Lucas 22

Juda Iscariote judi järimȩpea̧de Jechu pio ju̧i̧ yürüpea̧ oa ja̧bo tänȩtämi̧ cjiaji̧ri̧ pio ji̧ri̧iäpȩmo̧

Mateo 26:1-5; Marco 14:1-2; Juan 11:45-53

1Ado pjuru chiadëmȩ chja̧pe maea oa jurarea̧ do chjätäpea̧ do üdë ma̧na̧pea̧ ji̧ querediä tjamo̧rëremȩde. Ado pio jiro japamitë üdë peaja̧di uëmo̧ a̧dë chjätärea̧ do chjätäpea̧ do quȩmȩde. Aja̧, queri̧na̧ra̧rëremȩde. 2Ado pio jiro japamitërä o ji̧ri̧ chjiari tjamo̧ goë tuti ja̧bepaji̧ri̧ pio judiro̧ a̧dopea̧ oa cjiarëreji̧ri̧dirȩ Moicherë go̧ȩparërea̧ ma̧ȩ oa a̧ra̧ano̧ji̧ri̧ pio ji̧ri̧ nö̧ta. Jabechji̧ Jechu pio ju̧i̧ ja̧bo tänȩpea̧ ji̧ järi tjamo̧ji̧ri̧rȩ ni̧bä chjaorëreji̧ri̧dirȩ, jabo uaparëreji̧ri̧diro̧jȩrȩ pumȩ ji̧ri̧. 'Jabechji̧ a̧ro̧rȩ ju̧i̧ ja̧bo tänȩrä judi, ma̧i̧ dari̧ japapai̧ dadiro̧ibëda' quëna̧ jo̧rȩtaji̧ri̧rȩ uaparëreji̧ri̧diro̧jȩrȩ.

3Ado judiro̧ ja̧di dari̧ ni̧bä chjaoa̧ nö̧ta, Ichiae pio judi ira̧diä cjaeärëremȩdejȩ Juda Iscariote pio ju̧i̧. Jabechji̧ Jechu judi jibëa̧ jadü pio ji̧ri̧ mitërërea̧ ji̧, 12 oari pio ji̧ri̧ mitërërea̧ ji̧, jabechji̧ Juda Iscariote pio ju̧i̧bo mitërëremȩdejȩ. Ado pio ju̧i̧ ira̧diä cjaeärëremȩdejȩ Ichiae judi. 4Ado pio judi goëdepea̧dejȩrȩ tjamo̧ goë tuti ja̧bepaji̧ri̧ pio ji̧ri̧, Ütë tjamo̧ ja̧ bë oa tjamo̧ jidaji̧ri̧ guadia pio ji̧ri̧bo. Ado pio ji̧ri̧iäpȩ go̧düdärä ëte, ni̧bä chjaorëreji̧ri̧dirȩ. Juda judi goadi gatë tänȩpea̧ pio ju̧i̧ chjiari, Jechu ju̧i̧ ja̧bo tänȩtämi̧ cjiaji̧ri̧ pio ji̧ri̧iäpȩmo̧ goadi gatë tänȩpea̧ pio ju̧i̧ chjiari ni̧bä chjaorëreji̧ri̧dirȩ. 5Ado judiro̧ Juda pio ju̧i̧iä ta̧rëa̧ oaiä, jabechji̧ ma̧ chiadëri̧ cjia tjamo̧ji̧ri̧pea̧dirȩ. Ado chëre oa pio ju̧i̧iäpȩmo̧ yürüpea̧ ji̧ yo̧ë cji̧däa̧diro̧jo̧ȩ. 6Ado Juda Iscariote pio judi chëre yürüpea̧ yo̧a̧ oa ta̧rëa̧ oaiä, 'jabechji̧ chjadëdida, japapaquëda' quëna̧mȩrȩ dëbë yo̧a̧dejȩrȩ. Ado pio judiri yurori järi tjamo̧mȩpea̧de Jechu pio ju̧i̧ yürüpea̧ oa pio ji̧ri̧iäpȩmo̧, pio ju̧i̧ ja̧bo tänȩtämi̧ cjiaji̧ri̧ pio ji̧ri̧iäpȩmo̧. Aja̧, pumȩ buba decjiaräpȩ cjiamȩ oa yürüpea̧ oa järi tjamo̧mȩpea̧de.

Jechu pio judi chjadürëremȩdejȩrȩ jibëa̧ jadü yo̧a̧ri̧ oa a̧doparea̧ jo̧ tjo pio ju̧i̧ chjadëri̧ jëdano̧pea̧ oa, uëmo̧ a̧dë chjätärea̧ do pio ju̧i̧ chjadëri̧ jo̧rȩtaji̧ri̧rȩ jurapea̧ oa

Mateo 26:17-21; Marco 14:12-21; Juan 13:21-30

7Ado judirä pjuru chiadëmȩ chja̧pe maea oa jurarea̧ do chjätäpea̧ do üdë ma̧na̧na̧ra̧de. Ado oveja pëi̧ chja oa goe gu̧rori̧ ja̧bo tänȩpea̧ do üdë, uëmo̧ a̧dë chjätärea̧ do pio judi peaja̧di ma̧na̧na̧ra̧de. 8Ado pio ju̧i̧iä Jechu judi yabo jäpea̧ oa chjadürëremȩdejȩrȩ Juan ju̧i̧, ado Pedro pio ju̧i̧bo. Ado ja̧di ta̧rëri̧ yo̧mȩrȩ chjadüa̧dejȩrȩ:

—Danȩrȩ, a̧ro̧rȩ uëmo̧ a̧dë chjätäpea̧ doro chjadëri̧ jurapea̧ oa, jabechji̧ yabo jächji̧vä chjadëri̧ jëdano̧pea̧ oa —yo̧a̧dejȩrȩ—. Aja̧, a̧ro̧rȩ ji̧mo̧ jurapea̧ oa jëdano̧chji̧vä —yo̧a̧dejȩrȩ.

9Ado dëbë yo̧a̧diro̧jo̧ȩ:

—¿Tjana̧räpȩ jëdane yürütä earenȩibe —iëno̧ë ta̧rëa̧diro̧jo̧ȩ.

