Lucas 21

Üi̧ chiarëreyi̧ iei̧ pio jini̧ o ji̧ri̧ u̧i̧ yürümi̧ dari̧ yürürëreyi̧nȩ, jabëtari̧mi̧ maea oa yürüa̧yi̧borë

Marco 12:41-44

1Ado Jechu judi Ütë tjamo̧ pio ju̧i̧ ja̧ bëräpȩ charëremȩde tjamo̧ chëre yürürea̧ joë dëbëräpȩ ju̧ri̧, Ütë tjamo̧ ja̧ oa yürürea̧ joë dëbëräpȩ ju̧ri̧. Jabechji̧ yürüji̧ri̧ oa dae charëremȩdejȩrȩ chëre ji̧ra̧ri̧ goaji̧ri̧ pio ji̧ri̧, jibëa̧ chëre oa joërä gatëchäji̧ri̧ oa. 2Ado üi̧ chiarëreyi̧ iei̧ ji̧, chjö̧na̧i̧ti̧ oa cjäri̧ ja̧boyi̧ iei̧ pio ji̧ peaja̧di daea̧dejȩ. Aja̧, chëre ji̧ra̧dë oa yürüyi̧ oa, yo̧a̧ri̧ chërei̧ maea oa yürüyi̧ oa daea̧dejȩ, ba chia tjamo̧dë oa yürüyi̧ oa. 3Ado pio ji̧ daea̧ oaiä, ja̧di ta̧rëri̧ yo̧rëremȩdejȩrȩ jibëa̧ jadü ji̧ri̧ Jechu judi:

—Tjamo̧ri̧ yo̧requededibe —yo̧a̧dejȩrȩ—. Pio jiro iei̧ pio jini̧ o ji̧ri̧ u̧i̧ yürümi̧ dari̧ yürüa̧nȩ —yo̧a̧dejȩrȩ—. Tjamo̧ davä. O judiro̧ ütëborë yürüa̧ pio ju̧i̧ u̧i̧ yürümi̧ dari̧ yürüa̧nȩ. 4Jabechji̧ o judiro̧ chëre ji̧ra̧ tjamo̧ oa goaji̧ri̧rȩ yürüa̧dirȩ jabëtari̧mi̧mi̧ da oa, jabë ji̧ra̧ri̧ goaji̧ri̧rȩ. Jabechji̧ yuropadäräri̧ yürüdëa̧dirȩ, jabo ji̧ra̧ tjamo̧ri̧ cjiadiäri̧ yürüa̧dirȩ, jabë pjärämȩ cjiadiäri̧. Jabo pio jiro iei̧ pio jini̧ ja̧di dari̧ yürüdëa̧nȩ. Jabechji̧ chjö̧na̧i̧ti̧ oa cjäri̧ ja̧boyi̧borë cjiadiädëri̧ yürüa̧nȩ jibëa̧ chëre chjö̧na̧i̧ oa. Jënȩ jurarea̧ oa gatëpea̧ chëre chjö̧na̧i̧ oa, jënȩ china̧chjari̧ tutia̧ chëre chjö̧na̧i̧ oa yürüa̧nȩ cjiadiädëri̧. Ado o judiro̧, cjäri̧ madirȩ, ja̧di dari̧ yürüdëa̧dirȩ. Ado pio ju̧i̧iä yo̧requededibe. O ji̧ri̧ u̧i̧ ji̧ra̧ri̧ yürüa̧mi̧ dari̧ yürüa̧nȩ pio jiro iei̧ pio jini̧ —yo̧mȩrȩ ni̧bä chjaoa̧dejȩrȩ jibëa̧ jadü ji̧ri̧ Jechu judi.

Jechu judi ni̧bärëremȩde cjiadiäa̧ japamitë pio ju̧i̧ chjiari

Mateo 24:1-2; Marco 13:1-13

5Ado Jechu ja̧ jadü judiro̧ orë ni̧bä chjaorëreji̧ri̧dirȩ Ütë tjamo̧ ja̧ bë pio ju̧i̧ chjiari. Aja̧, ta̧dë chjacjiamȩ tjamo̧ra̧ cji̧däa̧ oa cjia̧ pio ju̧i̧ chjiari, icharaita ja̧ra̧ chjacjiamȩri̧ cji̧däa̧ pio ju̧i̧ chjiari, judiro̧ no̧mȩ tjamo̧ri ja̧ yürürërea̧ra̧ pio ju̧ri̧ra̧ chjacjiamȩri̧ cji̧däa̧ pio ju̧i̧ chjiari ni̧bä chjaorëreji̧ri̧dirȩ. Jabo Jechu judi ja̧di ta̧rëri̧ ni̧bäji̧ri̧ oa ta̧rëa̧ oaiä, ja̧di ta̧rëri̧ yo̧rëremȩdejȩrȩ pio jiro bë pio ju̧i̧ chjiari:

6—Danȩrȩ, dae cjiarenȩro̧jo̧ȩ pio jiro bë ana̧ tjamo̧ oa, jabo cjäri̧ made, cjiadiädëri̧ iëchäa̧ oa cjia mapade chjö̧na̧i̧därärë ma̧na̧pamȩ japamitërä. Tjamo̧ davä. Cja̧rȩmȩ ta̧dë üdë jibëa̧ jadüremȩrä charea̧mi̧dëri̧ cjia mapade. Jabechji̧ daburäpȩmo̧ aeno̧ oa cjia mapade —yo̧a̧dejȩrȩ.

7Ado Jechu judi ja̧di ta̧rëri̧ yo̧a̧ oaiä, iëno̧ë ta̧rëa̧diro̧jo̧ȩ:

—Jabo danȩ a̧ra̧ano̧mȩ, chjadëri̧ ni̧bä chjaoibe Ütë tjamo̧ ja̧ bë pio ju̧i̧ chjiari, mȩnȩ pea̧ yo̧a̧ pio ju̧i̧ chjiari —yo̧a̧diro̧jo̧ȩ—. ¿Naparä iëchäa̧ oa cjiapade? Ado bë üdë iëchäpea̧ ji̧ querediä tjamo̧ro, ¿tjana̧ na̧rȩrea̧ oa daparea̧rȩ? ¿Tjana̧rȩ na̧rȩpadiibe bë üdë iëchäpea̧ pio ju̧i̧ chjiari? Chjadëri̧ yo̧ibe —yo̧a̧diro̧jo̧ȩ.

8Ado Jechu judi dëbë yo̧a̧dejȩrȩ:

—Danȩrȩ, na̧e chia tjamo̧chji̧vä eami̧ pumȩ üdë pio dibë u̧i̧pachea oa —yo̧a̧dejȩrȩ—. Jabechji̧ ji̧dë duri oa no̧i̧dë tjamo̧rȩ go̧düdäräpadirȩ pio cüdëcji̧ quëna̧ japaji̧ri̧rȩ, pio coa daede japaji̧ri̧rȩ. "Aja̧, Ütërë mitëa̧ Chjätä Tänȩmȩ pio judirequede" yo̧padiro̧dibe. "Aja̧, Ütërë yo̧a̧ chja̧oerä cjo̧ro̧pea̧ japamitë üdë ma̧na̧diibe yaba̧" yo̧padirȩ. Jabo cjäri̧ ma, na̧e chiachji̧vä ca̧ jadü. ‘Pio judi tjamo̧dida’ quëna̧ dadëchji̧jȩrȩ. Jabechji̧ ‘pio judi tjamo̧dida’ quëna̧rea̧mi̧dë madirȩ. Jabechji̧ cho̧rë jädë machji̧jȩrȩ —yo̧a̧dejȩrȩ—. 9Ado danȩrȩ, pio judirä japamitë chjätä ëte, peaja̧di ta̧rëpanȩrȩ. Tjamo̧ davä. Babui̧ra̧ goë goë ta̧rë chjaopanȩrȩ acji go̧düdäräji̧ri̧ pio ji̧ri̧ chjiari, dibëa̧ chiri queri̧räpȩ acji go̧düdäräji̧ri̧ pio ji̧ri̧ chjiari. Ado jachi tjamo̧ a̧rȩmȩ chiriräpȩ ju̧ri̧ acji go̧düdäräji̧ri̧ pio ji̧ri̧ chjiaribo ji̧dë ma goë goë ta̧rë chjaopanȩrȩ. Jibëa̧ dëbëti̧ra̧ chia acji tai̧ chjaoji̧ri̧ pio ji̧ri̧ chjiari babui̧ra̧ goë goë ta̧rëpanȩrȩ. Jabo danȩrȩ ca̧ jadü, ja̧di ta̧rëri̧ goë ta̧rëa̧räbo, ana̧ri̧ jo̧rȩtadëchji̧vä. Jabechji̧ uaparea̧ üdë boadärächedidibe dibëa̧ chji̧ oa. Jabechji̧ ja̧di dari̧ japapadirȩ. Jabo judiro̧ ja̧di dari̧ acji tai̧ chjaoräbo, jabë pjärämȩde cjiadiäa̧ japamitë üdë. Jabë ma̧na̧na̧ra̧dëa̧de. Jabë tarupadëa̧de —yo̧a̧dejȩrȩ.

