Taruparea̧ Ma̧ȩ 35

Jacobo judi baärëremȩde Bete quȩmȩräpȩ

1Ado japamitë chjätä ëte Ütë tjamo̧ judi yo̧rëremȩdejȩ Jacobo ju̧i̧:

—Cjitëvä. Ado Bete quȩmȩräpȩ baätä earequedemȩ. Pio ju̧ri̧pȩ ano̧ mire cjo̧ro̧tä earequedemȩ. Ado mȩnȩ idëpȩ go̧düdärä ëte, jabechji̧ gu̧na̧rea̧ mechja oa cji̧dätä earequedemȩ. Jabechji̧ pio mȩa na̧rȩrëremȩ Ütë pio ju̧i̧ ba chia jo̧rȩtapea̧ oa, gu̧na̧rea̧ mechja oa japatä earequedemȩ. Aja̧, mȩnȩ goadi a̧dë baämȩ oa na̧rȩrëremȩ Ütë pio ju̧i̧iäpȩmo̧ ba chia jo̧rȩtapea̧ oa, na̧ omȩ Echau pio ju̧i̧ uapamȩrȩ goadi a̧dë baäa̧mȩ oa na̧rȩrëremȩ Ütë pio ju̧i̧iäpȩmo̧ ba chia jo̧rȩtapea̧ oa, jabechji̧ gu̧na̧rea̧ mechja oa cji̧dätä earequedemȩ —yo̧mȩrȩ yo̧rëremȩdejȩ Jacobo ju̧i̧ Ütë tjamo̧ judi.

2Ado pio ju̧i̧ ta̧rëa̧ oaiä Jacobo judi yo̧rëremȩdejȩrȩ jibëa̧ pumȩ ji̧ri̧, pio jȩa nö̧ta cjo̧ro̧ji̧ri̧ pio ji̧ri̧:

—Danȩrȩ, teracaba ütë chjö̧na̧i̧ oa aeno̧chji̧vä. Jabechji̧ pumȩrȩ jëdano̧a̧ ütë oa, jibëa̧ ichira̧ jëdano̧a̧ ütë oa, mȩnȩro̧ boea̧ ütë oa aeno̧chji̧vä chjö̧na̧i̧ oa. Ado pio ju̧i̧ uëri ui choachji̧vä. Ado joa̧ oa cjiamȩ chjibora̧ pio ju̧ri̧ra̧ ano̧ mire ina̧chji̧vä. 3Danȩrȩ, pio yaba̧ baäparea̧rȩ Bete quȩmȩräpȩ. Ado pio ju̧ri̧pȩ gu̧na̧rea̧ mechja oa cji̧däparequede. Jabechji̧ cüdë bücjüri̧ cjia tjamo̧mȩ oa A̧dorëremȩ pio ju̧i̧ jo̧rȩtapea̧ oa, cüdë uapa tjamo̧mȩ oa A̧dorëremȩ pio ju̧i̧ jo̧rȩtapea̧ oa cji̧däparequede. Aja̧, cüdë oëra̧ti̧ oa chjätäti̧ cjiamȩ oa Ëba cjiarëremȩ pio ju̧i̧ ba chia jo̧rȩtapea̧ oa gu̧na̧rea̧ mechja oa cji̧däpareconȩ. Pio ju̧i̧iä yo̧requededibe. Chjadëri̧ jëdano̧chji̧vä —yo̧mȩrȩ yo̧rëremȩdejȩrȩ jibëa̧ pumȩ ji̧ri̧ Jacobo judi.