10Ado Jechu judi dëbë yo̧a̧dejȩrȩ:

—Jabechji̧ mȩnȩro̧ Jerucharȩräpȩ pea yu̧a̧däräa̧rä, jabechji̧ ui chiamȩ dabu yocodë oa aramȩ pio ju̧i̧ dëbëdiäparenȩro̧jo̧ȩ. Jabechji̧ cho̧rë jächji̧jo̧ȩ judi yu̧a̧pamȩ bërä. 11Ado judi yu̧a̧pea̧ bë ano̧mȩ pio ju̧i̧ yo̧chji̧jo̧ȩ: "Danȩ, A̧ra̧ano̧mȩ pio judi ja̧di ta̧rëri̧ iëno̧ë ta̧rëtä eadiibe pio mȩaiäpȩmo̧" yo̧eji̧ri̧renȩro̧jo̧ȩ. "Aja̧, ¿tjana̧räpȩde jo̧ tjo üdë, pio mȩa goëdaera̧pea̧ji̧ri̧ pio ji̧ri̧ cjo̧ro̧ tänȩrea̧ jo̧ tjo üdë? Jabechji̧ ca̧ jadü pio ji̧ri̧ nö̧ta ëba juratämi̧ cjiarequedejȩrȩ uëmo̧ a̧dë chjätärea̧ do pio ju̧i̧ chjadëri̧ jo̧rȩtapea̧ oa" yo̧eji̧ri̧renȩro̧jo̧ȩ. 12Ado pio ju̧i̧ ta̧rëa̧ oaiä, ëba buapadidibe jo̧ uëräpȩ yuro, ado cja̧rȩmo̧ cjo̧ro̧rea̧ iräpȩ yuro. Ado uëräpȩ bua̧rä, jabechji̧ ju̧ri̧pȩ jo̧ tjo ana̧ oa dae yo̧padidibe chjadëri̧ jëdano̧a̧ oa cjiamȩ oa, a̧ro̧rȩ chjadëri̧ jurapea̧ oa jëdano̧a̧ oa cjiamȩ oa. Jabechji̧ pio ju̧ri̧pȩ chjadëri̧ jëdanȩ yürüparenȩro̧ibe a̧ro̧rȩ jurapea̧ oa —yo̧mȩrȩ yo̧rëremȩdejȩrȩ Jechu judi jibëa̧ jadü yo̧a̧ri̧ oa.

13Pio ju̧i̧ ta̧rëa̧ oaiä, jabechji̧ jäa̧dirȩ. Ado Jechu judi pio jibë yo̧a̧mi̧ daea̧ madiro̧jo̧ȩ. Tjamo̧i̧ cjiari̧ yo̧a̧dejȩrȩ. Ado jo̧ tjo uëräpȩ chjadëri̧ go̧düdäräji̧ri̧rȩ jëdano̧rëreji̧ri̧diro̧jo̧ȩ jurarea̧ oa, uëmo̧ a̧dë chjätärea̧ do pio ju̧i̧ chjadëri̧ jo̧rȩtaji̧ri̧rȩ jurapea̧ oa.

Jibëa̧ icjara oa chjadëri̧ jo̧rȩtapea̧ oa, jënȩ ja̧boa̧ pio ju̧i̧, jibëa̧ goe pio ju̧i̧ chjadëri̧ jo̧rȩtapea̧ oa, Jechu judi ëba juradejȩrȩ jibëa̧ jadü pio ji̧ri̧

14Ado jurarea̧ oa jurapea̧ japamitë üdë ma̧na̧rä, Jechu pio judi mechjaräpȩ ju̧ri̧ ëba charëremȩdejȩrȩ jibëa̧ jadü 12 oa, jënȩ chjadüa̧ pio ji̧ri̧. 15Ado Jechu judi yo̧a̧dejȩrȩ:

—Danȩrȩ, cüdë ma̧i̧ dari̧ conȩdarea̧ pio ju̧i̧ chjätäbea yaboi̧, jabechji̧ tjamo̧ri̧ ëba juratämi̧ cjiarequede pio jiro jurarea̧ oa pio dibë nö̧ta —yo̧a̧dejȩrȩ—. Tjamo̧ davä. Pio jiro jurarea̧ oa, uëmo̧ a̧dë chjätäpea̧ doro jurapea̧ jurarea̧ pio yoa tjamo̧ri̧ ëba juratämi̧ cjiarequede pio dibë nö̧ta, cüdë ma̧i̧ da gito oa tarabea yaboi̧. 16Ado judiri juradëpareconȩ. Jabo ja̧dëa ji̧ ji̧dë duri oa cjiadiäa̧ japamitërä, Ütë tjamo̧ ja̧ pumȩ ütëborë ji̧mo̧ jurapea̧ oa a̧dopë cjiarä, dëdë, ado chjereno̧ jurapareconȩ. Tjamo̧ davä. A̧ro̧rȩ ütëborë Ütërë yo̧a̧ chja̧oerä cjo̧ro̧ji̧ri̧pea̧rä, Ütë tjamo̧ pio judi chiri ütëmȩrȩ cjo̧ro̧mȩpea̧rä, pio yoa jurarea̧ oa jura̧ pio ju̧i̧ chjiari jo̧rȩtarea̧ üdë tjamo̧i̧padäräa̧ oa cjiarä, jabechji̧ ado chjereno̧ jurapareconȩ —yo̧mȩrȩ yo̧rëremȩdejȩrȩ Jechu judi.

17Ado ja̧dëa ji̧ Jechu judi mitërëremȩdejȩ uva ui chiamȩ ae jararea̧ oa, cja̧rȩmȩ oa. Ado Ütë tjamo̧ pio ju̧i̧iäpȩmo̧ chjacjiamȩri̧ ni̧bä ëte, "Aja̧, chjadëri̧ japea̧renȩibe" yo̧ ëte, yo̧a̧dejȩrȩ:

—Pio yoa ae jararea̧ oa mitëchji̧vä. Ado ütëborë ano̧ mire jarachji̧jo̧ȩ —yo̧a̧dejȩrȩ—. 18Ado cüdë yaba̧ pio dibë nö̧ta ëba jararäbo, jabechji̧ ado judiri jaradëpareconȩ. Jabo dëdë, japamitë ana̧ tjamo̧ chjätä ëte ado chjereno̧ jaraparequede uva ui pio ju̧i̧. Tjamo̧ davä. Ütë tjamo̧ pio judi chiri tjamo̧ yo̧mȩrȩ cjiamȩpea̧rä, Ütërë yo̧a̧ chja̧oerä cjo̧ro̧pea̧ japamitë üdë ma̧na̧na̧ra̧rä, dëdë, pio jiro jararea̧ oa jarapareconȩ ado chjereno̧ —yo̧a̧dejȩrȩ.

19Ado ja̧dëa ji̧ Jechu judi chja̧pe oa mitërëremȩdejȩ. Ado Ütë tjamo̧ pio ju̧i̧iäpȩmo̧ ni̧bämȩrȩ yo̧a̧dejȩ: "Ama̧i̧, chjadëri̧ japea̧renȩibe pio yoa chja̧pe oa yürüa̧ oaiä." Ado ja̧di ta̧rëri̧ ni̧bä ëte, mu̧i̧ quirë yürürëremȩdejȩrȩ jibëa̧ jadü pio ji̧ri̧. Ado yo̧a̧dejȩrȩ:

—Pio yoa mitëchji̧vä —yo̧a̧dejȩrȩ—. Jabechji̧ ca̧ icjarami̧ dade. Pio dibë chjiari yürüa̧ oa cjiade. Jabechji̧ pio coa jo̧rȩtaji̧ri̧rȩ jurachji̧vä —yo̧a̧dejȩrȩ.

