Taruparea̧ Ma̧ȩ 39

Potipja ja̧ iei̧ pio jini̧ dae ja̧bo darëreyi̧nȩjȩ Joche ju̧i̧

1Ado Joche judi, jabechji̧ Ichamae pio judiri ja̧ji̧ri̧ pio ji̧ri̧ nö̧ta go̧düdärärëremȩde Ejitoräpȩ ju̧ri̧. Ado ja̧dëa ji̧ gatë tänȩrëreji̧ri̧diro̧jo̧ȩ Potipja quȩmȩ ju̧i̧, guadia ütë pio ju̧i̧, pjarao̧ ja̧ oa ja̧bepamȩ pio ju̧i̧. 2Ado Joche judi chjadëri̧ cjo̧ro̧rëremȩde Potipja ja̧ bëräpȩ ju̧ri̧. Jabechji̧ Jeova pio judi jȩa chjadëri̧ a̧doa̧ oaiä, jȩa chjadëri̧ jida̧ oaiä, jabechji̧ chjadëri̧ cjo̧ro̧rëremȩde jȩa gatëa̧mȩ ja̧ bëräpȩ ju̧ri̧. 3Ado Potipja judi jo̧rȩtamȩrȩ darëremȩdejȩ Joche ju̧i̧. ‘Aja̧, Jeova pio judi chjadëri̧ a̧dodiji̧da, ca̧ mu̧i̧tjoi̧ pio ju̧i̧ chjadëri̧ a̧dodiji̧da, ca̧ea̧ pio ju̧i̧ chjadëri̧ ja̧bepë yürürea̧mi̧ dari̧ a̧dodiji̧da’ quëna̧ jo̧rȩtamȩrȩ darëremȩdejȩ. 4Ja̧di tara ma̧ chiadëri̧ cjiamȩrȩ daea̧dejȩ chjadëri̧ ja̧bepamȩ oa. Ado pio ju̧i̧iä jibëa̧ mu̧i̧tjoi̧ tjamo̧ tänȩrëremȩdejȩ. Ado jibëa̧ bë tjamo̧ jidamȩ tänȩa̧dejȩ peaja̧di. Ado pio ju̧i̧iä Potipja ja̧ oa chjö̧na̧i̧ oa jidamȩpea̧de cjiadiädëri̧. 5Ado Potipja judi Joche ju̧i̧ bë tjamo̧ jidamȩ tänȩa̧ pio judiri yurori ja̧, jabechji̧ chjadëri̧ cjiadiäa̧ marëremȩ jibëa̧ üdë, Jeova pio judi tänȩa̧ oaiä. Jabechji̧ Ütë tjamo̧ judi chjadëri̧ japarëremȩdejȩ Potipja ju̧i̧ Joche pio ju̧i̧iä. Ado pio ju̧i̧iä judi goa̧ pio judi, jibëa̧ tjado üdë, jibëa̧ mu̧i̧tjoi̧ judiro̧, jibëa̧ pumȩ judiro̧, jabechji̧ chjadëri̧ cjiadiäa̧ marëremȩde Jeova pio judi tänȩa̧ oaiä. 6Ado pio ju̧i̧iä jibëa̧ chjö̧na̧i̧ oa jida tänȩrëremȩdejȩ Joche ju̧i̧ Potipja judi. ‘Jabechji̧ chjadëri̧ ja̧bepadida, chjadëri̧ jida madiji̧da, cüdë bücjüri̧ cjiarea̧mi̧dëri̧ ja̧bepamȩdida’ quëna̧ jo̧rȩta̧ oaiä, jabechji̧ ana̧ri̧ jo̧rȩtadë marëremȩde jibëa̧ pio ju̧i̧ chjiari. Jabechji̧ jënȩ jurapea̧ pio ju̧i̧mo̧i̧ jo̧rȩtarëremȩde ado judiri decjia.

Ado Joche judi, jabechji̧ üi̧ chacjiamȩrȩ cjo̧ro̧rëremȩde. 7Ado japamitë chjätä ëte Potipja ja̧ iei̧ pio jini̧ dae ja̧bo dae ja̧bo darëreyi̧nȩjȩ. Ado ja̧dëa̧ ji̧ ado cja̧rȩmo̧ doremȩrä, Joche pio ju̧i̧ gari̧patämi̧ cjiayi̧rȩ yo̧tea̧nȩjȩ:

—Goë jaecoe. Ëba mo̧a̧coe —yo̧a̧.

