Taruparea̧ Ma̧ȩ 29

Jacobo judi go̧düdärärëremȩde Ara̧ quȩmȩ chiriräpȩ

1Ado Jacobo judi dorë cjitëmȩräpȩmo̧ baämȩrȩ baärëremȩde do ji̧ra̧ri̧. Ado japamitë ana̧ chjätä ëte go̧düdärärëremȩde pio judiro̧ cjo̧ro̧mȩ chiriräpȩ, Aba̧ ja̧ pumȩ judiro̧ cjo̧ro̧mȩräpȩ. 2Ado chiri ana̧rä yu̧a̧mȩrȩ darëremȩdejȩ tade puë oa. Peaja̧di tjarari̧ buba oa daea̧dejȩrȩ oveja ji̧ri̧, china̧ cjiaji̧ri̧ oa. Oveja judiro̧ jaramȩ tade puë quȩriräpȩ china̧ cjiaji̧ri̧ oa daea̧dejȩrȩ. Ado tade puë ya üdë tuti cara̧ oa cjiarëremȩde ta̧dë chachara̧ pio ju̧ri̧ra̧. 3Jabechji̧ tuti cara̧ oa cjiarëremȩde oveja jidaji̧ri̧ pio judiro̧ jabë are iëdëa̧ oaiä. Doti̧mi̧ are iërëreji̧ri̧diro̧jo̧ȩ jibëa̧ oveja judiro̧ jarapea̧ oa. Jibëa̧ oveja buba oa doti̧mi̧ a̧dope chjaorërea̧ ji̧, jabechji̧ are iëa̧diro̧jo̧ȩ ui yürüpea̧ oa. Ado oveja judiro̧ jara̧ duri oa ado chjereno̧ tuti cara̧diro̧jo̧ȩ.

4Ado Jacobo judi, oveja jidaji̧ri̧ pio ji̧ri̧ damȩrȩ iëno̧ë ta̧rëa̧dejȩrȩ:

—¿Yudiriji̧ri̧nȩrȩ ca̧ oti̧?

Ado judiro̧ dëbë yo̧a̧diro̧jo̧ȩ:

—Yidiriji̧ri̧dërea̧rȩ, jabechji̧ Ara̧ quȩmȩ bë ma̧ri̧räpȩ cjo̧ro̧ji̧ri̧rea̧rȩ —dëbë yo̧a̧diro̧jo̧ȩ.

5Ado yo̧a̧dejȩrȩ Jacobo judi:

—Nacoro quȩmȩ ju̧i̧ ja̧ jojada oa, Aba̧ quȩmȩ oa ¿dabadërenȩro̧jo̧ȩ?

—Dëdë, dabarea̧ro̧jo̧ȩ —dëbë yo̧a̧diro̧jo̧ȩ.

6—¿Jabëde? ¿Chjari̧ dopade? —iëno̧ë ta̧rëa̧dejȩrȩ.

—Aja̧, Aba̧ judi jabëde. Chjari̧ dopade —yo̧a̧diro̧jo̧ȩ.

Ja̧dëa ji̧ oveja jidaji̧ri̧ judiro̧ Aba̧ jojabi i̧a daji̧ri̧rȩ yo̧a̧diro̧jo̧ȩ Jacobo ju̧i̧:

—Danȩ, pio ju̧i̧ ja̧ jabi jini̧ pio ju̧ri̧pȩnȩ. Jäja ja̧ oveja buba oa ma̧ȩ ma̧na̧nȩjȩrȩ. Aba̧ ja̧ jabi pio jini̧nȩ. Raque quȩyi̧nȩ jini̧ —yo̧a̧diro̧jo̧ȩ.