20Ado judiro̧ jura ëte, mitërëremȩdejȩ ado cja̧rȩmo̧ uva ui chiamȩ ae jararea̧ oa. Ado jibëa̧ Ama̧i̧ pio ju̧i̧iäpȩmo̧ chjacjiamȩri̧ ni̧bä ëte, ëba goë yüre jararëremȩdejȩrȩ. Ado yo̧a̧dejȩrȩ:

—Pio yoa jarachji̧vä mȩnȩro̧ ütëborë —yo̧a̧dejȩrȩ—. Jabechji̧ pio yoa uva ui üdë ca̧ goemi̧ dade. Ado cüdë ja̧boa̧rä, jabechji̧ gu̧roa̧ oa cjiapade pumȩ ja̧ oa. Ado ca̧ goe üdë jabechji̧ chjadëri̧ na̧rȩpadidibe Ütërë yo̧ë cji̧därërea̧ ma̧ȩ peaja̧ pio ju̧i̧ chjiari. ‘Aja̧, Ütërë yo̧ë cji̧därërea̧mi̧ pumȩ pio judiro̧ duridëparȩa̧ oa cjiapadiro̧da, Jechu ja̧ goe pio oaiä duridëparȩa̧ oa cjiapadiro̧da’ quëna̧rea̧mi̧ dari̧ na̧rȩpadidibe ca̧ goe üdë. Pio ju̧i̧iä yo̧requededibe. Jarachji̧vä —yo̧a̧dejȩrȩ.

21Ado ja̧dëa ji̧ ja̧di ta̧rëri̧ yo̧rëremȩde Jechu judi jibëa̧ jadü pio ju̧i̧ chjiari, cja̧rȩmȩ pio ju̧i̧ chjiari:

—Jabo danȩrȩ, pio coa chjai̧dëri̧ japapamȩ pio judi, pio coa ja̧bo tänȩtämi̧ cjiaji̧ri̧ pio ji̧ri̧iäpȩmo̧ goadi gatë tänȩpamȩ pio judi, jabechji̧ pio ibë nö̧ta chade mechjaräpȩ —yo̧a̧dejȩrȩ—. 22Ado danȩrȩ, cüdë, Pumȩrȩ Ara̧ Tjamo̧ pio judi, dëdë, Ütë tjamo̧ pio judi pearä judirä ütarë jo̧rȩtarërea̧mi̧ ja̧bo tänȩpadiro̧coe. Jabo cjäri̧ madejȩ jabo, a̧dë chjäte uapai̧ dari̧ bape chjaorea̧ üdë acji cjatäpadejȩ davä, pio coa chjai̧dëri̧ japamȩ pio ju̧i̧iäpȩmo̧, pio coa ja̧bo tänȩtämi̧ cjiaji̧ri̧ pio ji̧ri̧iäpȩmo̧ goadi gatë tänȩpamȩ pio ju̧i̧iäpȩmo̧ —yo̧a̧dejȩrȩ.

23Ado pio ju̧i̧ ta̧rëa̧ oaiä, Jechu ja̧ jadü pio judiro̧ jibëa̧ dëbëti̧ra̧ chia ba dëbë iëno̧ iëno̧ ta̧rëpea̧ ji̧ taruparëreji̧ri̧dirȩ. 'Aja̧, Jechu pio ju̧i̧ chjai̧dëri̧ japapamȩ pio judi jirodida' quëna̧ jo̧rȩtaji̧ri̧rȩ ba dëbë iëno̧ iëno̧ ta̧rërëreji̧ri̧dirȩ jibëa̧ dëbëti̧ra̧ chia.

Jechu judi pio ibë na̧rȩrërea̧mi̧ a̧dotäreji̧ri̧rea̧ro̧jȩrȩ ibëa̧ pumȩ ji̧ri̧, mu̧i̧tjoi̧mi̧ darë a̧doji̧ri̧rȩ

24Ado Jechu ja̧ jadü pio judiro̧ jibëa̧ dëbëti̧ra̧ chia ni̧bätarëreji̧ri̧dirȩ. 'Aja̧, Jechu judi chiri Ütëmȩrȩ cjo̧ro̧mȩpea̧rä, jaeboquëda, o ji̧ri̧iä ji̧dë u̧i̧ ba chiamȩrȩ cjiadiäemȩ jiroquëda, Jechu judi mitëa̧ pio ji̧ri̧iä ji̧dë u̧i̧ ba chiaemȩ jiroquëda, o judiro̧ pio coa tjamo̧ri̧ nö̧tadëpadiro̧da' quëna̧ jo̧rȩtaji̧ri̧rȩ ni̧bätarëreji̧ri̧dirȩ jibëa̧ dëbëti̧ra̧ chia. 25Ado pio ju̧i̧iä Jechu judi ja̧di ta̧rëri̧ yo̧mȩrȩ ni̧bä chjaorëremȩdejȩrȩ na̧rȩrea̧ ma̧ȩmi̧ dara̧:

—Danȩrȩ ca̧ pumȩ, dabanȩrȩ judiodë ütëti̧ pio ji̧ri̧ chjiari, chiri ütë cjo̧ro̧ji̧ri̧ pio ji̧ri̧ chjiari —yo̧a̧dejȩrȩ—. 'Jabechji̧ o ji̧ri̧iä ji̧dë u̧i̧ ba chia tjamo̧quëda' quëna̧ jo̧rȩtaji̧ri̧rȩ jibëa̧ chja̧oerämo̧ cjo̧ro̧ tänȩtadiro̧jȩrȩ jibëa̧ pumȩ ji̧ri̧, pio jibë jiadarea̧ yürüdëji̧ri̧rȩ. Ado judiro̧ ja̧di dari̧ japaji̧ri̧borë, 'Jaeboquëda, chjadëri̧ japaquiji̧ri̧da, cüdë a̧doa̧rämo̧ chjadëri̧ cjo̧ro̧rea̧ dadiro̧da, jabechji̧ ibëa̧ ütë judi ba chia tjamo̧dida quëna̧pea̧ chiadiro̧coada' quëna̧ jo̧rȩtataji̧ri̧rȩ cjo̧ro̧dirȩ pio jiro ütëti̧ judiro̧, oëra̧ jo̧rȩtaji̧ri̧rȩ. 26Jabo danȩrȩ ca̧ jadü, mȩnȩro̧ ja̧di dari̧ jo̧rȩtaji̧ri̧rȩ cjo̧ro̧dë matäreji̧ri̧nȩrȩ jabo jabechji̧, tjaoëpai̧ dari̧ cjo̧ro̧täreji̧ri̧nȩrȩ. Ado pio ju̧i̧iä yo̧requededibe —yo̧a̧dejȩrȩ—. Eami̧ pumȩ judi ba chia tjamo̧parȩa̧ oa cjiatämi̧ cjiarä judi, jabechji̧ ba chiadëmȩ pumȩ pio judimi̧ dari̧ cjo̧ro̧täremȩde. Ado tjamo̧ yo̧mȩ pio judi, jabechji̧ ütëbo ja̧ mu̧i̧tjoi̧mi̧ dari̧ cjo̧ro̧täremȩde peaja̧di —yo̧a̧dejȩrȩ—. 27Danȩrȩ ca̧ jadü, dai chirirä ja̧ jo̧rȩtarea̧ra̧ jo̧rȩtaji̧ri̧ pio ji̧ri̧iä, ¿chjiade ji̧dë u̧i̧ ba chiamȩ judi? Jabo mechjaräpȩ jura chamȩ pio judi, jabo jurarea̧ oa goa jä yürümȩ mu̧i̧tjoi̧ judi? Mechjaräpȩ jara chamȩ pio judi, jabo jararea̧ oa mu̧i̧ jädiämȩ mu̧i̧tjoi̧ judi? ¿Chjiade ji̧dë u̧i̧ ba chiamȩ judi? Chiadëde, jabechji̧ mechjaräpȩ jura chamȩ pio judide. Jabo danȩrȩ, ja̧didëde pio coaiä. Ado pio ju̧i̧iä jabechji̧ dibëa̧ chjarerä cjo̧ro̧mȩrequede pumȩ pio ji̧ri̧ ja̧ mu̧i̧tjoi̧mi̧ darë, pumȩ pio ji̧ri̧ a̧domȩmi̧ darë, dibëa̧ oa ja̧bepë yürümȩmi̧ darë. Jabechji̧ pio dibë chjadëri̧ na̧rȩpea̧ oa ja̧di dari̧ na̧rȩrëremȩrequededibe mȩnȩro̧ pio coa chjadëri̧ cho̧rëdiäpea̧ oa —yo̧mȩrȩ ni̧bä chjaorëremȩdejȩrȩ.