10Ado Jechu judi ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ:

—Jabechji̧ cja̧rȩmȩ chiriräpȩ cjo̧ro̧ji̧ri̧ pio judiro̧ acji jäpadiro̧jȩrȩ ado cja̧rȩmo̧ chiriräpȩ cjo̧ro̧ji̧ri̧ pio ji̧ri̧iäpȩmo̧ —yo̧a̧dejȩrȩ—. Ado chiri ütë ja̧ chja̧oeräpȩ cjo̧ro̧ji̧ri̧ pio judiro̧, jabechji̧ acji jä chjaopadiro̧jȩrȩ ado cja̧rȩmo̧ chiri ütë ja̧ chja̧oerä cjo̧ro̧ji̧ri̧ pio ji̧ri̧iäpȩmo̧. Ja̧di ma ja̧di ma jape chjaopadirȩ. 11Ado judirä, ma̧i̧ dari̧ jö̧nö̧jö̧no̧a maeari̧ cjiapade chiri üdë. Tjamo̧ davä. Oëra̧ti̧ oa a̧rȩmȩ chiri üdë, jabechji̧ a̧dë chjäte ma̧i̧ dari̧ jö̧nö̧jö̧no̧a mari̧ cjiapade ja̧di dari̧ cjiadërea̧ ji̧. Ado peaja̧di chiri üdë jurarea̧ oa chjadëri̧ yürürërea̧ ji̧, jurarea̧ yürüdëpe bagapade. Jabechji̧ ta̧mȩcho̧ ja̧bo tjamo̧ji̧ri̧rȩ cjo̧ro̧padirȩ pumȩ judiro̧. Ado pio ju̧i̧ uëri ma̧i̧ da gito üdë oëra̧ti̧ oa cjitëpade ji̧dëri̧, pumȩ judiro̧ a̧dë chjäte gitori̧ tararea̧mi̧ dari̧. Ado a̧dëri pio judiri uapai̧ da tjamo̧ri̧ na̧rȩa̧ oa cjiapade. Tjamo̧ davä. A̧dëri pio judiri ma̧i̧ da na̧rȩrea̧ oa dapadiro̧jo̧ȩ pumȩ judiro̧ pio jibë uapa tjamo̧ tänȩmȩ na̧rȩrea̧ oa.

12Jabo danȩrȩ, pio jiro chjö̧na̧i̧rȩ ma̧na̧bea yaboi̧, cüdë dibë pea yo̧a̧ pio judi ma̧na̧bea yaboi̧, jabechji̧ ma̧i̧ dari̧ conȩdapadiro̧dibe. Tjamo̧ davä. Mai̧ dari̧ japapadiro̧dibe. Ado ja̧dëa ji̧ dibë chjuari̧ mitë ëte, jabechji̧ ëba jäpadiro̧dibe judiorë a̧doparea̧ bëräpȩ, pio dibë iëno̧ iëno̧ ta̧rëpea̧ oa, pio dibë chaärea̧ bërä ju̧ri̧ tutipea̧ oa. Jabechji̧ mȩnȩro̧ ca̧ mu̧i̧tjoi̧ tara, pio coa quëna̧ji̧ri̧pea̧ tara, jabechji̧ chiri ütë cjo̧ro̧ji̧ri̧ pio ji̧ri̧ ja̧ dëbëräpȩ cjiadiä tänȩpadiro̧dibe peaja̧di, chiri tjamo̧ cjo̧ro̧ji̧ri̧ pio ji̧ri̧ ja̧ dëbëräpȩbo. 13Ado danȩrȩ, mȩnȩro̧ pio ji̧ri̧ ja̧ dëbëräpȩ cjiarä, jabechji̧ pio coa chjiari ni̧bärea̧ dapanȩrȩ. Ni̧bärea̧ dadërërea̧ ji̧, jabechji̧ pio coa chjiari ni̧bärea̧ dapanȩrȩ —yo̧a̧dejȩrȩ—. 14Ado danȩrȩ, jabërä bücjüri̧ cjiadëchji̧vä mȩnȩro̧ pio ji̧ri̧iäpȩmo̧ ni̧bä chjaopea̧ pio ju̧i̧ chjiari. Judiro̧ dibë aechide yo̧ro, pio dibë iëno̧ iëno̧ cjia ta̧rërä, jabechji̧ ana̧ri̧ jo̧rȩtadëchji̧vä. '¿Yö̧ta dari̧ dëbë ni̧bäpacjivaquiji̧ri̧?' quëna̧ jo̧rȩtadëchji̧vä. 15Jabechji̧ mȩnȩro̧ ji̧ri̧ ja̧ dëbëräpȩ cjiarä, judiro̧ dibë iëno̧ë ta̧rërä, jabechji̧ ni̧bä chjaorea̧ yürüparequededibe. Tjamo̧ davä. Urëdi tjamo̧ oa jo̧rȩtarea̧ duri maea oa ni̧bä chjaorea̧ yürüparequededibe, judiro̧ pio dibëiäpȩmo̧ dëbë yo̧rea̧mi̧dëri̧.