7Ja̧dëa ji̧ Jacobo judi yo̧a̧dejȩrȩ oveja pio ji̧ri̧ chjiari:

—Jabo danȩrȩ, jabë uëdiibe do üdë. Oveja judiro̧ jabë cö̧area̧mi̧dëdirȩ. ¿Tjana̧pea̧ ji̧ ui oa yürüdërenȩro̧jȩrȩ? Jabë pjärämȩ tara, ado chjereno̧ are goë chjadütäreji̧ri̧nȩro̧jȩrȩ chjadëri̧ jurariä tai̧pea̧ oa chiriräpȩ. Jabechji̧ ui oa jara ëte ado chjereno̧ ma̧ȩ jätäreji̧ri̧renȩro̧jȩrȩ cärä chjadëräpȩmo̧ —yo̧tea̧dejȩrȩ.

8Jabo dëbë yo̧ji̧ri̧rȩ yo̧a̧diro̧jo̧ȩ:

—Cjäri marea̧rȩ, ja̧di dari̧ japadërea̧rȩ. Jabechji̧ pio yi jidatarea̧rȩ oveja judiro̧ ütëborë ma̧na̧rä yuro. Ado ja̧dëa ji̧ oveja jidaji̧ri̧ ütëborë jibëa̧ oveja oa ma̧ȩ ma̧na̧na̧ra̧rä, jabechji̧ ji̧mo̧ are goërea̧ro̧jo̧ȩ ta̧dë chacha oa ui oa yürüpea̧ oa oveja ji̧ri̧iäpȩmo̧. Aja̧, ja̧di dari̧ japarea̧rȩ a̧ro̧rȩ —yo̧ji̧ri̧rȩ dëbë yo̧a̧diro̧jo̧ȩ Jacobo ju̧i̧.

9Ado Jacobo judi oveja jidaji̧ri̧ pio ji̧ri̧ nö̧ta ni̧bä chjaoa̧ nö̧ta, Raque jini̧ ma̧ȩ ma̧na̧na̧ra̧nȩjȩrȩ jäja ja̧ oveja ji̧ri̧. Pio jini̧reyi̧nȩ oveja jidayi̧ jini̧. 10Ado Jacobo judi jojade ja̧ jabi pio ji̧ daea̧ ji̧, jäja ja̧ oveja jidayi̧ i̧a daea̧ ji̧, chjaodëri̧ are goëno̧a̧dejȩ ta̧dë oa pio ji̧ ja̧ oveja judiro̧ chjadëri̧ jarapea̧ oa. 11Ji̧dë duri oa ma̧ chiadëri̧ cjia tjamo̧mȩrȩ ya ibueno̧a̧dejȩ Raque ji̧. Ado jadi dari̧ japa ëte ejaro cjiapea̧de ma̧ chiadëri̧ cjia tjamo̧mȩrȩ. 12Ado ejaro cjia ëte ni̧bä chjaoa̧dejȩ. "Damȩ, na̧ jaeiei̧ pio ji̧ ja̧ jaquë cüdë. Rebeca quȩyi̧ pio ji̧ ja̧ jaquë. Ado na̧ jademai̧ pio ju̧i̧ ja̧ jaquë" yo̧mȩrȩ yo̧rëremȩdejȩ. Pio ju̧i̧ ta̧rëyi̧rȩ bagurëno̧rëreyi̧nȩ Raque jini̧ jäja pio ju̧i̧ yo̧pea̧ oa.

13Ado Aba̧ judi ja̧ oyi̧ pio ji̧ ja̧ ja pio ju̧i̧ chjiari ta̧rëa̧ oaiä, Jacobo pio ju̧i̧ chjiari ta̧rëa̧ oaiä, jäe daea̧dejȩ jo̧ȩra̧pe. Ado pio ju̧i̧ jäe damȩrȩ ida̧dejȩ. Ya i̧bua̧dejȩ ma̧ chiadëri̧ cjiamȩrȩ. Ado ëba baäeno̧a̧dejȩ jibëa̧ bëräpȩ. Ja̧dëa ji̧ Jacobo judi ni̧bä chjaoa̧dejȩ. Jënȩ cjo̧ro̧a̧ ju̧i̧ chjiari, jënȩ jana̧ pio ju̧i̧ chjiari ni̧bä chjaorëremȩdejȩ.