28Ado ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ Jechu judi:

—Danȩrȩ, cüdë dami̧ti̧ chjai̧dë oa chjätäa̧räbo, jabechji̧ ji̧dë ma ëba cjiarëreji̧ri̧nȩrȩ pio coa nö̧ta. 29Ado yaba̧ ca̧ Ama̧i̧ pio judi coa yürürërea̧mi̧ yürürequededibe peaja̧di. Jabechji̧ ca̧ Ama̧i̧ pio judi tjamo̧ yo̧rea̧ yürürëremȩdique cüdë chiri Ütëmȩrȩ cjo̧ro̧pea̧ oa. Ado pio coa yürürërea̧mi̧ yürürequededibe peaja̧di. Aja̧, pio coa nö̧ta ji̧dë ma ëba cjiareji̧ri̧ pio ji̧ri̧ yürürequededibe. Jabechji̧ cüdë chiri Ütëmȩrȩ cjo̧ro̧mȩpea̧rä, pio mȩnȩro̧borë tjamo̧ yo̧ji̧ri̧rȩ cjo̧ro̧panȩrȩ. 30Ado judirä, jabechji̧ ëba jura chaparequededibe ca̧ mechjaräpȩ ju̧ri̧. Tjamo̧ davä. Cüdë chiri Ütëmȩrȩ cjo̧ro̧mȩpea̧rä, jabechji̧ pio coadi chjadëri̧ jurami̧ dari̧ ëba jura chaparequededibe. Ado mȩnȩro̧ dibëa̧ charea̧ ba chia tjamo̧ro chaji̧ri̧rȩ, jabechji̧ ütaraparenȩro̧jȩrȩ Icharai pio judiri ja̧ buba pio ji̧ri̧, 12 buba oa —yo̧mȩrȩ ni̧bä chjaorëremȩdejȩrȩ Jechu judi jibëa̧ jadü pio ji̧ri̧iäpȩmo̧, judiro̧ tjamo̧ yo̧ji̧ri̧rȩ cjo̧ro̧pea̧ pio ju̧i̧ chjiari.

Pedro judi ma̧ȩ chjádë yürüpea̧ pio ju̧i̧ chjiari jabërä yo̧rëremȩdejȩ Jechu judi

Mateo 26:31-35; Marco 14:27-31; Juan 13:36-38

31Ado Pedro judi dabadëchea oa, jabechji̧ jabërä yo̧rëremȩdejȩ Jechu judi jibëa̧ jadü üdë na̧e chiadëchea oa. Ja̧di ta̧rëri̧ yo̧a̧dejȩ:

—Chimo̧, Chimo̧, chjadëri̧ ta̧rëcoe —yo̧a̧dejȩ—. Danȩ, Ichiae pio judi cjo̧dëa̧dejȩ Ütë tjamo̧ pio ju̧i̧iä pio jȩaiäpȩmo̧ japarea̧ yürütä pio dibë ütëbo oa ütarami̧ dari̧ japapea̧ oa. Jabechji̧ pjäë e oa pjaepa oaiä japami̧ dari̧, boa cha tänȩmi̧ dari̧ japatämi̧ cjiadidibe. Jabechji̧ judiro̧ quëna̧ üdë jabomo̧ emi̧ dadida, tjamo̧ri̧ quëna̧dëdiro̧da' quëna̧mȩrȩ ütaratämi̧ cjiadidibe. Ado ja̧di dari̧ japapea̧ ji̧ cjo̧dëa̧dejȩ Ütë tjamo̧ pio ju̧i̧iä, ado Ütë tjamo̧ pio judi japarea̧ yürüa̧dejȩ. 32Jabo danȩ Chimo̧, goë cjo̧dëa̧requede pio mȩa chjiari, mȩnȩ pio coaiäpȩmo̧ quëna̧dëpe bagachea oa. Jabo dëdë, putu jura̧ a̧dë chami̧ dari̧ japaparenȩque jabo. Jabo ja̧dëa ji̧ ji̧dë duri oa mȩnȩ ano̧ mire jo̧rȩtamȩpea̧rä, jabechji̧ ado chjereno̧ ori̧ bagari̧ ëba cjiarea̧ daparenȩ pio coadi. Ado ja̧dëa ji̧ na̧ jadü pio ji̧ri̧ a̧doemȩrenȩjȩrȩ. Tjamo̧ davä. Pio mȩa nö̧ta chjadüa̧ pio ji̧ri̧ a̧doemȩrenȩjȩrȩ, pio judiro̧borë ji̧dë u̧i̧ chjuari̧ quëna̧pea̧ oa pio coaiäpȩmo̧ —yo̧a̧dejȩ.

33Jabo Pedro judi dëbë yo̧a̧dejȩ:

—Danȩ Ano̧mȩ, ji̧dë ma cho̧rë jäparequedemȩ, putu jura̧ a̧dë chami̧ dari̧ japarea̧ decjiari̧. Tjamo̧ davä. Coa chaärea̧ bëräpȩ tutia̧räbo ji̧dë ma cho̧rë jäparequedemȩ, pio coa ja̧bo tänȩräbo —yo̧a̧dejȩ.

