Lucas 20

O judiro̧ dëbëpe chjaomi̧ dari̧ japarëreji̧ri̧diro̧jo̧ȩ Jechu pio ju̧i̧

Mateo 21:23-27; Marco 11:27-33

1Ado cja̧rȩmo̧ doremȩrä Jechu judi pumȩ ji̧ri̧ Ütë tjamo̧ ja̧ bëräpȩ a̧ra̧ano̧rërea̧ ji̧, ma̧ȩ chjadëi̧ pio ju̧i̧ chjiari ma̧ȩ oa a̧ra̧ano̧rërea̧ ji̧, pio ju̧i̧ dëbëpe chjaomi̧ dari̧ japaji̧ri̧ pio judiro̧ go̧düdärärëreji̧ri̧diro̧jo̧ȩ. Tjamo̧ davä. O ji̧ri̧ chjiari tjamo̧ goë tuti ja̧bepaji̧ri̧ judiro̧, Moicherë go̧ȩparërea̧ ma̧ȩ oa a̧ra̧ano̧ji̧ri̧ judiro̧, ado judio tjamo̧ yo̧ji̧ri̧ ütëti̧ pio judiro̧borë go̧düdärärëreji̧ri̧dirȩ pio ju̧i̧iäpȩ. 2Ado yo̧a̧diro̧jo̧ȩ:

—Danȩ, chjadëri̧ yo̧ibe —yo̧a̧diro̧jo̧ȩ—. Jabechji̧ mȩnȩ ji̧ra̧ tjamo̧ oa japea̧renȩ. ¿Jabo chjia ja̧ ma̧ȩrä japamȩrenȩ mȩnȩ? ¿Chjiarë chjadüa̧ oa ja̧di dari̧ japarëmȩrenȩ mȩnȩ? —iëno̧ë ta̧rëa̧diro̧jo̧ȩ Jechu ju̧i̧.

3Jabo Jechu judi dëbë yo̧tärea̧ ji̧ ja̧di ta̧rëri̧ yo̧a̧dejȩrȩ:

—Danȩrȩ, pio cüdëborë iëno̧ë ta̧rëparequededibe —yo̧a̧dejȩrȩ—. Ado mȩnȩro̧ coa chjadëri̧ dëbë yo̧rä judi, peaja̧di chjadëri̧ dëbë yo̧parequededibe mȩnȩro̧ coa yo̧a̧ pio ju̧i̧. Danȩrȩ, chjadëri̧ yo̧chji̧coe yaba̧. 4¿Chjia ja̧ ma̧ȩrä go̧ȩ cjaeä chudarëremȩdejȩrȩ pumȩ ji̧ri̧ Juan judi? Jabo Ütë tjamo̧ ja̧ ma̧ȩrä, jabo pumȩ ja̧ ma̧ȩrä? Chjadëri̧ yo̧chji̧coe —yo̧mȩrȩ ba dëbë iëno̧ë ta̧rërëremȩdejȩrȩ Jechu judi.

5Ado judiro̧ Jechu pio ju̧i̧iä ta̧rëa̧ oaiä, 'yö̧ta dari̧ dëbë yo̧täreji̧ri̧a̧ro̧ju̧i̧da' quëna̧ jo̧rȩtaji̧ri̧rȩ chjaodëri̧ ni̧bä chjaoji̧ri̧pea̧dirȩ jibëa̧ dëbëti̧ra̧ chia, ja̧di ta̧rëri̧ yo̧ji̧ri̧rȩ:

—Danȩrȩ, a̧ro̧rȩ dëbë yo̧rä judi, "Aja̧, Juan pio judi Ütë tjamo̧ pio ju̧i̧ ja̧ ma̧ȩrä go̧ȩ cjaeä chudarëremȩde" dëbë yo̧rä judi, jabo cjäri̧ madiibe, pio ibëiäpȩmo̧ dëbë yo̧pai̧ dadiibe. "Jabo Ütë tjamo̧ ja̧ ma̧ȩrä chuda̧rä judi, ¿tjana̧ japatä Juan pio ju̧i̧ quëna̧dëa̧renȩro̧jo̧ȩ?" yo̧pai̧ da jirodiibe. 6Jabo cjäri̧ marea̧rȩ, a̧ro̧rȩ, "Aja̧, pumȩ ja̧ ma̧ȩrä go̧ȩ cjaeä chudarëremȩde" dëbë yo̧rä judi, peaja̧di uapai̧ dade. Jabechji̧ chjaodëri̧ ërecjiape bagapai̧ dadiro̧ibe pumȩ judiro̧. Ta̧dëra̧ ae cjie ja̧bo tänȩpai̧ dadiro̧ibe ji̧dëri̧. ‘Jabechji̧ Juan pio judi Ütërë ea jana̧ chjadüa̧ oa ni̧bämȩdida’ quëna̧ jo̧rȩta madiro̧jo̧ȩ. Ado pio ju̧i̧iä ja̧di ta̧rëri̧ dëbë yo̧rea̧mi̧dëde" yo̧a̧dirȩ jibëa̧ dëbëti̧ra̧ chia. 7Ado ja̧dëa̧ ji̧ tjamo̧ yo̧ji̧ri̧ pio judiro̧ ja̧di ta̧rëri̧ yo̧ji̧ri̧rȩ yo̧a̧diro̧jo̧ȩ Jechu ju̧i̧:

—Cjäri̧ marea̧rȩ, 'pio ju̧i̧ ja̧ ma̧ȩrä go̧ȩ cjaeä chudarëremȩdida' quëna̧ dabadërea̧rȩ —yo̧a̧diro̧jo̧ȩ.

8Ado pio ju̧i̧ ta̧rëa̧ oaiä Jechu judi dëbë yo̧a̧dejȩrȩ:

—Mȩnȩro̧ pio coa chjadëri̧ dëbë yo̧dë tara, jabechji̧ pio cüdëborë chjadëri̧ dëbë yo̧dëparequededibe. "Aja̧, pio ju̧i̧ ja̧ ma̧ȩrä japarequede" yo̧tärea̧ ji̧, jabechji̧ yo̧dëparequededibe —yo̧a̧dejȩrȩ.

