marco 10:17-31

18Ado cja̧rȩmȩ pumȩ üi̧ judi, tjamo̧ yo̧mȩ pio judi ja̧di ta̧rëri̧ yo̧mȩrȩ iëno̧ë ta̧rërëremȩdejȩ Jechu ju̧i̧:

—Danȩ a̧ra̧ano̧mȩ, chjadërenȩ. Ado pio ju̧i̧iä iëno̧ë ta̧rërequedemȩ —yo̧a̧dejȩ—. Danȩ, cüdë bucho ana̧ cjo̧ro̧rea̧ dapea̧ oa, ¿tjana̧ oa japatäremȩrequede cüdë? —iëno̧ë ta̧rëa̧dejȩ.

19Ado Jechu judi dëbë yo̧a̧dejȩ:

—¿Tjana̧ ju̧i̧iä "a̧ra̧ano̧mȩ chjadërenȩ" yo̧renȩque? —iëno̧ë ta̧rëa̧dejȩ—. Danȩ, chjadëmȩ pio judi jabomo̧ cja̧rȩmȩde. Ütë tjamo̧ pio judimo̧de. 20Ado yaba̧ chjadëri̧ dëbë yo̧parequedemȩ mȩnȩ coa iëno̧ë ta̧rëa̧ pio ju̧i̧ chjiari —yo̧a̧dejȩ—. Danȩ, mȩnȩ bucho ana̧ cjo̧ro̧rea̧ datämi̧ cjiarä judi, jabechji̧ nö̧tadäräri̧ ta̧rë japavä tüdüa̧mi̧ darä cjo̧ro̧pea̧ ma̧ȩ pio ju̧i̧ —yo̧a̧dejȩ—. Aja̧, ado cja̧rȩmo̧ ja̧ iei̧ ji̧ baë ëba mo̧a̧dëvä. Ado cja̧rȩmo̧ pumȩ oa ja̧bo tänȩdëvä. Ado garüdëvä. Ma̧ȩ chjádë yürüdëvä, ado mȩa nö̧riji̧ri̧ pio ji̧ri̧ ba chia dajȩrȩ. Aja̧, pio jiro ma̧ȩrä cjo̧ro̧pea̧de —yo̧mȩrȩ yo̧a̧dejȩ Jechu judi.

21Jabo pumȩ üi̧ judi pio ju̧i̧ ta̧rëa̧ oaiä, dëbë yo̧a̧dejȩ Jechu ju̧i̧:

—Danȩ, mȩnȩ yo̧a̧ ma̧ȩ chjö̧na̧i̧ oa nö̧tadäräri̧ ta̧rëdiämȩrȩ cjo̧ro̧requede no̧mȩ tjamo̧ri ja̧, cüdë boi̧chji̧rä ja̧. Jabechji̧ nö̧tadäräri̧ ta̧rëdiäa̧reconȩ cjiadiärea̧ decjiari̧ —yo̧a̧dejȩ.

22Ado Jechu judi jënȩ dëbë yo̧a̧ pio ju̧i̧ ta̧rëa̧ oaiä, ja̧di ta̧rëri̧ dëbë yo̧a̧dejȩ:

—Jabo danȩ, jabë pjärämȩde cja̧rȩmȩrȩ —yo̧a̧dejȩ—. Jabechji̧ mȩnȩ jabëdiärea̧ decjiari̧ cjo̧ro̧tämi̧ cjiarä judi, jabechji̧ na̧ea̧ chjö̧na̧i̧ oa gatë tänȩchäeno̧jo̧ȩ. Ado gatë tänȩ ëte, jabechji̧ chëre chjö̧na̧i̧ oa yürüjȩrȩ chjö̧na̧i̧ti̧ oa cjäri̧ ja̧boji̧ri̧ pio ji̧ri̧iäpȩmo̧. Jabechji̧ mȩnȩ ja̧di dari̧ japarä judi, a̧dë chjäte ba chia pio ju̧i̧ goaparenȩ a̧dëräpȩ ju̧i̧. Aja̧ ado dari̧ japa ëte, jabechji̧ cho̧rë jana̧coe —yo̧a̧dejȩ.