34Jabo Jechu judi dëbë yo̧a̧dejȩ:

—Jabo cjäri̧ marenȩ Pedro, pio yaba̧ domȩ oa ocararo üi̧rȩ jabë eadëa̧rä, tjarari̧ co ma̧ȩ chjádë yürüparenȩ pio coa chjiari —yo̧a̧dejȩ—. Pio coa dabadëcji̧ quëna̧ ni̧bämȩrȩ ma̧ȩ chjádë yürüparenȩ. “Aja̧, Jechu pio ju̧i̧ tjamo̧ri̧ dabadëreconȩ” yo̧parenȩ. Ado ja̧dëa ji̧ mȩnȩ pio coa chjiari tjarari̧ co ma̧ȩ chjádë yürüa̧rä, dëdë, ocararo üi̧rȩ eapade —yo̧a̧dejȩ.

Ütërë ea jana̧ chjadüa̧ oa ni̧bäji̧ri̧ judiro̧ Jechu pio ju̧i̧ chjiari jabërä go̧ȩparërea̧ ma̧ȩ üdë tjamo̧i̧padäräa̧ oa cjiapade

35Ja̧dëa ji̧ Jechu judi iëno̧ë ta̧rëa̧dejȩrȩ jibëa̧ jadü ji̧ri̧:

—Danȩrȩ, cüdë dibë no̧mȩrä judirä ma̧ȩ oa a̧ra̧ano̧pea̧ oa chjadürërea̧ ji̧, jabechji̧ mö̧na̧ maea oa chjadürëremȩrequededibe —yo̧a̧dejȩrȩ—. Chëre boearea̧ joë chiadë maea oa, tati̧goe oa chiadë maea oa chjadüa̧requededibe, ta joë ano̧ mire go̧iorea̧ goadë maea oa. Ado danȩrȩ, ¿eami̧ oa jabëdiädëa̧nȩrȩ? —iëno̧ë ta̧rëa̧dejȩrȩ.

Ado judiro̧ dëbë yo̧a̧diro̧jo̧ȩ:

—Cjäri̧ marea̧rȩ, eami̧ oa jabëdiädëa̧rea̧rȩ —dëbë yo̧a̧diro̧jo̧ȩ.

36Ado ja̧dëa ji̧ a̧do cja̧rȩmo̧ ma̧ȩ oa yürürëremȩdejȩrȩ jibëa̧ jadü ji̧ri̧. Jabechji̧ judiro̧ dabadëchea oa, pumȩ judiro̧ noi̧dërë pio ji̧ri̧ dëbëpe chjaopea̧ pio ju̧i̧ chjiari dabadëchea oa, jabechji̧ ado cja̧rȩmo̧ ma̧ȩ oa yo̧rëremȩdejȩrȩ:

—Jabo yaba̧ ano̧ mire japapea̧de —yo̧a̧dejȩrȩ—. Jabechji̧ tjaoëpai̧ dari̧ japapea̧de. Danȩrȩ, mȩnȩro̧ dibëa̧ chëre boearea̧ joë oa goarä judi, jabechji̧ goa jäpea̧de. Ado dibëa̧ tati̧goe oa goarä judi, peaja̧di chia jäpea̧de. Ado danȩrȩ, dibëa̧ tjapënȩ oa goadërä judi, dëbëribo jo̧dë chiamȩ tjapënȩ jujuai̧ pio ju̧i̧ goadërä judi, jabechji̧ gatë tänȩtäreji̧ri̧nȩrȩ dibëa̧ chjibo oa dibëa̧ tjapënȩ jujuai̧ pio ju̧i̧ ano̧ mire gatëpea̧ oa. Aja̧, dairi ja̧ ina̧rea̧ chjibo pio ju̧i̧ gatë tänȩtäremȩdejȩ chjadëri̧ arapea̧ oa. 37Tjamo̧ davä. Mȩnȩro̧ pio ju̧i̧ araji̧ri̧rȩ cjo̧ro̧dërërea̧ ji̧, jabechji̧ arapea̧de yaba̧ pio coa chjiari go̧ȩpea̧ oa cjiarërea̧ ma̧ȩ üdë tjamo̧i̧padäräa̧ oa cjiapa tara. Danȩrȩ, Ütë tjamo̧ judi go̧ȩpa tänȩrërea̧ ma̧ȩ üdë ja̧di ta̧rëri̧ go̧ȩpea̧ oa cjiarëremȩde jabërä pio coa chjiari. Ta̧rëchji̧vä:

"Ado pumȩ judiro̧ pio ju̧i̧ chjadëri̧ datärea̧ ji̧, cjäri̧ madiro̧jo̧ȩ, a̧dë chjäte chjai̧dëri̧ japamȩmi̧ da oa darëreji̧ri̧diro̧jo̧ȩ, pio ju̧i̧ tjamo̧ri̧ bape chjaotämi̧ cjiaji̧ri̧rȩ."

Aja̧, ja̧di ta̧rëri̧ go̧ȩpea̧ oa cjiarëremȩde ma̧ȩ üdë pio coa chjiari, pumȩ judiro̧ pio coa chjai̧dëri̧ dapea̧ pio ju̧i̧ chjiari. Ado peaja̧dimi̧ dari̧ jo̧rȩtaji̧ri̧rȩ dapadiro̧dibe —yo̧a̧dejȩrȩ—. Ado pio ju̧i̧iä jabechji̧ arapea̧de yaba̧, cüdë dibë pio yabo yo̧a̧mi̧ —yo̧a̧dejȩrȩ.

38Ado ja̧dëa ji̧ dëbë yo̧a̧diro̧jo̧ȩ:

—Danȩ Ano̧mȩ, pio yi yo̧a̧ri̧ tjapënȩ jujuai̧ oa goarea̧rȩ.

Ado Jechu judi dëbë yo̧a̧dejȩrȩ:

—Aja̧, jabechji̧de.

Jechu judi ana̧ri̧ jo̧rȩtamȩrȩ ni̧bärëremȩdejȩ jibëa̧ Ama̧i̧ ju̧i̧ Gechema̧ni̧ quȩmȩ tjadoräpȩ

Mateo 26:36-46; Marco 14:32-42

39Ja̧dëa ji̧ Jechu judi a̧doparea̧ jo̧ tjori pio judiri go̧dümȩrȩ järëremȩde Orivo quȩmȩ ya̧mi̧räpȩ ju̧ri̧, jënȩ jädiärërea̧räpȩ ju̧ri̧. Ado jibëa̧ jadü pio judiro̧ cho̧rë jäa̧diro̧jo̧ȩ. 40Ado ütëborë pio ju̧ri̧pȩ go̧düdäräa̧rä, yo̧rëremȩdejȩrȩ:

—Jabechji̧ Ütë tjamo̧ pio ju̧i̧iä cjo̧dëchji̧vä mȩnȩro̧ eami̧ chjai̧dë oa aja̧pachea oa, mȩnȩro̧ chjai̧dë oaiä u̧i̧pea̧ oa cjiachea oa —yo̧a̧dejȩrȩ.