16Jabo danȩrȩ ca̧ jadü, mȩnȩro̧ dabadëchea oa yo̧requededibe —yo̧a̧dejȩrȩ—. Danȩrȩ, na̧ pumȩ pio judiro̧borë chjai̧dëri̧ japapadiro̧dibe. Jabechji̧ dibë chjadëri̧ a̧dotärea̧ ji̧, pio dibë cjäri̧ri̧ cjia datärea̧ ji̧, cjäri̧ madiro̧dibe, yürüpadiro̧dibe pio dibë eadëji̧ri̧ pio ji̧ri̧iäpȩmo̧, pio dibë ja̧bo tänȩtämi̧ cjiaji̧ri̧ pio ji̧ri̧iäpȩmo̧. Tjamo̧ davä. Pio dibë nö̧riji̧ri̧ pio judiro̧, ado pio dibëdi ja̧ji̧ri̧ pio judiro̧, ado dibëa̧ quërama̧i̧ pio judiro̧borë ja̧di dari̧ japapadiro̧dibe, dibëa̧ pumȩ noi̧dërë. Pio judiro̧ orë dibë yürüa̧ oaiä, pio dibë ja̧bo tänȩtämi̧ cjiaji̧ri̧ pio ji̧ri̧iäpȩmo̧ yürüa̧ oaiä, jabechji̧ ja̧bo tänȩpadiro̧dibe o oa. 17Pumȩ no̧i̧dë tjamo̧rȩ ea tjamo̧dëji̧ri̧rȩ goëdëri̧ cjia dapadiro̧dibe mȩnȩro̧ pio coaiäpȩmo̧ quëna̧ji̧ri̧pea̧ tara, mȩnȩro̧ pio coa cho̧rë ma̧na̧mi̧ dari̧ quëna̧ji̧ri̧pea̧ tara. 18Jabo danȩrȩ, dibëa̧ tjo üdë chjadëri̧ jida̧ oa cjiapade. 19Ado mȩnȩro̧ pio coaiäpȩmo̧ ji̧dë ma chjuari̧ quëna̧ji̧ri̧rȩ cjo̧ro̧a̧ oaiä, o judiro̧ dibë ma̧i̧ dari̧ japea̧räbo ji̧dë ma chjuari̧ quëna̧ji̧ri̧rȩ cjo̧ro̧a̧ oaiä, jabechji̧ yuroparea̧ decjiari̧ cjo̧ro̧rea̧ dapanȩrȩ —yo̧mȩrȩ ni̧bä chjaorëremȩdejȩrȩ Jechu judi jibëa̧ jadü pio ji̧ri̧iäpȩmo̧.

Jechu judi ni̧bärëremȩdejȩrȩ acji jana̧paji̧ri̧ pio ji̧ri̧ chjiari, judiro̧ Jerucharȩ quȩmȩ bë ma̧ri̧ oa iëchäpea̧ pio ju̧i̧ chjiari

Mateo 24:15-28; Marco 13:14-23

20Ado Jechu judi cjiadiäa̧ japamitë üdë ma̧na̧na̧ra̧pea̧ pio ju̧i̧ chjiari ji̧dë u̧i̧ ni̧bämȩrȩ ja̧di ta̧rëri̧ a̧de ni̧bä chjaorëremȩdejȩrȩ jibëa̧ jadü pio ji̧ri̧iäpȩmo̧:

—Danȩrȩ ca̧ jadü, pio jiro japamitërä Jerucharȩ bë ma̧ri̧ yuroti̧ oa a̧dopea̧ oa cjiarä, dibë eadëji̧ri̧ pio ji̧ri̧ ja̧ guadia üdë bubarë bë ma̧ri̧ yuroti̧ oa a̧dopea̧ oa cjiarä, 'jabechji̧ Jerucharȩ bë ma̧ri̧ pio judi iëchäa̧ oa cjiapadida yaba̧' quëna̧ dabarea̧ dapanȩrȩ —yo̧a̧dejȩrȩ—. Tjamo̧ davä. Mȩnȩro̧ darä, pio dibë eadëji̧ri̧ pio ji̧ri̧ ja̧ guadia buba oa darä, Jerucharȩ bë ma̧ri̧ yuroti̧ oa a̧dopë cjiaji̧ri̧ pio ji̧ri̧ darä, 'jabechji̧ Jerucharȩ bë ma̧ri̧ oa iëchäpadiro̧ju̧i̧da, cjiadiärea̧mi̧dëri̧ yuropapadiro̧ju̧i̧da' quëna̧ jo̧rȩtaji̧ri̧rȩ daparenȩro̧jȩrȩ. 21Ado pio judirä Judea quȩmȩ chiriräpȩji̧ri̧ pio judiro̧ goae tarari̧ bagureno̧täreji̧ri̧dirȩ ya̧mi̧räpȩmo̧. Ado Jerucharȩ bë ma̧ri̧räpȩji̧ri̧ pio judiro̧borë ja̧dira̧ goae tarari̧ bagureno̧täreji̧ri̧dirȩ. Ado Danȩrȩ, chiriräpȩ tai̧ji̧ri̧ pio judiro̧ jibëa̧ goë oa mitëpea̧ oa ado chjereno̧ yu̧a̧dëtäreji̧ri̧dirȩ bë ma̧ri̧ oa, jabo peaja̧di goae tarari̧ bagureno̧täreji̧ri̧dirȩ jachipadäräeno̧rea̧mi̧ dari̧. 22Jabechji̧ ma̧na̧pamȩ japamitë oaiä, ana̧ri̧ na̧rȩa̧ oa cjiapade davä Ütë tjamo̧ ja̧ bape chjaorea̧ üdë. Jabechji̧ pio jiro japamitërä tjamo̧i̧ cjiari̧ cjiadiäpade davä Ütërë ea jana̧ chjadüa̧ oa ni̧bäji̧ri̧ pio judiro̧ jabërä ni̧bärërea̧ pio judi —yo̧a̧dejȩrȩ—. Tjamo̧ davä. Tjamo̧i̧padäräa̧ oa cjiapade. 23Ado danȩrȩ, pio judirä goae tjamo̧dëpadejȩrȩ davä bo maiji̧ri̧ pio ji̧ri̧iä. Ado bori̧ ji̧ri̧ chuchu yürüji̧ri̧ pio ji̧ri̧iäbo goae tjamo̧dëpadejȩrȩ. Jabechji̧ a̧dë chjäte chjai̧dë oa chjätäpadirȩ pio yoa chirirä cjo̧ro̧ji̧ri̧ pio judiro̧, a̧dë chjäte gitoi̧ dari̧ —yo̧a̧dejȩrȩ—. Tjamo̧ davä. Ütë tjamo̧ judi pio yoa chirirä cjo̧ro̧ji̧ri̧ pio ji̧ri̧ ana̧ri̧ bape chjaorä, jabechji̧ pumȩ judiro̧ ma̧i̧ da chjai̧dë pio ju̧i̧ chjätäpadirȩ, a̧dë chjäte ma̧i̧ da gito oa taraji̧ri̧rȩ. 24Jabechji̧ dëbëribo jo̧dë chiamȩ tjapënȩ jujuai̧ra̧ pio ju̧ri̧ra̧ guë ja̧bo tänȩa̧ oa cjiadiäpadirȩ noi̧dërë. Ado ja̧bo tänȩa̧ oa cjiadëji̧ri̧ pumȩ pio ji̧ri̧, jabechji̧ mitë ëte yura̧ oa cjiaji̧ri̧ oa ëba baäpadiro̧jȩrȩ chiriräpȩti̧ oa jachi tjamo̧räpȩ. Ado Jerucharȩ bë ma̧ri̧remȩ pio judi boadäräa̧ oa cjiapade judiodë pio ji̧ri̧iä. Jabechji̧ boë cjaeä chjätämi̧ dari̧ conȩdapadiro̧jo̧ȩ. Ado boadäräji̧ri̧ pio judiro̧ tjamo̧ yo̧ji̧ri̧rȩ ano̧ mire cjo̧ro̧padirȩ judiorë cjo̧ro̧rërea̧ bë ma̧ri̧räpȩ ju̧ri̧ Ütë tjamo̧ pio judi ütara̧ japamitërä yuro. Tjamo̧ davä. Ütë tjamo̧ judi judiodë pio ji̧ri̧ tjamo̧ yo̧ji̧ri̧rȩ cjo̧ro̧rea̧ japamitë üdë goarijäa̧rä yuro tjamo̧ cjo̧ro̧rea̧ yürüpadejȩrȩ, Ütë tjamo̧ judi pio jiro japamitë oa goarijä tänȩa̧rä yuro —yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi cjiadiäa̧ japamitë pio ju̧i̧ chjiari.

Jechu judi ni̧bärëremȩdejȩrȩ jënȩ ado chjereno̧ ma̧na̧pea̧ pio ju̧i̧ chjiari

Mateo 24:29-35, 42-44; Marco 13:24-27

25Ado Jechu judi cjiadiädëmȩrȩ ji̧dë u̧i̧ ni̧bä chjaorëremȩdejȩrȩ jibëa̧ jadü pio ji̧ri̧, jënȩ ado chjereno̧ ma̧na̧pea̧ pio ju̧i̧ chjiari.

