Taruparea̧ Ma̧ȩ 37

1Ado Jacobo judi jäjarea̧rë cjo̧ro̧rërea̧räpȩ cjo̧ro̧mȩpe bagarëremȩde Canaa̧ quȩmȩ chiriräpȩ. 2Ado pio yoa ma̧ȩ üdë, jabechji̧ Jacobo ja̧ u̧ri̧ pio ji̧ri̧ chjiari ma̧ȩde.

Joche ja̧ oti̧ judiro̧ goëdëri̧ cjiape bagarëreji̧ri̧diro̧jo̧ȩ

Joche judi jabë pëi̧ chjarä judirä, jabomo̧ 17 ui goamȩrä judirä, jabechji̧ jidarëremȩdejȩ oveja oa jibëa̧ oti̧ pio ji̧ri̧ nö̧ta. Jabechji̧ Jacobo judi tjamo̧ eba̧ pio ji̧ri̧ ja̧ uëri a̧de ëbarëremȩdejȩrȩ jibëa̧ ivi ja̧ mu̧i̧tjoi̧ pio ji̧ri̧. Bija quȩyi̧ pio ji̧, Chipa quȩyi̧ pio ji̧ a̧de ëbarëremȩdejȩrȩ. Ado pio ji̧ri̧ ja̧ u̧ri̧ pio ji̧ri̧ nö̧ta ja̧bepamȩrȩ jidarëremȩdejȩ oveja oa Joche judi. Ado jibëa̧ pumȩ pio ji̧ri̧ chjiari ma̧ȩ goaedë oa yürü chjaorëremȩdejȩ jibëa̧ ama̧i̧ ju̧i̧. "Chjai̧dëri̧ jape chjaodirȩ" yo̧mȩrȩ yo̧rëremȩdejȩ jibëa̧ ama̧i̧ ju̧i̧.

3Ado Jacobo judi jibëa̧ u̧ri̧ pio ji̧ri̧iä ji̧dë u̧i̧ earëremȩdejȩ Joche pio ju̧i̧. Ütama̧i̧padäräa̧mȩrȩ nö̧ria̧ oaiä, jabechji̧ ji̧dë u̧i̧ ba chia darëremȩdejȩ. Ja̧di tara chjibo chjacjiamȩ tjamo̧ oa yürürëremȩdejȩ pio ju̧i̧mo̧i̧, o ji̧ri̧dë. 4Ado jibëa̧ pumȩ judiro̧ chjibo pio ju̧i̧ chjiari ta̧rëji̧ri̧pea̧rä, ‘Aja̧, ibëa̧ ama̧i̧ judi pio ibëiä ji̧dë u̧i̧ eadiji̧da’ quëna̧ jo̧rȩtaji̧ri̧pea̧rä, jabechji̧ ea tjamo̧dëpe bagarëreji̧ri̧diro̧jo̧ȩ joji̧ri̧ja pio ju̧i̧. Ado pio ju̧i̧iä Joche pio ju̧i̧ chjadëri̧ jearërea̧ ji̧, jeadëji̧ri̧pea̧diro̧jo̧ȩ.

5Ado cja̧rȩmo̧ doremȩrä, Joche judi canȩjä mo̧a̧rëremȩrȩ chjö̧na̧i̧ oa yo̧rëremȩdejȩrȩ jibëa̧ oti̧ ji̧ri̧. Ado pio ju̧i̧ ta̧rëa̧ oaiä, ji̧dë u̧i̧ eadëpe baga̧diro̧jo̧ȩ. 6Ja̧di ta̧rëri̧ yo̧mȩrȩ yo̧rëremȩdejȩrȩ:

—Chjadëri̧ ta̧rëchji̧coe ca̧ pumȩ. Jabechji̧ cüdë canȩjäa̧ pio ju̧i̧ ni̧bä chjaotämi̧ cjiarequededibe. 7Danȩrȩ, a̧ro̧rȩ ütëborë tjadoräpȩ ju̧ri̧ ja̧beparëreji̧ri̧dirȩ. Ado a̧ro̧rȩ trigo to oa budo ëte, yurareji̧ri̧rea̧ro̧jo̧ȩ tirigo cho to oa. Oti̧ nö̧tarë yurareji̧ri̧rea̧rȩ. Aja̧, ja̧di cjia ja̧di cjia mo̧a̧remȩrequede. Ado cüdë yura̧ üdë cjitëa̧rämi̧ cjiaremȩrequede. Ado mȩnȩro̧ yura̧ üdë peaja̧di cjitëa̧rämi̧ cjiaremȩrequede chjö̧na̧i̧rȩ. Ado cüdë yura̧ pio ju̧i̧ tjoro tänȩa̧rämi̧ cjiaremȩrequejȩrȩ. Ado ja̧dëa̧ ji̧ juchatura̧ tjätjäpë china̧mi̧ dari̧ japea̧diro̧jo̧ȩ cüdë yura̧ pio ju̧i̧. Aja̧, ja̧di dari̧ ja̧di cjia ja̧di cjia mo̧a̧remȩrequede —yo̧mȩrȩ ni̧bä chjaorëremȩdejȩrȩ jibëa̧ oti̧ ji̧ri̧ Joche judi.