23Jabo cjäri̧ made, judi pio jiro ma̧ȩ oa ta̧rëa̧ oaiä, gito ana̧ri̧ jo̧rȩtamȩpea̧de. Jabechji̧ a̧dë chjäte ji̧ra̧ri̧ goamȩrȩ cjo̧ro̧rëremȩde. 24Ja̧dëa ji̧ Jechu judi üi̧ pio ju̧i̧iäpȩmo̧ cho̧rë damȩrȩ, pio jȩa a̧dë baämȩ oa cho̧rë damȩrȩ yo̧rëremȩde:

—Danȩrȩ, chjao tjamo̧de chëre ji̧ra̧ri̧ goamȩ pio ju̧i̧iä Ütërë yo̧a̧ chja̧oerä yu̧a̧pea̧ üdë —yo̧a̧de—. 25Ado peaja̧di chjao tjamo̧de putu ju chocomȩ pio judi cararea̧ cjara oaiä yu̧ë chjätäpea̧ üdë. Jabo danȩrȩ, chëre ji̧ra̧ri̧ goamȩ pio judi Ütërë yo̧a̧ chja̧oeräpȩ yu̧a̧pea̧ üdë ji̧dë u̧i̧ chjaode jabo. Tjamo̧ davä. Putu ju chocomȩ judi cararea̧ cjara oaiä yu̧ë chjätäpea̧ pio ju̧i̧iä ji̧dë u̧i̧ chjaode davä chëre ji̧ra̧ri̧ goamȩ pio judi Ütërë yo̧a̧ chja̧oeräpȩ yu̧a̧pea̧ üdë —yo̧rëremȩde.

26Ado Jechu judi pio jiro ma̧ȩ oa ni̧bä chjaoa̧ pio ju̧i̧ ta̧rëji̧ri̧ pio judiro̧ ta̧rëa̧ oaiä, jabechji̧ dacho bëremi̧ cjiami̧ dari̧ jo̧rȩtaji̧ri̧pea̧dirȩ, ana̧ri̧ jo̧rȩtaji̧ri̧rȩ. Ado yo̧a̧diro̧jo̧ȩ Jechu ju̧i̧:

—Jabo ja̧dirä judi, ¿chjiadirȩ tjamo̧ri̧ chjätärea̧ dapaji̧ri̧ judiro̧? —iëno̧ë ta̧rëa̧diro̧jo̧ȩ—. Chjätäpea̧ üdë chëre ji̧ra̧ri̧ go̧a̧mȩ pio ji̧ri̧iä chjao tjamo̧rä judi, ¿tjana̧ pumȩrȩ chjätärea̧ dapacjivadi? —yo̧ji̧ri̧rȩ iëno̧ë ta̧rëa̧diro̧jo̧ȩ.

27Jabo Jechu judi dëbë yo̧a̧dejȩrȩ:

—Dëdë, chjätärea̧ üdë pumȩ pio ji̧ri̧iä chjao tjamo̧de. Jabechji̧ japarea̧mi̧dëde. Jabo chjao tjamo̧dëde Ütë tjamo̧ pio ju̧i̧iä —yo̧a̧dejȩrȩ—. 'Jabechji̧ japarea̧mi̧dëdida' quëna̧dëmȩde. Dëdë, pumȩ judiro̧ jibëa̧ ma̧na̧ri̧ japea̧ oaiä chjätärea̧mi̧dëdirȩ, jabo Ütë tjamo̧ pio judi tuti japea̧ oaiä, dëdë, chjätärea̧ dapai̧ dadirȩ —yo̧mȩrȩ ni̧bä chjaorëremȩdejȩrȩ Jechu judi.

28Ado ja̧dëa ji̧ Pedro judi yo̧a̧dejȩ:

—Jabo danȩ, ¿yö̧ta dari̧ jo̧rȩtamȩrȩ dapadiibe Ütë tjamo̧ judi? Jabechji̧ ibëa̧remȩ chjö̧na̧i̧ oa a̧dë ma̧na̧rea̧ro̧jo̧ȩ pio mȩa cho̧rë jana̧pea̧ oa. ¿Yö̧ta dari̧ jo̧rȩtamȩrȩ dapadiibe? —iëno̧ë ta̧rëa̧dejȩ.