Na̧rȩrea̧ ma̧ȩmi̧ dara̧ ni̧bä chjaorëremȩdejȩrȩ tjado oa jidaji̧ri̧ chjadëdë pio ji̧ri̧ chjiari

Mateo 21:33-44; Marco 12:1-12

9Jabo Jechu judi cjiadiädëmȩrȩ pio yoa na̧rȩrea̧ ma̧ȩmi̧ dara̧ a̧de ni̧bä chjaorëremȩdejȩrȩ judio tjamo̧ yo̧ji̧ri̧ ütëti̧ pio ji̧ri̧iäpȩmo̧:

—Danȩrȩ, cjo̧ro̧rëremȩde pumȩ judi, jibëa̧ chiri oa goamȩrȩ. Ado jiro pumȩ judi, ‘jabechji̧ uva tjado oa japatäquëda’ quëna̧ jo̧rȩtamȩrȩ ja̧beparëremȩde. Ado tjado oa chjadëri̧ japa ëte, uva to oa chjadëri̧ gua ëte, jabechji̧ jibëa̧ tjado oa jida tänȩrëremȩdejȩrȩ ja̧bepatämi̧ cjiaji̧ri̧ pio ji̧ri̧, jibëa̧ mu̧i̧tjoi̧ pio ji̧ri̧. Jabechji̧ pio judiro̧ chëre boapea̧ oa, uva pio oaiä chëre boapea̧ oa, ado pio jȩaiäpȩmo̧bo uva oa yürüpea̧ oa, jida tänȩrëremȩdejȩrȩ. Ado ja̧di dari̧ japa ëte tjado ana̧mȩ pio judi baärëremȩde jachi tjamo̧ oa, ado cja̧rȩmo̧ chiriräpȩ cjo̧ro̧pea̧ oa, ui ji̧ra̧ri̧ cjo̧ro̧pea̧ oa.

10Jabo ja̧dëa ji̧ japamitë chjätä ëte uva oa täarea̧ japamitë üdë ma̧na̧na̧ra̧rä, jabechji̧ tjado ana̧mȩ pio judi jachiri pio judiri chjadürëremȩdejȩ jibëa̧ mu̧i̧tjoi̧ cja̧rȩmȩ oa. Jabechji̧ jibëa̧ tjadoräpȩ jäpea̧ oa, jibëa̧ uva pio ju̧i̧ mitëpea̧ oa, pio jȩaiäpȩmo̧ goa ma̧ne yürüpea̧ oa, chjadürëremȩdejȩ. Jabo cjäri̧ madiro̧jo̧ȩ, judi chjadüa̧ mu̧i̧tjoi̧ pio judi tjadoräpȩ go̧düdäräa̧rä, uva tjado oa jidaji̧ri̧ pio judiro̧ chjadëri̧ jeatärea̧ ji̧, chjuari̧ mitërëreji̧ri̧diro̧jo̧ȩ. Ado ma̧i̧ dari̧ bide cjaeäa̧diro̧jo̧ȩ ji̧dëri̧. Ado ja̧di dari̧ japa ëte, baä tänȩa̧diro̧jo̧ȩ eami̧ oa yürüdëji̧ri̧rȩ. Tjado ana̧mȩ pio ju̧i̧ ja̧ ba oa chjadëri̧ yürütärea̧ ji̧, mö̧na̧mȩrȩ baärëremȩde mu̧i̧tjoi̧ üdë. 11Jabo tjado ana̧mȩ pio judi cjiadiädëmȩrȩ ado cja̧rȩmo̧ mu̧i̧tjoi̧ oa chjadürëremȩdejȩ. Jabo peaja̧di ma̧i̧ dari̧ japea̧diro̧jo̧ȩ. Jabechji̧ pio ju̧i̧ goae tarari̧ bide cjaeä ëte, idëri̧ cjia tjamo̧parȩ ëte, peaja̧di baä tänȩa̧diro̧jo̧ȩ mö̧na̧mȩ oa. 12Jabo tjado ana̧mȩ pio judi cjiadiädëmȩrȩ ado chjadürëremȩdejȩ ado cja̧rȩmo̧ mu̧i̧tjoi̧ oa. Jabo cjäri̧ madiro̧jo̧ȩ, goe chiari̧ conȩda̧diro̧jo̧ȩ. Ado ja̧dëa ji̧ tjado dairäpȩmo̧ idë cürë ëte, baä tänȩa̧diro̧jo̧ȩ mö̧na̧mȩ oa.

13Ado ja̧dëa ji̧ tjado ana̧mȩ pio judi ana̧ri̧ jo̧rȩtamȩpea̧de. 'Cjäri̧ maquëda, ¿tjana̧ oa japatäremȩquëda, ca̧ mu̧i̧tjoi̧ maea oa chjadürërea̧ ji̧, ¿tjana̧ oa ano̧ mire japatäremȩquëda, chja jabechji̧ ca̧ ja pio ju̧i̧ ano̧ mire chjadütäremȩquëda, cüdë tjamo̧ri̧ ea̧ pio ju̧i̧ ano̧ mire chjadütäremȩcuni̧da, pio ju̧i̧ tjamo̧ri̧ ba chia dapa jirodiro̧ju̧i̧da' quëna̧ jo̧rȩtamȩpea̧de. 14Jabo cjäri̧ madiro̧jo̧ȩ, tjado jidaji̧ri̧ pio judiro̧ pio ju̧i̧ daea̧rä, järi tjamo̧pea̧dirȩ pio ju̧i̧ ja̧bo tänȩpea̧ ji̧. ‘Jabechji̧ joja pio judidida, tjado ana̧mȩ pio judipadida, ado pio ju̧i̧ ja̧bo tänȩrä judi, jibëa̧remȩ tjado pio ju̧i̧ mitëpai̧ daa̧ro̧da, chja jabechji̧ ja̧bo tänȩtäreji̧ri̧a̧ro̧ju̧i̧da’ quëna̧ jo̧rȩtaji̧ri̧rȩ ja̧di ta̧rëri̧ yo̧rëreji̧ri̧dirȩ jibëa̧ dëbëti̧ra̧: "Jaeibe, ja̧bo tänȩtäro̧jo̧ȩ pio a̧ro̧rȩ tjado oa ano̧ mire mitëpea̧ oa" yo̧ji̧ri̧rȩ mitëa̧diro̧jo̧ȩ. 15Ado joja pio ju̧i̧ chjuari̧ mitë ëte, tjado dairäpȩ ëba jäa̧diro̧jo̧ȩ. Ado ju̧ri̧pȩ chjaodëri̧ ja̧bo tänȩa̧diro̧jo̧ȩ —yo̧mȩrȩ ni̧bä chjaorëremȩdejȩrȩ Jechu judi na̧rȩrea̧ ma̧ȩmi̧ dara̧.