—Ado pio jiro japamitërä ma̧i̧ da na̧rȩrea̧ oa dapadiro̧jo̧ȩ pumȩ judiro̧, jënȩro̧ cja̧rȩmȩ co dadërërea̧ pio ju̧i̧ —yo̧a̧dejȩrȩ—. Jabechji̧ do pio ju̧i̧iä ma̧i̧ da na̧rȩrea̧ oa dapadiro̧jo̧ȩ, gupënȩ pio ju̧i̧iäbo. Ado büë pio ju̧i̧iäbo ma̧i̧ da na̧rȩrea̧ oa dapadirȩ, jënȩro̧ cja̧rȩmȩ co dadërërea̧ pio ju̧i̧. Ado oëra̧ti̧ oa a̧rȩmȩ chirirä cjo̧ro̧ji̧ri̧ pumȩ pio judiro̧ ütëborë, cjäri̧ madirȩ, a̧dë chjäte bücjüri̧ cjia tjamo̧ji̧ri̧rȩ cjo̧ro̧padirȩ, chji̧ goaera̧ jo̧rȩtarea̧mi̧dëri̧. Jabechji̧ judiro̧ dami̧ti̧ oa dae chjaoa̧ oaiä, uapa tjamo̧ji̧ri̧rȩ jo̧rȩtapadirȩ, bücjüri̧ cjia tjamo̧ji̧ri̧rȩ —yo̧a̧dejȩrȩ—. Tjamo̧ davä. Judiro̧ daea̧ oaiä, ui ana̧ üdë ma̧i̧ dari̧ japamȩ pio ju̧i̧ daea̧ oaiä, jënȩro̧ cja̧rȩmȩ co ja̧di da oa japamȩ pio ju̧i̧ daea̧ oaiä, ado ma̧i̧ da ui go̧ma̧ üdë a̧dë chjäte ana̧ri̧ acji ma̧na̧mȩ pio ju̧i̧ daea̧ oaiä, cjäri̧ madirȩ, 'tjana̧ japapacji̧vaa̧ro̧, japarea̧ decjiaa̧ro̧da, a̧ro̧rȩ tjamo̧ri̧ dabarea̧mi̧dë oa chjätäpaa̧ro̧da' quëna̧ jo̧rȩtaji̧ri̧rȩ cjo̧ro̧padirȩ, a̧dë chjäte bücjüri̧ cjia tjamo̧ri̧ jo̧rȩtaji̧ri̧rȩ. 26Jabechji̧ pumȩ judiro̧ dami̧ti̧ oa dae chjaoa̧ oaiä, jënȩro̧ cja̧rȩmȩ co dadërërea̧ pio ju̧i̧ daea̧ oaiä, jabechji̧ uapea̧ üdë boadäräpadejȩrȩ davä jibëa̧ chji̧ oa. Jabechji̧ a̧dë chjö̧na̧i̧ oa jö̧nö̧jö̧nö̧a ma cjiari̧ cjiamȩpea̧mȩ oa daea̧ pio ju̧i̧iä uapa tjamo̧ji̧ri̧rȩ cjo̧ro̧padirȩ. 27Ado ja̧dëa ji̧ dapadiro̧coe Pumȩrȩ Ara̧ Tjamo̧ pio ju̧i̧ —yo̧a̧dejȩrȩ—. Tjamo̧ davä. Ma̧i̧ da tatari̧ cjiamȩ oa, go̧a̧ra̧ ërä birë ma̧na̧mȩ oa dapadiro̧coe a̧dë chjäte jauëchjamȩ oa. 28Ado pio ju̧i̧iä yo̧requededibe ca̧ jadü —yo̧a̧dejȩrȩ—. Danȩrȩ, chjö̧na̧i̧rȩ na̧rȩa̧ oa cjiarä, cüdë yo̧a̧ pio judi ma̧na̧pamȩ japamitërä chjö̧na̧i̧rȩ na̧rȩa̧ oa cjiarä, mȩnȩro̧ dami̧ti̧ uapai̧ da tjamo̧ pio ju̧i̧ daea̧rä, o judiro̧ uapea̧ pio ju̧i̧iä boadäräa̧ oa cjiarä, jabechji̧ uapadëchji̧vä, jabo ma̧ chiadëri̧ cjiaji̧ri̧rȩ gatë dachji̧vä uëräpȩmo̧. Jabechji̧ mȩnȩro̧ chjätäpea̧ üdë queri̧ na̧ra̧didibe —yo̧mȩrȩ ni̧bä chjaorëremȩdejȩrȩ.