14Ado Aba̧ judi yo̧a̧dejȩ Jacobo ju̧i̧:

—Aja̧, ca̧ pumȩ tjamo̧renȩ —yo̧a̧dejȩ.

Ado Jacobo judi Aba̧ pio ju̧i̧ nö̧ta cjo̧ro̧mȩpea̧de.

Jacobo judi ja̧beparëremȩde jibëa̧ ivi ji̧ri̧ gatëpea̧ oa

15Ado cja̧rȩmȩ gupënȩ üdë chjätä ëte ado cja̧rȩmo̧ doremȩrä, Aba̧ pio judi yo̧rëremȩdejȩ Jacobo ju̧i̧:

—Danȩ, badëri̧ ja̧bepadëparenȩ ca̧ea̧ oa. Ca̧ea̧ pumȩborë, jabechji̧ badëri̧ ja̧beparea̧mi̧dërenȩ. Chjadëri̧ yo̧tä earequedemȩ. Danȩ, ¿napai̧ ba ano̧tä earenȩque? Chjadëri̧ yo̧coe —yo̧a̧dejȩ Jacobo ju̧i̧ jojade pio judi.

16Ado Aba̧ judi yo̧a̧ri̧ jabi ëbarëremȩde. Yaboyi̧ jini̧ Dea quȩyi̧nȩ. Ado duriyi̧ jini̧, Raque quȩyi̧nȩ. 17Dea quȩyi̧ jini̧ chamacho chjacjiayi̧ tjamo̧dërëreyi̧nȩ, jabo Raque jini̧ chjacjiayi̧ tjamo̧rëreyi̧nȩ icjara nö̧tai̧ oa, chamachobo. 18Ado Jacobo judi Raque pio ji̧ dae ja̧bo dae ja̧bo daea̧ oaiä, dëbë yo̧a̧dejȩ jibëa̧ jademai̧ ju̧i̧:

—Napai̧ ba ano̧tä eadë, jabechji̧ na̧ jabi duriyi̧ pio ji̧, Raque quȩyi̧ pio ji̧ ëbatämi̧ cjiamȩrȩ ja̧bepë yürüparequedemȩ ca̧i̧ta̧ra̧ ichiri yo̧a̧ri̧ ui. Na̧ jabi pio ji̧ yürütä earequedemȩ cüdë ja̧bepea̧ ba oa —yo̧a̧dejȩ.

19Ado Aba̧ judi dëbë yo̧mȩrȩ yo̧a̧dejȩ:

—Danȩ, Raque jini̧ pio mȩa ëbarä judi ji̧dë u̧i̧ chjadëtäremȩde, ado cja̧rȩmo̧rȩ bae mitëchea oa. Aja̧, jabechji̧de. Pio coadi cjiadiävä. Pio ji̧ yürüparequedemȩ mȩnȩ coa ca̧i̧ta̧ra̧ ichiri yo̧a̧ri̧ ui oa ja̧bepë yürüa̧ duri oa —yo̧mȩrȩ dëbë yo̧rëremȩdejȩ Jacobo ju̧i̧.

20Ja̧di tara Jacobo judi ja̧bepamȩpea̧de jojade ja̧ oa. Ca̧i̧ta̧ra̧ ichiri yo̧a̧ri̧ ui ja̧bepë yürürëremȩdejȩ. Jabo Raque pio ji̧ ea tjamo̧ tara, jibëa̧ iei̧payi̧ pio ji̧ ana̧ri̧ jo̧rȩta tara, jabechji̧ chjaodëri̧ chjäteno̧rëremȩde pio jiro japamitë üdë. 21Ja̧dëa ji̧ ca̧i̧ta̧ra̧ ichiri yo̧a̧ri̧ ui chjätäa̧ ji̧, Jacobo judi yo̧rëremȩdejȩ Aba̧ ju̧i̧:

—Danȩ, yürücoe ca̧ iei̧ ji̧ cüdë ji̧ ëbatä. Jabechji̧ chjätäa̧de davä cüdë mȩa yo̧a̧rea̧ japamitë üdë. Cüdë mȩa ja̧bepë yürüpea̧ japamitë üdë chjätäa̧de. Ado pio ju̧i̧iä jabechji̧, chjadëri̧ yürüji̧coe —yo̧mȩrȩ yo̧a̧dejȩ Jacobo judi Aba̧ ju̧i̧.

22Ja̧dëa ji̧ Aba̧ judi ëna̧diärëremȩdejȩrȩ jibëa̧ pumȩ ji̧ri̧ chjadëri̧ a̧dopapea̧ oa. Ado a̧dopaji̧ri̧pea̧dirȩ. Ado ja̧dëa ji̧ chjadëri̧ ëba jura̧dejȩrȩ. Jibëa̧ jabi jini̧ üi̧ ëbapea̧ oaiä, jabechji̧ ji̧mo̧ a̧doparëreji̧ri̧dirȩ ai̧ri̧ cjia ai̧ri̧ cjiaji̧ri̧rȩ. 23Ja̧dëa ji̧ gȩnȩpea̧rä, Aba̧ judi yürürëremȩdejȩ jojabi ji̧ Jacobo pio ju̧i̧iäpȩmo̧. Jabo cjäri̧ madejȩ, duriyi̧ pio ji̧ yürütärea̧ ji̧, yaboyi̧ pio ji̧ ano̧ mire yürüa̧dejȩ. Raquë pio ji̧ yürüdëa̧dejȩ jabo Dea quȩyi̧ pio ji̧ ano̧ mire yürüa̧dejȩ. Ado ëba mo̧a̧dirȩ. Ado gȩnȩpea̧ oaiä, jabechji̧ Jacobo judi, 'Aja̧, Dea pio jini̧ni̧da' quëna̧dëmȩrȩ ëba mo̧a̧rëremȩdejȩ.

24Ado Dea jini̧ jibëa̧ mu̧i̧tjoi̧ pio ji̧ ebadëchea oa, jabechji̧ jäja judi yürürëremȩdejȩ Dea ji̧iäpȩmo̧. Aja̧, Chipa quȩyi̧ pio ji̧ yürüa̧dejȩ Aba̧ judi Dea pio ji̧ chjadëri̧ ja̧bepë yürüpea̧ oa.

25Ja̧dëa ji̧ Jacobo judi peadai̧rä bëdüa̧ ji̧, 'Jabo cjäri̧ mani̧da, Raquedëni̧da, ado cja̧rȩmo̧ni̧da, Dea pio jini̧ni̧da, yaboyi̧ pio ji̧ nö̧ta ëba mo̧a̧quëda' quëna̧ jo̧rȩtamȩrȩ ana̧ri̧ jo̧rȩtamȩpea̧de. Ado Aba̧ pio ju̧i̧iäpȩ jämȩrȩ to̧bari̧ yo̧ë ta̧rërëremȩdejȩ jibëa̧ ja̧ȩtȩ oa:

—Jabo cjäri̧ marenȩque, ¿tjana̧ japea̧renȩque? Cüdë chjadëri̧ ja̧bepë yürüa̧requedemȩ Raque pio ji̧ ëbapea̧ oa, jabo u̧i̧pea̧renȩque. ¿Tjana̧pea̧ ju̧i̧ u̧i̧pea̧renȩque? —yo̧mȩrȩ iëno̧ë ta̧rëa̧dejȩ, ana̧ri̧ jo̧rȩtamȩrȩ.