8Ado Joche ja̧ pumȩ judiro̧ pio ju̧i̧ ta̧rëa̧ oaiä iëno̧ë ta̧rëa̧diro̧jo̧ȩ:

—¿Jabo yö̧ta jo̧rȩtamȩrȩ ni̧bä chjaorenȩibe? ‘Ca̧ pumȩ pio ji̧ri̧ ja̧ ütëpaquëda, ca̧ oti̧ pio ji̧ri̧ boadärämi̧ dari̧ japaemȩ jiroquiji̧ri̧da' ¿quëna̧ jo̧rȩtadënȩ? —yo̧ji̧ri̧rȩ iëno̧ë ta̧rërëreji̧ri̧diro̧jo̧ȩ jibëa̧ omȩ ju̧i̧.

Ado jibëa̧ ayi̧ma̧i̧ judi ja̧di dari̧ ni̧bä chjaoa̧ oaiä, jënȩ canȩjäa̧ pio ju̧i̧ ni̧bä chjaoa̧ oaiä, jabechji̧ ji̧dë u̧i̧ eadëpe bagurarëreji̧ri̧diro̧jo̧ȩ. Ji̧dë u̧i̧ ërecjiapea̧diro̧jo̧ȩ. Jabechji̧ ma̧i̧ dari̧ ni̧bä chjaomȩ oa, eadëji̧ri̧pea̧diro̧jo̧ȩ.

9Ado japamitë chjätä ëte Joche judi ado canȩjärëremȩde. Ado judi canȩjäa̧ pio ju̧i̧ peaja̧di ni̧bä chjaorëremȩdejȩrȩ jibëa̧ oti̧ ji̧ri̧. Ja̧di ta̧rëri̧ yo̧mȩrȩ ni̧bä chjaorëremȩdejȩrȩ:

—Danȩrȩ, ta̧rëchji̧coe ca̧ pumȩ. Cüdë canȩjäa̧ pio ju̧i̧ ni̧bä chjaotämi̧ cjiarequededibe ado chjereno̧. Danȩrȩ, do oa, gupënȩ oa, büë oa ja̧di cjia ja̧di cjia mo̧a̧remȩrequede. Aja̧, 11 büë oa darämi̧ cjiaremȩrequede. Ado pio coaiäpȩmo̧ juchatura̧ tjätjäpë china̧mi̧ dari̧ japea̧ maeadiro̧coe ütëmi̧ da oa. Aja̧, ja̧di cjia ja̧di cjia mo̧a̧remȩrequede cüdë —yo̧mȩrȩ ni̧bä chjaorëremȩdejȩrȩ ado.

10Ado Joche judi jënȩ canȩjäa̧ pio ju̧i̧ ni̧bä chjaorëremȩdejȩ jibëa̧ ama̧i̧ ju̧i̧ peaja̧di. Jabo jibëa̧ ama̧i̧ judi pio ju̧i̧ ta̧rëa̧ oaiä, to̧bari̧ yo̧mȩrȩ yo̧a̧dejȩ:

—Jabo cjäri̧ marenȩ. ¿Tjana̧ japacjivarenȩ? ¿Yö̧ta dari̧ jo̧rȩtacjivarenȩ? ‘Ca̧ ama̧i̧ judi, coa arayi̧borë, ca̧ pumȩ pio judiro̧borë ütëmi̧ dari̧ japapadiro̧coada, jibëa̧ daito oa daburäpȩ yuro juchatura̧ tjätjäpë china̧däräpadiro̧coada’ ¿quëna̧ jo̧rȩtanȩ mȩnȩ? —yo̧mȩrȩ yo̧rëremȩdejȩ joja oa Jacobo judi.