29Ado Jechu judi dëbë yo̧a̧dejȩ:

—Tjamo̧i̧ cjiari̧ yo̧requedemȩ. Jabechji̧ eami̧ pumȩ üdë pio coa eamȩrȩ baärä judi, jibëa̧ bë oa a̧dë baärä judi, jibëa̧ iei̧ pio ji̧ a̧dë baärä judi, jibëa̧ ayi̧ma̧i̧ pio ji̧ri̧ a̧dë baärä judi, jibëa̧ ayi̧cai̧ pio ji̧ri̧ a̧dë baärä judi, jibë nö̧riji̧ri̧ pio ji̧ri̧ a̧dë baärä judi, jibëa̧ bori̧ pio ji̧ri̧ a̧dë baärä judi, jibëa̧ pumȩ ütëbo oa a̧dë baärä judi, o judiro̧ peaja̧di ta̧rërea̧ dapea̧ oa baärä judi, o judiro̧ peaja̧di Ütërë yo̧a̧ chja̧oerä cjo̧ro̧rea̧ dapea̧ oa baärä judi, 30jabechji̧ pio yoa chirirä cjo̧ro̧a̧ nö̧ta a̧dë chjäte ji̧ra̧ra̧ pio ju̧ri̧ra̧ ba ano̧a̧ oa cjiapade. Ado pio ju̧i̧ uëri ma̧na̧pamȩ japamitërä, bucho ana̧ cjo̧ro̧rea̧ dapade peaja̧di —yo̧mȩrȩ dëbë yo̧rëremȩdejȩ Pedro ju̧i̧ Jechu judi.

Jechu judi ado ni̧bädejȩrȩ jibëa̧ jadü ji̧ri̧ jënȩ ja̧bopea̧ pio ju̧i̧ chjiari

Mateo 20:17-19; Marco 10:32-34

31Ado Jechu judi jibëa̧ jadü pio ji̧ri̧mo̧i̧ ni̧bä chjaotämi̧ cjiamȩrȩ o ji̧ri̧ a̧dë järëreji̧ri̧diro̧jȩrȩ. Ja̧dëa ji̧ ja̧di ta̧rëri̧ yo̧a̧dejȩrȩ:

—Danȩrȩ, Jerucharȩräpȩ baäparea̧rȩ yaba̧ —yo̧a̧dejȩrȩ—. Ado Ütërë ea jana̧ chjadüa̧ ni̧bäji̧ri̧ pio judiro̧ Pumȩrȩ Ara̧ Tjamo̧ pio ju̧i̧ chjiari jabërä yo̧rërea̧ ma̧ȩ pio judi tjamo̧i̧padäräa̧ oa cjiapade pio ju̧ri̧pȩ —yo̧a̧dejȩrȩ—. 32Danȩrȩ, judiodë pio ji̧ri̧iäpȩmo̧ yürüpadiro̧coe. Ado airi̧ cjia airi̧ cjia chjaocjiapadiro̧coe. Idi̧ dari̧ conȩdapadiro̧coe. A̧ra̧ a̧ra̧ pjui̧no̧padiro̧coe. 33Ado peaja̧di biderea̧ ca̧i̧ra̧ pio ju̧ri̧ra̧ bide cjaeäpadiro̧coe. Ado ja̧dëa ji̧ ja̧bo tänȩpadiro̧coe. Tjamo̧ davä. Ja̧bo tänȩpadiro̧coe jabo ja̧dëa ji̧ tjarari̧ do chjätä ëte, ado chjereno̧ bëdüparequede —yo̧a̧dejȩrȩ.

34Jabo Jechu ja̧ jadü judiro̧, cjäri̧ madiro̧jo̧ȩ, bapë ta̧rëdëa̧diro̧jo̧ȩ. Jabechji̧ judiro̧ chjadëri̧ ta̧rëtärea̧ ji̧, tjamo̧ri̧ ta̧rërea̧ dadëa̧dirȩ. Jabechji̧ Jechurë pearä yo̧a̧ ma̧ȩ pio judi goadia̧ oa cjiami̧ dari̧ cjiarërea̧ oaiä, tjamo̧ri̧ ta̧rërea̧ dadëa̧dirȩ.