4Ado pio ju̧i̧ ta̧rëa̧ oaiä, jibëa̧ ütë teracaba oa a̧dopeno̧ ëte yürürëreji̧ri̧diro̧jo̧ȩ Jacobo pio ju̧i̧. Ta̧ra̧ märärea̧bo yürüa̧diro̧jo̧ȩ. Ado ja̧dëa ji̧ chjö̧na̧i̧ oa na̧ra̧rëremȩde Jacobo judi Chequemȩ bë ma̧ri̧ quȩriräpȩ cjiamȩ to yuroro. 5Ado ja̧di dari̧ japa ëte go̧dürëreji̧ri̧dirȩ Bete quȩmȩräpȩ baäpaji̧ri̧rȩ. Ado pio jiro chiriräpȩ bë ma̧ri̧rä cjo̧ro̧ji̧ri̧ pumȩ pio judiro̧ Jacobo ja̧ pumȩ pio ji̧ri̧ acji jädärätärea̧ ji̧, jabechji̧ acji jädärärea̧ dadëa̧diro̧jȩrȩ. Jabechji̧ Ütë tjamo̧ pio judi uaparea̧ yürüa̧ oaiä, acji jädärärea̧ dadërëreji̧ri̧diro̧jȩrȩ. 6Ado Jacobo judi, pio jȩa nö̧ta ëba baäa̧ji̧ri̧borë chjadëri̧ go̧düdärärëreji̧ri̧dirȩ Bete quȩmȩ bë ma̧ri̧räpȩ. Ado Bete quȩmȩ bë ma̧ri̧ üdë peaja̧di Uche quȩmȩde. Chjara quȩ chiade. Ado pio jiro bë ma̧ri̧ üdë, jabechji̧ Canaa̧ quȩmȩ chiriräpȩde. 7Ado ju̧ri̧pȩ gu̧na̧rea̧ mechja oa cji̧därëremȩde Jacobo judi Ütë tjamo̧ pio ju̧i̧iäpȩmo̧ chjacjiamȩri̧ jo̧rȩtapea̧ oa. Ado pio jiroräpȩ ano̧ mire quȩparëremȩdejȩ. Aja̧, Ere Bete quȩra̧ pio ju̧ri̧ra̧ ano̧ mire quȩpea̧dejȩ. Jabechji̧ Ütërë jȩa na̧rȩrërea̧räpȩ pio ju̧ri̧, ja̧ omȩ pio ju̧i̧ uapamȩrȩ a̧dë baämȩ oa na̧rȩrërea̧räpȩ pio ju̧ri̧ ano̧ mire quȩpea̧dejȩ. Aja̧, "Beteräpȩ cjiamȩ Ütë" yo̧mȩ quȩra̧ pio ju̧ri̧ra̧ ano̧ mire quȩparëremȩdejȩ. 8Ado pio ju̧ri̧pȩ a̧dë ja̧borëreyi̧nȩjȩrȩ Debora quȩyi̧ jini̧, Rebeca ji̧ chjadëri̧ jidareyi̧ pio jini̧. Ado na̧ra̧diro̧jȩ torë cjiamȩräpȩ, Bete bë mari̧ dairäpȩ ju̧ri̧. Ado na̧ra̧rea̧räpȩ quȩparëreji̧ri̧diro̧jo̧ȩ. Aja̧, "Ejaro cjiarea̧ to" yo̧mȩ quȩra̧ pio ju̧ri̧ra̧ quȩparëreji̧ri̧diro̧jo̧ȩ.

Ütë tjamo̧ judi ano̧ mire quȩparëremȩdejȩ Jacobo ju̧i̧

9Ado Jacobo judi Padanarama quȩmȩ chiriri pio judiri cuchupë ma̧na̧mȩ oa, jabechji̧ Ütë tjamo̧ judi ado chjereno̧ na̧rȩrëremȩdejȩ Beteräpȩ. Aja̧, Jacobo ju̧i̧ na̧rȩmȩrȩ chjadëri̧ cjo̧ro̧pea̧ ma̧ȩ oa yürürëremȩdejȩ, jënȩ chjadëri̧ cjo̧ro̧rea̧mi̧ dari̧. 10Ja̧di ta̧rëri̧ yo̧rëremȩdejȩ:

—Aja̧, Jacobo quȩmȩrenȩ. Jabo yaba̧ Jacobo quȩmȩdërenȩ jabo Icharai quȩmȩrenȩ. Pio yaba̧ domȩri ja̧ Icharai quȩmȩrenȩ bucho ana̧ —yo̧mȩrȩ yo̧rëremȩdejȩ Ütë tjamo̧ judi Jacobo pio ju̧i̧iäpȩmo̧, jënȩ no̧mȩri ja̧ yo̧rërea̧mi̧.

Ado Ütë tjamo̧ judi Jacobo ju̧i̧ ano̧ mire quȩpa ëte, 11ja̧di ta̧rëri̧ yo̧rëremȩdejȩ ado:

—Danȩ, a̧dë chjäte jauëchjamȩ Ütë pio judirequede. Ado pio ju̧i̧iä yo̧requedemȩ. Jabechji̧ goëje ji̧ra̧ tjamo̧pe bagarea̧mi̧ dari̧ bori̧ ji̧ra̧ tjamo̧ oa nö̧rivä. Ado danȩ, na̧ea̧ri ja̧ji̧ri̧ pio judiro̧borë jibëa̧ bori̧ no̧i̧dë tjamo̧ oa nö̧ripadiro̧jȩrȩ. Jabechji̧ pumȩ no̧i̧dë tjamo̧ji̧ri̧rȩ cjo̧ro̧padirȩ chiriräpȩti̧ oa cjo̧ro̧ji̧ri̧pe bagarea̧mi̧ dari̧. Ado tjamo̧ yo̧ji̧ri̧rȩ cjo̧ro̧padirȩ o judiro̧. Chiri ütëji̧ri̧rȩ cjo̧ro̧padirȩ. 12Ado cüdë Abaraa̧ pio ju̧i̧ yürürërea̧ chiri oa, cüdë Icha pio ju̧i̧ yürürërea̧ chiri oa yürürequedemȩ peaja̧di. Ado na̧ea̧ri ja̧ji̧ri̧ pio ji̧ri̧bo yürürequedejȩrȩ —yo̧mȩrȩ yo̧rëremȩdejȩ Jacobo ju̧i̧ Ütë tjamo̧ judi.

13Ja̧dëa ji̧ Ütë tjamo̧ judi Jacobo pio ju̧i̧ nö̧ta ni̧bäa̧ duri oa a̧dë baärëremȩdejȩ. 14Ado Jacobo judi, a̧dë cjiadiäa̧mȩrȩ mitërëremȩdejȩ ta̧dë jujua oa. Ado uëräpȩmo̧ cjiari̧ arë cji̧därëremȩdejȩ Ütërë pio jȩa ni̧bäa̧rea̧räpȩ ju̧ri̧. Ado yo̧ra̧ pio ju̧ri̧ra̧ arë cjaräa̧dejȩ. Bino quȩmȩ ërüra̧bo a̧de arë cjaräa̧dejȩ. Ado ja̧di dari̧ japamȩrȩ china̧chjari̧ tutirëremȩdejȩ ta̧dë oa Ütë tjamo̧ ja̧ oa. 15Ado pio ju̧ri̧pȩ Ütërë pio jȩa ni̧bäa̧ tara, jabechji̧ Bete quȩra̧ pio ju̧ri̧ra̧ quȩparëremȩdejȩ.

Raque jini̧ a̧dë ja̧boa̧nȩjȩ Jacobo ju̧i̧

16Jacobo judi Bete quȩmȩ bë ma̧ri̧ri pio judiri baärëremȩde. Jibëa̧ pumȩ pio ji̧ri̧ nö̧ta baäa̧de. Ado Epjata quȩmȩräpȩ jabë go̧düdärädëa̧rä, ararëreyi̧nȩ Raque jini̧ boi̧chji̧ oa. Üi̧ boi̧ oa ara̧nȩjȩ. Gito ana̧ri̧ tarayi̧rȩ ara̧nȩjȩ. 17Ado jȩa a̧doyi̧ pio jini̧ ana̧ tjamo̧ri̧ tarayi̧ pio ji̧iiäpȩmo̧ yo̧a̧nȩjȩ:

—Damȩ, uapadëje. Jabechji̧ üi̧ boi̧ ara̧mȩ —yo̧a̧nȩjȩ.

18Jabo cjäri̧ manȩ, Raque jini̧ ja̧bopea̧ querediä tjamo̧rëreyi̧nȩ. Ado jȩoadëpe bagayi̧rȩ quȩparëreyi̧nȩjȩ joja oa. Benoni quȩra̧ pio ju̧ri̧ra̧ quȩparëreyi̧nȩjȩ. Jabo Jacobo judi ado cja̧rȩmo̧ quȩra̧ a̧dë quȩpea̧dejȩ. Jabechji̧ Bejami̧ quȩra̧ pio ju̧ri̧ra̧ ano̧ mire quȩpea̧dejȩ.

19Aja̧, Raque jini̧ ja̧borëreyi̧nȩ. Ado Epjata quȩmȩräpȩ järea̧ no̧ yuroro na̧ra̧rëreji̧ri̧diro̧jȩ. Ado Epjata bë ma̧ri̧ üdë, jabechji̧ Berȩ quȩmȩde yaba̧. Ano̧ mire quȩpea̧diro̧jo̧ȩ. 20Ado Raquerea̧ ji̧ na̧ra̧rea̧räpȩ chjadëri̧ na̧rȩpea̧ oa, jabechji̧ arë cji̧därëremȩdejȩ ta̧dë oa pjatë puëräpȩ ju̧ri̧. Jabechji̧ pio ju̧ri̧pȩ cjiade yaba̧. ‘Aja̧, Raquerea̧ jini̧ pio yi na̧ra̧ oa cjiani̧da’ quëna̧ tänȩpea̧ oa cji̧däa̧ oa cjiade na̧rȩrea̧ ta̧dë üdë.