8Jabo Joche judi ëba mo̧a̧dëri̧ cjiamȩrȩ dëbë yo̧a̧dejȩ:

—Damȩ, pio mȩa ëbamȩ üi̧ pio judi coa jidamȩ tänȩa̧ oaiä, jabechji̧ ja̧bepamȩrȩ ja̧bepaquë jibëa̧ oa chjadëri̧ jidapea̧ oa, jënȩ bücjüri̧ cjiachea oa. 9Jabechji̧ pio cüdëquë bë tjamo̧ jidamȩ judi. Ado pio ju̧i̧iä tjamo̧ cjo̧ro̧mȩmi̧ dari̧ cjo̧ro̧quë ca̧ bëräpȩ cjo̧ro̧mȩmi̧ dari̧. Nȩmȩpadë madicoa na̧ üi̧ judi jabo chjadëri̧ ëba goa madicoa ütëbo oa. Pio mȩamo̧i̧ ëba goadëdicoa jibëa̧ iei̧ tara. Ado yaba̧, ¿yö̧ta japapea̧? ¿Ma̧i̧ da chjai̧dë pio ju̧i̧ japapea̧? ¿Ütë tjamo̧ pio ju̧i̧iäpȩmo̧ chjai̧dëri̧ japapea̧? Cjäri̧ madi. Ja̧di dari̧ japarea̧mi̧dëdi. Ado pio ju̧i̧iä jabechji̧ ëba mo̧a̧dëpacama̧ —yo̧mȩrȩ dëbë yo̧rëremȩdejȩ Potipja ja̧ iei̧ pio ji̧iäpȩmo̧ Joche judi.

10Jabo cjäri̧ manȩ, cjiadiädëa̧nȩ. Jabechji̧ Joche pio ju̧i̧ dae ano̧dëa̧nȩ. Ado ji̧dë mayi̧rȩ yo̧rëreyi̧nȩjȩ ëba mo̧a̧tä. Doti̧mi̧ garipea̧nȩjȩ. Jabo Joche judi dëbë gari̧padëri̧ cjiamȩrȩ gari̧padëa̧dejȩ. Jabechji̧ ëba mo̧a̧dëa̧dejȩ. Jabechji̧ pio ji̧ nö̧ta ëba cjiadiädëri̧ cjiamȩrȩ darëremȩdejȩ. 11Jabo ado cja̧rȩmo̧ doremȩrä Joche judi Potipja ja̧ jo̧räpȩ ja̧bepapea̧ oa yu̧a̧däräa̧rä, o judiro̧ jabë jana̧dëa̧rä, 12cjäri̧ manȩjȩ, Potipja ja̧ iei̧ pio jini̧ mitëa̧nȩjȩ jibëa̧ chjibo oa. Ado yo̧a̧nȩjȩ:

—Ëba mo̧a̧coe.

Jabo Joche judi dëbë yo̧dëmȩrȩ goae tarari̧ bagureno̧rëremȩde bëri pio judiri. Jibëa̧ chjibo pio ju̧i̧ a̧dë bagurëno̧a̧dejȩ. 13Ado Potipja ja̧ iei̧ jini̧, ‘Aja̧, jibëa̧ chjibo oa a̧dë bagureno̧a̧diji̧da, ca̧ ichirä mitëa̧ oa goacuni̧da’ quëna̧ jo̧rȩta̧rä, 14to̧bari̧ ëna̧diärëreyi̧nȩjȩrȩ jibëa̧ bëräpȩ ja̧bepaji̧ri̧ mu̧i̧tjoi̧ pio ji̧ri̧, pea ja̧bepera̧pea̧ji̧ri̧ pio ji̧ri̧. Ado yo̧a̧nȩjȩrȩ:

—Danȩrȩ, pio yi ja̧bepamȩ ebereo mu̧i̧tjoi̧ pio judi bë tjamo̧ jidamȩpea̧de ca̧ üi̧ pio judi tänȩa̧ oaiä. Jabo cjäri̧ madique, oëadëmȩrȩ yu̧a̧de ca̧ jo̧ tjoräpȩ. Ëba mo̧a̧tämi̧ cjiamȩrȩ japatea̧dique. Jabo cüdë goae tarari̧ ëna̧diäa̧ oaiä, 15jabechji̧ a̧dë bagureno̧a̧dique. Jabo danȩrȩ, jibëa̧ chjibo pio ju̧i̧ a̧dë bagureno̧a̧dejȩ —yo̧yi̧rȩ ma̧ȩ chjádë yürürëreyi̧nȩjȩrȩ jibëa̧ mu̧i̧tjoi̧ pio ji̧ri̧.