41Ado ja̧di ta̧rëri̧ yo̧ ëte, Jechu judi a̧dë järëremȩdejȩrȩ jachi chjaräpȩ, pumȩrȩ ta̧dë oa jachi oa aeno̧mi̧ daräpȩ. Ado ja̧dëa ji̧ ju chatura̧ cjia ëte, taruparëremȩde jibëa̧ Ama̧i̧ pio ju̧i̧ ni̧bäpea̧ ji̧. Ja̧di ta̧rëri̧ yo̧mȩrȩ ni̧bärëremȩdejȩ:

42—Ama̧i̧, mȩnȩ earä judi, jabechji̧ tuti japavä pio coa chjiari, cüdë a̧dë chjäte ma̧i̧ dari̧ tarachea oa. Jabo cüdë jo̧rȩta̧mi̧ japadëvä, jabo jabechji̧ pio mȩnȩ ütarë jo̧rȩta̧mi̧ japavä Ama̧i̧ —yo̧mȩrȩ yo̧rëremȩdejȩ.

43Ado ja̧dëa ji̧ a̧dërimȩ mu̧i̧tjoi̧ pio judi cjiana̧ra̧dejȩ. Ado ju chiaparȩa̧dejȩ. 44Ado Jechu judi, a̧dë chjäte gitori̧ jo̧rȩta̧ oaiä, ji̧dë u̧i̧ järipea̧mȩrȩ ni̧bärëremȩdejȩ jibëa̧ Ama̧i̧ ju̧i̧, pio jȩaiäpȩmo̧ tjamo̧ri̧ a̧dotä. Ado ana̧ri̧ cjo̧dëa̧ oaiä, jabechji̧ ma̧i̧ dari̧ ugo̧dü cjia tjamo̧mȩpea̧de. Ado ui üdë ma̧i̧ dari̧ ugo̧dücjia̧ oaiä, jabechji̧ daburäpȩmo̧ tai tai gu̧rorëremȩde goe choco ma̧ri̧mi̧ darë. 45Ado ja̧di ta̧rëri̧ ni̧bädärä ëte, cuchupë jäeno̧a̧de jibëa̧ jadü pio ji̧ri̧iäpȩ. Ado mo̧a̧ cjiaji̧ri̧ oa dadärärëremȩdejȩrȩ, gitori̧ jo̧rȩta̧ oaiä ju chiadëpea̧ji̧ri̧ oa.

46Ado yo̧a̧dejȩrȩ:

—¿Tjana̧ ju̧i̧iä mo̧a̧ cjianȩrȩ? Jabechji̧ cjitëno̧chji̧vä. Ütë tjamo̧ pio ju̧i̧iä goë cjo̧dëchji̧jo̧ȩ mȩnȩro̧ u̧i̧pea̧ oa cjiachea oa —yo̧a̧dejȩrȩ.

Chjuari̧ mitërëreji̧ri̧diro̧jo̧ȩ Jechu ju̧i̧

Mateo 26:47-56; Marco 14:43-50; Juan 18:1-11

47Ado Jechu judi jibëa̧ jadü pio ji̧ri̧ nö̧ta jabë ni̧bä chjaodärädëa̧rä, chjaodëri̧ acji go̧dürärärëreji̧ri̧diro̧jo̧ȩ pumȩ bubarë Jechu pio ju̧i̧ mitëpea̧ oa. Ado Juda Iscariote pio judi pumȩ pio ji̧ri̧ ëba go̧düa̧ oaiä, jabechji̧ Jechurë cjiamȩräpȩ chjadëri̧ go̧düdärärea̧ daea̧dirȩ. Ado Juda Iscariote pio judi Jechu ja̧ jadüräbo, 11 jadü pio ji̧ri̧ nö̧ta mitëa̧ oa cjiaräbo, jabechji̧ a̧dorëremȩdejȩrȩ pumȩ ji̧ri̧ Jechu pio ju̧i̧ mitërea̧ dapea̧ oa. Ado Juda judi Jechu pio ju̧i̧iäpȩ jäa̧mȩrȩ, chamachoro ibua̧dejȩ pio ju̧i̧ jeapea̧ oa. 48Jabo Jechu judi dëbë yo̧a̧dejȩ:

—¿Tjana̧ japanȩ Juda? ¿Tjana̧ ju̧i̧iä chjai̧dëri̧ japarenȩjo̧ȩ Pumȩrȩ Ara̧ Tjamo̧ pio ju̧i̧, i̧bumȩrȩ? Pio coa ea tjamo̧mȩmi̧ dari̧ japarenȩque jabo cjäri̧ marenȩque, coa eadëji̧ri̧ pio judiro̧ coa mitërea̧mi̧ dari̧ i̧burenȩque. ¿Tjana̧ ju̧i̧iä ja̧di dari̧ japarenȩ? —yo̧mȩrȩ iëno̧ë ta̧rëa̧dejȩ Jechu judi Juda pio ju̧i̧iäpȩmo̧.

49Ado Jechu ja̧ yuroro cjiaji̧ri̧ jadü pio judiro̧ daea̧ oaiä, acji go̧düdäräa̧ji̧ri̧ oa daea̧ oaiä, 'chia chia, Jechu pio ju̧i̧ chjaodëri̧ mitëpai̧ dadiro̧ju̧i̧da' quëna̧ jo̧rȩta̧ oaiä, jabechji̧ chjaodëri̧ iëno̧ë ta̧rëa̧diro̧jo̧ȩ Jechu ju̧i̧:

—Danȩ Ano̧mȩ, acji jana̧ji̧ri̧ pio ji̧ri̧ dëbëpe chjaotä ¿eadërenȩibe? Ibëa̧ dëbëribo jo̧dë chiamȩ tjapënȩ jujuai̧ra̧ pio ju̧ri̧ra̧ dëbëpe chjaotä ¿earenȩibe? Chjadëri̧ yo̧ibe —yo̧ji̧ri̧rȩ iëno̧ë ta̧rëa̧diro̧jo̧ȩ.

50Ado judiro̧ cja̧rȩmȩrȩ chjaodëri̧ mu̧i̧ coëno̧a̧dejȩ jibëa̧ coana̧rea̧ oa. Ado goae tarari̧ tuti gu̧na̧mȩrȩ tuti gu̧na̧rëremȩdejȩ pumȩ ja̧ ta̧ra̧ oa. Tjamo̧ davä. Tjamo̧ goë tuti ja̧bepamȩ ja̧ mu̧i̧tjoi̧ pio ju̧i̧ ja̧ ta̧ra̧ oa tuti gu̧neno̧a̧dejȩ, mu̧i̧ chjuari ja̧ ta̧ra̧ pio ju̧i̧, ta̧ra̧ cotope bagari̧.

51Jabo Jechu judi tuti yo̧a̧dejȩ:

—Cjäri̧ made, ja̧di dari̧ japadëpea̧de —yo̧a̧dejȩ—.