26Ado Aba̧ judi dëbë yo̧mȩrȩ yo̧a̧dejȩ:

—Jabo cjäri̧ marea̧rȩ, ja̧di dari̧ cjo̧ro̧dërea̧rȩ pio yoaiä —yo̧a̧dejȩ—. Pio yoa chiri oa tjaoëpai̧ dari̧ cjo̧ro̧rea̧rȩ. Danȩ, duriyi̧ pio jini̧ yabo ëbarea̧mi̧dënȩ. Yaboyi̧ pio jini̧nȩ yabo ëbapea̧ jini̧. Ja̧di dari̧ cjo̧ro̧rea̧rȩ a̧ro̧rȩ. 27Jabo danȩ, a̧ro̧rȩ pio yi airi̧ cjia airi̧ cjia a̧dope cjia̧ oaiä, jabechji̧ chjadëri̧ ëba a̧dope chjaoibe Dea pio ji̧iä. Jabechji̧ cja̧rȩmȩ chemana codë oa a̧dope chjaoparea̧rȩ ca̧ jabi yaboyi̧ pio jini̧ ëba̧ oaiä. Aja̧ ja̧dëa ji̧ cja̧rȩmȩ chemana chjätä ëte, peaja̧di yürüparequedemȩ ca̧ jabi duriyi̧ pio ji̧ mȩnȩ pio ji̧bo ëbapea̧ oa. Jabo danȩ, peaja̧dimi̧ banȩ. Ado pio ju̧i̧iä, jabechji̧ ca̧i̧ta̧ra̧ ichiri yo̧a̧ri̧ ui oa ja̧bepë yürüpea̧ chiarenȩque pio ji̧ ëba̧ ba oa —yo̧mȩrȩ yo̧rëremȩdejȩ Jacobo ju̧i̧ joja̧ȩtȩ judi.

28Ado ja̧di dari̧ japarëremȩde Jacobo judi. Cja̧rȩmȩ chemana codë nö̧ta oa ëba a̧doparëremȩdejȩrȩ airi̧ cjia airi̧ cjia a̧dopaji̧ri̧ oa. Ado a̧dopadärä ëte Aba̧ judi a̧de yürürëremȩdejȩ jojabi duriyi̧ pio ji̧. Aja̧, Raque quȩyi̧ pio ji̧ a̧de yürüa̧dejȩ. 29Ado Raque jini̧ jibëa̧ mu̧i̧tjoi̧ ji̧ ëbadëchea oa, peaja̧di yürürëremȩdejȩ jäja judi Bija quȩyi̧ ji̧. Jabechji̧ jojabi pio ji̧ chjadëri̧ ja̧bepë yürüpea̧ oa yürüa̧dejȩ. 30Ado Jacobo judi ëba mo̧a̧rëremȩdejȩ Raque ji̧. Ea tjamo̧rëremȩdejȩ. Ji̧dë u̧i̧ earëremȩdejȩ Dea pio ji̧iä. Ado Raque pio ji̧ ëba̧ ba oa, jabechji̧ ja̧bepë yürürëremȩde Jacobo judi ca̧i̧ta̧ra̧ ichiri yo̧a̧ri̧ ui nö̧ta joja̧ȩtȩ ja̧ oa. Ja̧di dari̧ japarëremȩde.

Jacobo ja̧ u̧ri̧ judiro̧ ji̧ra̧pe järëreji̧ri̧dirȩ.