11Ado pio ju̧i̧iä Joche ja̧ ayima̧i̧ judiro̧, jabechji̧ ërecjia tjamo̧rëreji̧ri̧diro̧jo̧ȩ jibëa̧ omȩ oa. Quëbaji̧ri̧rȩ jo̧rȩtarëreji̧ri̧diro̧jo̧ȩ. Jabo jäja pio judi canȩjäa̧ pio ju̧i̧ chjiari ta̧rëa̧ oaiä, jabechji̧ ana̧ri̧ jo̧rȩtamȩpea̧de. ‘Aja̧, ca̧ ja judi ja̧di dari̧ canȩjäa̧dida, a̧ro̧rȩ ja̧di dari̧ japabëmi̧ canȩjäa̧ jirodida, a̧ro̧rȩ pio ju̧i̧ idëgua china̧däräbëmi̧ canejäremȩ jirodida’ quëna̧ jo̧rȩtamȩpea̧de Jacobo judi, ana̧ tjamo̧ri̧ jo̧rȩtamȩrȩ.

Joche ja̧ pumȩ judiro̧ gatë tänȩrëreji̧ri̧diro̧jo̧ȩ tjaoëriji̧ri̧ pio ji̧ri̧

12Ado cja̧rȩmo̧ doremȩrä Joche ja̧ oti̧ pio judiro̧ ma̧ȩ järëreji̧ri̧diro̧jo̧ȩ oveja oa Chiquema quȩmȩräpȩ cärä chjadë oa jura tänȩpea̧ oa. 13Ado jibëa̧ ama̧i̧ judi, Icharai quȩmȩpea̧ pio judi, yo̧rëremȩdejȩ Joche ju̧i̧:

—Danȩ, na̧ pumȩ judiro̧ Chiquemaräpȩdirȩ. Pio ju̧ri̧pȩ ano̧ mire jidadiro̧jo̧ȩ oveja buba oa. Pio ji̧ri̧ goëde jätä earequedemȩ —yo̧a̧dejȩ.

Ado Joche judi:

—Aja̧, goëdeparequedejȩrȩ.

14Ado yo̧a̧dejȩ jäja judi:

—Aja̧, goëde jäjȩrȩ. Ado mȩnȩ ma̧na̧rä, pio mȩaiä ta̧rëparequede na̧ pumȩ pio ji̧ri̧ chjiari, oveja pio ji̧ri̧ chjiari —yo̧mȩrȩ chjadürëremȩdejȩ Joche ju̧i̧ Icharai judi.

Ado jäjarë yo̧a̧mi̧ järëremȩde Joche judi. Eboro̧ quȩmȩ chiriri pio judiri go̧dümȩrȩ järëremȩde. Ado japamitë chjätä ëte go̧düdärärëremȩde Chiquema̧ quȩmȩräpȩ. 15Ado ju̧ri̧pȩ dabadëtämȩmi̧ dari̧ chjätäti̧ cjiamȩpea̧de. Ado pumȩ judi Joche pio ju̧i̧ dëbëdiämȩrȩ iëno̧ë ta̧rëa̧dejȩ:

—¿Jabo tjana̧ na̧nȩ?

16Ado Joche judi:

—Tjana̧ na̧dë, jabechji̧ ca̧ pumȩ pio ji̧ri̧ na̧tarequedejȩrȩ. Jibëa̧ oveja buba oa jidadirȩ. Pio ji̧ri̧ chjiari ¿dabadënȩ? —iëno̧ë ta̧rëa̧dejȩ Joche judi.

17Ado pumȩ judi:

—Aja̧, pio yireji̧ri̧dirȩ jabo baäa̧dirȩ —yo̧a̧—. "Dota̧ quȩmȩräpȩ baäpavedirȩ" yo̧a̧ oa ta̧rëa̧requede —yo̧a̧dejȩ.

Ado pio ju̧i̧ ta̧rëa̧ oaiä, Dota̧ quȩmȩräpȩ järëremȩde Joche judi. Ado ju̧ri̧pȩ dadärärëremȩdejȩrȩ jibëa̧ pumȩ ji̧ri̧. 18Jabo Joche ja̧ pumȩ judiro̧ jibëa̧ durimȩ pio ju̧i̧ jabë jachirä daea̧ ji̧, pio ju̧i̧ ja̧bo tänȩpea̧ ji̧ järi tjamo̧ji̧ri̧rȩ ni̧bä chjaoji̧ri̧pea̧dirȩ. 19Ado jibëa̧ dëbëti̧ra̧ chia yo̧a̧dirȩ:

—Danȩrȩ, jana̧diibe canȩjä chjaomȩ judi. 20Goë jaeibe. Ja̧bo tänȩtäro̧jo̧ȩ. Jibëa̧ icjararemȩ oa aeno̧parea̧ro̧jo̧ȩ tade puë garäpȩ. Ado ibëa̧ ama̧i̧ ju̧i̧: "Aja̧, chirirä cjo̧ro̧mȩ chjuamȩrȩ jura̧ jirodejȩ" yo̧parea̧ro̧jo̧ȩ. Ado a̧ro̧rȩ ja̧di dari̧ japarä judi, badëri̧ cjiadiämi̧ dari̧ cjiadiäpade davä jënȩ canȩjäa̧ pio judi. Jaeibe. Japatärȩ —yo̧ji̧ri̧rȩ ni̧bä chjaorëreji̧ri̧dirȩ Joche ja oti̧ pio judiro̧ jibëa̧ dëbëti̧ra̧ chia.

21Jabo Rubȩ judi, "ja̧di dari̧ japaparea̧ro̧jo̧ȩ ibëa̧ ayi̧ma̧i̧ ju̧i̧" yo̧a̧ oa ta̧rëa̧ oaiä, ‘jabo cjäri̧ madida, ja̧di dari̧ japarea̧mi̧dëdida, Joche ju̧i̧ a̧dopea̧ chiacuni̧da’ quëna̧ jo̧rȩtamȩpea̧de. Ja̧dëa̧ ji̧ yo̧a̧dejȩ jibëa̧ oti̧ ji̧ri̧:

—Danȩrȩ ca̧ oti̧, ja̧bo tänȩdëtäro̧jo̧ȩ. 22Goe chiari̧ japadëtäreji̧ri̧rea̧ro̧jo̧ȩ, jabo jabechji̧ puëräpȩ aeno̧täro̧jo̧ȩ chiri tjoräpȩ ju̧ri̧. Ado ja̧di dari̧ japea̧ oaiä, jabechji̧ jibëa̧ ma̧na̧ri̧ ja̧bopade pio a̧ro̧rȩ gu̧na̧dëa̧ oa —yo̧mȩrȩ yo̧rëremȩdejȩrȩ jibëa̧ oti̧ ji̧ri̧ Rubȩ judi.

Aja̧, ja̧di ta̧rëri̧ yo̧mȩrȩ yo̧rëremȩdejȩrȩ Rubȩ judi jibëa̧ oti̧ ji̧ri̧ pio ji̧ri̧iäpȩmo̧. Jabechji̧ tjamo̧ri̧ a̧dotämi̧ cjiarëremȩdejȩ jibëa̧ omȩ oa. ‘Aja̧, ji̧dë duri oa puëri pio judiri go̧dü tänȩpacuni̧da, ado chjereno̧ jäjarë cjo̧ro̧mȩräpȩ baä tänȩpacuni̧da’ quëna̧ jo̧rȩtamȩrȩ yo̧a̧dejȩrȩ.

23Ado ja̧dëa̧ ji̧ Joche judi jibëa̧ oti̧ pio ji̧ri̧iäpȩ go̧düdäräa̧mȩ oa, acji mitëa̧diro̧jo̧ȩ. Ado jibëa̧ chjibo chjacjiamȩ tjamo̧ oa chjaodëri̧ bae cjoëa̧diro̧jo̧ȩ. 24Ado pio ju̧i̧ mitëji̧ri̧rȩ aeno̧a̧diro̧jo̧ȩ tade puë garäpȩ. 25Ado puërämȩ oa a̧dë järëreji̧ri̧diro̧jo̧ȩ jurapea̧ oa.

Ado judiro̧ jurë cha̧ nö̧ta chjaodëri̧ darëreji̧ri̧diro̧jȩrȩ chirirä tai̧ji̧ri̧ pio ji̧ri̧, cameyo maeara̧ tai̧ji̧ri̧ pio ji̧ri̧. Aja̧, Ichamae pio judiri ja̧ji̧ri̧ pio ji̧ri̧, Gara quȩmȩ chiriri pio judiri jana̧ji̧ri̧ pio ji̧ri̧ darëreji̧ri̧diro̧jȩrȩ. Ado judiro̧ Ejitoräpȩmo̧ chia järëreji̧ri̧dirȩ jibëa̧ oa gatë tänȩpea̧ oa. Goaeri̧ pjȩa̧ joarea̧ pio ju̧i̧, bachamo̧ quȩmȩ chjaparȩrea̧ pio ju̧i̧, mira quȩmȩ gi̧därea̧ pio ju̧i̧ gatë tänȩpea̧ oa chia järëreji̧ri̧dirȩ Ejitoräpȩ. 26Ja̧dëa ji̧ Juda quȩmȩ pio judi yo̧mȩrȩ yo̧a̧dejȩrȩ jibëa̧ oti̧ ji̧ri̧:

—Danȩrȩ ca̧ oti̧, ja̧bo tänȩdëtäreji̧ri̧rea̧ro̧jo̧ȩ ibëa̧ omȩ oa. Jabechji̧ a̧ro̧rȩ ja̧di dari̧ japarä judi ji̧dë ma goadiparea̧rȩ. Goaepa ma̧ ja̧didë. 27Ado pio ju̧i̧iä jabechji̧, Ichamae pio judiri ja̧ji̧ri̧ pio ji̧ri̧iäpȩmo̧ gatë tänȩtäreji̧ri̧rea̧ro̧jo̧ȩ. Ibëa̧ omȩ tara, jabechji̧ tjamo̧ri̧ ja̧bo tänȩdëtäreji̧ri̧rea̧ro̧jo̧ȩ —yo̧a̧dejȩrȩ.

Ado Juda ja̧ oti̧ judiro̧ pio ju̧i̧ ta̧rëa̧ oaiä, ‘Aja̧, jabechji̧dida, ja̧di dari̧ japatäreji̧ri̧a̧ro̧ju̧i̧da’ quëna̧ jo̧rȩtaji̧ri̧rȩ ta̧rë ja̧boa̧diro̧jo̧ȩ. 28Ado ja̧dëa ji̧ Ichamae pio judiri ja̧ji̧ri̧ judiro̧ queri̧räpȩ chjätärërea̧ ji̧, gatë tänȩji̧ri̧ pio judiro̧, Media quȩmȩ chiriräpȩ cjo̧ro̧ji̧ri̧ pio judiro̧ quȩri̧räpȩ chjätäa̧ ji̧, jabechji̧ Joche ja̧ oti̧ pio judiro̧ puëri judiri chjaodëri̧ go̧dü tänȩno̧a̧diro̧jo̧ȩ. Ado gatë tänȩa̧diro̧jo̧ȩ Ejitoräpȩ jäpaji̧ri̧ pio ji̧ri̧. Aja̧, puëri pio judiri go̧dü tänȩ ëte, jabechji̧ 20 chërerä gatë tänȩrëreji̧ri̧diro̧jo̧ȩ. Ado gatë tänȩ ëte, jabechji̧ Ichamae pio judiri ja̧ji̧ri̧ pio judiro̧ ëba baärëreji̧ri̧diro̧jo̧ȩ Joche ju̧i̧ Ejito quȩmȩ chiriräpȩmo̧.

29Ado Rubȩ judi chiri oa tai̧rëremȩrȩ ma̧na̧ ji̧, jäeno̧a̧dejȩ puëräpȩ Joche pio ju̧i̧ a̧dopea̧ oa. Jabo cjäri̧ madejȩ, dadëa̧dejȩ. Ado pio ju̧i̧ dadëa̧ oaiä mu̧i̧ quirarëremȩdejȩ jibëa̧ chjibo oa, gito ana̧ri̧ jo̧rȩtamȩpea̧mȩrȩ. 30Ado jäa̧dejȩrȩ jibëa̧ oti̧ ji̧ri̧iäpȩ. Ado yo̧a̧dejȩrȩ:

—Danȩrȩ, ibëa̧ ayi̧ma̧i̧ judi puëräpȩdëde. ¿Tjana̧ japapea̧de yaba̧? Cjäri̧ marequede, a̧dorea̧ dadërequede yaba̧ —yo̧mȩrȩ yo̧rëremȩdejȩrȩ jibëa̧ oti̧ ji̧ri̧, jibëa̧ ayi̧ma̧i̧ pio ju̧i̧ tjamo̧ri̧ baä tänȩtämi̧ cjiaremȩrȩ.