—Ado yaba̧ iëno̧ë ta̧rërequededibe —yo̧a̧dejȩrȩ Jechu judi—. Danȩrȩ, tjado ana̧mȩ pio judi jibëa̧ tjadoräpȩ baädärärä, ado pio jiro pumȩ chjadëdë pio ji̧ri̧ dadärärä, ¿tjana̧ japatäremȩdejȩrȩ jidaji̧ri̧ pio ji̧ri̧? 16Tjana̧ japadë, jabechji̧ pio jiro pumȩ pio ji̧ri̧ chjaodëri̧ ja̧bo tänȩtäremȩdejȩrȩ. Ado ja̧dëa ji̧ ado cja̧rȩmo̧ oa ano̧ mire mitëtäremȩdejȩrȩ chjadëri̧ ano̧ mire ja̧bepapaji̧ri̧ pio ji̧ri̧, chjadëri̧ ano̧ mire jidapaji̧ri̧ pio ji̧ri̧.

Ado judio tjamo̧ yo̧ji̧ri̧ ütëti̧ pio judiro̧ pio jiro ma̧ȩ oa ta̧rëa̧ oaiä, yo̧a̧dirȩ:

—Jabo cjäri̧ madirȩ, a̧dë chjäte chjai̧dëri̧ japea̧dirȩ. Jabo a̧ro̧rȩ, cjäri̧ marea̧rȩ, pio judiro̧ japami̧ dari̧ japadë matäreji̧ri̧rea̧rȩ —yo̧a̧dirȩ.

17Jabo Jechu judi pio ji̧ri̧iäpȩmo̧ dëbë damȩrȩ iëno̧ë ta̧rëa̧dejȩrȩ:

—¿Jabo tjana̧ yo̧rea̧de Ütë tjamo̧ ja̧ ma̧ȩ üdë, no̧mȩ tjamo̧ri ja̧ go̧ȩparërea̧ ma̧ȩ üdë? —iëno̧ë ta̧rëa̧dejȩrȩ—. Danȩrȩ, ta̧rëchji̧vä:

"Ta̧dë oa jiadarëreji̧ri̧diro̧jo̧ȩ jo̧ oa cji̧däji̧ri̧ pio judiro̧. Jabo judiro̧ jiadarërea̧ ta̧dë pio judi ba chia tjamo̧de. Jabechji̧ Ano̧mȩ pio judi tänȩa̧ oaiä, a̧dë chjäte ba chia tjamo̧pea̧de. Jabechji̧ tjamo̧ goë chamȩ ta̧dëpea̧de. Ado pio jiro ta̧dë pio ju̧i̧iämo̧i̧ chjua tjamo̧ri̧ cjiade bë üdë."

18Aja̧ ca̧ pumȩ, ja̧di ta̧rëri̧ go̧ȩpea̧ oa cjiarëremȩde Ütë tjamo̧ ja̧ ma̧ȩ üdë pumȩ judiro̧ Chjätä Tänȩmȩ pio ju̧i̧ jiadapea̧ pio ju̧i̧ chjiari. Jabo jiadaji̧ri̧ pio judiro̧, cjäri̧ madiro̧jo̧ȩ, uapai̧ da tjamo̧ri̧ jiadadiro̧jo̧ȩ —yo̧a̧dejȩrȩ Jechu judi—. Jabechji̧ eami̧ pumȩ judi pio jiro ta̧dë oa badëri̧ darä judi, pio jiro ta̧dërä gatëgua china̧därämi̧ dari̧ cjatärä judi, jabechji̧ ju yarëa̧ oa cjiami̧ dari̧ cjiapade. Ado pio jiro ta̧dë üdë eami̧ pumȩ pio ju̧i̧iäpȩmo̧ acji cjatämi̧ dari̧ japarä judi, jabechji̧ pjatë ma cjiadiämi̧ dari̧ cjiadiäpade, pjo̧no̧ mape bagari̧ —yo̧mȩrȩ ni̧bä chjaorëremȩdejȩrȩ Jechu judi pio jȩa chjiari, uapai̧ da tjamo̧ri̧ cjiapai̧ damȩ pio ju̧i̧ chjiari. Jabechji̧ pio judi ta̧dëmi̧ da tara, jabechji̧ ja̧di ta̧rëri̧ ni̧bä chjaorëremȩdejȩrȩ pio jȩa chjiari.