21Ado Icharai judi, Jacobo quȩmȩrëremȩ pio judi ji̧dë u̧i̧ jachi oa baärëremȩde jibëa̧ iei̧rea̧ pio ji̧ na̧ra̧ duri oa. Ado Edara quȩmȩ bë queri̧räpȩ ju̧ri̧ go̧düdärä ëte, uë tjamo̧ cjiamȩ bë oëräpȩ ju̧ri̧ go̧düdärä ëte, jabechji̧ bëpeno̧rëremȩde jibëa̧ pumȩ pio ji̧ri̧ nö̧ta. 22Ado judiro̧ pio ju̧ri̧pȩ cjo̧ro̧a̧ nö̧ta, Rubȩ judi bae ëba mo̧a̧rëremȩdejȩ jibëa̧ ama̧i̧ ja̧ iei̧ pio ji̧, Bija quȩyi̧ pio ji̧. Ado Jacobo judi pio ju̧i̧ chjiari goë ta̧rëa̧ oaiä ërecjia tjamo̧pe bagarëremȩdejȩ joja oa.

Jacobo ja̧ u̧ri̧ judiro̧ ji̧ra̧rëreji̧ri̧dirȩ

Jacobo ja̧ u̧ri̧ judiro̧ 12dirȩ. 23Ado Dea jini̧ ara̧ judiro̧ ja̧di quȩji̧ri̧dirȩ: Cja̧rȩmȩrȩ Rubȩ quȩmȩde. Ado cja̧rȩmo̧rȩ Chimeo̧ quȩmȩde. Ado cja̧rȩmo̧rȩ Devi quȩmȩde. Ado cja̧rȩmo̧rȩ Juda quȩmȩde. Ado cja̧rȩmo̧rȩ Ichaca quȩmȩde. Ado cja̧rȩmo̧rȩ Chaburo̧ quȩmȩde. Aja̧, pio judiro̧dirȩ Dea jini̧ ara̧ pio judiro̧. Ado yabomȩ judi Rubȩ pio judide. 24Ado Raque jini̧ ara̧ judiro̧ ja̧di quȩji̧ri̧dirȩ: Cja̧rȩmȩrȩ Joche quȩmȩde. Ado cja̧rȩmo̧rȩ Bejami̧ quȩmȩde. Pio judiro̧mo̧i̧dirȩ. 25Ado Bija jini̧, Raque ja̧ mu̧i̧tjoi̧ jini̧ ara̧ pio judiro̧, ja̧di quȩji̧ri̧dirȩ. Cja̧rȩmȩrȩ Da̧de quȩmȩde. Ado cja̧rȩmo̧rȩ Nepjatari quȩmȩde. Pio judiro̧mo̧i̧dirȩ. 26Ado Chipa jini̧, Dea ja̧ mu̧i̧tjoi̧ jini̧ ara̧ judiro̧, ja̧di quȩji̧ri̧dirȩ: Cja̧rȩmȩrȩ Ga quȩmȩde. Ado cja̧rȩmo̧rȩ Ache quȩmȩde. Pio judiro̧mo̧i̧dirȩ. Aja̧, Jacobo ja̧ u̧ri̧ judiro̧ pio judiro̧mo̧dirȩ. Padanarama quȩmȩräpȩ ara̧ oa cjia marëreji̧ri̧dirȩ.

Icha judi ja̧borëremȩde

27Ado Jacobo judi Mamare quȩmȩ bë ma̧ri̧räpȩ järëremȩde jibëa̧ ama̧i̧ Icha pio ju̧i̧ goëdepea̧ oa. Ado Mamare quȩmȩ bë ma̧ri̧ üdë peaja̧di Eboro̧ quȩmȩde. Araba quȩmȩde peaja̧di. 28Ado Icha judi, jabechji̧ 180 ui goamȩrȩ cjo̧ro̧rëremȩde. 29Ado ütama̧i̧ tjamo̧padäräa̧mȩrȩ ja̧boa̧de jȩoadëpe baga̧mȩrȩ. Ado ju̧i̧rea̧ ja̧ u̧ri̧ pio judiro̧, Echau judi, ado Jacobo pio judi na̧ra̧diro̧jo̧ȩ.

Currently Selected:

Taruparea̧ Ma̧ȩ 35: Pume

Highlight

Copy