Igera to pio ju̧i̧iä chjadëri̧ dabapapea̧de yo̧dejȩrȩ Jechu judi

Mateo 24:32-35; Marco 13:28-31

29Ja̧dëa ji̧ Jechu judi ji̧dë u̧i̧ ni̧bämȩrȩ ja̧di ta̧rëri̧ a̧de ni̧bä chjaorëremȩdejȩrȩ jibëa̧ jadü ji̧ri̧ na̧rȩrea̧ ma̧ȩmi̧ dara̧ igera to pio ju̧i̧ chjiari:

—Danȩrȩ ca̧ jadü, ütarë dachji̧vä igera to pio ju̧i̧, jabo eami̧ to chjö̧na̧i̧ oa —yo̧a̧dejȩrȩ—. 30Jabechji̧ tjo go̧düa̧rä, to pjö̧da chiapea̧rä, jabechji̧ jo̧no̧pea̧ ji̧ querediä tjamo̧diibëda’ quëna̧ ütarë darenȩro̧jo̧ȩ.#21:30 Danȩrȩ, Icharaitarë cjo̧ro̧mȩ chiriräpȩ üdë ado cja̧rȩmo̧ chiride. Jachi tjamo̧ a̧rȩde. Ado pio ju̧i̧iä pio ju̧ri̧pȩ cjo̧ro̧mȩ to üdë tjaoëpai̧ dari̧ japamȩde. Pio yoa chirirä cjo̧ro̧mȩ to üdë japami̧ dari̧ japadëmȩde. Ado pio ju̧i̧iä uipea̧rä, pio ju̧ri̧pȩ chjöchjapea̧rä, jabechji̧ gu̧ro maeade pjö̧da üdë. Jabo ja̧dëa ji̧ jono̧pea̧ ji̧ querediäa̧rä, chiri üdë chjöchjaremȩrȩ cjüëtüpea̧rä, jabechji̧ tjo go̧düde. To pjö̧da chiape jäde. "Ado pio ju̧i̧iä jabechji̧ tjo go̧düa̧rä, to pjö̧da chiapea̧rä, 'jabechji̧ jo̧no̧pea̧ ji̧ querediä tjamo̧diibëda’ quëna̧ ütarë darenȩro̧jo̧ȩ" yo̧de ma̧ȩ üdë. 31Ado peaja̧dimi̧ dari̧ ütarë datäreji̧ri̧nȩrȩ cüdë dibë yo̧a̧ pio ju̧i̧ chjiari. Tjamo̧ davä. Ütërë yo̧a̧ chja̧oerä cjo̧ro̧pea̧ pio ju̧i̧ chjiari, pio jiro japamitë üdë ma̧na̧pea̧ pio ju̧i̧ chjiari peaja̧dimi̧ dari̧ ütarë datäreji̧ri̧nȩrȩ —yo̧a̧dejȩrȩ—. Danȩrȩ, cüdë dibë ni̧bä chjaoa̧ pio ju̧i̧ da̧rä, cüdë dibë ni̧bä chjaoa̧ üdë ma̧na̧rä, jabechji̧ ütarë dapanȩrȩ. ‘Aja̧, Ütërë yo̧a̧ chja̧oerä cjo̧ro̧pea̧ japamitë üdë ma̧na̧na̧ra̧pea̧ ji̧ querediä tjamo̧dida yaba̧’ quëna̧ ütarë daba dapanȩrȩ. 32Ado pio ju̧i̧iä tjamo̧i̧ cjiari̧ yo̧requededibe —yo̧a̧dejȩrȩ—. Danȩrȩ, cüdë dibë pea̧ ni̧bä chjaoa̧ pio judi chjö̧na̧i̧rȩ tjamo̧i̧padäräa̧ oa cjiapade. Tjamo̧ davä. Tjamo̧i̧ cjiari̧ cjiadiäa̧ oa cjiapade. Ado cjiadiäa̧ japamitërä irä dapaji̧ri̧ pio judiro̧ orë, cüdë yo̧a̧ na̧rȩrea̧ pio ju̧i̧ irä dapaji̧ri̧ pio judiro̧ orë, cüdë yo̧a̧ chjö̧na̧i̧rȩ tjamo̧i̧padäräa̧ oa cjiapade pio judiro̧ ja̧bobea yaboi̧. Tjamo̧ davä. Cüdë yo̧a̧ chjö̧na̧i̧ oa irä dapaji̧ri̧ pio judiro̧ orë jabë ja̧bodëa̧rä tjamo̧i̧padäräa̧ oa cjiapade. 33Jabechji̧ teracabari̧ ni̧bädërequededibe —yo̧a̧dejȩrȩ—. Danȩrȩ, a̧dë üdë goarijäpade. Ado dabu üdë peaja̧di yuropapade. Bucho ana̧dëmȩde. Jabo cüdë dibë ni̧bä chjaoa̧ ma̧ȩ pio judi, cjäri̧ made, goarijädëpade jabo tjamo̧i̧padäräa̧ oa cjiapade. Jabechji̧ yuropadëpade jabo bucho ana̧mȩde ca̧ ma̧ȩ üdë —yo̧mȩrȩ ni̧bä chjaorëremȩdejȩrȩ Jechu judi.