19Jabo cjäri̧ madiro̧jo̧ȩ, tjamo̧ goë tuti ja̧bepaji̧ri̧ pio judiro̧ pio jiro na̧rȩrea̧ ma̧ȩmi̧ da oa ta̧rëa̧ oaiä, pjaricheo judiro̧ pio jiro ma̧ȩ oa ta̧rëa̧ oaiä, 'jabechji̧ pio ibë chjiari ni̧bä jirodiibëda, tjado oa jidaji̧ri̧ chjadëdëdiro̧da quëna̧ jirodiibëda' quëna̧ jo̧rȩtaji̧ri̧pea̧dirȩ. Ado pio ju̧i̧iä järiji̧ri̧ tjamo̧pea̧dirȩ Jechu pio ju̧i̧ mitëpea̧ oa, pio ju̧i̧ chaäpea̧ oa. Jabo cjäri̧ madiro̧jo̧ȩ, judiro̧ ja̧di dari̧ japatärea̧ ji̧, chjaodëri̧ uapa tjamo̧ji̧ri̧pea̧dirȩ pumȩ buba oaiä.

Pjaricheo pio judiro̧ Jechu judi puërä choë cjätämi̧ dari̧ cjiapea̧ oa iëno̧ë ta̧rërëreji̧ri̧diro̧jo̧ȩ chirirä cjo̧ro̧a̧ ba oa ba ano̧pea̧ pio ju̧i̧ chjiari

Mateo 22:15-22; Marco 12:13-17

20Ado pjaricheo pio judiro̧ ji̧dë ma järirëreji̧ri̧dirȩ Jechu pio ju̧i̧ ütarë dae chjaopea̧ oa, pio ju̧i̧iäpȩmo̧ aechide yo̧pea̧ oa. Ado pio ju̧i̧iä chjadürëreji̧ri̧diro̧jȩrȩ jibëa̧ mu̧i̧tjoi̧ pio ji̧ri̧ Jechu pio ju̧i̧ ji̧dë ma ütarë ta̧rëpea̧ oa. Aja̧, pio jiro mu̧i̧tjoi̧ pio judiro̧ Jechu pio ju̧i̧iä tjamo̧ri̧ dabapatämi̧ cjiaji̧ri̧mi̧ dari̧ japapea̧ oa chjadüa̧diro̧jȩrȩ, judi ni̧bäa̧ pio ju̧i̧ ütarë ta̧rë chjaopea̧ oa. 'Aja, oëra̧ dëbë yo̧pai̧ da jirodida, ta anȩno̧ tänȩmi̧ dari̧ japarea̧ daeji̧ri̧a̧ro̧ju̧i̧da' quëna̧ ütarë dae chjaopea̧ oa chjadüa̧diro̧jȩrȩ. Jabechji̧ Jechu pio ju̧i̧iäpȩmo̧ aechide ni̧bärea̧ dapea̧ oa, ado pio ju̧i̧ daea̧ oaiä domano̧ ja̧ ütë pio ju̧i̧iäpȩmo̧ ma̧ȩ yürüpea̧ oa, pio jënȩ Jechu ju̧i̧ mitë ëte chaäpea̧ oa, ütarë dae chjaopea̧ oa chjadürëreji̧ri̧diro̧jȩrȩ jibëa̧ mu̧i̧tjoi̧ pio ji̧ri̧. 21Ado pio jiro mu̧i̧tjoi̧ judiro̧ Jechu ju̧i̧ u̧i̧pë iëno̧ë ta̧rërëreji̧ri̧diro̧jo̧ȩ, ja̧di ta̧rëri̧ yo̧ji̧ri̧rȩ:

—Danȩ a̧ra̧ano̧mȩ, pio mȩa chjiari dabarea̧ro̧mȩ —yo̧a̧diro̧jo̧ȩ—. ‘Aja̧, judi a̧ra̧ano̧a̧ üdë, tjamo̧i̧ cjiari̧ cjiadida, Ütë tjamo̧ pio judi ütarë jo̧rȩta̧ pio ju̧i̧ chjiari coëma cjiari̧ a̧ra̧ano̧dida, ado pumȩ ütëbodärä oa cja̧rȩmȩ ba chia maeara̧ damȩrȩ a̧ra̧ano̧mȩdida, Ütë tjamo̧ pio ju̧i̧iäpȩmo̧ baämȩ no̧mi̧da pio ju̧i̧ chjiari tjamo̧i̧ cjiari̧ a̧ra̧ano̧dida’ quëna̧ dabarea̧ro̧mȩ pio mȩa chjiari —yo̧a̧diro̧jo̧ȩ—. 22Ado pio ju̧i̧iä iëno̧ë ta̧rëtämi̧ cjiarea̧ro̧mȩ chirirä cjo̧ro̧a̧ ba oa ba ano̧pea̧ pio ju̧i̧ chjiari —yo̧a̧diro̧jo̧ȩ—. ¿Yö̧ta jo̧rȩtarenȩ mȩnȩ? ¿Jabo jabechji̧de domano ja̧ ütë pio ju̧i̧iäpȩmo̧ ba ano̧pea̧ üdë jabo jabechji̧dëde? ¿Jabo Checha pio ju̧i̧iäpȩmo̧ ba ano̧pea̧de, jabo ba ano̧dëpea̧de? ¿Yö̧ta japapea̧de? —yo̧ji̧ri̧rȩ iëno̧ë ta̧rëa̧diro̧jo̧ȩ Jechu ju̧i̧, judi oëra̧ ni̧bämȩmi̧ dari̧ dëbë yo̧pea̧ oa.

23Jabo Jechu judi pio ji̧ri̧ ja̧ chji̧ oa cjacjarë damȩrȩ, pio jȩaiäpȩmo̧ chjai̧dëri̧ japatämi̧ cjiaji̧ri̧ pio ji̧ri̧ chjiari dabamȩrȩ chjaodëri̧ dëbë yo̧a̧dejȩrȩ:

24—Jabo goë na̧rȩno̧chji̧coe chëre pio ju̧i̧, pio yoa chirirä cjo̧ro̧a̧ ba oa ba ano̧pea̧ chëre oa —yo̧a̧dejȩrȩ.

Ado Jechu judi chëre oa cjo̧dëa̧ oaiä, yürüa̧diro̧jo̧ȩ. Ado Jechu judi yo̧a̧dejȩrȩ:

—Danȩrȩ, chjadëri̧ yo̧chji̧coe. ¿Chjia ja̧ dacho chiade chëre üdë? Ado ¿chjia ja̧ quȩ chiade —iëno̧ë ta̧rëa̧dejȩrȩ.