16Ado boearëreyi̧nȩjȩ Joche ja̧ chjibo oa Potipja pio judi ma̧na̧rä yuro. 17Ado ja̧dëa̧ ji̧ jibëa̧ mu̧i̧tjoi̧ pio ji̧ri̧ yo̧a̧mi̧ yo̧rëreyi̧nȩjȩ jibëa̧ üi̧ oa peaja̧di:

—Danȩ, ebereo üdë, mu̧i̧tjoi̧ pio judi oëadëmȩrȩ acji yu̧a̧tea̧dique cüdë cjo̧ro̧mȩräpȩ. Goaeri̧ ëba mo̧a̧tämi̧ cjiamȩrȩ acji yu̧a̧tea̧dique. 18Jabo cüdë goae tarari̧ ëna̧diäa̧ oaiä dairäpȩmo̧ bagureno̧a̧de. Jabo jibëa̧ chjiboremȩ pio ju̧i̧ a̧dë bagureno̧a̧dejȩ. 19Aja̧, ja̧di dari̧ japatea̧dique na̧ mu̧i̧tjoi̧ pio judi —yo̧yi̧rȩ yo̧rëreyi̧nȩjȩ ëbamȩ pio ju̧i̧, Joche pio ju̧i̧iäpȩmo̧ aeno̧yi̧rȩ.

20Ado jibëa̧ iei̧ pio ji̧iä ta̧rëa̧ oaiä Joche ja̧ ano̧mȩ pio judi ërecjia tjamo̧pe bagarëremȩdejȩ. Ado chjaodëri̧ mitëa̧dejȩ Joche ju̧i̧. Ado chaärea̧ bëräpȩ aeno̧tä yo̧a̧ oaiä, jabechji̧ chaärea̧ bëräpȩ aeno̧a̧ oa ano̧ mire cjo̧ro̧mȩpea̧de. Aja̧, pjarao̧ judi, Ejitoräpȩ cjo̧ro̧mȩ ütë pio judi chaä tänȩa̧ oa cjo̧ro̧rëreji̧ri̧ ja̧ bëräpȩ ju̧ri̧ cjo̧ro̧mȩpea̧de Joche judi. 21Jabo chaärea̧ bëräpȩ cjiamȩbo oa chjadëri̧ jidarëremȩdejȩ Jeova judi judi. A̧dë baädëa̧dejȩ jabo cjäri̧ri̧ cjia jo̧rȩtamȩrȩ darëremȩdejȩ. Ado pio judi tänȩa̧ oaiä, jabechji̧ chaärea̧ bë tjamo̧ jidamȩ pio judiborë cjäri̧ri̧ cjia darëremȩdejȩ. 22Ado pio ju̧i̧iä jabechji̧, mu̧i̧tjoi̧ tjamo̧ tänȩrëremȩdejȩ Joche pio ju̧i̧. Aja̧, chaäa̧ oa cjiarëreji̧ri̧ ütëbo oa tjamo̧ jidamȩpea̧dejȩrȩ. Peaja̧di tjamo̧ yo̧mȩpea̧de. Ado pio ju̧i̧iä Joche ja̧ ma̧ȩrämo̧ ja̧beparëreji̧ri̧dirȩ chaäa̧ oa cjo̧ro̧rëreji̧ri̧ pio judiro̧. 23Ado Joche judi a̧dë chjäte chjadëri̧ ja̧bepë yürüa̧ oaiä, 'jabechji̧ oëra̧ ja̧bepamȩ jirodida' quëna̧ dadërëremȩdejȩ chaärea̧ bë tjamo̧ jidamȩ judi. ‘Aja̧, Joche judi ja̧bepea̧ pio ju̧i̧ irä ütarë datäremȩcuni̧da, oëra̧ japa jirodida, cüdë yo̧a̧mi̧ japadë jirodida’ quëna̧ jo̧rȩtamȩrȩ dadëa̧dejȩ. Jabechji̧ Jeova pio judi chjadëri̧ a̧doa̧ oaiä, chjadë maeari̧ cjiadiärëremȩde Jocherë ja̧bepea̧ üdë. Ja̧di dari̧ ja̧beparëremȩde.

Currently Selected:

Taruparea̧ Ma̧ȩ 39: Pume

Highlight

Copy