Ado jibëa̧ jadü pio ju̧i̧ ja̧di ta̧rëri̧ yo̧ë ëte, ta̧ra̧ cotope baga̧mȩ pio ju̧i̧ ja̧ ta̧ra̧ oa ga̧re tara̧dejȩ. Ado chjaodëri̧ cji̧deno̧a̧dejȩ, chaparȩrea̧mi̧ dari̧. 52Ado pio ju̧i̧ chjaparea̧ duri oa, ja̧di ta̧rëri̧ yo̧rëremȩdejȩrȩ pio jȩa mitëra̧pea̧ji̧ri̧ pio ji̧ri̧. Aja̧, tjamo̧ goë tuti ja̧bepaji̧ri̧ pio ji̧ri̧, ado Ütë tjamo̧ ja̧ bë oa tjamo̧ yo̧ji̧ri̧ guadia pio ji̧ri̧, ado judio ütëti̧ pio ji̧ri̧ yo̧rëremȩdejȩrȩ, ja̧di ta̧rëri̧ yo̧mȩrȩ:

—¿Chjiarequede cüdë? —iëno̧ë ta̧rëa̧dejȩrȩ—. ¿Garümȩ uapai̧ da tjamo̧ pio judirequede? ¿Tjana̧ ju̧i̧iä ma̧i̧ da chjai̧dë oa japamȩmi̧ da oa acji jana̧renȩro̧coe? ¿Tjana̧ ju̧i̧iä dëbëribo jo̧dë chiamȩ tjapënȩ jujuai̧ oa araji̧ri̧rȩ acji jana̧renȩro̧coe, gu̧na̧rea̧ tobo? ‘Pumȩ uapai̧ da tjamo̧dida’ quëna̧ jo̧rȩtaji̧ri̧rȩ jana̧nȩrȩ? —iëno̧ë ta̧rëa̧dejȩrȩ—. 53Danȩrȩ, cüdë pumȩ pio ji̧ri̧ nö̧ta Ütë tjamo̧ ja̧ bëräpȩ ju̧ri̧ doti̧mi̧ cjiamȩ oa peadë mitëa̧täreji̧ri̧renȩro̧coe cüdë tjamo̧ri̧ chjai̧dëri̧ japea̧rä judi. Jabo cjäri̧ marenȩro̧coe, peadë mitëtärea̧ ji̧, mitërea̧ dadëa̧renȩro̧coe cüdë chjai̧dëri̧ japadëa̧ oaiä. Jabo Ütë tjamo̧ judi pio dibë japarea̧ yürüa̧ oaiä, dëdë, mȩnȩro̧ jo̧rȩta̧mi̧ japapai̧ darenȩro̧coe yaba̧. Ado Ichiae pio judiborë japapai̧ dadique, pio judi jo̧rȩta̧mi̧. Jabechji̧ Ütë tjamo̧ pio judi japarea̧ yürüa̧ oaiä, dëdë, bagönȩmi̧ darä tjamo̧ yo̧mȩrȩ cjiamȩ pio judi japapai̧ dadique davä bagönȩmi̧ darä cjiaji̧ri̧ pio ji̧ri̧iä —yo̧rëremȩdejȩrȩ Jechu judi.

Pedro judi ma̧ȩ chjádë yürüde Jechu pio ju̧i̧ chjiari

Mateo 26:57-58, 69-75; Marco 14:66-72; Juan 18:15-18, 25-27

54Ja̧dëa ji̧ Jechu pio ju̧i̧ chjuari̧ mitë ëte, ëba järëreji̧ri̧diro̧jo̧ȩ tjamo̧ goë tuti ja̧bepamȩ pio ju̧i̧ ja̧ bëräpȩ. Ado Pedro judi, duriräpȩ cjiamȩrȩ jaerira̧ jachi chja dariä cho̧rë järëremȩdejȩrȩ tjamo̧ goë tuti ja̧bepamȩ pio ju̧i̧ ja̧ bëräpȩ yuro. 55Ado joë ya jidaji̧ri̧ mu̧i̧tjoi̧ judiro̧ pio jiro bë yuroräpȩ ju̧ri̧, tutirea̧ra̧ tutia̧ oa cjiamȩräpȩ ju̧ri̧ cjo̧dë oa cjitëparȩa̧diro̧jo̧ȩ pio jiro chiri tjoräpȩ ju̧ri̧. Ado ja̧di dari̧ japa ëte, chaji̧ri̧pea̧dirȩ cjo̧dë yuroro. Ado Pedro pio judi go̧düdärä ëte, peaja̧di pio ju̧ri̧pȩ chamȩpea̧de pio ji̧ri̧ nö̧ta. 56Ado mu̧i̧tjoi̧ iei̧ pio jini̧, cja̧rȩmȩrȩ Pedro pio ju̧i̧ daea̧ oaiä, cjo̧dëri cjitëmȩ tata oaiä ütarë daea̧ oaiä, jabechji̧ pio ju̧i̧iäpȩ go̧düdäräa̧nȩ. Ado pio ju̧i̧iäpȩmo̧ dëbë dayi̧rȩ yo̧a̧nȩ:

—Danȩrȩ, pio yodëborë ëba cjiaremȩdejȩ Jechu pio ju̧i̧ nö̧ta —yo̧a̧nȩ.

57Jabo Pedro judi pumȩ no̧i̧dë ja̧ dëbëräpȩ chamȩrȩ yo̧a̧dejȩ iei̧ ji̧:

—Cjäri̧ maquë iei̧. Pio ju̧i̧ nö̧ta ëba cjiadëremȩcuni̧. Ju̧i̧ dabadëcuni̧ —dëbë yo̧a̧dejȩ.

58Ado japamitë boi̧chji̧ chjätä ëte, ado cja̧rȩmo̧rȩ pio ju̧i̧iäpȩmo̧ ütarë damȩrȩ yo̧a̧dejȩ:

—Danȩ, pio mȩnȩborë Jechu pio ju̧i̧ nö̧ta ëba cjiaremȩrenȩ —yo̧a̧dejȩ.

Jabo Pedro judi dëbë yo̧a̧dejȩ:

—Cjäri̧ marequede üi̧. Pio ju̧i̧ nö̧ta ëba cjiadëremȩreconȩ —dëbë yo̧a̧dejȩ.

59Ja̧dëa ji̧ cja̧rȩmȩ ora chjätä ëte, ado cja̧rȩmo̧rȩ peaja̧di ta̧rëri̧ yo̧rëremȩde:

—Danȩrȩ, tjamo̧i̧ cjiari̧ yo̧requededibe, pio yodëje peaja̧di Jechu pio ju̧i̧ nö̧ta ëba cjiaremȩde. Jabechji̧ peaja̧di Garirea quȩmȩ chiririmȩ pio judide —yo̧a̧de.

60Jabo Pedro judi yo̧a̧dejȩ:

—Jaboti̧ri̧ yo̧renȩque. Tjamo̧ri̧ dabadëreconȩ. 'Jabechji̧ pio judidida' quëna̧ dabadë marequede —yo̧a̧.