Na̧e chia tjamo̧ji̧ri̧rȩ cjo̧ro̧pea̧de

34Ado Jechu judi ji̧dë u̧i̧ ni̧bä chjaomȩrȩ ja̧di ta̧rëri̧ a̧de ni̧bä chjaorëremȩdejȩrȩ:

—Jabo Ano̧mȩ judi ma̧na̧pea̧ do üdë ma̧na̧pea̧ queri̧na̧ra̧ tara, jabechji̧ ji̧dë ma na̧e chiachji̧vä mȩnȩro̧ dadiädëji̧ri̧mi̧ dari̧ cjo̧ro̧chea oa, mo̧a̧ji̧ri̧mi̧ dari̧ cjo̧ro̧chea oa —yo̧a̧dejȩrȩ—. Ado pio ju̧i̧iä teracabara̧ pio ju̧ri̧ra̧ boadäräa̧ oa cjiadë matäreji̧ri̧nȩrȩ. Jabechji̧ ërü oaiä, airi̧ cjia airi̧ cjia a̧dope chjaoa̧ pio oaiä, ado pio yoa chirirä cjo̧ro̧pea̧ pio ju̧i̧ chjiari ji̧dë ma bücjüri̧ cjia̧ pio oaiä boadäräa̧ oa cjiadë matäreji̧ri̧nȩrȩ jabo ji̧dë ma dadiäji̧ri̧mi̧ dari̧ na̧e chia tjamo̧täreji̧ri̧nȩrȩ pio jiro do üdë pio dibëiäpȩmo̧ acji ma̧na̧mi̧ dari̧ ma̧na̧chea oa, 35mȩnȩro̧ puëräpȩ choë cjatämi̧ dari̧ cjiachea oa. Jabechji̧ pio jiro do üdë chiriräpȩti̧ oa cjo̧ro̧ji̧ri̧ pio ji̧ri̧ chjaodëri̧ acji ma̧na̧mi̧ dari̧ ma̧na̧padejȩrȩ, jënȩro̧ daba quëna̧dërä. 36Ado pio ju̧i̧iä jabechji̧, ji̧dë ma dadiäji̧ri̧mi̧ dari̧ na̧e chiaji̧ri̧rȩ cjo̧ro̧chji̧vä tjaoërämo̧dë. Ado ji̧dë ma goë cjo̧dëriä cjo̧ro̧chji̧vä Ütë tjamo̧ pio ju̧i̧iä, judi dibë ju chiarea̧ yürütä, mȩnȩro̧ chjai̧dë oa chjätäa̧ oaiä oëra̧diädëtä. Tjamo̧ davä, mȩnȩro̧ dami̧ti̧ uapai̧ da oa chjadëri̧ chjätärea̧ datä, mȩnȩro̧ Pumȩrȩ Ara̧ Tjamo̧ pio ju̧i̧ ja̧ dëbëräpȩ idëri̧ cjiadëji̧ri̧rȩ cjiatä, jabechji̧ goë cjo̧dëchji̧jo̧ȩ pio ju̧i̧iä, ji̧dë ma goë cjo̧dëji̧ri̧rȩ —ni̧bä chjaomȩrȩ cjiadiärëremȩde Jechu judi, jibëa̧ jadü pio ji̧ri̧iäpȩmo̧ ana̧ri̧ ni̧bä chjaorërea̧ ji̧, ji̧dë duri oa ma̧na̧pamȩ pio ju̧i̧ chjiari ni̧bä chjaorërea̧ ji̧.

37Ado Jechu judi, jabechji̧ doti̧mi̧ jädiärëremȩde Ütë tjamo̧ ja̧ bëräpȩ pumȩ ji̧ri̧ a̧ra̧ano̧pea̧ oa. Jabo ja̧dëa ji̧ gȩnȩpea̧mi̧ nö̧ta, bë ma̧ri̧ri pio judiri jädiärëremȩde jibëa̧ jadü pio ji̧ri̧ nö̧ta Orivo quȩmȩ ya̧mi̧räpȩ cjiapea̧ oa, pio ju̧ri̧pȩ mo̧a̧pea̧ oa. 38Ja̧di ma jadi ma japarëremȩde doti̧mi̧ japamȩrȩ. Ado pumȩ judiro̧ noi̧dërë doti̧mi̧ a̧dope chjaorëreji̧ri̧dirȩ Ütë tjamo̧ ja̧ bëräpȩ peadai̧rä Jechu pio ju̧i̧ ta̧rëpea̧ oa.

Currently Selected:

Lucas 21: Pume

Highlight

Copy