31Ja̧dëa̧ ji̧ Joche ja̧ oti̧ judiro̧ ja̧bo tänȩa̧diro̧jo̧ȩ chivo oa. Ado ju̧i̧ ja̧ goerä chuda̧diro̧jo̧ȩ Joche ja̧ chjiboremȩ pio ju̧i̧. 32Ado ja̧di dari̧ japa ëte chjadüa̧diro̧jo̧ȩ chjibo oa jibëa̧ ama̧i̧ ju̧i̧. Ma̧ȩ chjadüa̧diro̧jo̧ȩ peaja̧di. "Pio yoa chjibo oa dadäräa̧rea̧ro̧jo̧ȩ chiriräpȩ a̧rȩmȩ oa. Chjadëri̧ daba davä. 'Na̧ ja ja̧ chjiboremȩ pio judidida' quëna̧pea̧ oa chjadëri̧ daba dajo̧ȩ." Aja̧, ja̧di ta̧rëri̧ ma̧ȩ chjadürëreji̧ri̧diro̧jo̧ȩ jäja pio ju̧i̧iäpȩmo̧.

33Ado Jacobo judi chjibo oa daea̧ ji̧, ‘Aja̧ davä, ca̧ ja ja̧ chjiboremȩ pio judidida, chirirä cjo̧ro̧mȩ chjuamȩ pio judi ja̧bo tänȩa̧ jirodiji̧da, jibëa̧ go̧a̧rȩ cjiadiädëri̧ jura̧ jirodiji̧da’ quëna̧ jo̧rȩtamȩrȩ yo̧rëremȩde. 34Ado ja̧dëa̧ ji̧ Jacobo judi a̧dë chjäte gito ana̧ri̧ jo̧rȩtamȩrȩ mu̧i̧ quirarëremȩdejȩ jibëa̧ chjibo oa, jënȩ ina̧ pio ju̧i̧. Ado ano̧ mire ina̧dejȩ cö̧ chiamȩ chjibo oa, töcari̧ japamȩ chjibo oa. Ja̧di dari̧ japarëremȩde jënȩ gitori̧ jo̧rȩta̧ pio ju̧i̧iä. ‘Jabechji̧ Joche judi ja̧boa̧dida’ quëna̧ pio ju̧i̧iä ejaro cjiamȩrȩ cjo̧ro̧rëremȩde japamitë ana̧. 35Ado jibëa̧ u̧ri̧ judiro̧ chjö̧na̧i̧rȩ a̧dotarëreji̧ri̧diro̧jo̧ȩ. Oari judiro̧, ivi jini̧ro̧borë a̧dotarëreji̧ri̧diro̧jo̧ȩ, jabo cjäri̧ madiro̧jo̧ȩ, cjatäcjie jo̧rȩta tänȩrea̧ dadëa̧diro̧jo̧ȩ. Jabechji̧ cjatäcjie jo̧rȩtadëri̧ cjiamȩrȩ ta̧rë ja̧bodëa̧dejȩrȩ. Ado pio jȩa a̧dotämi̧ cjiaji̧ri̧ pio ji̧ri̧ ja̧di ta̧rëri̧ yo̧rëremȩdejȩrȩ:

—Jabechji̧ ji̧dë ma gitori̧ jo̧rȩtamȩrȩ cjo̧ro̧parequede cüdë ja̧boa̧rä yuro. Ado ja̧dëa ji̧ cüdë ja̧boa̧rä, ja̧boa̧ji̧ri̧ pio ji̧ri̧iäpȩ go̧düdäräa̧rä, jabechji̧ ado chjereno̧ dadäräpareconȩ ca̧ jarea̧ pio ju̧i̧ —yo̧mȩrȩ yo̧rëremȩdejȩrȩ Jacobo judi, ana̧ri̧ ejaro cjiamȩrȩ.

36Ado Jacobo judi ana̧ri̧ jo̧rȩtamȩrȩ cjo̧ro̧a̧ nö̧ta Joche pio ju̧i̧ gatëa̧ji̧ri̧ pio judiro̧ chjadëri̧ go̧düdärärëreji̧ri̧dirȩ Ejitoräpȩ. Tjamo̧ davä. Mediaräpȩ cjo̧ro̧ji̧ri̧ pio judiro̧ chjadëri̧ go̧düdäräa̧dirȩ Ejito quȩmȩ chiriräpȩ yuro. Ado Joche pio ju̧i̧ gatë tänȩrëreji̧ri̧diro̧jo̧ȩ Potipja quȩmȩ ju̧i̧, guadia ütë pio ju̧i̧. Ado Potipja judi, jabechji̧ pjarao̧ pio ju̧i̧ ja̧ oa ja̧bepamȩrȩ cjo̧ro̧rëremȩde, Ejitoräpȩ cjo̧ro̧mȩ ütë pio ju̧i̧ ja̧ oa.

Currently Selected:

Taruparea̧ Ma̧ȩ 37: Pume

Highlight

Copy