Ado Pedro pio judi jabë ni̧bädärädëa̧rä, ocararo üi̧ üdë chjaodëri̧ eamȩpea̧de. 61Ado Jechu judi Pedro pio ju̧i̧iäpȩmo̧ mȩmȩrȩpe cjiadiäa̧mȩrȩ dëbë darëremȩdejȩ. Ado Pedro judi Jechu pio ju̧i̧ daea̧ oaiä, chjaodëri̧ jo̧rȩtamȩpea̧de davä judi pio jȩaiäpȩmo̧ jabërä yo̧a̧ pio ju̧i̧. "Aja̧, ji̧dë duri oa ocararo üi̧ üdë eabea yaboi̧, tjarari̧ co ma̧ȩ chjádë yürüparenȩ pio coa chjiari" yo̧mȩ ma̧ȩ oaiä ana̧ri̧ jo̧rȩtamȩpea̧de. 62Ado pio ju̧i̧iä Pedro judi bë yuroro a̧rȩmȩ chiriri pio judiri go̧dümȩrȩ ana̧ri̧ ejaro cjiamȩpea̧de, a̧dë chjäte ëcarami̧ tarari̧ jo̧rȩtamȩrȩ.

Jechu pio ju̧i̧ airi̧ cjia airi̧ cjiaji̧ri̧rȩ chjaocjiarëreji̧ri̧diro̧jo̧ȩ

Mateo 26:67-68; Marco 14:65

63Ja̧dëa ji̧ guadia judiro̧ taruparëreji̧ri̧dirȩ pio ju̧i̧ airi̧ cjia airi̧ cjia ya̧pea̧ ji̧. Jabechji̧ chjaocjiami̧ dari̧ japea̧diro̧jo̧ȩ, airi̧ cjia airi̧ cjiaji̧ri̧rȩ. Ado goae tarari̧ ano̧ mire bide cjaeä chjaorëreji̧ri̧diro̧jo̧ȩ. 64Ado ja̧dëa ji̧ jibëa̧ dacho oa ina̧diro̧jo̧ȩ. Ado dacho oa ina̧ oa cjiamȩ oa, ji̧dë ma iëno̧ë iëno̧ë cjiarëreji̧ri̧diro̧jo̧ȩ:

—Aja̧, chjadëri̧ yo̧ibe —yo̧a̧diro̧jo̧ȩ—. Ütërë pio mȩaiäpȩmo̧ ea jana̧ chjadüa̧ oa chjadëri̧ yo̧ibe. ¿Chjia tjamo̧de pio mȩa bide cjaeämȩ pio judi? —iëno̧ë ta̧rë chjaorëreji̧ri̧diro̧jo̧ȩ.

65Ado dami̧ti̧ chjai̧dë oa yo̧ji̧ri̧rȩ ana̧ri̧ ya̧rëreji̧ri̧diro̧jo̧ȩ, pio ju̧i̧iäpȩmo̧ goae tarari̧ aechide yo̧ji̧ri̧rȩ.

Jechu pio ju̧i̧ cjiadiä tänȩrëreji̧ri̧diro̧jo̧ȩ tjamo̧ ütaraji̧ri̧ pio ji̧ri̧ ja̧ dëbëräpȩ

Mateo 26:59-66; Marco 14:55-64; Juan 18:19-25

66Ado peadai̧rä judio ütëti̧ pio judiro̧ no̧i̧dërë a̧doparëreji̧ri̧dirȩ. Tjamo̧ goë tuti ja̧bepaji̧ri̧ pio judiro̧ yo̧a̧ri̧borë, ado Moicherea̧rë go̧ȩparërea̧ ma̧ȩ oa a̧ra̧ano̧ji̧ri̧ pio judiro̧borë a̧doparëreji̧ri̧dirȩ. Ado Jechu pio ju̧i̧ jidaji̧ri̧ pio judiro̧ yabo ëba jäa̧diro̧jo̧ȩ a̧dopaji̧ri̧ pio ji̧ri̧ ja̧ dëbëräpȩ, tjamo̧ ütaraji̧ri̧ pio ji̧ri̧ ja̧ dëbëräpȩ. 67Ado yo̧a̧diro̧jo̧ȩ:

—Danȩ, mȩnȩ Ütërë mitëa̧ Chjätä Tänȩmȩrä judi, jabechji̧ chjadëri̧ yo̧ibe —yo̧a̧diro̧jo̧ȩ.

Jabo Jechu judi dëbë yo̧a̧dejȩrȩ:

—Jabo cjäri̧ marequede, cüdë dibë yo̧rä judi, quëna̧dëparenȩro̧coe —dëbë yo̧a̧dejȩ. 68Ado cüdë dibë eami̧ oa iëno̧ë ta̧rërä judi, chjadëri̧ dëbë yo̧dëparenȩro̧coe. 69Jabo danȩrȩ, mȩnȩro̧ coa eadëräbo, jabechji̧ pio yoa ma̧ȩ oa yo̧requededibe —yo̧a̧dejȩrȩ—. Ji̧dë duri oa japamitë boi̧chji̧ chjätä ëte a̧dë chjäte ba chia tjamo̧räpȩ chamȩ oa daparenȩro̧coe Pumȩrȩ Ara̧ Tjamo̧ pio ju̧i̧, a̧dëräpȩmȩ oa —yo̧a̧dejȩrȩ—. Tjamo̧ davä. A̧dë chjäte jauëchjamȩ Ütë pio ju̧i̧ ja̧ mu̧i̧ chjuarä chamȩ oa daparenȩro̧coe —yo̧a̧dejȩrȩ.

70Ado pio ju̧i̧ ta̧rëa̧ oaiä, chjaodëri̧ iëno̧ë ta̧rëa̧diro̧jo̧ȩ:

—Danȩ, mȩnȩ ja̧di ta̧rëri̧ yo̧a̧ oaiä, ¿tjana̧ yo̧renȩibe? —iëno̧ë ta̧rëa̧diro̧jo̧ȩ—. ¿Ütë tjamo̧ ja̧ Joja pio judi tjamo̧requede yo̧dënȩ? —iëno̧ë ta̧rëa̧diro̧jo̧ȩ:

Ado Jechu judi dëbë yo̧a̧dejȩrȩ:

—Aja̧, mȩnȩro̧ yo̧a̧mi̧ pio judi tjamo̧requede —yo̧a̧dejȩrȩ.

71Ado judiro̧ pio ju̧i̧ ta̧rëa̧ oaiä, ja̧di ta̧rëri̧ yo̧ji̧ri̧pea̧dirȩ jibëa̧ dëbëti̧ra̧ chia:

—Danȩrȩ, irä ta̧rëa̧rea̧ro̧jo̧ȩ judi yo̧a̧ pio ju̧i̧. Ado pio ju̧i̧iä jabechji̧de yaba̧ —yo̧a̧dirȩ—. ‘Ado judiri ado cja̧rȩmo̧ pumȩ pio ju̧i̧ia a̧de ta̧rëpea̧ chia jiroa̧ro̧da’ quëna̧rea̧mi̧dëde. Jabechji̧ jibëa̧ yara̧ yo̧a̧ pio ju̧i̧ irä ta̧rëa̧rea̧ro̧jo̧ȩ. Ado pio ju̧i̧iä, dëdë, ja̧bo tänȩrea̧ dapai̧ darea̧ro̧jo̧ȩ —yo̧a̧dirȩ.

Currently Selected:

Lucas 22: Pume

Highlight

Copy