31Ado Jacobo judi jibëa̧ iei̧ yaboyi̧ pio ji̧ chjadëri̧ dadëa̧ ji̧, jabo badë badë damȩ oa daea̧ ji̧, jabechji̧ daba darëremȩdejȩ Jeova judi. Ado pio ju̧i̧iämȩrȩ bori̧ ji̧ra̧ri̧ ararea̧ yürürëremȩdejȩ Dea pio ji̧, Jacobo judi eadëa̧ iei̧ pio ji̧. Jabo Raque ji̧ bomairea̧mi̧dëri̧ cjo̧ro̧ tänȩrëremȩdejȩ. 32Ado Dea jini̧ bomaiyi̧rȩ ararëreyi̧nȩjȩ joja oa. Ja̧dëa̧ ji̧ ara ëte yo̧anȩ, "Aja̧, odëri̧ cjiayi̧ i̧a daba daea̧dique Ano̧mȩ judi. Jabo yaba̧ joja oa ëba ara̧ oaiä, jabechji̧ eapadique ca̧ üi̧ judi" yo̧yi̧rȩ yo̧rëreyi̧nȩ. Ja̧di tara Rubȩ quȩra̧ pio ju̧ri̧ra̧ quȩparëreyi̧nȩjȩ. Aja̧, "Daba daea̧dique odëri̧ cjiayi̧ ji̧" yo̧mȩ quȩra̧ pio ju̧ri̧ra̧ quȩpea̧nȩjȩ.

33Ja̧dëa ji̧ ji̧dë duri oa japamitë chjätä ëte, ado ara̧nȩ Dea jini̧. Ado cja̧rȩmo̧ üi̧ boi̧ oa ararëreyi̧nȩjȩ. Ja̧dëa̧ ju̧i̧ ara ëte yo̧rëreyi̧nȩ, "'Badë badë dadejȩ' yo̧a̧ oa ta̧rëa̧ jirode Jeova judi. Ado pio ju̧i̧iä a̧de yürüa̧dicoe ado cja̧rȩmo̧ boi̧chji̧ oa" yo̧yi̧rȩ yo̧rëreyi̧nȩ. Ja̧di tara Chimeo̧ quȩra̧ pio ju̧ri̧ra̧ quȩparëreyi̧nȩjȩ joja oa. "Ta̧rëa̧" yo̧mȩ quȩra̧ pio ju̧ri̧ra̧ quȩpea̧nȩjȩ. 34Ado japa mitë chjätä ëte ado ara̧nȩ Dea jini̧. Ado ara̧nȩjȩ üi̧ boi̧ oa. Ja̧dea̧ ju̧i̧ ara ëte, yo̧rëreyi̧nȩ, "Aja̧, yaba̧ ji̧dë u̧i̧ jo̧rȩtapadique ca̧ üi̧ judi cüdë tjarari̧ ja oa ëba ara̧ tara" yo̧yi̧rȩ yo̧a̧nȩ. Jadi tara Devi quȩra̧ pio ju̧ri̧ra̧ quȩparëreyi̧nȩjȩ Dea jini̧. Aja̧, "Jo̧rȩta" yo̧mȩ quȩra̧ pio ju̧ri̧ra̧ quȩpea̧nȩjȩ.

35Ja̧dëa̧ ji̧ ji̧dë duri oa ado ara̧nȩ Dea jini̧. Ado cja̧rȩmo̧ üi̧ boi̧ oa ararëreyi̧nȩjȩ. Ado joja oa ara ëte, yo̧rëreyi̧nȩ: "Ado ararea̧ yürüa̧ tara chjacjiamȩri̧ ni̧bäpareconȩ Jeova pio ju̧i̧" yo̧yi̧rȩ yo̧a̧nȩ. Ja̧di tara Juda quȩra̧ pio ju̧ri̧ra̧ quȩpea̧nȩjȩ joja oa. Aja̧, "Ütë tjamo̧ pio judi chjacjiamȩri̧ ni̧bäpea̧de" yo̧mȩ quȩra̧ pio ju̧ri̧ra̧ quȩpea̧nȩjȩ. Ado judiri aradëa̧nȩ Dea jini̧. Jabechji̧ cjiadiärëreyi̧nȩ, jabo bucho ana̧ ara ano̧dëa̧nȩ jabo.

Currently Selected:

Taruparea̧ Ma̧ȩ 29: Pume

Highlight

Copy