Ado pio ju̧i̧ ta̧rë oaiä dëbë yo̧a̧diro̧jo̧ȩ:

—Chjia ja̧ dacho chiadë, jabechji̧ Domano ja̧ ütë pio ju̧i̧ ja̧ dacho chiade, Checha quȩmȩ pio ju̧i̧ ja̧ dacho chiade —dëbë yo̧a̧diro̧jo̧ȩ.

25Ja̧dëa ji̧ Jechu judi dëbë yo̧a̧dejȩrȩ:

—Jabechji̧ Checha pio ju̧i̧ ja̧ oa pio ju̧i̧iäpȩmo̧ yürüpea̧de. Ado Ütë tjamo̧ pio ja̧ oa Ütë tjamo̧ pio ju̧i̧iäpȩmo̧ yürüpea̧de —yo̧mȩrȩ dëbë yo̧rëremȩdejȩrȩ.

26Ado Jechu judi yo̧a̧ oa ta̧rëa̧ oaiä, dacho bëremi̧ cjiami̧ dari̧ jo̧rȩtaji̧ri̧pea̧dirȩ ana̧ri̧ jo̧rȩtaji̧ri̧rȩ. ‘Chia chia, Jechu judi dabamȩ tjamo̧dida’ quëna̧ jo̧rȩtaji̧ri̧pea̧dirȩ. Jabechji̧ puërä cjatä tänȩmi̧ dari̧ japatärea̧ ji̧, pumȩ ja̧ dachoro ta anȩno̧ tänȩmi̧ dari̧ japatärea̧ ji̧, cjäri̧ madiro̧jo̧ȩ, eami̧ oa japarea̧ dadëa̧dirȩ. Ado pio ju̧i̧iä cjapiri̧ cjiadiäji̧ri̧pea̧dirȩ.

Ja̧boa̧ duri oa bëdüpea̧ pio ju̧i̧ chjiari iëno̧ë ta̧rërëreji̧ri̧diro̧jo̧ȩ Jechu ju̧i̧

Mateo 22:23-33; Marco 12:18-27

27Ji̧dë duri oa pio jiro doro, judio ja̧ tjamo̧ yo̧ji̧ri̧ judiro̧ orë, Chaducheo#20:27 Ado chaducheo judiro̧, ¿chjiadirȩ? Chjiadëdirȩ, jabechji̧ judio maearë cjiarëreji̧ri̧dirȩ. Ado pjaricheo pio judiro̧mi̧ dari̧ cjo̧ro̧rëreji̧ri̧dirȩ. Jabechji̧ Moicherë go̧ȩparërea̧ ma̧ȩrä cjo̧ro̧pea̧ ji̧ järi tjamo̧rëreji̧ri̧dirȩ. Jabo pjaricheo judiro̧ judio ütëti̧rea̧rȩ a̧de yo̧a̧ ma̧ȩrä cjo̧ro̧rërea̧mi̧ cjo̧ro̧dërëreji̧ri̧dirȩ jabo Moicherë go̧ȩparërea̧ duri maea oa jo̧rȩtariä cjo̧ro̧rëreji̧ri̧dirȩ. Jabo pumȩ judiro̧ ja̧boa̧ duri oa bëdüpea̧ pio ju̧i̧ chjiari quëna̧dëa̧dirȩ. 'Jabechji̧ pumȩ judiro̧ ja̧boa̧rä, ja̧boa̧mi̧ ja̧bodiro̧da, ado chjereno̧ bëdüpea̧ oa ja̧bodëdiro̧da, jabechji̧ bëdürea̧ decjiadida, bucho ana̧ cjo̧ro̧rea̧ decjiadida' quëna̧ jo̧rȩtaji̧ri̧rȩ cjo̧ro̧rëreji̧ri̧dirȩ. Ado peaja̧di quëna̧dërëreji̧ri̧dirȩ Ichiae pio ju̧i̧ chjiari, yaröca pio ji̧ri̧ chjiari. 'Jabechji̧ yaröca decjiadiro̧da, Ichiae decjiadida, jabechji̧ jiro decjiadiro̧da' quëna̧ jo̧rȩtaji̧ri̧rȩ cjo̧ro̧rëreji̧ri̧dirȩ. pio judiro̧ go̧düdärärëreji̧ri̧dirȩ Jechu pio ju̧i̧ iëno̧ë ta̧rëpea̧ oa. Ado Chaducheo judiro̧, ¿chjiadirȩ? Chjiadëdirȩ, jabechji̧ judio pio judiro̧dirȩ. Jabo danȩrȩ, ado cja̧rȩmo̧ jo̧rȩtarea̧ chiadirȩ. Jabechji̧ ja̧boa̧ji̧ri̧ pio judiro̧, ‘aja̧, ado chjereno̧ bëdürea̧ dadëpadiro̧da, jabechji̧ bucho ana̧ ja̧boa̧mi̧ ja̧boa̧ maeadiro̧da, jabechji̧ bëdürea̧ decjiadida’ quëna̧ jo̧rȩtaji̧ri̧rȩ a̧ra̧ano̧rëreji̧ri̧ pio judiro̧dirȩ. Ado pio jiro oari judiro̧ goëdepea̧diro̧jo̧ȩ Jechu pio ju̧i̧. 28Ado ja̧di ta̧rëri̧ yo̧ji̧ri̧rȩ iëno̧ë ta̧rërëreji̧ri̧diro̧jo̧ȩ:

—A̧ra̧ano̧mȩ, Moicherea̧ pio judi no̧mȩ tjamo̧ri ja̧ go̧ȩparëremȩde ibëa̧ pio ju̧i̧ —yo̧a̧diro̧jo̧ȩ—. Aja̧, ja̧di ta̧rëri̧ go̧ȩparëremȩde: “Eami̧ pumȩ üi̧ pio judi jibëa̧ iei̧ pio ji̧ a̧dë ja̧borä judi, jabo jibëa̧ bori̧ pio ji̧ri̧ nö̧ridë ëte a̧dë ja̧boa̧rä judi, jabechji̧ pio ju̧i̧rea̧ ja̧ jadü pio judi ano̧ mire ëbatäremȩdejȩ iei̧ pio ji̧. Ado ja̧boa̧mȩ pio judi jibëa̧ u̧ri̧ pio ji̧ri̧ ëbarea̧ dadëa̧räbo, jabechji̧ ja̧ omȩ pio ju̧i̧iä ëbamȩmi̧ dari̧ cjiadiäpade.” Aja̧, ja̧di ta̧rëri̧ go̧ȩparëremȩde Moicherea̧ pio judi. 29Ado yaba̧ a̧ra̧ano̧mȩ, jabechji̧ ëbapea̧ pio ju̧i̧ chjiari iëno̧ë ta̧rëtämi̧ cjiarea̧ro̧mȩ, a̧dëräpȩ bëdüa̧ pio ju̧i̧ chjiaribo —yo̧a̧diro̧jo̧ȩ—. Danȩ, no̧mȩ judi cjo̧ro̧rëreji̧ri̧dirȩ 7 oari judiro̧, oti̧ maearë, cja̧rȩmȩ chuchurämo̧ jaraji̧ri̧rȩ. Ado yabomȩ pio judi, jabechji̧ ëbarëremȩdejȩ jibëa̧ iei̧ ji̧. Jabo cjäri̧ made, judi cja̧rȩmȩ oa nö̧ritärea̧ ji̧, bori̧ ji̧ri̧ nö̧ridë ëte a̧dë ja̧boa̧dejȩ. Ado pio ju̧i̧iä jabechji̧, pio ju̧i̧rea̧ ja̧ durimȩ pio judi ano̧ mire ëbarëremȩdejȩ iei̧ ji̧. 30Aja̧, jibëa̧ omȩrea̧ judi a̧dë ja̧boa̧ pio ju̧i̧iä, jabechji̧ pio judi ano̧ mire ëba̧dejȩ iei̧ ji̧. Jabo cjäri̧ made, pio judiborë a̧dë ja̧boa̧dejȩ iei̧ ji̧. Bori̧ ji̧ri̧ nö̧ritärea̧ ji̧, nö̧ridë ëte a̧dë ja̧boa̧dejȩ. 31Ado ja̧dëa ji̧ ado cja̧rȩmo̧rȩ, pio ju̧i̧rea̧ ja̧ durimȩ pio judi ano̧ mire ëba̧rä, peaja̧di chjaodëri̧ a̧dë ja̧boa̧dejȩ iei̧ pio ji̧, jibëa̧ bori̧ ji̧ri̧ nö̧ridëmȩrȩ. Ja̧di ma, ja̧di ma ano̧ mire ëbarëreji̧ri̧dirȩ pio jiro oari judiro̧, 7rë. Ado judiro̧ cja̧rȩmȩrȩ jibëa̧ u̧ri̧ pio ji̧ri̧ nö̧ritärea̧ ji̧, jabechji̧ nö̧rirea̧ dadë maearë ja̧bo ga̧re baärëreji̧ri̧dirȩ. 32Ado judiro̧ ütëborë ja̧boa̧ duri oa, iei̧ jini̧, ano̧ mire ëbarëreyi̧ pio jini̧borë ja̧boa̧nȩ. 33Ado yaba̧ chjadëri̧ yo̧ibe a̧ra̧ano̧mȩ —yo̧a̧diro̧jo̧ȩ Jechu ju̧i̧—. Bëdürea̧ dobearä, ja̧boa̧ji̧ri̧ pio judiro̧ ütëborë bëdürea̧ dabearä, ¿chjia ja̧ iei̧ tjamo̧panȩ pio jiro iei̧ jini̧, 7 oari pio ji̧ri̧ ëbarëreyi̧ iei̧ jini̧? ¿Chjia ja̧ iei̧täreyi̧nȩ bëdürea̧ dobearä? ¿Chjia tjamo̧de iei̧ ano̧mȩ tjamo̧ judi? —yo̧ji̧ri̧rȩ u̧i̧pe iëno̧ë ta̧rëtarëreji̧ri̧diro̧jo̧ȩ Jechu ju̧i̧, judi puëräpȩ choë cjatämi̧ dari̧ cjiapea̧ oa.

34Jabo Jechu judi dëbë yo̧rëremȩdejȩrȩ:

—Danȩrȩ, ëbarea̧ üdë dai chirirä ja̧ji̧ri̧ pio ji̧ri̧ ja̧ maeade —yo̧a̧dejȩrȩ—. Pio yoa dabu oa cjaeäji̧ri̧ pio ji̧ri̧ ja̧ maeade. 35Jabechji̧ ma̧na̧pamȩ japamitërä a̧dëräpȩ cjo̧ro̧paji̧ri̧ pio judiro̧, cjäri̧ madirȩ, ëbarea̧ dadëpadirȩ. Jabechji̧ ja̧borëreji̧ri̧ pio judiro̧ bëdüa̧rä, a̧dëräpȩ cjo̧ro̧pea̧ ji̧ nö̧taji̧ri̧ pio judiro̧ bëdüa̧rä, jabechji̧ ado judiri ëbadë mapadirȩ. 36Ado judiri ja̧bodëpadirȩ peaja̧di. Tjamo̧ davä. Ja̧bodëpadirȩ jabo a̧dëräpȩ cjiaji̧ri̧ mu̧i̧tjoi̧ pio judiro̧mi̧ dari̧ cjiapadirȩ, jibëa̧ jadü oa ëbadëji̧ri̧rȩ. Ado pio ju̧i̧iä jabechji̧ bucho ana̧ cjo̧ro̧padirȩ ja̧borea̧ decjiari̧. Jabechji̧ Ütë tjamo̧ ja̧ u̧ri̧pea̧ tara, judiro̧ bëdüa̧ u̧ri̧ mapea̧ tara, jabechji̧ bucho ana̧ cjo̧ro̧padirȩ —yo̧mȩrȩ dëbë yo̧rëremȩdejȩrȩ.