Jechu judi chjaparȩrëremȩdejȩ da cotomȩ pio ju̧i̧

35Ado Jechu judi Jerico quȩmȩ bë ma̧ri̧ queri̧räpȩ go̧düdärärërea̧ ji̧, da cotomȩ pio judi järea̧ no̧ yuroro charëremȩde. Järea̧ no̧ yuroro chamȩrȩ chëre oa cjo̧dë chjaorëremȩdejȩrȩ pumȩ ji̧ri̧iä. 36Ado pumȩ bubarë ma̧i̧ dari̧ gürë ea cjiari̧ chjätäa̧rä, da cotomȩ judi pio ji̧ri̧ ta̧rë oaiä iëno̧ë ta̧rëa̧dejȩrȩ, jënȩro̧ japea̧ pio ju̧i̧ chjiari. 37Ado pumȩ judiro̧ dëbë yo̧a̧diro̧jo̧ȩ Jechu judi no̧ro chjätäa̧ pio ju̧i̧ chjiari, Nacharerimȩ pio judi no̧ro chjätäa̧ pio ju̧i̧ chjiari. 38Ado da cotomȩ judi pio ju̧i̧ ta̧rëa̧ oaiä, goae tarari̧ ëna̧diämȩpea̧de, ja̧di ta̧rëri̧ yo̧mȩrȩ:

—Jechu, Davirea̧ pio judiri ja̧mȩ pio ju̧i̧ yo̧requedemȩ. Jabechji̧ cjäri̧ri̧ cjia dacoe —ëna̧diämȩrȩ yo̧rëremȩde.

39Jabo pio ju̧i̧ ja̧ dëbëräpȩ chjätäa̧ji̧ri̧ pio judiro̧ cjapiri̧ cjiatä yo̧tea̧diro̧jo̧ȩ. Jabo cjäri̧ made, järidëpe bagadëa̧de jabo ji̧dë u̧i̧ goae tarari̧ ëna̧diämȩpea̧de:

—Davirea̧ ja̧ joja pio ju̧i̧ yo̧requedemȩ. Cjäri̧ri̧ cjia dacoe! —ëna̧diämȩrȩ yo̧a̧dejȩ.

40Ado Jechu judi pio ju̧i̧ ta̧rëa̧ oaiä, cjiadiäa̧de. Ado ëna̧diäa̧mȩ pio ju̧i̧ pio jȩaiäpȩ ëba jana̧tä yo̧a̧dejȩrȩ pumȩ ji̧ri̧. Ado da cotomȩ pio judi Jechu ja̧ queri̧räpȩ go̧düdäräa̧mȩ oa, Jechu judi iëno̧ë ta̧rëa̧dejȩ:

41—Danȩ, ¿tjana̧ oa japatä earenȩque? —iëno̧ë ta̧rëa̧dejȩ.

Ado da cotomȩ pio judi dëbë yo̧a̧dejȩ:

—Tjana̧ japatädë, danȩ Ano̧mȩ, jabechji̧ ado chjereno̧ da mirerea̧ yürücoe —dëbë yo̧a̧dejȩ.

42Ado Jechu judi dëbë yo̧a̧dejȩ:

—Jabechji̧de ado ja̧di. Jabechji̧ damȩpe jävä. Mȩnȩ quëna̧ pio ju̧i̧iä, chjaparȩa̧ oa cjiarenȩ —yo̧a̧dejȩ.

43Ado pumȩ pio judi chjaodëri̧ damȩpea̧de. Ado ja̧dëa ji̧ chjaodëri̧ chjacjiamȩri̧ jo̧rȩtamȩpea̧dejȩ Ütë tjamo̧ ju̧i̧. Jechu pio ju̧i̧ cho̧rë jämȩrȩ chjacjiamȩri̧ ni̧bämȩpea̧dejȩ. Ado judimo̧rȩdë jabo o judiro̧borë, Jechu judi japea̧ pio ju̧i̧ irä daea̧ji̧ri̧ pio judiro̧borë chjacjiamȩri̧ ni̧bäji̧ri̧pea̧diro̧jo̧ȩ Ütë tjamo̧ ju̧i̧.

Currently Selected:

Lucas 18: Pume

Highlight

Copy