37Ado mȩnȩro̧ quëna̧dëräbo, 'Aja̧, pumȩ judiro̧ ja̧boa̧ duri oa ado chjereno̧ bëdürea̧ dapadiro̧da' quëna̧dëräbo, jabechji̧ Moicherea̧ pio judi chjadëri̧ na̧rȩmi̧ dari̧ go̧ȩparëremȩde pio ju̧i̧ chjiari. Danȩrȩ, ja̧borëreji̧ri̧ pumȩ pio judiro̧ ado chjereno̧ bëdüpea̧ pio ju̧i̧ chjiari go̧ȩparëremȩde. ¿Naparä go̧ȩparëremȩde? Naparädë, jabechji̧ Ütë tjamo̧ judi Moiche pio ju̧i̧iäpȩmo̧ ma̧ȩ yürürërea̧ ji̧, tjaepadëmȩ tori pio judiri ma̧ȩ yürürërea̧ ji̧, go̧ȩparëremȩde. Aja̧, ja̧di ta̧rëri̧ go̧ȩparëremȩde Ano̧mȩ pio ju̧i̧ chjiari: "Danȩrȩ, Ütë tjamo̧ judi Abaraa̧ pio ju̧i̧ ja̧ Ütëde. Tjamo̧ davä. Pio ju̧i̧ ja̧ Ütëde, ado Icha pio ju̧i̧ ja̧ Ütëde peaja̧di. Ado Jacobo ja̧ Ütëde peaja̧di" go̧ȩparëremȩde. Jabechji̧ judiro̧ no̧mȩ tjamo̧ri ja̧ ja̧boa̧räbo, Ano̧mȩ judi pio ji̧ri̧ ja̧ Ütëmȩrȩ cjiade. 38Ado Moiche üdë go̧ȩparërea̧ ma̧ȩ üdë, ¿tjana̧ oa daba tänȩdiibe? ¿Tjana̧ oa daba tänȩdë, jabechji̧ judiro̧ no̧mȩ tjamo̧ri ja̧ ja̧borërea̧räbo, pio ji̧ri̧rea̧ ja̧ icjararemȩ üdë no̧mȩ tjamo̧ri ja̧ ja̧boa̧räbo, jabechji̧ cjo̧ro̧rea̧ chiaji̧ri̧rȩ cjo̧ro̧ maeadirȩ Ütë tjamo̧ pio ju̧i̧ nö̧ta. Jabechji̧ Ütë tjamo̧ judi cjo̧ro̧rea̧ chiaji̧ri̧ pio ji̧ri̧ ja̧ Ütëde. Cjo̧ro̧rea̧ chiadëji̧ri̧ pio ji̧ri̧ ja̧ Ütëdëde. Tjamo̧ davä. Cjo̧ro̧rea̧ chiadëji̧ri̧ pio ji̧ri̧ ja̧ Ütëdëde pio jiro pumȩ judiro̧, ütëborë pio ju̧i̧iä cjo̧ro̧rea̧ chia maea tara. Ado pio ju̧i̧iä Moiche judi pio ji̧ri̧ chjiari ni̧bärërea̧ ji̧, jabechji̧ "Ütë tjamo̧ judi pio ji̧ri̧ ja̧ Ütëde" yo̧mȩrȩ yo̧rëremȩde —yo̧mȩrȩ ni̧bä chjaorëremȩdejȩrȩ Jechu judi.

39-40Ado Jechu judi ja̧di ta̧rëri̧ dëbë yo̧a̧ oaiä, jabechji̧ uapaji̧ri̧pea̧dirȩ ado chjereno̧ iëno̧ë ta̧rëpea̧ ji̧. Jabechji̧ ado chjereno̧ puëräpȩ choë cjatämi̧ dari̧ cjiapea̧ oa iëno̧ë ta̧rëtärea̧ ji̧, cjäri̧ madirȩ, iëno̧ë ta̧rëdëri̧ cjiaji̧ri̧pea̧diro̧jo̧ȩ, jabo cjapi̧ maeari̧ cjiadiärëreji̧ri̧dirȩ. Jabo Moicherë go̧ȩparërea̧ ma̧ȩ oa a̧ra̧ano̧ji̧ri̧ judiro̧ orë Jechu ja̧ ma̧ȩ oa ta̧rëa̧ oaiä, jabechji̧ ja̧di ta̧rëri̧ dëbë yo̧a̧diro̧jo̧ȩ:

—Aja̧, chjadëri̧ dëbë yo̧a̧renȩ —yo̧a̧diro̧jo̧ȩ.

Jechu judi iëno̧ë ta̧rërëremȩdejȩrȩ pumȩ ji̧ri̧ Chjätä Tänȩmȩ pio ju̧i̧ chjiari, Davirea̧ pio judiri ja̧mȩ pio ju̧i̧ chjiari

Mateo 22:41-46; Marco 12:35-37

41Jabo Jechu judi cjiadiädëmȩrȩ ado iëno̧ë ta̧rërëremȩdejȩrȩ chaducheo pio ji̧ri̧. Jabechji̧ Chjätä Tänȩmȩborë iëno̧ë ta̧rëa̧dejȩrȩ pio jȩa chjiari, ja̧di ta̧rëri̧ yo̧mȩrȩ:

—Danȩrȩ, "Chjätä Tänȩmȩ pio judi Davirea̧ pio judiri ja̧mȩde" yo̧dirȩ pumȩ judiro̧. Jabo chjadëri̧ yo̧chji̧coe —yo̧a̧dejȩrȩ—. ¿Tjana̧ ju̧i̧iä ja̧di ta̧rëri̧ yo̧rea̧ dadirȩ judiro̧? 42Jabechji̧ Tjo tjamo̧ pio judi jabërä ma̧ȩ yürürërea̧ oaiä, ja̧di ta̧rëri̧ go̧ȩparëremȩde Davirea̧ pio judi. Tärëchji̧vä:

“Aja̧, Ütë tjamo̧ judi yo̧rëremȩdejȩ ca̧ Ano̧mȩ ju̧i̧. Pio yi chavä, ca̧ mu̧i̧ chjua cotoro, a̧dë chjäte ba chiaräpȩ ju̧ri̧. Jabechji̧ pio yi chatä earequedemȩ 43cüdë mȩa eadëji̧ri̧ pio ji̧ri̧ ütëbodärä oa boadäräa̧rä yuro.”

Aja̧, ja̧di ta̧rëri̧ go̧ȩparëremȩde Davirea̧ judi Chjätä Tänȩmȩ pio ju̧i̧ chjiari jabërä. 44Jabo yo̧chji̧coe —yo̧a̧dejȩrȩ—. Ütërë mitëa̧ Chjätä Tänȩmȩ pio judi Davirea̧ pio judiri ja̧mȩrä judi, ¿tjana̧ ju̧i̧iä ‘ca̧ Ano̧mȩdida’ quëna̧ jo̧rȩtarëremȩde Davirea̧ judi jibëa̧ri ja̧mȩ pio ju̧i̧ chjiari? ¿Tjana̧ ju̧i̧iä jabërä ja̧di ta̧rëri̧ go̧ȩparëremȩde pio jibëa̧ri ja̧mȩ pio ju̧i̧ chjiari? ¿Tjana̧ ju̧i̧iä 'ca̧ Ano̧mȩdida' quëna̧ jo̧rȩtarëremȩdejȩ? Chjadëri̧ yo̧chji̧coe —yo̧mȩrȩ iëno̧ë ta̧rëa̧dejȩrȩ Jechu judi.

45Ado ja̧dëa ji̧ Chaducheo pio ji̧ri̧iäpȩmo̧ ni̧bäa̧ duri oa, jibëa̧ jadü pio ji̧ri̧iäpȩmo̧ ano̧ mire ni̧bärëremȩdejȩrȩ, pumȩ bubarë ta̧rë cjia̧ nö̧ta:

46—Danȩrȩ —yo̧a̧dejȩrȩ—. Na̧e chia tjamo̧chji̧vä Moicherë go̧ȩparërea̧ ma̧ȩ oa a̧ra̧ano̧ji̧ri̧ pio ji̧ri̧ chjiari, mȩnȩro̧ pio ji̧ri̧iä u̧i̧pea̧ oa cjiachea oa. Jabechji̧ jibëa̧ chjibo chjacjiamȩra̧, go̧a̧ti̧ra̧ oëra̧ti̧ oa tai̧pea̧ üdë, pumȩ ja̧ dachoro tai̧pea̧ üdë goae tjamo̧dejȩrȩ. Ado pumȩ judiro̧ pio jȩaiäpȩmo̧ ba chia daji̧ri̧rȩ chjadëri̧ jeapea̧ üdë peaja̧di goae tjamo̧dejȩrȩ. Ado judiro̧ gatë tänȩrea̧ bëräpȩ järä, jabechji̧ pio jibëiäpȩmo̧ ba chia daji̧ri̧rȩ jeatä ea tjamo̧diro̧jȩrȩ pumȩ ji̧ri̧ —yo̧a̧dejȩrȩ—. Ado danȩrȩ, pio jiro tjamo̧ a̧ra̧ano̧ji̧ri̧ pio judiro̧ jurapea̧ oa a̧doparä, pumȩ no̧i̧dërë jurapea̧ oa a̧doparä, jabechji̧ judiro̧ eami̧ charea̧räpȩ chjadëri̧ chatärea̧ ji̧, cjäri̧ madirȩ, ba chia tjamo̧räpȩ chapea̧ ji̧ järi tjamo̧dirȩ. Jabechji̧ tjamo̧ cjo̧ro̧ji̧ri̧ pumȩ pio ji̧ri̧ nö̧ta tjamo̧ri̧ chatämi̧ cjiadirȩ. Ado judiro̧ judiorë a̧doparea̧ bëräpȩ a̧doparä, peaja̧di ba chiaräpȩ ju̧ri̧ chapea̧ ji̧ järi tjamo̧dirȩ. Jabechji̧ jibëa̧ maea oa jo̧rȩtadirȩ —yo̧a̧dejȩrȩ—. 47Ado danȩrȩ, idëri̧ cjiarea̧ taradëji̧ri̧rȩ garü chjaodiro̧jȩrȩ oari chiarëreji̧ri̧ ivi pio ji̧ri̧iä. Aja̧, jibëa̧ bëremȩ oa, jibëa̧ chiriremȩ oa baë mitëdiro̧jo̧ȩ, pio ji̧ri̧ u̧i̧pe ni̧bäji̧ri̧rȩ. Jabo ja̧di dari̧ japaji̧ri̧borë ma̧ȩ go̧a̧ti̧ oa ni̧bäji̧ri̧rȩ ni̧bämi̧ dari̧ japadiro̧jo̧ȩ Ütë tjamo̧ ju̧i̧iä, pumȩ chjadëcji̧ quëna̧ japaji̧ri̧rȩ. Jabo cjäri̧ madejȩrȩ, a̧dë chjäte uapai̧ dara̧ pio ju̧ri̧ra̧ bape chjaopadejȩrȩ Ütë tjamo̧ judi —yo̧mȩrȩ ni̧bä chjaorëremȩdejȩrȩ Jechu judi jibëa̧ jadü pio ji̧ri̧iäpȩmo̧ Moicherë go̧ȩparërea̧ ma̧ȩ oa a̧ra̧ano̧ji̧ri̧ pio ji̧ri̧ chjiari.

Currently Selected:

Lucas 20: Pume

Highlight

Copy